Hoko ko e Kau Faifekau Fakalakalaka mo Ngaofengofua

“Kuo u hoko ko e meʻa kehekehe ki he kakai kehekehe, kehe ke u fakamoʻui hanau niʻihi.”—1 KOLINITO 9:22.

1, 2. (a) ʻI he ngaahi founga fē naʻe hoko ai ʻa e ʻapositolo ko Paulá ko ha faifekau ola leleí? (e) Naʻe anga-fēfē hono fakamatalaʻi e Paula tonu ʻa ʻene fakakaukau ki heʻene vāhenga-ngāué?

 NAʻÁ NE fiemālie ʻi he feohi mo e kau poto fakaemāmaní pea mo e kau tuitui tēniti māʻulaló. Naʻá ne fakatupu fakalotoʻi ki he kau Loma māʻolungá pea ki he kau Filisia māʻulaló. Ko ʻene ngaahi tohí naʻe fakaueʻiloto ki he kau Kalisi fakakaukau ʻataá pea ki he kau Siu piki ki he tukufakaholó. Ko ʻene fakaʻuhingá naʻe ʻikai ala fakakikihiʻi ʻo hangē pē ko e mālohi ʻo ʻene manakoa fakaeongó. Naʻá ne feinga ke maʻu ha tuʻunga felotoi mo e tokotaha kotoa koeʻuhi ke lava ai ʻo ne fakatuiʻi ha niʻihi kia Kalaisi.—Ngāue 20:21.

² Ko e tangatá ko e ʻapositolo ko Paulá, ʻoku ʻikai ha veiveiua ko ha faifekau ola lelei mo fakalakalaka ia. (1 Timote 1:​12) Naʻá ne maʻu meia Sīsū ʻa e fekau ke “fakaha [ʻa e] huafa [ʻo Kalaisí] ki he gaahi Jenitaile, moe gaahi tuʻi, bea moe fānau a Isileli.” (Ngāue 9:​15, PM) Ko e hā ʻene fakakaukau ki he vāhenga-ngāue ko ení? Naʻá ne talaki: “Kuo u hoko ko e meʻa kehekehe ki he kakai kehekehe, kehe ke u fakamoʻui hanau niʻihi. Pea ʻilonga ha meʻa ʻoku ou fai, ʻoku ou fai koeʻuhi ko e Kosipeli, koeʻuhi ke u ʻinasi ai fakataha mo e kakai kehe.” (1 Kolinito 9:​19-23) Ko e hā ʻoku lava ke tau ako mei he faʻifaʻitakiʻanga ʻa Paulá ʻa ia ʻe lava ke ne tokoniʻi kitautolu ke hoko ai ʻo ola lelei ange ʻi heʻetau malangá mo e faiakó?

Fetaulaki ha Tangata Kuo Liliu mo ha Pole

 3. Ko e hā ʻa e ongoʻi ʻa Paula ki he kau Kalisitiané ki muʻa ʻi heʻene tafokí?

³ Naʻe hoko maʻu pē ʻa Paula ko ha tokotaha kātaki fuoloa, fakaʻatuʻi mo feʻunga ki he vāhenga-ngāue naʻá ne maʻú? Halaʻatā! Ko e loto-māfana tōtuʻa fakalotú naʻá ne ʻai ʻa Saula (hangē ko ia naʻe uiʻaki ʻa Paula ki muʻá) ko ha tokotaha fakatanga fakamālohi ʻo e kau muimui ʻo Kalaisí. ʻI he tuʻunga ko ha talavoú, naʻá ne tali lelei hono fakapoongi ʻo Sitīvení. Hili iá, naʻe tuli anga-fakamamahi ʻe Paula ʻa e kau Kalisitiané. (Ngāue 7:​58; 8:​1, 3; 1 Timote 1:​13) Naʻá ne hokohoko hō ʻaki “ʻa e fakamanamana mo e lau fakapō ki he kau ako ʻa e ʻEiki.” ʻI he ʻikai fiemālie he tuli ki he kau tui ʻi Selusalema peé, naʻá ne kamata fakamafola ʻa ʻene feingangāue tāufehiʻá ʻo aʻu ki Tāmasikusi ʻi he tokelau mamaʻó.—Ngāue 9:​1, 2.

