Fanongo ʻa e Kakai “mei he Ngaahi Lea Kehekehe ʻo e Ngaahi Puleʻanga” ki he Ongoongo Leleí

“[Ko] ha tuʻunga tangata ʻe toko hongofulu, mei he ngaahi lea kehekehe ʻo e ngaahi puleʻanga, ʻio te nau [pehē], Te tau ō mo kimoutolu; he kuo mau fanongo ʻoku ʻiate kimoutolu ʻa e ʻOtua.”​—SAKALAIA 8:​23.

1. Naʻe anga-fēfē hono tokonaki mai ʻe Sihova ʻa e taimi mo e tuʻunga lelei tahá ki hono kamata ʻo e lotu faka-Kalisitiané ʻi he lea lahi mo fakavahaʻapuleʻangá?

 NAʻE lelei ʻaupito ʻa e taimí mo e tuʻunga ʻo e meʻa naʻe hokó. Ko e ʻaho ia ʻo e Penitekosi 33 T.S. ʻI ha ngaahi uike ki muʻa, naʻe fakafonu ai ki Selusalema ʻa e kau Siu mo e kau ului Siu mei he ngaahi vahefonua ʻikai siʻi hifo he 15 ʻo e ʻEmipaea Loma mafolalahiá pea fakalaka atu ai ke kātoangaʻi ʻa e Pāsová. ʻI he ʻaho ko iá, naʻe fanongo ai ʻa e laui afe ʻo kinautolu—ʻo ʻikai ʻi ha puputuʻu, ʻo hangē ko ia ne hoko ki he faʻahinga ʻi Pēpeli ʻo e kuonga muʻá, ka naʻa nau mahinoʻi—ʻa hono fanongonongo ʻo e ongoongo leleí ʻe he kakai lāuvale naʻe fonu ʻi he laumālie māʻoniʻoní, ʻi he ngaahi lea lahi ko ia naʻe leaʻaki ʻi he ʻemipaeá. (Ngāue 2:​1-12) Naʻe fakaʻilongaʻi ʻi he meʻa ko ia naʻe hokó ʻa e fanauʻi ʻo e fakatahaʻanga Kalisitiané mo e kamata ʻo ha ngāue fakaeako fakavahaʻapuleʻanga ʻi he ngaahi lea lahi, ʻa ia kuo hokohoko ʻo aʻu mai ai pē ki he ʻahó ni.

 2. Naʻe anga-fēfē ʻa hono ʻai ʻe he kau ākonga ʻa Sīsuú ke “fakatumutumu” ʻenau kau fanongo mei he feituʻu kehekehé ʻi he Penitekosi 33 T.S.?

² Ko e kau ākonga ʻa Sīsuú ʻoku ngalingali naʻa nau lava ke lea ʻi he lea faka-Kalisi anga-mahení, ʻa e lea manakoa ʻo e ʻaho ko iá. Naʻa nau toe ngāueʻaki ʻa e lea faka-Hepeluú, ʻa e lea ko ia naʻe leaʻaki ʻi he temipalé. Kae kehe, ʻi he ʻaho Penitekosi ko iá, naʻa nau ʻai ʻo “fakatumutumu” ʻenau kau fanongo mei he feituʻu kehekehé ʻi heʻenau lea ʻi he ngaahi lea tuʻufonua ʻa e kakai ko iá. Ko e hā ʻa e olá? Naʻe aʻu ki he loto ʻo e kau fanongó ʻa e ngaahi moʻoni mātuʻaki mahuʻinga naʻa nau fanongoa ʻi heʻenau lea tuʻufonuá. ʻI he ngataʻanga ʻo e ʻaho ko iá, naʻe tupu ai ʻa e kiʻi kulupu ʻo e kau ākongá ʻo hoko ko ha fuʻu feohiʻanga ʻo e faʻahinga laka hake ʻi he toko 3,000!​—Ngāue 2:​37-​42.

3, 4. Naʻe anga-fēfē ʻa e tupulekina ʻa e ngāue fakamalangá ʻi he hiki ʻa e kau ākongá mei Selusalema, Siutea mo Kālelí?

