Ko Hotau Tauhí ʻa Sihova

“Ko hoku tauhi ʻa Sihova; ʻe ʻikai te u masiva.”—Sāme 23:1.

1-3. Ko e hā ʻoku ʻikai fakaʻohovale ai ʻa hono fakahoa ʻe Tēvita ʻa Sihova ki ha tauhí?

 KAPAU ʻe kole atu ke ke fakamatalaʻi ʻa e anga ʻo e tokanga ʻa Sihova ki hono kakaí, ko e hā te ke leaʻakí? Ko e hā ʻa e fakafehoanaki ʻe lava ke ke fai, ʻa ia ʻe fakahaaʻi ai ʻa e tokanga ʻofa ʻokú ne fai ki heʻene kau sevāniti faitōnungá? Laka hake he taʻu ʻe 3,000 kuo maliu atú, naʻe hiki ai ʻe he tuʻi tokotaha-tohi-saame ko Tēvitá ha fakamatala fakaʻofoʻofa fekauʻaki mo Sihova, ʻo ngāueʻaki ha fakahoa ʻa ia naʻe maʻu mei he ngāue ʻa Tēvita ʻi he konga ki muʻa ʻo ʻene moʻuí.

² ʻI hono tuʻunga ko ha talavoú, naʻe hoko ai ʻa Tēvita ko ha tauhi-sipi, ko ia ai, naʻá ne ʻilo fekauʻaki mo hono tokangaʻi ʻo e fanga sipí. Naʻá ne ʻiloʻi lelei ko e fanga sipí, kapau ʻe tuku taʻetokangaʻi, te nau molengofua pea hoko ai ʻo maʻukovia kinautolu ʻe he kau kaihaʻá pe ko e fanga manu fekaí. (1 Samiuela 17:​34-​36) ʻI he ʻikai ha tauhi-sipi tokangá, ʻe ʻikai nai te nau ʻilo ʻa honau kaikaiʻangá mo e feituʻu ʻoku ʻi ai ʻa e meʻakaí. ʻI hono ngaahi taʻu ki muí, ʻoku ʻikai ha veiveiua naʻe manatu ʻofa ai ʻa Tēvita ki he ngaahi houa lahi naʻá ne fakamoleki ʻi hono tataki, maluʻi mo fafanga ʻa e fanga sipí.

³ ʻOku ʻikai fakaʻohovale ʻa e haʻu ki heʻene manatú ʻa e ngāue ʻa ha tauhi-sipí ʻi he taimi naʻe fakamānavaʻi ai ʻa Tēvita ke ne fakamatalaʻi ʻa e tokanga ʻoku fakahāhā ʻe Sihova ki hono kakaí. Ko e Sāme hono 23 naʻe hiki ʻe Tēvitá, ʻoku kamataʻaki ia ʻa e ngaahi leá ni: “Ko hoku tauhi ʻa Sihova; ʻe ʻikai te u masiva.” Tau lāulea angé ki he ʻuhinga ʻoku hoko ai eni ko ha fakamatala feʻungamālié. ʻI he tokoni leva ʻa e Sāme 23, te tau sio ai ki he ngaahi founga ʻoku tokanga ai ʻa Sihova ki heʻene kau lotú ʻi he tuʻunga ko ha tauhi ʻoku tokanga ki heʻene fanga sipí.—1 Pita 2:25.

Ko ha Fakahoa Feʻungamālie

4, 5. ʻOku anga-fēfē hono fakamatalaʻi ʻe he Tohi Tapú ʻa e anga ʻo e fanga sipí?

⁴ ʻOku maʻu ʻe Sihova ʻa e ngaahi hingoa fakalakanga lahi ʻi he Tohi Tapú, ka ko e hingoa makehe ko e “tauhi” ʻokú ne fakahaaʻi ʻa e tuʻunga anga-ʻofa tahá. (Sāme 80:1) Ke mahinoʻi lelei ange ʻa e ʻuhinga ʻoku feʻungamālie ai ʻa hono ui ʻa Sihova ko ha Tauhí, ʻoku ʻaonga ke tau ʻiloʻi ʻa e ongo meʻa ʻe ua: ʻuluakí, ko e natula ʻo e fanga sipí pea ko hono uá, ko e ngaahi fatongia mo e ʻulungāanga ʻo ha tauhi lelei.

