ʻOku Tokoniʻi Kitautolu ʻe he Kikite ʻa Hōseá Ke Tau ʻAʻeva mo e ʻOtuá

“Te nau ʻalu muimui kia Sihova.”​—HOSEA 11:10.

1. Ko e hā ʻa e tulama fakaefakatātā ʻoku maʻu ʻi he tohi ʻa Hōseá?

 ʻOKÚ KE fiefia ʻi ha ngaahi foʻi tulama fakataha mo hono kau ʻeti fakatoʻoalotó mo hono ngaahi fokotuʻutuʻu fakamānakó? ʻOku ʻi he tohi Tohi Tapu ʻa Hōseá ha tulama fakaefakatātā. a ʻOku fekauʻaki ʻa e tulama ko iá mo e ngaahi meʻa fakafāmili ʻa e palōfita ʻa e ʻOtuá ko Hōseá pea ʻoku felāveʻi ia mo e mali fakaefakatātā naʻe aleapau ai ʻa Sihova mo ʻIsileli ʻo e kuonga muʻá ʻo fakafou ʻi he fuakava Lao ʻa Mōsesé.

 2. Ko e hā ʻoku ʻiloʻi fekauʻaki mo Hōseá?

² Ko e puipuituʻa ki he foʻi tulama ko ʻení ʻoku maʻu ia ʻi he Hosea vahe 1. ʻOku ngalingali naʻe nofo ʻa Hōsea ʻi he feituʻu ʻo e puleʻanga matakali ʻe hongofulu ʻo ʻIsilelí (ʻa ia naʻe toe ui ko ʻIfalemi, koeʻuhi ko e matakali tefito ia aí). Naʻá ne kikite ʻi he lolotonga ʻa e pule ʻa e kau taki fakamuimui ʻe toko fitu ʻo ʻIsilelí pea ʻi he taimi ʻo e ngaahi tuʻi ko ʻŪsaia, Siotame, ʻĀhasi mo Hesekaia ʻo Siutá. (Hosea 1:1) Ko ia naʻe kikite ai ʻa Hōsea ʻo ʻikai toe siʻi hifo ʻi he taʻu ʻe 59. Neongo ko e tohi ʻoku uiʻaki hono hingoá naʻe kakato ia ʻi he taimi siʻi hili ʻa e 745 K.M., ʻoku mahuʻinga ia ki he ʻahó ni, ʻi he tuli ʻa e laui miliona ki ha ʻalunga hangē ko ia naʻe tomuʻa tala ʻi he ngaahi leá ni: “Te nau ʻalu muimui kia Sihova.”​—Hosea 11:10.

Meʻa ʻOku Fakahaaʻi ʻe he Vakai Fakalūkufuá

3, 4. Fakamatala nounou ki he meʻa ʻoku kātoi ʻi he Hosea vahe 1 ki he 5.

³ Ko ha vakai fakalūkufua nounou ki he Hosea vahe 1 ki he 5 ʻe fakaivimālohiʻi ai ʻa ʻetau fakapapau ke ʻaʻeva mo e ʻOtuá ʻaki hono ngāueʻi ʻa e tuí pea tuli ki ha ʻalunga ʻoku fehoanaki mo hono finangaló. Neongo naʻe hoko ʻa e kau nofo ʻi he puleʻanga ʻIsilelí ʻo halaia ʻi he tono fakalaumālie, ʻe faimeesi ʻa e ʻOtuá kiate kinautolu kapau te nau fakatomala. Naʻe fakatātaaʻi ʻeni ʻe he founga naʻe feangainga ai ʻa Hōsea mo hono uaifí, ʻa Kōmela. Hili ʻene fāʻeleʻi ha tama ʻe taha kiate iá, ʻoku ngalingali naʻe ʻi ai mo ʻene fānau tuʻutāmaki ʻe toko ua. Neongo ia, naʻe fakafoki mai ia ʻe Hōsea, ʻo hangē tofu pē ko e loto-lelei ʻa Sihova ke fakahāhā ʻa e meesi ki he kau ʻIsileli fakatomalá.​—Hosea 1:1–​3:5.

