Ko ha Fakamoʻoni ki he ʻOfa, Tui mo e Talangofua

KO E pongipongi ʻo Mē 16, 2005, naʻe mokomoko lelei ai ʻa e ʻeá pea laʻalaʻā ʻi he Faama ʻa e Taua Leʻó ʻi Wallkill, Niu ʻIoke. Naʻe ulo fetapaki mai ʻa e musie nonou leleí mo e ngoue matalaʻiʻakaú tupu mei ha ʻuha naʻe tō ki muʻa ke aata ʻa e ʻahó. Naʻe kakau moulu holo ha pato mo hano fānganga ʻe valu ʻi he kiʻi vai tofukī ofi ki he ngataʻanga ʻo e kiʻi anó. Naʻe ofoofo ʻa e kau ʻaʻahí ʻi heʻene fakaʻofoʻofá. Naʻa nau lea leʻo-siʻi, ʻo hangē ʻoku ʻikai ke nau loto ke fakahohaʻasi ʻa e nonga ʻo e pongipongí.

Ko e kau ʻaʻahí ko e Kau Fakamoʻoni ʻa Sihova kuo nau ōmai mei he ngaahi fonua ʻe 48 takatakai he māmaní. Ka naʻe ʻikai te nau ōmaí ke sio ʻi he mātangá. Naʻa nau mahuʻingaʻia ʻi he meʻa naʻe hoko ʻi loto ʻi ha fuʻu fale piliki kulokula lahi, ko e fakalahi fakamuimui taha ia ki he ngaahi fale ʻo e Pēteli ʻi he ʻIunaite Seteté ʻi Wallkill. ʻI loto ʻi he fale ko iá, naʻa nau toe ofoofo, neongo ko e ʻatimosifia aí naʻe ʻikai ke lōngonoa pe nonga.

ʻI he tuʻu ʻi he fakafaletolo he vahaʻa ʻo e ongo fungavaká, naʻe fakasio fakamamaʻu hifo ai ʻa e kau ʻaʻahí ki he ngaahi mīsini fihi. Naʻe kāpui ʻe ha ngaahi fuʻu mīsini pulusi lalahi ʻe nima ha faliki sima molemole ʻa ia ʻoku lahi ange ia ʻi ha malaʻe ʻakapulu ʻe hiva. ʻI hení ʻoku pulusi ai ʻa e ngaahi Tohi Tapú, ngaahi tohí mo e ngaahi makasiní. Ko e ngaahi fuʻu takainga pepa lalahi, ʻa ia ko honau mamafá taki taha ko e kilo ʻe 1,700, ʻoku nau vilo ʻo hangē ko e ngaahi foʻi vaʻe ʻo ha loli lele omá. ʻOku tukuange mai ʻa e foʻi takainga pepa kilomita ʻe 23 taki taha ʻo fou atu ia ʻi he mīsini pulusí ʻi he miniti pē ʻe 25. Lolotonga iá, ʻoku huhua ki ai mo fakamōmoa ʻe he mīsini pulusí ʻa e vaitohí pea fakamokomoko ʻa e pepá koeʻuhí ke lava ʻo pelu ki he ngaahi makasini ʻa ia ʻoku nau ngaʻunu vave ʻi ʻolunga ʻi he ngaahi mīsini feʻaveʻakí ki hono faʻoaki puha pea fakafolau ki he ngaahi fakatahaʻangá. ʻOku femoʻuekina ʻa e ngaahi mīsini pulusi kehé ia ʻi hono pulusi ʻa e ngaahi kongokonga peesi ʻo ha tohí, ʻa ia ʻoku fetuku vave kinautolu ki ha feituʻu tukuʻanga ʻoku lele mei he falikí ki he ʻaofí, kae  ʻoua leva kuo ʻave kinautolu ki he faiʻanga fakamaʻu tohí. Ko e foʻi ngāué ko ha ngaʻunu feongoongoi tonu matematē ia ʻa ia ʻoku puleʻi ʻe he komipiutá.

