Mafola ʻa e Lotu Faka-Kalisitiané ʻi he Lotolotonga ʻo e Kau Siu ʻi he ʻUluaki Senitulí

NAʻE fai ha fakataha mahuʻinga ʻi Selusalema ʻi he 49 T.S. nai. Ko e faʻahinga “ʻoku lau ko e ngaahi pou” ʻo e fakatahaʻanga Kalisitiane ʻo e ʻuluaki senitulí—ʻa Sione, Pita mo e tokoua tamai-taha ʻo Sīsū ko Sēmisí—naʻa nau ʻi ai. Ko e toko ua kehe naʻe fakahaaʻi hona hingoá naʻá na maʻu ʻa e fakatahá ko e ʻapositolo ko Paulá mo hono takanga ko Panepasá. Naʻe ʻi he ʻasenitá ʻa e founga ke vahevahe ai ʻa e feituʻu ngāue lahi kāfakafa ki he ngāue fakamalangá. Naʻe fakamatala ʻa Paula: “Naʻa nau tuku mai kiate au mo Panepasa ʻa e nima toʻomataʻu ʻo e kautaha [pe kaungākau fakatahá], koeʻuhi ke ʻamaua ʻa e ngaue ki he Senitaile, kae ʻanautolu ʻa e fai ki he haʻa Kamu.”—Kaletia 2:​1, 9. a

ʻOku totonu ke fēfē ʻetau mahinoʻi ʻa e felotoi ko ení? Ko e feituʻu ngāue ʻa ia naʻe totonu ke malangaʻi ai ʻa e ongoongo leleí naʻe vahevahe ia ki he kau Siú mo e kau ului Siú ʻi he tafaʻaki ʻe tahá pea ko e kau Senitailé ʻi he tafaʻaki ʻe tahá? Pe ko e felotoí ko ha vahevahe fakasiokālafi moʻoni ia ʻo e feituʻu ngāué? Ke maʻu ha tali ʻuhinga lelei, ʻoku tau fiemaʻu ha fakamatala fakahisitōlia fekauʻaki mo e Nofoʻanga Siú, ʻa e kau Siu naʻe nofo ʻi tuʻa Pālesitainé.

Ko e Māmani Siu ʻi he ʻUluaki Senitulí

Ko e hā ʻa e tokolahi ʻo e kau Siu naʻe ʻi he Nofoʻanga Siu ʻi he ʻuluaki senitulí? ʻOku hā ngali loto-tatau ʻa e kau mataotao tokolahi mo e tohi Atlas of the Jewish World: “ʻOku faingataʻa ke fakapapauʻi ha ngaahi fika pau, ka ʻi he ʻuhinga lelei kuo fakafuofua ʻi he taimi nounou ki muʻa ʻi he 70 naʻe ʻi ai ʻa e kau Siu ʻe toko ua mo e konga miliona ʻi Siutea pea laka hake ʻi he toko fā milioná ʻi he nofoʻanga Siu ʻi Lomá. . . . ʻOku ngalingali naʻe fakafofongaʻi ʻe he kau Siú ʻa e vahe hongofulu ʻe taha ʻo e kakai fakakātoa ʻo e ʻemipaeá, pea ʻi he ngaahi feituʻu ʻa ia naʻa nau tokolahi taha aí, ʻi he ngaahi kolo lalahi ʻo e ngaahi vahefonua fakahahaké, naʻe ʻi ai nai ʻa e vahe fā ʻe taha pe lahi ange ai ʻo e kakaí.”

Ko e ngaahi senitā tefitó naʻe ʻi Sīlia, ʻĒsia Maina, Pāpilone mo ʻIsipite, ʻi he Hahaké, fakataha mo e fanga kiʻi kolo iiki ange ʻi ʻIulopé. Naʻe ʻi ai ha puipuituʻa ʻo e muʻaki kau Kalisitiane Siu ʻiloa ʻe niʻihi ʻi he Nofoʻanga Siú, hangē ko Panepasa mei Saipaló, Pīsila mo ʻAkuila mei Ponitō pea hoko ai ki Loma, ko ʻApolosi mei ʻAlekisanitulia, pea mo Paula mei Tāsusi.—Ngāue 4:​36; 18:​2, 24; 22:3.

