Ko Ho Konisēnisí ʻOku Akoʻi Lelei?

KUO faifai ange peá ke pehē, “ʻoku ou ʻiloʻi ʻi hoku lotó ʻoku ʻikai ke tonu ia,” pe, “heʻikai lava ke u fai ʻa e meʻa naʻá ke kole mai ke u faí. ʻOku ʻi ai ʻa e meʻa ʻi loto ʻokú ne tala mai kiate au ʻoku hala ia”? Ko e “leʻo” ia ʻo ho konisēnisí, ʻa e ʻiloʻi ko ia ʻi loto, pe ongoʻi, ʻa e tonú mo e halá, ʻa ia ʻokú ne fakatonuhiaʻi pe fakahalaiaʻi ha tokotaha. ʻIo, ko e konisēnisí ʻoku fanauʻi mai pē ia mo kitautolu.

Naʻa mo e ʻi hono tuʻunga ʻo e mavahe mei he ʻOtuá, ʻoku kei maʻu pē ʻe he tangatá ʻa e malava lahi ke fakafaikehekeheʻi ʻa e tonú mei he halá. ʻOku peheé koeʻuhi naʻe ngaohi ia ʻi he ʻīmisi ʻo e ʻOtuá, ʻo ne tapua atu ai ʻi ha tuʻunga ʻa e ongo ʻulungāanga fakaʻotua ko e potó mo e māʻoniʻoní. (Senesi 1:​26, 27) ʻI he fekauʻaki mo e meʻá ni, naʻe tohi ʻe he ʻapositolo ko Paulá ʻi he malumalu ʻo e fakamānavaʻi fakaʻotuá: “Ko e Senitaile, ʻa e kakai ʻoku ʻikai te nau maʻu lao, ʻo ka ai haʻanau fai fakaenatula pe ʻa e ngaahi meʻa ʻoku ʻi he Lao, neongo ʻoku ʻikai te nau maʻu lao ka ko e lao pe ʻa kinautolu maʻanautolu: he ko e faʻahinga ia ʻoku ha ʻi heʻenau anga kuo tohi ʻi honau loto ʻa e ngaue fakalao; ai mo e fakamoʻoni foki ʻe honau konisenisi, mo ʻenau fevakaiʻaki ʻa ʻenau toʻonga, ʻo nau fakahalaia, ʻio mo fakatonuhia foki.” a​—Fakaʻītali ʻamautolu; Loma 2:​14, 15.

Ko e natula fakaeʻulungāanga ko ení, ʻi heʻene tukufakaholo mai mei he ʻuluaki tangatá, ʻa ʻĀtama, ʻoku ngāue ia ko ha “lao,” pe ko ha tuʻutuʻuni fakaeʻulungāanga, ʻi he kakai ʻo e matakali mo e fonua kotoa pē. Ko e malava ia ke sivisiviʻi kitautolu pea fakahoko ha fakamaau fekauʻaki mo kitautolu tonu. (Loma 9:1) Naʻe fakahāhā ʻe ʻĀtama mo ʻIvi ʻa e tufakanga ko ení he ʻi heʻena maumauʻi pē ʻa e lao ʻa e ʻOtuá—naʻá na toitoi. (Senesi 3:​7, 8) Ko e fakatātā ʻe taha ʻa e anga ʻo e ngāue ʻa e konisēnisí ko e anga ʻo e tali ʻa Tuʻi Tēvita ʻi he taimi naʻá ne ʻiloʻi ai naʻá ne faiangahala ʻi hono fai ha tohi-kakaí. ʻOku pehē ʻe he Tohi Tapú naʻe “tautea ʻa Tevita ʻe hono loto.”—2 Samiuela 24:​1-10.