ʻI he mavahe mei he loki pulusí, ʻoku ʻeveʻeva atu ʻa e kau ʻaʻahí ki he faiʻanga fakamaʻu tohí. ʻI hení ʻoku ngaohi ai ʻe he ngaahi mīsiní ʻa e ngaahi tohi takafi fefeká mo e ngaahi Tohi Tapu takafi moluú ʻo aʻu ki he ngaahi tatau ʻe 50,000 ʻi he ʻaho. ʻOku fakahokohoko lelei, fakamaʻu pea tutuʻu ʻa e ngaahi kongokonga peesi ʻo ha tohi. ʻOku toki fakapipiki atu leva ki ai ʻa e ngaahi takafí. Ko e ngaahi fokotuʻunga tohi ʻoku ʻosi hono faʻú ʻoku faʻo ia ki he ngaahi puha. ʻOku ʻotomētiki pē hono silaʻi, fakahingoa pea fokotuʻutuʻu ʻi ha pāletí. Tānaki atu ki ai, ko ha foʻi holongā ngāue ʻo hono ngaohi mo hono faʻoaki ʻo e ngaahi tohí ʻoku aʻu ki he 100,000 ʻi he ʻaho. Ko e foʻi ngāue foki ko ení ʻoku kau ki ai ʻa e ngaahi fuʻu mīsini lalahi​—ngaahi foʻi moto, mīsini feʻaveʻaki, kia, veʻeteka mo e ngaahi leta taʻefaʻalaua​—ʻoku nau ngaʻunu kotoa ʻi ha tuʻunga oma fakaʻulia ke ngaohiʻaki ʻa e ngaahi tohi Fakatohitapú.

ʻI he ngāue fakataha mo e tonu matematē ʻa ha uasi lelei, ko e oma ʻo e mīsini pulusí, ko e fakalakalaka ʻoku aʻu ki ai ʻa e mīsiní ko ha meʻa fakaofo ia ʻi he tekinolosia ʻi onopōní. Hangē ko ia te tau sio ki aí, ko ha toe fakamoʻoni ia ki he ʻofa, tui mo e talangofua ʻa e kakai ʻa e ʻOtuá. Kae kehe, ko e hā naʻe hiki ai ʻa e ngaahi ngāue pulusí mei Brooklyn, Niu ʻIoke ki Wallkill?

Ko ha ʻuhinga tefito ko hono fakafaingofuaʻi ʻa e pulusí mo e fakaheka vaká ʻaki hono fakahoko tāfataha ʻa e ngaahi ngāué ʻi he feituʻu ʻe taha. ʻI he ngaahi taʻu lahi, naʻe pulusi ai mo fakaheka vaka ʻa e ngaahi tohí mei Brooklyn, pea naʻe pulusi mo fakaheka vaka ʻa e ngaahi makasiní mei Wallkill. Ko hono fakatahaʻi ʻa e ngaahi ngāué ʻe fakasiʻisiʻi ai ʻa e kau ngāué pea ngāueleleiʻaki ai ʻa e paʻanga fakatapui ki he ngāue ʻa e ʻOtuá. ʻIkai ngata aí, koeʻuhi naʻe fakaʻau ke motuʻa ange ʻa e ngaahi mīsini pulusi ʻi Brooklyn, naʻe ʻota ha ongo mīsini pulusi MAN Roland Lithoman foʻou ʻe ua mei Siamane. Ko e ongo mīsini pulusi ko ení naʻe fuʻu lalahi ia ke hao ʻi he fale faiʻanga pulusi ʻi Brooklyn.

Poupouʻi ʻe Sihova ʻa e Ngāué

Ko e taumuʻa ʻo e pulusí ke fakalahi atu maʻu ai pē ʻa e ongoongolelei ʻo e Puleʻanga ʻo e ʻOtuá. Kuo hā mahino naʻe ʻi he ngāué ni ʻa e tāpuaki ʻa Sihová mei he kamataʻangá pē. Mei he 1879 ki he 1922, naʻe pulusi ʻa e ngaahi tohí ʻe he ngaahi kautaha pulusi fakakomēsiale. ʻI he 1922, naʻe totongi ai ha fale fungavaka ono ʻi he 18 Concord Street ʻi Brooklyn pea naʻe fakatau mai ha ʻū meʻangāue ki hono pulusi ʻa e ngaahi tohí. ʻI he taimi ko iá, naʻe tālaʻa ai ʻa e niʻihi pe ʻe lava koā ʻe he fanga tokouá ʻo fakahoko ʻa e ngāué.