⁴ Naʻe fai ʻe Sihova ha hopo fakalao mo ʻIsileli koeʻuhi naʻe ʻikai ha moʻoni, ʻaloʻofa pe ʻiloʻi ʻo e ʻOtuá ʻi he fonuá. Te ne fai ha ʻeke fakatouʻosi ki ʻIsileli tauhi ʻaitoli mo e puleʻanga talangataʻa ʻo Siutá. Kae kehe, ʻi he taimi naʻe “hoko [ai] ha mamahi” ki he kakai ʻa e ʻOtuá, naʻa nau kumi kia Sihova.​—Hosea 4:1–​5:​15.

Fakahaaʻi ʻa e Tulamá

5, 6. (a) Naʻe mafolalahia fēfē ʻa e feʻauakí ʻi he puleʻanga matakali ʻe hongofulu ʻo ʻIsilelí? (e) Ko e hā ʻoku mahuʻinga ai kiate kitautolu ʻa e fakatokanga naʻe ʻoange ki ʻIsileli ʻo e kuonga muʻá?

⁵ “ʻAlu,” ko e tuʻutuʻuni ia ʻa e ʻOtuá kia Hōseá, “toʻo mai ha fefine feʻauaki, mo e fanau feʻauaki, ʻo mali mo ia: he kuo matuʻaki fai feʻauaki ʻa e fonua, ʻo tuku ʻene muimui kia Sihova.” (Hosea 1:2) Naʻe mafolalahia fēfē ʻa e feʻauakí ʻi ʻIsilelí? ʻOku tala mai kiate kitautolu: “Kuo fakaheeʻi [ʻa e kakai ʻo e puleʻanga matakali ʻe hongofulú] ʻe he laumalie anga-feʻauaki, pea kuo nau fai kovi  mei he fatafata ʻo honau ʻOtua. . . . ʻoku fai feʻauaki ai hoʻomou fanau fefine, pea ʻoku tonoa ai ʻa e ngaahi uaifi ʻo hoʻomou fanau tangata. . . . he naʻa mo e faʻahinga ko é ʻoku nau afe mo e paʻumutu, pea ʻoku nau o mo e kau fefine tapu [pe paʻumutu] ki he feilaulau.”​—Hosea 4:​12-​14.

⁶ Naʻe mafolalahia ʻa e feʻauakí ʻi ʻIsileli ʻi ha ʻuhinga fakaesino mo fakalaumālie fakatouʻosi. Ko ia ai, ʻe fai ʻe Sihova ha “ʻeke” ki he kau ʻIsilelí. (Hosea 1:4; 4:9) ʻOku mahuʻinga ʻa e fakatokangá ni kiate kitautolu koeʻuhi ʻe fai ʻe Sihova ha ʻeke ki he faʻahinga ʻoku nau fai ʻa e ʻulungāanga taʻetāú mo kau ʻi he lotu taʻemaʻa ʻi he ʻaho ní. Ka ko e faʻahinga ko ia ʻoku nau ʻaʻeva mo e ʻOtuá ʻoku nau aʻusia ʻene ngaahi tuʻunga ki he lotu maʻá pea ʻoku nau lāuʻilo “ʻilonga ha feʻauaki . . . ʻoku ʻikai hano tofiʻa ʻi he Puleʻanga ʻo Kalaisi mo e ʻOtua.”​—Efeso 5:4 (5, PM); Semisi 1:​27.