⁵ ʻOku faʻa lave ʻa e Tohi Tapú ki he ngaahi anga ʻo e fanga sipí, ʻo fakamatalaʻi kinautolu ʻoku nau tali lelei ʻa e ʻofa ʻa ha tauhi (2 Samiuela 12:3), ʻikai anga-fefeka (Aisea 53:7), pea ʻikai hanau maluʻi. (Maika 5:8) Ko e faʻu-tohi ʻe taha ʻa ia naʻá ne tauhi hake ha fanga sipi ʻi ha taʻu lahi naʻá ne pehē: “Ko e fanga sipí ʻoku ʻikai ke nau ‘tokangaʻi pē kinautolu’ ʻo hangē nai ko e fakamahalo ʻa e niʻihi. ʻOku nau fiemaʻu, ʻo laka ia ʻi ha toe faʻahinga ʻo e fanga manú, ʻa e tokanga taʻefakangatangata mo e tokanga fakamākukanga.” Ke haó, ko e ngaahi meʻamoʻui masiva tokoni ko ení ʻoku nau fiemaʻu ha tauhi tokanga.—Isikeli 34:5.

 6. ʻOku anga-fēfē hono fakamatalaʻi ʻe ha tikisinale Tohi Tapu ʻe taha ha ʻaho anga-maheni ʻi he moʻui ʻa ha tauhi-sipi ʻi he kuonga muʻá?

 ⁶ Naʻe fēfē ʻa e ʻaho anga-mahení ki he tauhi-sipi ʻi he kuonga muʻá? ʻOku fakamatala ʻa e tikisinale Tohi Tapu ʻe taha: “ʻI he pongipongiá naʻá ne taki atu ai ʻa e tākangá mei he lotoʻaá, ʻo ne laka ʻi muʻa ki he feituʻu ʻa ia te nau kaikai aí. Naʻá ne leʻohi heni kinautolu ʻi he ʻahó kotoa, ʻo fakapapauʻi ke ʻoua naʻa hē ha taha ʻo e fanga sipí, pea kapau ʻe ʻi ai ha sipi ʻe mavahe ʻi ha taimi mei heʻene leʻohí ʻo hē mamaʻo mei he toengá, ʻokú ne kumi tōtōivi kae ʻoua ke maʻu ia ʻo fakafoki. . . . ʻI he poʻulí ʻokú ne fakafoki ʻa e tākangá ki ʻapi ki he lotoʻaá, ʻo lau kinautolu ʻi heʻenau laka mai ʻi he lalo tokotokó ʻi he matapaá ke fakapapauʻi ʻiate ia tonu ʻoku ʻikai mole hanau taha. . . . Naʻe pau ke ne faʻa leʻohi ʻa e lotoʻaá ʻi he ngaahi houa poʻulí mei hano ʻohofi ʻe he fanga manu fekaí, pe ko e ngaahi feinga kākā ʻa e kau kaihaʻa ʻoku ʻalu fano holó.” a

 7. Ko e hā naʻe fiemaʻu ai ʻi he taimi ʻe niʻihi ki ha tauhi-sipi ke ne fakahaaʻi ʻa e kātaki mo e fakaalaala lahi angé?

⁷ Naʻe ʻi ai ʻa e ngaahi taimi naʻe fiemaʻu ai ʻe he fanga sipí, tautefito ki he fanga sipi fefine feitamá mo e fanga lamí, ʻa e kātaki mo e fakaalaala lahi ange. (Senesi 33:13) ʻOku fakamatala ha tohi maʻuʻanga fakamatala Fakatohitapu ʻe taha: “Ko e fanauʻi ʻo e ʻuhiki ʻi ha tākangá ʻoku faʻa hoko mamaʻo ia ʻi he veʻe moʻungá. ʻOku leʻohi tokanga ʻe he tauhi-sipí ʻa e faʻeé lolotonga ʻa hono ngaahi mōmeniti vaivai ʻaupitó pea fua ʻa e lamí ʻo ʻave ki he ʻaá. ʻI ha ngaahi ʻaho siʻi, kae ʻoua kuo toki malava ke luelue, ʻokú ne fua nai ia ʻi hono umá pe ʻi he ngaahi pelu ngatōtō ʻo hono kofu tuʻá.” (Aisea 40:​10, 11) ʻOku hā mahino, naʻe fiemaʻu fakatouʻosi ʻe ha tauhi-sipi lelei ha ʻulungāanga mālohi mo fakaalaala.

