Ko Hai ʻa Ponitō Pailato?

“ʻI HE paetakú, ʻoku hoko ʻa Pailato lotolotoua ko ha tokotaha tefito fakahisitōlia ʻa ia ʻoku hokohoko atu ʻene nofoʻia ʻi heʻetau fakakaukaú. ʻOku vakai e niʻihi ki ai ko ha sangato, ki he niʻihi kehé ko ha fakasino ia ʻo e ngaahi vaivaiʻanga fakaetangatá, ko ha tokotaha politiki faʻifaʻitakiʻanga haohaoa ia naʻe loto-lelei ke feilaulauʻi ha tangata ʻe toko taha koeʻuhi ke tauhi ʻa e tuʻunga tuʻumaʻú.”—Pontius Pilate, ʻa Ann Wroe.

Pe ʻokú ke kau ʻi ha taha ʻo e ngaahi fakakaukau ko iá pe ʻikai, naʻe maʻu ʻe Ponitō Pailato ha hingoa ongoongoa koeʻuhi ko e anga ʻo ʻene tōʻongafai kia Sīsū Kalaisí. Ko hai ʻa Pailato? Ko e hā ʻoku ʻiloʻi fekauʻaki mo iá? Ko hano mahinoʻi lelei ange ʻa hono tuʻungá ʻe fakalahi ai ʻetau mahinoʻi ʻa e ngaahi meʻa mahuʻinga taha naʻe faifai ange pea hoko ʻi he māmaní.

Tuʻungá, Ngaahi Fatongiá mo e Mafaí

Ko ʻEmipola Taipiliō ʻo Lomá naʻá ne fakanofo ʻa Pailato ko e kōvana ʻo e vahefonua Siuteá ʻi he 26 T.S. Ko e kau ʻōfisa māʻolunga peheé ko e kau tangata ia naʻe taku ko e kalasi fakakautau​—ko e tuʻunga nōpele māʻulalo ange, ʻo kehe mei he kau māʻolunga ʻo e tuʻunga sēnatú. ʻOku ngalingali naʻe kau ʻa Pailato ʻi he kau taú ʻi he tuʻunga ko ha ʻōfisa fakakautau Loma; pe ʻeiki-tau māʻulalo, ʻa ia naʻá ne mahiki hake ki he ngaahi tuʻunga kehekehe lolotonga ʻa e ngaahi fononga hokohoko ʻi he fatongiá; pea naʻe fakanofo kōvana ia ki muʻa ke ne taʻu 30.

ʻI heʻene tui teungá, naʻe pau ke tui ʻe Pailato ha teunga leta mo e kofu tau mētale. Ko hono teunga fakapuleʻangá ko ha kofu tuʻa hinehina naʻe tapa vāleti. Naʻe pau naʻá ne ʻulu nonou pea tele maʻa hono kavá. Neongo ʻoku tui ʻa e niʻihi naʻá ne haʻu mei Sipeini, ʻoku fakahuʻunga ʻi hono hingoá naʻá ne kau ki he haʻa ʻo e kau Ponitií​—ko e kau nōpele Seminaite mei he fakatonga ʻo ʻĪtalí.

Ko e kau ʻōfisa māʻolunga ʻo e tuʻunga ʻo Pailató naʻe faʻa fekauʻi kinautolu ki he ngaahi feituʻu anga-fakapāpeliané. Naʻe vakai ʻa e kau Lomá ko ha feituʻu pehē ʻa Siutea. Tānaki atu ki hono tauhi maʻu ʻo e tuʻunga māú, naʻe tokangaʻi ʻe Pailato ʻa e tānaki ʻo e ngaahi tukuhau taʻefakahangatonú mo e tukuhau paú. Ko hono fakahoko fakaʻaho ʻa e ngāue ʻo e fakamaau totonú naʻe ʻi he mafai ia ʻo e ngaahi fakamaauʻanga faka-Siú, ka ko e ngaahi keisi naʻe fiemaʻu ai ʻa e tautea maté ʻoku hā mahino naʻe ʻave ia ki he kōvaná, ʻa ia ko e mafai fakaefakamaau māʻolungá ia.

