“Fanongonongo ʻa e Tukuange ki he Popula”

ʻI HE kamataʻanga ʻo ʻene ngāue fakafaifekaú, naʻe talaki ai ʻe Sīsū ko e konga ʻo e fekau naʻe ʻoange kiate iá “ke fanongonongo ʻa e tukuange ki he popula.” (Luke 4:​19a [18, PM]) ʻI he muimui ki he faʻifaʻitakiʻanga ʻa honau ʻEikí, ko e kau Kalisitiane moʻoní ʻoku nau malangaʻi ʻa e ongoongo lelei ʻo e Puleʻangá ki he “kakai kotoa pe,” ʻo ʻoange kiate kinautolu ʻa e tukuange mei he nofo pōpula fakalaumālié pea tokoniʻi kinautolu ke nau fakalakalaka ʻi heʻenau moʻuí.​—1 Timote 2:4.

ʻI he ʻahó ni, ʻoku kau ki he ngāué ni ʻa e malanga ki he kau pōpula moʻoni​—ko e kakai ʻoku tuku pōpula ʻi he ngaahi faihia kehekehe pea ʻoku nau fakamahuʻingaʻi ha tukuange fakalaumālie. Maʻu ʻa e fiefia ʻi he līpooti fakalototoʻa ko eni fekauʻaki mo e ngaahi ngāue fakamalanga ʻa e Kau Fakamoʻoni ʻa Sihová ʻi he ngaahi pilīsone ʻo ʻIukalaine mo e feituʻu kehe ʻi ʻIulopé.

Liliu mei he Maʻunimā ʻe he Faitoʻo Kona Tapú ʻo Hoko ko e Kau Kalisitiane

ʻI he taʻu ʻe 38 ʻo e moʻui ʻa Sehí, a kuo fakamoleki ai ʻa hono taʻu ʻe 20 ʻi he pilīsoné. Naʻe aʻu ʻo toki fakaʻosi ʻa ʻene akó ʻi he pilīsoné. ʻOkú ne pehē: “ʻI he ngaahi taʻu kuo maliu atú, naʻe tuku pōpula ai au ʻi he fakapō, pea ʻoku kei toe ʻa hoku ngaahi taʻu ke ngāueʻí. ʻI he pilīsoné naʻá ku tōʻonga ai ʻo hangē ha tokotaha pule kakahá, pea naʻe ilifiaʻi au ʻe he kau pōpula kehé.” Naʻe ʻai ia ʻe he meʻá ni ke ne ongoʻi tauʻatāina? ʻIkai. Naʻe pōpula ʻa Sehi ʻi he ngaahi taʻu lahi ki he faitoʻo kona tapú, ʻolokaholó mo e tapaká.

Naʻe vahevahe ange leva ʻe ha kaungā pōpula kiate ia ʻa e moʻoni Fakatohitapú. Naʻe hangē ia ha huelo maama ʻi he fakapoʻulí. ʻI loto ʻi ha ngaahi māhina siʻi, naʻá ne fakatauʻatāinaʻi ia mei he ngaahi meʻa naʻe maʻunimā aí, ʻo ne hoko ko ha tokotaha malanga ʻo e ongoongo leleí pea papitaiso. ʻOku ʻi ha moʻui femoʻuekina he taimí ni ʻa Sehi ʻi he pilīsoné, ʻi he ngāue ko ha faifekau taimi-kakato ʻa Sihova. Kuó ne tokoniʻi ʻa e kau faihia ʻe toko fitu ke liliu ʻa ʻenau ngaahi foungá pea nau hoko ko hono fanga tokoua fakalaumālie. Kuo tukuange ʻa e toko ono ʻo kinautolu, ka ʻoku kei nofo pilīsone pē ʻa Sehi. ʻOku ʻikai te ne loto-mamahi heni koeʻuhí ʻokú ne fiefia he ʻoku lava ke ne tokoniʻi ʻa e niʻihi kehé ke tukuange kinautolu mei he nofo pōpula fakalaumālié.​—Ngāue 20:35.

