ʻOkú Ke ʻIloʻi ʻa e Fakaʻilonga ʻo e ʻI Ai ʻa Sīsuú?

ʻOKU ʻikai ha taha ʻe loto ke puke lahi pe tofanga fakafokifā ʻi ha fakatamaki. Koeʻuhi ke kalofi ʻa e ngaahi fakatamaki peheé, ko ha tokotaha poto ʻokú ne tokanga ki he ngaahi fakaʻilonga ʻoku tuhu ki he fakatuʻutāmakí pea ngāue ʻo fakatatau ki ai. Naʻe fakamatalaʻi ʻe Sīsū Kalaisi ha fakaʻilonga tefito ʻa ia ʻoku fiemaʻu ke tau ʻiloʻi. Ko e meʻa naʻá ne tuhu ki aí ʻe ʻi ai ʻene maongo fakaemāmani lahi pea te ne uesia ʻa e faʻahinga kotoa ʻo e tangatá. ʻOkú ke kau ki ai pea mo ho fāmilí.

Naʻe lea ʻa Sīsū fekauʻaki mo e Puleʻanga ʻo e ʻOtuá, ʻa ia te ne toʻo atu ʻa e fulikivanú pea ngaohi ʻa e māmaní ke hoko ko ha palataisi. Naʻe fieʻilo ʻa ʻene kau ākongá fekauʻaki mo eni pea nau loto ke ʻiloʻi ʻa e taimi ʻe hoko mai ai ʻa e Puleʻanga ko iá. Naʻa nau ʻeke: “Ko e hā ʻa e fakaʻilonga ʻo hoʻo ʻi aí mo e fakaʻosiʻosi ʻo e ngaahi meʻa ʻoku tuʻu ní?”​—Mātiu 24:​3, NW.

Naʻe ʻiloʻi ʻe Sīsū ʻi he hili ʻa hono tāmateʻí mo ʻene toetuʻú, ʻe mahili atu mei ai ha ngaahi senituli ki muʻa ke fakanofo ia ʻi hēvani ko e Tuʻi faka-Mīsaia ke ne pule mai ki he faʻahinga ʻo e tangatá. Koeʻuhi ko hono fakanofó ʻe taʻehāmai ki he faʻahinga ʻo e tangatá, naʻe ʻomai ai ʻe Sīsū ha fakaʻilonga ʻa ia ʻe ʻai ai ke malava ʻa hono kau muimuí ʻo ʻiloʻi ʻa ʻene “ʻi aí” pea pehē ki he “fakaʻosiʻosi ʻo e ngaahi meʻa ʻoku tuʻu ní.” Ko e fakaʻilongá ni ʻoku faʻuʻaki ia ʻa e ngaahi tafaʻaki lahi, ʻa ia ʻoku faʻuʻaki fakataha ia ha fakapapauʻiʻanga pe fakaʻilonga faʻu fetuiaki—ko e fakaʻilonga ʻo e ʻi ai ʻa Sīsuú.

Ko e kau tohi Kōsipeli ko Mātiu, Maʻake, mo Luké naʻa nau taki taha lēkooti fakalelei ʻa e tali ʻa Sīsuú. (Mātiu, vahe 24 mo e 25; Maake, vahe 13; Luke, vahe 21) Ko e kau tohi Tohi Tapu kehé naʻa nau tānaki mai ʻa e ngaahi fakaikiiki ki he fakaʻilongá. (2 Timote 3:​1-5; 2 Pita 3:​3, 4; Fakahā 6:​1-8; 11:18) ʻOku ʻikai ha ʻatā feʻunga ʻi he kupú ni ke tau vakaiʻi lelei ai ʻa e kotoa ʻo e ngaahi fakaikiikí, ka te tau lāulea ki he ngaahi ʻelemēniti tefito ʻe nima ʻa ia ʻoku faʻuʻaki ʻa e fakaʻilonga naʻe lave ki ai ʻa Sīsuú. Te ke ʻiloʻi ko e lāulea ko ení ʻoku mohu ʻuhinga mo mahuʻinga kiate koe fakafoʻituitui.—Sio ki he puha ʻi he peesi 6.