 7. Ko e hā naʻe fakatātaaʻi ʻe he mali ʻa Hōsea mo Kōmelá?

⁷ ʻI he taimi naʻe mali ai ʻa Hōsea mo Kōmelá, ʻoku ngalingali naʻá ne kei tāupoʻou, pea ko ha uaifi faitōnunga ia ʻi he taimi ʻo ʻene “faʻeleʻi kiate ia ha tama.” (Hosea 1:3) Hangē ko ia ʻoku fakahāhaaʻi ʻi he tulama fakaefakatātaá, taimi nounou mei hono fakatauʻatāinaʻi ʻa e kau ʻIsilelí mei he nofo pōpula ʻi ʻIsipité ʻi he 1513 K.M., naʻe fai ai ʻe he ʻOtuá ʻi he tuʻunga meimei tatau ha fuakava mo kinautolu naʻe hangē ha aleapau ki ha mali tuʻunga maʻá. ʻI he felotoi ki he fuakavá, naʻe palōmesi ai ʻa ʻIsileli te ne faitōnunga ki hono “husepaniti,” ʻa Sihova. (Aisea 54:5) ʻIo, ko e mali fakaefakatātā ko ʻeni ʻa ʻIsileli mo e ʻOtuá naʻe fakatātaaʻi ia ʻe he mali tuʻunga maʻa ʻa Hōsea mo Kōmelá. Ka he liliu lahi ē ko e ngaahi meʻá!

 8. Naʻe anga-fēfē ʻa e hoko ʻo ʻi ai ʻa e puleʻanga matakali ʻe hongofulu ʻo ʻIsilelí, pea ko e hā ʻoku malava ke ke leaʻaki fekauʻaki mo ʻene lotú?

⁸ Ko e uaifi ʻo Hōseá “ne toe feitama, ʻo ne faʻeleʻi ha taʻahine.” Ko e taʻahine ko iá pea mo ha tama tangata ki mui ai naʻe tuʻituʻiaʻi nai kinaua ʻe Kōmela ʻi he tono. (Hosea 1:​6, 8) Koeʻuhi ʻoku fakafofongaʻi ʻe Kōmela ʻa ʻIsileli, te ke ʻeke nai, ‘Naʻe anga-fēfē ʻa e hoko ʻa ʻIsileli ʻo paʻumutú?’ ʻI he 997 K.M., naʻe mavahe ai ʻa e ngaahi matakali ʻe hongofulu ia ʻo ʻIsilelí mei he ongo matakali fakatonga ʻo Siuta mo Penisimaní. Naʻe fokotuʻu ʻa e lotu ki he kiʻi pulú ʻi he puleʻanga fakatokelau matakali ʻe hongofulu ʻo ʻIsilelí koeʻuhi ke ʻoua ʻe toe ō ʻa hono kakaí ki Siuta ke lotu ai kia Sihova ʻi hono temipale ʻi Selusalemá. Ko e lotu ki he ʻotua loi ko Pēalí, fakataha mo hono ngaahi kātoanga konā mo fehokotaki fakasinó, naʻe hoko ia ʻo faiaka loloto ʻi ʻIsileli.

 9. Hangē ko ia naʻe tomuʻa tala ʻi he Hosea 1:​6, ko e hā naʻe hoko ki ʻIsilelí?

⁹ ʻI he fāʻeleʻi ʻa e tama tuʻutāmaki nai hono ua ʻa Kōmelá, naʻe tala ʻe he ʻOtuá kia Hōsea: “Ke ke ui hono higoa ko Loluhama: [ko hono ʻuhingá “Naʻe ʻIkai Fakahāhaaʻi ki Ai ha Meesi”]: koeuhi e ikai teu toe ʻaloʻofa [pe meesi] ki he fale o Isileli, ka teu matuaki ave akinautolu.” (Hosea 1:​6, PM) Naʻe “ave akinautolu” ʻe Sihova ʻi hono taki pōpula ko ia ʻe he kau ʻAsīliá ʻa e kau ʻIsilelí ʻi he 740 K.M. Kae kehe, naʻe fakahāhaaʻi ʻe he ʻOtuá ʻa e meesi ki he puleʻanga matakali ʻe ua ʻo Siutá pea fakahaofi ia kae ʻikai faiʻaki ha kaufana, heletā, tau, fanga hoosi pe kau heka hoosi. (Hosea 1:7) ʻI he lolotonga ʻo ha pō ʻe taha ʻi he 732 K.M., naʻe tāmateʻi ai ʻe ha ʻāngelo pē ʻe taha ʻa e kau sōtia ʻAsīlia ʻe toko 185,000 naʻa nau fakamanamanaʻi ʻa e kolomuʻa ʻo Siutá, ʻa Selusalema.​—2 Tuʻi 19:35.