 8. Ko e hā ʻa e ngaahi ʻuhinga ʻoku lave ki ai ʻa Tēvita ki heʻene falala kia Sihová?

⁸ “Ko hoku tauhi ʻa Sihova”—ʻikai ko ha fakamatala feʻungamālie ia fekauʻaki mo ʻetau Tamai fakahēvaní? ʻI heʻetau sivisiviʻi ʻa e Sāme 23, te tau sio ai ki he anga ʻo e tokanga ʻa e ʻOtuá kiate kitautolu ʻaki ʻa e mālohi mo e fakaalaala ʻa ha tauhi-sipí. ʻI he Sāme 23 veesi 1, ʻoku fakamatalaʻi ai ʻe Tēvita ʻa ʻene falala ʻe fai ʻe he ʻOtuá ʻa e ngaahi tokonaki kotoa ʻoku fiemaʻú ki Heʻene fanga sipí koeʻuhi ke ʻoua te nau “masiva” ʻi ha meʻa. ʻI he ngaahi veesi hokó, ʻoku lave ai ʻa Tēvita ki he ngaahi ʻuhinga ʻe tolu ʻo ʻene falalá: ʻOku taki, maluʻi mo fafanga ʻe Sihova ʻa ʻEne fanga sipí. Tau lāulea tahataha angé ki he ngaahi meʻá ni.

“ʻOku Ne Taki Au”

 9. Ko e hā ʻa e tuʻunga nonga ʻoku fakamatalaʻi ʻe Tēvitá, pea ʻe anga-fēfē ʻa e hoko ʻo ʻi ha tuʻunga pehē ʻa e fanga sipí?

⁹ ʻUluakí, ʻoku taki ʻe Sihova ʻa hono kakaí. ʻOku tohi ʻe Tēvita: “ʻOku ne fakatokoto au he ngaahi toafa [pe kaikaiʻanga] lau mukomuka; ʻoku ne taki au ki he ngaahi vai fakanonga. Ko hoku laumalie ʻoku ne fakafoki [pe fakaivifoʻou]: ʻoku ne taki au ʻi he ngaahi hala ʻo e maʻoniʻoni; ko hono ʻuhinga e ko hono huafa pe.” (Sāme 23:​2, 3) Ko ha tākanga ʻoku tākoto nonga ʻi he lotolotonga ʻo e ngaahi meʻa hulu fau—ʻoku fakamatalaʻi heni ʻe Tēvita ha tuʻunga ʻo e fiemālie, fakaivifoʻou mo e malu. Ko e foʻi lea faka-Hepelū ʻoku liliu ko e “ngaahi toafa” pe kaikaiʻanga ʻe lava ke ʻuhinga iá ko ha “feituʻu lelei.” Ngalingali, ʻiate kinautolu pē, ʻe ʻikai maʻu ʻe he fanga sipí ha feituʻu fakaivifoʻou ke nau tākoto nonga ai. Kuo pau ke taki kinautolu ʻe honau tauhí ki ha “feituʻu lelei.”

10. ʻOku anga-fēfē hono fakahaaʻi ʻe he ʻOtuá ʻa ʻene falala mai kiate kitautolú?

¹⁰ ʻOku anga-fēfē hono taki kitautolu ʻe Sihova he ʻaho ní? Ko e founga ʻe taha ʻokú ne fai ai iá ko e faʻifaʻitakiʻangá. ʻOku ekinaki mai ʻa ʻene Folofolá kiate kitautolu ke tau “hoko muʻa ko e kau faʻifaʻitaki ki he ʻOtua.” (Efeso 4:32e [Ef 5:​1, PM]) Ko e potutohi ʻo e ngaahi lea ko iá ʻoku lave ai ki he manavaʻofa, fakamolemole mo e ʻofa. (Efeso 4:​32, 33 [Ef 5:​2, PM]) Ko e moʻoni, ʻoku fokotuʻu ʻe Sihova ʻa e faʻifaʻitakiʻanga lelei tahá ʻi hono fakahāhā ʻa e ngaahi ʻulungāanga fakalotomāfana ko iá. ʻOkú ne taʻetotonu ʻi heʻene kole mai ke tau faʻifaʻitaki ange kiate iá? ʻIkai. Ko e akonaki fakamānavaʻi ko iá ko hono moʻoní ko ha fakahāhā fakaofo ia ʻo ʻene falala mai kiate kitautolú. ʻI he founga fē? ʻOku ngaohi kitautolu ʻi he ʻīmisi ʻo e ʻOtuá, ʻo ʻuhingá kuo tuku mai kiate kitautolu ʻa e ngaahi tuʻunga fakaeʻulungāanga mo e malava ke ʻi ha tuʻunga fakalaumālie. (Senesi 1:26) Ko ia ai, ʻoku ʻafioʻi ʻe Sihova neongo ʻetau ngaahi  taʻehaohaoá, ʻoku tau maʻu ʻi loto ʻiate kitautolu ʻa e malava ke fakatupulekina ʻa e ngaahi ʻulungāanga tatau ko ia ʻokú ne fakatātaaʻi maí. Fakakaukau atu pē—ko hotau ʻOtua ʻofá ʻoku falala mai ʻe lava ke tau hoko ʻo hangē ko iá. Kapau ʻoku tau muimui ʻi heʻene faʻifaʻitakiʻangá, te ne taki kitautolu, hangē ko e laú, ki ha ‘feituʻu nonga’ lelei. ʻI he lotolotonga ʻo e māmani fakamālohi ko ení, te tau “nofo nonga” ai, ʻo aʻusia ʻa e nonga ʻoku haʻu mei hono ʻiloʻi ʻoku tau maʻu ʻa e hōifua ʻa e ʻOtuá.—Sāme 4:8; 29:11.

