Ko Hai ʻOku Mou Talangofua ki Aí—Ko e ʻOtuá pe ko e Tangatá?

“ʻOku totonu pe ke fai ki he pule ʻa e ʻOtua ʻi he pule ʻa e tangata.”—NGĀUE 5:29.

1. (a) Ko e hā ʻa e konga tohi ko e kaveinga ia ki he ako ko ení? (e) Ko e hā naʻe ʻave ai ʻa e kau ʻapositoló ʻo tauhi fakalaó?

 KO E kau fakamaau ʻo e fakamaauʻanga māʻolunga faka-Siú kuo pau pē naʻa nau ʻita lahi. Naʻe pulia ʻa e kau pōpulá. Ko e kau ʻapositolo kinautolu ʻa Sīsū Kalaisi, ko ha tangata ʻa ia naʻe fakahalaiaʻi ki he mate ʻe he fakamaauʻanga māʻolungá ʻi ha ngaahi uike siʻi ki muʻa ange. Naʻe mateuteu he taimi ko ení ʻa e fakamaauʻangá ke fai ha ngāue ki hono kau muimui ofi tahá. Ka ʻi he ʻalu atu ʻa e kau kaʻaté ke ʻomi kinautolú, naʻa nau ʻiloʻi ai ne halaʻatā ha taha ʻi honau ngaahi pilīsoné, neongo naʻe lokaʻi pē ʻa e ngaahi matapaá. Naʻe vave hono ʻiloʻi ʻe he kau kaʻaté ʻoku ʻi he temipalé ʻi Selusalema ʻa e kau ʻapositoló, ʻo akoʻi taʻemanavahē ʻa e kakaí fekauʻaki mo Sīsū Kalaisi—ʻa e ngāue tofu pē ko ia naʻe puke ai kinautolú! Naʻe hangatonu ai pē ʻa e kau kaʻaté ki he temipalé, ʻo fakafoki ʻa e kau ʻapositoló ki hono tauhi fakalaó, pea ʻomai kinautolu ki he fakamaauʻangá.—Ngāue 5:​17-​27.

 2. Ko e hā naʻe fekauʻi ʻe ha ʻāngelo ʻa e kau ʻapositoló ke nau faí?

² Naʻe tukuange ʻe ha ʻāngelo ʻa e kau ʻapositoló mei pilīsone. Naʻe fai ení ke fakahaofi ai kinautolu mei ha fakatanga lahi ange? ʻIkai. Naʻe fai iá koeʻuhi ke fanongo ʻa e kakai ʻo Selusalemá ki he ongoongo lelei fekauʻaki mo Sīsū Kalaisí. Ko e fakahinohino ʻa e ʻāngeló ki he kau ʻapositoló ke nau “malangaʻaki ki he kakai ʻa e ngaahi folofola kotoa pē ʻo e moʻui.” (Ngāue 5:​19, 20) Ko ia ʻi he taimi naʻe aʻu atu ai ʻa e kau kaʻate ʻo e temipalé, naʻa nau maʻu atu ʻa e kau ʻapositoló ʻoku nau fakahoko talangofua ʻa e fekau ko iá.

3, 4. (a) ʻI hono tuʻutuʻuniʻi ke tuku ʻa e malangá, naʻe anga-fēfē ʻa e tali ʻa Pita mo Sioné? (e) Naʻe anga-fēfē ʻa e tali ʻa e kau ʻapositolo kehé?