Hopo Fakalao ʻa Sihova mo ʻIsileli

10. Ko e hā naʻe fakatātaaʻi ʻe he ʻulungāanga tono ʻo Kōmelá?

¹⁰ Naʻe liʻaki ʻe Kōmela ʻa Hōsea pea hoko ko ha “fefine feʻauaki,” ʻo nofo fakaetono mo ha toe tangata ʻe taha. Naʻe fakatātaaʻi ʻe he meʻá ni ʻa e hū ʻa e puleʻanga ʻo ʻIsilelí ki ha ngaahi fepikitaki fakapolitikale mo e ngaahi puleʻanga tauhi ʻaitolí pea kamata ke fakafalala kiate kinautolu. ʻI he ʻikai ke ne taku kia Sihova ʻa ʻene ngaahi lakalakaimonū  fakamatelié, naʻe taku ʻe ʻIsileli ia ʻa e ngaahi meʻá ni ki he ngaahi ʻotua ʻo e ngaahi puleʻanga ko iá pea maumauʻi ai ʻene fuakava mali mo e ʻOtuá ʻaki ʻene kau ʻi he lotu loí. ʻOku ʻikai ha ofo ʻi he hopo fakalao ʻa Sihova mo e puleʻanga tono fakalaumālié ni!​—Hosea 1:2; 2:​2, 12, 13.

11. Ko e hā naʻe hoko ki he fuakava Laó ʻi hono fakaʻatā ko ia ʻe Sihova ʻa ʻIsileli mo Siuta ke fakahēʻí?

¹¹ Ko e hā ʻa e tautea naʻe totongi ʻe ʻIsileli ki heʻene tukuange ʻa hono Husepānití? Naʻe ʻai ia ʻe he ʻOtuá ke ne “fakalaka ki he toafa” ʻo Papilōniá, ʻa e puleʻanga naʻá ne ikunaʻi ʻa ʻAsīliá, ʻa ē naʻe fakaheeʻi ki ai ʻa e kau ʻIsilelí ʻi he 740 K.M. (Hosea 2:​14) ʻI hono ʻai ko ia ʻe Sihova ke ngata ʻa e puleʻanga matakali ʻe 10, naʻe ʻikai te ne kaniseli ai ʻene fuakava mali mo e muʻaki puleʻanga matakali ʻe 12 ʻo ʻIsilelí. Ko hono moʻoní, ʻi hono tuku ʻe he ʻOtuá ke fakaʻauha ʻa Selusalema ʻe he kau Pāpiloné ʻi he 607 K.M. pea fakaʻatā ʻa e kakai ʻo Siutá ke hoko ko e kau pōpulá, naʻe ʻikai te ne tāmateʻi ai ʻa e fuakava Lao ʻa Mōsesé ʻa ē naʻe hū ai ʻa e matakali ʻe 12 ʻo ʻIsilelí ki ha mali fakaefakatātā mo iá. Naʻe toki ngata ʻa e vahaʻangatae ia ko iá ʻi he hili hono fakataleʻi ko ia ʻe he kau taki Siú ʻa Sīsū Kalaisi pea tāmateʻi ia ʻi he 33 T.S.​—Kolose 2:​14.

Valokiʻi ʻe Sihova ʻa ʻIsileli

12, 13. Ko e hā ʻa e ʻuhinga ʻo e Hosea 2:​6-8, pea naʻe anga-fēfē ʻa e kaunga ʻa e ngaahi lea ko iá ki ʻIsilelí?

¹² Naʻe valokiʻi ʻe he ʻOtuá ʻa ʻIsileli ke ne “ave ene feauaki,” ka naʻe loto ia ke muimui ʻi he faʻahinga naʻa nau ʻofa fakaemanako ʻiate iá. (Hosea 2:​2, 5, PM) “Ko hono o ia,” ko e folofola ia ʻa Sihová, “ko au eni te u felei ho hala ʻaki ʻa e talatala, te u ngaohi ha ʻa maka ke songo ia, pea ʻe ʻikai te ne lava ke ʻilo hono ngaahi founga. Pea te ne matuʻaki tuli ki hono ngaahi ʻofaʻanga [fakaemanakó], kae ʻikai te ne maʻu kinautolu; ʻio, te ne kumi kiate kinautolu, kae ʻikai te ne ʻiloa. Pea te ne toki pehe, kau foki muʻa ki hoku ʻuluaki husepaniti; he naʻa ku lelei ange ʻi he taimi ko é ʻi he fai ko eni. Ka ko siʻi fefine na ʻoku ʻikai te ne ʻilo ko au ia naʻa ku ʻange ki ai ʻa e uite, mo e uaine mo e lolo, mo fakalahi ʻene siliva mo e koula, naʻa nau ngaohiʻaki ʻa Peali.”​—Hosea 2:​6-8.

