Talitekeʻi ʻa e Fakakaukau Halá!

ʻI HEʻENE hokosia ʻa e fakatamakí, naʻe maʻu ʻe he pēteliake ko Siopé ha ʻaʻahi mei hono ngaahi kaungāmeʻa ʻe toko tolu ko ʻElifasi, Pilitati mo Sofaʻā. Naʻa nau omi ke kaungāmamahi mo ia pea ke fakafiemālieʻi ia. (Siope 2:​11) Ko e tokotaha faitākiekina ʻiloa taha mo motuʻa taha nai ʻi he toko tolú ko ʻElifasi. Ko e fuofua tokotaha ia ke leá pea toe lea lahi tahá. Ko e hā ʻa e faʻahinga fakakaukau naʻe tapua atu ʻe ʻElifasi ʻi heʻene ngaahi lea ʻe tolú?

ʻI hono manatuʻi ha hokosia mahulu hake ʻi natula naʻá ne maʻu ki muʻá, naʻe pehē ai ʻe ʻElifasi: “Toki māʻili mai ha matangi [pe laumālie] ki hoku mata; naʻe vavana hoku sino kotoa. Ne mamalu mai ʻa e Meʻa ka naʻe ʻikai te u maʻiloa hono fotunga; ko ha ʻata pe naʻe maʻali mai: naʻe ai ha ngananganaiki pea u ongoʻi ha lea.” (Siope 4:​15, 16) Ko e hā ʻa e faʻahinga laumālie naʻá ne tākiekina ʻa e fakakaukau ʻa ʻElifasí? Ko e founga fakahalaiaʻi ʻo e ngaahi lea naʻe hoko atu aí ʻoku fakahaaʻi ai ko e laumālié naʻe ʻikai ko e taha ia ʻo e kau ʻāngelo māʻoniʻoni ʻa e ʻOtuá. (Siope 4:​17, 18) Ko ha meʻamoʻui laumālie fulikivanu ia. Kapau naʻe ʻikai, ko e hā naʻe valokiʻi ai ʻe Sihova ʻa ʻElifasi mo hono kaungāmeʻa ʻe toko uá ki hono leaʻaki ʻa e ngaahi loí? (Siope 42:7) ʻIo, naʻe tākiekina ʻa ʻElifasi ʻe ha tēmeniō. Ko ʻene ngaahi fakamatalá naʻe tapua atu ai ʻa e fakakaukau taʻefakaʻotuá.

Ko e hā ʻa e ngaahi fakakaukau ʻe lava ke ʻiloʻi mei he ngaahi fakamatala ʻa ʻElifasí? Ko e hā ʻoku mahuʻinga ai ke tau maluʻi kitautolu mei he fakakaukau halá? Pea ko e hā ʻa e ngaahi meʻa ʻe lava ke tau fai ke talitekeʻi ai iá?

“Oku Ikai Te Ne Falala ki He Ene Kau Tamaioeiki”

ʻI he kotoa ʻo e ngaahi lea ʻe tolú, naʻe fakahaaʻi ai ʻe ʻElifasi ʻa e fakakaukau ʻoku fuʻu anga-kakaha ʻa e ʻOtuá ʻa ia ʻoku ʻikai fakahōifua kiate ia ha meʻa ʻe fai ʻe heʻene kau tamaioʻeikí. “Vakai, oku ikai te ne falala ki he ene kau tamaioeiki,” ko e tala ange ia ʻe ʻElifasi kia Siopé, “bea ko ene kau agelo oku ikai ke ne fakamalo ki ai.” (Siope 4:​18, PM) Naʻe pehē ki mui ʻe ʻElifasi ʻo kau ki he ʻOtuá: “Vakai, oku ikai falala jii eia ki he ene kau maonioni; io naa moe gaahi lagi oku ikai maa ia i hoo ao.” (Siope 15:​15, PM) Pea naʻá ne ʻeke: “Oku aoga ki he Mafimafi a hoo maonioni?” (Siope 22:​3, PM) Naʻe loto-tatau ʻa Pilitati ki he fakakaukau ko ení, he naʻá ne pehē: “Vakai, naʻa mo e mahina ka talaʻehai ʻoku maʻa ʻasinisini, pea ko e ngaahi fetuʻu ʻoku ʻikai te nau maʻa ʻi he vakai ʻa hono fofonga [ʻOtua].”​—Siope 25:5.