Ko e taha ʻo e kau tālaʻa ko iá ko e palesiteni ia ʻo e kautaha naʻá ne pulusi ʻa e lahi taha ʻo ʻetau ngaahi tohí. ʻI heʻene ʻaʻahi ki Concord Street, naʻá ne pehē: “ʻOku mou maʻu ha mīsini pulusi ʻi he kalasi māʻolunga tahá, pea ʻoku ʻikai ha taha ia ʻia kimoutolu te ne ʻiloʻi ʻa e founga ke fakaleleʻakí. ʻI he māhina ʻe ono ʻe hoko ʻa e meʻá kotoa ko ha fokotuʻunga mīsini maumau pē; pea te mou ʻiloʻi ai ko e kakai totonu ke nau fai hoʻomou pulusí ʻa e faʻahinga ko ia kuo nau fai maʻu pē iá, pea ʻoku nau ʻai ia ko ʻenau ngāué.”

Ko e ʻovasia faipulusi ʻi he taimi ko iá, ko Robert J. Martin, naʻá ne pehē: “Naʻe ongo ʻuhingamālie ia, ka naʻá ne tukuange ʻe ia ʻa e ʻEikí; pea kuó ne kau maʻu pē mo kimautolu. . . . Ne ʻikai fuoloa mei ai kuo mau ngaohi ʻa e ngaahi tohí.” Lolotonga ʻa e taʻu ʻe 80 hoko atu aí, naʻe pulusi ʻe he Kau Fakamoʻoni ʻa Sihová ʻa e ngaahi tohi ʻe laui piliona ʻi heʻenau ngaahi mīsini pulusi pē ʻanautolu.

Pea ʻi ʻOkatopa 5, 2002 leva, ʻi he fakataha fakataʻu ʻa e Sōsaieti Taua Leʻo Tohi Tapu mo e Tuleki ʻo Pennsylvania, naʻe fanongonongo ai kuo tali ʻe he Kulupu Pulé ʻa hono hiki ʻa e ngaahi ngāue pulusi ʻa e vaʻa ʻIunaite Seteté ki Wallkill. Naʻe ʻota ha ongo mīsini pulusi foʻou ʻe ua, fakataha mo hono ʻaho ke fakatūʻuta ai ki aí ko Fepueli 2004. ʻE fiemaʻu ʻe he fanga tokouá ke tisaini pea fakalahi ʻa e faiʻanga pulusí pea mateuteu ki ai ʻi loto he māhina ʻe 15 ke maʻu ʻa e ongo mīsini pulusi foʻoú. Pea ko hono fokotuʻu leva ʻo e mīsini fakamaʻu tohi foʻoú mo e ngaahi ngāue fakaheka vaká ʻe pau ke  fakakakato ia ʻi loto he māhina ʻe hiva ka hoko mai aí. Naʻe veiveiua nai ʻa e niʻihi ʻi heʻenau fanongo ki he taimi-tēpilé​—naʻe hā meimei taʻemalava ʻa e ngāué. Ka neongo ia, naʻe ʻiloʻi ʻe he fanga tokouá fakafou ʻi he tāpuaki ʻa Sihová, ʻe lava ʻo fakahoko ia.

Ko “ha Laumālie Fiefia ʻo e Fāitahá”

ʻI hono ʻiloʻi ʻe ʻoatu loto-lelei ʻe he kakai ʻa Sihová kinautolu, naʻe kamataʻi ʻe he fanga tokouá ʻa e foʻi ngāué. (Sāme 110:3) Ko hono lahí naʻe fiemaʻu ai ʻa e kau ngāue tokolahi ange ʻi he tokolahi naʻe ala maʻú mei he ngaahi potungāue langa ʻa e Pētelí. Mei he ʻIunaite Seteté mo Kānata, naʻe pole ai ha fanga tokoua mo e fanga tuofāfine pōtoʻi langa laka hake he toko 1,000, ke ngāue mei he uike ʻe tahá ʻo aʻu ki he māhina ʻe tolú ko ha konga ia ʻo ha polokalama ngāue pole fakataimi. Naʻe fakaafeʻi ke kau ʻi he ngāué ʻa e niʻihi kehe mei he ngaahi polokalama fakaesevāniti mo e ngāue pole fakavahaʻapuleʻangá. Naʻe toe tokoni lahi foki mo e Ngaahi Kōmiti Langa Fakafeituʻú.

