Ko Hono Tokoniʻi ʻa e Kakai Siaina ʻi Mekisikoú

“ʻE PUKE ʻe ha tuʻunga tangata ʻe toko hongofulu, mei he ngaahi lea kehekehe ʻo e ngaahi puleʻanga, ʻio te nau puke ki he kapaʻi kofu ʻo ha tangata Siu, heʻenau pehe, Te tau ō mo kimoutolu; he kuo mau fanongo ʻoku ʻiate kimoutolu ʻa e ʻOtua.” (Sakalaia 8:​23) ʻI he ʻahó ni, ʻoku fakahoko ai ʻa e kikite fakaʻofoʻofa ko ení ʻi he kotoa ʻo e māmaní. Ko e kakai “mei he ngaahi lea kehekehe ʻo e ngaahi puleʻanga” ʻoku nau piki ki he kau ʻIsileli fakalaumālié koeʻuhí ke nau lotu kia Sihova ko e ʻOtuá. ʻOku mahuʻingaʻia vēkeveke ʻa e Kau Fakamoʻoni ʻa Sihová ʻi he fakahoko ʻo e kikite ko ení. Ko e tokolahi ʻo kinautolú ʻoku nau ako ha toe lea ʻe taha koeʻuhi ke kau ai ʻi he ngāue fakamalanga ʻi māmani lahí.

ʻOku ʻikai toe kehe mei ai ʻa e Kau Fakamoʻoni ʻa Sihova ʻi Mekisikoú. ʻOku fakafuofua ko ha kakai lea faka-Siaina ʻe toko 30,000 ʻoku nofo ʻi Mekisikoú. ʻI he 2003, naʻe maʻu ai ʻe he toko 15 ʻo kinautolu ʻa e Fakamanatu ʻo e pekia ʻa Kalaisí naʻe fai ʻi he Kolo Mekisikoú. Ko ia naʻe hoko ai ʻa e Kau Fakamoʻoni ʻi Mekisikoú ʻo lāuʻilo ki he malava ko ia ke ʻi ai ʻa e tupu fakalaumālie ʻi he malaʻe ngāue faka-Siainá. Koeʻuhi ke maʻu ha kau malanga tokolahi ange ke nau tokangaʻi ʻa e kakai lea faka-Siaina ko ení, naʻe fokotuʻu ai ha koosi māhina ʻe tolu ke akoʻi ki he Kau Fakamoʻoni Mekisikoú ʻa e ngaahi tuʻuaki faingofua ʻi he lea Siaina faka-Meniteliní. ʻI he fakakātoá, ko e kau Fakamoʻoni ʻe toko 25 naʻa nau kau ki he kōsí. ʻI heʻene ʻosí, naʻe haʻu ai ha ʻōfisa mei he feituʻu lea faka-Menitelini ʻi he Kolo Mekisikoú ki he maʻu tohi fakamoʻoni akó, ʻi hono fakahaaʻi ʻa e kaunga mahuʻinga ʻo e kalasí ki he kakai lea faka-Siainá. Naʻe ʻoange ʻe he kautaha Siaina fakalotofonuá ki he toko tolu ʻo e kau akó ʻa e ngaahi sikolasipi ke nau folau ki muli ke fakaleleiʻi ai ʻenau lea faka-Siainá.

Ko e koosi leá naʻe kau ki ai ʻa e ako ʻaonga. Hili hono ako ʻo e ngaahi kupuʻi lea tefito ʻaupitó, naʻe kamata malanga leva ʻa e kau akó ʻi he lea faka-Siainá ʻi he vahefonua pisinisi ʻo e Kolo Mekisikoú. Ko e kau ako faivelengá naʻa nau kamata ha ngaahi ako Tohi Tapu ʻe 21. Ko e polosiua Ko e Hā ʻOku Fiemaʻu ʻe he ʻOtuá Meiate Kitautolú? ʻi he lea faka-Siainá fakataha mo e konga tohi naʻe liliu ki he ʻalafapeti faka-Lomá, naʻe ui ko e Pininí, naʻe tokoni lahi ia.

Naʻe anga-fēfē hono fai ʻe he Kau Fakamoʻoni ʻa ia naʻa nau toki kamata kau ʻi he koosi lea faka-Siainá ʻa e ngaahi ako Tohi Tapú? ʻUluakí, naʻe lava ke nau lea pē ʻo pehē, “Qing Du [Kātaki ʻo lau]” pea tuhu ki ha palakalafi pea toki hoko atu leva ki he fehuʻí. Hili hono lau ʻe he tokotahá pea tali ʻi he lea faka-Siainá, te nau pehē, “Shei shei [Mālō]” mo e, “Hen Hao [Sai ʻaupito].”