Kuo pau ke tau maluʻi kitautolu mei he hoko ʻo tākiekina ʻe he fakakaukau peheé. ʻE lava ke taki atu ai kitautolu ke tau ongoʻi ʻoku fiemaʻu tōtuʻa ʻe he ʻOtuá ha meʻa meiate kitautolu. Ko e fakakaukau ko ení ʻoku uesia ai ʻa hotau vahaʻangatae moʻoni mo Sihová. ʻIkai ngata aí, kapau te tau tukulolo ki he faʻahinga fakaʻuhinga ko ení, ʻe anga-fēfē haʻatau tali ʻi he taimi ʻoku ʻomai ai ha akonaki ʻoku fiemaʻu kia kitautolú? ʻI he ʻikai tali anga-fakatōkilalo ʻa e fakatonutonú, ʻe hoko nai ʻo ‘hanu [pe ʻita] hotau lotó kia Sihova,’ pea te tau tukulotoa nai ai ʻa e loto-mamahi kiate ia. (Palovepi 19:3) He fakatuʻutāmaki fakalaumālie moʻoni ko ia!

 “Naʻa mo e Tangata Malohi Te Ne Lava Koā ke ʻAonga Kia Ela?”

ʻOku felāveʻi vāofi mo e fakakaukau ʻoku fuʻu anga-kakaha ʻa e ʻOtuá ʻa e fakakaukau ʻokú ne vakai mai ʻoku taʻeʻaonga ʻa e tangatá. ʻOku ʻi he lea hono tolu ʻa ʻElifasí ʻa e fehuʻi: “Naʻa mo e tangata malohi te ne lava koā ke ʻaonga kia Ela? Seuke, ʻe ʻaonga ʻa e tangata ʻatamai kiate ia pe”? (Siope 22:2) Naʻe fakahuʻunga ʻe ʻElifasi ko e tangatá ʻoku taʻeʻaonga ia ki he ʻOtuá. ʻI ha tuʻunga meimei tatau, naʻe fakaʻuhinga ʻa Pilitati ʻo pehē: “Pea tonuhia fefe ha tangata-meʻa-vaivai he hopo mo Ela? Pea maʻa fefe ʻa e meʻa kuo fanauʻi ʻe he fefine?” (Siope 25:4) Fakatatau ki he foʻi fakaʻuhinga ko iá, ʻe lava fēfē ke faifai ange pea maʻu ʻe Siope, ko ha tokotaha ko e meʻa vaivai pē, ha tuʻunga māʻoniʻoni ʻi he ʻao ʻo e ʻOtuá?

Ko e kakai ʻe niʻihi he ʻahó ni ʻoku fakamamahiʻiʻaki kinautolu ʻa e ngaahi ongoʻi taʻepau fekauʻaki mo kinautolu tonu. Ko e ngaahi tuʻunga hangē ko hono ʻohake ʻo e fāmilí, ko e fakaʻasi atu ki he ngaahi tenge ʻi he moʻuí pe hoko ko e tokotaha maʻukovia ʻo e tāufehiʻa fakamatakalí pe fakafaʻahingá kuó ne fakatupunga nai ai ʻa e meʻá ni. Ka ko Sētane mo ʻene kau tēmenioó ʻoku nau toe fiefia ʻi hono fakailifiaʻi ha tokotahá. Kapau ʻe lava ke nau tākiekina ha tokotaha ke ne ongoʻi ʻoku ʻikai ke lelei feʻunga ha meʻa ʻokú ne fai ki he ʻOtua Māfimafi-Aoniú, ʻokú ne tōngofua ange ai ki he ʻamanaki-tōnoá. ʻE aʻu ki he taimi, ko ha tokotaha pehē ʻe lava ke ne ʻauhia atu, naʻa mo ʻene mavahe, mei he ʻOtua moʻuí.​—Hepelu 2:1; 3:​12.