Ko e taha ʻo e kau ako ʻa Sehi ʻi he pilīsoné ko Vikitā, ko ha tokotaha tila mo maʻunimā ki muʻa ʻe he  faitoʻo kona tapú. Hili hono tukuange ia mei he pilīsoné, naʻe hokohoko atu ʻa Vikitā ʻi hono fai ʻa e fakalakalaka fakalaumālié pea naʻe iku pē ʻo ne maʻu tohi fakamoʻoni ako mei he Akoʻanga Ako Fakafaifekau ʻi ʻIukalainé. ʻOkú ne ngāue he taimí ni ko ha faifekau tāimuʻa makehe ʻi Molotova. ʻOku pehē ʻe Vikitā: “Naʻá ku kamata ifi ʻi hoku taʻu 8, ngāuekoviʻaki ʻa e ʻolokaholó ʻi hoku taʻu 12 pea ngāueʻaki ʻa e faitoʻo kona tapú ʻi hoku taʻu 14. Naʻá ku loto ke liliu ʻa ʻeku moʻuí, ka naʻe taʻelavameʻa ʻa ʻeku ngaahi feingá kotoa. ʻI he 1995 leva, ʻi heʻeku palani pē mo hoku uaifí ke ma mavahe mei heʻeku ngaahi feohi koví, naʻe hoka heleʻi ai ia ʻo ne mate ʻe ha tokotaha puke fakaʻatamai, havala ke tāmate. Naʻe hoko ai ʻeku moʻuí ki ha tuʻunga fakamamahi fakaʻaufuli. ‘Ko feʻia ʻa hoku uaifí he taimí ni? Ko e hā ʻoku hoko ʻi he taimi ʻoku mate ai ha tahá?’ Naʻá ku hokohoko ʻeke ha ngaahi fehuʻi ka naʻe ʻikai lava ke u maʻu ha ngaahi tali. Naʻá ku ngāueʻaki ʻa e faitoʻo kona tapu lahi ke feau ʻa e ongoʻi taʻelatá. Naʻe puke au ʻi he tila faitoʻo kona tapú pea tautea ki he ngāue pōpula taʻu ʻe nima. Naʻe tokoniʻi ai au ʻe Sehi ke u maʻu ʻa e ngaahi talí. Naʻá ku feinga tuʻo lahi ke ʻatā mei he faitoʻo kona tapú, ka naʻá ku toki lavameʻa ʻi he taimi ko ení ʻi he tokoni ʻa e Tohi Tapú. Ko e Folofola ʻa e ʻOtuá ʻoku mālohi ʻaupito!”​—Hepelu 4:​12.

Liliu ʻa e Kau Faihia Loto-Fefeká

Ko Vēsilí naʻe ʻikai ʻaupito ke ne ngāueʻaki ʻa e faitoʻo kona tapú, ka naʻe ʻikai ke ne hao mei he nofo pōpulá. “Ko e fuhu-ʻaká naʻá ne maʻunimā au,” ko ʻene fakamatalá ia. “Naʻá ku akoʻi au ke u haha ʻa e kakaí ʻo ʻikai ʻasi ha takatakaʻuli ʻia kinautolu.” Naʻe ngāueʻaki ʻe Vēsili ʻa ʻene ngaahi founga fakamālohí ke kaihaʻa ai mei he kakaí. “Naʻá ku ʻi he pilīsoné tuʻo tolu, ʻa ia naʻe iku ai ki hono veteʻi au ʻe hoku uaifí. Lolotonga ʻa e tautea taʻu ʻe nima fakamuimuí, naʻá ku maheni ai mo e ʻū tohi ʻa e Kau Fakamoʻoni ʻa Sihová. Naʻe ueʻi au ʻe he meʻá ni ke u lau ʻa e Tohi Tapú, ka naʻá ku kei kau pē ʻi he meʻa naʻá ku manako moʻoni aí​—ko e fuhu ʻo ʻikai hano ngaahi laó.

