ʻĀmaketone—Ko ha Kamataʻanga Fiefia

KO E foʻi lea “ʻĀmaketone” ko e tupu ia mei he foʻi lea faka-Hepelū ko e “Hamaketone,” pe “Moʻunga ʻo Mekito.” ʻOku maʻu ia ʻi he Fakahā 16:​16, ʻa ia ʻoku pehē: “Naʻa [nau] fakataha kinautolu ki he potu ʻoku ui ʻi he lea faka-Hepelu ko Hamaketone.” Ko hai ʻoku fakataha ki ʻĀmaketoné, pea ko e hā hono ʻuhingá? ʻI he veesi pē ʻe ua ki muʻá, ʻi he Fakahā 16:​14, ʻoku tau lau ai: “[Ko e] ngaahi tuʻi ʻo mamani kātoa” ʻoku nau fakatahataha “ki he tau ʻo e ʻaho lahi ʻo e ʻOtua Aoniu.” (Fakaʻītali ʻamautolu.) Ko hono moʻoní, ʻoku langaʻi hake ʻe he ongo fakamatala ko iá ha ngaahi fehuʻi mahuʻinga ʻaupito. Ko fē ʻoku faitau ai ʻa e “ngaahi tuʻi” ko ʻení? Ko e hā ʻa e ʻīsiu ʻoku nau faitau aí, pea mo hai? Te nau ngāueʻaki, hangē ko ia ʻoku tui ki ai ʻa e tokolahi, ʻa e ngaahi meʻatau fakaʻauha fakatokolahí? ʻE ʻi ai ha kau hao moʻui atu ʻi ʻĀmaketone? Tuku ki he Tohi Tapú ke ne ʻomai ʻa e talí.

ʻOku ʻuhinga ʻa e lave ki he “Moʻunga ʻo Mekito” ʻe fai ʻa e tau ʻo ʻĀmaketoné ʻi ha moʻunga pau ʻi he Hahake Lotolotó? ʻIkai. Ko e meʻa ʻe taha, ʻoku ʻikai ke ʻi ai moʻoni ha moʻunga pehē ia—ʻi he tuʻuʻanga ʻo Mekito ʻo e kuonga muʻá, ko ha foʻi māʻolunga pē ʻe taha ʻoku mahiki hake ʻi he mita ʻe 20 nai ki ʻolunga ʻi he teleʻa tokalelei ʻoku fehokotaki mo ia. Tānaki atu ki ai, ko e ʻēlia takatakai ʻi Mekitó heʻikai malava ke ne fālute ʻe ia ʻa e “ngaahi tuʻi ʻo mamani, mo ʻenau ngaahi matatau.” (Fakahā 19:19) Kae kehe, ko Mekito ʻa e faiʻanga ʻo e niʻihi ʻo e ngaahi tau fakailifia taha mo ʻosi fakapapauʻi taha hono olá ʻi he hisitōlia Fakahahake Lotolotó. Ko ia ai, ko e hingoa ʻĀmaketoné ʻoku tuʻu ia ko ha fakaʻilonga ʻo ha fepaki kuo ʻosi fakapapauʻi hono olá, fakataha mo e tokotaha-ikuna mahino pē ʻe taha.—Sio ki he puha “Mekito—Ko ha Fakaʻilonga Feʻungamālie,” ʻi he peesi 5.

Heʻikai malava ke pehē ko ʻĀmaketoné ko ha fepaki pē ʻi he lotolotonga ʻo e ngaahi puleʻanga fakaemāmaní, koeʻuhi ʻoku pehē ʻe he Fakahā 16:14 ko e “ngaahi tuʻi ʻo mamani kātoa” ʻoku nau fokotuʻu ha kulupu fakafepaki fāʻūtaha ki he “tau ʻo e ʻaho lahi ʻo e ʻOtua Aoniu.” ʻI heʻene kikite fakamānavaʻí, naʻe pehē ai ʻe Selemaia ko e faʻahinga “e tamateʻi e Jihova” ʻe movete “mei he gataaga e taha o mamani o aʻu ki hono gataaga e taha o mamani.” (Selemaia 25:​33, PM) Ko ia ai, ko ʻĀmaketoné ʻoku ʻikai ko ha tau fakaetangata ia ʻo fakangatangata pē ki ha feituʻu pau ʻi he Hahake Lotolotó. Ko e tau ia ʻa Sihova, pea ʻoku fakamāmani lahi.

