Talanoa ki he Moʻuí

Ko e Faʻifaʻitakiʻanga ʻa ʻEku Ongo Mātuʻá Naʻá Ne Fakaivimālohiʻi Au

FAKAMATALA FAI ʻE JANEZ REKELJ

Ko e taʻú ko e 1958. Ko au mo hoku uaifí, ko Stanka, naʻá ma ʻi ʻolunga ʻi he ʻOtu Moʻunga Karawanken ʻi he kauʻāfonua ʻIukosilāvia-ʻAosituliá, ʻi he feinga ke hola ki ʻAositulia. Naʻe fakatuʻutāmaki eni, he naʻe fakapapauʻi ʻe he kau leʻo toʻo naunau tau ʻo e kauʻāfonua ʻIukosilāviá ke taʻofi ha taha pē mei he kolosi aí. ʻI heʻema ngaʻunu atú, naʻá ma aʻu ai ʻo fehangahangai mo ha ngataʻanga ʻo ha lilifa naʻe ngungutu ki lalo. Naʻe ʻikai ʻaupito ke u sio mo Stanka ʻi he ngaahi tafatafaʻaki moʻunga ʻAosituliá ki muʻa. Naʻá ma huʻu fakahahake ʻo ma aʻu ai ki ha tahifo tokakovi ʻo e maka mo e fanga kiʻi makamaka. ʻI hono haʻi kimaua ki ha tapoleni ʻa ia naʻá ma toʻó, naʻá ma fakaheheke hifo he tafaʻaki moʻungá ʻo ʻikai ʻilo pe ko e hā ʻe hoko kiate kimauá.

TUKU ke u fakamatala ki he ʻuhinga naʻá ma hoko ai ʻo ʻi he tuʻunga ko ení mo e anga hono ueʻi au ʻe he faʻifaʻitakiʻanga ʻa ʻeku ongo mātuʻa faitōnungá ke mateaki ai pē kia Sihova ʻi he ngaahi taimi faingataʻá.

Naʻá ku tupu hake ʻi Solovēnia, ʻa ia ʻi he ʻaho ní ko ha kiʻi fonua ʻIulope Lotoloto ia. ʻOku tuʻu ia he ʻOtu Moʻunga ʻIulopé, ʻo tuʻu ʻa ʻAositulia ki he tokelaú, ʻĪtali ki he hihifó, Kolōtia ki he tongá, pea ko Hungali ki he hahaké. Kae kehe, ʻi he taimi naʻe fāʻeleʻi ai ʻeku ongo mātuʻá, ko Franc mo Rozalija Rekelj, naʻe hoko ʻa Solovēnia ko ha konga ia ʻo e ʻEmipaea ʻAositulia-Hungalí. ʻI he ngataʻanga ʻo e Tau I ʻa Māmaní, naʻe hoko ai ʻa Solovēnia ko e konga ʻo ha vahefonua foʻou naʻe ui ko e Puleʻanga ʻo e kau Sēpiá, Kolōtiá mo e Solovēniá. ʻI he 1929 naʻe liliu ai ʻa e hingoa ʻo e fonuá ki he ʻIukosilāviá, ko hono moʻoní ko “Silāvia Tonga.” Naʻe fāʻeleʻi au ʻi Sanuali 9 ʻo e taʻu tatau, ʻi he tuʻakolo ʻo e kolo ko Podhom, ofi ki he Anovai Bled fakaʻofoʻofá.

 Naʻe ʻohake ʻa e fineʻeikí ko ha Katolika fefeka. Ko e taha ʻo e tokoua ʻo ʻene tamaí ko ha pātele ia, pea ko e toko tolu ʻo hono fanga mehikitangá ko e kau tāupoʻou. Naʻá ne maʻu ha holi lahi ke maʻu ha Tohi Tapu, ke ne lau, pea ke ne mahinoʻi ia. Kae kehe, ko e tangataʻeikí naʻe ʻikai te ne loko leleiʻia ʻi he lotú. Naʻá ne fakaliliʻa ʻi he kaunga ʻa e lotú ki he Tau Lahi ʻo e 1914-18.

