Taimi Kilisimasí—Ko e Hā ʻEne Fakamamafa Tefitó?

KI HE laui miliona ko e faʻahitaʻu ʻaho mālōloó ko ha taimi ia ke fakataha ai mo e fāmilí pea mo e ngaahi kaungāmeʻá, ko ha taimi ia ke fakafoʻou ai ʻa e ngaahi haʻi ʻo e ʻofá. ʻOku tokolahi ʻa e niʻihi ia ʻoku nau fakakaukau ki ai ko ha taimi ia ke fakalaulauloto ai ki hono ʻaloʻi ʻo Sīsū Kalaisí pea mo hono fatongia ʻi hono fakahaofi ʻa e faʻahinga ʻo e tangatá. ʻI Lūsia, ʻi he ʻikai hangē ko e ngaahi fonua lahi kehé, ko hono kātoangaʻi ʻo e Kilisimasí naʻe ʻikai maʻu pē ko ha meʻa ia naʻe fakangofua ke fai ʻe he kakaí. Neongo naʻe kātoangaʻi fakahāhā ʻi he laui senituli ʻe he faʻahinga ʻo e Siasi ʻOfotokisī Lūsiá ʻa e Kilisimasí, naʻe ʻikai ngofua ke nau fai pehē ʻi he lahi taha ʻo e senituli hono 20. Ko e hā naʻá ne fakatupunga ʻa e liliú?

ʻI he hili pē ko ia ʻa e liukava ʻa e Kominiusi Bolshevik ʻi he 1917, naʻe fokotuʻu ai ʻe he kau maʻu mafai ʻo e Sovietí ha lao fakaaoao ʻo e fakaʻikaiʻi-ʻOtuá ʻi he kotoa ʻo e puleʻangá. Ko e faʻahitaʻu ʻaho mālōlō Kilisimasí fakakātoa fakataha mo hono ngaahi ʻuhinga fakalotú naʻe hoko ʻo ʻikai tali ia. Naʻe kamata ke fakamafola ʻe he Puleʻangá ha fakamatala fakangalilelei ʻo fakafepakiʻi ʻa e ongo kātoanga Kilisimasí mo e Taʻu Foʻoú. Naʻe toe fakahalaiaʻi fakahāhā ʻa e ngaahi fakaʻilonga fakalotofonua ʻo e faʻahitaʻú—ko e ʻakau Kilisimasí mo Ded Moroz, pe Kui Tangata Falōsite, ko hono ui tatau faka-Lūsia ia ʻo e Santa Claus.

ʻI he 1935, naʻe hoko ai ha liliu ʻa ia naʻe liliuʻi lahi ai ʻa e founga ʻo hono kātoangaʻi ʻe he kau Lūsiá ʻa e faʻahitaʻu ʻaho mālōloó. Naʻe toe fakaʻatā ai ʻe he kau Sovietí ʻa Kui Tangata Falōsite, ko e ʻakau ʻo e faʻahitaʻú mo e kātoanga Taʻu Foʻoú—kae fakataha mo ha foʻi mioʻi mahuʻinga. Naʻe pehē ko Kui Tangata Falōsite, te ne ʻomi ʻa e ngaahi meʻaʻofá, ʻo ʻikai ʻi he Kilisimasí, ka ʻi he ʻAho Taʻu Foʻoú. ʻI he tuʻunga meimei tatau, ʻe ʻikai ke kei ʻi ai ha ʻakau Kilisimasi. ʻE hoko ia ko ha ʻakau Taʻu Foʻou! Ko ia ai, naʻe ʻi ai ha liliu lahi ʻo e tuʻunga fakamamafá ʻi he Sovieti ʻIunioní. Ko hono olá, naʻe fetongi ai ʻe he kātoangaʻi ʻo e Taʻu Foʻoú ʻa e Kilisimasí.