¹³ Neongo naʻe kumi ʻa ʻIsileli ki he tokoni ʻa e ngaahi puleʻanga naʻe hoko ko hono “ngaahi ʻofaʻanga [fakaemanakó],” naʻe hala ha taha ia ʻo kinautolu naʻe malava ke tokoni kiate ia. Naʻe felei holo ia ʻo hangē ne faiʻaki ha vaotā fihí, koeʻuhi ke ʻoua te nau malava ke ʻoatu ha tokoni ʻe taha kiate ia. ʻI he hili ha ʻākoloʻi taʻu ʻe tolu ʻe he kau ʻAsīliá, naʻe tō ʻa hono kolomuʻá, ʻa Samēlia, ʻi he 740 K.M., pea naʻe ʻikai ʻaupito ke toe fokotuʻu ʻa e puleʻanga matakali ʻe hongofulú. Ko e faʻahinga tāutaha pē ʻe niʻihi ʻi he lotolotonga ʻo e kau ʻIsileli nofo pōpulá naʻa nau fakatokangaʻi ʻa e ngaahi meʻa lelei naʻe hoko ʻi he taimi naʻe tauhi ai ʻenau fanga kuí kia Sihová. ʻE siʻaki ʻe he toenga ko iá ʻa e lotu Pēalí pea kumi ki ha vahaʻangatae fuakava fakafoʻou mo Sihova.

Ko ha Toe Vakai ʻe Taha ki he Tulamá

14. Naʻe anga-fēfē ʻa e hoko ʻo toe fakafoʻou ʻe Hōsea ʻa e ngaahi vahaʻangatae fakaemali mo Kōmelá?

¹⁴ Ke mahinoʻi kakato ange ʻa e fekauʻaki ʻi he vahaʻa ʻo e ngaahi meʻa fakaemali ʻa Hōseá pea mo e vahaʻangatae ʻo ʻIsileli mo Sihová, fakakaukau angé ki he ngaahi leá ni: “Pea folofola ʻa Sihova kiate au, toe ʻalu, ʻo ʻofaʻi ha fefine ʻoku ai hono ʻofaʻanga, ka kuo ne maumau ʻene alafia [pe tono].” (Hosea 3:1) Naʻe fai ʻa Hōsea ki he tuʻutuʻuni ko ʻení ʻaki hono toe fakatau mai ʻa Kōmela mei he tangata naʻá na nofó. ʻI he hili iá, naʻe valokiʻi fefeka ʻe Hōsea ʻa hono uaifí: “Te ke nofo  kiate au ʻo ʻaho lahi: ʻe ʻikai te ke paʻumutu, pea ʻe ʻikai te ke tali ha tangata.” (Hosea 3:​2, 3) Naʻe tali ʻe Kōmela ʻa e akonakí, pea naʻe toe fakafoʻou ʻe Hōsea ʻa e ngaahi vahaʻangatae fakaemali mo iá. Naʻe anga-fēfē hono ngāueʻaki ʻeni ki he ngaahi feangainga ʻa e ʻOtuá mo e kakai ʻo ʻIsileli mo Siutá?

15, 16. (a) ʻI he malumalu ʻo e ngaahi tuʻunga ko e hā naʻe malava ai ʻa e kakai akonakiʻi ʻa e ʻOtuá ke nau maʻu ʻene mēsí? (e) Kuo anga-fēfē hono fakahoko ʻo e Hosea 2:​18?