Ki he tokolahi, ko e pole ki he ngāue ʻi Wallkill naʻe ʻuhinga iá ko ha fakamole lahi ʻi he fefolauʻakí mo e taimi mavahe mei he ngāue fakamāmaní. Ka neongo ia, naʻa nau fai fiefia ʻa e ngaahi feilaulaú ni. Ko hono tokonaki ʻa e nofoʻanga mo hono fafanga ʻa e kau ngāue pole tokolahi ange ko ení naʻe ʻoange ai ʻa e ngaahi faingamālie ki he fāmili Pētelí ke nau ngāue mālohi ʻi hono poupouʻi ʻa e ngāué. Laka hake he ngaahi mēmipa ʻo e fāmili Pētelí ʻe toko 535 mei Brooklyn, Patterson mo Wallkill naʻa nau pole ke nau tokoni ʻi he ngāué ʻi he ngaahi ʻaho Tokonakí, ʻo tānaki atu ki heʻenau ngaahi vāhenga-ngāue anga-maheni ʻi he ngaahi ʻaho lolotonga ʻa e uiké. Ko e poupou lahi fau naʻe fai ʻe he kakai ʻa e ʻOtuá ki he ngāue fakahisitōlia ko ení naʻe malava pē iá koeʻuhi naʻe poupouʻi ʻe Sihova ʻa e foʻi ngāué.

Naʻe tokoni fakapaʻanga ʻa e niʻihi kehé ia. Ko e fakatātaá, naʻe maʻu ʻe he fanga tokouá ha tohi meia Abby taʻu hiva. Naʻá ne tohi: “ʻOku ou houngaʻia lahi ʻi he ngāue kotoa ʻoku mou faí—ʻi hono ngaohi ʻa e kotoa ʻo e ngaahi tohi fakaʻofoʻofá. Mahalo ʻe vavé ni haʻaku ʻaʻahi atu. Naʻe tala mai ʻe heʻeku tamaí ko e taʻu kahaʻú! Te u tui ha kaati fakaʻilonga koeʻuhi ke mou ʻiloʻi pe ko hai au. Ko e tola ʻena ʻe 20 ki he mīsini pulusi foʻoú! Ko ʻeku paʻanga ia mei heʻeku ongo mātuʻá, ka ʻoku ou fie ʻoatu ia kia kimoutolu fanga tokoua.”

Naʻe tohi ha tuofefine: “Kātaki ʻo tali ʻa ʻeku meʻaʻofa ko ení ko e ʻū tatā lalanga ia naʻá ku ngaohiʻaki pē hoku ongo nima vaivaí ni. ʻOku ou saiʻia ke foaki ʻa e ʻū tatā ko ení ki he kau ngāue ʻoku nau ngāue ʻi he langa ʻi Wallkill. Naʻe pehē ʻi ha tohi fakamatala matangi ʻe ʻi ai ha faʻahitaʻu momoko ʻaupito. Pe ʻoku nau tonu pe hala, ʻoku ʻikai te u ʻilo. Ka ʻoku ou ʻiloʻi ko e lahi taha ʻo e ngāue ʻi Wallkill ʻe fakahoko ia ʻi tuʻa, pea ʻoku ou loto ke fakapapauʻi ʻe ʻai ʻe hoku fanga tuongaʻané mo hoku fanga tokouá ʻa honau ʻulú ke māfana. ʻOku ʻikai te u maʻu ha taha ʻo e ngaahi pōtoʻi ʻa ia ʻoku fekumi ki ai ʻa e fanga tokouá, ka ʻoku ou lava ʻo lālanga, ko ia ai naʻá ku fakapapauʻi ke ngāueʻaki ʻa e pōtoʻi ko ení ke tokoni atu ʻaki ʻa e meʻa ʻoku ou malavá.” Naʻe ʻave fakataha mo e tohí ha ʻū tatā lalanga ʻe 106!