Naʻe hoko ʻa e faʻahitaʻu Kilisimasí ko ha taimi kātoanga fakamāmani ʻataʻatā pē ia, ʻo toʻo fakaʻofisiale mei ai ha faʻahinga ʻuhinga fakalotu pē. Naʻe teuteuʻi ʻa e ʻakau Taʻu Foʻoú, ʻo ʻikai ʻaki ʻa e ngaahi meʻa teuteu fakalotu, ka ko e ngaahi meʻa fakamāmani ʻo fakahaaʻi ai ʻa e fakalakalaka ʻo e Sovieti ʻIunioní. ʻOku fakamatalaʻi ʻe he pepa Lūsia ko e Vokrug Sveta (Takatakai he Māmaní): “ʻOku malava ke toe fakatotoloʻi ʻa e hisitōlia ʻo hono fokotuʻu ʻo ha sōsaieti Kominiusí fakafou he ngaahi teuteu ʻo e ʻakau Taʻu Foʻou ʻo e ngaahi taʻu kehekehe ʻo e kuonga Sovietí. Fakataha mo e fanga kiʻi lāpisi, fanga kiʻi konga ʻaisi poloká mo e ngaahi foʻi mā fuopotopoto anga-mahení, naʻe ngaohi mo e ngaahi teuteu ʻi he fōtunga ʻo e hele pikó, hāmalá mo e ngaahi tulekitoá. Naʻe toki fetongi ʻa e ngaahi meʻá ni ki muí ni ʻe he ngaahi tā tongitongi ʻo e kau keli koulá mo e kau ʻalu vavaá, ngaahi naunau keli loló, lōketí mo e fanga kiʻi meʻalele fakalele puha ʻuhila ʻi he māhiná.”

Kae fēfē ʻa e ʻAho Kilisimasí ia ʻiate ia pē? Naʻe ʻikai moʻoni ke tali ia. ʻI hono kehé, naʻe tuku hifo ia ʻe he maʻu mafai Sovietí ki he tuʻunga ko ha ʻaho ngāue anga-maheni ia. Ko e faʻahinga naʻa nau fakaʻamu ke pukepuke ʻa e kātoanga fakalotu ʻo e Kilisimasí naʻe lava ke nau fai pehē pē ʻo fakapotopoto ʻaupito, ʻo nau ʻi ha tuʻunga fakatuʻutāmaki ai ʻi hono taʻefakafiemālieʻi ʻa e Puleʻangá pea mo e ngaahi nunuʻa kovi. ʻIo, ʻi Lūsia ʻo e senituli hono 20, naʻe ʻi ai ha kiʻi liliu ʻi he fakamamafa ʻo e faʻahitaʻu ʻaho mālōloó, mei he anga ʻo e vakai fakalotú ʻo aʻu ki he kātoanga fakamāmaní.

Ko ha Kiʻi Liliu ki Muí Ni Mai

ʻI he 1991 naʻe ngata ai ʻa e Sovieti ʻIunioní pea naʻe maʻu ai ʻe he kakaí ʻa e tauʻatāina lahi ange. Naʻe pulia atu ai ʻa e lao Fakapuleʻanga ʻo e fakaʻikaiʻi-ʻOtuá. Naʻe lahilahi fakamāmani  pē ʻa e ngaahi puleʻanga hau naʻe toki fokotuʻu foʻou kehekehe, fakataha mo ha mavaeua ʻa e Siasí mo e Puleʻangá. Naʻe ongoʻi ʻe he kakai hehema fakalotu tokolahi te nau lava he taimi ko ení ʻo tuli ki heʻenau ngaahi tuipau fakalotú. Naʻa nau fakaʻuhinga ko e founga ʻe taha ke fai ai ení ko hono kātoangaʻi ʻa e ʻaho mālōlō fakalotu ʻo e Kilisimasí. Kae kehe, naʻe vave ke hoko ha loto-mamahi lahi ki he tokolahi ʻo e faʻahinga ko iá. Ko e hā hono ʻuhingá?