¹⁵ Lolotonga ʻa e hoko ʻa e kau fakaheeʻi mei ʻIsileli mo Siutá ko ha kau pōpula ʻi Pāpiloné, naʻe ngāueʻaki ai ʻe he ʻOtuá ʻa ʻene kau palōfitá ke nau ‘lea fakafiemalie kiate kinautolu.’ Ke maʻu ʻa e meesi fakaʻotuá, naʻe pau ki hono kakaí ke nau fakahāhā ʻa e fakatomala pea foki ki honau Husepānití, ʻo hangē ko e toe foki ʻa Kōmela ki hono husepānití. ʻE toʻo leva ʻe Sihova hono puleʻanga hangē ha uaifi naʻe akonakiʻí mei he “toafa” Pāpiloné pea fakafoki mai ia ki Siuta mo Selusalema. (Hosea 2:​14, 15, PM) Naʻá ne fakahoko ʻa e talaʻofa ko iá ʻi he 537 K.M.

¹⁶ Naʻe toe fakahoko ʻe he ʻOtuá ʻa e talaʻofa ko ʻení: “ʻI he taimi ko ia te u fai maʻanautolu ha kovinanite mo e manu ʻo e vao, pea mo e manupuna ʻo e ʻatā, mo e meʻa ʻoku ngaolo ʻi he kelekele: pea te u maumau mo fakaʻosi mei he fonua ʻa e kaufana, mo e heleta, mo e tau; pea te u tuku ke nau tokoto nonga.” (Hosea 2:​18) Ko e toenga ko ia ʻo e kau Siu naʻa nau toe foki ki honau fonua tupuʻangá naʻa nau nofo nonga, ʻo ʻikai ha ʻuhinga ke manavahē ai ki he fanga manú. Naʻe toe fakahoko ʻa e kikite ko ʻení ʻi he 1919 T.S., ʻi he taimi naʻe fakatauʻatāinaʻi ai ʻa e toenga ʻo e ʻIsileli fakalaumālié mei “Pāpilone ko e Lahi,” ʻa e ʻemipaea fakaemāmani ʻo e lotu loí. ʻOku nau nofo nonga he taimí ni mo fiefia ʻi he moʻui ʻi ha palataisi fakalaumālie fakataha mo honau ngaahi takangá, ʻa ē ʻoku nau ʻamanaki atu ki he moʻui taʻengata ʻi he māmaní. ʻOku ʻikai ke ʻi he lotolotonga ʻo e kau Kalisitiane moʻoni ko ʻení ʻa e ngaahi ʻulungāanga fakamanú.​—Fakahā 14:​8, NW; Aisea 11:​6-9; Kaletia 6:​16.

Tali Fakamātoato ʻa e Ngaahi Lēsoní

17-19. (a) Ko e hā ʻa e ongo ʻulungāanga ʻo e ʻOtuá ʻoku enginaki mai heni ke tau faʻifaʻitaki ki aí? (e) ʻOku totonu ke ueʻi fēfē kitautolu ʻe he meesi mo e manavaʻofa ʻa Sihová?

¹⁷ Ko e ʻOtuá ʻoku faimeesi mo manavaʻofa, pea ʻoku totonu ke tau pehē. Ko e lēsoni ia ʻe taha ʻoku akoʻi mai ʻi he muʻaki ongo vahe ʻo e tohi Hosea. (Hosea 1:​6, 7; 2:​23) Ko e loto-lelei ʻa e ʻOtuá ke fakaaʻu atu ʻa e mēsí ki he kau ʻIsileli fakatomalá ʻoku fehoanaki ia mo e palōveepi fakamānavaʻí: “Ko ia ʻoku ʻufiʻufi ʻene ngaahi angahala, ʻe ʻikai te ne tuʻumalie: ka ko ia ʻoku ne vete mo siʻaki, ʻe fai ha mēsi ki ai.” (Palovepi 28:13) ʻOku toe fakafiemālie foki ki he kau faihala fakatomalá ʻa e ngaahi lea ʻa e tokotaha-tohi-sāmé: “Ko e feilaulau ki he ʻOtua ko e laumalie lavea: ko e loto lavea mo mafesifesi ʻe ʻikai taʻe tokaʻi ʻe he ʻAfiona.”​—Sāme 51:17.