11. ʻI hono taki ʻa ʻene fanga sipí, ko e hā ʻoku fakakaukau ki ai ʻa Sihová, pea ʻoku anga-fēfē ʻa e tapua atu eni ʻi he meʻa ʻokú ne fiemaʻu meiate kitautolú?

¹¹ ʻI hono taki kitautolú, ʻoku fakaalaala mo kātaki ʻa Sihova. ʻOku fakakaukau ha tauhi-sipi ki he ngaahi ngataʻanga ʻo ʻene fanga sipí, ko ia ʻokú ne taki “ʻo fakatatau ki he faʻa ʻalu [pe vave] ʻa e fanga manu.” (Senesi 33:14) ʻOku taki tatau ʻa Sihova “ʻo fakatatau ki he faʻa ʻalu” pe vave ʻa ʻene fanga sipí. ʻOkú ne fakakaukau ki heʻetau ngaahi malavá mo e ngaahi tuʻungá. Ko hono moʻoní, ʻokú ne feʻunuʻaki ʻa e vavé, ʻo ʻikai ʻaupito fiemaʻu mai ʻa e meʻa lahi ange ʻi he meʻa ʻoku lava ke tau foakí. Ko e meʻa ʻokú ne fiemaʻu maí ke tau ʻaufuatō. (Kolose 3:​23) Kae fēfē kapau ʻokú ke motuʻa ange pea ʻikai lava ke ke fai ʻa e meʻa naʻá ke anga ki aí? Pe fēfē kapau ʻokú ke maʻu ha puke lahi ʻokú ne ʻai koe ki he tuʻunga fakangatangata? ʻOku ʻi he malumalu ʻo e tuʻunga ko ení ʻa e fakaʻofoʻofa ʻo e fiemaʻu ke tau ʻaufuatoó. ʻOku ʻikai ha ongo meʻa ʻe toko ua te na tatau tofu pē. Ko e tauhi ʻaufuatoó ʻoku ʻuhingá ko hono ngāueʻaki ho mālohí mo e iví kotoa ʻi he tuʻunga kakato taha ʻoku malava kiate koe ʻi he ngāue ʻa e ʻOtuá. Neongo ʻa e ngaahi vaivai ʻa ia ʻe uesia nai ai ʻetau vavé, ʻoku fakamahuʻingaʻi ʻe Sihova ʻetau lotu ʻaufuatoó.—Maake 12:​29, 30.

12. Ko e hā ʻa e fakatātā mei he Lao ʻa Mōsesé ʻoku fakahaaʻi ai ʻoku taki ʻa Sihova “ʻo fakatatau ki he faʻa ʻalu” pe vave ʻa ʻene fanga sipí?