ʻI he ʻi ai ʻene kau ngāue tokosiʻi ʻo e kau sikalaipe, ngaahi kaungāmeʻa mo e kau talafekaú, naʻe nofo ʻa Pailato mo hono uaifí ʻi he kolo taulanga ko Sesaliá. Naʻe puleʻi ʻe Pailato ʻa e kongakau ʻe nima ʻo e kau sōtia Loma ʻalu laló, naʻe mei he kau tangata ʻe toko 500 ki he 1,000 ʻa e kongakau taki taha pea pehē ki he kau tau heka hoosi ʻoku ngalingali naʻe kau ki ai ʻa e toko 500. Naʻe toutou tautea mate ʻe heʻene kau sōtiá ʻa e kau maumau-laó. ʻI he taimi melinó, naʻe fakahoko ai ʻa e tauteá ʻo ʻikai fai ha fakamaau ʻi he tuʻunga kakato, ka ʻi he lolotonga ʻo ha fakafepakí, naʻe tāmateʻi ʻa e kau angatuʻú ʻi he taimi pē ko iá pea naʻe ʻi he tuʻunga fakatokolahi. Ko e fakatātaá, naʻe tautea mate ʻe he kau Lomá ʻa e kau pōpula ʻe toko 6,000 ke fakavaivaiʻi ʻaki ʻa e angatuʻu  naʻe taki ʻe Sipatakasí. Kapau naʻe maluʻaki ha faingataʻa ʻi Siutea, naʻe anga-maheniʻaki ʻa e lava ki he kōvaná ke hanga ki he ʻeiki-tau ʻa e ʻemipolá ʻi Sīliá, ʻa ia naʻá ne puleʻi ʻa e ngaahi kongakaú. Kae kehe, lolotonga ʻa e vahaʻa taimi pule ʻo Pailató, naʻe ʻikai ke ʻi ai ʻa e ʻeiki-taú, pea naʻe pau ai ke fakangata fakavavevave ʻe Pailato ʻa e ngaahi moveuveú.

Naʻe fetuʻutaki maʻu pē ʻa e kau kōvaná mo e ʻemipolá. Ko e ngaahi meʻa naʻe kau ki hono ngeiá pe ko ha ngaahi fakamanamana pē ki he tuʻunga mafai ʻo Lomá naʻe fiemaʻu ke līpooti ia pea naʻe iku ai ki he ngaahi tuʻutuʻuni ʻa e ʻemipolá. Naʻe hohaʻa nai ha kōvana ke ʻoange ki he ʻemipolá ʻa ʻene fakamatala tonu ki he ngaahi meʻa ʻi hono vahefonuá ki muʻa ke lava ʻo lāunga ʻa e niʻihi kehé. ʻI he tupulaki ʻa e faingataʻá ʻi Siuteá, naʻe mafatukituki moʻoni kia Pailato ʻa e kaunga ʻo e ngaahi meʻa peheé.

Tuku kehe ʻa e ngaahi fakamatala Kōsipelí, ko e ongo faihisitōlia ko Feleiviasi Siosifasi mo Filó ʻa e ongo maʻuʻanga tefito ki he fakamatala kia Pailató. Ko e faihisitōlia Loma ko Tasitusí naʻá ne toe pehē foki naʻe tauteaʻi ʻe Pailato ʻa Kilisitō, ʻa ia naʻe maʻu mei ai ʻe he kau Kalisitiané ʻa honau hingoá.

Fakalanga e ʻIta ʻa e Kau Siú

ʻOku pehē ʻe Siosifasi ʻi he fakakaukau ki he loto-filingaua ʻa e kau Siú ʻi hono ngaohi ʻo e ngaahi ʻīmisí, naʻe taʻofi ai ʻe he kau kōvana Lomá ʻa hono ʻave ki Selusalema ʻa e ngaahi fuka fakakautau ʻoku hā ai ʻa e ngaahi ʻīmisi ʻiloa ʻo e ʻemipolá. Koeʻuhi naʻe ʻikai fakahāhā ʻe Pailato ha fakangatangata pehē, naʻe fakavavevave ai ʻa e kau Siu ʻitá ki Sesalia ke lāunga. Naʻe ʻikai fai ʻe Pailato ha meʻa ʻi he ʻaho ʻe nima. ʻI he ʻaho hono onó, naʻá ne fekauʻi ai ʻene kau sōtiá ke nau ʻātakaiʻi ʻa e kau fakafepakí pea fakamanamana ke tāmateʻi kinautolu kapau naʻe ʻikai te nau movete. ʻI he taimi naʻe pehē ai ʻe he kau Siú ʻe lelei ange kiate kinautolu ke nau mate ʻi he sio ki hono tauhi halaʻi ʻenau Laó, naʻe fakavaivai ai ʻa Pailato peá ne fekauʻi ke fakamavaheʻi ʻa e ngaahi ʻīmisí.