“Kae kehe, hili ʻa e māhina ʻe ono ʻo e lau Tohi Tapú, naʻe ʻi ai ha liliu ʻiate au. Naʻe ʻikai kei ʻomai kiate au ʻe he ikuna ʻi ha fuhú ʻa e fiemālie ʻo hangē ko ia naʻe hoko ki muʻá. Ko ia naʻá ku kamata ai ke ʻanalaiso ʻa ʻeku moʻuí ʻi he tokoni ʻa e Aisea 2:4 pea ʻiloʻi ai ka ʻikai ke feʻunuʻaki ʻa ʻeku fakakaukaú, te u fakamoleki ai ʻa e toenga ʻo ʻeku moʻuí ʻi he pilīsoné. Ko ia naʻá ku laku ʻeku ngaahi naunau fuhú kotoa pea kamata ke ngāue ki hoku angaʻitangatá. Naʻe ʻikai ke faingofua ia, ka naʻe tokoniʻi māmālie au ʻe he fakalaulaulotó mo e lotú ke taʻofi ʻa ʻeku ngaahi tōʻonga koví. ʻI he taimi ʻe niʻihi, naʻá ku kōlenga ai ʻi he tangi loʻimata kia Sihova ke ʻomai kiate au ʻa e mālohi ke u ʻatā ai mei hoku tuʻunga maʻunimaá. Naʻe iku ai ʻou lavameʻa.

 “Hili ʻa e tukuange mei he pilīsoné, naʻá ku toe fāʻūtaha ai mo hoku fāmilí. ʻOku ou ngāue he taimí ni ʻi ha keliʻanga malala. ʻOku ʻomai ʻe he meʻá ni kiate au ʻa e taimi feʻunga ke kau ai ʻi he ngāue fakamalangá fakataha mo hoku uaifí pea ke fakahoko ʻa hoku ngaahi fatongia ʻi he fakatahaʻangá.”

Ko Mīkola mo hono ngaahi kaumeʻá naʻa nau kaihaʻa ʻi ha ngaahi pangikē lahi ʻi ʻIukalaine. Naʻe iku eni ki heʻene ngāue pōpula taʻu ʻe hongofulu. Ki muʻa ʻi hono tuku pilīsoné, naʻá ne ʻi he fale lotú tuʻo taha pē​—ʻi he teuteu ke kaihaʻa mei he fale lotu ko iá. Naʻe ʻikai lavameʻa ʻene feingá, ka ko e ʻaʻahi ko iá naʻá ne ʻai ai ke tui ʻa Mīkola ko e Tohi Tapú kuo pau pē ʻoku fonu ʻi he ngaahi talanoa fakapipiko fekauʻaki mo e kau pātele ʻOfotokisií, ngaahi teʻelangó mo e ngaahi ʻaho mālōlō fakalotú. ʻOkú ne pehē: “ʻOku ʻikai te u ʻiloʻi tonu ʻa e ʻuhingá, ka naʻá ku kamata ke lau ʻa e Tohi Tapú. Naʻá ku ofo ʻi he ʻiloʻi ʻoku halaʻatā ke hangē ia ko e meʻa naʻá ku fakakaukauloto atu ki aí!” Naʻá ne kole ki ha ako Tohi Tapu pea naʻá ne papitaiso ʻi he 1999. ʻI he sio kiate ia he taimi ní, ʻoku faingataʻa ke tui ko e sevāniti fakafaifekau anga-fakatōkilalo ko ení ko ha tokotaha kaihaʻa pangikē anga-kovi ia ki muʻa!

Ko Latiume naʻe tautea mate ia. Lolotonga ʻene tatali ki he tautea maté, naʻá ne lotu ai ki he ʻOtuá ʻo palōmesi ange te ne tauhi kiate Ia ʻo kapau ʻe fakahaofi ʻene moʻuí. ʻI he taimi ko iá, naʻe liliu ai ʻa e laó, pea naʻe fakasiʻisiʻi ai ʻa hono tautea maté ki he ngāue pōpula ki he mate. Ke fai ki heʻene palōmesí, naʻe kamata ke kumi ʻa Latiume ki he lotu moʻoní. Naʻá ne hū ʻo kau ʻi ha koosi fetohiʻaki pea maʻu hano tipiloma mei ha siasi ʻAho-Fitu, ka naʻe ʻikai te ne fiemālie ai.