³ ʻIkai fuoloa mei he meʻa mahuʻinga ko ia naʻe hokó, naʻe mapuna hake ai ha fuʻu fakatanga ʻi Selusalema, pea “ko kinautolu naʻe vetekina naʻa nau ʻalu atu pe mo malangaʻaki ʻa e folofola.” (Ngāue 8:​1-4) Ko e fakatātaá, ʻoku tau lau ʻi he Ngāue vahe 8 fekauʻaki mo Filipe, ʻoku ngalingali ko ha ʻevangeliō lea faka-Kalisi. Naʻe malanga ʻa Filipe ki he kau Samēliá. Naʻá ne toe malanga foki ki ha ʻōfisa ʻItiopea ʻa ia naʻá ne tali ʻa e pōpoaki fekauʻaki mo Kalaisí.​—Ngāue 6:​1-5; 8:​5-​13, 26-​40; 21:​8, 9.

⁴ ʻI he hiki ʻa e kau Kalisitiané ʻo kumi ki he ngaahi feituʻu ke toe langa ai hanau nofoʻanga ʻi tuʻa ʻi he ngaahi feituʻu ʻo Selusalema, Siutea, mo Kālelí, naʻa nau fetaulaki ai mo e ngaahi ʻā vahevahe foʻou fakafaʻahinga mo fakaelea. Naʻe faifakamoʻoni pē nai ʻa e niʻihi ʻo kinautolu ki he kau Siú. Ka ʻoku līpooti ʻe he ākonga ko Luké: “Naʻe ai honau niʻihi ko e kau tangata mei Saipalo mo Sailine, pea ko kinautolu ʻi heʻenau hoko ki Aniteoke naʻa nau lea ki he kakai [lea faka-Kalisí] foki, heʻenau malangaʻaki ʻa e ʻEiki ko Sisū.”—Ngāue 11:​19-21.

Ko ha ʻOtua Taʻefilifilimānako —Ko ha Pōpoaki ki he Tokotaha Kotoa

 5. ʻOku anga-fēfē ʻa e hā ʻa e taʻefilifilimānako ʻa Sihová ʻi he fekauʻaki mo e ongoongo leleí?

⁵ Ko e hoko ʻa e ngaahi meʻa peheé ʻoku fehoanaki ia mo e ngaahi founga ʻa e ʻOtuá; ʻoku ʻikai te ne filifilimānako. Hili hono tokoniʻi ʻe Sihova ʻa e ʻapositolo ko Pitá ke ne fakatonutonu ʻene  vakai ki he kakai ʻo e ngaahi puleʻangá, naʻá ne fakahaaʻi ai ʻi he houngaʻia: “Ta ko ʻene toki mahino mai e kiate au, ʻoku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.” (Ngāue 10:​34, 35; Sāme 145:9) ʻI he taimi naʻe talaki ai ʻe he ʻapositolo ko Paulá, ko ha tokotaha fakatanga ia ki muʻa ʻo e kau Kalisitiané, ko e ʻOtuá “ʻoku ne finangalo ke maʻu moʻui ʻe he kakai kotoa pe” naʻá ne toe fakapapauʻi ai ʻoku ʻatā ʻa e ʻOtuá mei he filifilimānakó. (1 Timote 2:4) Ko e taʻefilifilimānako ʻa e Tokotaha-Fakatupú ʻoku hā ia ʻi he ʻatā ʻa e ʻamanaki ʻo e Puleʻangá ki he kakai ʻo ha faʻahinga pē, tangata pe fefine, matakali, fonua, pe lea.

6, 7. Ko e hā ʻa e ngaahi kikite Fakatohitapu naʻe tomuʻa tala ai ʻa e mafola fakavahaʻapuleʻanga mo fakaelea lahi ʻa e ongoongo leleí?

⁶ Ko e tupulekina fakavahaʻapuleʻanga ko ení naʻe tomuʻa tala ia ʻi he ngaahi senituli ki muʻa angé. Fakatatau ki he kikite ʻa Tanielá, “naʻe tuku [kia Sīsū] ha hau, mo ha langilangi, mo ha pule, koeʻuhi ke tauhi kiate ia ʻe he ngaahi kakai, matakali, mo [e] faʻahinga lea kehekehe.” (Taniela 7:14) Ko e moʻoniʻi meʻa ko ia ʻa hono pulusi ʻo e makasini ko ení ʻi he lea ʻe 151 ʻo tufaki ʻi māmani lahí, ʻo ʻai ai ke ke malava ʻo lautohi fekauʻaki mo e Puleʻanga ʻo Sihová, ʻoku tapua atu ai ʻa hono fakahoko ʻo e kikite Fakatohitapu ko iá.