Naʻe malava ʻe Pailato ke ngāueʻaki ʻa e mālohí. ʻI ha meʻa naʻe hoko ʻa ia naʻe lēkooti ʻe Siosifasi, naʻe kamata ngāue ʻa e ʻōfisa māʻolungá ni ki ha fakatafenga vai ke ʻomi ai ʻa e vaí ki Selusalema pea naʻá ne ngāueʻaki ʻa e paʻanga mei he tauhiʻanga koloa ʻi he temipalé ke fakapaʻangaʻaki ʻa e ngāué. Naʻe ʻikai ke tafoki pē ʻa Pailato ʻo faʻao ʻa e paʻangá, he naʻá ne ʻiloʻi ko e faʻao fakamālohi mei he temipalé ko ha taʻefakaʻapaʻapa ia ki he meʻa toputapú pea ʻe mei fakatupunga ai ʻa e kau Siu ʻitá ke nau kole kia Taipiliō ke tuli ia. Ko ia ʻoku hā ngalingali naʻe maʻu ʻe Pailato ʻa e tokoni fāitaha ʻa e kau maʻu mafai ʻi he temipalé. Ko e paʻanga fakatapui naʻe ui ko e “kōpanó,” naʻe lava ke hoko ʻo ngāueʻaki totonu ia ki he ngaahi ngāue maʻá e kakaí ke ʻaonga ki he koló. Ka naʻe fakatahataha ʻa e laui afe ʻo e kau Siú ke fakahaaʻi ʻa ʻenau ʻitá.

Naʻe ʻai ʻe Pailato ha ngaahi kongakau ke nau fefaʻuhi mo e fuʻu kakaí pea tuʻutuʻuni ke ʻoua ʻe ngāueʻaki ʻa e heletaá ka ke haha ʻa e kau fakafepakí ʻaki ʻa e ngaahi fuʻu vaʻakau. ʻOku hangehangē naʻá ne loto ke mapuleʻi ʻa e fuʻu kakai ʻitá ʻo ʻikai fakalanga ai ha tāmate tavale. ʻOku hā ngali naʻe hoko ʻa e meʻa naʻe fiemaʻú, neongo naʻe mate ʻa e niʻihi. Ko e faʻahinga pau ne nau līpooti kia Sīsū ʻo pehē naʻe felīngiaki ʻe Pailato ʻa e toto ʻo e kau Kālelí fakataha mo ʻenau ngaahi feilaulaú ko e lave nai ia ki he meʻa ko ʻeni naʻe hokó.​—Luke 13:1.

“Ko e Ha Tū ʻa e Moʻoni?”

Ko e meʻa ʻokú ne ʻai ʻa Pailato ke ne ʻiloa ʻi he meʻa ʻoku koví ko ʻene fakatotoloʻi ko ia ʻa e ngaahi tukuakiʻi naʻe fai ʻe he kau taulaʻeiki lahí pea mo e kau tangata matuʻotuʻa angé ʻo pehē naʻe fakahāhā atu ʻe Sīsū ʻa ia tonu ko ha Tuʻi. ʻI he fanongo ki he fekau naʻe tuku kia Sīsū ke fakahaaʻi ʻa e moʻoní, naʻe sio ai ʻa Pailato naʻe ʻikai ʻomai ʻe he tokotaha pōpulá ia ha fakamanamana ki Loma. “Ko e ha tū ʻa e moʻoni?” ko ʻene ʻeké ia, ʻi heʻene fakakaukau hā mahino ko e moʻoní ko ha foʻi lea ia naʻe fuʻu faingataʻa ke mahinoʻi ke tuha ai ke fai ha tokanga ki ai. Ko e hā ʻene fakamulitukú? “ʻOku ʻikai te u ʻilo ha hala ʻi he tangata ni.”​—Sione 18:​37, 38; Luke 23:4.