Ko e malava ke sio ki he kuohilí ʻo fakamāuʻi ʻa hoto ʻulungāangá ʻe lava ke ne fakatupunga ʻa e ola mātuʻaki mahuʻinga ʻo e fakatomala fakaʻotuá. Naʻe tohi ʻe Tēvita: “Lolotonga ʻeku fakalongo pe, ko hoku ngaahi hui naʻe ʻaufoē, pea ʻosi ʻa e ʻaho mo ʻeku toʻe. Naʻa ku fakamoʻoni ki he ʻAfiona ʻeku hia, pea naʻe ʻikai te u fufū ʻeku angahala: naʻa ku pehē, Te u vete ki he ʻEiki ʻeku ngaahi talangataʻa; pea naʻa ke tamateʻi ʻa e moʻua ʻo ʻeku angahala.” (Sāme 32:​3, 5) Ko ia ai, ko ha konisēnisi ʻoku ngāue ʻe lava ke ne fakafoki ʻa e tokotaha angahalá ki he ʻOtuá, ʻi hono tokoniʻi ia ke ne ʻiloʻi ʻa e fiemaʻu ke maʻu ʻa e fakamolemole ʻa e ʻOtuá pea ke muimui ʻi Heʻene ngaahi foungá.—Sāme 51:​1-4, 9, 13-​15.

ʻOku toe ʻomai ʻe he konisēnisí ʻa e ngaahi fakatokanga pe ʻomai ʻa e tataki ʻi he taimi ʻoku fiemaʻu ai ke tau fai ha fili pe ko ha fakapapau fakaeʻulungāangá. Ko e tafaʻaki ko eni ʻo e konisēnisí naʻá ne tokoniʻi nai ʻa Siosifa ke ne tomuʻa ʻiloʻi naʻe hala mo kovi ʻa e tonó​—ko ha angahala ia ki he ʻOtuá. Ko ha lao fakahangatonu ki he tonó naʻe fakakau ia ki mui ʻi he Fekau ʻe Hongofulu naʻe ʻoange ki ʻIsilelí. (Senesi 39:​1-9; Ekisoto 20:14) ʻOku hā mahino, ʻoku ngalingali te tau maʻu ʻa e ʻaonga lahi mamaʻo ange ʻi he taimi ʻoku  akoʻi ai hotau konisēnisí ke ne tataki kitautolu kae ʻikai ke fakamāuʻi pē kitautolú. ʻOku ngāue ʻa ho konisēnisí ʻi ha founga pehē?

Ko Hono Akoʻi ʻa e Konisēnisí Ke Ne Fai ʻa e Ngaahi Fili Totonú

Neongo ʻoku tau maʻu ʻi hotau fanauʻí ʻa e tufakanga ko e konisēnisí, ko hono pangó ko e meʻaʻofa ko iá ʻoku fakameleʻi. Neongo naʻe ʻoange ha kamata haohaoa ki he faʻahinga ʻo e tangatá, “kuo fai angahala kotoa pe, pea ʻoku ʻikai te nau aʻusia ʻa e hōifua ʻa e ʻOtua.” (Loma 3:23) Koeʻuhi ʻoku fakameleʻi kitautolu ʻe he angahalá mo e taʻehaohaoá, ʻe mioʻi nai ai hotau konisēnisí pea ʻikai nai kei ngāue kakato ʻi he ngaahi founga naʻe muʻaki fakataumuʻa ki aí. (Loma 7:​18-23) Tānaki atu ki ai, ko e ngaahi meʻa tefito ʻi tuʻá ʻe lava ke ne uesia hotau konisēnisí. ʻE lava ke tākiekina ia ʻe hotau ʻohaké pe ngaahi tōʻonga, ngaahi tui, mo e ʻātakai fakafeituʻú. Ko e moʻoni ko e ngaahi ʻulungāanga ololaló mo e ngaahi tuʻunga hōloa ʻa e māmaní ʻe ʻikai lava ke hoko ko e tuʻunga ia ʻo ha konisēnisi lelei.

Ko ia ai, kuo pau ke maʻu ʻe ha Kalisitiane ʻa e tokoni lahi ange ʻo e ngaahi tuʻunga tuʻumaʻu mo māʻoniʻoni ʻoku maʻu ʻi he Folofola ʻa e ʻOtuá, ʻa e Tohi Tapú. Ko e ngaahi meʻá ni ʻe lava ke ne tataki hotau konisēnisí ke ne fakapapauʻi totonu ʻa e ngaahi meʻá pea fakatonutonu kinautolu. (2 Timote 3:16) ʻI he taimi ʻoku fakamaama ai hotau konisēnisí ʻo fakatatau ki he ngaahi tuʻunga ʻa e ʻOtuá, ʻe lava ke ngāue lelei ange ai ʻi he tuʻunga ko ha meʻangāue maluʻi fakaeʻulungāanga, ʻo ʻai ai ke tau malava ʻo “fakafaikehekeheʻi fakatouʻosi ʻa e tonú mo e halá.” (Hepelu 5:​14, NW) ʻI he ʻikai ʻa e ngaahi tuʻunga ʻa e ʻOtuá, ʻe ʻikai nai ke ʻomai ʻe hotau konisēnisí ha fakatokanga ʻi he taimi ʻoku tau hē ai ki ha ʻalunga koví. “ʻOku ai ha hala ʻoku matamata totonu ki he tangata,” ko e lau ia ʻa e Tohi Tapú, “ka ʻoku tuʻulu atu ki he ngaahi hala ʻoku fakatau ki he mate.”—Palovepi 16:25; 17:20.