¹² Ke fakatātaaʻi ʻoku taki ʻe Sihova “ʻo fakatatau ki he faʻa ʻalu” pe vave ʻa ʻene fanga sipí, fakakaukau angé ki he meʻa ʻoku leaʻaki fekauʻaki mo e ngaahi feilaulau halaia ʻe niʻihi ʻi he Lao ʻa Mōsesé. Naʻe fiemaʻu ʻe Sihova ʻa e ngaahi feilaulau lelei ʻa ia naʻe ueʻi ʻe he ngaahi loto houngaʻiá. ʻI he taimi tatau, naʻe fakakalasi ʻa e ngaahi feilaulaú ʻo fakatatau ki he malava ʻa e tokotaha foakí. Naʻe pehē ʻe he Laó: “Kapau ʻe ʻikai . . . ke maʻu ha sipi, ka te ne haʻu mo ia . . . ha ongo kulukulu pe lupe mui.” Pea fēfē kapau naʻe ʻikai lava ke ne maʻu naʻa mo ha ongo lupe mui? Naʻe lava leva ke ne ʻomai ha “mahoaʻa lelei.” (Livitiko 5:​7, 11) ʻOku fakahaaʻi ʻe he meʻá ni naʻe ʻikai ke kounaʻi ʻe he ʻOtuá ʻa e meʻa naʻe ʻikai malava ke maʻu ʻe he tokotaha foakí. Koeʻuhi ʻoku ʻikai ke liliu ʻa e ʻOtuá, ʻe lava ke tau maʻu ʻa e fiemālie ʻi hono ʻiloʻi heʻikai ʻaupito ke ne fiemaʻu mai ha meʻa ʻo lahi ia ʻi he meʻa ʻoku lava ke tau foakí; ʻi hono kehé, ʻokú ne hōifua ʻo tali ʻa e meʻa ʻoku lava ke tau foakí. (Malakai 3:6) He meʻa fakafiefia moʻoni ia ke hoko ʻo taki ʻe ha Tauhi mahino pehē!

“ʻE ʻIkai Te U Manavahe ki ha Kovi; he ko Koe ʻOku Ma Feohi”

13. ʻI he Sāme 23:​4, ʻoku anga-fēfē ʻa e lea ai ʻa Tēvita ʻi he tuʻunga vāofi angé, pea ko e hā ʻoku ʻikai ke fakaʻohovale ai ení?

¹³ ʻOku ʻomai ʻe Tēvita ha ʻuhinga hono ua ki heʻene falalá: ʻOku maluʻi ʻe Sihova ʻene fanga sipí. ʻOku tau lau: “ʻIo, neongo ʻete ʻalu pe ʻi he teleʻa ʻoku maluʻaki ai ʻa Mate, ʻe ʻikai te u manavahe ki ha kovi; he ko koe ʻoku ma feohi: ko siʻo tokotoko mo ʻakau, ʻoku na fakafiemalieʻi au.” (Sāme 23:4) ʻOku lea ʻa Tēvita ʻi he tuʻunga vāofi ange he  taimi ko ení, ʻo lea kia Sihova ʻaki ʻa e fetonginauna ko e “koe.” ʻOku ʻikai ke fakaʻohovale eni, he ʻoku talanoa ʻa Tēvita ʻo fekauʻaki mo e founga ʻo hono tokoniʻi ia ʻe he ʻOtuá ke ne kātakiʻi ʻa e faingataʻá. Naʻe fou ʻa Tēvita ʻi he ngaahi teleʻa lahi ʻoku maluʻaki ai ʻa e maté—ʻi he ngaahi taimi ʻa ia naʻe ʻi he fakatuʻutāmaki tonu ai ʻa ʻene moʻuí. Ka naʻe ʻikai te ne fakaʻatā ʻa e manavaheé ke ne puleʻi ia, he naʻá ne ʻiloʻi ko e ʻOtuá—mo Hono “tokotoko” mo e “ʻakau” naʻe mateuteú—naʻá ne ʻiate ia. Ko e lāuʻilo ko eni ki he maluʻí naʻe fakafiemālieʻi ai ʻa Tēvita pea ʻoku ʻikai ha veiveiua naʻá ne tohoakiʻi ai ia ke ne ofi ange kia Sihova. b

14. Ko e hā ʻa e fakafiemālie ʻoku ʻomai ʻe he Tohi Tapú kiate kitautolu fekauʻaki mo e maluʻi ʻa Sihová, ka ko e hā ʻoku ʻikai ke ʻuhinga ki ai ení?

¹⁴ ʻOku anga-fēfē hono maluʻi ʻe Sihova he ʻahó ni ʻa ʻene fanga sipí? ʻOku fakapapauʻi mai ʻe he Tohi Tapú ʻoku ʻikai ha kau fakafepaki—tēmeniō pe tangata—ʻe faifai ange pea nau lavameʻa ʻi hano toʻo ʻosi ʻa ʻene fanga sipí mei he māmaní. ʻE ʻikai ʻaupito ke fakaʻatā ia ʻe Sihova. (Aisea 54:17; 2 Pita 2:9) Kae kehe, ʻoku ʻikai ʻuhinga eni iá ko hotau Tauhí te ne maluʻi kitautolu mei he fakatamaki kotoa pē. ʻOku tau hokosia ʻa e ngaahi ʻahiʻahi ʻoku anga-maheni ki ai ʻa e faʻahinga ʻo e tangatá, pea ʻoku tau fehangahangai mo e fakafepaki ʻa ia ʻoku hoko ki he kau Kalisitiane moʻoni kotoa pē. (2 Timote 3:12; Semisi 1:2) ʻOku ʻi ai ʻa e ngaahi taimi te tau lava ai, hangē ko e laú ke “ʻalu pe ʻi he teleʻa ʻoku maluʻaki ai ʻa Mate.” Ko e fakatātaá, ʻe lava ke tau meimei mate ko e tupu mei ha fakatanga pe ko ha tuʻunga mahamahaki. Pe mahalo ko ha tokotaha ʻoku tau ʻofa ai ʻoku meimei mate pe ʻoku ofi ke mate. Lolotonga ʻa e meʻa ʻoku hā ngali ko e ngaahi mōmeniti fakapōpōʻuli tahá, ʻoku ʻiate kitautolu ʻa hotau Tauhí, pea te ne maluʻi kitautolu. Anga-fēfē?