 4. Ko e hā ʻa e feʻunuʻaki naʻe pau ke fai ʻe Paula ke fakahoko ʻa ʻene vāhenga-ngāué?

⁴ Ko e tupuʻanga tefito ʻa e tāufehiʻa lahi ʻa Paula ki he lotu faka-Kalisitiané ʻoku ngalingali ko e tuipau ko ia ʻe hanga ʻe he tui foʻoú ʻo fakameleʻi ʻa e lotu faka-Siú ʻaki hono fio ia mo e ngaahi fakakaukau muli ʻoku ʻikai fiemaʻú. Ko hono moʻoní, ko Paulá ko ha “Falesi” ia, ko e ʻuhinga ʻo e hingoá tonu ko e “tokotaha kuo fakamavaheʻi.” (Ngāue 23:6) Fakaʻuta atu ki he ʻohovale kuo pau naʻe hoko kia Paula ʻi heʻene ʻiloʻi kuo fili ia ʻe he ʻOtuá ke ne malangaʻi ʻa Kalaisi​—ʻi he tuʻunga taʻeʻamanekina​—ki he Senitailé! (Ngāue 22:​14, 15; 26:​16-​18) He ko ē, naʻe fakafisi ʻa e kau Fālesí ke aʻu ʻo kai fakataha mo e faʻahinga ko ia naʻa nau vakai ki ai ko e kau angahalá! (Luke 7:​36-​39) ʻOku ʻikai ha veiveiua naʻe fiemaʻu ʻa e feinga lahi ʻi heʻene tafaʻakí ke liliu ʻene fakakaukaú pea ke ʻomai ia ke fehoanaki mo e finangalo ʻo e ʻOtuá ke fakamoʻui ʻa e kakai kotoa pē.—Kaletia 1:​13-​17.

 5. ʻE lava fēfē ke tau faʻifaʻitaki kia Paula ʻi heʻetau ngāue fakafaifekaú?

⁵ ʻE pau nai ke tau fai ʻa e meʻa tatau. ʻI heʻetau fetaulaki mo ha tupulekina ʻo e kakai kehekehe ʻi hotau malaʻe fakavahaʻapuleʻanga, mo fakaelea kehekehé, ʻoku fiemaʻu ke tau fai ha feinga fakamākukanga ke sivisiviʻi ʻetau fakakaukaú pea toʻo meia kitautolu ha tomuʻa fehiʻa pē. (Efeso 4:​22-24) Pe ʻoku tau ʻiloʻi pe ʻikai, ʻoku tākiekina kitautolu ʻe hotau ʻohake fakasōsialé mo fakaeakó. ʻE lava ke fakahūhū ʻe he meʻá ni ʻiate kitautolu ʻa e ngaahi vakai mo e fakakaukau ʻa ia ʻoku filifilimānako,  tomuʻa fehiʻa mo ʻikai ngaofengofua. Kuo pau ke tau ikuʻi ʻa e ngaahi fakakaukau peheé kapau ʻoku fiemaʻu ke tau lavameʻa ʻi hono kumi mo tokoniʻi ʻa e faʻahinga ʻoku hangē ha sipí. (Loma 15:7) Ko e meʻa ia naʻe fai ʻe Paulá. Naʻá ne tali ʻa e pole ke fakalahi ʻa ʻene ngāue fakafaifekaú. ʻI hono ueʻi ʻe he ʻofá, naʻá ne fakatupulekina ʻa e ngaahi pōtoʻi fakafaiako ʻa ia ʻoku taau ke faʻifaʻitaki ki ai. Ko e moʻoni, ko hano ako ʻo e ngāue fakafaifekau ʻa e “aposetolo ʻo e Senitaile” ʻoku fakahaaʻi ai naʻá ne tokanga, ngaofengofua mo fakapotopoto ʻi he malangá mo e faiakó. a​—Loma 11:13.

Ngāue ʻa ha Faifekau Fakalakalaka

 6. Naʻe anga-fēfē ʻa e tokanga ʻa Paula ki he puipuituʻa ʻo ʻene kau fanongó, pea ko e hā hono olá?

⁶ Naʻe tokanga ʻa Paula ki he ngaahi tui mo e puipuituʻa ʻo ʻene kau fanongó. ʻI heʻene lea kia Tuʻi ʻAkilipa II, naʻe lāuʻilo ʻa Paula ko e tuʻí naʻe “boto i he gaahi gaue [pe tōʻonga] moe gaahi mea kotoabe oku eke [pe ngaahi fakakikihi] i he kakai Jiu.” Naʻe ngāueʻaki pōtoʻi leva ʻe Paula ʻa ʻene ʻilo ki he ngaahi tui ʻa ʻAkilipá ʻo ne fetalanoaʻaki mo ia ki he ngaahi meʻa naʻe mahinoʻi lelei ʻaupito ʻe he tuʻí. Ko e māʻalaʻala mo e fakatupu tuipau ʻo e fakaʻuhinga ʻa Paulá naʻe pehē ai ʻe ʻAkilipa: “Kuo ke meimei fakahehemaʻi au keu hoko koe Kalisitiane.”—Ngāue 26:​2, 3, 27, 28, PM.