Ko e ngaahi kolo Nofoʻanga Siú naʻe lahi honau ngaahi fetuʻutakiʻanga mo honau fonua tupuʻangá. Ko e taha ko e tukuhau fakataʻu naʻe ʻave ki he temipale ʻi Selusalemá, ko ha founga ia ke kau ai ʻi he moʻui mo e lotu ʻi he temipalé. ʻI he fekauʻaki mo e meʻá ni, ʻoku pehē ʻe he mataotao ko John Barclay: “ʻOku ʻi ai ʻa e fakamoʻoni lelei ko e tānaki ʻo e paʻangá ni, ʻi he fakalahi atu ki ai ʻa e ngaahi tokoni fakapaʻanga lahi ange mei he kau koloaʻiá, naʻe fakahoko fakamākukanga ia ʻi he ngaahi kolo Nofoʻanga Siú.”

Ko e fetuʻutakiʻanga ʻe taha ko e kau pilikimi ʻe laui mano naʻa nau ō ki Selusalema ʻi he taʻu kotoa pē ki he ngaahi kātoangá. Ko e fakamatala ʻi he Ngāue 2:​9-11 fekauʻaki mo e Penitekosi 33 T.S. ʻoku fakahaaʻi ai ʻa e meʻá ni. Ko e kau pilikimi Siu naʻe ʻi aí naʻa nau haʻu mei Pātia, Mītia, ʻĪlami, Mesopotēmia,  Kapatōsia, Ponitō, ʻĒsia, Filisia, Pamifilia, ʻIsipite, Līpia, Loma, Kēliti mo ʻAlepea.

Ko hono fakalele ʻo e temipale ʻi Selusalemá naʻe fai ai ʻa e fetuʻutaki mo e kau Siu ʻi he Nofoʻanga Siú ʻi he faitohí. ʻOku ʻiloʻi ko Kāmelieli, ʻa e faiako lao ʻoku lau ki ai ʻi he Ngāue 5:​34, naʻá ne ʻave ʻa e ngaahi tohi ki Pāpilone pea mo e ngaahi tafaʻaki kehe ʻo e māmaní. ʻI he taimi naʻe aʻu ai ʻa e ʻapositolo ko Paulá ʻi he tuʻunga ko ha pōpula ki Loma ʻi he 59 T.S. nai, ko e “kau tuʻukimuʻa ʻo e kakai Siu” naʻa nau tala ange kiate ia “kuo ʻikai te mau maʻu tohi mei Siutea kiate koe; pea kuo ʻikai ha taha ʻi he kainga [pe fanga tokouá] ʻe haʻu mo hao ongoongokovi, pē ai haʻane talanoa ʻe kau kovi kiate koe.” ʻOku fakahaaʻi ʻe he meʻá ni ko e ngaahi tohí mo e ngaahi līpōtí naʻe toutou ʻave ia mei he fonua tupuʻangá ki Loma.—Ngāue 28:​17, 21.

Ko e Tohi Tapu ʻa e kau Siu ʻi he Nofoʻanga Siú ko ha liliu faka-Kalisi ʻo e Ngaahi Konga Tohi Tapu Faka-Hepeluú ʻoku ʻiloa ko e Septuagint. ʻOku pehē ʻe ha tohi maʻuʻanga fakamatala: “ʻOku ʻuhinga lelei ʻaupito ke fakaʻosiʻaki ko e LXX [Septuagint] naʻe lau mo maʻu ia ʻi he kotoa ʻo e nofoʻanga Siú ko e Tohi Tapu faka-Siu ʻa e nofoʻanga Siú pe ko e ‘tohi māʻoniʻoní.’” Naʻe ngāueʻaki lahi ʻa e liliu tatau ʻe he muʻaki kau Kalisitiané ʻi heʻenau faiakó.