 ³ Ko e toko ua ʻo e kau malanga tuʻukāivi ko iá, ko e ʻapositolo ko Pitá mo Sione, ʻa ia naʻá na ʻi he fakamaauʻangá ki muʻa, ʻi he fakamanatu fefeka kiate kinaua ʻe he tuʻi fakamaau lahi, ko Siosefa Kaiafasí. Naʻá ne pehē: “Naʻa mau matuʻaki fekau kiate kimoutolu ke ʻoua te mou akoʻaki ʻa e hingoa ni [ʻo Sīsuú], pea ko eni kuo mou fakafonu ʻa Selusalema ʻaki hoʻomou akonaki.” (Ngāue 5:28) Naʻe ʻikai totonu ke ʻohovale ʻa Kaiafasi ʻi he sio kia Pita mo Sione ʻokú na toe ʻi he fakamaauʻangá. ʻI hono fekauʻi ke tuku ʻena malangá ʻi he ʻuluaki taimí, naʻe tali ange ʻe he ongo ʻapositoló: “Mou meʻa lelei pe ki ai, pe ko e fē ʻoku totonu ʻi he finangalo ʻo e ʻOtua, ʻa ʻema talangofua kiate kimoutolu, pe ki he ʻEne ʻAfio. He ʻe ʻikai te ma faʻa tuku ʻema lea ki he ngaahi meʻa naʻa ma sio ki ai mo fanongoa.” ʻI he hangē ko e palōfita ko Selemaia ʻi he kuonga muʻá, naʻe ʻikai lava ʻo taʻofi ʻe Pita mo Sione ʻena fakahoko ʻa e fekau ke na malangá.—Fakaʻītali ʻamautolu; Ngāue 4:​18-20; Selemaia 20:9.

⁴ ʻI he taimi ko ení, naʻe ʻikai ko Pita pē mo Sione ka ko e kau ʻapositoló kotoa—ʻo kau ai ʻa Mataiasi naʻe toki fili foʻoú—naʻa nau maʻu ʻa e faingamālie ke fakahaaʻi ʻa honau tuʻungá ʻi he fakamaauʻangá. (Ngāue 1:​21-26) ʻI hono tuʻutuʻuniʻi ke tuku ʻa e malangá, naʻa nau tali loto-toʻa foki mo kinautolu: “ʻOku totonu pe ke fai ki he pule ʻa e ʻOtua ʻi he pule ʻa e tangata.”—Fakaʻītali ʻamautolu; Ngāue 5:29.

Talangofua ki he ʻOtuá pe ko e Tangatá?

5, 6. Ko e hā naʻe ʻikai talangofua ai ʻa e kau ʻapositoló ki he tuʻutuʻuni ʻa e fakamaauʻangá?

⁵ Ko e kau ʻapositoló ko e kau tangata tauhi lao ʻa ia ʻe ʻikai te nau talangataʻa ʻi he tuʻunga anga-mahení ki ha tuʻutuʻuni fakaefakamaauʻanga. Kae kehe, ʻoku ʻikai ha tangata, tatau ai pē pe ko e hā hono mālohí, ʻe fakamafaiʻi ke ne tuʻutuʻuniʻi ha taha kehe ke ne talangataʻa ki he taha ʻo e ngaahi fekau ʻa e ʻOtuá. Ko Sihova ʻa e “Fugani Maoluga i mamani kotoabe.” (Sāme 83:​18, PM) ʻOku ʻikai ngata pē ʻi heʻene hoko ko e “Tuʻi Fakamāu ʻo mamani katoa” ka ko e toe Tokotaha Foaki-Lao Aoniu ia, pea ko e Tuʻi foki ia ʻo ʻitānití. Ko ha tuʻutuʻuni fakaefakamaauʻanga pē ʻoku feinga ke ne kaniseli ʻa e taha ʻo e ngaahi fekau ʻa e ʻOtuá ʻoku taʻeʻaonga ia ʻi he vakai mai ʻa e ʻOtuá.—Senesi 18:25; Aisea 33:22.

⁶ Ko e moʻoniʻi meʻa ko ení kuo lāuʻilo ki ai ʻa e niʻihi ʻo e kau mataotao lelei taha fakaelaó. Ko e fakatātaá, ko e fakamaau Pilitānia ʻiloa ʻi he senituli hono 18 ko William Blackstone naʻá ne tohi ʻo pehē, ʻoku ʻikai totonu ke fakaʻatā ha lao fakaetangata ke fepaki mo e “lao ʻo e meʻa fakahā” ʻa ia ʻoku maʻu ʻi he Tohi Tapú. Ko ia ai, naʻe fakalaka ʻa e Sanetalimí ia ʻi he tuʻunga totonú ʻi heʻene tuʻutuʻuniʻi ko ia ʻa e kau ʻapositoló ke tuku ʻenau malangá. Ko e kau ʻapositoló naʻe ʻikai pē lava ke nau talangofua ki he tuʻutuʻuni ko iá.