 7. Naʻe anga-fēfē hono fakahāhā ʻe Paula ʻa e ngaofengofuá ʻi heʻene malanga ki ha fuʻu kakai ʻi Līsitá?

⁷ Naʻe toe ngaofengofua ʻa Paula. Fakatokangaʻi ʻa e kehe ʻa ʻene leá ʻi heʻene feinga ke fakalotoʻi ke tafoki ha fuʻu kakai ʻi he kolo ko Līsitá mei he lotu ange kiate ia mo Panepasa ko e ongo ʻotuá. Naʻe pehē tokua ko e kakai ko ení, ʻa ia naʻa nau lea faka-Laikoniá, naʻe vakai kiate kinautolu ko e faʻahinga ia ʻi he kakaí naʻe siʻi ʻenau akó pea lahi ange ʻenau tui taʻeʻuhingá. Fakatatau ki he Ngāue 14:​14-18, naʻe fakahaaʻi ai ʻe Paula ʻa e fakatupú mo hono ngaahi foaki fakanatulá ko e fakamoʻoni ia ʻo e tuʻunga māʻolunga ʻo e ʻOtua moʻoní. Naʻe faingofua ke muimui ki he fakaʻuhingá, pea naʻe hā ngali  naʻá ne “taʻofi ʻa e kakai mei he fai feilaulau” kia Paula mo Panepasá.

 8. ʻI he ngaahi founga fē naʻe fakahaaʻi ai ʻe Paula naʻá ne ngaofengofua neongo ʻa e ngaahi taimi naʻá ne ongoʻi mālohi aí?

⁸ Ko e moʻoni, naʻe ʻikai ke haohaoa ʻa Paula, pea ʻi he taimi ʻe niʻihi, naʻá ne maʻu ai ʻa e ngaahi ongoʻi mālohi fekauʻaki mo e ngaahi meʻa ʻe niʻihi. Ko e fakatātaá, ʻi he taimi ʻe taha ʻi hono ʻohofi ia ʻi ha founga fakamā mo taʻetotonú, naʻá ne lea lahi fakafokifā ai ki ha Siu ko ʻAnanaia. Ka ʻi hono tala ange kia Paula naʻá ne ngāhiʻi ʻi he taʻeʻilo ʻa e taulaʻeiki lahí, naʻá ne kole fakamolemole ʻi he taimi pē ko iá. (Ngāue 23:​1-5) ʻI ʻAtenisí, naʻá ne ʻuluaki ‘ʻita ʻi heʻene vakai kuo tamapuaʻia ʻa e koló.’ Neongo ia, ʻi heʻene lea ʻi Moʻunga Maʻasí, naʻe ʻikai ke fakahā ai ʻe Paula ʻa e ʻita ko iá. ʻI hono kehé, naʻá ne lea ki he kau ʻAtenisí ʻi honau faiʻanga fakataú, ʻo fakaʻuhinga ʻi he meʻa naʻe fai ai ʻa e felotoí ʻaki ʻene lave ki honau ʻōlita “Moʻo ha ʻOtua Teʻeki ʻIloa” pea lave ki he taha ʻo ʻenau ngaahi māú.—Ngāue 17:​16-28.