Naʻe kamata ha ako Tohi Tapu pehē ʻe taha mo ha fefine ʻa ia ko ha Kalisitiane lau pē. Hili ʻa e ako hono tolú, naʻe fifili ʻa e Fakamoʻoní pe naʻe mahinoʻi lelei ʻe he fefiné ʻa e fakamatalá. Ko ia naʻe ʻalu atu ai ʻa e Fakamoʻoní mo ha tokoua ʻa ia ko  ʻene lea tuʻufonuá ʻa e lea faka-Siainá. ʻI heʻene ʻeke ange ki he fefiné pe naʻe ʻi ai haʻane ngaahi fehuʻí, naʻe ʻeke ange ʻe he fefiné: “Ke hoko ʻo papitaisó, ʻoku fiemaʻu ia ke u poto he kakaú?”

ʻIkai fuoloa, naʻe fokotuʻu ha Ako Tohi Fakaefakatahaʻanga fakataha mo e kau maʻu fakataha naʻe fakaʻavalisi ki he kau lea faka-Siaina ʻe toko 9 mo e Kau Fakamoʻoni Mekisikou fakalotofonua ʻe toko 23. Naʻe ʻi he faʻahinga naʻe kau ki aí ha toketā Siaina, ʻa ia naʻá ne maʻu ʻa e makasini Taua Leʻo mo e ʻĀ Hake! ʻi he lea faka-Sipeiní mei he taha ʻo ʻene kau mahakí. Koeʻuhi naʻe ʻikai te ne lea faka-Sipeini, naʻá ne ʻai ai ha tokotaha ke ne liliu ange ha ngaahi sētesi kiate ia. ʻI hono ʻiloʻi ʻoku felāveʻi ʻa e ngaahi makasiní mo e Tohi Tapú, naʻá ne kole ange ai ki he tokotaha mahakí pe ʻe lava ke ne maʻu ʻa e ngaahi makasiní ʻi he lea faka-Siainá. Naʻá ne fai ia, pea fakafou ʻi he ʻōfisi vaʻa ʻo e Kau Fakamoʻoni ʻa Sihova ʻi Mekisikoú, naʻe fai ai ʻa e ngaahi fokotuʻutuʻu ki ha tokotaha Fakamoʻoni lea faka-Siaina ke ʻaʻahi kiate ia. Ko ʻene faʻeé ʻi Siaina naʻe ʻi ai ʻa ʻene Tohi Tapu, pea naʻe fiefia ʻa e toketaá ʻi hono lau iá. ʻI heʻene fili ke ʻalu ki Mekisikoú, naʻe tala ange ʻe heʻene faʻeé kiate ia ke ʻoua ʻe tuku ʻa hono lau ʻa e Tohi Tapú. Ko ia naʻá ne lotu ke ʻi ai ha taha ʻe lava ke ne tokoniʻi ia ke ne ako lahi ange ʻo fekauʻaki mo e ʻOtua ʻo e Tohi Tapú. Naʻá ne lea leʻo-lahi: “Kuo fanongo mai ʻa e ʻOtuá ki heʻeku ngaahi lotú!”

Naʻe toe kau ki he ako tohí ha fāmili Siaina naʻa nau nofo totongi ʻi ha ngaahi fale ʻo ha fefine Mekisikou ʻa ia naʻe ako Tohi Tapu mo e Kau Fakamoʻoni ʻa Sihová. Neongo naʻe mahinoʻi ʻe he fāmili Siainá ʻa e meʻa siʻisiʻi ʻaupito ʻi he lea faka-Sipeiní, naʻa nau kau ki he ngaahi fetalanoaʻaki Fakatohitapú. ʻI he faai atu ʻa e taimí, naʻe ʻeke ai ʻe he fāmilí ki he tokotaha Fakamoʻoni naʻá ne fai ʻa e akó pe naʻe ʻi ai haʻane ʻū tohi ʻi he lea faka-Siainá. Naʻe vave ʻa hono fai ʻo ha ako Tohi Tapu faka-Siaina mo kinautolú. ʻIkai fuoloa, naʻe fakahaaʻi ʻe he fāmilí ha holi ke malanga ki honau kaungā tangataʻifonuá pea ke fakatapui ʻenau moʻuí kia Sihova.

ʻOku moʻoni, ko e lea faka-Siainá ko ha lea faingataʻa ia ke ako. Kae kehe, hangē ko ia ʻoku hā ʻi he ngaahi hokosia naʻe lave ki ai ʻi muʻá, ʻi he tokoni ʻa Sihová ʻoku ako ai ʻa e kakai ʻo e ngaahi lea lahi, ʻo kau ai ʻa e lea faka-Siainá ʻi Mekisikou, ki he finangalo ʻo e ʻOtuá, pea pehē foki ki he ngaahi tafaʻaki kehe ʻo e māmaní.

[Fakatātā ʻi he peesi 17]

Ko ha kalasi lea faka-Siaina ʻi he Kolo Mekisikoú

[Fakatātā ʻi he peesi 18]

Ko ha tokotaha Fakamoʻoni Mekisikou ʻokú ne fai ha ako Tohi Tapu ʻi he lea faka-Siainá

[Fakatātā ʻi he peesi 18]

Ngāue fakafaifekau ʻi he matapā ki he matapā ʻi he lea faka-Siainá, he Kolo Mekisikoú