⁷ Naʻe tomuʻa tala ʻe he Tohi Tapú ha taimi ʻa ia ʻe fanongo ai ʻa e kakai ʻo e ngaahi lea kehekehe ki heʻene pōpoaki foaki-moʻuí. ʻI hono fakamatalaʻi ʻa e founga ʻe tohoakiʻi ai ʻe he lotu moʻoní ʻa e tokolahi, naʻe kikiteʻi ʻe Sākalaia: “ʻI he taimi ko ia tokua, ʻe puke ʻe ha tuʻunga tangata ʻe toko hongofulu, mei he ngaahi lea kehekehe ʻo e ngaahi puleʻanga, ʻio te nau puke ki he kapaʻi kofu ʻo ha tangata Siu, [Kalisitiane pani ʻe he laumālié, ko e konga ʻo e “ʻIsileli faka-ʻOtua”] heʻenau pehe, Te tau ō mo kimoutolu; he kuo mau fanongo ʻoku ʻiate kimoutolu ʻa e ʻOtua.” (Fakaʻītali ʻamautolu; Sakalaia 8:23; Kaletia 6:16) Pea ʻi he felāveʻi mo e meʻa naʻá ne mamata ai ʻi ha vīsone, naʻe pehē ʻe he ʻapositolo ko Sioné: “Naʻa ku vakai, pea ta ko e fuʻu kakai  lahi, ʻa ia ʻe ʻikai lava ʻe ha taha hono lau, ko ha kakai mei he puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea, naʻa nau tutuʻu ʻi he ʻao ʻo e taloni pea ʻi he ʻao ʻo e Lami.” (Fakaʻītali ʻamautolu; Fakahā 7:9) Kuo tau sio ki he hoko moʻoni ʻa e ngaahi kikite ko iá!

Aʻu ki he Kakai Kotoa Pē

 8. Ko e hā kuo fiemaʻu ʻi he ngaahi tuʻunga moʻoni ʻi onopōní ki he ngaahi feʻunuʻaki ʻi heʻetau ngāue fakaefakamoʻoní?

⁸ ʻI he ʻahó ni, kuo hoko ʻo fakautuutu ai ʻa e fehikitaki ʻa e kakaí. Kuo hanga ʻe he feinga ke taha ʻa e tuʻunga fakaemāmaní ʻo fakaava ha kuonga foʻou ʻo e fehikitakí. Kuo hiki ʻa e fuʻu kakai tokolahi mei he ngaahi feituʻu ʻo e taú mo e ngaahi ʻēlia ʻoku faingataʻaʻia fakaʻekonōmiká ki he ngaahi feituʻu ʻoku tuʻumaʻu angé, ʻi he kumi ki ha founga moʻui ʻoku malu fakamatelié. ʻI he ngaahi fonua lahi, kuo iku ʻi he ʻaukolo mai ʻa e faʻahinga ʻoku hikí pea mo e kau kumi hūfangá ki hono fokotuʻu ʻo e ngaahi kulupu lea muli makehe. Hangē ko ení, ʻi Finilaní ʻoku leaʻaki ai ʻa e lea laka hake ʻi he 120; ʻi ʻAositelēliá ʻoku laka hake ai ʻa e fiká ʻi he 200. ʻI he kolo lahi pē ʻe taha ʻi he ʻIunaite Seteté​—ʻa San Diego—ʻoku lava ke fanongoa ai ʻa e lea laka hake ʻi he 100!

 9. Ko e hā ʻa e vakai ʻoku totonu ke tau maʻu fekauʻaki mo e ʻi ai ʻi hotau feituʻu ngāué ʻa e kakai ʻoku lea ʻi he ngaahi lea kehé?