Ko e ngaahi palopalema ʻo e taʻumotuʻá mo e moʻui leleí ʻokú ʻomi ai ʻa e fakangatangata kia kitautolu. Ko ʻetau kau ʻi he ngāue ʻo e Puleʻangá ʻe hā ngali fuʻu siʻisiʻi nai ia ʻi he fakafehoanaki atu ki he meʻa naʻa tau fai ʻi he taimi naʻa tau kei siʻi ange, moʻui lelei ange mo mālohi ange aí. He mahuʻinga moʻoni ia ke ʻiloʻi ko Sētane mo ʻene kau tēmenioó ʻoku nau fiemaʻu ke tau ongoʻi ko e meʻa ʻoku tau faí ʻoku ʻikai ke lelei feʻunga ia ki he ʻOtuá! Kuo pau ke tau talitekeʻi ʻa e fakakaukau peheé.

Founga ke Talitekeʻi Ai ʻa e Fakakaukau Taʻepaú

Neongo ʻa e faingataʻa naʻe ʻomi kiate ia ʻe Sētane ko e Tēvoló, naʻe pehē ʻe Siope: “Teu mate be ka e ikai teu tukuage eku agatonu meiate au.” (Siope 27:​5, PM) Koeʻuhi naʻá ne ʻofa ʻi he ʻOtuá, naʻe fakapapauʻi ʻe Siope ke tauhi maʻu ʻene anga-tonú ʻo tatau ai pē pe ko e hā ʻe hokó, pea naʻe ʻikai ha meʻa te ne liliu ʻa e meʻa ko iá. Ko ha meʻa tefito mahuʻinga eni ke talitekeʻiʻaki ʻa e fakakaukau taʻepaú. Kuo pau ke tau maʻu ha mahinoʻi lelei ʻo e ʻofa ʻa e ʻOtuá pea fakatupulekina ha houngaʻia loloto ki ai. ʻOku toe fiemaʻu ke fakaloloto ʻetau ʻofa kiate iá. ʻOku aʻusia eni fakafou ʻi ha ako tuʻumaʻu ʻo e Folofola ʻa e ʻOtuá pea fakalaulauloto faʻa lotu ki he meʻa ʻoku tau akó.

Ko e fakatātaá, ʻoku pehē ʻe he Sione 3:​16: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu.” ʻOku maʻu ʻe Sihova ʻa e ʻofa loloto ki he māmani ʻo e faʻahinga ʻo e tangatá, pea ko ʻene ngaahi fakafeangai mo e tangatá ʻi he faai mai ʻa e taimí ʻoku fakahaaʻi ai ʻa e ʻofa ko iá. Ko e fakalaulauloto ki he ngaahi faʻifaʻitakiʻanga mei he kuohilí ʻoku totonu ke ne langa hake ʻa ʻetau houngaʻia kia Sihová pea fakaloloto ai ʻetau ʻofa kiate iá, ʻo tokoniʻi ai kitautolu ke tau talitekeʻi ʻa e fakakaukau hala pe taʻepaú.