ʻI he ʻosi atu ʻa e taʻu taki taha, kuo hoko ai ʻa e ʻaho mālōloó ia ʻo fakakomēsiale lahi ange. ʻIo, hangē ko ia ʻi he Uēsité, kuo hoko ʻa e faʻahitaʻu Kilisimasí ko e taha ia ʻo e ngaahi founga lelei taha ke fakatupu paʻanga ai ʻa e kau ngaohi koloá, ngaahi pisinisi fefakatauʻakí mo e kau mēsianití. ʻOku meimei ke fakahaaʻi pē ʻa e ngaahi teuteu faka-Kilisimasí ia ʻi muʻa ʻi he ngaahi falekoloá. Ko e fasi mo e ngaahi hiva fakalotu ʻi he sīpinga Kilisimasi ʻa e Uēsité, naʻe taʻeʻiloa ki muʻa ʻi Lūsiá, ʻoku ongona ia mei he ngaahi falekoloá. Ko e kau tangata faifakatau ʻoku nau fata holo ʻa e ngaahi fuʻu tangai meʻa-vaʻinga Kilisimasí ʻoku nau fakatau atu ʻenau ngaahi meʻá ki he kau fefonongaʻaki lēlué mo e ngaahi meʻalele kehe maʻá e kakaí. Ko e meʻa ia te ke ʻiloʻi he taimí ni ʻi aí.

Naʻa mo e faʻahinga ʻoku nau vakai ʻoku ʻikai ha meʻa ia ʻe hala ʻi he founga fakakomēsiale fakahangatonu ko ení ʻoku uesia nai kinautolu ʻe ha tuʻunga fakahohaʻa ʻe taha ʻo e faʻahitaʻú​—ko hono ngāueʻaki hala ʻo e ʻolokaholó fakataha mo e kotoa ʻo hono ngaahi nunuʻa koví. Naʻe fakamatala ha toketā mei he loki fakatuʻutāmaki ʻi ha falemahaki Mosikou ʻo pehē: “Ki he kau toketaá, ko ha foʻi moʻoni ala tali ia ʻa e pehē ko e kātoanga Taʻu Foʻoú ʻe ʻuhinga iá ko ha ngaahi lavelavea lahi ʻoku fakaholoholo hifo mei he fefulofulaí mo e takatakaʻulí ki he ngaahi kafo ʻi he helé mo e meʻafaná, ko e lahi tahá ko e fakatupunga ʻe he fakamālohi ʻi he fāmilí, kau konā uataú mo e ngaahi fepaki he meʻalelé.” Naʻe pehē ʻe ha saienisi māʻolunga mei ha vaʻa ʻo e Akoʻanga Saienisi ʻi Lūsiá: “ʻOku ʻi ai ha tupulaki fakatuʻupakē ʻi he lahi ʻo e ngaahi mate felāveʻi mo e ʻolokaholó. Naʻe tautefito ʻene māʻolungá ʻi he taʻu 2000. Ko e fika ʻo e ngaahi taonakitá mo e ngaahi tāmaté kuo toe ʻalu foki mo ia he ʻataá.”

Ko hono pangó, ko ha faʻahinga ʻulungāanga pehē pē lolotonga ʻa e faʻahitaʻu ʻaho mālōloó ʻi Lūsia ʻoku ʻai ʻo kovi ange ia ʻe ha toe meʻa kehe. ʻI lalo he ʻuluʻi-kaveinga ko e “Kātoangaʻi Tuʻo Ua ʻe he Kau Lūsiá ʻa e Kilisimasí,” ʻoku līpooti mai ʻe he nusipepa Izvestiya: “ʻOku meimei ko e toko 1 ʻi he toko 10 ʻo e kau Lūsiá ʻoku nau kātoangaʻi tuʻo ua ʻa e Kilisimasí. Hangē ko ia naʻe fakamoʻoniʻi ʻe ha savea ʻa e senitā tokangaekina ʻa e ROMIR, ko e peseti ʻe 8 ʻo e kau talí naʻa nau fakahaaʻi moʻoni ʻoku nau kātoangaʻi fakatouʻosi ʻa e Kilisimasí ʻi Tīsema 25, ʻo fakatatau ki he tohimāhina Kilisimasi ʻa e Katoliká, pea ʻi Sanuali 7, fakatatau ki he ʻOfotokisií . . . Ki he niʻihi, ʻoku hā mahino ʻoku ʻikai ko e meʻa mahuʻingá ʻa e ʻuhinga fakalotu ʻo e Kilisimasí ka ʻi hono kehé ko e faingamālie ke kātoangaʻí ʻoku mahuʻingá.” a