“Ko ha Liliu ki ha ʻĒpoki Foʻou”

“ʻE tuʻu ha kakai ki ha kakai, mo ha puleʻanga ki ha puleʻanga.” (Mātiu 24:7) Ko e makasini ongoongo Siamane ko e Der Spiegel ʻoku līpooti ai ʻo pehē ki muʻa ʻi he 1914, ko e kakaí naʻa nau “tui ki ha kahaʻu fakaofo fakataha mo e tauʻatāina, fakalakalaka  mo e lakalakaimonū lahi ange.” Naʻe liliu leva ʻa e meʻa kotoa. “Ko e tau naʻe kamata ʻi ʻAokosi 1914 pea hoko ʻo ngata ʻi Nōvema 1918 ko ha meʻa fakaʻohovale ia. Naʻá ne fakatupunga ha liliu vave fakahisitōlia, ʻi hono fakamavaheʻi ʻa e meʻa motuʻá mei he meʻa foʻoú,” ko e fakamatala ia ʻa e makasini GEO. Laka hake he kau sōtia ʻe toko 60 miliona mei he konitinēniti ʻe nima naʻa nau kau ʻi he fepaki anga-fītaʻá. ʻI hono fakaʻavalisí, ko e kau sōtia ʻe toko 6,000 nai naʻe tāmateʻi ʻi he ʻaho taki taha. Talu mei ai, kuo vakai ʻa e kau faihisitōlia ʻo e toʻutangata taki taha pea mo e kau tui fakapolitikalé kotoa “ko e 1914 ki he 1918 kuo hoko ia ko ha liliu ki ha ʻēpoki foʻou.”

Naʻe fakamālohiʻi ʻe he Tau I ʻa Māmaní ha ngaahi liliu ʻoku ʻikai lava ʻo fakafoki ki he sōsaieti fakaetangatá pea tekeʻi atu ai ʻa e faʻahinga ʻo e tangatá ki he ngaahi ʻaho fakaʻosi ʻo e fokotuʻutuʻu ko eni ʻo e ngaahi meʻá. Ko e toenga ʻo e senituli ko iá naʻe fakaʻilongaʻiʻaki ia ʻa e ngaahi tau, ngaahi fepaki fakakautau mo e tautoitoi lahi ange. Kuo ʻikai liliu ʻa e ngaahi meʻá ki he lelei ange ʻi he muʻaki ngaahi taʻu ʻo e senituli lolotongá. Tuku kehe ʻa e tau, ʻoku hā mai ʻa e ngaahi tafaʻaki kehe ʻo e fakaʻilongá.

Honge, Mahaki Fakaʻauha mo e Ngaahi Mofuike

“ʻE ai ha ngāhi honge.” (Mātiu 24:7) Naʻe taaʻi ʻe he fiekaiá ʻa ʻIulope lolotonga ʻa e tau ʻuluaki ʻa e māmaní, pea kuo fakahohaʻasi ʻe he hongé ʻa e faʻahinga ʻo e tangatá talu mei ai. Ko e faihisitōlia ko Alan Bullock naʻá ne tohi ʻo pehē ʻi Lūsia mo ʻIukalaine ʻi he 1933, “naʻe feʻaluʻaki holo ai ʻa e fuʻu kakai fiekaiá ʻi he feituʻu ʻutá . . . Naʻe fokotuʻuna ʻa e ngaahi ʻangaʻangá ʻi he ngaahi veʻehalá.” ʻI he 1943 ko e fainusipepa ko T. H. White naʻá ne sio tonu ʻi he honge ʻi he vahefonua Siaina ko Henan. Naʻá ne tohi: “ʻI ha honge, ʻoku meimei hoko ai ha meʻa pē ʻo ala kai pea ʻe lava ke laiki, ʻo kai pea liliu ivi ia ʻe he sino fakaetangatá. Ka ʻoku fiemaʻu ʻi he ilifia lahi ki he maté ke fakakaukauloto atu ai ki hono kai ha meʻa, ʻa ia ʻoku ʻikai ala kai ʻi he taimi ko ení.” ʻOku fakamamahi ke leaʻaki, kuo hoko ʻa e honge ʻi ʻAfiliká ʻo meimei anga-maheniʻaki lolotonga ʻa e ngaahi hongofuluʻi taʻu ki mui ní. Neongo ʻoku ʻomai ʻe he māmaní ʻa e meʻakai feʻunga ki he tokotaha kotoa, ʻoku fakafuofuaʻi ʻe he Kautaha Meʻatokoni mo e Ngoue ʻa e UN ko e kakai ʻe toko 840 miliona ʻi māmani lahi ʻoku siʻi ʻaupito ʻa e meʻa ʻoku maʻu ke nau kaí.