 7. Ko e hā naʻe fakaʻitaʻi ai ʻe he ngāue fakamalangá ʻa e kau taulaʻeiki lahí?

⁷ Ko e fakapapau ʻa e kau ʻapositoló ke hokohoko atu ʻa e malangá naʻe fakaʻitaʻi ai ʻa e kau taulaʻeiki lahí. Ko e kau mēmipa ʻe niʻihi ʻo e tuʻunga taulaʻeikí, ʻo kau ai ʻa Kaiafasi tonu, ko e kau Sātusi kinautolu, ʻa ia naʻe ʻikai te nau tui ki he toetuʻú. (Ngāue 4:​1, 2; 5:​17) Neongo ia, naʻe hanganaki vilitaki pē ʻa e kau ʻapositoló ʻi he pehē naʻe toetuʻu ʻa Sīsū mei he maté. Tānaki atu ki ai, naʻe feinga lahi ʻa e niʻihi ʻo e kau taulaʻeiki lahí ke maʻu ʻa e leleiʻia ʻa e kau maʻu mafai Lomá. ʻI he taimi naʻe ʻoange ai ʻa e faingamālie ʻi hono fakamāuʻi ʻo Sīsuú ke nau tali ʻa Sīsū ko honau tuʻí, naʻe aʻu ʻo kalanga ʻa e kau taulaʻeiki lahí: “ʻOku ʻikai hamau tuʻi, ko Sisa pē.” (Sione 19:15) a ʻIkai ngata pē ʻi hono fakapapauʻi ʻe he kau ʻapositoló kuo toetuʻu ʻa Sīsuú ka naʻa nau faiakoʻaki ʻo pehē ka ʻikai ʻa e huafa ʻo Sīsuú, “oku ikai ke tuku mo ha higoa ki he kakai i lalo lagi, ke tau moui ai.” (Ngāue 2:36; 4:​12, PM) Naʻe manavahē ʻa e kau taulaʻeikí, he kapau naʻe kamata ke hanga ʻa e kakaí kia Sīsū kuo toetuʻú ko honau Takí ia, ʻe haʻu nai ʻa e kau Lomá pea ʻe lava ke mole ai mei he kau taki Siú ‘honau fonuá mo honau puleʻangá fakatouʻosi.’—Sione 11:48.

 8. Ko e hā ʻa e faleʻi fakapotopoto naʻe fai ʻe Kāmelieli ki he Sanetalimí?

⁸ Naʻe hā ngali fakapōpōʻuli ʻa e kahaʻú ki he kau ʻapositolo ʻa Sīsū Kalaisí. Ko e kau fakamaau ʻo e Sanetalimí naʻa nau fakapapauʻi ke tāmateʻi  kinautolu. (Ngāue 5:33) Kae kehe, naʻe liliu taʻeʻamanekina ʻa e ngaahi meʻá. Ko Kāmelieli, ko ha mataotao ʻi he Laó, naʻá ne tuʻu hake ʻo fakatokanga ki hono kaungāngāué ke ʻoua te nau fai fakavave ha meʻa. Naʻá ne fakahaaʻi fakapotopoto: “Kapau ʻoku mei he tangata ʻa e fakakaukau ko eni mo e ngāue ni, ʻe ngata: ka ʻo kapau ʻoku mei he ʻOtua, ʻe ʻikai te mou lava ke fakangata kinautolu.” Naʻe tānaki atu leva ki ai ʻe Kāmelieli ha meʻa mahuʻinga: “Kaeʻumaʻā foki naʻa ʻiloange ʻoku mou tauʻi ʻa e ʻOtua.”—Ngāue 5:​34, 38, 39.