Fakakaukau atu ki he founga naʻe fakafeangai ai ʻa Sihova kia ʻĒpalahame ʻi he taimi ʻo e fakaʻauha naʻe tuʻunuku mai ki Sōtoma mo Komolá. Naʻe ʻeke tuʻo valu ʻa ʻĒpalahame kia Sihova ʻo fekauʻaki mo ʻEne fakamāú. Naʻe ʻikai teitei fakahaaʻi ʻe Sihova ha ongoʻi ʻita pe feifeitamaki. Kae kehe, ko ʻene ngaahi talí naʻe papau mo fakafiemālie kia ʻĒpalahame. (Senesi 18:​22-​33) ʻI he taimi naʻe fakahaofi ai ki mui ʻe he ʻOtuá ʻa Lote pea mo hono fāmilí mei Sōtomá, naʻe kole ange ʻe Lote ke ne hola ki ha kolo ofi mai kae ʻikai ko e ngaahi moʻungá. Naʻe tali ʻe Sihova: “Ko eni, kuo u tokaʻi koe ʻi he meʻa ni foki, pea ʻe ʻikai te u maumauʻi ʻa e kolo ko ia kuo ke lea ki ai.” (Senesi 19:​18-​22) ʻOku fakahaaʻi ʻe he ngaahi talanoa ko ení ʻa Sihova ko ha tokotaha-pule anga-kakaha, taʻeʻofa mo fakaaoao? ʻIkai. ʻOku nau fakahaaʻi ʻa e tokotaha ko hono tuʻunga moʻoní ia​—ko ha Hau anga-ʻofa, anga-lelei, faimeesi mo fakaʻatuʻi.

ʻOku fakahalaʻi ʻa e fakakaukau ko e ʻOtuá ko ha tokotaha fakasio fehālaakí pea ʻoku ʻikai ha taha ʻi he ngaahi faʻifaʻitakiʻanga ʻa ʻĒlone, Tēvita mo Manase ʻo ʻIsileli ʻo e kuonga muʻá ʻe lava ke lelei feʻunga kiate ia. Naʻe halaia ʻa ʻĒlone ʻi he ngaahi hala mamafa ʻe tolu. Naʻá ne ngaohi ʻa e pulu koulá, kau mo hono tuofefine ko Meliamé ʻi hono fakaangaʻi ʻo Mōsesé pea ʻikai te ne  fakamāʻoniʻoniʻi mo fakalāngilangiʻi ʻa e ʻOtuá ʻi Mēlipa. Kae kehe, naʻe ʻafio ʻa Sihova ki he lelei ʻiate iá peá ne fakaʻatā ia ke ne hokohoko atu ʻene ngāue ko e taulaʻeiki lahí ʻo aʻu ki heʻene maté.​—Ekisoto 32:​3, 4; Nomipa 12:​1, 2; 20:​9-​13.

Naʻe fai ʻe Tuʻi Tēvita ha ngaahi angahala mamafa lolotonga ʻene pulé. Naʻe kau ai heni ʻa e tono, mo hono faʻufaʻu fakafufū ke mate ha tangata taʻehalaia mo hono fai ha tohi kakai taʻefakalao. Kae kehe, naʻe ʻafioʻi ʻe Sihova ʻa e fakatomala ʻa Tēvitá mo ʻene pipiki mateaki ki he fuakava ʻo e Puleʻangá ʻaki ʻEne fakaʻatā ia ke ne hoko ko e tuʻi ʻo aʻu ki heʻene maté.​—2 Samiuela 12:9; 1 Kalonikali 21:​1-7.

Naʻe fokotuʻu ʻe he Tuʻi Siuta ko Manasé ha ngaahi ʻōlita kia Pēali, naʻá ne ʻai ʻene fānaú ke ʻalu ʻi he afí, poupouʻi ʻa e ngaahi tōʻonga fakahaʻele faʻahikehé peá ne langa ʻa e ngaahi ʻōlita lotu loi ʻi he ngaahi lotoʻā ʻo e temipalé. Kae kehe, hili ʻene fakahāhā ʻa e fakatomala loto-moʻoní, naʻe fakamolemoleʻi ia ʻe Sihova, ʻo tukuange ia mei he nofo pōpulá peá Ne fakafoki kiate ia ʻa e tuʻunga-tuʻí. (2 Kalonikali 33:​1-​13) Ko e ngaahi ngāue eni ʻa ha ʻOtua ʻa ia ʻoku ʻikai ke lelei feʻunga ha tokotaha kiate ia? Hala ʻataʻatā!