ʻI he ngaahi tafaʻaki ʻe niʻihi ʻo e moʻuí, ʻoku fokotuʻu mai ai ʻe he Folofola ʻa e ʻOtuá ʻa e ngaahi tataki mo e fakahinohino māʻalaʻala, pea ʻoku lelei ke tau muimui ki ai. ʻI he tafaʻaki ʻe tahá, ʻoku lahi ʻa e ngaahi tuʻunga ʻa ia ʻoku ʻikai ha ngaahi fakahinohino papau ki ai ʻi he Tohi Tapú. ʻOku kau nai ki heni ʻa e ngaahi fili ʻi he ngāué, ngaahi meʻa kau ki he moʻui leleí, fakafiefiá, valá mo e teuteú pea mo e ngaahi tafaʻaki kehe. ʻOku ʻikai faingofua ke ʻiloʻi ʻa e meʻa ke fai ʻi he tuʻunga taki taha, pea ke fai ʻa e fili totonú. ʻI he ʻuhinga ko iá ʻoku totonu ke tau maʻu ʻa e fakakaukau ʻa Tēvitá, ʻa ia naʻá ne lotu: “ʻEiki, fakaʻilo mai ho ngaahi founga; ako kiate au ho ngaahi ʻalunga. Tataki au ʻi hoʻo moʻoni, pea ako kita; he ko koe hoku ʻOtua fakamoʻuiʻanga.” (Sāme 25:​4, 5) Ko e lelei ange ʻetau mahinoʻi ʻa e ngaahi fakakaukau mo e founga ʻa e ʻOtuá, ko e lahi ange ia ʻo ʻetau malava ke fakafuofua totonu hotau ngaahi tuʻungá pea fai ha ngaahi fili fakataha mo ha konisēnisi maʻa.

Ko ia ai, ʻi he taimi ʻoku tau fehangahangai ai mo ha fehuʻi pe ko ha filí, ʻoku totonu ke tau ʻuluaki fakakaukauloto atu ki he ngaahi tefitoʻi moʻoni Fakatohitapu ʻoku ngāueʻaki nai  ki aí. Ko e niʻihi nai eni ʻo kinautolu: fakaʻapaʻapa ki he tuʻunga-ʻulú (Kolose 3:​18, 20); faitotonu ʻi he meʻa kotoa pē (Hepelu 13:18); fehiʻa ki he meʻa ʻoku koví (Sāme 97:10); tuli ki he melinó (Loma 14:19); talangofua ki he kau maʻu mafai kuo fokotuʻú (Mātiu 22:21; Loma 13:​1-7); līʻoa maʻataʻatā ki he ʻOtuá (Mātiu 4:​10); ʻikai hoko ko ha konga ʻo e māmaní (Sione 17:14); fakaʻehiʻehi mei he feohi koví (1 Kolinito 15:33); fakanānā ʻi he valá mo e teuteú (1 Timote 2:​9, 10); pea ʻoua ʻe fakatupu tūkia ki he niʻihi kehé (Filipai 1:​10). Ko hono ʻiloʻi ʻa e ngaahi tefitoʻi moʻoni Fakatohitapu feʻungamālié ʻe lava ai ke fakaivimālohi hotau konisēnisí pea tokoniʻi kitautolu ke tau fai ʻa e fili totonú.