Ko Hono Ako ʻa e Moʻoní

ʻI ha taimi hili ʻa e taú, ko e tokotaha naʻe tuongaʻaneʻaki ʻe heʻeku faʻeé, ko Janez Brajec, mo hono uaifí, ko Ančka, naʻá na hoko ko e ongo Ako Tohi Tapu, hangē ko ia naʻe uiʻaki ʻa e Kau Fakamoʻoni ʻa Sihová he taimi ko iá. ʻI he taimi ko ení, naʻá na nofo ʻi ʻAositulia. Mei he 1936 nai ʻo faai mai ai, naʻe haʻu ai ʻa Ančka ʻi he taimi lahi ke ʻaʻahi ki he fineʻeikí. Naʻá ne ʻomai ha Tohi Tapu, ʻa ia naʻe vave hono lau ʻe he fineʻeikí, fakataha mo e ngaahi tatau ʻo e Taua Leʻo mo e ʻū tohi Fakatohitapu kehe ʻi he lea faka-Solovēniá. Faifai atu pē, koeʻuhi ko hono puleʻi ʻe Hitilā ʻa ʻAositulia ʻi he 1938, naʻe foki mai ai ʻa Janez mo Ančka ki Solovēnia. ʻOku ou manatuʻi ko ha ongo meʻa poto mo ʻiloʻilo kinaua fakataha mo ha ʻofa moʻoni kia Sihova. Naʻá na faʻa lāulea ki he ngaahi moʻoni Fakatohitapú mo e fineʻeikí, ʻa ia naʻe ueʻi ai ia ke ne fakatapui ʻa ʻene moʻuí kia Sihova. Naʻá ne papitaiso ʻi he 1938.

Naʻe fakatupunga ʻe he fineʻeikí ha fakakikihi ʻi he feituʻú ʻi he tuku ʻene kātoangaʻi ʻa e ngaahi anga fakafonua taʻefakatohitapú, hangē ko hono kātoangaʻi ʻo e Kilisimasí; ʻi he ʻikai te ne kei kai ʻa e sōsisi totó; pea tautefito ʻi he taimi naʻá ne toʻo ai ʻo tutu ʻa e ngaahi ʻīmisi kotoa pē naʻa mau maʻú. Naʻe tuai e kemo kuo hoko mai ʻa e fakafepakí. Ko e fanga mehikitanga ʻo e fineʻeikí, ʻa e kau tāupoʻoú, naʻa nau tohi ki ai, ʻo feinga ke fakalotoʻi ia ke foki kia Malia mo e siasí. Kae kehe, ʻi he tohi ʻa e fineʻeikí ʻo ʻeke kia kinautolu ʻa e tali ki he ngaahi fehuʻi Fakatohitapu tefitó, naʻe ʻikai ha tali mai. Naʻe toe fakafepakiʻi fefeka ia ʻe heʻeku kui-tangatá. Naʻe ʻikai ko ha tangata anga-kovi ia, ka naʻe tenge lahi ia ʻe homau ngaahi kāingá pea mo e koló. Ko hono olá, naʻá ne fakaʻauha ʻi ha ngaahi taimi ʻa e ʻū tohi Fakatohitapu ʻa e fineʻeikí, ka naʻe ʻikai ʻaupito te ne ala ki heʻene Tohi Tapú. Naʻá ne tūʻulutui ʻo kōlenga kiate ia ke ne foki ki he siasí. Naʻe aʻu ki he tuʻunga naʻá ne fakamanamanaʻi ʻaki ai ia ha hele. Neongo ia, naʻe tala ange papau kiate ia ʻe heʻeku tamaí ko e tōʻonga peheé ʻe ʻikai makātakiʻi.

Naʻe hokohoko atu ʻa e poupouʻi ʻe he tangataʻeikí ʻa e totonu ʻa e fineʻeikí ke ne lau ʻa e Tohi Tapú pea ke fai ʻene ngaahi fili pē ʻaʻana ki heʻene tuí. ʻI he 1946 naʻá ne papitaiso ai mo ia foki. ʻI he sio ki he anga hono fakaivimālohiʻi ʻe Sihova ʻa ʻeku faʻeé ke ne tuʻu taʻemanavahē maʻá e moʻoní neongo ʻa e fakafepakí, pea mo e anga hono fakapaleʻi ia ʻe Sihova ʻi heʻene tuí, naʻe ueʻi ai au ke u fakatupulekina ʻa e vahaʻangatae ʻoʻoku pē mo e ʻOtuá. Naʻá ku toe maʻu ʻaonga lahi mei he tōʻonga  lautohi leʻo-lahi ʻa e fineʻeikí kiate au mei he Tohi Tapú pea mei he ʻū tohi makatuʻunga ʻi he Tohi Tapú.