 ʻOku Hanga Nai ʻe he Fakamamafa Lolotongá ʻo Fakalāngilangiʻi Moʻoni ʻa Kalaisi?

ʻOku hā māʻalaʻala, ʻoku ʻalu fakataha ʻa e lahi taha ʻo e ʻulungāanga taʻefakaʻotuá mo e faʻahitaʻu ʻaho mālōloó. ʻI heʻene fakahohaʻa ʻo hangē tofu pē ko ení, ʻoku ongoʻi nai ia ʻe he niʻihi ʻoku totonu ke nau tauhi ʻa e ngaahi kātoangá ʻo fakatuʻunga ʻi he fakaʻapaʻapa ki he ʻOtuá mo Kalaisi. Ko ha holi ke fakahōifuaʻi ʻa e ʻOtuá ʻoku ala fakaongoongoleleiʻi ia. Ka ʻoku hōifua moʻoni nai ʻa e ʻOtuá mo Kalaisi ki he faʻahitaʻu Kilisimasí? Fakakaukau angé ki hono tupuʻangá.

Hangē ko ení, pe ko e hā pē haʻate vakai ki he fakakaukau ʻa e Sovietí ki he Kilisimasí, ʻe faingataʻa ke fai ha fakakikihi mo e ngaahi foʻi moʻoni fakahisitōlia hoko ʻoku ʻomai ʻi he Great Soviet Encyclopedia: “Ko e Kilisimasí . . . naʻe ohi mai ia mei he lotu ki muʻa ʻi he Kalisitiané ki he ngaahi ʻotua ‘ʻoku nau mate pea tuʻu hake mei he maté,’ ʻa ia naʻe tautefito ʻa hono failahia ʻi he lotolotonga ʻo e kakai ngoué, ko ha vahaʻa taimi ia naʻe faʻa fakangatangata pē ki he ngaahi ʻaho nonoú mei Tīsema 21-​25, ʻa ia naʻe fakamanatu fakataʻu ai ʻa hono ‘ʻaloʻi’ ʻo e ʻOtua-Faifakamoʻuí, ʻa ia ʻokú ne fakafoki ʻa e moʻuí ki natula.”

Te ke ʻiloʻi nai ha meʻa mahuʻinga ʻi he meʻa ʻoku tuhuʻi tonu matematē mai ʻe he ʻenisaikolopētiá: “Ko e lotu faka-Kalisitiane ʻo e ʻuluaki senitulí naʻe ʻikai te nau ʻiloʻi ʻa e kātoanga ʻo e Kilisimasí. . . . Mei he konga loto ʻo e senituli hono faá, naʻe ohi mai ʻe he lotu faka-Kalisitiané ʻa e kātoanga ʻo e ʻaho nonoú mei he lotu kia Mītilá, ʻo liliu ia ki he kātoanga Kilisimasí. Ko e fuofua feituʻu ke kātoangaʻi ai ʻa e Kilisimasí ko e ngaahi kolo fakalotu ʻo Lomá. ʻI he senituli hono hongofulú, ko e Kilisimasí, fakataha mo e lotu faka-Kalisitiané, naʻe mafola atu ia ki Lūsia, ʻa ia naʻe hoko ai ʻo fakatahaʻi mo e kātoanga faʻahitaʻu momoko ʻa e muʻaki kau Silaví, ʻo fakalāngilangiʻi ai ʻa e laumālie ʻo e ngaahi kuí.”