Ko e kau mēmipa ʻo e kulupu pule Kalisitiane ʻi Selusalemá naʻa nau maheni mo e ngaahi tuʻunga ko ení. Naʻe ʻosi aʻu ʻa e ongoongo leleí ki he kau Siu ʻi he Nofoʻanga Siu ʻi Sīliá pea fakalaka atu ai, ʻo kau ai ʻa Tāmasikusi mo ʻAniteoke. (Ngāue 9:​19, 20; 11:19; 15:​23, 41; Kaletia 1:21) ʻI he fakataha ʻi he 49 T.S., ko e faʻahinga naʻe i aí ʻoku hā mahino naʻa nau palani ki he ngāue ʻi he kahaʻú. Tau lāulea angé ki he ngaahi lave Fakatohitapu ki he fakalahi ʻi he haʻohaʻonga ʻo e kau Siú mo e kau ului Siú.

Ngaahi Fononga ʻa Paulá mo e Kau Siu ʻi he Nofoʻanga Siú

Ko e muʻaki vāhenga-ngāue ʻa e ʻapositolo ko Paulá ko e ‘fakaha ʻa e huafa [ʻo Sīsū Kalaisí] ki he gaahi Jenitailé, moe gaahi tuʻí, bea moe fānau a Isilelí.’  b (Fakaʻītali ʻamautolu; Ngāue 9:​15, PM) Hili ʻa e fakataha ʻi Selusalemá, naʻe hokohoko atu ʻa Paula ke aʻu ki he kau Siu ʻi he Nofoʻanga Siú ʻi ha feituʻu pē naʻá ne fononga ki ai. (Sio ki he puha ʻi he peesi 14.) ʻOku fakahaaʻi ʻe he meʻá ni ko e felotoi ʻi he feituʻu ngāué ʻoku ngalingali naʻe hoko ia ko ha felotoi fakasiokālafi. Naʻe fakalahi ʻe Paula mo Panepasa ʻa ʻena ngāue fakamisinalé ki he hihifó, pea ko e niʻihi kehé naʻa nau ngāue ʻi he fonua tupuʻanga faka-Siú mo e ngaahi fuʻu kolo faka-Siu lalahi ʻi he māmani ʻo e Hahaké.

ʻI he taimi naʻe kamataʻi ai ʻe Paula mo hono ngaahi takangá ʻa e fononga fakamisinale hono ua mei ʻAniteoke ʻi Sīliá, naʻe tataki fakahihifo kinautolu ʻo fou atu ʻi ʻĒsia Maina ki Taloasi. Naʻa nau kolosi mei ai ki Masitōnia koeʻuhí naʻa nau fakaʻosiʻaki ʻo pehē “kuo ui [kinautolu] ʻe he ʻOtua ke malangaʻaki ʻa e Kosipeli [ki he kau Masitōniá].” Ki mui ai, naʻe kamata ai ʻa e ngaahi fakatahaʻanga Kalisitiané ʻi he ngaahi kolo ʻIulope kehe, ʻo kau ai ʻa ʻAtenisi mo Kolinitō.—Ngāue 15:​40, 41; 16:​6-10; 17:1–18:18.

ʻI he 56 T.S. nai, ʻi he ngataʻanga ʻo ʻene fononga fakamisinale hono tolú, naʻe palani ai ʻa Paula ke ngaʻunu mamaʻo ange fakahihifo ʻo fakalahi ʻa e feituʻu ngāue naʻe vaheʻi ange kiate ia ʻi he fakataha ʻi Selusalemá. Naʻá ne tohi: “Oku ou loto keu malaga aki ae ogoogolelei kiate kimoutolu oku i Loma foki,” pea, “te u foki ʻo ʻalu atu ʻiate kimoutolu ki Sepeni.” (Loma 1:​15, PM; 15:​24, 28) Kae fēfē ʻa e ngaahi kolo Nofoʻanga Siu lalahi ʻi he Hahaké?