Naʻe toe fai foki ʻe he fineʻeikí ʻa e ngaahi fetalanoaʻaki lōloa mo hono tokouá, ko Marija Repe, pea naʻe faifai pē ʻou papitaiso mo Marija ʻi he ʻaho tatau ʻi he vaeuaʻanga ʻo Siulai 1942. Naʻe haʻu ha tokoua ke ne fai ha malanga nounou, pea naʻe papitaiso kimaua ʻi homau ʻapí ʻi ha fuʻu topu papa.

Ngāue Pōpula Lolotonga ʻa e Tau II ʻa Māmaní

ʻI he 1942, ʻi he lotolotonga ʻo e Tau II ʻa Māmaní, naʻe ʻohofi ai ʻe Siamane mo ʻĪtali ʻa Solovēnia ʻo na vahevahe ia ʻia kinaua pea mo Hungali. Naʻe fakafisi ʻa ʻeku ongo mātuʻá ke na kau ki he Volksbund, ko e kautaha ʻa e kau Nasí. Naʻá ku fakafisi ke lea “Heil Hitler” ʻi he ʻapiakó. ʻOku hā mahino, naʻe fakahā ʻe heʻeku faiakó ki he kau maʻu mafaí ʻa e tuʻunga ko iá.

Naʻe fakaheka kimautolu ki ha lēlue naʻe huʻu ki ha kāsolo ofi ki he kolo ko Hüttenbach, Bavaria, ʻa ia naʻe ngāueʻaki ko ha kemi ngāue fakamamahi. Naʻe fokotuʻutuʻu ʻa ʻeku tamaí ke u ngāue mo nofo ʻi ha tokotaha taʻo mā pea mo hono fāmilí ʻi he feituʻú. Lolotonga ʻa e taimi ko ení, naʻá ku ako ai ke hoko ko ha tokotaha taʻo mā, ʻa ia naʻe fakamoʻoniʻi ʻene ʻaonga ʻaupito ki mui ai. ʻI he faai mai ʻa e taimí, naʻe hiki ai ʻa e toenga kotoa ʻo hoku fāmilí (kau ai ʻa Marija mo hono fāmilí) ki he kemi ʻi Gunzenhausen.

ʻI he ngata ʻa e taú, naʻá ku te u ai ke kau ki ha kulupu ke fononga ki he feituʻu naʻe ʻi ai ʻeku ongo mātuʻá. ʻI he efiafi ki muʻa ke u mavahé, naʻe ʻasi fakafokifā mai ai ʻa e tangataʻeikí. ʻOku ʻikai te u ʻilo pe naʻá ku mei iku ki fē kapau naʻá ku ʻalu mo e kulupú, he naʻe ʻikai ko e kakai falalaʻanga kinautolu. Naʻá ku toe ongoʻi ai ʻa e tokanga ʻofa ʻa Sihová, ʻi heʻene ngāueʻaki ʻeku ongo mātuʻá ke na maluʻi mo akoʻi aú. Naʻá ku lue lalo ai mo e tangataʻeikí ʻi he ʻaho ʻe tolu ke fetaulaki mo e fāmilí. ʻI Sune 1945 naʻa mau aʻu kotoa ai ki ʻapi.

Hili ʻa e taú, ko e kau Kominiusí ʻi he malumalu ʻo e tuʻunga taki ʻa Palesiteni Josip Broz Tito naʻe hoko ki he mafaí ʻi ʻIukosilāviá. Tupu mei ai, naʻe faingataʻa ai pē ʻa e ngaahi tuʻungá ki he Kau Fakamoʻoni ʻa Sihová.