Te ke ʻeke nai, ‘Ko e hā ʻoku leaʻaki ʻe he Folofola ʻa e ʻOtuá, ʻa e Tohi Tapú, ʻo kau ki hono ʻaloʻi mai ʻo Sīsū ʻi Tīsema 25?’ Ko hono moʻoní, ʻoku ʻikai ke fakahaaʻi pau ʻe he Tohi Tapú ia ha ʻaho ki hono ʻaloʻi ko ia ʻo Sīsuú, pea ʻoku ʻikai ha lēkooti ia naʻe leaʻaki tonu ʻe Sīsū ʻo kau ki ai, ʻo fuʻu siʻisiʻi hano fakahinohinoʻi mai ke kātoangaʻi ia. Kae kehe, ʻoku tokoniʻi kitautolu ʻe he Tohi Tapú ke tau fakapapauʻi ʻa e taimi ʻo e taʻú ʻa ia naʻe ʻaloʻi ai ʻa Sīsuú.

Fakatatau ki he Kōsipeli ʻa Mātiú, Mt vahe 26 mo e 27, naʻe fakapoongi ʻa Sīsū ʻi Nīsani 14, ʻi he houa efiafi ʻo e ʻaho ʻo e Laka-Atu faka-Siú ʻa ia naʻe kamata ʻi Maʻasi 31, 33 T.S. ʻOku tau ako mei he Kōsipeli ʻa Luké naʻe taʻu 30 nai ʻa Sīsū ʻi he taimi naʻe papitaiso ai ia peá ne kamata ʻene ngāue fakafaifekaú. (Luke 3:​21-​23) Naʻe taʻu ʻe tolu mo e konga ʻa e lōloa ʻo e ngāue fakafaifekau ko iá. Ko ia ai, naʻe taʻu 33 1/2 nai ʻa Sīsū ʻi heʻene pekiá. Naʻá ne mei taʻu 34 ʻi ʻOkatopa 1, 33 T.S. nai. ʻOku līpooti mai ʻe Luke ʻi he taimi ko ia ʻo e ʻaloʻi ʻo Sīsuú, ko e kau tauhi-sipí naʻa nau “mohe vao, ʻo leʻohi ʻenau fanga sipi ʻi he poʻuli.” (Luke 2:8) Naʻe ʻikai mei nofo ʻa e kau tauhi-sipí ia ʻi tuʻa mo ʻenau tākangá ʻi he momoko ʻo Tīsemá, ʻa ia naʻe lava ke aʻu ʻo sinou ai ʻi he feituʻu takatakai ʻi Pētelihemá. Ka naʻa nau mei ʻi ai mo ʻenau ngaahi tākangá ʻo fakafuofua ki ʻOkatopa 1, ʻa ia fakatatau ki he fakamoʻoní ko e taimi ia naʻe ʻaloʻi ai ʻa Sīsuú.

ʻI ha tuʻunga fāinoa, fēfē ʻa e kātoanga Taʻu Foʻoú? Hangē ko ia kuo tau ʻosi sio ki aí, ʻoku fakaʻilongaʻiʻaki ia ʻa e ʻulungāanga taʻetaau. Neongo  ʻa e ngaahi feinga ke ʻai ia ke fakamāmaní, naʻe toe ʻi ai foki mo hono ngaahi tupuʻanga ala fehuʻia.

ʻOku hā mahino, ʻi he fakamaama ʻa e ngaahi foʻi moʻoni ʻokú ne takatakaiʻi ʻa e faʻahitaʻu ʻaho mālōloó, ko e ngaahi moto hangē ko e, ko Sīsū ʻa e ʻuhinga ki he faʻahitaʻú ʻoku taʻeʻuhinga ia. Kapau ʻoku fakasivaʻi hoʻo ʻamanakí ʻe he tuʻunga fakakomēsialé mo e ʻulungāanga fakahohaʻa ʻoku fekauʻaki mo e faʻahitaʻu Kilisimasí, pea pehē ki hono ngaahi tupuʻanga fakapangani ʻikai ala talí, ʻoua ʻe loto-siʻí. ʻOku ʻi ai ha founga feʻungamālie ʻa ia ʻoku lava ai ke tau fakahaaʻi ʻa e ʻapasia ʻoku taau mo e ʻOtuá pea fakalāngilangiʻi ai ʻa Kalaisi, ʻi he taimi tatau ʻoku fakaivimālohiʻi ai ʻa e ngaahi haʻi ʻo e fāmilí.