Ngaahi Kolo Siu ʻi he Hahaké

Lolotonga ʻa e ʻuluaki senituli T.S., naʻe maʻu ai ʻe ʻIsipite ʻa e kolo Nofoʻanga Siu lahi tahá, tautefito ʻi hono kolomuʻá, ʻa ʻAlekisanitulia. Ko e senitā fefakatauʻaki ko ení mo e tōʻonga fakafonuá naʻe ʻi ai ha kakai Siu naʻe aʻu honau tokolahí ki he laui kilú, fakataha mo e ngaahi sinakoke naʻe tuʻu movetevete holo ʻi he kotoa ʻo e koló. Ko Filo, ko ha Siu ʻAlekisanitulia, naʻá ne taukaveʻi ʻo pehē ʻi he kotoa ʻo ʻIsipité, naʻe ʻi ai ʻo ʻikai siʻi hifo ʻi ha kau Siu ʻe miliona ʻi he taimi ko iá. Naʻe toe nofo ha fuʻu tokolahi ʻi Līpia ofi maí, ʻi he kolo ko Sailiné mo e ngaahi feituʻu takatakaí.

Ko e kau Siu ʻe niʻihi ʻa ia naʻa nau hoko ko e  kau Kalisitiané naʻa nau haʻu mei he ngaahi feituʻu ko ení. ʻOku tau lau fekauʻaki mo “Apolosi, ko e toko taha naʻe tupu ʻi [ʻAlekisanitulia],” “ko e kau tangata mei Saipalo mo Sailine,” mo “Lusio mei Sailine,” ʻa ia naʻá ne poupou ki he fakatahaʻanga ʻi Sīlia ʻAniteoké. (Ngāue 2:10; 11:​19, 20; 13:1; 18:24) ʻOku ʻikai ha toe lave kehe ʻa e Tohi Tapú fekauʻaki mo e muʻaki ngāue faka-Kalisitiane ʻi ʻIsipite mo hono feituʻu kaungāʻapí, tuku kehe pē ʻa e faifakamoʻoni ʻa e ʻevangeliō Kalisitiane ko Filipé ki he ʻiunoke ʻItiopeá.—Ngāue 8:​26-​39.

Ko Pāpilone, mo hono ngaahi feituʻu fakalahi ʻi Pātia, Mītia mo ʻĪlamí, ko ha toe senitā lahi ia ʻe taha. ʻOku pehē ʻe he faihisitōlia ʻe taha ko e “feituʻu kotoa ʻi he tokalelei ʻo e Taikilisí mo ʻIufaletesí, mei ʻAmīnia ki he kūlifa Pēsiá, pea pehē ʻi he fakatokelau-hahake ki he Tahi Kesipiá, ʻo fakahahake ki Mītia, naʻe ʻi ai ʻa e kakai Siu.” ʻOku fakafuofua ʻe he Encyclopaedia Judaica ʻa honau tokolahí ki he toko 800,000 pe tokolahi ange ai. Ko e faihisitōlia Siu ko Siosifasi ʻi he ʻuluaki senitulí ʻokú ne tala mai ko e kau Siu Pāpilone ʻe laui mano naʻa nau fononga ki Selusalema ki he ngaahi kātoanga fakataʻú.

Naʻe papitaiso ha niʻihi ʻo e kau pilikimi Pāpiloné ʻi he Penitekosi 33 T.S.? ʻOku ʻikai ke tau ʻiloʻi, ka naʻe ʻi he lotolotonga ʻo e faʻahinga naʻe fanongo ki he ʻapositolo ko Pitá ʻi he ʻaho ko iá ʻa e faʻahinga mei Mesopotēmia. (Ngāue 2:9) ʻOku tau ʻiloʻi ko e ʻapositolo ko Pitá naʻá ne ʻi Pāpilone ʻi he 62-​64 T.S. nai. Lolotonga ʻene ʻi aí, naʻá ne tohi ai ʻene ʻuluaki tohí pea mahalo mo e tohi hono uá foki. (1 Pita 5:13) Ko Pāpilone mo hono fuʻu kakai Siu tokolahí ʻoku hā mahino naʻe vakai ki ai ko e konga ia ʻo e feituʻu ngāue naʻe vaheʻi ki ai ʻa Pita, Sione, mo Sēmisi ʻi he fakataha naʻe lave ki ai ʻi he tohi ki he kau Kalētiá.