 9. Naʻe anga-fēfē hono fakahāhā ʻe Paula ʻa e fakapotopotó ʻi heʻene feangainga mo e kau fanongo kehekehé?

⁹ ʻI he feangainga mo e kau fanongo kehekehé, naʻe fakahaaʻi ai ʻe Paula ʻa e fakapotopoto ʻoku taau ke fakatokangaʻi. Naʻá ne fakakaukauʻi ʻa e tōʻonga fakafonua mo e ʻātakai naʻá ne tākiekina ʻa e fakakaukau ʻa ʻene kau fanongó. ʻI heʻene tohi ki he kau Kalisitiane ʻi Lomá, naʻá ne ʻiloʻi lelei naʻa nau nofo ʻi he kolomuʻa ʻo e mafai mālohi taha ʻo e taimi ko iá. Ko ha poini tefito ʻo e tohi ʻa Paula ki he kau Kalisitiane ʻi Lomá ko e pehē ko e mālohi ʻo e angahala ʻa ʻĀtama ke fai fakameleʻí ʻoku ikunaʻi ia ʻaki ʻa e mālohi ʻo Kalaisi ke fai ʻa e huhuʻí. Naʻá ne lea ki he kau Kalisitiane Lomá mo e faʻahinga takatakai ʻiate kinautolú ʻi he lea naʻe fakamānako ki honau lotó.—Loma 1:4; 5:​14, 15.

10, 11. Naʻe anga-fēfē hono feʻunuʻaki ʻe Paula ʻa ʻene ngaahi talanoa fakatātaá ki heʻene kau fanongó? (Sio foki ki he fakamatala ʻi laló.)

¹⁰ Ko e hā naʻe fai ʻe Paula ʻi heʻene loto ke fakamatalaʻi ʻa e ngaahi moʻoni loloto ʻo e Tohi Tapú ki heʻene kau fanongó? Naʻe pōtoʻi ʻa e ʻapositoló ʻi hono ngāueʻaki ʻa e ngaahi fakatātā anga-maheni mo mahinoʻingofuá ke fakamāʻalaʻalaʻaki ʻa e ngaahi fakakaukau fihi fakalaumālié. Ko e fakatātaá, naʻe ʻiloʻi ʻe Paula naʻe maheni ʻa e kakai ʻi Lomá fekauʻaki mo e fokotuʻutuʻu ʻo e nofo pōpulá ʻi he kotoa ʻo e ʻEmipaea Lomá. Ko hono moʻoní, ko e tokolahi ʻo e kakai naʻá ne tohi ki aí naʻe ngalingali ko e kau pōpula kinautolu. Ko ia naʻe ngāueʻaki ai ʻe Paula ʻa e nofo pōpulá ko ha fakatātā ke fakafefekaʻiʻaki ʻene fakaʻuhinga mālohi fekauʻaki mo e fili ʻa ha taha ke fakavaivai ki he angahalá pe ki he māʻoniʻoní.—Loma 6:​16-​20.

¹¹ “ʻI he haʻohaʻonga ʻo e kau Lomá,” ko e lau ia ʻa ha maʻuʻanga fakamatala ʻe taha, “naʻe lava ke fakatauʻatāinaʻi hangatonu ai ʻe ha taha haʻane pōpula, pe naʻe lava ke maʻu ʻe ha pōpula ʻa ʻene tauʻatāiná ʻaki hono fai ha totongi ki he tokotaha ʻoku ʻaʻana iá. Naʻe toe lava ke fokotuʻutuʻu ʻa e tuʻunga tauʻatāiná kapau ko e tuʻunga ʻo e tokotaha naʻe ʻaʻaná naʻe hiki ia ʻo ʻoange ki ha ʻotua.” Naʻe lava ke hokohoko atu ʻa e ngāue ʻa ha pōpula kuo fakatauʻatāinaʻi ki hono pulé ki ha vāhenga. Ngalingali naʻe lave ʻa Paula ki he tōʻongafai ko ení ʻi heʻene tohi fekauʻaki mo e fili ʻa ha tokotaha pe ko fē ʻa e pule ke talangofua ki aí—ʻa angahala pe ko māʻoniʻoni. Ko e kau Kalisitiane ʻi Lomá naʻe fakatauʻatāinaʻi kinautolu mei he angahalá pea naʻe puleʻi kinautolu he taimi ko iá ʻe he ʻOtuá. Naʻa nau tauʻatāiná ke tauhi ki he ʻOtuá, neongo ia naʻe kei lava pē ke nau fili ke ngāue maʻá e angahalá—ʻa e pule ki muʻá​—kapau naʻa nau loto ki ai. Ko e fakatātā faingofua kae anga-maheni ko iá naʻá ne ueʻi ʻa e kau Kalisitiane ko ia ʻi Lomá ke nau ʻeke hifo kiate kinautolu, ‘Ko fē ʻa e pule ʻoku ou tauhi ki aí?’ b

Ako mei he Faʻifaʻitakiʻanga ʻa Paulá

12, 13. (a) Koe hā ʻa e feinga ʻoku fiemaʻu he ʻahó ni koeʻuhi ke aʻu ai ki he loto ʻo ʻetau kau fanongo kehekehé? (e) Ko e hā kuó ke ʻiloʻi ʻoku ola lelei ʻi he malanga ki he kakai mei he ngaahi puipuituʻa kehekehé?