¹⁸ ʻOku fakamamafaʻi mai ʻe he kikite ʻa Hōseá ʻa e manavaʻofa mo e meesi ʻa e ʻOtua ʻoku tau lotu ki aí. Neongo kapau ʻoku ʻi ai ha niʻihi ia ʻoku  nau mavahe mei heʻene ngaahi founga māʻoniʻoní, ʻoku malava ke nau fakatomala pea tafoki. Kapau te nau fai ia, ʻe talitali lelei kinautolu ʻe Sihova. Naʻá ne fakahāhaaʻi ʻa e mēsí ki he kau mēmipa fakatomala ʻo e puleʻanga ʻIsilelí, ʻa ē naʻá ne mali fakaefakatātā mo iá. Neongo naʻa nau talangataʻa kia Sihova pea mo ‘fakalotomamahiʻi ʻa e Tokotaha Māʻoniʻoni ʻo ʻIsilelí, naʻá ne meesi mo manatuʻi maʻu pē ko e kakano kinautolu.’ (Sāme 78:​38-​41, NW) ʻOku totonu ke ueʻi kitautolu ʻe he meesi peheé ke tau hanganaki ʻaʻeva mo hotau ʻOtua manavaʻofá, ʻa Sihova.

¹⁹ Neongo naʻe mafolalahia ʻa e ngaahi angahala hangē ko e fakapoó, kaihaʻá mo e fai feʻauakí ʻi ʻIsileli, naʻe “lea fakafiemalie kiate ia” ʻa Sihova. (Hosea 2:​14, PM; Ho 4:2) ʻOku totonu ke ueʻi hotau lotó tonu pea fakaivimālohiʻi ʻetau pīkitai fakafoʻituitui kia Sihová ʻi heʻetau fakakaukauloto atu ki heʻene mēsí mo ʻene manavaʻofá. Ko ia ai, tau ʻeke hifo kiate kitautolu: ‘ʻE malava fēfē ke u faʻifaʻitaki lelei ange ki he meesi mo e manavaʻofa ʻa Sihová ʻi heʻeku ngaahi feangainga mo e niʻihi kehé? Kapau ʻoku kole fakamolemole mai ha kaungā Kalisitiane kuó ne fakalotomamahiʻi au, ʻoku ou mateuteu ke fakamolemole ʻo hangē ko ia ko e ʻOtuá?’​—Sāme 86:5.

20. ʻOmai ha fakatātā ke fakahāhaaʻiʻaki ʻoku totonu ke tau maʻu ʻa e loto-falala ki he ʻamanaki ʻoku ʻomai ʻe he ʻOtuá.

²⁰ ʻOku ʻomai ʻe he ʻOtuá ʻa e ʻamanaki moʻoní. Ko e fakatātaá, naʻá ne talaʻofa: “Teu foaki kiate ia . . . moe telea o Akoli koe mataba oe amanaki.” (Hosea 2:​15, PM) Naʻe maʻu ʻe he kautaha hangē ha uaifi ʻo Sihova ʻi he kuonga muʻá ʻa e ʻamanaki papau ko hono toe fakafoki ki hono fonua tupuʻangá, ʻa ia naʻe tuʻu ai ʻa e “telea o Akoli.” Ko hono fakahoko ʻo e talaʻofa ko iá, ʻi he 537 K.M., ʻoku ʻomai ai kiate kitautolu ʻa e ʻuhinga mahuʻinga ke tau fiefia ʻi he ʻamanaki papau ʻoku fokotuʻu mai ʻe Sihova kiate kitautolú.