⁹ ʻOku tau vakai ʻi he tuʻunga ko e kau faifekau Kalisitiané ki he ʻi ai ʻa e kakai ko ia ʻoku lea ʻi he ngaahi lea kehekehé ko ha fakafaingataʻaʻiaʻanga ki heʻetau ngāue fakafaifekaú? ʻIkai ʻaupito! ʻI hono kehé, ʻoku tau sio ki heni ko ha fakalahi lelei ia ʻo ʻetau feituʻu ngāue fakafaifekaú—‘ko e ngaahi ngoue, kuo fisi hina ki he ututaʻú.’ (Sione 4:35) ʻOku tau feinga ke tokanga ki he kakai ʻa ia ʻoku nau lāuʻilo ki heʻenau fiemaʻu fakalaumālié, ʻo tatau ai pē pe ko e hā honau fonuá pe leá. (Mātiu 5:3) Ko hono olá, ʻi he taʻu taki taha ʻoku hoko ai ʻa e kakai tokolahi fakautuutu ʻo e “lea” kotoa pē ko e kau ākonga ʻa Kalaisi. (Fakahā 14:6) Ko e fakatātaá, ʻi ʻAokosi 2004, naʻe fakahoko ai ʻa e ngāue fakamalanga ʻi Siamané ʻi he lea nai ʻe 40. ʻI he taimi tatau, naʻe malangaʻi ai ʻa e ongoongo leleí ʻi ʻAositelēlia ʻi he meimei lea ʻe 30, ko e mahiki hake ia mei he 18 ʻi he taʻu pē ʻe hongofulu kuo maliu atú. ʻI Kalisi, naʻe aʻu ai ʻa e Kau Fakamoʻoni ʻa Sihová ki he kakai ʻi he lea kehekehe meimei aʻu ki he 20. ʻI māmani lahi, ko e peseti nai ʻe 80 ʻo e  Kau Fakamoʻoni ʻa Sihová ʻoku nau lea ʻi ha lea kehe mei he lea faka-Pilitāniá, ʻa e lea fakavahaʻapuleʻanga ʻoku mafolalahia tahá.

10. Ko e hā ʻa e ngafa ʻo e tokotaha malanga tāutaha ʻi hono ngaohi ʻa e “ngāhi kakai kotoa pe” ko e kau akó?

¹⁰ Ko e moʻoni, ko e fekau ʻa Sīsū ke ‘ngaohi ʻa e ngāhi kakai kotoa pe ko e kau akó’ ʻoku lolotonga fakahoko ia! (Fakaʻītali ʻamautolu; Mātiu 28:19) ʻI hono tali vēkeveke ʻa e fekau ko iá, ʻoku longomoʻui ai ʻa e Kau Fakamoʻoni ʻa Sihová ʻi he fonua ʻe 235, ʻi hono tufaki ʻa e ʻū tohí ʻi he ngaahi lea laka hake he 400. Lolotonga hono tokonaki ʻe he kautaha ʻa Sihová ʻa e naunau ʻoku fiemaʻu ke aʻu mo ia ki he kakaí, ko e tokotaha malanga tāutaha ʻo e Puleʻangá kuo pau ke ne tamuʻomuʻa ʻi hono fakahaaʻi ʻa e pōpoaki ʻa e Tohi Tapú ki he “kakai kotoa pe” ʻi he lea ʻoku lava ke nau mahinoʻi lelei tahá. (Sione 1:7) Ko e feinga fāʻūtaha ko ení kuo malava ai ʻa e laui miliona ʻo e kakai ʻo e ngaahi kulupu lea kehekehé ke maʻu ʻaonga mei he ongoongo leleí. (Loma 10:​14, 15) ʻIo, ko kitautolu taki taha ʻoku tau fakahoko ha ngafa mātuʻaki mahuʻinga!

Fakafetaulakiʻi ʻa e Polé

11, 12. (a) Ko e hā ʻa e ngaahi pole kuo pau ke fakafetaulakiʻí, pea ʻoku anga-fēfē ʻa e tokoni ʻa e laumālie māʻoniʻoní? (e) Ko e hā ʻoku faʻa ʻaonga ai ʻa e malanga ki he kakaí ʻi heʻenau lea tuʻufonuá?