Kae kehe, fakatokangaʻi ʻi he Fakahā 16:​16, ʻoku ui ai ʻa ʻĀmaketone ia ko ha “potu.” ʻI he Tohi Tapú ko ha “potu” ʻoku ʻuhinga nai ia ki ha founga pe faʻahinga tuʻunga—ʻi he tuʻunga ko ʻení, ko e māmaní fakakātoa te nau fāʻūtaha ʻi he fakafepaki kia Sihova. (Fakahā 12:​6, 14) ʻI ʻĀmaketone ʻe fakatahataha ai ʻa e kotoa ʻo e ngaahi puleʻanga fakaemāmaní ʻo fepaki mo e “ngaahi matatau ʻoku ʻi he langi” ʻi he malumalu ʻo e tuʻutuʻuni fakakautau ʻa e “Tuʻi ʻo e ngaahi tuʻi, mo e ʻEiki ʻo e ngaahi ʻeiki,” ʻa Sīsū Kalaisi.—Fakahā 19:​14, 16.

Fēfē ʻa e taukaveʻi ko ia ko ʻĀmaketoné ko ha tāmate fakatokolahi ʻe kau ai ʻa e ngaahi meʻatau fakaʻauha fakatokolahi pe ko ha fepaki mo ha naunau fakalangí? ʻE fakaʻatā ʻe ha ʻOtua ʻofa ha faʻahinga ngataʻanga fakalilifu pehē ki he faʻahinga ʻo e tangatá pea mo honau ʻapí, ʻa e māmaní? ʻIkai. ʻOkú ne fakahaaʻi papau mai naʻe ʻikai te ne fakatupu ʻa e māmaní ke “maomaonganoa” ka “naʻa ne faʻu ia ke nofoʻanga.” (Aisea 45:18; Sāme 96:10) ʻI ʻĀmaketone, ʻe ʻikai ke maumauʻi ai ʻe Sihova ʻa hotau kolopé ʻi ha vela lahi fakalilifu. ʻI hono kehé, te ne “fakaʻauha ʻakinautolu ʻoku fakaʻauha ʻa e fonua.”—Fakahā 11:18.

ʻĀmaketone—ʻAfē?

ʻI he laui senituli, ko ha fehuʻi vivili ʻeni kuó ne fakatupunga ʻa e fifili taʻengatá, ʻE hoko mai ʻa ʻĀmaketoné ʻafē? Ko hono sivisiviʻi ʻa e tohi Fakahaá ʻi he fakamaama ʻa e ngaahi konga kehe ʻo e Tohi Tapú ʻoku malava ke ne tokoniʻi kitautolu ke  tau fakapapauʻi ai ʻa e taimi ʻo e tau mātuʻaki mahuʻingá ni. ʻOku fakafehokotaki ʻe he Fakahā 16:15 ʻa ʻĀmaketone mo e haʻu ʻa Sīsū hangē ha kaihaʻá. Ko e foʻi lea fakaefakatātā ko iá ʻoku toe ngāueʻaki ʻe Sīsū ʻi hono fakamatalaʻi ʻene haʻu ke fakahoko ʻa e fakamaau ki he fokotuʻutuʻu ʻo e ngaahi meʻa ko ʻení.—Mātiu 24:​43, 44; 1 Tesalonaika 5:2.

Hangē ko ia kuo fakahaaʻi ʻe he fakahoko ʻo e ngaahi kikite ʻa e Tohi Tapú, talu mei he 1914 kuo tau moʻui mai ai ʻi he ngaahi ʻaho fakaʻosi ʻo e fokotuʻutuʻu ʻo e ngaahi meʻa ko ʻení. a ʻE fakaʻilongaʻi ʻa e konga fakaʻosi ʻo e ngaahi ʻaho fakaʻosí ʻe he vahaʻa taimi naʻe ui ʻe Sīsū ko e “mamahi lahi.” ʻOku ʻikai ke tala mai ʻe he Tohi Tapú ia pe ko e hā ʻa e lōloa ʻo e vahaʻa taimi ko iá, ka ko e ngaahi fakatamaki ʻoku fekauʻaki mo iá ʻe kovi ange ia ʻi ha meʻa pē kuo faifai ange pea mātā ʻe he māmaní. ʻE hoko ʻa e tumutumu ʻo e fuʻu mamahi lahi ko iá ʻi ʻĀmaketone.—Mātiu 24:​21, 29.