21. Ko e hā ʻa e ngafa ʻoku fakahoko ʻe he ʻiló ʻi heʻetau ʻaʻeva mo e ʻOtuá?

²¹ Ke hokohoko ʻaʻeva mo e ʻOtuá, ʻoku fiemaʻu ke tau hanganaki maʻu ʻa e ʻilo kiate ia pea ngāueʻaki ia ʻi heʻetau moʻuí. Naʻe mātuʻaki hala ʻa ʻIsileli ʻi he ʻilo kia Sihová. (Hosea 4:​1, 6) Neongo ia, naʻe fakamahuʻingaʻi lahi ʻe he niʻihi ʻa e fakahinohino fakaʻotuá, ngāue ʻo fehoanaki mo ia, pea naʻe tāpuakiʻi lahi kinautolu. Ko e taha ʻo kinautolu ko Hōsea. Naʻe pehē mo e toko 7,000 ko ia ʻi he ʻaho ʻo ʻIlaisiaá naʻe ʻikai te nau punou kia Pēalí. (1 Tuʻi 19:18; Loma 11:​1-4) Ko ʻetau houngaʻia tonu ʻi he fakahinohino fakaʻotuá ʻe tokoniʻi ai kitautolu ke tau hanganaki ʻaʻeva mo e ʻOtuá.​—Sāme 119:66; Aisea 30:​20, 21.

22. ʻOku totonu ke fēfē ʻa e vakai ki he tafoki mei he moʻoní?

²² ʻOku ʻamanekina mai ʻe Sihova ʻa e kau tangata ʻoku nau takimuʻa ʻi he lotolotonga ʻo hono kakaí ke nau talitekeʻi ʻa e tafoki mei he moʻoní. Kae kehe, ʻoku pehē ʻe he Hosea 5:1: “Fanongo ki he meʻa ni, ʻa e kau taulaʻeiki; pea mou tokanga, ʻa e fale ʻo Isileli, pea mou fokotuʻu telinga mai, ʻa e fale ʻo e tuʻi; he ko homou fakamāu ʻoku tala; he kuo mou hoko ko e helepuna ʻi Misipa, mo e kupenga kuo aʻau ʻi funga Tepoa.” Naʻe hoko ʻa e kau takimuʻa tafoki mei he moʻoní ko ha tauhele mo ha kupenga ki he kau ʻIsilelí, ʻo fakataueleʻi ai kinautolu ke nau fai ʻa e tauhi ʻaitolí. Ko Moʻunga Tēpoa mo e feituʻu ʻoku ui ko Misipaá ʻoku ngalingali ko e ongo senitā ia ʻo e lotu loi ko iá.

23. Kuo anga-fēfē hoʻo maʻu ʻaonga mei hano ako ʻa e Hosea vahe 1 ki he 5?

²³ Ko ia ai, ko e kikite ʻa Hōseá kuó ne fakahaaʻi mai kiate kitautolu ko Sihová ko ha ʻOtua faimeesi ʻokú ne ʻomai ʻa e ʻamanaki pea tāpuakiʻi ʻa e faʻahinga ʻoku nau ngāueʻaki ʻene fakahinohinó pea talitekeʻi ʻa e tafoki mei he moʻoní. Ko ia ai, ʻi he hangē ko e kau ʻIsileli fakatomala ʻo e kuohilí, tau kumi kia Sihova pea feinga maʻu pē ke fakahōifuaʻi ia. (Hosea 5:​15) ʻI he fai peheé, te tau utu ai ʻa e meʻa ʻoku leleí pea maʻu ai ʻa e fiefia mo e melino taʻealafakatataua ʻoku hokosia ʻe he faʻahinga kotoa ʻoku nau ʻaʻeva faitōnunga mo e ʻOtuá.​—Sāme 100:2; Filipai 4:​6, 7.

[Fakamatala ʻi lalo]

ʻE Anga-Fēfē Haʻo Tali?

• Ko e hā naʻe fakatātaaʻi ʻe he mali ʻa Hōsea mo Kōmelá?

• Ko e hā naʻe hopo fakalao ai ʻa Sihova mo ʻIsilelí?

• Ko e hā ʻa e lēsoni ʻi he Hosea vahe 1 ki he 5 naʻe maongo kiate koé?

[Fehuʻi ki he Ako]

[Fakatātā ʻi he peesi 18]

ʻOkú ke ʻilo ko hai ʻoku fakafofongaʻi ʻe he uaifi ʻo Hōseá?

[Fakatātā ʻi he peesi 19]

Naʻe ikunaʻi ʻe he kau ʻAsīliá ʻi he 740 K.M. ʻa e kau nofo ʻi Samēliá

[Fakatātā ʻi he peesi 20]

Kakai fiefia ʻoku nau toe foki ki honau fonua tupuʻangá