‘Ngaahi mahaki fakaʻauha ʻi he ngaahi potu kehekehe.’ (Luke 21:11) “Ko e fulū faka-Sipeiní ʻoku fakafuofua naʻá ne tāmateʻi ʻa e kakai ʻi he vahaʻa ʻo e toko 20 miliona mo e 50 miliona ʻi he 1918, ʻo laka ange ia ʻi he mahaki fakaʻauha Mate ʻUliʻulí pe ko e tau ʻuluaki ʻa e māmaní,” ko e līpooti ia ʻa e Süddeutsche Zeitung. Talu mei ai, kuo moʻua ai ʻa e fuʻu tokolahi fakaʻulia ʻi he ngaahi mahaki hangē ko e malēliá, simolopōkisí, tīpií, polioó mo e kōlelá. Pea ʻoku ʻohovale ʻa e māmaní ʻi he sio ki he ʻikai lava ke fakangata e mafola ʻa e ʻeitisí. ʻOku tau maʻu he taimí ni ʻa e tuʻunga taʻealafakamatalaʻi ʻi he hokohoko atu pē ʻa e mahakí neongo ʻa e fakalakalaka fakaofo fakafaitoʻó. Ko e tuʻunga fepakipaki ko ení, ʻi he ʻikai ʻiloʻi ʻo aʻu mai ki he taimí ni ʻe he faʻahinga  ʻo e tangatá, ʻoku tokoni ia ke ʻiloʻi ai ʻa e taimi anga-kehe ʻoku tau ʻi aí.

“Ngāhi mofuike.” (Mātiu 24:7) Lolotonga ʻa e taʻu ʻe 100 kuo maliu atú, kuo tāmateʻi ai ʻi he ngaahi mofuiké ʻa e moʻui ʻa e kakai ʻe laui kilu. Fakatatau ki he maʻuʻanga fakamatala ʻe taha, ko e ngaahi mofuike fakataha mo e mālohi ke ne maumauʻi ʻa e ngaahi falé pea fahi ʻa e kelekelé kuo fakaʻavalisi ki he mofuike ʻe 18 ʻi he taʻu taki taha talu mei he 1914. Ko e ngaahi mofuike fakatupu mate ʻoku mālohi feʻunga ke ne holoki ʻa e ngaahi falé kuo hoko tuʻo taha nai ia he taʻu. Neongo ʻa e ngaahi fakalakalaka ʻi he tekinolosiá, ko e lahi ʻo e maté ʻoku kei māʻolunga pē koeʻuhi ko e tuʻu ʻa e ngaahi kolo lahi ʻa ia ʻoku tupu vave honau tokolahí ʻi he ngaahi halanga mofuiké.

Ongoongo Fakafiefia!

Ko e lahi taha e ngaahi tafaʻaki ʻo e fakaʻilonga ʻo e ngaahi ʻaho fakamuí ʻoku fakalotomamahi. Ka naʻe toe fakamatala foki ʻa Sīsū ki ha ongoongo fakafiefia.

“Koe ogoogolelei ni oe buleaga e malaga aki i mamani kotoabe, koe mea fakamooni ki he buleaga kotoabe.” (Mātiu 24:​14, PM) Ko e ngāue naʻe kamataʻi tonu ʻe Sīsuú—ʻa hono malangaʻi ʻa e ongoongo lelei ʻo e Puleʻangá—ʻe aʻu ia ki ha tumutumu lolotonga ʻa e ngaahi ʻaho fakaʻosí. Kuo hoko moʻoni ʻa e meʻá ni. ʻOku malangaʻi ʻe he Kau Fakamoʻoni ʻa Sihová ʻa e pōpoaki ʻa e Tohi Tapú pea ʻoku nau akoʻi ʻa e kakai loto-leleí ke nau ngāueʻaki ʻa e meʻa ʻoku nau akó ʻi he moʻui fakaʻahó. ʻI he lolotonga ní, ʻoku laka hake he Kau Fakamoʻoni ʻe toko ono miliona ʻoku nau malanga ʻi he fonua ʻe 235 pea ʻi he lea laka hake he 400.

Fakatokangaʻi ange naʻe ʻikai pehē ʻe Sīsū ia ʻe ngata ʻa e ngāue kotoa koeʻuhi ko e ngaahi tuʻunga fakalotomamahi ʻi he māmaní. Naʻe ʻikai foki ke ne pehē ʻe lōmekina ʻa e māmaní fakakātoa ʻe he tafaʻaki pē ʻe taha ʻo e fakaʻilongá. Ka naʻá ne tomuʻa tala ha ngaahi meʻa lahi ʻe hoko ʻa ia ʻe faʻuʻaki fakataha ia ha fakaʻilonga ʻa ia ʻe lava ke ʻiloʻi mei ha feituʻu pē ʻi he māmaní.