Koeʻuhi ko ʻĀmaketoné ko e “tau ʻo e ʻaho lahi ʻo e ʻOtua Aoniu,” ʻoku halaʻatā ha meʻa ia ʻe lava ʻe he faʻahinga ʻo e tangatá ke fai ke toloi ai ia. Kuo fokotuʻu ʻe Sihova ia ha “taimi kotofa” ke kamata ai ʻa e tau ko iá. “ʻE ʻikai tōmui ia.”—Hapakuke 2:​3, NW.

Ko ha ʻOtua ʻo e Māʻoniʻoni ʻOkú Ne Fakahoko ha Tau Faitotonu

Ka, ko e hā ʻe faitau ai ʻa e ʻOtuá ʻi ha tau fakaemāmani lahí? ʻOku felāveʻi vāofi ʻa e ʻĀmaketoné  mo e taha ʻo hono ngaahi ʻulungāanga tefitó, ʻa e fakamaau totonú. ʻOku fanongonongo ʻe he Tohi Tapú: “Oku ofa a Jihova ki he fakamāu [totonú].” (Sāme 37:​28, PM) Kuó ne ʻafioʻi ʻa e kotoa ʻo e ngaahi tōʻonga ʻo e fakamaau taʻetotonú heʻene hoko ʻi he lolotonga ʻo e hisitōlia ʻo e tangatá. ʻOku langaʻi moʻoni ai ʻe he meʻá ni ʻa ʻene taʻefiemālie totonu. Ko ia ai, kuó ne fakanofo hono ʻAló ke fakahoko ha tau faitotonu koeʻuhi ke fakaʻauha ʻa e fokotuʻutuʻu fulikivanu fakakātoa ko ʻení.

Ko Sihova pē ʻoku malava ke ne fakahoko ha tau faitotonu moʻoni mo fai filifili moʻoni ʻa ia ʻi he lolotonga iá ko e faʻahinga tāutaha loto-totonú, ʻi ha feituʻu pē ʻoku nau ʻi ai ʻi he māmaní, ʻe fakahaofi. (Mātiu 24:​40, 41; Fakahā 7:​9, 10, 13, 14) Pea ko ia pē ʻokú ne maʻu ʻa e totonu ke fokotuʻu hono tuʻunga-haú ʻi he māmaní kotoa, he ko ʻene fakatupu.—Fakahā 4:11.

Ko e hā ʻa e ngaahi mālohinga ʻe ngāueʻaki ʻe Sihova ki hono ngaahi filí? ʻOku ʻikai pē ke tau ʻilo. Ko e meʻa ʻoku tau ʻiló ʻokú ne maʻu ʻi hono mālohí ʻa e ngaahi founga ke fakaʻauhaʻaki ʻa e ngaahi puleʻanga fulikivanú fakakātoa. (Siope 38:​22, 23; Sefanaia 1:​15-18) Kae kehe, ko e kau lotu ʻa e ʻOtuá ʻi he māmaní ʻe ʻikai te nau kau ʻi he taú. ʻOku fakahaaʻi ʻe he vīsone ʻi he Fakahā vahe 19 ko e kau tau fakahēvani pē ʻe kau fakataha mo Sīsū Kalaisi ʻi he faitaú. Heʻikai ha taha ia ʻo e kau sevāniti Kalisitiane ʻa Sihova ʻi he māmaní ʻe kau ai.—2 Kalonikali 20:​15, 17.

Ko ha ʻOtua ʻo e Poto ʻOkú Ne ʻOmai ʻa e Fakatokanga Feʻungamālie

Fēfē ʻa e kau hao moʻuí? Ko e moʻoni, ʻoku ʻikai fiemaʻu ke ʻauha ha taha ia ʻi ʻĀmaketone. Naʻe pehē ʻe he ʻapositolo ko Pitá: “[Ko] Sihova . . . ʻoku ʻikai te ne finangalo ke fakaʻauha ha taha ka ʻokú ne finangalo ke aʻusia ʻe he tokotaha kotoa pē ʻa e fakatomalá.” (2 Pita 3:​9, NW) Pea naʻe pehē ʻe he ʻapositolo ko Paulá ko e ʻOtuá “ʻoku ne finangalo ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.”—1 Timote 2:4.