15, 16. (a) ʻI he ngaahi founga fē ʻoku tokoniʻi ai kitautolu ʻe Sihova ke tau fakaleleiʻi ʻa e ngaahi fakafaingataʻaʻiaʻanga ʻoku tau fehangahangai nai mo iá? (e) Fakamatala ki ha hokosia ke fakahaaʻi ai ʻa e anga hono tokoniʻi kitautolu ʻe Sihova ʻi he ngaahi taimi ʻo e ʻahiʻahí.

¹⁵ ʻOku ʻikai ke talaʻofa ʻe Sihova haʻane kau fakaemana mai. c Ka ʻoku lava ke tau fakapapauʻi ʻa e meʻá ni: ʻE tokoniʻi kitautolu ʻe Sihova ke tau ikuʻi ha faʻahinga fakafaingataʻaʻiaʻanga pē te tau fehangahangai nai mo ia. ʻE lava ke ne ʻomai kiate kitautolu ʻa e poto ke fekukiʻaki mo e “ngaahi ʻahiʻahi kehekehe.” (Semisi 1:​2-5) ʻOku ngāueʻaki ʻe he tauhi-sipí ʻa hono tokotokó pe vaʻakaú ke ʻikai ngata pē ʻi hono tuli ʻa e fanga manu fekaí kae pehē foki ki hono kiʻi teke ʻa ʻene sipí ki he hala totonú. ʻOku lava ke “kiʻi teke” kitautolu ʻe Sihova, mahalo pē fakafou ʻi ha kaungālotu, ke ngāueʻaki ʻa e akonaki makatuʻunga he Tohi Tapú ʻa ia te ne fai nai ha liliu lahi ʻi hotau tuʻungá. Tānaki atu ki ai, ʻe lava ke ʻomai ʻe Sihova kia kitautolu ʻa e mālohi ke kātaki. (Filipai 4:13) Fakafou ʻi hono laumālie māʻoniʻoní, ʻe lava ke ne teuʻi kitautolu ʻaki ʻa e “makehe atu ʻo e mafai.” (2 Kolinito 4:7) Ko e laumālie ʻo e ʻOtuá ʻoku lava ke ne ʻai ke tau malava ʻo kātakiʻi ha ʻahiʻahi pē ʻe ʻomai nai ʻe Sētane kiate kitautolu. (1 Kolinito 10:13) ʻIkai ʻoku fakafiemālie ke ʻiloʻi ʻoku mateuteu ai pē ʻa Sihova ke ne tokoniʻi kitautolu?