ʻI he 1948 naʻe haʻu ai ha tokoua mei ʻAositulia pea naʻá ne kai mo kimautolu. Naʻe muimuʻiʻi ia ʻe he kau polisí ʻi he feituʻu kotoa pē naʻá ne ʻalu ki aí, ʻo nau puke ʻa e fanga tokoua ko ē naʻá ne ʻaʻahi ki aí. Naʻe puke ai foki mo e tangataʻeikí ʻi heʻene fai kiate ia ʻa e anga-talitali kakai, kae ʻikai ke līpooti ia ki he kau polisí, pea naʻe tupu mei ai ʻa hono fakamoleki ʻe he tangataʻeikí ʻa e taʻu ʻe ua ʻi he pilīsoné. Ko ha taimi faingataʻa ʻaupito eni ki he fineʻeikí ʻo ʻikai koeʻuhi pē ko e ʻikai ʻi ai ʻa e tangataʻeikí ka koeʻuhí foki he naʻá ne ʻiloʻi ko hoku kiʻi tokouá pea mo au, ʻe vave ʻa ʻema fehangahangai mo e ʻahiʻahi ʻo e tuʻu-ʻataá.

Taimi Ngāue Pōpula ʻi Masitōniá

ʻI Nōvema 1949, naʻe ui ai au ki he ngāue fakakautaú. Naʻá ku līpooti ki ai pea ke fakamatalaʻi ʻa ʻeku fakafisi ke ngāue ʻi he tuʻunga fakakonisēnisí. Naʻe ʻikai ke fanongo kiate au ʻa e kau maʻu mafaí pea naʻa nau fakaheka au ʻi ha lēlue fakataha mo e kau sōtia foʻoú ʻa ia naʻe huʻu ki Masitōnia, ʻi he ngataʻanga ʻe taha ʻo ʻIukosilāviá.

Naʻe feʻunga mo e taʻu ʻe tolu ʻa ʻeku motuhia mei hoku fāmilí mo e fetokouaʻakí pea naʻá ku mavahe ʻo ʻikai ha ʻū tohi pe naʻa mo ha Tohi Tapu. Naʻe faingataʻa ʻaupito. Naʻe fakaivia au ʻe he fakalaulauloto kia Sihova mo e faʻifaʻitakiʻanga ʻa hono ʻAló, ʻa Sīsū Kalaisi. Naʻe toe fakaivimālohiʻi au ʻe he faʻifaʻitakiʻanga ʻa ʻeku ongo mātuʻá. Tānaki atu ki ai, ko e hokohoko lotu ki ha mālohí naʻá ne ʻai au ke u malava ai ʻo kalofi ʻa e siva ʻo e ʻamanakí.

Naʻe faifai pē ʻo ʻave au ki ha pilīsone ʻi Idrizovo, ofi ki Skopje. ʻI he pilīsone ko ení, naʻe ngāue ai ʻa e kau pōpulá ʻi he ngaahi fatongia mo e ngaahi  ngāue kehekehe naʻe fiemaʻu ki ai ʻa e pōtoʻi. Naʻá ku ʻuluaki ngāue ko ha tokotaha fakamaʻa pea hoko ko ha talafekau holo ʻi he ngaahi ʻōfisí. Neongo hono faʻa ngaohikoviʻi au ʻe ha pōpula ʻe taha, ʻa ia ko ha mēmipa ia ki muʻa ʻo e kau polisi fufuú, naʻe lelei ʻa hoku vā fakaengāue mo e tokotaha kehe kotoa—ʻa e kau kaʻaté, kau pōpulá, ʻo aʻu ki he pule ʻo e falengāue ʻi he pilīsoné.

Ki mui ai, naʻá ku ʻiloʻi ai naʻe fiemaʻu ha tokotaha taʻo mā ʻi he fale taʻo mā he pilīsoné. ʻI ha ngaahi ʻaho siʻi mei ai, naʻe haʻu ai ʻa e pulé ki he tali uí. Naʻá ne lue mai he lainé, ʻo tuʻu ʻi muʻa ʻiate au, ʻo ne ʻeke, “Ko ha tokotaha taʻo mā koe?” “ʻIo, tangataʻeiki,” ko ʻeku tala angé ia. “Līpooti he pongipongi ʻapongipongí ki he fale taʻo maá,” ko ʻene talí mai ia. Ko e pōpula naʻá ne ngaohikoviʻi aú naʻá ne faʻa lue mai he veʻe fale maá ka naʻe ʻikai lava ke ne toe fai mai ha meʻa. Naʻá ku ngāue ai mei Fepueli ki Siulai ʻi he 1950.