Fanongo ki Ho Konisēnisí

Koeʻuhi ke tokoniʻi kitautolu ʻe hotau konisēnisí, kuo pau ke tau tokanga ki ai. Ko e taimi pē ʻoku tau tali vave ai ʻa e angi ʻa hotau konisēnisi kuo akoʻi ʻe he Tohi Tapú te tau toki maʻu ʻaonga leva ai mei ai. ʻE lava ke tau fakahoa ʻa e konisēnisi kuo akoʻí ki he ngaahi maama fakatokanga ʻi he sioʻata fakatokanga ki he fiemaʻu ʻa e meʻalelé. Tau pehē ʻoku ulo mai ha maama ʻo fakatokanga mai kiate kitautolu ʻoku tōlalo ʻa e lahi ʻo e loló. Ko e hā ʻe hokó kapau naʻe ʻikai ke tau fai ha tokanga vave ki he meʻá pea hokohoko atu pē ʻa e lele holo ʻi he meʻalelé? ʻE lava ke tau fakatupunga ai ʻa e maumau lahi ki he mīsiní. ʻI ha founga meimei tatau, ko hotau konisēnisí, pe leʻo ʻi lotó, ʻoku lava ke ne fakatokanga mai kiate kitautolu ʻoku hala ha founga ngāue pau. ʻI hono fakahoa hotau ngaahi tuʻunga mo e ʻulungāanga Fakatohitapú ki he founga ngāue ʻoku fai pe fakakaukau ki aí, ʻoku ulo mai ai ha fakatokanga, ʻo hangē ko e meʻa ʻoku fai ʻe he maama ʻo e sioʻata fakatokangá ki he fiemaʻu ʻa e meʻalelé. Ko e tokanga ki he fakatokangá ʻe tokoniʻi ai kitautolu ʻo ʻikai ngata pē ke tau fakaʻehiʻehi mei he ngaahi nunuʻa kovi ʻo e ngāue halá kae toe fakatolonga foki ai ʻa e ngāue totonu ʻa hotau konisēnisí.

Ko e hā ʻe hokó kapau naʻa tau fili ke tukunoaʻi ʻa e fakatokangá? ʻI he faai atu ʻa e taimí, ʻe lava ke hoko ai ʻo ongonoa ʻa e konisēnisí. Ko e ola ʻo e hokohoko tukunoaʻi pe lōmia ʻa e konisēnisí ʻe lava ke fakatatau ki hono tutu ko ia ʻa e kakanó ʻaki ha ukamea velá. Ko e tisiū patú, ʻi he ʻikai ʻi ai ha fanga kiʻi hikuhikuʻi neavé, ʻoku ʻikai toe ʻi ai ha ongoʻanga ʻo e ongoʻi ha meʻá. (1 Timote 4:2) Ko ha konisēnisi pehē ʻoku ʻikai ke ne kei fai ha tali ki hono fai ʻo e angahalá, pea ʻoku ʻikai te ne fai ha ngaahi fakatokanga ke taʻofiʻaki hano toutou fai ʻo e angahalá. Ko ha konisēnisi patu ʻokú ne tukunoaʻi ʻa e ngaahi tuʻunga Fakatohitapu ki he tonú mo e halá pea hoko ai ia ko ha konisēnisi kovi. Ko ha konisēnisi ia kuo ʻuliʻi, ko e tokotaha ʻokú ne maʻu iá ʻoku hoko ʻo “ongonoa” pea mavahe mei he ʻOtuá. (Efeso 4:​17-​19; Taitusi 1:​15) Ko ha ola fakamamahi moʻoni ē!

‘Maʻu ha Konisenisi ʻAtaʻatā’

Ke tauhi maʻu ha konisēnisi ʻataʻatā ʻoku fiemaʻu ki ai ʻa e feinga hokohoko. Naʻe pehē ʻe he ʻapositolo ko Paulá: “ʻOku ou nofoʻaki ngaue ai ʻe au foki, ke tauhi maʻu hoku konisenisi ke  taʻe melengatamaki ki he ʻOtua mo e tangata.” (Ngāue 24:16) ʻI he hoko ko ha Kalisitiané, naʻe siviʻi mo fakatonutonu hokohoko ʻe Paula ʻa ʻene founga ngāué ke fakapapauʻi ʻokú ne taʻemelengatāmaki ki he ʻOtuá. Naʻe ʻiloʻi ʻe Paula ʻi he ʻanalaiso fakaʻosí, ko e ʻOtuá ia te ne fakapapauʻi ʻa e tuʻunga tonu pe hala ʻo e meʻa ʻoku tau faí. (Loma 14:​10-​12; 1 Kolinito 4:4) Naʻe pehē ʻe Paula: “ʻOku telefua mo tokaimaʻananga ʻa e meʻa kotoa pe ki he fofonga ʻo ia ʻoku tau fakamāu ki ai.”—Hepelu 4:13.

