ʻOkú Ke Manatuʻi?

Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sio angé pe ʻe lava ke ke tali ʻa e ngaahi fehuʻi ko ení:

• Ko e hā ʻe lava ai ʻa e ʻuluaki angahalá​—ʻa e talangataʻa ʻa ʻĀtamá​—ʻo fakatatau ki ha mahaki tukufakaholó?

ʻOku hangē ha mahakí koeʻuhí naʻe ʻomai ʻe ʻĀtama ʻa e angahalá ki heʻene fānaú. Ko ia kuo tau maʻu tukufakaholo ai ʻa e mele ko e angahalá, ʻo hangē tofu pē ko hono maʻu tukufakaholo ʻe he fānau ʻe niʻihi ha mahaki mei heʻenau ongo mātuʻá.​—​8/15, peesi 5.

• Ko e hā ʻa e ngaahi tupuʻanga tefito ʻo e tupulaki ʻa e fakamālohí he ʻaho ní?

ʻOku feinga ʻa Sētane ke fakamavaheʻi ʻa e kakaí meia Sihova ʻaki hono tō ha laumālie ʻo e fakamālohí ʻi he ngaahi lotó, ʻo hangē ko hono fakafou mai ʻi he ngaahi faivá, fasí pea mo e ngaahi keimi fakakomipiuta ʻa ia ʻokú ne fakaʻaiʻai ʻa e kau keimí ke nau langaʻi ʻa e anga-fakamamahí mo e tāmaté. Ko e fakamālohi ʻoku hā ʻi he mītiá kuo tānaki mai ia ki he lahi ʻo e ngaahi tōʻonga fakamālohí.​—9/1, peesi 29.

• Ko hai ʻa Ponitō Pailato?

Ko e tokotaha Loma ia ʻo e tuʻunga houʻeiki māʻulalo angé ʻa ia ʻoku ngalingali naʻe ʻi he kau taú. Naʻe fakanofo ʻe he ʻEmipola Loma ko Taipilioó ʻa Pailato ko e kōvana ʻo e vahefonua ʻo Siuteá ʻi he 26 T.S. ʻI hono fakamāuʻi ʻo Sīsuú, naʻe fanongo ai ʻa Pailato ki he ngaahi tukuakiʻi naʻe fai ʻe he kau taki Siú. Ke fakahōhōʻiaʻi ʻa e fuʻu kakaí, naʻá ne loto ai ki hono tautea mate ʻo Sīsuú.​—9/15, peesi 10-​12.

• Ko e hā “ʻa e fakaʻilonga” naʻe lave ki ai ʻi he Mātiu 24:​3 (NW)?

Ko e fakaʻilonga ko ení ʻoku faʻuʻaki ia ʻa e ngaahi tafaʻaki ʻa ia ʻoku maʻu ai ha fakaʻilonga faʻu fetuiaki papau. ʻOku kau ʻi he fakaʻilongá ʻa e tau, honge, mahaki fakaʻauha mo e ngaahi mofuike, pea ʻe ʻai ai ʻa e kau muimui ʻo Sīsuú ke nau ʻiloʻi ʻa ʻene “ʻi aí” pea pehē foki ki he “fakaʻosiʻosi ʻo e fokotuʻutuʻu ʻo e ngaahi meʻá.”​—10/1, peesi 4-5.

• Ko e hā ʻa e Nofoʻanga Siu, pea ko e hā ʻa e ngaahi feituʻu naʻe kau ki aí?

Ko e foʻi leá ʻoku ngāueʻaki ia ki he kau Siu ʻoku nau nofo ʻi tuʻa mei Pālesitainé. ʻI he ʻuluaki senitulí, ko e ngaahi senitā faka-Siu tefitó naʻe ʻi Sīlia, ʻĒsia Maina, Papilōnia mo ʻIsipite, pea naʻe ʻi ai ʻa e ngaahi komiunitī iiki ange ʻi he feituʻu faka-ʻIulope ʻo e ʻEmipaea Lomá.​—10/15, peesi 12.

• ʻE lava ʻe ha Kalisitiane ʻo tauhi maʻu ha konisēnisi lelei kapau te ne tali ʻa e ngāue ʻoku toʻo meʻataú?

Ko e kau ʻi he ngāue fakamāmani ʻa ia ʻoku fiemaʻu ki ai ʻa hono toʻo ʻo ha meʻafaná pe ko ha toe meʻatau kehe ko ha fili fakafoʻituitui ia. Ka ʻoku fakaeʻa ʻe he ngāue meʻataú ha taha ki he halaia ʻi he toto ʻe ala lava ke hokó kapau ʻe ngāueʻaki ʻe ha taha ʻa e meʻataú pea mo e fakatuʻutāmaki ʻo e lavea pe mate mei hano ʻohofi pe sāuni. Ko ha Kalisitiane ʻokú ne toʻo ha faʻahinga meʻatau pehē ʻe ʻikai taau ia ki he ngaahi monū makehe ʻi he fakatahaʻangá. (1 Timote 3:​3, 10)​—11/1, peesi 31.

• Koeʻuhi ko e foʻi lea “ʻĀmaketone” ko e haʻu ia mei he kupuʻi lea “Moʻunga ko Mekito,” ʻe fai nai ʻa e tau ʻo ʻĀmaketoné ʻi ha moʻunga ʻi he Hahake Lotolotó?

ʻIkai. ʻOku ʻikai ʻi ai ha Moʻunga ia ko Mekito, ko e foʻi ʻesi pē, ʻa ia ʻoku tafunga hake ʻi he teleʻa tokalelei ofi atu ki ai ʻi ʻIsilelí. ʻE ʻikai lava ke hao ʻi he feituʻu ko iá ʻa e “ngaahi tuʻi ʻo mamani, mo ʻenau ngaahi matatau.” Ko e tau lahi ʻa e ʻOtuá ʻe fai ia ʻi he māmaní kotoa, pea ʻe fakangata ai ʻa e kotoa ʻo e ngaahi taú. (Fakahā 16:​14, 16; 19:19; Sāme 46:​8, 9)​—12/1, peesi 4-7.