Naʻá ku hiki leva mei ai ki he ngaahi nofoʻanga sōtia naʻe ui ko Volkoderi, ʻi he fakatonga ʻo Masitōniá, ofi ki he Anovai Prespa. Mei Otešovo naʻe ofi maí naʻá ku malava ke faitohi ai ki ʻapi. Naʻá ku ngāue ʻi ha kulupu tanu hala, ka ko e lahi taha ʻo e taimí, naʻá ku ngāue ai ʻi ha fale taʻo mā, ʻa ia naʻá ne ʻai ke faingofua ange ai kiate au ʻa e ngaahi meʻá. Naʻe tukuange au ʻi Nōvema 1952.

Lolotonga ʻa e taimi naʻá ku mavahe ai mei Podhom, naʻe fokotuʻu ai ʻi he feituʻú ha fakatahaʻanga. Naʻe ʻuluaki fakataha ʻa e fakatahaʻangá ʻi ha fale nofo totongi ʻi Spodnje Gorje. Ki mui ai, naʻe ngaohi ʻe he tangataʻeikí ha loki naʻe ʻatā ʻi homau falé ke fakataha ai ʻa e fakatahaʻangá. Naʻá ku fiefia ke kau fakataha mo kinautolu ʻi heʻeku foki mai mei Masitōniá. Naʻá ku toe fakafoʻou foki ʻeku maheni mo Stanka, ʻa ia naʻá ku fetaulaki mo ia ki muʻa ke u ʻalu ki pilīsoné. ʻI ʻEpeleli 24, 1954, naʻá ma mali ai. Kae kehe, naʻe vave ʻa e hoko ʻo ngata ʻa ʻeku mālōloó.

Taimi Ngāue Pōpula ʻi Maribor

ʻI Sepitema 1954, naʻe toe ui ai au ki he taú. ʻI he taimi ko ení, naʻe tauteaʻi ai au ʻo laka hake he taʻu ʻe tolu mo e konga ʻi ha pilīsone ʻi Maribor, ʻa ia ʻoku tuʻu ʻi he ngataʻanga fakahahake ʻo Solovēniá. ʻI heʻeku malavá pē, naʻá ku fakatau mai ai ha pepa mo ha ngaahi peni vahevahe. Naʻá ku kamata ai ke tohi ʻa e meʻa kotoa pē naʻe lava ke u manatuʻí—ʻa e ngaahi konga Tohi Tapú, ngaahi lea mei he Taua Leʻo, mo e ngaahi fakakaukau mei he ʻū tohi faka-Kalisitiane kehe. Naʻá ku lau ʻa ʻeku noutí pea toe tānaki atu ki he meʻa naʻá ku hikí ʻi heʻeku manatuʻi ʻa e meʻa lahi angé. Naʻe iku ʻo fonu ʻa e pepá, pea naʻe ʻai ʻe he meʻa ko iá ke u malava ʻo nofoʻaki tokangataha ki he moʻoní pea kei mālohi fakalaumālie ai pē. Ko e lotú mo e fakalaulaulotó ko ha toe ongo tokoni mahuʻinga taʻehanotatau ia ki heʻeku mālohi fakalaumālié, ʻi hono ʻai au ke u malava ʻo loto-toʻa lahi ange ʻi hono vahevahe atu ʻa e moʻoní ki he niʻihi kehé.

ʻI he taimi ko iá, naʻe fakaʻatā ai ke u maʻu ha tohi ʻe taha ʻi he māhina mo ha ʻaʻahi ʻe taha ʻi he miniti ʻe 15 he māhina. Naʻe fononga mai ʻa Stanka ʻi he poó kotoa ʻi he lēlué koeʻuhi ke ne ʻaʻahi pongipongia mai kiate au ʻi he pilīsoné, pea lava leva ai ke ne toe fononga ʻo foki ʻi he ʻaho tatau pē. Naʻe fakalototoʻa ʻaupito kiate au ʻa e ngaahi ʻaʻahi ko ení. Naʻá ku faʻufaʻu leva ha palani ke maʻu ha Tohi Tapu. Naʻá ku tangutu fehangahangai mo Stanka ʻi ha tēpile, fakataha mo ha kaʻate naʻe vaheʻi ke ne leʻohi kimaua. ʻI he taimi naʻe ʻikai ke sio mai ai ʻa e kaʻaté, naʻá ku fakamouluʻi ai ha tohi ki heʻene kato toʻotoʻó, ʻo kole ange ke ne faʻo ha Tohi Tapu heʻene kató ʻi he taimi ʻo ʻene ʻaʻahi hoko maí.