Fakatahaʻanga Selusalemá mo e Kau Siu ʻi he Nofoʻanga Siú

Ko Sēmisi, ʻa ia naʻá ne toe maʻu ʻa e fakataha ʻa ia naʻe lave ai ki he ngaahi feituʻu ngāué, naʻe ngāue ia ko ha ʻovasia ʻi he fakatahaʻanga Selusalemá. (Ngāue 12:​12, 17; 15:13; Kaletia 1:​18, 19) Ko ha fakamoʻoni sio tonu ia ʻi he Penitekosi 33 T.S. ʻi hono tali ai ʻe he laui afe ʻo e kau ʻaʻahi Siu ʻi he Nofoʻanga Siú ʻa e ongoongo leleí pea nau papitaisó.—Ngāue 1:​14; 2:​1, 41.

ʻI he taimi ko iá pea mo e hili iá naʻe haʻu ai ʻa e kau Siu ʻe laui mano ki he ngaahi kātoanga fakataʻú.  Naʻe hoko ʻa e koló ʻo feʻefiʻefihi, pea naʻe pau ai ke nofo ʻa e kau ʻaʻahí ʻi he ngaahi kolo kaungāʻapí pe ʻapitanga ʻi he ngaahi tēniti. Tuku kehe ʻenau feʻiloaki mo e ngaahi kaungāmeʻá, ʻoku fakamatala ʻa e Encyclopaedia Judaica ʻo pehē, naʻe hū ʻa e kau pilikimí ki he temipalé ke lotu, foaki ʻa e ngaahi feilaulau, pea kau ʻi hono ako ʻo e Tolá.

ʻOku ʻikai ha veiveiua, ko Sēmisi mo e kau mēmipa kehe ʻo e fakatahaʻanga Selusalemá naʻa nau ngāueʻaki ʻa e ngaahi faingamālie ko ení ke faifakamoʻoni ai ki he kau Siu he Nofoʻanga Siú. Mahalo pē naʻe fai ia ʻe he kau ʻapositoló fakataha mo e fakapotopoto lahi lolotonga ʻa e vahaʻa taimi ʻa ia naʻe “hoko ai ha fuʻu fakatanga ki he siasi naʻe ʻi Selusalema” ko e tupu mei ai ʻa e mate ʻa Sitīvení. (Ngāue 8:1) Ki muʻa pea ʻi he hili ʻa e meʻa ko eni naʻe hokó, ʻoku fakahaaʻi ʻe he lēkōtí, ko e faivelenga ʻa e kau Kalisitiane ko ení ki he malangá naʻe iku ai ki he tupu hokohoko.—Ngāue 5:​42; 8:4; 9:​31.

Ko e Hā ʻE Lava Ke Tau Akó?

ʻIo, naʻe fai ʻe he muʻaki kau Kalisitiané ʻa e ngaahi feinga loto-moʻoni ke fetuʻutaki mo e kau Siú ʻi ha feituʻu pē naʻa nau nofo ai. ʻI he taimi tatau, naʻe aʻu ai ʻa Paula mo e niʻihi kehé ki he kau Senitaile ʻi he feituʻu ngāue ʻi ʻIulopé. Naʻa nau tokanga ki he fekau ʻa Sīsū ki hono kau muimuí ʻi heʻene mavahé ke ngaohi ke hoko ko e kau ākonga ʻa e “ngāhi kakai kotoa pe.”—Mātiu 28:​19, 20.

Mei heʻenau faʻifaʻitakiʻangá, ʻe lava ke tau ako ai ʻa e mahuʻinga ʻo e malanga ʻi ha founga fokotuʻutuʻu maau koeʻuhi ke maʻu ai ʻa e poupou ʻa e laumālie ʻo Sihová. ʻE lava ke tau toe sio ai ki he ngaahi ʻaonga ʻo e fetuʻutaki mo e faʻahinga ko ia ʻoku nau ʻapasia ki he Folofola ʻa e ʻOtuá, tautefito ʻi he ngaahi feituʻu ngāue ʻoku tokosiʻi ai ʻa e Kau Fakamoʻoni ʻa Sihová. ʻOku fua lahi ange ʻa e ngaahi ʻēlia ʻe niʻihi ʻo e feituʻu ngāue ʻoku vaheʻi ki hoʻo fakatahaʻangá ʻi he ngaahi ʻēlia kehé? ʻE ʻaonga nai ke toutou ʻosiki ʻa e ngaahi feituʻu ko ení. ʻOku ʻi ai ha ngaahi meʻa ʻoku hoko ki he kakai ʻi he feituʻu kaungāʻapí ʻa ia ʻoku feʻungamālie ki ha ngaahi feinga makehe ʻo e faifakamoʻoni ʻikai ʻi he founga anga-mahení pea ʻi he halá?