¹² ʻI he hangē ko Paulá, kuo pau ke tau tokanga,  ngaofengofua mo fakapotopoto koeʻuhí ke aʻu ki he loto ʻo ʻetau kau fanongo kehekehé. Ke tokoniʻi ʻetau kau fanongó ke nau maʻu ʻa e ʻuhinga ʻo e ongoongo leleí, ʻoku tau holi ke fai ʻa e meʻa lahi ange ʻi he fetuʻutaki fakafounga tuʻumaʻú pē, fakahoko ha pōpoaki kuo teuteuʻi, pe tuku ai ha tohi Fakatohitapu. ʻOku tau feinga ke ʻiloʻi ʻenau ngaahi fiemaʻú mo e hohaʻá, ko ʻenau saiʻiá mo e ngaahi fehiʻá, mo ʻenau ngaahi manavaheé mo e ngaahi tomuʻa fehiʻá. Neongo ʻoku fiemaʻu ki heni ha fakakaukau mo e feinga lahi, ko e kau malanga ʻo e Puleʻangá takatakai ʻi he māmaní ʻoku nau vēkeveke fai ia. Ko e fakatātaá, ʻoku līpooti ʻe he ʻōfisi vaʻa ʻo e Kau Fakamoʻoni ʻa Sihova ʻi Hungalí: “ʻOku fakahaaʻi ʻe he fanga tokouá ʻa e tokaʻi ki he tōʻonga fakafonua mo e founga moʻui ʻa e kakai ʻo e ngaahi fonua kehé pea ʻoku ʻikai te nau ʻamanekina kinautolu ke nau feʻunuʻaki ki he ngaahi tōʻonga fakalotofonuá.” ʻOku feinga ʻa e Kau Fakamoʻoní ʻi ha feituʻu pē ke fai ʻa e meʻa tatau.

¹³ ʻI ha fonua ʻe taha ʻi he Hahake Mamaʻó, ʻoku tokanga ai ʻa e tokolahi taha ʻo e kakaí ki he moʻui leleí, akoʻi ʻo e fānaú mo e akó. Ko e kau malanga ʻo e Puleʻangá ʻi aí ʻoku nau feinga ke fakamamafaʻi ʻa e ngaahi kaveinga ko ení kae ʻikai lāulea ki he ngaahi meʻa hangē ko e ngaahi tuʻunga ololalo fakaemāmani lahí pe ngaahi ʻīsiu fakasōsiale fihí. ʻI he tuʻunga meimei tatau, ko e kau malanga ʻi ha kolo lahi ʻi he ʻIunaite Seteté naʻa nau fakatokangaʻi ʻoku tokanga ʻa e kakai ʻi ha feituʻu tefito ʻi honau feituʻu ngāué ki he ngaahi meʻa hangē ko e kākaá, lahi fau ʻo e meʻalelé pea mo e faihiá. ʻOku ngāueʻaki lavameʻa ʻe he Kau Fakamoʻoní ʻa e ngaahi kaveinga ko ení ke kamata ha ngaahi fetalanoaʻaki Fakatohitapu. Ko e kau faiako Tohi Tapu ola leleí ʻoku nau fakapapauʻi ʻe tatau ai pē pe ko e hā ʻa e tuʻunga-lea ʻoku nau filí, ʻoku nau fakakaukau pau ai pē mo fakalototoʻa, ʻo fakamamafaʻi ʻa e mahuʻinga ʻaonga ʻo hono ngāueʻaki ʻo e ngaahi tefitoʻi moʻoni Fakatohitapú ʻi he taimí ni pea mo e ngaahi ʻamanaki fakafiefia ʻoku tuku mai ʻe he ʻOtuá ki he kahaʻú.—Aisea 48:​17, 18; 52:7.

14. Fakamatalaʻi ʻa e ngaahi founga ʻa ia ʻe lava ke tau feʻunuʻaki ai ki he ngaahi fiemaʻu mo e ngaahi tuʻunga kehekehe ʻo e kakaí.