Ki he taumuʻa ko iá, kuo fakapapauʻi fakapotopoto ai ʻe Sihova ʻoku fanongonongo ʻa e “ongoongolelei ko eni ʻo e puleʻanga” ʻi he feituʻu kotoa pē, ʻi he ngaahi lea ʻe lauingeau. ʻOku ʻoatu ki he kakai ʻi he feituʻu kotoa pē ʻa e faingamālie ki he hao mo e fakamoʻui. (Mātiu 24:14; Sāme 37:34; Filipai 2:12) Ko e faʻahinga ko ia ʻoku nau tali lelei ʻa e ongoongo leleí ʻe malava ke nau hao moʻui atu ʻi ʻĀmaketone pea moʻui taʻengata ʻi he haohaoa ʻi ha māmani palataisi. (Isikeli 18:​23, 32; Sefanaia 2:3; Loma 10:13) ʻIkai ko e meʻa ʻeni ʻe ʻamanekina ʻe ha taha mei ha ʻOtua ʻoku ʻofa?—1 Sione 4:8.

ʻE Lava ha ʻOtua ʻo e ʻOfá ke Faitau?

Kae kehe, ʻoku fifili ʻa e tokolahi ki he ʻuhinga ʻe ʻomai ai ʻe ha ʻOtua ʻa ia ko e fakasino tonu mai ia ʻo e ʻofá ʻa e maté mo e fakaʻauhá ki he konga lahi ʻo e faʻahinga ʻo e tangatá. ʻE lava nai ke fakahoa ʻa e tuʻungá ni ki ha tuʻunga ʻo ha fale ʻoku fonu he fanga kiʻi manu maumaú. ʻIkai te ke loto-tatau ko ha tokotaha tokanga ʻoku ʻoʻona ʻa e falé ʻoku totonu ke ne maluʻi ʻa e moʻui lelei mo e tuʻunga lelei ʻo hono fāmilí ʻaki hono fakaʻauha ʻa e fanga kiʻi manu maumaú?

ʻI he tuʻunga meimei tatau, koeʻuhi ko e ʻofa loloto ʻa Sihova ki he faʻahinga ʻo e tangatá kuo pau ke fakahoko ai ʻa e tau ʻo ʻĀmaketoné. Ko e taumuʻa ʻa e ʻOtuá ke ʻai ʻa e māmaní ko ha palataisi pea ʻohake ʻa e faʻahinga ʻo e tangatá ki he haohaoa mo e melino, “ʻo ʻikai mafakahohaʻa kinautolu ʻe ha taha.” (Maika 4:​3, 4; Fakahā 21:4) Ko e hā leva ʻe fai ki he faʻahinga ko ia ʻoku nau fakamanamana ki he melino mo e malu ʻa honau kaungā faʻahinga ʻo e tangatá? Kuo pau ke toʻo atu ʻe he ʻOtuá ʻa e “fanga kiʻi manu maumau” peheé—ʻa e kau fulikivanu taʻemangoí—koeʻuhi ko ha lelei maʻá e faʻahinga māʻoniʻoní.—2 Tesalonaika 1:​8, 9; Fakahā 21:8.

Ko e konga lahi ʻo e fekeʻikeʻi mo e lingitoto ʻi he ʻaho ní ʻoku fakatupunga ia ʻe he tuʻunga-pule fakaetangata taʻehaohaoá pea mo e feinga siokita ki he ngaahi meʻa fekauʻaki mo e mamahiʻi-fonuá. (Koheleti 8:9) ʻI he feinga ke fakalahi ʻenau tākiekiná, kuo taʻetokaʻi fakaʻaufuli ai ʻe he ngaahi founga-pule fakaetangatá ia ʻa e Puleʻanga ʻo e ʻOtuá ʻa ia kuo fokotuʻú. ʻOku ʻikai ha fakaʻilonga ia te nau liʻaki ʻenau tuʻunga-pulé pea tuku atu ia ki he ʻOtuá mo Kalaisi. (Sāme 2:​1-9) Ko ia ai, kuo pau ke toʻo atu ʻa e ngaahi founga-pule peheé kae tofa ʻa e hala ki he pule māʻoniʻoni ʻa e Puleʻanga ʻo Sihová ʻi he malumalu ʻo Kalaisí. (Taniela 2:44) Kuo pau ke faitau ʻa ʻĀmaketone ia koeʻuhi ke fakaleleiʻi tā tuʻo taha ʻa e ʻīsiu ko ia pe ko hai ʻokú ne maʻu ʻa e totonu ke pule ki he palanite ko ʻení mo e faʻahinga ʻo e tangatá.