ʻOku fakakoloa kiate kitautolu ke ʻoua ʻe ngata pē he lau ʻi he Tohi Tapú fekauʻaki mo e muʻaki kau Kalisitiané kae pehē foki ke tau hoko ʻo maheni tonu mo e niʻihi ʻo e ngaahi fakaikiiki fakahisitōlia mo fakasiokālafí. Ko e meʻangāue ʻe taha ʻe lava ke tau ngāueʻaki ke fakalahi ai ʻetau mahinó ko e polosiua “See the Good Land,” fakataha mo hono ngaahi mapé mo e ʻū tā lahí.

[Fakamatala ʻi lalo]

[Saati ʻi he peesi 14]

KO E TOKANGA ʻA E ʻAPOSITOLO KO PAULÁ KI HE KAU SIU ʻI HE NOFOʻANGA SIÚ

KI MUʻA ʻI HE FAKATAHA ʻI SELUSALEMA ʻI HE 49 T.S.

Ngāue 9:​19, 20 Tāmasikusi — ‘peá ne malanga ʻi he ngaahi

falelotú’

Ngāue 9:29 Selusalema — “naʻa ne akonaki ki he kau Elinisito

[pe kau Siu lea faka-Kalisí]”

Ngāue 13:5 Salamisi, Saipalo — “malangaʻaki ʻa e folofola

ʻa e ʻOtua ʻi he ngaahi fale

lotu ʻo e kakai Siu”

Ngāue 13:14 ʻAniteoke ʻi Pisitia — “hu ki he falelotu”

Ngāue 14:1 ʻAikoniume — “hu . . . ki he falelotu ʻo e kakai

Siū”

HILI ʻA E FAKATAHA ʻI SELUSALEMA ʻI HE 49 T.S.

Ngāue 16:14 Filipai — “Litia, . . . tafoki ki he lotu ʻa e

ʻOtua”

Ngāue 17:1 Tesalonaika — “falelotu ʻo e kakai Siu”

Ngāue 17:10 Pēlea — “falelotu ʻo e kakai Siu”

Ngāue 17:17 ʻAtenisi — “fakakikihi [pe fakaʻuhinga] ʻi he

fale lotu mo e kau Siu”

Ngāue 18:4 Kolinitō — “fai ʻene talanoa lotu ʻi he falelotu”

Ngāue 18:19 ʻEfesō — “ʻalu ʻe ia ki he fale lotu, ʻo fai ʻene

talanoa lotu mo e kakai Siu”

Ngāue 19:8 ʻEfesō — “pea ne hu ki he falelotu, pea ko e

mahina ʻe tolu ʻene malanga malohi”

Ngāue 28:17 Loma — “fekau ke fakataha mai ʻa e kau tuʻukimuʻa

ʻo e kakai Siu”

[Mape ʻi he peesi 15]

(Ki he konga tohi kuo fokotuʻu kakato, sio ki he tohi)

Ko e faʻahinga naʻa nau fanongo ki he ongoongo leleí ʻi he Penitekosi 33 T.S. naʻa nau haʻu mei ha ʻēlia lahi

ʻILILIKUMI

ʻĪTALI

Loma

MASITŌNIA

ʻAtenisi

KALISI

KĒLITI

Sailine

LĪPIA

PITINIA

KALĒTIA

ʻĒSIA

FILISIA

PAMIFILIA

SAIPALO

ʻISIPITE

ʻITIOPEA

PONITŌ

KAPATŌSIA

SILISIA

MESOPOTĒMIA

SĪLIA

SAMĒLIA

Selusalema

SIUTEA

MĪTIA

Pāpilone

ʻĪLAMI

ʻALEPEA

PĀTIA

[Ngaahi vai]

Tahi Metiteleniane

Tahi ʻUliʻuli

Tahi Kulokula

Kūlifa Pēsia