Naʻe kakato ʻa e faiʻanga pulusí ʻi he taimi naʻe fakataimitēpileʻi ki aí. Naʻe pehē ʻe John Larson, ko e ʻovasia ʻo e faiʻanga pulusí: “Naʻe ʻi ai ha laumālie fiefia ʻo e fāitahá. Ko hai ia ʻe toe tālaʻa naʻe faitāpuekina ʻe Sihova ʻa e ngāué? Naʻe vave ʻaupito  hono fakahoko ʻa e ngaahi meʻá. ʻOku ou manatuʻi ʻeku tuʻu ʻi he pelepelá ʻi Mē 2003 ʻo mamata ʻi hono fakatoka ʻe he fanga tokouá ʻa e fakavaʻe ʻo e falé. Siʻi hifo ʻi ha taʻu ʻe taha mei ai, naʻá ku tuʻu ʻi he feituʻu tatau ʻo mamata ʻi ha mīsini pulusi ʻoku ngāue.”

Polokalama Fakatapuí

Ko e polokalama ki hono fakatapui ʻa e faiʻanga pulusi foʻoú, fakataha mo e ngaahi fale nofoʻanga ʻe tolú, naʻe fakahoko ia ʻi Wallkill ʻi he Mōnite ʻo Mē 16, 2005. Ko e ngaahi fale Pēteli ʻi Patterson mo Brooklyn, pea pehē ki he Pēteli Kānatá, naʻe fakahoko kia kinautolu ʻaki ha laine vitiō. Ko e toko 6,049 fakakātoa ne nau maʻu ʻa e polokalamá. Ko Theodore Jaracz, ko ha mēmipa ʻo e Kulupu Pule ʻo e Kau Fakamoʻoni ʻa Sihová, naʻá ne hoko ko e seá pea naʻá ne fai ha fakamatala nounou ki he hisitōlia ʻo e ngāue pulusí. Fakafou ʻi ha ngaahi fakaʻekeʻeke mo ha ngaahi foʻi vitiō naʻe huluʻi, naʻe fakamanatu ai ʻe he ongo mēmipa ʻo e Kōmiti Vaʻá, ko John Larson mo John Kikot ʻa e hisitōlia fakatouʻosi ʻo e ngāue langá mo e ngaahi ngāue pulusí ʻi he ʻIunaite Seteté. Ko John Barr mei he Kulupu Pulé naʻá ne fakahoko ʻa e malanga fakaʻosí, ʻo ne fakatapui ai ʻa e fale faiʻanga pulusí mo e ngaahi fale nofoʻanga ʻe tolu foʻoú kia Sihova ko e ʻOtuá.

Lolotonga ʻa e uike naʻe hoko atu aí, naʻe ʻoange ai ʻa e faingamālie ki he kau ngāue Pēteli mei Patterson mo Brooklyn ke nau ʻeveʻeva takai ʻi he ngaahi fale foʻoú. ʻI hono fakakātoá, ko e toko 5,920 naʻa nau ʻaʻahi lolotonga ʻa e taimi ko iá.

ʻOku Anga-Fēfē ʻEtau Vakai ki he Faiʻanga Pulusí?

ʻI he malanga fakatapuí, naʻe fakamanatu ai ʻe Tokoua Barr ki heʻene kau fanongó ko e faiʻanga pulusí, neongo nai ʻene hā fakaueʻilotó, ʻoku ʻikai ko e meʻa mahuʻingá ʻa e mīsiní. Ko e meʻa mahuʻingá ʻa e kakaí. Ko e ngaahi tohi ʻoku tau pulusí ʻoku ʻi ai ʻene uesia loloto ʻi he moʻui ʻa e kakaí.