 Ko e kau longomoʻui mai ʻa Sihova ʻi ʻĀmaketoné ko ha lelei lahi ia maʻá e faʻahinga ʻo e tangatá. ʻI he fehangahangai mo e ngaahi tuʻunga fakaʻau ki he kovi ange ʻo e māmaní, ko e tuʻunga-pule haohaoa pē ʻa e ʻOtuá te ne fakafiemālieʻi kakato ʻa e ngaahi fiemaʻu ʻa e faʻahinga ʻo e tangatá. Ko hono Puleʻangá pē ʻe hoko mai ai ʻa e melino mo e lakalakaimonū moʻoní. ʻE fēfē ʻa e ngaahi tuʻunga ʻo e māmaní kapau ʻe fakafisi taʻengata ʻa e ʻOtuá ia ke kau mai ki ai? ʻIkai ʻe hokohoko atu hono uesia ʻe he tāufehiʻá, fakamālohí mo e ngaahi taú ʻa e faʻahinga ʻo e tangatá ʻo hangē ko ia kuo hoko ʻi he laui senituli kotoa ʻo e tuʻunga-pule fakaetangatá? Ko e tau ʻo ʻĀmaketoné ko e taha moʻoni ia ʻo e ngaahi meʻa lelei taha ʻe lava ke hoko mai kiate kitautolú!—Luke 18:​7, 8; 2 Pita 3:13.

Ko e Tau ke Fakangata ʻa e Ngaahi Tau Kotoa Pē

ʻE fakahoko ʻe ʻĀmaketone ha meʻa kuo teʻeki ai ʻaupito ke fakahoko ia ʻe ha toe tau kehe—ke fakangata ʻa e ngaahi tau kotoa pē. Ko hai ia ʻoku ʻikai ke fakaʻamu ki he ʻaho ʻa ia ʻe hoko ai ʻa e taú ia ko ha meʻa pē ʻo e kuohilí? Kae kehe, ko e fakangata ʻo e taú kuo taʻemalava ia ʻi he ngaahi feinga kotoa ʻa e tangatá. ʻOku fakamamafaʻi mai pē ʻe he ngaahi toutou taʻemalava pehē ʻa e ngaahi feinga ʻa e tangatá ke fakangata ʻa e taú ʻa e moʻoni ʻo e ngaahi lea ʻa Selemaiá: “ʻOku ou ʻilo, ʻe Sihova, ʻoku ʻikai ʻi he tangata hono hala: ʻoku ʻikai ʻi he tangata ʻoku haʻele ke fakaʻuli ʻene ʻalu.” (Selemaia 10:23) ʻI he fekauʻaki mo e meʻa ʻe fakahoko ʻe Sihová, ʻoku talaʻofa mai ʻa e Tohi Tapú: “ʻOku ne lolololo ʻa e ngaahi tau ʻo aʻu ki he ngataʻanga ʻo mamani, ʻoku ne fesiʻi kaufana, mo tutuʻu tao, mo tutu saliote ʻi he afi.”—Sāme 46:​8, 9.

ʻI hono ngāueʻaki ʻe he ngaahi puleʻangá ʻenau ngaahi meʻatau fakatupu maté ʻiate kinautolu pea mo fakamanamana ke fakaʻauhaʻaki ʻa e ʻātakaí, ʻe ngāue mai leva ʻa e Tokotaha-Ngaohi ʻo e māmaní—ʻi he ʻĀmaketone Fakatohitapú! (Fakahā 11:18) Ko ia ai, ʻe fakahoko ʻe he taú ni ʻa e meʻa naʻe lava ke ʻamanaki pē ki ai ʻa e kau tangata manavahē-ʻOtuá ʻi he kotoa ʻo e ngaahi kuongá. Te ne fakatonuhiaʻi ʻa e tuʻunga-pule totonu ʻa e Tokotaha-ʻAʻana ʻo e māmaní, ʻa Sihova ko e ʻOtuá, ki he kotoa ʻo ʻene fakatupú.

Ko ia ai, ʻoku ʻikai fiemaʻu ke ilifia ʻa e kakai ʻoku ʻofa ki he māʻoniʻoní ki ʻĀmaketone. ʻI hono kehé, ʻokú ne ʻomai ha makatuʻunga ki he ʻamanaki. Ko e tau ʻo ʻĀmaketoné te ne fakamaʻa atu mei he māmaní ʻa e taʻefaitotonu mo e fulikivanu kotoa pē pea fakaʻatā ʻa e hala ki ha fokotuʻutuʻu foʻou māʻoniʻoni ʻo e ngaahi meʻá ʻi he malumalu ʻo e pule ʻa e Puleʻanga Faka-Mīsaia ʻo e ʻOtuá. (Aisea 11:​4, 5) ʻI he ʻikai ko ha ngataʻanga fakalilifu fakailifia iá, ʻe fakaʻilongaʻi ʻe ʻĀmaketone ha kamataʻanga fiefia ki he faʻahinga tāutaha māʻoniʻoni ko ia te nau moʻui taʻengata ʻi ha māmani palataisí.—Sāme 37:29.