 9. Ko e hā ʻokú ne fakamoʻoniʻi ko e ngāue ʻa e kau ʻapositoló naʻe mei he ʻOtuá?

⁹ Ko e meʻa taʻeʻamanekiná, naʻe tali ʻe he fakamaauʻangá ʻa e faleʻi ʻa Kāmelielí. Naʻe hanga ʻe he Sanetalimí ʻo “ui ange ʻa e kau Aposetolo ʻo haha, ʻo nau fekau ke ʻoua te nau toe malangaʻaki ʻa e huafa ʻo Sisū, ʻo nau toki tuku ange.” Kae kehe, ʻi he ʻikai ʻaupito te nau manavaheé, naʻe fakapapauʻi ʻe he kau ʻapositoló ke nau talangofua ki he fekau fakaeʻāngelo ke nau malangá. Ko ia ai, ʻi he hili honau tukuangé, “ko e ʻaho kotoa pē, ʻi he Temipale pea ʻi ʻapi, naʻe ʻikai tuku [ʻe he kau ʻapositoló] ʻenau ako mo malangaʻaki ʻa Sisu, ko e Misaia ia.” (Ngāue 5:​40, 42) Naʻe tāpuakiʻi ʻe Sihova ʻenau ngaahi feingá. ʻO aʻu ki he tuʻunga fē? “Naʻe tupu maʻu pē ʻa e folofola ʻa e ʻOtua; pea fakatokolahi ʻaupito ʻa e lau ʻo e kau ako ʻi Selusalema.” Ko hono moʻoní, “ko e fuʻu tokolahi ʻo e kau taulaʻeiki naʻa nau fakavaivaiʻi kinautolu ʻo tui.” (Ngāue 6:7) He fakatupu lōmekina ē kuo pau pē naʻe hoko ki he kau taulaʻeiki lahí! Naʻe fakautuutu ʻa e fakamoʻoni: Ko e ngāue ʻa e kau ʻapositoló ko e moʻoni naʻe mei he ʻOtuá!

Ko e Kau Faitau ki he ʻOtuá Heʻikai Lava Ke Nau Lavameʻa

10. Mei ha vakai fakaetangatá, ko e hā nai naʻe ongoʻi malu ai ʻa Kaiafasi ʻi hono tuʻungá, ka ko e hā naʻe hala ai ʻa ʻene falalá?

¹⁰ ʻI he ʻuluaki senitulí, naʻe fakanofo ai ʻa e kau taulaʻeiki lahi faka-Siú ʻe he kau maʻu mafai Lomá. Ko e tuʻumālie ko Siosefa Kaiafasí naʻe fokotuʻu ia ki hono tuʻungá ʻe Valeliasi Kalatusi, pea naʻá ne maʻu ʻa e lakanga ko iá ʻo lōloa ange ia ʻi he tokolahi ʻo e faʻahinga naʻe ʻi muʻa ʻiate iá. ʻOku ngalingali naʻe tuku ʻe Kaiafasi ʻa e lavameʻa ko ení ki heʻene pōtoʻi ʻi he tuʻunga ko ha fakafofonga ki mulí pea mo ʻene kaungāmeʻa fakafoʻituitui mo Pailató kae ʻikai ko e kau mai ʻa e ʻOtuá. ʻI ha tuʻunga pē, naʻe fakamoʻoniʻi naʻe hala ʻa ʻene falala ki he tangatá. ʻI he taʻu pē ʻe tolu mei he hā ʻa e kau  ʻapositoló ʻi he ʻao ʻo e Sanetalimí, naʻe mole ai ʻa e leleiʻia ʻa e kau maʻu mafai Lomá ʻia Kaiafasi pea naʻe toʻo ia mei he taulaʻeiki lahí.

11. Ko e hā ʻa e ikuʻanga naʻe hoko kia Ponitō Pailato mo e fokotuʻutuʻu ʻo e ngaahi meʻa faka-Siú, pea ko e hā ʻa e fakamulituku ʻokú ke maʻu mei hení?

¹¹ Ko e tuʻutuʻuni ke toʻo ʻa Kaiafasi mei hono lakangá naʻe haʻu ia mei he pule tonu ʻo Pailató, ko Lusiasi Viteliasi, ko e kōvana ʻo Sīliá, pea naʻe ʻikai lava ke taʻofi ia ʻe he kaumeʻa ofi ʻo Kaiafasi ko Pailató. Ko hono moʻoní, ʻi he taʻu pē ʻe taha mei he tō ʻa Kaiafasí, naʻe toʻo ai ʻa Pailato tonu mei hono lakangá pea naʻe toe fiemaʻu ke ne foki ki Loma ke tali ki he ngaahi tukuakiʻi mamafa naʻe fai kiate iá. Ki he kau taki Siu naʻe tuku ʻenau falalá kia Sisá, naʻe toʻo moʻoni ʻe he kau Lomá ‘honau fonuá mo honau puleʻangá fakatouʻosi.’ Naʻe hoko eni ʻi he taʻu 70 T.S. ʻi he taimi naʻe fakaʻauha ʻosi ai ʻe he kau tau Lomá ʻa e kolo ko Selusalemá, ʻo kau ai ʻa e temipalé mo e holo ʻo e Sanetalimí. He moʻoni ē ko e ngaahi lea ʻa e tokotaha-tohi-sāmé ʻi he tuʻunga ko ení: “ʻOua ʻe tuʻu hoʻomou falala kia houʻeiki, ki ha hakoʻi tangata ʻoku ʻikai ai ha tokoni”!—Sione 11:48; Sāme 146:3.