¹¹ ʻI he ʻahó ni, ʻe saiʻia ʻa e kau malanga tokolahi ʻo e Puleʻangá ke nau ako ha lea ʻe taha, ka heʻikai lava ke nau fakafalala pe ʻamanekina ʻa e ngaahi meʻaʻofa fakaemana ʻa e laumālie ʻo e ʻOtuá. (1 Kolinito 13:8) Ko hono ako ha lea foʻoú ko ha ngāue lahi ia. Naʻa mo e faʻahinga kuo nau ʻosi lea ʻi ha lea hono uá kuo pau ke feʻunuʻaki ʻenau fakakaukaú mo e foungá koeʻuhi ke ʻai ʻa e pōpoaki ʻa e Tohi Tapú ke fakamānako ki he kakai ʻoku nau lea ʻi he lea ko iá ka ʻoku kehe honau puipuituʻá mo e anga fakafonuá. Pea ko e kau hiki foʻou maí foki ʻoku nau faʻa mā mo loto-siʻi; ke mahinoʻi ʻa e anga ʻo ʻenau fakakaukaú ʻoku fiemaʻu ki ai ʻa e ngāue mālohi.

¹² Neongo ia, ʻoku kei ngāue pē ʻa e laumālie māʻoniʻoní ʻi he lotolotonga ʻo e kau sevāniti ʻa Sihová ʻi heʻenau ngaahi feinga ke tokoniʻi ʻa e kakai ʻoku nau lea ʻi ha ngaahi lea kehé. (Luke 11:13) ʻI he ʻikai tuku mai ha ngaahi malava fakaemana ʻi he leá, ʻe lava ke fakalahi ʻe he laumālié ʻetau holi ke fetuʻutaki mo e kakai ʻoku ʻikai te nau lea ʻi heʻetau leá. (Sāme 143:10) Ko hono malangaʻi pe akoʻi ʻa e pōpoaki ʻo e Tohi Tapú ki he kakaí ʻi ha lea ʻoku ʻikai te nau alāanga mo iá ʻe lava ke aʻu nai ki honau ʻatamaí. Kae kehe, koeʻuhi ke maongo ki he loto ʻo ʻetau kau fanongó, ʻoku faʻa lelei ange ke ngāueʻaki ʻenau lea tuʻufonuá—ʻa e lea ʻoku aʻu ki heʻenau ngaahi fakaueʻilotó, taumuʻá mo e ʻamanaki loloto tahá.—Luke 24:32.

13, 14. (a) Ko e hā ʻokú ne ueʻi ʻa e niʻihi ke nau fai ʻa e ngāue fakafaifekaú ʻi ha toe lea ʻe tahá? (e) ʻOku anga-fēfē ʻa e hā ʻa e laumālie ʻo e feilaulauʻi-kitá?

¹³ Ko e kau malanga tokolahi ʻo e Puleʻangá kuo nau fai ʻa e ngāue fakafaifekaú ʻi ha malaʻe lea muli ʻi heʻenau vakai ki he tali lelei ʻoku fai ki he moʻoni Fakatohitapú. ʻOku ongoʻi fakaivimālohi ʻa e niʻihi ʻi he hoko ʻenau ngāué ʻo toe faingataʻa mo fakatupu tokanga angé. “Ko e tokolahi ʻo e faʻahinga ʻoku haʻu mei ʻIulope Hahaké ʻoku nau fieinua ki he moʻoní,” ko e fakamatala ia ʻa ha ʻōfisi vaʻa ʻo e Kau Fakamoʻoni ʻa Sihová ʻi he fakatonga ʻo ʻIulopé. He fakafiemālie ē ko ia ke tokoniʻi ʻa e faʻahinga ongongofua tāutaha ko iá!—Aisea 55:​1, 2.