 Naʻe totonu ko ʻene ngata ia ʻa e fakamāuʻi ʻo Sīsuú, ka naʻe fakamatematē ʻa e kau Siú ʻo pehē naʻá ne fakamoveuveuʻi ʻa e puleʻangá. Ko e meheká ʻa e ʻuhinga naʻe puke ai ʻe he kau taulaʻeiki lahí ʻo ʻave ʻa Sīsuú, pea naʻe ʻiloʻi ia ʻe Pailato. Naʻá ne toe ʻiloʻi foki ko hono tukuange ʻa Sīsuú ʻe fakatupunga ai ʻa e faingataʻa, ʻa ia ko ha meʻa ia naʻá ne loto ke taʻofi. Naʻe ʻosi ʻi ai ʻa e faingataʻa feʻunga, he naʻe tukupōpula ʻa Palapasa pea mo e niʻihi kehe ki he feinga angatuʻu mo e tāmate. (Maake 15:​7, 10; Luke 23:2) ʻIkai ngata aí, ko e ngaahi fekīhiaki ki muʻa atu mo e kau Siú kuó ne fakameleʻi ai ʻa e ongoongo ʻo Pailató kia Taipiliō, ʻa ia naʻe ʻiloa ʻi heʻene feangainga anga-kakaha mo e kau kōvana ne ʻikai te nau fakahoko lelei ʻa e fatongiá. Neongo ia, ke ʻulutukua ki he kau Siú ʻe hoko ia ko ha fakaʻilonga ʻo e vaivai. Ko ia naʻe fehangahangai ai ʻa Pailato mo ha palopalema.

ʻI he fanongo ʻo kau ki he feituʻu naʻe haʻu mei ai ʻa Sīsuú, naʻe feinga ai ʻa Pailato ke paasi ʻa e keisí kia Hēlota ʻAnitipasa, ʻa e pule fakavahe ʻo Kālelí. ʻI he ʻikai lava iá, naʻe feinga ai ʻa Pailato ke ʻai ʻa e faʻahinga naʻa nau fakatahataha ʻi tuʻa ʻi hono palasí ke kole ke tukuange ʻa Sīsū, ʻo fakatatau ki he anga-fakafonua ʻo hono fakatauʻatāinaʻi ha pōpula ʻi he Pāsová. Naʻe kaikaila leʻo lahi ʻa e fuʻu kakaí ia ke tukuange ʻa Palapasa.​—Luke 23:​5-​19.

Mahalo naʻe loto ʻa Pailato ke fai ʻa e meʻa naʻe totonú, ka naʻá ne toe holi foki ke fakahaofi ia pea mo fakafiefiaʻi ʻa e fuʻu kakaí. Fakaʻosí, naʻá ne ʻai ai ʻa ʻene ngāue fakaemāmaní ke muʻomuʻa ia ʻi hono konisēnisí mo e fakamaau totonú. ʻI heʻene kole ki ha vaí, naʻá ne fanofano ai hono nimá peá ne taukaveʻi naʻá ne tonuhia ʻi he mate naʻá ne tali fakaʻofisiale ʻi he taimi ko ʻení. a Neongo naʻá ne tui naʻe tonuhia ʻa Sīsū, naʻe tuʻutuʻuni ʻe Pailato ke uipi ia pea fakaʻatā ʻa e kau sōtiá ke nau manumanukiʻi, taaʻi pea mo ʻanuhi ia.​—Mātiu 27:​24-​31.

Naʻe fai ʻe Pailato ha feinga fakaʻosi ke fakatauʻatāinaʻi ʻa Sīsū, ka naʻe kaikaila ʻa e fuʻu kakaí kapau te ne fai pehē, naʻe ʻikai leva ko ha kaumeʻa ia ʻo Sisa. (Sione 19:12) ʻI he fanongo ki aí, naʻe fakavaivai ai ʻa Pailato. Naʻe leaʻaki ʻe ha mataotao ʻe taha ʻa eni fekauʻaki mo e fili ʻa Pailató: “Ko e fakaleleiʻangá naʻe faingofua: tāmateʻi ʻa e tangatá. Ko e meʻa pē naʻe teu ke molé ko e moʻui ʻa e tangata Siu ne hangehangē naʻe taʻemahuʻingá; ʻe fakavalevale ia ke tuku ʻa e faingataʻá ke tupulekina koeʻuhí ko ia.”

Ko e Hā e Meʻa Naʻe Hoko kia Pailató?