Ko e ongo mīsini pulusí fakatouʻosi ʻe lava ke na pulusi ha ngaahi tuleki ʻe laui miliona ʻi he hili pē ha houa ʻe taha! Ka neongo ia, ʻe lava ʻe ha lauʻi tuleki ʻe taha ʻo uesia lahi ʻa e moʻui ʻa ha taha. Ko e fakatātaá, ʻi he 1921 naʻe ngāue  hokohoko ai ha timi ʻo e kau tangata monomono halanga lēlue ʻi Saute ʻAfilika ʻi ha halanga lēlue lōloa. Ko e taha ʻo kinautolu, ko ha tangata ko Christiaan, naʻá ne fakatokangaʻi ha kiʻi lauʻipepa ʻoku ʻefihia ʻi lalo ʻi ha halanga lēlue. Ko e taha ia ʻo ʻetau ngaahi tulekí. Naʻe lau ia ʻe Christiaan fakataha mo e mahuʻingaʻia lahi. Naʻá ne lele ke fetaulaki mo hono foha-ʻi-he-fonó peá ne fakahaaʻi fiefia ange: “ʻI he ʻaho ní kuó u maʻu ʻa e moʻoní!” Hili mei ai ha taimi siʻi, naʻá na fai tohi ai ke maʻu ha maʻuʻanga fakamatala lahi ange. Naʻe ʻave ki ai ʻe he vaʻa ʻi Saute ʻAfiliká ha ngaahi tohi Fakatohitapu lahi ange. Naʻe ako ia ʻe he ongo tangatá, hoko ʻo papitaiso peá na vahevahe atu ʻa e moʻoni Fakatohitapú ki he niʻihi kehé. Ko hono olá, naʻe tali ʻe he tokolahi ʻa e moʻoní. Ko hono moʻoní, ʻi he konga ki muʻa ʻo e 1990 tupú, laka hake ʻi ha laui ngeau ʻo hona hakó ko e Kau Fakamoʻoni ʻa Sihova​—ko e ola kotoa ia ʻo hono maʻu ʻe ha tangata ha kiʻi lauʻi tuleki ʻi ha halanga lēlue!

Ko e ngaahi tohi ʻoku tau pulusí, ko e lea ia ʻa Tokoua Barr, ʻoku ʻomi ai ʻa e kakaí ki he moʻoní, tauhi ai kinautolu ʻi he moʻoní, ueʻi kinautolu ke nau faivelenga lahi ange, pea fakafāʻūtahaʻi ai ʻa e fetokouaʻakí. Pea hiliō ai, ko e ngaahi tohí, ʻa ia ʻoku tau kau kotoa ʻi hono tufaki atú, ʻoku fakalāngilangiʻi ai ʻa hotau ʻOtuá, ʻa Sihova!

ʻOku Anga-Fēfē ʻa e Vakai Mai ʻa Sihova ki he Faiʻanga Pulusí?

Naʻe toe kole ange ʻe Tokoua Barr ki he kau fanongó ke nau fakakaukau ki he anga ʻo e vakai mai ʻa Sihova ki he faiʻanga pulusí. ʻOku ʻikai moʻoni te ne fakafalala ki ai. ʻOku lava ke ne ʻai ʻa e ngaahi maká ke nau malangaʻi ʻa e ongoongoleleí! (Luke 19:40) Tānaki atu ki ai, ʻoku ʻikai maongo ki ai ʻa e falé, ko hono lahí, vavé pe ko e ngaahi malava ʻa e mīsiní. He ko ē, naʻá ne fakatupu ʻa e ʻunivēsí! (Sāme 147:10, 11) ʻOku ʻafioʻi ʻe Sihova ʻa e ngaahi founga fakalakalaka ange ke faʻuʻaki ʻa e ngaahi tohí, ko e ngaahi founga kuo teʻeki ai ke fokotuʻutuʻu pe aʻu ʻo fakakaukau atu ki ai ʻa e tangatá. Ko ia ai, ko e hā ʻa e meʻa ia ʻoku ʻafio ki ai ʻa Sihova ʻa ia ʻokú ne fakamahuʻingaʻi moʻoní? ʻOku pau moʻoni ʻokú ne ʻafioʻi ʻi he faiʻanga pulusi ko ení ʻa e ngaahi ʻulungāanga mahuʻinga ʻo ʻene kakaí​—ʻa ʻenau ʻofá, tuí mo e talangofuá.

Naʻe fakatātaaʻi ʻa e tafaʻaki ʻo e ʻofá. ʻOku taʻo ʻe ha taʻahine ha foʻi keke maʻa ʻene ongo mātuʻá. ʻOku hangehangē ʻe maongo ia ki he ongo mātuʻá. ʻIo, kae kehe tatau ai pē pe ko e hā ʻa e tuʻunga ʻo e foʻi keké, ko e meʻa ʻoku maongo ki he ongo mātuʻá ko e ʻofa ʻa ʻena tamá, ʻo hangē ko ia ʻoku fakahāhaaʻi ʻe heʻene ngāue loto-fiefoakí. ʻI he tuʻunga meimei tatau, ʻi he taimi ʻoku vakai mai ai ʻa Sihova ki he faiʻanga pulusi foʻou ko ení, ʻokú ne ʻafio mai ʻo fakalaka atu ia ʻi he falé mo e mīsiní. Ko e meʻa muʻomuʻá, ʻokú ne ʻafio ki ai ko ha fakahāhā ko ia ʻo e ʻofa ki hono huafá.​—Hepelu 6:​10.