12. ʻOku anga-fēfē hono fakamoʻoniʻi ʻi he tuʻunga ʻo Sīsuú ko e talangofua ki he ʻOtuá ʻa e ʻalunga ʻo e potó?

¹² ʻI hono kehé, naʻe fakanofo ʻe he ʻOtuá ʻa Sīsū Kalaisi naʻe toetuʻú ko e Taulaʻeiki Lahi ʻo ha temipale fakalaumālie lahi. ʻOku ʻikai ha tangata ʻe lava ke ne kaniseli ʻa e fakanofo ko iá. Ko e moʻoni, ko Sīsuú “ʻoku ʻikai liua ʻene lakanga taulaʻeiki.” (Hepelu 2:9; 7:​17, 24; 9:11) Naʻe toe fakanofo ʻe he ʻOtuá ʻa Sīsū ko e Fakamaau ia ʻo e kau moʻuí mo e kau pekiá. (1 Pita 4:5) ʻI he tuʻunga malava ko iá, ʻe fakapapauʻi ai ʻe Sīsū pe ʻe malava ke maʻu ʻe Siosefa Kaiafasi mo Ponitō Pailato ha moʻui ʻi he kahaʻú.—Mātiu 23:33; Ngāue 24:15.

Kau Malanga Taʻemanavahē ʻo e Puleʻangá ʻi Onopōní

13. ʻI onopooni, ko e hā ʻa e ngāue ʻoku fakamoʻoniʻi naʻe mei he tangatá, pea ko e hā ʻa e ngāue ʻoku fakamoʻoniʻi naʻe mei he ʻOtuá? ʻOku anga-fēfē hoʻo ʻiloʻí?

¹³ ʻI hotau ʻahó, hangē ko ia ʻi he ʻuluaki senitulí, kuo ʻikai tokosiʻi ai ʻa e kau “tauʻi ʻa e ʻOtua.” (Ngāue 5:39) Ko e fakatātaá, ʻi he taimi naʻe fakafisi ai ʻa e Kau Fakamoʻoni ʻa Sihova ʻi Siamané ke salute kia ʻAtolofi Hitilā ko honau Takí, naʻe fuakava ai ʻa Hitilā ke fakaʻauhamālie kinautolu. (Mātiu 23:10) Ko ʻene kau taú naʻe hā ngali feʻungaʻānoa ia ki he ngāué. Naʻe lavameʻa moʻoni ʻa e kau Nasí ʻi hono puke ʻa e laui afe ʻo e Kau Fakamoʻoní ʻo ʻave kinautolu ki he ngaahi kemi fakamamahí. Naʻe aʻu ʻo nau tāmateʻi ʻa e Kau Fakamoʻoni ʻe niʻihi. Ka naʻe ʻikai malava ʻe he kau Nasí ʻo maumauʻi ʻa e fakapapau ʻa e Kau Fakamoʻoní ke lotu ki he ʻOtuá tokotaha peé, pea naʻe ʻikai te nau malava ke fakangata ʻosi ʻa e kau sevāniti ʻa e ʻOtuá ʻi he tuʻunga ko ha kulupú. Ko e ngāue ʻa e kau Kalisitiane ko ení naʻe mei he ʻOtuá, ʻikai ko e tangatá, pea ko e ngāue ʻa e ʻOtuá ʻe ʻikai lava ke liua ia. ʻI he taʻu ʻe onongofulu ki mui aí, ko e kau hao moʻui faitōnunga mei he ngaahi kemi fakamamahi ʻa Hitilaá ʻoku nau kei tauhi pē kia Sihova ‘ʻaki ʻa e kotoa ʻo honau lotó, mo e kotoa ʻo honau laumalié, mo e kotoa ʻo honau ʻatamaí,’ lolotonga ia ʻoku manatua pē ʻa Hitilā mo ʻene faʻahi Nasí ʻi heʻenau ngaahi ngāue fakamaá.—Mātiu 22:37.