Ko e lēkooti fakamuimui ʻo e meʻa naʻe hoko ʻi he ngāue ʻa Pailató ko ha toe fepaki kehe. ʻOku pehē ʻe Siosifasi naʻe fakatahataha ha fuʻu kau Samēlia toʻo meʻatau tokolahi ʻi he Moʻunga Kelisimí ʻi he ʻamanaki atu ke maʻu ʻa e ngaahi koloa ʻoku pehē naʻe tanu ʻe Mōsese ʻi aí. Naʻe kau fakamālohi ai ʻa Pailato, pea naʻe tāmateʻi ʻe heʻene ngaahi kongakaú ha tokolahi ʻi he fuʻu kakaí. Naʻe lāunga ʻa e kau Samēliá ki he tokotaha māʻolunga ange ʻia Pailató, ko Lusiasi Viteliasi, ʻa e kōvana ʻo Sīliá. Pe naʻe fakakaukau ʻa Viteliasi ne fuʻu tōtuʻa ʻa e meʻa naʻe fai ʻe Pailató ʻoku ʻikai ke fakahaaʻi ia. Pe ko e hā pē ʻa e tuʻungá, naʻá ne fekauʻi ʻa Pailato ke ʻalu ki Loma ʻo fai ha tali ki he ʻemipolá ki heʻene ngaahi ngāué. Kae kehe, ki muʻa ke ne aʻu ki aí, naʻe mate ʻa Taipiliō ia.

“ʻI he meʻa ko iá,” ko e lau ia ʻa e maʻuʻanga fakamatala ʻe taha, “ʻoku ʻikai toe fai ha lave lahi ange ʻi he hisitōliá ʻo kau kia Pailato ka kuo hoko ia ko ha talatupuʻa.” Ka kuo feinga ʻa e tokolahi ke tokonaki ʻa e ngaahi fakaikiiki ʻoku ʻikai ke maʻú. Kuo taukaveʻi ia naʻe hoko ʻa Pailato ko ha Kalisitiane. Ko e kau “Kalisitiane” ʻItiopeá naʻa nau ʻai ia ko ha “sangato.” Ko ʻIusepiasi, ʻa ia naʻe tohi ʻi he fakaʻosinga ʻo e senituli hono tolú mo e konga ki muʻa ʻo e senituli hono faá, ko e ʻuluaki ia ʻi he tokolahi ke ne pehē ko Pailato, ʻi he hangē ko Siutasi ʻIsikalioté, naʻá ne taonakita. Kae kehe, ko e meʻa tofu pē naʻe hoko kia Pailató ʻoku ʻikai ʻilo fakapapau ha taha ia ki ai.

Naʻe malava ʻa Pailato ke loto-fefeka, taʻemahuʻingaʻia mo anga-kakaha. Ka naʻá ne nofo maʻu ʻi he ngāue ki he puleʻangá ʻi he taʻu ʻe hongofulu, lolotonga ia ko e tokolahi taha ʻo e kau ʻōfisa māʻolunga ʻi Siuteá naʻa nau maʻu ha taimi nounou ange. Ko ia ai, mei ha vakai faka-Loma, ko Pailató naʻe taau ia. Kuo ui ia ko ha tokotaha foʻi ʻa ia kuó ne ʻai ʻi he tuʻunga fakamā ʻa Sīsū ke fakamamahiʻi mo tāmateʻi ke maluʻi ʻa ia tonu. ʻOku fakakikihiʻi ʻe he tokolahi ko e fatongia ʻo Pailató naʻe ʻikai ke fuʻu lahi ia ki hono poupouʻi ʻa e fakamaau totonú ka ke pouaki ʻa e melinó mo e ngaahi mahuʻingaʻia faka-Lomá.

Ko e taimi ʻo Pailató naʻe fuʻu kehekehe ʻaupito ia mei hoʻotautolú. Neongo ia, ʻoku ʻikai ha fakamaau te ne lava ke fakahalaiaʻi totonu ha tangata ʻokú ne fakapapauʻi ʻoku tonuhia. Ka ne ʻikai ʻa ʻene fetaulaki mo Sīsuú, naʻe mei hoko pē nai ʻa Ponitō Pailato ia ko ha toe foʻi hingoa ʻe taha ʻi he ngaahi tohi hisitōliá.

[Fakamatala ʻi lalo]

[Fakatātā ʻi he peesi 11]

Ko e tā tongitongi ko ʻení ʻoku fakapapauʻi mai ai ʻa Ponitō Pailato ko e ʻŌfisa Māʻolunga ʻo Siuteá naʻe maʻu ʻi Sesalia