ʻĀtakaiʻi ʻa e Leleí ʻe he Koví

ʻI HE māmani ʻo e ʻaho ní, ʻe hā ngali nai ʻoku loto-lelei ʻa e kakai tokosiʻi ke foaki atu kinautolu. Kae kehe, ko e niʻihi ia ʻoku nau kei fakaʻamu pē “ke ʻai ha faikehekehe”​—ke failelei ki he niʻihi kehé ʻi ha faʻahinga founga. ʻI he taʻu taki taha, ʻoku foaki atu ai ʻe he kakai taʻefaʻalaua ʻa e paʻanga ʻe laui piliona ki he meʻa ʻoku nau ongoʻi ʻoku ʻaongá. Ko e fakatātaá, ʻi Pilitānia, ko e ngaahi tokoni ki he tokoni ʻofá naʻe aʻu ia ʻi he 2002 ki he tumutumu ko e $13 piliona (U.S.). Talu mei he 1999, kuo foaki pe palōmesi ai ʻe he kau tokoni loto-fiefoaki ki he faʻahinga ʻo e tangatá ʻe toko hongofulu ʻa e tola laka hake he $38 piliona (U.S.) ke tokoni ki he kau masivá.

Ko e niʻihi ʻo e ngaahi ngāue lelei kuo fakahoko ʻe he kau ngāue tokoni ʻofá ʻoku kau ai ʻa hono totongi ʻo e ngaahi foʻiʻakau fakafaitoʻo ʻa e ngaahi fāmili ʻoku māʻulalo ʻenau paʻanga hū maí, tokoni fakaako ki he fānau ʻa e mātuʻa taʻehoá, fakapaʻanga ʻa e ngaahi polokalama huhu maluʻi ʻi he ngaahi fonua langalanga haké, foaki ange ki he fānaú ʻa ʻenau fuofua tohí, tokonaki ʻa e fanga manu ʻa ia ʻe fanafanaú ki he kau faama ʻi he ngaahi fonua masivá, pea mo hono ʻave ʻa e ngaahi tokonaki ko e tokoni ki he faʻahinga kuo maʻukovia ʻe he ngaahi fakatamaki fakanatulá.

Ko e ngaahi fakamoʻoni kuo toki lave ki aí ʻoku fakahaaʻi ai ʻoku maʻu ʻe he faʻahinga ʻo e tangatá ʻa e malava ke failelei ki he niʻihi kehé. Neongo ia, ko e meʻa fakamamahí, ʻoku toe ʻi ai foki ʻa e kakai ia ʻoku nau fakahoko ʻa e ngaahi tōʻonga kovi mātuʻaki fakalilifu.

Tupulaki ʻa e Koví

Talu mei he ʻosi ʻa e Tau II ʻa māmaní, kuo lēkooti ʻa e hoko ʻa e meimei ngaahi fakaʻauha fakafaʻahinga ʻe 50 mo hono tāmateʻi ʻa e fuʻu kakai tokolahi ʻi he ngaahi ʻuhinga fakapolitikale. “Ko e ngaahi meʻa ko ʻeni naʻe hokó,” ko e fakamatala ia ʻa e pepa American Political Science Review, “kuo mole ai ʻa e moʻui laka hake he toko 12 milioná pea aʻu ki he kau siviliane ʻe toko 22 miliona, ʻo lahi ange ia ʻi he kotoa ʻo e kau maʻukovia ʻo e ngaahi tau fakalotofonua mo fakavahaʻapuleʻanga talu mei he 1945.”

Lolotonga ʻa e konga fakamuimui ʻo e senituli hono 20, kuo aʻu ki he kakai ʻe toko 2.2 miliona naʻe tāmateʻi ʻi Kemipōtia ʻi he ngaahi ʻuhinga fakapolitikale. ʻI he fetāufehiʻaʻaki fakafaʻahinga ʻi Luanitaá naʻe iku ai ki he mate ʻa e kau tangata, kau fefine mo e fānau laka hake he toko 800,000. Ko e ngaahi tāmate ʻi he ngaahi ʻuhinga fakalotu mo fakapolitikale ʻi Posiniá naʻe iku atu ai ki he kau mate laka hake ʻi he toko 200,000.

ʻI hono fakapapauʻi ʻa e ngaahi tōʻonga kovi ki muí ni maí, naʻe pehē ʻe he sekelitali pule ʻa e Ngaahi Puleʻanga Fakatahatahá ʻi he 2004: “ʻI ʻIulaki, kuo ʻi ai ʻa e kau siviliane ne tāmateʻi tavale taʻemanavaʻofa, lolotonga iá ko e kau ngāue tokoni, kau faiongoongo mo e kau siviliane kehe ʻoku taki pōpula kinautolu pea tāmateʻi ʻi he tuʻunga fakapāpeliane tahá. ʻI he taimi tatau, kuo ʻi ai ʻa e kau pōpula ʻIulaki kuo ngaohikoviʻi fakahāea kinautolu. ʻI Darfur, kuo tuli fakamālohiʻi ai ʻa e kakai kotoa, pea kuo fakaʻauha ʻa honau ngaahi ʻapí, lolotonga iá  ko e tohotohó ʻoku ngāueʻaki ia ko ha founga ʻosi fakakaukauʻi pē. ʻI ʻIukanitā tokelau, kuo ʻi ai ʻa e fānau ne fakalaveaʻi lahi mo fakamālohiʻi ke kau ʻi he ngaahi tōʻonga fakamālohi fakalilifu. ʻI Beslan, kuo ʻi ai ʻa e fānau kuo taki pōpula ai pea tāmateʻi anga-fakamamahi.”

Naʻa mo e ngaahi fonua ʻoku taku ʻoku fakalakalaká, ko e ngaahi faihia ʻi he fetāufehiʻaʻaki fakafaʻahingá ʻoku hā ngali ʻoku tupulaki ia. Ko e fakatātaá, naʻe līpooti ʻe he Independent News ʻi he 2004 ʻo pehē naʻe fakamoʻoniʻi ʻe Pilitānia “ha tupulaki liunga tahataha ʻi he tokolahi ʻo e kau maʻukovia ʻo e ngaahi ʻoho pe ngaohikoviʻi tupu mei he fetāufehiʻaʻaki fakamatakalí ʻi he hongofuluʻi taʻu kuo maliu atú.”

Ko e hā ʻoku fai ai ʻe he faʻahinga ʻo e tangatá ʻa ia ʻoku nau malava ke fai ʻa e lelei lahi ʻaupitó ʻa e ngaahi tōʻonga fulikivanu peheé? ʻE faifai ange pea tau tauʻatāina mei he koví? Hangē ko ia ʻoku fakahaaʻi ʻe he kupu hono hokó, ʻoku tokonaki mai ʻe he Tohi Tapú ʻa e ngaahi tali fakafiemālie ki he ngaahi fehuʻi fakapuputuʻu ko ʻení.

 [Maʻuʻanga ʻo e Tā ʻi he peesi 2]

TAKAFÍ: Mark Edwards/Still Pictures/Peter Arnold, Inc.