¹⁶ ʻIo, tatau ai pē pe ko e hā ʻa e teleʻa ʻoku maluʻaki ai ʻa mate ʻoku tau ʻi aí nai, ʻoku ʻikai fiemaʻu ke tau fou tokotaha ai. ʻOku ʻiate kitautolu hotau Tauhí, ʻo tokoniʻi kitautolu ʻi he ngaahi founga ʻa ia ʻoku ʻikai nai ke tau ʻuluaki ʻiloʻi kakato. Fakakaukau angé ki he hokosia ʻa ha tokotaha mātuʻa Kalisitiane ʻa ia naʻe ʻiloʻi ʻokú ne maʻu ʻa e foʻi ngungu fakatupu mate ʻi hono ʻutó. “Kuo pau ke u fakahaaʻi ʻi he ʻuluaki taimí, naʻá ku fifili ai pe naʻe houhau ʻa Sihova ʻiate au pea aʻu ʻou pehē pe naʻá ne ʻofa nai ʻiate au. Ka naʻá ku fakapapauʻi ke ʻoua te u holomui meia Sihova. ʻI hono kehé, naʻá ku leaʻaki kiate ia ʻa ʻeku ngaahi loto-hohaʻá. Pea naʻe tokoniʻi au ʻe Sihova, ʻo faʻa fakafiemālieʻi au fakafou ʻi hoku fanga tokouá mo e fanga tuofāfiné. Naʻe vahevahe mai ʻe he tokolahi ʻa e ngaahi fakamaama ʻaonga makatuʻunga ʻi heʻenau hokosia tonu ʻa e fekuki mo e puke mafatukitukí. Ko ʻenau ngaahi fakamatala mafamafatataú naʻe fakamanatu mai ai kiate au naʻe ʻikai ha meʻa ʻe ngalikehe ʻi he meʻa naʻe hoko kiate aú. Ko e tokoni ʻaongá, ʻo kau ai ʻa e ngaahi tōʻonga anga-ʻofa ʻoku maongó, naʻe fakapapauʻi mai ai naʻe hōifua mai ʻa Sihova kiate au. Ko e moʻoni, kuo pau ke u hokohoko atu ʻa e faitau mo hoku mahakí, pea ʻoku ʻikai te u ʻiloʻi pe ko e hā ʻe iku ki aí. Ka ʻoku ou tuipau ʻoku ʻiate au ʻa Sihova pea te ne hokohoko atu ke tokoniʻi au ʻi he ʻahiʻahi ko ení.”

 “ʻOku Ke Teuteu Mai ʻi Hoku ʻAo ha Tepile”

17. ʻOku anga-fēfē hono fakamatalaʻi ʻe Tēvita ʻa Sihova ʻi he Sāme 23:​5, pea ko e hā ʻoku ʻikai fepaki ai eni mo e fakatātā fekauʻaki mo ha tauhi-sipí?

¹⁷ ʻOku lave he taimi ko ení ʻa Tēvita ki ha ʻuhinga hono tolu ki heʻene falala ki hono Tauhí: ʻOku fafangaʻi ʻe Sihova ʻa ʻene fanga sipí, pea ʻokú ne fai lahi ia. ʻOku tohi ʻe Tēvita: “ʻOku ke teuteu mai ʻi hoku ʻao ha tepile, ka ko hoku ngaahi fili ʻoku sio mei hé: kuo ke pani lolo hoku ʻulu; ʻoku fonu mahuohua a ʻeku ipu.” (Sāme 23:5) ʻI he veesi ko ení, ʻoku fakamatalaʻi ai ʻe Tēvita ʻa hono Tauhí ko ha tokotaha-talitali nima-homo ʻokú ne tokonaki mai ʻa e meʻakai mo e inu lahi. Ko e ongo fakatātaá—ko ha tauhi-sipi tokanga mo ha tokotaha-talitali nima-homó—ʻoku ʻikai te na fepaki. He ko ē, ko ha tauhi-sipi lelei kuo pau ke ne ʻiloʻi ʻa e feituʻu ke maʻu ai ha kaikaiʻanga lelei mo ha vai feʻunga koeʻuhi ke ʻoua ʻe “masiva” ai ʻi ha meʻa ʻa ʻene tākangá.—Sāme 23:​1, 2.

18. Ko e hā ʻokú ne fakahaaʻi ko Sihová ko ha tokotaha-talitali nima-homó?

¹⁸ Ko hotau Tauhí ko ha toe tokotaha-talitali nima-homo ia? ʻOku ʻikai toe fehuʻia ia! Fakakaukau atu pē ki he tuʻunga, lahi mo e kehekehe ʻo e meʻakai fakalaumālie ʻoku tau maʻu he taimi ní. Fakafou he kalasi tamaioʻeiki anga-tonu mo potó, kuo tokonaki mai ai ʻe Sihova kiate kitautolu ʻa e ngaahi tohi ʻaonga mo e ngaahi polokalama mohu ʻuhinga ʻi he ngaahi fakatahá, ngaahi ʻasemipilií, mo e ngaahi fakataha-lahí—ʻa ia ko ia kotoa ʻoku fakalato ai ʻetau ngaahi fiemaʻu fakalaumālié. (Mātiu 24:​45-47, PM) ʻOku ʻikai moʻoni ha nounou ʻa e meʻakai fakalaumālié. Kuo faʻu ʻe he “tamaioeiki agatonu mo boto” ʻa e Tohi Tapu ʻe laui miliona mo e ʻū tohi tokoni ako Tohi Tapu, pea ko e ʻū tohi ko iá ʻoku ala maʻu ia he taimí ni ʻi he lea ʻe 413. Kuo tokonaki mai ʻe Sihova ʻa e meʻakai fakalaumālie ko ení ʻi he tuʻunga kehekehe lahi—mei he “huʻakau,” ʻa e ngaahi akonaki tefito Fakatohitapú, ki he “meʻakai malohi,” ʻa e fakamatala loloto ange fakalaumālié. (Hepelu 5:​11-14) Ko hono olá, ʻi he taimi ʻoku tau fehangahangai ai mo e ngaahi palopalemá pe ngaahi fili ke faí, ʻe lava ke tau faʻa maʻu ai ʻa e meʻa tofu pē ʻoku tau fiemaʻú. Naʻa tau mei ʻi fē kapau naʻe ʻikai ha meʻakai fakalaumālie pehē? Ko hotau Tauhí ko ha tokotaha tokonaki mātuʻaki nima-homo moʻoni ia!—Aisea 25:6; 65:13.