Kae kehe, ʻi he hili hono lau ʻa e ongo makasini Taua Leʻo mo e ʻĀ Hake! ʻi he laipeli he pilīsoné, naʻe tohi ʻa Latiume ki he ʻōfisi vaʻa ʻo e Kau Fakamoʻoni ʻa Sihova ʻi ʻIukalainé, ʻo kole ke fai ange kiate ia ha ʻaʻahi. ʻI he ʻaʻahi kiate ia ʻa e fanga tokoua fakalotofonuá, naʻá ne ʻosi lau ʻe ia ʻa ia tonu ko ha Fakamoʻoni pea naʻá ne malanga ʻi he pilīsoné. Naʻe tokoniʻi ia ke ne taau ke hoko ko ha tokotaha malanga ʻo e Puleʻangá. ʻI hono hiki ení ko Latiume mo e toko fitu kehe ʻi he pilīsone ko iá ʻoku nau tatali ke papitaiso. Ka ʻoku ʻi ai ʻenau palopalema. Koeʻuhi ko e kau pōpula ngāue ki he maté ʻoku tauhi kinautolu ʻi he fanga kiʻi loki ʻo fakatatau ki heʻenau ngaahi tui fakalotú, ko Latiume mo hono kaungā pōpulá ʻoku nau ʻi he tui tatau. Ko ia ko hai ʻe lava ke nau malanga ki aí? Naʻa nau vahevahe atu ʻa e ongoongo leleí ki he kau kaʻate ʻi he pilīsoné ʻaki ʻenau faitohí.

Ko Nasá naʻe hiki ia mei ʻIukalaine ki he Lepupilika Sekí, ʻa ia naʻá ne kau ai ki ha kau kengi kaihaʻa. Naʻe iku eni ki ha tuku pilīsone taʻu ʻe tolu mo e konga. Lolotonga ʻene ʻi he pilīsoné, naʻá ne tali ʻa e ngaahi ʻaʻahi ʻa e Kau Fakamoʻoni ʻa Sihová mei he kolo ko Karlovy Vary, ako ʻa e moʻoní pea toe foki ki ha tuʻunga lelei fakaʻaufuli. ʻI he sio ki hení, naʻe tala ange ʻe he taha ʻo e kau kaʻate leʻó ki he ngaahi kaungā pōpula ʻo Nasá: “Kapau ko kimoutolú kotoa te mou hangē ko e ʻIukalaine ko eé, ʻe lava ke iku ai ʻo liliu ʻa ʻeku ngāué.” Naʻe pehē ʻe ha tokotaha ʻe taha: “Ko e Kau Fakamoʻoni ko eni ʻa Sihová ko e kau mataotao moʻoni. ʻOku haʻu ki pilīsone ha faihia; ʻokú ne hū ki tuʻa ko ha tangata taau.” ʻOku ʻi ʻapi ʻa Nasa he taimí ni. Naʻá ne ako tufunga pea mali, pea ko ia mo hono uaifí ʻokú na kau ʻi he ngāue fakafaifekau taimi-kakató. He fakamālō ē ko ia ʻi he ngaahi ʻaʻahi ʻa e Kau Fakamoʻoní ki he pilīsoné!

ʻIloʻi Fakaʻofisiale

ʻOku ʻikai ko e kau pōpulá pē ʻa e faʻahinga ʻoku nau houngaʻia ʻi he ngāue ʻoku tokonaki mai ʻe he Kau Fakamoʻoni ʻa Sihová. Ko Milosiloa Kovasikī, ko ha tangata lea maʻá e taha ʻo e ngaahi pilīsone ʻi Pōlaní, naʻá ne pehē: “ʻOku mau fakahoungaʻi ʻaupito ʻenau ngaahi ʻaʻahí. Ko e kau pōpula ʻe niʻihi ʻoku ʻi ai honau ngaahi puipuituʻa fakamamahi. Ngalingali naʻe ʻikai ʻaupito tōʻongafai kiate kinautolu ʻi he tuʻunga ko e faʻahinga ʻo e tangatá. . . . Ko e tokoni [ʻa e Kau Fakamoʻoní] ʻoku mahuʻinga ʻaupito koeʻuhí ʻoku tokosiʻi ʻemau kau ngāué mo e kau faiakó.”