 Ko ha Founga Lelei Ange ke Fakalāngilangiʻi Ai ʻa e ʻOtuá mo Kalaisí

ʻOku tala mai ʻe he Tohi Tapú kiate kitautolu naʻe haʻu ʻa Sīsū Kalaisi “ke tuku ʻene moʻui ke huhuʻiʻaki ha tokolahi, heʻene fetongi kinautolu.” (Mātiu 20:28) Naʻá ne fakaʻatā ʻa ia tonu ke fakapoongi, ʻo loto-lelei ke pekia maʻa ʻetau ngaahi angahalá. ʻE saiʻia nai ʻa e niʻihi ke fakalāngilangiʻi ʻa Kalaisi, ʻo ongoʻi ʻoku lava ke nau fai eni lolotonga ʻa e faʻahitaʻu Kilisimasí. Kae hangē ko ia kuo tau ʻosi sio ki aí, ko e Kilisimasí mo e Taʻu Foʻoú ʻoku ʻikai haʻana felāveʻi mo Kalaisi pea ʻokú na tupu mei he ngaahi kātoanga fakapangani. Pehē foki, neongo ʻoku hā matamatalelei ʻa e faʻahitaʻu Kilisimasí ia ki he niʻihi, ka ʻoku fakaʻilongaʻiʻaki ia ʻa e tuʻunga fakakomēsiale kovi. Tānaki atu ki ai, kuo pau ke fakahaaʻi moʻoni ko e ʻaho mālōlō Kilisimasí ʻoku felāveʻi ia mo e ʻulungāanga fakamā ʻa ia ʻoku taʻefakahōifuaʻi ai ʻa e ʻOtuá mo Kalaisi.

ʻOku totonu ke fēfē ʻa e tali ʻa ha taha ʻokú ne kumi ke fakahōifuaʻi ʻa e ʻOtuá? ʻI he ʻikai ke piki ki he ngaahi talatukufakaholo ʻa e tangatá ʻa ia ʻe fakafiemālieʻi nai ai ʻa e ngaahi ongoʻi ʻo e tōʻonga fakalotú ka ʻoku fepaki ia mo e Tohi Tapú, ko ha tokotaha loto-totonu te ne kumi ki he founga moʻoni ke fakalāngilangiʻi ai ʻa e ʻOtuá mo Kalaisi. Ko e hā ʻa e founga moʻoni ko iá, pea ko e hā ʻoku totonu ke tau faí?

Naʻe tala mai tonu ʻe Kalaisi kiate kitautolu: “Ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha, pea mo Sisu ne ke fekau mai ko e Misaia.” (Sione 17:3) ʻIo, ko e tokotaha loto-totonu moʻoní ʻoku kumi ia ke ne maʻu ʻa e ʻilo totonu ki he founga ke fakalāngilangiʻi ai ʻa e ʻOtuá mo Kalaisí. ʻOkú ne toki ngāueʻaki leva ʻa e ʻilo ko ení ʻo ʻikai ʻi he lolotonga pē ʻo ha taimi pau ʻo e taʻú ka ʻi he moʻuí he ʻaho kotoa pē. ʻOku hōifua ʻa e ʻOtuá ki he ngaahi feinga loto-totonu peheé, ʻa ia ʻe lava ke taki atu ki he moʻui taʻengatá.