“Pea ko ʻEku Nofo ʻi he Fale ʻo Sihova”

19, 20. (a) ʻI he Sāme 23:​6, ko e hā ʻa e falala ʻoku fakahāhā ai ʻe Tēvitá, pea ʻe anga-fēfē nai ʻetau kau ʻi he falala ko iá? (e) Ko e hā ʻe lāulea ki ai ʻi he kupu hoko maí?

¹⁹ Hili ʻa e fakakaukauloto ki he ngaahi founga ʻa hono Tauhí mo e Tokotaha-Tokonakí, ʻoku fakaʻosiʻaki ʻe Tēvita: “Ta ʻe toupili mai ʻa e lelei mo e ʻaloʻofa ʻi hoku ngaahi ʻaho kotoa; pea ko ʻeku nofo ʻi he fale ʻo Sihova ʻe fai pe ʻo lauikuonga.” (Sāme 23:6) ʻOku lea ʻa Tēvita mei ha loto ʻoku fonu ʻi he houngaʻia mo e tui—houngaʻia ʻi he fakamanamanatu ki he kuohilí mo e tui ʻi he vakai atu ki he kahaʻú. Ko e tauhi-sipi ko eni ki muʻá ʻoku malu ia, ʻi heʻene ʻiloʻi lolotonga ʻene nofo ofi ai pē ki hono Tauhi fakahēvaní, ʻo hangē ʻoku nofo ʻi Hono falé, te ne hoko maʻu pē ai ko e tokotaha ʻoku tokanga ʻofa ki ai ʻa Sihova.

²⁰ He fakamālō ē ko kitautolu ki he ngaahi lea fakaʻofoʻofa ʻoku lēkooti ʻi he Sāme hono 23! Naʻe maʻu ʻe Tēvita ʻa e founga feʻungamālie taha ke fakamatala ai ki he anga ʻo e tataki, maluʻi mo e fafanga ʻe Sihova ʻa ʻene fanga sipí. Ko e ngaahi fakamatala fakalotomāfana ʻa Tēvitá kuo fakatolonga mai ia ke ʻomai ai ʻa e falala ko kitautolu foki ʻoku lava ke tau hanga kia Sihova ko hotau Tauhí ia. ʻIo, kehe pē ke tau nofo ofi kia Sihova, te ne tokangaʻi kitautolu ʻi he tuʻunga ko ha Tauhi ʻofa “o lauikuonga,” naʻa mo e kotoa ʻo ʻitānití. Kae kehe, ʻi he hoko ko ʻene sipí, ʻoku tau maʻu ai ʻa e fatongia ke ʻaʻeva mo hotau Tauhi lahí, ʻa Sihova. Ko e meʻa ʻoku kau ki hení ʻe lāulea ki ai ʻi he kupu hoko maí.

[Fakamatala ʻi lalo]

ʻOkú Ke Manatuʻi?

• Ko e hā ʻoku feʻungamālie ai ʻa hono fakahoa ʻe Tēvita ʻa Sihova ki ha tauhi-sipí?

• ʻOku anga-fēfē hono taki ʻe Sihova kitautolu fakataha mo e mahinó?

• ʻI he ngaahi founga fē ʻoku tokoniʻi ai ʻe Sihova kitautolu ke tau kātakiʻi ʻa e ngaahi ʻahiʻahí?

• Ko e hā ʻokú ne fakahaaʻi ko Sihová ko ha tokotaha-talitali nima-homó?

[Fehuʻi ki he Ako]

[Fakatātā ʻi he peesi 18]

ʻI he hangē ko ha tauhi-sipi ʻi ʻIsilelí, ʻoku taki ʻe Sihova ʻa ʻEne fanga sipí