Ko e sela ʻo ha toe pilīsone ʻe taha ʻi Pōlani naʻá ne tohi ki he ʻōfisi vaʻá, ʻo kole ki he Kau Fakamoʻoní ke fakalahi ʻenau ngāue ʻi hono pilīsoné. Ko e hā hono ʻuhingá? Naʻá ne fakamatala: “Ko e ngaahi toutou ʻaʻahi ʻa e kau fakafofonga ʻo e Taua Leʻó ʻe lava ke tokoniʻi ai ʻa e kau pōpulá ke nau fakatupu ha ngaahi ʻulungāanga lelei fakasōsiale, ʻo lōmia ai ʻa e fakaaoao ʻi honau lotolotongá.”

Naʻe līpooti ha nusipepa ʻIukalaine ʻo kau ki ha pōpula loto-mafasia ʻa ia naʻe feinga ke taonakita ka naʻá ne maʻu ʻa e tokoni mei he Kau Fakamoʻoni ʻa Sihová. “ʻI he lolotonga ní ko e tangatá ni ʻokú ne fakaakeake fakaeongo māmālie,” ko e lau ia ʻa e līpōtí. “ʻOkú ne pipiki ki he founga-tuʻumaʻu ʻi he pilīsoné pea ko ha faʻifaʻitakiʻanga ia ki he kau pōpula kehé.”

 Fakalaka Atu ʻa e Ngaahi ʻAongá ʻi he Ngaahi Matapā Pilīsoné

Ko e ngaahi ʻaonga ʻo e ngāue ʻoku fai ʻe he Kau Fakamoʻoni ʻa Sihová ʻoku ʻikai ke ngata pē ia ʻi he matapā pilīsoné. ʻOku hokohoko atu ia hili hono tukuange ʻa e kau pōpulá. Ko e ongo Kalisitiane ʻe toko ua, ko Pilisita mo Linate, kuó na tokoniʻi ʻa e kakaí ʻi ha ngaahi taʻu ʻi he foungá ni. Ko ha nusipepa Siamane, ko e Main-Echo Aschaffenburg, ʻoku līpooti ai fekauʻaki mo kinaua: “ʻOkú na tokangaʻi ʻa e kau pōpulá ʻi he māhina ʻe tolu ki he nima hili honau fakaʻataá, ʻo fakalototoʻaʻi kinautolu ke nau maʻu ha taumuʻa ʻi he moʻuí. . . . Kuo ʻiloʻi fakaʻofisiale kinaua ko e ongo ʻōfisa tokangaʻi pōpula pole. . . . ʻOku toe ʻi ai ʻena ngaahi feangai fakalakalaka mo lelei mo e kau ngāue ʻi he pilīsoné.” Kuo fakatapui ʻe ha kakai ʻenau moʻuí kia Sihova ko e tupu mei he faʻahinga tokoni ko ení.

Naʻa mo e kau ʻōfisa pilīsoné ʻoku nau maʻu ʻaonga mei he ngāue fakaeako Tohi Tapu ʻa e Kau Fakamoʻoni ʻa Sihová. Ko e fakatātaá, ko Lōmanó ko ha mēsia fakakautau ia pea ko ha toketā ki he ʻatamaí ʻi ha pilīsone ʻIukalaine. ʻI he taimi naʻe ʻaʻahi ai ʻa e Kau Fakamoʻoni ʻa Sihová ki hono ʻapí, naʻá ne loto ai ki ha ako Tohi Tapu. Pea naʻá ne ʻiloʻi naʻe ʻikai ke fakaʻatā ʻa e Kau Fakamoʻoní ke nau fetuʻutaki mo e kau pōpula ʻi he feituʻu naʻá ne ngāue aí. Ko ia naʻá ne kole ai ki he selá ki ha ngofua ke ne ngāueʻaki ʻa e Tohi Tapú ʻi heʻene ngāue ki he kau pōpulá. Naʻe tali ʻa ʻene kolé, pea naʻe fakahaaʻi ʻe he kau pōpula ʻe toko hongofulu nai ʻa e mahuʻingaʻia. Naʻe vahevahe tuʻumaʻu ʻe Lōmano ʻa ʻene ʻilo Tohi Tapu ne tupulakí ki he kau pōpula ko ení pea naʻe ʻomai ʻe heʻene ngaahi feingá ʻa e ngaahi ola lelei ʻaupito. Hili hono tukuangé, naʻe hokohoko atu ʻa e fakalakalaka ʻa e niʻihi pea nau hoko ai ko e kau Kalisitiane ʻosi papitaiso. ʻI he sio ki he mālohi ʻo e Folofola ʻa e ʻOtuá, naʻe fakakaukau fakamātoato ange ai ʻa Lōmano ki heʻene akó. Naʻá ne mavahe mei he ngāue fakakautaú pea hokohoko atu ʻi heʻene ngaahi ngāue fakaeako Tohi Tapú. ʻI he taimi ní ʻokú ne kau fakataha ʻi he ngāue fakamalangá mo ha tokotaha pōpula ki muʻa.