Naʻe fakakaukau ʻa Stanka mo ʻeku ongo mātuʻá ʻoku fuʻu fakatuʻutāmaki ʻa e meʻá ni, ko ia naʻa nau toʻo ai ha konga tatau ʻo e Ngaahi Konga Tohi Tapu Faka-Kalisi Kalisitiané ʻo faʻo hano ngaahi peesi ʻi loto ʻi ha ngaahi foʻi pani. Naʻá ku maʻu ai ʻi he foungá ni ʻa e Tohi Tapu naʻá ku fiemaʻú. ʻI he founga tatau, naʻá ku toe maʻu ai ʻa e ngaahi tatau ʻo e Taua Leʻo, ʻa ia naʻe tohinimaʻi ʻe Stanka. Naʻá ku hiki vave ha toe tatau ʻe taha ʻi heʻeku  tohinima pē ʻaʻakú pea fakaʻauha leva ʻa e muʻaki tataú koeʻuhi ke ʻoua ʻe malava ha taha pē te ne maʻu ʻa e ngaahi kupú ʻo ʻiloʻi ʻa e feituʻu naʻá ku maʻu mei aí.

Koeʻuhi ko ʻeku kīvoi ʻi he faifakamoʻoní, naʻe fakahaaʻi ʻe he ngaahi kaungāpōpulá kuo pau ke hoko kiate au ʻa e faingataʻa. ʻI he taimi ʻe taha, naʻá ku fai ai ha fetalanoaʻaki Fakatohitapu longomoʻui mo ha kaungāpōpula. Naʻá ma fanongo ai ki hono fakahū ʻa e kií ʻi he foʻi loká, pea hū mai ki loto ha kaʻate. Naʻá ku fakakaukau ai pē he taimi pē ko iá ʻe tauteaʻi au ʻi he pilīsone malú. Ka naʻe ʻikai ko e taumuʻa ia ʻa e kaʻaté. Naʻá ne fanongo mai ki he fetalanoaʻakí peá ne loto ke kau ki ai. ʻI he fiemālie ʻi he ngaahi tali ki heʻene ngaahi fehuʻí, naʻá ne mavahe peá ne lokaʻi ʻa e matapā ʻo e loki pilīsoné.

Lolotonga ʻa e māhina fakaʻosi ʻo hoku tauteá, naʻe fakaongoongoleleiʻi ai au ʻe he komisiona naʻá ne tokangaʻi ʻa e feinga ke liliu ʻa e kau pōpulá, ʻi heʻeku fakapapauʻi ke tuʻu maʻá e moʻoní. Naʻá ku ongoʻi ko ha pale lelei ia ki heʻeku ngaahi feinga ke ʻai ke ʻiloa ʻa e huafa ʻo Sihová. ʻI Mē 1958, naʻe toe tukuange ai au mei pilīsone.

Hola ki ʻAositulia, pea ki ʻAositelēlia

ʻI ʻAokosi 1958 naʻe mate ai ʻeku fineʻeikí. Naʻá ne hokohoko puke ʻi ha taimi. Pea ʻi Sepitema 1958, naʻe ui ai au ko hono tuʻo tolú ia ki he taú. ʻI he efiafi ko iá naʻá ku fai ai mo Stanka ʻa e fili mahuʻinga ʻa ia naʻe taki atu ai ki heʻema kolosi fakaʻohovale ʻi he kauʻāfonuá ʻa ia naʻe lave ki ai ki muʻá. ʻI he ʻikai tala ki ha tahá, naʻá ma faʻo ai ha kato naʻe ʻai ʻi homa tuʻá pea mo ha tapoleni peá ma mavahe ʻi he matapā sioʻatá, ʻo huʻu ki he kauʻāfonua ʻAosituliá ʻi he fakahihifo pē ʻo e Moʻunga Stol. Naʻe hā ngali naʻe tataki ʻe Sihova homa halá ʻi heʻene ʻafioʻi naʻá ma fiemaʻu ha fakafiemālié.