Te ke saiʻia ke kau ho fāmilí ʻi he lotolotonga ʻo e faʻahinga ʻoku nau fakalāngilangiʻi moʻoni ʻa e ʻOtuá mo Kalaisi ʻo fehoanaki mo e Tohi Tapú? Kuo tokoniʻi ʻe he Kau Fakamoʻoni ʻa Sihová ʻa e laui miliona ʻo e ngaahi fāmili takatakai he māmaní ke nau maʻu ʻa e ʻilo mātuʻaki mahuʻinga mei he Tohi Tapú. ʻOku mau fakaafeʻi loto-māfana atu koe ke ke fetuʻutaki ki he Kau Fakamoʻoni ʻa Sihova ʻi ho feituʻú pe ko hoʻo tohi kia kinautolu ʻi he tuʻasila feʻungamālie ʻoku maʻu ʻi he peesi 2 ʻo e makasini ko ení.

[Fakamatala ʻi lalo]

[Puha/Fakatātā ʻi he peesi 7]

Ko e Ngaahi Tupuʻanga ʻo e Kātoanga Taʻu Foʻoú

ʻOku Lea Loto-Toʻa ha Pātele ʻOfotokisī ʻi Siōsia

“Ko e ʻaho mālōlō Taʻu Foʻoú ʻoku tupu ia mei ha ngaahi ʻaho mālōlō fakapangani lahi mei Loma motuʻa. Ko e ʻaho ʻuluaki ʻo Sanualí ko ha ʻaho mālōlō ia naʻe līʻoa ki he ʻotua pangani ko Sānusí, pea ko e hingoa ʻo e māhiná ko e maʻu ia mei hono hingoá. Ko e ngaahi ʻīmisi ʻo Sānusí ʻoku ʻi ai hono mata ʻe ua ʻi he ongo tafaʻaki fehangahangaí, ʻa ia ʻoku ʻuhingá naʻá ne vakai fakatouʻosi ki he kuohilí pea mo e lolotongá. Naʻe ʻi ai ʻa e pehē ko ia pē naʻe fetaulaki mo e ʻaho ʻuluaki ʻo Sanualí fakataha mo e fiefia, kakata mo e lahi ʻa e meʻakai mo e inú te ne fononga atu ʻi he taʻú kotoa ʻi he fiefia mo e tuʻunga lelei. Ko e tui taʻeʻuhinga tatau tofu pē ʻoku ʻalu fakataha mo hono kātoangaʻi ʻa e taʻu foʻoú ʻe he tokolahi ʻo hotau kaungā tangataʻifonuá . . . Lolotonga ʻa e ngaahi ʻaho mālōlō fakapangani pau, naʻe fai ai ʻa e ngaahi feilaulau ʻa e tangatá tonu ki ha ʻaitoli. Naʻe ongoongoa ʻa e niʻihi ʻi heʻenau ngaahi ouau fakapulipuli taʻetaau, tono mo e feʻauaki. ʻI he ngaahi tuʻunga kehé, ko e fakatātaá lolotonga ʻa e ʻaho mālōlō Sānusí, naʻe tōtuʻa ai ʻa e kaí mo e inú, faʻa konā mo e founga kotoa pē ʻo e ʻulungāanga taʻemaʻá ʻa ia naʻe ʻalu fakataha mo e ngaahi meʻa ko iá. Kapau te tau manatuʻi ʻe kitautolu tonu ʻa e founga naʻa tau kātoangaʻi ai ʻi ha taimi he kuohilí ʻa e Taʻu Foʻoú, ta ʻoku pau leva ke tau fakahaaʻi moʻoni ko e kotoa ʻo kitautolú kuo tau kau ʻi he kātoanga fakapangani ko ení.”​—Ko ha nusipepa faka-Siōsia.

[Fakatātā ʻi he peesi 6]

Naʻe ohi mai ʻe he Puleʻanga-Haʻa-Kalisitiané ʻa e lotu kia Mītilá

[Maʻuʻanga]

Misiume Wiesbaden

[Fakatātā ʻi he peesi 7]

Naʻe ʻikai mei nofo ʻa e kau tauhi-sipí ia ʻi tuʻa mo ʻenau tākangá ʻi he momoko ʻo Tīsemá