Ko e sio fakalaka atu ʻi he ngaahi meʻa naʻe hoko fakatāutahá pe ngaahi meʻa kehekehé, ʻokú ke sio ai ki ha sīpinga, ko ha fakaʻilonga faʻu fetuiaki ʻoku mahuʻinga fakaemāmani lahi? Ko e meʻa ʻoku hokó ʻokú ne uesia koe mo ho fāmilí. Ka ko e hā hono ʻuhinga, ko ʻetau ʻeké nai ia, ʻoku fakatokangaʻi ai pē ia ʻe he kakai mātuʻaki tokosiʻí?

 Muʻomuʻa ʻa e Ngaahi Meʻa Fakafoʻituituí

“Tapu Kaukau Tahi,” “Volota Māʻolunga,” “Holoki ʻa e Vavé.” Ko e niʻihi eni ʻo e ngaahi fakaʻilonga mo e fakatokanga ʻoku tau sio ai ka ʻoku faʻa tukunoaʻi. Ko e hā hono ʻuhingá? ʻOku afeʻingofua kitautolu ʻe he meʻa ʻoku tau vakai ki ai ʻoku lelei kiate kitautolú. Ko e fakatātaá, ʻoku tau ongoʻi nai ʻa e fiemaʻu ke lele vave ange ʻi he meʻa ʻoku fakangofua ʻe he laó, pe ʻoku tau maʻu nai ha holi mālohi ke kaukau ʻi he feituʻu ʻoku tapuí. Ka ko hono tukunoaʻi ʻo e ngaahi fakaʻilongá ʻoku taʻefakapotopoto ia.

Hangē ko ení, ko e ngaahi holo ʻa e sinoú ʻi he ʻotu Moʻunga Alpine ʻo ʻAosituliá, Falanisē, ʻĪtali, mo Suisalaní ʻoku toʻo ai he taimi ʻe niʻihi ʻa e moʻui ʻa e kau folau ʻeveʻeva ʻa ē ʻoku nau tukunoaʻi ʻa e ngaahi fakatokanga ʻoku uki ai ke nau sikī pe fakaheheke ʻi he ngaahi hala ʻoku malú. Fakatatau ki he Süddeutsche Zeitung, ko e kau folau ʻeveʻeva tokolahi ʻoku nau tukunoaʻi ʻa e ngaahi fakatokanga ko iá ʻoku nau moʻui ʻo fakatatau ki he lea ʻoku taka, ʻOku ʻikai ha ifo ia ʻi he ʻikai ʻi ai ha fakatuʻutāmakí. Ko e meʻa fakamamahí, ko hono tukunoaʻi ʻa e ngaahi fakatokangá ʻe lava ke ʻi ai hono ngaahi ola fakamamahi.

Ko e hā ʻa e ngaahi ʻuhinga ʻoku maʻu ʻe he kakaí ki hono tukunoaʻi ʻa e fakaʻilonga naʻe fakamatalaʻi ʻe Sīsuú? ʻOku fakakuihi nai kinautolu ʻe he mānumanú, fakaongonoaʻi ʻe he taʻemahuʻingaʻiá, fakamamateaʻi ʻe he lotolotouá, lōmekina ʻe he founga tuʻumaʻú, pe puleʻi ʻe he manavahē ki he mole ʻa e tuʻunga ongoongoá. Ko e taha nai ʻo e ngaahi meʻá ni ʻokú ne ʻai koe ke ke tukunoaʻi ʻa e fakaʻilonga ʻo e ʻi ai ʻa Sīsuú? ʻIkai ʻe fakapotopoto ange ke ʻiloʻi ʻa e fakaʻilongá pea ngāue ʻo fakatatau ki ai?

Moʻuí ʻi ha Māmani Palataisi

ʻOku tokanga ha kakai tokolahi fakautuutu ki he fakaʻilonga ʻo e ʻi ai ʻa Sīsuú. Ko Kristian, ko ha talavou ʻosi mali ʻi Siamane, ʻokú ne tohi: “Ko e ngaahi taimi fakapōpōʻuli eni. ʻOku tau moʻui taʻetoeveiveiua ʻi he ‘ngaahi ʻaho fakaʻosí.’” Ko ia mo hono uaifí ʻokú na fakamoleki ʻa e taimi lahi ʻi he talanoa ki he niʻihi kehé ʻo fekauʻaki mo e Puleʻanga faka-Mīsaiá. ʻOku nofo ʻa Frank ʻi he fonua tatau. Ko ia mo hono uaifí ʻokú na fakalototoʻaʻi ʻa e niʻihi kehé ʻaki ʻa e ongoongo lelei mei he Tohi Tapú. ʻOku pehē ʻe Frank: “Koeʻuhi ko e tuʻunga ʻi he māmaní, ʻoku loto-moʻua ai ʻa e kakai tokolahi he ʻaho ní ʻo fekauʻaki mo e kahaʻú. ʻOkú ma feinga ke fakalototoʻaʻi kinautolu ʻaki ʻa e ngaahi kikite Fakatohitapu fekauʻaki mo ha māmani palataisí.” Ko Kristian mo Frank ʻokú na tokoni ai ki hono fakahoko ʻa e tafaʻaki ʻe taha ʻo e fakaʻilonga ʻa Sīsuú—ko hono malangaʻi ʻa e ongoongo lelei ʻo e Puleʻangá.—Mātiu 24:14.