14. (a) Ko e hā ʻa e ngaahi feinga kuo fai ʻe he kau fakafepakí ke lauʻikoviʻi loi ʻaki ʻa e kau sevāniti ʻa e ʻOtuá, pea ko e hā hono ngaahi olá? (e) ʻE ʻomai ʻe he ngaahi feinga ko iá ha maumau tuʻuloa ki he kakai ʻa e ʻOtuá? (Hepelu 13:​5, 6)

¹⁴ ʻI he ngaahi taʻu talu mei he ngaahi feinga ʻa e kau Nasí, kuo kau ai ʻa e niʻihi kehe ʻi he faitau ʻulungia kia Sihova mo ʻene kakaí. ʻI ha ngaahi fonua lahi ʻi ʻIulope, kuo feinga ai ʻa e ngaahi ʻelemēniti kākā fakalotu mo fakapolitikalé ke fakaʻilongaʻi ʻa e Kau Fakamoʻoni ʻa Sihová ko ha ‘lotu mavahe fakatuʻutāmaki,’ ʻa e tukuakiʻi tatau ko ia naʻe fakahanga ki he kau Kalisitiane ʻi he ʻuluaki senitulí. (Ngāue 28:​22, NW) Ko hono moʻoní,  kuo fakahaaʻi ʻe he Fakamaauʻanga ʻIulope ki he Ngaahi Totonu ʻa e Tangatá ko e Kau Fakamoʻoni ʻa Sihová ko ha lotu, ʻo ʻikai ko ha lotu mavahe. Kuo pau pē ʻoku ʻiloʻi ia ʻe he kau fakafepakí. Neongo ia, ʻoku nau kei kīvoi pē ʻi hono lauʻikoviʻi loi ʻa e Kau Fakamoʻoní. Ko ha ola fakahangatonu ʻo e fakamatala hala ko ení, kuo tuku ki tuʻa ai ʻa e niʻihi ʻo e kau Kalisitiane ko ení mei heʻenau ngāué. Kuo fakahohaʻasi ai ʻa e fānau Fakamoʻoní ʻi he ngaahi ʻapiakó. Kuo kaniseli ʻe he kau maʻu kelekele manavaheé ʻa e ngaahi aleapau ki he ngaahi fale kuo ngāueʻaki ʻe he Kau Fakamoʻoní ʻi he ngaahi taʻu lahi ko e ngaahi faiʻanga fakatahá. ʻI ha ngaahi keisi siʻi, kuo aʻu ʻo fakaʻikaiʻi ai ʻe he ngaahi kautaha fakapuleʻangá ʻa e tuʻunga tangataʻifonuá ki he faʻahinga tāutaha ʻo makatuʻunga ʻataʻatā pē ʻi heʻenau hoko ko e Kau Fakamoʻoni ʻa Sihová! Neongo ia, ʻoku ʻikai holomui ʻa e Kau Fakamoʻoní.

15, 16. Kuo anga-fēfē ʻa e tali ʻa e Kau Fakamoʻoni ʻa Sihova ʻi Falaniseé ki he fakafepaki ki heʻenau ngāue faka-Kalisitiané, pea ko e hā ʻoku nau hokohoko atu ai pē ʻa e malangá?