Naʻe toe lave foki ʻa Paula ki he taʻemelengatāmaki ki he tangatá. Ko ha tuʻunga feʻungamālie ʻa ʻene faleʻi ki he kau Kalisitiane Kolinitoó fekauʻaki mo hono “kai ʻa e meʻa ne ʻatu ki he aitoli.” Ko ʻene poiní naʻa mo e taimi ʻoku ʻikai ai fepaki ha ʻalunga pau ʻiate ia pē mo e tuʻunga ʻo e Folofola ʻa e ʻOtuá, ʻoku mātuʻaki mahuʻinga ke tokanga ki he konisēnisi ʻo e niʻihi kehé. Ko e taʻemalava ke fai iá ʻe lava ke ne fakatupunga ʻa e ‘vaivai ki siʻotau tokoua naʻe pekia ki ai ʻa Kalaisí.’ ʻE toe lava ke tau maumauʻi ai hotau vahaʻangatae mo e ʻOtuá.—1 Kolinito 8:​4, 11-13; 10:​23, 24.

Ko ia ai, hokohoko atu hono akoʻi ho konisēnisí pea tauhi ha konisēnisi ʻataʻatā. ʻI hono fai ʻa e ngaahi filí, kumi ki he tataki ʻa e ʻOtuá. (Semisi 1:5) Ako ʻa e Folofola ʻa e ʻOtuá, pea fakaʻatā ʻa ʻene ngaahi tefitoʻi moʻoní ke ne fakafuo ho ʻatamaí mo e lotó. (Palovepi 2:​3-5) ʻI he taimi ʻoku malanga hake ai ʻa e ngaahi ʻīsiu mafatukitukí, kumi faleʻi mei he kau Kalisitiane matuʻotuʻá ke fakapapauʻi ʻokú ke maʻu ʻa e mahino totonu ki he ngaahi tefitoʻi moʻoni Fakatohitapu ʻoku kau ki aí. (Palovepi 12:15; Loma 14:1; Kaletia 6:5) Fakakaukau ki he founga ʻe uesia ai ho konisēnisí ʻe hoʻo filí, founga ʻene uesia ʻa e niʻihi kehé pea hiliō he meʻa kotoa, ko e founga ʻene uesia ho vahaʻangatae mo Sihová.—1 Timote 1:​5, 18, 19.

Ko hotau konisēnisí ko ha meʻaʻofa fakaofo ia mei heʻetau Tamai ʻofa fakahēvaní, ʻa Sihova ko e ʻOtuá. ʻI hono ngāueʻaki ia ʻo fehoanaki mo e finangalo ʻo e Tokotaha-Foaki naʻá ne ʻomai iá, te tau ʻunuʻunu ofi ange ai ki hotau Tokotaha-Fakatupú. ʻI heʻetau feinga ke maʻu ‘ha konisenisi ʻataʻatā’ ʻi he meʻa kotoa ʻoku tau faí, ʻoku tau hoko ʻo fakahāhā ofi ʻaupito ange ai naʻe ngaohi kitautolu ʻi he ʻīmisi ʻo e ʻOtuá.—1 Pita 3:15 (16, PM); Kolose 3:10.

[Fakamatala ʻi lalo]

[Fakatātā ʻi he peesi 13]

ʻOku akoʻi ho konisēnisí ke ne tataki koe kae ʻikai ke fakamāuʻi pē koe?

[Fakatātā ʻi he peesi 14]

Ko ha konisēnisi kuo akoʻi lelei ʻoku tupu ia

mei heʻetau ako mo ngāueʻaki ʻa e ngaahi tefitoʻi moʻoni Fakatohitapú

[Fakatātā ʻi he peesi 15]

ʻOua ʻe tukunoaʻi ʻa e ngaahi fakatokanga ʻa ho konisēnisí