¹⁴ Kae kehe, ke kau mohu ʻuhinga ʻi he ngāué ni, ʻoku fiemaʻu kiate kitautolu ʻa e fakapapauʻi mo e feilaulauʻi-kita. (Sāme 110:3) Hangē ko ení, kuo liʻaki ʻe he ngaahi fāmili Siapani Fakamoʻoni tokolahi ʻa e ngaahi ʻapi fakafiemālie ʻi he ngaahi kolo lalahí pea kuo nau hiki ki he ngaahi feituʻu mamaʻo ke tokoniʻi ʻa e ngaahi kulupu ʻo e kau Siaina kuo hiki atú ke nau mahinoʻi ʻa e Tohi Tapú. ʻI he matāfonua hihifo ʻo e ʻIunaite Seteté, ʻoku fakaʻuli maʻu pē ai ʻa e kau malangá ʻi he houa ʻe taha ki he ua ke fai ha ngaahi ako Tohi Tapu mo e kakai ʻi he malaʻe Filipainí. ʻI Noaue, ʻoku ako ai ha ongo  meʻa mo ha fāmili mei ʻAfikānisitani. ʻOku ngāueʻaki ʻe he ongo meʻa Fakamoʻoní ʻa e ngaahi pulusinga faka-Pilitānia mo faka-Noaue ʻo e polosiua Ko e Hā ʻOku Fiemaʻu ʻe he ʻOtuá Meiate Kitautolú? a ʻOku lau ʻe he fāmilí ʻa e ngaahi palakalafí ʻi he lea faka-Pēsiá, ko ha lea ʻoku felāveʻi vāofi mo ʻenau lea faka-Tali tuʻufonuá. ʻOku nau fetalanoaʻaki ʻi he lea faka-Pilitāniá mo e faka-Noaué. Ko ha laumālie pehē ʻo e feilaulauʻi-kita mo e feʻunuʻakingofuá ʻoku fakapaleʻi lahi ia ʻi he taimi ʻoku tali ai ʻe he kau mulí ʻa e ongoongo leleí. b

15. ʻE lava fēfē ke tau kau kotoa ʻi he ngāue fakamalanga ʻi he ngaahi lea lahí?

¹⁵ ʻE lava ke ke kau ʻi he ngāue fakaelea lahi ko ení? Ko e hā ʻoku ʻikai te ke kamata ai ʻaki hono kumi pe ko fē ʻa e ngaahi lea muli ʻoku leaʻaki anga-maheni ʻi ho feituʻu ngāué? ʻE lava leva ke ke ʻave ha ngaahi tuleki pe polosiua ʻi he ngaahi lea ko iá. Ko e kiʻi tohi Good News for People of All Nations, naʻe tukuange mai ʻi he 2004, kuo ʻosi meʻangāueʻaki ia ʻi hono fakamafola ʻa e ʻamanaki ʻo e Puleʻangá ʻi heʻene pōpoaki faingofua mo papau ʻi he ngaahi lea lahí.—Sio ki he kupu “Good News for People of All Nations” ʻi he peesi 32.

“ʻOfa ki he Muli”

16. ʻE lava fēfē ke fakahāhā ʻe he fanga tokoua fua fatongiá ʻa e mahuʻingaʻia taʻesiokita ʻi hono tokoniʻi ʻa e kakai lea mulí?

¹⁶ Pe ʻoku tau ako ha lea ʻe taha pe ʻikai, ʻe lava ke tau tokoni kotoa ʻi hono akoʻi fakalaumālie ʻo e kau muli ʻi hotau feituʻú. Naʻe fakahinohino ʻa Sihova ki hono kakaí ke nau “ʻofa ki he muli.” (Teutalonome 10:​18, 19) Ko e fakatātaá, ʻi he kolo lahi ʻe taha ʻi ʻAmelika Tokelau, ʻoku fakataha ai ʻa e fakatahaʻanga ʻe nima ʻi he Fale Fakatahaʻanga tatau. Hangē ko ia ʻi he ngaahi holo lahi, ʻoku ʻi ai ha vilo fakataʻu ʻo e ngaahi taimi fakatahá ʻa ia naʻe mei ʻunu ai ʻa e ngaahi fakataha faka-Siaina ʻi aí ki ha houa ki mui ange ʻi he Sāpaté. Kae kehe, ʻe ʻuhinga ení ko e tokolahi ʻo e kau hiki atu ʻoku ngāue ʻi ha ngaahi ngāue felāveʻi mo e fale kaí ʻe ʻikai malava ke nau maʻu ia. Ko e kau mātuʻa ʻi he ngaahi fakatahaʻanga kehé naʻa nau fai anga-ʻofa ha ngaahi feʻunuʻaki koeʻuhi ke lava ʻa e ngaahi fakataha faka-Siainá ʻo fai ki muʻa ange ʻi he Sāpaté.

17. ʻOku totonu ke fēfē ʻetau ongoʻí ʻi he taimi ʻoku fili ai ha niʻihi ke hiki ʻo tokoni ʻi ha toe kulupu ʻe tahá?