¹⁵ Ko e fakatātaá, ʻi Falanisē, ko e kakaí ʻi he tuʻunga fakalūkufuá ʻoku nau fakaʻatuʻi mo ʻikai tomuʻa fehiʻa. Kae kehe, ko e kau fakafepaki tokosiʻi kuo nau pouaki ʻa e ngaahi lao kuo fakataumuʻa ki hono taʻofi ʻa e ngāue ʻo e Puleʻangá. Kuo anga-fēfē ʻa e tali ʻa e Kau Fakamoʻoni ʻa Sihova ʻi aí? Kuo nau fakalahi ʻenau ngāue ʻi he malaʻe ngāué ʻo laka ia ʻi ha toe taimi ki muʻa fakataha mo e ngaahi ola fakafiefia. (Semisi 4:7) He ko ē, ʻi ha vahaʻa taimi pē ʻe taha ʻo e māhina ʻe ono, kuo tupulaki ai ʻa e fika ʻo e ngaahi ako Tohi Tapu ʻi ʻapí ʻaki ha peseti fakaofo ʻe 33 ʻi he fonua ko iá! Kuo pau pē ʻoku fakatupuʻita ki he Tēvoló ke sio ki he faʻahinga loto-totonu ʻi Falaniseé ʻoku nau tali ʻa e ongoongo leleí. (Fakahā 12:17) Ko hotau kaungā Kalisitiane ʻi Falaniseé ʻoku nau falala-pau ko e ngaahi lea ʻa e palōfita ko ʻAiseá ʻe hoko moʻoni ia ʻi honau tuʻungá: “ʻIlonga ha mahafu ʻoku faʻu ke fai ʻaki ha kovi kiate koe, ʻe ʻikai siaʻa; pea ʻilonga ha ʻelelo ʻoku hopo mo koe ʻi he fakamaau, te ke fakahalaia.”—Aisea 54:17.

¹⁶ ʻOku ʻikai fiefia ʻa e Kau Fakamoʻoni ʻa Sihová ʻi he hoko ʻo fakatangaʻí. Kae kehe, ʻi he talangofua ki he fekau ʻa e ʻOtuá ki he kau Kalisitiane kotoa peé, heʻikai lava pea ʻe ʻikai tuku ʻenau lea ʻo fekauʻaki mo e ngaahi meʻa kuo nau fanongoá. ʻOku nau feinga ke hoko ko e kau tangataʻifonua lelei. Kae kehe, ʻi he taimi ʻoku ʻi ai ai ha fepaki ʻi he vahaʻa ʻo e lao ʻa e ʻOtuá mo e lao ʻa e tangatá, kuo pau ke nau talangofua ki he ʻOtuá ʻi hono tuʻunga ko e pulé.

ʻOua ʻe Manavahē Kiate Kinautolu

17. (a) Ko e hā ʻoku ʻikai fiemaʻu ai ke tau manavahē ki hotau ngaahi filí? (e) Ko e hā ʻoku totonu ke hoko ko ʻetau fakakaukau ia ki he kau fakatangá?

¹⁷ Ko hotau ngaahi filí ʻoku nau ʻi ha tuʻunga fakatuʻutāmaki ʻaupito. ʻOku nau faitau ki he ʻOtuá. Ko ia ai, ʻi he fehoanaki mo e fekau ʻa Sīsuú, ʻi he ʻikai ke manavahē kiate kinautolú, ʻoku tau lotua ʻa e faʻahinga ʻoku nau fakatangaʻi kitautolú. (Mātiu 5:44) ʻOku tau lotu kapau ʻoku ʻi ai ha niʻihi ʻoku fakafepaki ki he ʻOtuá ʻi he taʻeʻilo, ʻo hangē ko ia ko Saula ʻo Tāsusí, ʻe hanga ʻe Sihova ʻo fakaʻā ʻi he manavaʻofa ʻa honau matá ki he moʻoní. (2 Kolinito 4:4) Naʻe hoko ʻa Saula ko e ʻapositolo Kalisitiane ko Paulá pea naʻá ne faingataʻaʻia lahi ʻi he nima ʻo e kau maʻu mafai ʻi hono ʻahó. Neongo ia, naʻá ne hanganaki fakamanatu ki he kaungātuí “ke nau anganofo ki he ngaahi pule maʻolunga, mo e ngaahi tuʻunga; ke nofo talangofua pe; ke nofo teu ki he ngaue lelei kotoa pe: ke ʻoua te nau lauʻikovi ha taha [ʻikai, ʻo aʻu ki honau kau fakatanga kakaha tahá]: ke ʻoua naʻa ko e kau veipā, ka ko e kau fakaʻatūʻi pe, ʻo matuʻaki faiʻaki ʻa e angakataki ki he kakai kotoa pe.” (Taitusi 3:​1, 2) Ko e Kau Fakamoʻoni ʻa Sihova ʻi Falaniseé pea mo ha feituʻu pē ʻoku nau feinga ke tokanga ki he akonaki ko ení.