¹⁴ ʻOku toe ʻaonga ke ʻai ke kehekehe ʻetau fakaofiofi ʻo lea ʻi he ngāue fakafaifekaú, koeʻuhi ʻoku maʻu ʻe he kakaí ha puipuituʻa fakafonua, fakaako mo fakalotu kehekehe lahi fau. Ko ʻetau fakaofiofi ki he kakai ʻoku nau tui ki ha Tokotaha-Fakatupu kae ʻikai ki he Tohi Tapú ʻe kehe ia mei he fakaofiofi ko ia ʻoku ngāueʻaki ke talanoa ki he faʻahinga ʻoku nau tui ʻoku ʻikai ha ʻOtuá. ʻI he tokotaha ʻokú ne ongoʻi ko e ʻū tohi fakalotu kotoa pē ko ha meʻangāue fakatokāteliné, ʻe kehe ʻa e fakaʻaliʻali ʻoku tau ngāueʻakí mei he fakaʻaliʻali ʻoku tau ngāueʻaki ki ha tokotaha ʻokú ne tali ʻa e meʻa ʻoku akoʻi ʻe he Tohi Tapú. ʻOku toe fiemaʻu ʻa e ngaofengofua ʻi he feangainga mo e ngaahi tuʻunga fakaako kehekehe lahi ʻo e kakai ʻoku tau talanoa ki aí. Ko e kau faiako  pōtoʻí te nau ngāueʻaki ʻa e fakaʻuhinga mo e ngaahi talanoa fakatātā feʻungamālie ki he tuʻunga ʻoku nau fetaulaki mo iá.—1 Sione 5:20.

Tokoni ki he Kau Faifekau Foʻoú

15, 16. Ko e hā ʻoku ʻi ai ai ha fiemaʻu ki hono akoʻi ʻo e kau faifekau foʻoú?

¹⁵ Naʻe ʻikai tokanga ʻa Paula ki hono fakaleleiʻi ʻa ʻene ngaahi founga fakafaiako pē ʻaʻaná. Naʻá ne ʻiloʻi ʻa e fiemaʻu ke akoʻi mo teuteuʻi ʻa e faʻahinga ʻi ha toʻutangata kei siʻi ange, hangē ko Tīmote mo Taitusí, ke nau hoko ko e kau faifekau ola lelei. (2 Timote 2:2; 3:​10, 14; Taitusi 1:4) ʻI he tuʻunga meimei tatau, ko ha fiemaʻu vivili ke tokonaki mo maʻu ʻa e akó ʻoku kei ʻi ai ia he ʻahó ni.

¹⁶ ʻI he 1914, naʻe fakafuofua ai ki he kau malanga ʻo e Puleʻangá ʻe toko 5,000 ʻi māmani kātoa; ʻi he ʻahó ni, ʻoku papitaiso ai ʻi he uike taki taha ʻa e faʻahinga foʻou nai ʻe toko 5,000! (Aisea 54:​2, 3; Ngāue 11:21) ʻI he taimi ʻoku kamata ai ʻa e faʻahinga foʻoú ke feohi mo e fakatahaʻanga Kalisitiané pea fakaʻamu ke kau ʻi he ngāue fakafaifekaú, ʻoku nau fiemaʻu ʻa e ako mo e fakahinohino. (Kaletia 6:6) ʻOku mātuʻaki mahuʻinga ke tau ngāueʻaki ʻa e ngaahi founga ʻa e ʻEikí, ʻa Sīsū, ʻi he faiakó mo hono akoʻi ʻo e kau ākongá. c

17, 18. ʻE lava fēfē ke tau tokoni ki he faʻahinga foʻoú ke nau maʻu ʻa e loto-maʻu ʻi he ngāue fakafaifekaú?

¹⁷ Naʻe ʻikai ke kumi pē ʻe Sīsū ha fuʻu kakai pea tala ange ki heʻene kau ʻapositoló ke nau kamata malanga ki ai. Naʻá ne ʻuluaki fakamamafaʻi ʻa e fiemaʻu ki he ngāue fakamalangá pea fakalototoʻaʻi ha fakakaukau ʻi he lotu. Naʻá ne fokotuʻutuʻu leva ha tokonaki tefito ʻe tolu: ko ha hoa, ko ha feituʻu ke ngāue ai, mo ha pōpoaki. (Mātiu 9:​35-​38; 10:​5-7; Maake 6:7; Luke 9:​2, 6) ʻE lava ke tau fai ʻa e meʻa tatau. Pe ʻoku tau tokoniʻi ʻetau kiʻi tamá tonu, ko ha ako foʻou, pe ko ha taha ʻa ia kuo ʻikai te ne kau ki he ngāue fakamalangá ʻi ha vahaʻa taimi, ʻoku feʻungamālie ke fai ha feinga ke tokonaki ʻa e akó ʻi he founga ko ení.