[Fakamatala ʻi lalo]

[Puha/Fakatātā ʻi he peesi 5]

MEKITO—KO HA FAKAʻILONGA FEʻUNGAMĀLIE

Naʻe tuʻu ʻa Mekito ʻo e kuonga muʻá ʻi ha feituʻu mātuʻaki mahuʻinga, ʻo hanga hifo ki he tafaʻaki fakahihifo ʻo e Teleʻa Sisilili kelekele moʻuí, ʻi ʻIsileli fakatokelau. Naʻá ne puleʻi ʻa e fefakatauʻaki fakavahaʻapuleʻangá mo e ngaahi halanga fakakautau naʻe fekolosiʻaki aí. Ko ia ai, naʻe hoko ʻa Mekito ko ha feituʻu ʻo e ngaahi tau ne ʻosi fakapapauʻi hono olá. ʻOku tohi ʻe Palōfesa Graham Davies ʻi heʻene tohi ko e Cities of the Biblical World​—Megiddo: “Ko e kolo lahi ko Mekitó . . . naʻe faingofua ʻa e hū ki ai ʻa e kau fefakatauʻakí mo e kau fehikitaki mei he ngaahi feituʻu kotoa; ka ʻi he taimi tatau naʻá ne malava, kapau naʻe mālohi feʻunga, ke ne puleʻi ʻa e hū ki aí fakafou ʻi he ngaahi halanga ko ʻení pea naʻe malava ai ke ne tataki ʻa e ʻalunga fakatouʻosi ʻo e fefakatauʻakí mo e taú. Ko ia ai, ʻoku ʻikai ha ʻohovale ʻi heʻene hoko . . . ko ha pale naʻe faʻa fai hono tauʻi pea ʻi hono ikunaʻí naʻe fai hono maluʻi fefeka.”

Ko e hisitōlia lōloa ʻo Mekitó naʻe kamata ʻi he mileniume hono ua K.M., ʻi hono ikunaʻi ʻe he pule ʻIsipite ko Tatimose III ʻa e kau pule Kēnani aí. Naʻe hokohoko mai ia ʻi he laui senituli ʻo aʻu mai ki he 1918 ʻi hono fakahoko ʻe Seniale Edmund Allenby ʻo Pilitāniá ha ikunaʻi fakamamahi ʻo e kau tau Toaké. Ko Mekito naʻe fakamafeia ai ʻe he ʻOtuá ʻa Fakamaau Pēlaki ke ne fakahoko ha tā fakaʻauha kia Tuʻi Siapini ʻo Kēnaní. (Fakamaau 4:​12-24; 5:​19, 20) Ko e feituʻu takatakai ia naʻe ikunaʻi ai ʻe Fakamaau Kitione ʻa e kau Mitianí. (Fakamaau 7:​1-22) Ko e toe feituʻu foki ia, naʻe tāmateʻi ai ʻa e ongo tuʻi ko ʻAhasaia mo Siosaiá.—2 Tuʻi 9:27; 23:​29, 30.

Ko hono fakafekauʻaki ʻo ʻĀmaketone mo e feituʻu takatakai ko iá ʻoku feʻungamālie, koeʻuhi ko e feituʻu ia ʻo e ngaahi tau lahi ne ʻosi fakapapauʻi ʻa e olá. Ko ha fakaʻilonga feʻungamālie ia ʻo hono ikunaʻi fakaʻaufuli ʻe he ʻOtuá ʻa e ngaahi kongakau fakafepakí kotoa.

[Maʻuʻanga]

Pictorial Archive (Near Eastern History) Est.

[Fakatātā ʻi he peesi 7]

ʻI māmani lahi, ʻoku lolotonga ʻoatu ai ki he kakaí ha fakatokanga pea mo e faingamālie ke hao moʻui atu ʻi ʻĀmaketone

[Fakatātā ʻi he peesi 7]

ʻE fakaʻilongaʻi ʻe ʻĀmaketone ha kamataʻanga fiefia