ʻIkai ngata aí, hangē pē ko e vakai ʻa Sihova ki he ʻaʻaké ko ha fakahāhā ia ʻo e tui ʻa Noá, ʻokú ne ʻafio ki he faiʻanga pulusi ko ení ko ha fakamoʻoni hā mahino ia ʻo ʻetau tuí. Tui ki he hā? Naʻe maʻu ʻe Noa ʻa e tui ko e meʻa naʻe tomuʻa tala ʻe Sihová ʻe hoko. ʻOku tau tui ʻoku tau lolotonga moʻui ʻi he ngaahi ʻaho fakaʻosí, ko e ongoongoleleí ko e pōpoaki mahuʻinga taha ia ʻa ia ʻoku fakaongo atu ʻi he māmaní, pea ʻoku mātuʻaki mahuʻinga ki he kakaí ke nau fanongo ki ai. ʻOku tau ʻiloʻi ko e pōpoaki ʻa e Tohi Tapú ʻoku lava ke fakahaofi ai ʻa e ngaahi moʻui.​—Loma 10:​13, 14.

ʻOku ʻikai ha veiveiua, ʻoku toe ʻafioʻi ʻe Sihova ʻi he faiʻanga pulusi ko ení ko ha fakahāhā ia ʻo ʻetau talangofuá. Hangē ko ia ʻoku tau ʻiloʻí, ko hono finangaló ia ke malangaʻi ʻa e ongoongoleleí ʻi māmani lahi ki muʻa ke hoko mai ʻa e ngataʻangá. (Mātiu 24:14) Ko e faiʻanga pulusi ko ení, fakataha mo kinautolu ʻi he ngaahi feituʻu kehe ʻo e kolopé, te nau fakahoko ha ngafa ʻi hono fakahoko ʻa e fekau ko iá.

ʻIo, ko e ʻofa, tui mo e talangofua kuo fakahāhā ʻi hono fakapaʻanga, langa mo hono fakalele ʻa e ngaahi fale ko ení ʻoku toe tapua mai ia ʻi he ngāue faivelenga ʻa e kakai ʻa Sihová ʻi he feituʻu kotoa pē ʻi heʻenau hokohoko atu hono fanongonongo ʻa e moʻoní ki he faʻahinga kotoa te nau fanongó.

[Puha/Fakatātā ʻi he peesi 11]

FAKALAHI ʻO E PULUSÍ ʻI HE ʻIUNAITE SETETÉ

1920: Pulusi e ngaahi makasiní ʻaki ʻa e fuofua mīsini pākí, ʻi 35 Myrtle Avenue, Brooklyn.

1922: Hiki ʻa e faiʻanga pulusí ki ha fale fungavaka ono ʻi 18 Concord Street. Pulusi he taimi ko ení ʻa e ngaahi tohí.

1927: Hiki ʻa e faiʻanga pulusí ki ha fale foʻou naʻe langa ʻi 117 Adams Street.

1949: Toe tānaki atu ʻa e fungavaka ʻe hiva ʻo lī tuʻo ua ai ʻa e lahi ʻo e faiʻanga pulusí.

1956: Toe fakalahi ʻa e faiʻanga pulusi ʻi Adams Street ʻi he taimi naʻe langa ai ʻa e fale foʻou ʻi 77 Sands Street.

1967: Langa ha fale fungavaka hongofulu, ʻo ʻai ai ke malava ʻo fakahoko ki ai ha faiʻanga pulusi ʻoku liunga hongofulu ʻa hono lahí ʻi he muʻaki falé.

1973: Langa ha faiʻanga pulusi fakalahi ʻi Wallkill, ʻo fakatefito ki hono ngaohi ʻa e makasiní.

2004: Kotoa ʻo e ngāue pulusí, fakamaʻu-tohí mo e fakaheka vaka ʻi he ʻIunaite Seteté naʻe fakatahaʻi kotoa ia ʻi Wallkill.