¹⁷ ʻOku fakaongoongoleleiʻi ʻe he kau ʻovasia anga-ʻofá ʻa e fanga tokoua mo e fanga tuofāfine taau mo pōtoʻi ʻa ia ʻoku nau loto ke hiki ke tokoni ʻi he ngaahi kulupu lea kehé. Ko e kau faiako Tohi Tapu taukei ko iá ʻe ongoʻi fakalotofonua nai ʻenau pulí, ka ʻoku ongoʻi tatau ʻa e kau ʻovasiá mo e kau mātuʻa ʻi Līsita mo ʻAikoniumé. Ko e kau mātuʻa ko iá naʻe ʻikai te nau taʻofi ʻa Tīmote mei he fononga mo Paulá, neongo ko Tīmoté ko ha kupu mahuʻinga ia ki heʻenau ngaahi fakatahaʻangá tonu. (Ngāue 16:​1-4) Tānaki atu ki ai, ko e faʻahinga ʻoku takimuʻa ʻi he ngāue fakamalangá ʻoku ʻikai taʻofi kinautolu ʻe he tuʻunga fakaefakakaukau, ngaahi tōʻonga fakafonua pe ngaahi anga kehekehe ʻo e kau mulí. ʻI hono kehé, ʻoku nau ngāueʻaki ʻa e tuʻunga kehekehé pea kumi ha ngaahi founga ke fakatupulekina ai ʻa e ngaahi vahaʻangatae leleí koeʻuhi ko e ongoongo leleí.—1 Kolinito 9:​22, 23.

18. Ko e hā ʻa e matapā lahi ʻoku taki atu ki he ngāué ʻoku ʻatā ki he tokotaha kotoa?

¹⁸ Hangē ko ia naʻe kikiteʻí, ko e ongoongo leleí ʻoku malangaʻi ia ʻi he “ngaahi lea kehekehe ʻo e ngaahi puleʻanga.” ʻOku kei ʻi ai ʻa e malava ki ha tupu fakaofo ʻi he ngaahi malaʻe lea mulí. Kuo hū ʻa e laui afe ʻo e kau malanga lavameʻa ki he “matapā lahi ʻoku taki atu ki he ngāué.” (1 Kolinito 16:​9, NW) Neongo ia, ʻoku fiemaʻu ʻa e meʻa lahi ange koeʻuhi ke fakatupulekina ʻa e ngaahi feituʻu ngāue ko iá, hangē ko ia ʻe fakahaaʻi ʻi he kupu hoko maí.

[Fakamatala ʻi lalo]

ʻE Lava Ke Ke Fakamatalaʻi?

• ʻE lava fēfē ke tau faʻifaʻitaki kia Sihova ʻi hono fakahāhā ʻa e taʻefilifilimānako ki he kakai kotoa peé?

• ʻOku totonu ke fēfē ʻetau vakai ki he kakai ʻi hotau feituʻu ngāué ʻa ia ʻoku ʻikai te nau lea ʻi heʻetau leá?

• Ko e hā ʻoku ʻaonga ai ke malanga ki he kakaí ʻi heʻenau lea tuʻufonuá?

• ʻE lava fēfē ke tau fakahaaʻi ʻa e tokanga ki he kau muli ʻi hotau lotolotongá?

[Fehuʻi ki he Ako]

[Puha/Fakatātā ʻi he peesi 23]

(Ki he konga tohi kuo fokotuʻu kakato, sio ki he tohi)

Loma

KĒLITI

ʻĒSIA

FILISIA

PAMIFILIA

PONITŌ

KAPATŌSIA

MESOPOTĒMIA

MĪTIA

PĀTIA

ʻĪLAMI

ʻALEPEA

LĪPIA

ʻISIPITE

SIUTEA

Selusalema

[Ngaahi vai]

Tahi Metiteleniane

Tahi ʻUliʻuli

Tahi Kulokula

Kūlifa Pēsia

[Fakatātā]

ʻI he Penitekosi 33 T.S., naʻe fanongoa ai ʻe he kakai mei he vahefonua ʻe 15 ʻo e ʻEmipaea Lomá pea fakalaka atu ai ʻa e ongoongo leleí ʻi heʻenau ngaahi lea tuʻufonuá

[Fakatātā ʻi he peesi 24]

Naʻe tali lelei ʻe he kau muli tokolahi ʻa e moʻoni Fakatohitapú

[Fakatātā ʻi he peesi 25]

Ko ha fakaʻilonga Fale Fakatahaʻanga ʻi he lea ʻe nima