ʻI he aʻu ʻa e ngaahi ʻaho fakaʻosí ki honau tumutumú, ʻe tafiʻi atu ai ʻe Sīsū ʻa e fokotuʻutuʻu motuʻa ko ení pea mo e kakai ʻoku nau poupouʻi iá. ʻE fakaleleiʻi leva ai ʻe he Puleʻanga faka-Mīsaiá ʻa e ngaahi meʻa ʻi he foʻi māmaní, ʻa ia ʻe ʻomai ki hono tuʻunga Palataisi naʻe tomuʻa talá. ʻE fakatauʻatāinaʻi ai ʻa e faʻahinga ʻo e tangatá mei he puké mo e maté, pea ʻe fokotuʻu hake ʻa e kau maté ki he moʻui ʻi he foʻi māmaní. Ko e ngaahi tafaʻaki fakafiefia eni ʻoku tatali mai ki he faʻahinga ʻoku nau ʻiloʻi ʻa e fakaʻilonga ʻo e taimí. ʻIkai ʻe hoko ko e ʻalunga fakapotopotó ia ke ako lahi ange fekauʻaki mo e fakaʻilongá pea mo e meʻa kuo pau ke fai ʻe ha taha ke hao ai ʻi he ngataʻanga ʻo e fokotuʻutuʻu ko ení? Ko e moʻoni ʻoku totonu ke hoko eni ko ha meʻa mātuʻaki fakavavevave ki he tokotaha kotoa.—Sione 17:3.

[Fakamatala ʻi he peesi 4]

Naʻe tomuʻa tala ʻe Sīsū ha ngaahi meʻa lahi ʻe hoko ʻa ia ʻe faʻuʻaki fakataha ia ha fakaʻilonga ʻa ia ʻe lava ke ʻiloʻi mei ha feituʻu pē ʻi he māmaní

[Fakamatala ʻi he peesi 6]

ʻOkú ke sio ki ha sīpinga, ko ha fakaʻilonga faʻu fetuiaki ʻoku mahuʻinga fakaemāmani lahi?

[Puha/Fakatātā ʻi he peesi 6]

NGAAHI FAKAʻILONGA FAKAPAPAUʻIʻANGA ʻO E NGAAHI ʻAHO FAKAʻOSÍ

Tau taʻehanotatau.—Mātiu 24:7; Fakahā 6:4

Honge.​—Mātiu 24:7; Fakahā 6:​5, 6, 8

Ngaahi mahaki fakaʻauha.​—Luke 21:11; Fakahā 6:8

Tupulaki ʻa e maumau-laó.​—Mātiu 24:12

Ngaahi mofuike.​—Mātiu 24:7

Ngaahi taimi faingataʻa.​—2 Timote 3:1

ʻOfa tōtuʻa ki he paʻangá.​—2 Timote 3:2

Talangataʻa ki he ngaahi mātuʻá.​—2 Timote 3:2

Taʻeʻofa-ki-hoʻota.​—2 Timote 3:3

ʻOfa ki he mālié ʻo ʻikai ʻofa ki he ʻOtuá.​—2 Timote 3:4

Ko ha taʻefakamaʻumaʻu.​—2 Timote 3:3

Taʻeʻofa ki he leleí.​—2 Timote 3:3

ʻIkai ha ʻaloʻiloa ki he fakatuʻutāmaki ʻoku tuʻunuku maí.​—Mātiu 24:39

Fakataleʻi ʻe he kau manukí ʻa e fakamoʻoni ʻo e ngaahi ʻaho fakaʻosí. ​—2 Pita 3:​3, 4

Malangaʻi ʻi māmani lahi ʻa e Puleʻanga ʻo e ʻOtuá.​—Mātiu 24:14

[Maʻuʻanga ʻo e Tā ʻi he peesi 5]

Kau sōtia WWI: From the book The World War ​—A Pictorial History, 1919; fāmili masiva: AP Photo/Aijaz Rahi; maʻukovia ʻe he polioó: © WHO/P. Virot