¹⁸ ʻOku fiemaʻu ʻe he faʻahinga foʻoú ʻa e tokoni lahi ke maʻu ai ʻa e loto-maʻu ʻi hono ʻoatu ʻa e pōpoaki ʻo e Puleʻangá. ʻE lava ke ke tokoniʻi kinautolu ke nau teuteu pea ʻahiʻahiʻi ha tuʻuaki faingofua mo fakamānako? ʻI he malaʻe ngāué, tuku ke nau ako mei hoʻo faʻifaʻitakiʻangá ʻi hoʻo fai ʻa e muʻaki ngaahi ʻaʻahí. ʻE lava ke ke muimui he sīpinga ʻa Kitioné, ʻa ia naʻá ne pehē ki hono kaungātaú: “Mou sio kiate au, ʻo faʻifaʻitaki.” (Fakamaau 7:17) Pea ʻoange leva ki he tokotaha foʻoú ʻa e faingamālie ke kau ki ai. Fakaongoongoleleiʻi loto-māfana ʻa e faʻahinga foʻoú ʻi heʻenau ngaahi feingá, pea ʻi heʻene feʻungamālié, fai ha ngaahi fokotuʻu nounou ki hano fakaleleiʻi.

19. Ko e hā hoʻo fakapapaú ʻi hoʻo feinga ke ‘fai kakato hoʻo gaue fakafaifekaú’?

¹⁹ Koeʻuhi ke ‘fai ke kakato ʻetau gaue fakafaifekaú,’ ʻoku tau fakapapauʻi ke hoko ʻo ngaofengofua ʻi heʻetau fakaofiofí, pea ʻoku tau loto ke akoʻi ʻa e kau faifekau foʻoú ke nau fai ʻa e meʻa tatau. ʻI heʻetau fakakaukau ki he mahuʻinga ʻo ʻetau taumuʻá—ke ʻoatu ʻa e ʻiloʻi tonu ʻo e ʻOtuá ʻa ia ʻoku taki atu ki he fakamoʻuí—ʻoku tau tuipau ʻoku tuha mo e feingá ke hoko ‘ko e meʻa kehekehe ki he kakai kehekehe, kehe ke [tau] fakamoʻui hanau niʻihi.’—2 Timote 4:​5, PM; 1 Kolinito 9:22.

[Fakamatala ʻi lalo]

ʻOkú Ke Manatuʻi?

• ʻI he ngaahi founga fē ʻe lava ke tau faʻifaʻitaki ai kia Paula ʻi heʻetau ngāue fakafaifekaú?

• Ko e hā ʻa e ngaahi liliu ʻi heʻetau fakakaukaú ʻoku ngalingali ʻe fiemaʻú?

• ʻE lava fēfē ke tau tauhi ke pau ʻa ʻetau pōpoakí?

• Ko e hā ʻoku fiemaʻu ʻe he kau faifekau foʻoú koeʻuhi ke fakatupulekina ʻa e loto-maʻú?

[Fehuʻi ki he Ako]

[Fakamatala ʻi he peesi 29]

Ko e ʻapositolo ko Paulá naʻe tokanga, ngaofengofua mo fakapotopoto ʻi he malangá mo e faiakó

[Fakamatala ʻi he peesi 31]

Naʻe fai ʻe Sīsū ʻa e tokonaki tefito ʻe tolu ki heʻene kau ākongá: ko ha hoa ngāue, vaheʻi ki ha feituʻu, mo ha pōpoaki

[Fakatātā ʻi he peesi 28]

Naʻe lavameʻa ʻa Paula ʻi he aʻu ki he kau fanongo kehekehe ʻaki ʻene fai ʻa e feʻunuʻaki

[Fakatātā ʻi he peesi 30]

Ko e kau faifekau ola leleí ʻoku nau fakakaukau ki he puipuituʻa fakafonua ʻo ʻenau kau fanongó

[Fakatātā ʻi he peesi 31]

Ko e kau faifekau fakalakalaká ʻoku nau tokoniʻi ʻa e faʻahinga foʻoú ʻi he teuteu ki he ngāue fakafaifekaú