Ko e Tokotaha Tukuakiʻi Loí Tonu ʻOku Halaiá

ʻOku ʻikai totonu ke ne fakaʻohovaleʻi kitautolu ko Sētane ʻa e fakasino tefito ʻo e ngaahi ʻulungāanga ko ia ʻokú ne tukuakiʻi ʻoku maʻu ʻe Sihová. Ko Sētané ʻoku anga-fefeka mo anga-kakaha. ʻOku lava ke hā mahino eni ʻi he felāveʻi ʻa e tōʻonga ʻo hono feilaulauʻaki ʻa e fanaú pea mo e lotu loi ʻi he kuohilí. Ko e kau ʻIsileli tafoki mei he moʻoní ne nau tutu honau ngaahi fohá mo e ngaahi ʻofefiné ʻi he afí​—ko ha meʻa naʻe ʻikai teitei ake ʻi he loto ʻo Sihová.​—Selemaia 7:​31.

Ko Sētane ia, ʻikai ko Sihova, ʻa e tokotaha fakasio fehālaakí. ʻOku lave ʻa e Fakahā 12:10 kia Sētane ko e tokotaha “tukuaki ʻo hotau kainga [pe fanga tokouá], ʻa ia ʻoku ne tukuakiʻi kinautolu ʻi he ʻao ʻo hotau ʻOtua, ʻi he ʻaho mo e po.” ʻI he tafaʻaki ʻe tahá, ʻi he fekauʻaki mo Sihová, naʻe hiva ʻa e tokotaha-tohi-sāmé: “Ka ne ke nofo, ʻe Iaa, ke lama kovi, ko hai ha taha ʻe tuʻu, Atonai? Ka ʻoku ʻiate koe ʻa e fakamolemole.”​—Sāme 130:​3, 4.

Taimi ʻE Ngata Ai ʻa e Fakakaukau Halá

He ongoʻi nonga moʻoni ia kuo pau naʻe ongoʻi ʻe he ngaahi meʻamoʻui laumālie fakaeʻāngeló ʻi he taimi naʻe tuli hifo ai ʻa Sētane ko e Tēvoló mo ʻene kau tēmenioó mei hēvaní! (Fakahā 12:​7-9) Hili pē iá, ko e ngaahi laumālie fulikivanu ko ení naʻe ʻikai kei lava ke nau uesia ʻa e ngaahi ngāue ʻa e fāmili fakaeʻāngelo ʻo Sihova ʻi hēvaní.​—Taniela 10:13.

Ko e kau nofo ʻi he māmaní te nau fiefia ʻi he kahaʻu ofi maí. ʻE vavé ni ʻa e ʻalu hifo ha ʻāngelo mei hēvani mo ha kī ʻo e luo taʻehanotakelé mo ha fuʻu sēini lahi ʻi hono nimá ʻo ne haʻi ʻa Sētane mo ʻene kau tēmenioó pea lī kinautolu ki he luo taʻehanotakele ʻo e taʻengāué. (Fakahā 20:​1-3) He nonga moʻoni ē te tau hokosia ʻi he taimi ʻe hoko ai iá!

ʻI he taimi tatau, kuo pau ke tau maluʻi kitautolu mei he fakakaukau halá. ʻI he taimi pē ʻoku tau ʻiloʻi ai ʻoku haʻu ki heʻetau fakakaukaú ʻa e fakakaukau halá pe taʻepaú, ʻoku fiemaʻu ke tau talitekeʻi kinautolu ʻaki ʻa e fakahangataha hotau ʻatamaí ki he ʻofa ʻa Sihová. Pea ‘ko e nonga ʻa e ʻOtuá, ʻa ia ʻoku mamaʻo ʻi he tatae ʻa e ʻatamai kotoa pe, te ne maluʻi hotau lotó mo ʻetau ngaahi fakakaukaú.’​—Filipai 4:​6, 7.

[Fakatātā ʻi he peesi 26]

Naʻe talitekeʻi ʻe Siope ʻa e fakakaukau taʻepaú

[Fakatātā ʻi he peesi 28]

Naʻe ʻiloʻi ʻe Lote ko Sihová ko ha Hau fakaʻatuʻi