“ʻOku mau moʻui heni ʻi he Tohi Tapú, ʻū tohi Fakatohitapú mo e ako Tohi Tapú,” ko e tohi ia ʻa ha pōpula ʻe taha. ʻOku fakamatalaʻi lelei ʻe he ngaahi leá ni ʻa e fiemaʻu ʻū tohi Fakatohitapu ʻoku hoko ʻi he ngaahi pilīsone ʻe niʻihi. ʻOku līpooti ha fakatahaʻanga ʻe taha ʻi ʻIukalaine fekauʻaki mo e ngāue fakaeako Tohi Tapú ʻi ha pilīsone fakalotofonua: “ʻOku fakamālō lahi ʻa e tafaʻaki fakalele ʻo e ngāué ki he ʻū tohi ʻoku mau tokonakí. ʻOku mau tokonaki kia kinautolu ʻa e tatau ʻe 60 ʻo e ʻīsiu taki taha ʻo e Taua Leʻo mo e ʻĀ Hake!” ʻOku tohi ha toe fakatahaʻanga ʻe taha: “ʻOku mau tokangaʻi ha pilīsone ʻa ia ʻoku ʻi ai ʻa e fanga kiʻi laipeli ʻe 20. Naʻa mau tokonaki ki he laipeli taki taha ʻemau ʻū tohi tefitó. Naʻe aʻu ʻa e lahi ʻo e meʻá ni ki he puha tohi ʻe 20.” ʻI he pilīsone ʻe taha, ʻoku tauhi ai ʻe he kau kaʻaté ha faile ʻo ʻetau ʻū makasiní ʻi he laipelí koeʻuhi ke lava ʻo maʻu ʻaonga ʻa e kau pōpulá mei he ʻīsiu kotoa pē.

ʻI he 2002 naʻe fokotuʻu ai ʻe he ʻōfisi vaʻa ʻi ʻIukalainé ha Potungāue Pilīsone. ʻI he aʻu mai ki he taimi ní, kuo fetuʻutaki ʻa e potungāué ki he pilīsone ʻe 120 nai pea kuo vaheʻi ʻa e ngaahi fakatahaʻanga ke nau tokangaʻi kinautolu. ʻI he māhina kotoa ʻoku maʻu ai ʻa e tohi ʻe 50 nai mei he kau pōpulá, ko e lahi taha ʻo kinautolú ʻoku nau kole ha ʻū tohi pe kole ki ha ako Tohi Tapu. ʻOku ʻave ki ai ʻe he vaʻá ʻa e ʻū tohi, makasini mo e polosiua kae ʻoua leva kuo lava ʻo fetuʻutaki kiate kinautolu ʻa e fanga tokoua fakalotofonuá.

“Manatua ʻa kinautolu ʻoku nofo pilisone,” ko e tohi ia ʻa e ʻapositolo ko Paulá ki hono kaungā Kalisitiané. (Hepelu 13:3) Naʻá ne ʻuhingá ki he faʻahinga naʻe tuku pōpula koeʻuhí ko ʻenau tuí. ʻI he ʻahó ni, ʻoku manatuʻi ʻe he Kau Fakamoʻoni ʻa Sihová ʻa e faʻahinga ʻoku tuku pilīsoné, ʻaʻahi ki he ngaahi pilīsoné pea “fanongonongo ʻa e tukuange ki he popula.”​—Luke 4:​18.

[Fakamatala ʻi lalo]

[Fakatātā ʻi he peesi 9]

ʻĀ pilīsone ʻi L’viv, ʻIukalaine

[Fakatātā ʻi he peesi 10]

Mīkola

[Fakatātā ʻi he peesi 10]

Ko Vēsili mo hono uaifí, ko ʻIlina

[Fakatātā ʻi he peesi 10]

Vikitā