Naʻe ʻave kimaua ʻe he kau maʻu mafai ʻAosituliá ki ha kemi hūfanga ofi ki Salzburg. Lolotonga ʻa homa māhina ʻe ono aí, naʻá ma feohi maʻu pē mo e Kau Fakamoʻoni ʻi he feituʻú, ko ia naʻe siʻi ʻaupito ai ʻa homa taimi ʻi he kemí. Naʻe ʻohovale ʻa e niʻihi kehe ʻi he kemí ʻi he vave ʻa e ʻi ai ʻa homa ngaahi kaumeʻá. Ko e lolotonga ʻa e taimi ko ení naʻá ma maʻu ai ʻema ʻuluaki ʻasemipilií. Ko e toe ʻuluaki taimi ia naʻá ma malava ai ke malanga tauʻatāina mei he fale ki he falé. Naʻe faingataʻa ʻaupito kiate kimaua ke mavahe mei he siʻi fanga tokoua ko ení ʻi he taimi naʻe pau ke ma mavahe aí.

Naʻe ʻomai ʻe he kau maʻu mafai ʻAosituliá kiate kimaua ʻa e faingamālie ke hiki ki ʻAositelēlia. Naʻe ʻikai ʻaupito ke faifai ange pea ʻi ai haʻama misi te ma fononga mamaʻo fau. Naʻá ma fononga lēlue ki Genoa, ʻĪtali, pea heka ai ʻi ha vaka naʻe teu ʻalu ki ʻAositelēlia. Naʻe iku ai ʻo ma nofo ʻi he kolo ko Wollongong, ʻi Niu Sau Uele. Naʻe fāʻeleʻi heni ʻa homa foha, ko Philip, ʻi Maʻasi 30, 1965.

Ko e nofo ʻi ʻAositelēliá kuo fakaava mai ai ʻa e ngaahi tafaʻaki kehekehe ʻo e ngāué, ʻo kau ai ʻa e faingamālie ke malanga ki he niʻihi kehe ʻa ia kuo nau hiki mai mei he ngaahi feituʻu naʻe ʻiloa ki muʻa ko ʻIukosilāviá. ʻOkú ma fakamālō ki he ngaahi tāpuaki ʻa Sihová, ʻo kau ai ʻemau malava ke tauhi kiate ia ko ha fāmili fāʻūtahá. Ko Philip mo hono uaifí, ko Susie, ʻokú na maʻu ʻa e monū ʻo e ngāue ʻi he ʻōfisi vaʻa ʻo e Kau Fakamoʻoni ʻa Sihová ʻi ʻAositelēliá, pea naʻe aʻu ʻo na maʻu ʻa e faingamālie ke fakamoleki ʻa e taʻu ʻe ua ʻi he ʻōfisi vaʻa ʻi Solovēniá.

Neongo ʻa e ngaahi pole ʻoku ʻomai ʻe he taʻumotuʻá mo e ngaahi palopalema fakaemoʻuileleí, ʻoku ou hokohoko atu mo hoku uaifí ʻi he fiefia ʻi heʻema ngāue kia Sihová. ʻOku ou houngaʻia ʻaupito ʻi he faʻifaʻitakiʻanga lelei ʻa ʻeku ongo mātuʻá! ʻOku hokohoko atu ʻa ʻene fakaivimālohiʻi aú, ʻo tokoniʻi ai au ke u fai ʻa e meʻa naʻe leaʻaki ʻe he ʻapositolo ko Paulá: “ʻI he fai ʻo hoʻomou ʻamanaki, mou fiefia; ʻi he fai homou fakamamahi, mou kataki pe; ʻi he hufia, mou fakaʻutumauku hono fai.”—Loma 12:12.

[Fakatātā ʻi he peesi 16, 17]

Ko ʻeku ongo mātuʻá ʻi he konga ki mui ʻo e 1920 tupú

[Fakatātā ʻi he peesi 17]

Ko ʻeku faʻeé, taupotu ki toʻomataʻú, mo Ančka, ʻa ia naʻá ne akoʻi kiate ia ʻa e moʻoní

[Fakatātā ʻi he peesi 18]

Mo hoku uaifí, Stanka, taimi nounou mei he hili ʻema malí

[Fakatātā ʻi he peesi 19]

Ko e fakatahaʻanga naʻe fakataha ʻi he ʻapi homau fāmilí ʻi he 1955

[Fakatātā ʻi he peesi 20]

Mo hoku uaifí, ko homa fohá, ʻa Philip, mo hono uaifí, Susie