18. (a) ʻI he ngaahi founga fē ʻe fakahaofi nai ai ʻe Sihova ʻa hono kakaí? (e) Ko e hā ʻe hoko ko e ola fakaʻosí?

¹⁸ Naʻe tala ʻe he ʻOtuá ki he palōfita ko  Selemaiá: “ʻOku ou ʻiate koe ke fai ho fakahaofi.” (Selemaia 1:8) ʻE lava fēfē ke fakahaofi kitautolu ʻe Sihova he ʻahó ni mei he fakatangá? Te ne fokotuʻu hake nai ha fakamaau ʻikai tomuʻa fehiʻa hangē ko Kāmelielí. Pe te ne fakapapauʻi nai ke fetongi taʻeʻamanekina ha ʻōfisa kākā pe fakafepaki ʻaki ha tokotaha ʻoku anga-fakaʻatuʻi angé. Ko ia ai, ʻi he taimi ʻe niʻihi, ʻe fakangofua nai ai ʻe Sihova ke hokohoko atu ʻa hono fakatangaʻi ʻa hono kakaí. (2 Timote 3:12) Kapau ʻoku fakaʻatā ʻe he ʻOtuá ke fakatangaʻi kitautolu, te ne ʻomai maʻu pē kiate kitautolu ʻa e mālohi ke kātakiʻiʻaki ʻa e fakatangá. (1 Kolinito 10:13) Pea tatau ai pē pe ko e hā ʻoku fakaʻatā ʻe he ʻOtuá, ʻoku ʻikai haʻatau veiveiua ki he ola fakaʻosí: Ko e faʻahinga ʻoku nau faitau ki he kakai ʻa e ʻOtuá ʻoku nau faitau ki he ʻOtuá, pea ko e kau faitau ki he ʻOtuá ʻe ʻikai te nau ikuna.

19. Ko e hā ʻa e konga tohi fakataʻu ki he 2006, pea ko e hā ʻoku feʻungamālie ai iá?

¹⁹ Naʻe tala ʻe Sīsū ki heʻene kau ākongá ke nau ʻamanekina ʻa e fakamamahí. (Sione 16:33) ʻI he vakai ki hení, ko e ngaahi lea ʻoku lēkooti ʻi he Ngāue 5:29 kuo taimi tonu ʻaupito: “ʻOku totonu pe ke fai ki he pule ʻa e ʻOtua ʻi he pule ʻa e tangata.” ʻI he ʻuhinga ko iá, kuo fili ai ʻa e ngaahi lea fakaueʻiloto ko ení ke hoko ko e konga tohi fakataʻu ia ʻa e Kau Fakamoʻoni ʻa Sihová ki he 2006. Fakatauange ke hoko ko ʻetau fakapapaú ia ʻi he lolotonga ʻa e taʻu ka hoko maí pea ʻi he kotoa ʻo ʻitānití ke talangofua ki he ʻOtuá ko e Pule ʻo tatau ai pē pe ko e hā ʻe hokó!

[Fakamatala ʻi lalo]

ʻE Lava Ke Ke Tali?

• Ko e hā ʻa e faʻifaʻitakiʻanga fakalototoʻa naʻe fokotuʻu ʻe he kau ʻapositoló maʻatautolu ʻi he founga ne nau fehangahangai ai mo e fakafepakí?

• Ko e hā ʻoku totonu ai ke tau talangofua maʻu pē ki he ʻOtuá ko e pule kae ʻikai ko e tangatá?

• Ko hotau kau fakafepakí ʻoku nau faitau moʻoní mo hai?

• Ko e hā ʻa e ola ʻe lava ke tau ʻamanekina ki he faʻahinga ʻoku nau kātakiʻi ʻa e fakatangá?

[Fehuʻi ki he Ako]

[Fakamatala ʻi he peesi 23]

Ko e konga tohi fakataʻu eni ki he 2006: “ʻOku totonu pe ke fai ki he pule ʻa e ʻOtua ʻi he pule ʻa e tangata.”​—Ngāue 5:29

[Fakatātā ʻi he peesi 19]

“ʻOku totonu pe ke fai ki he pule ʻa e ʻOtua ʻi he pule ʻa e tangata”

[Fakatātā ʻi he peesi 21]

Naʻe tuku ʻe Kaiafasi ʻa ʻene falalá ki he tangatá kae ʻikai ki he ʻOtuá