Ko e Taulaʻeiki Lahi Naʻá Ne Fakahalaiaʻi ʻa Sīsuú

ʻI NŌVEMA 1990, naʻe ʻiloʻi ai ʻe ha kau tangata ne nau ngāue ʻi ha paʻake mo ha hala ʻi he meimei kilomita ʻe taha ki he fakatonga ʻo e Kolo Motuʻa ko Selusalemá ha meʻa fakatoʻoaloto. Naʻe matuʻutāmaki ʻo tau ha tulekitoa ʻo holofa ai ʻa e ʻato ʻo ha ʻana ʻa ia ko ha tanuʻanga mate ia ʻi he kuonga muʻá. Ko e ʻēlia takatakai aí naʻe ngāueʻaki ia ko ha fuʻu faʻitoka mei he ʻuluaki senitulí K.M. ki he ʻuluaki senituli T.S. Naʻe fakatoʻoaloto moʻoni ʻa e meʻa naʻe maʻu ʻe he kau keli fakatotoló ʻi lotó.

Naʻe ʻi he ʻaná ʻa e tauhiʻanga-hui ʻe 12, pe ngaahi puha hui, ʻa ia naʻe tuku ai ʻa e ngaahi hui ʻo e kau maté ʻi he hili ia hono fakatokoto kinautolu ʻi he ngaahi fonualotó ʻi he meimei taʻu ʻe taha pea kuo ʻauʻaunga ai ʻa honau kakanó. Ko e meʻa naʻe tohi ʻi he tafaʻaki ʻo e tauhiʻanga-hui tā tongitongi fakaʻofoʻofa ʻe taha​—ko e taha ʻo e ngaahi tā tongitongi lelei taha kuo faifai ange pea maʻú—ko e hingoa ko e Yehosef bar Caiapha (Siosefa foha ʻo Kaiafasi).

ʻOku fakahuʻunga mei he fakamoʻoní ko e fonualoto nai eni ʻo e taulaʻeiki lahi naʻá ne puleʻi ʻa e hopo mahuʻinga taha kuo faifai ange pea hokó​—ʻa ē ʻo Sīsū Kalaisí. ʻOku fakapapauʻi ʻe he faihisitōlia Siu ko Siosifasí ʻa e taulaʻeiki lahi ko ʻení ko “Siosefa, ʻa ia naʻe ui ko Kaiafasí.” ʻI he Tohi Tapú, ʻoku ui pē ia ai ko Kaiafasi. Ko e hā ʻoku totonu ke tau mahuʻingaʻia ai ʻiate iá? Ko e hā naʻá ne ueʻi ia ke ne fakahalaiaʻi ʻa Sīsuú?

Fāmilí mo e Puipuituʻá

Naʻe mali ʻa Kaiafasi mo e ʻofefine ʻo ʻĀnasi, ko ha toe taulaʻeiki lahi kehe. (Sione 18:13) Ko e alea malí ʻoku hangehangē naʻe fokotuʻutuʻu ia ʻi he ngaahi taʻu ki muʻa ʻi he kātoanga malí, ʻa ia ʻoku pau pē ko e fiemaʻu ia ʻe he ongo fāmilí fakatouʻosi ke fakapapauʻi ne nau faʻu ha fepikitaki lelei. Naʻe ʻuhinga ʻení ko hono sivisiviʻi ʻa e laine fakafāmilí ke fakapapauʻi ʻa e maʻa ko ia ʻo honau laine hohoko fakataulaʻeikí. ʻOku ngalingali ko e ongo fāmilí fakatouʻosi naʻá na tuʻumālie pea ʻi he ngaahi fāmili māʻolungá, ʻo hangehangē ne nau maʻu ʻenau koloá mei he ngaahi konga kelekele lalahi ʻi he feituʻu Selusalemá. ʻOku ʻikai ha veiveiua naʻe loto ʻa ʻĀnasi ke fakapapauʻi ko hono foha-ʻi-he-fono ʻi he kahaʻú ʻe hoko ia ko ha faʻahi fakapolitikale alafalalaʻanga. ʻOku hā ngali naʻe kau  fakatouʻosi ʻa ʻĀnasi mo Kaiafasi ki he lotu mavahe tākiekina lahi ko ia ʻo e kau Sātusí.​—Ngāue 5:​17.

ʻI he tuʻunga ko ha mēmipa ʻo ha fāmili fakataulaʻeiki tuʻu-ki-muʻá, ʻoku pau pē naʻe maʻu ʻe Kaiafasi ha ako ʻi he ngaahi Konga Tohi Tapu faka-Hepeluú pea mo honau ngaahi ʻuhingá. ʻOku pau pē naʻe kamata ʻene ngāue ʻi he temipalé ʻi hono taʻu 20, ka ʻoku ʻikai ʻiloʻi ʻa e taʻu ʻa ia naʻá ne hoko ai ʻo taulaʻeiki lahí.

Kau Taulaʻeiki Lahí mo e Houʻeiki Taulaʻeikí

Ko e tuʻunga taulaʻeiki lahí ko ha ʻuluaki meʻa tukufakaholo ia pea ko e fatongia ia ki he kotoa ʻo e moʻuí. Ka ʻi he senituli hono uá K.M., naʻe toʻo ai ʻe he kau Hesimoní ia ʻa e tuʻunga taulaʻeiki lahí. a Naʻe fakanofo pea fakahifo ʻe Hēlota ko e Lahi ia ʻa e kau taulaʻeiki lahí, ʻo ʻai ke hā mahino ko ia ʻa e mafai moʻoni ki hono fakanofo ʻo e fatongiá ni. Naʻe muimui ʻa e kau kōvana Lomá ʻi ha founga ngāue meimei tatau.

Ko e ngaahi meʻa ko ʻeni naʻe hokó naʻe iku ia ki hono faʻu ʻo ha kulupu ʻa ia ʻoku ʻuhinga ki ai ʻa e Tohi Tapú ko e “houʻeiki taulaʻeiki.” (Mātiu 26:​3, 4) Tuku kehe ʻa Kaiafasi, naʻe kau ki he kulupu ko ʻení ʻa e kau taulaʻeiki lahi ki muʻa, ʻo hangē ko ʻĀnasí, ʻa ia naʻe fakahifo ka naʻá ne hokohoko atu pē ke maʻu ʻa e hingoa fakalakangá. Naʻe toe kau foki ki he kulupú ʻa e ngaahi fāmili ofi ʻo e kau taulaʻeiki lahi lolotongá mo e kau taulaʻeiki lahi ki muʻá.

Naʻe fakaʻatā ʻe he kau Lomá ʻa e fakahoko ngāue fakaʻaho ʻa Siuteá ke fakalele ia ʻe he ngaahi fāmili Siu māʻolungá, ʻo kau ai ʻa e houʻeiki taulaʻeikí. Naʻe ʻai ai ʻe he meʻá ni ʻa e puleʻanga Lomá ke ne lava ʻo puleʻi ʻa e vahefonuá mo mapuleʻi lelei ʻa e paʻanga tukuhau mei aí ʻo ʻikai fekauʻi atu ki ai ha kau sōtia tokolahi. Naʻe ʻamanekina ʻe Loma ʻa e haʻa faifekau Siú ke nau tauhi maʻu ʻa e māú pea maluʻi ʻa ʻene ngaahi tupú. Naʻe ʻikai loko saiʻia ʻa e kau kōvana Lomá ia ʻi he kau taki Siú, ʻa ia naʻa nau fehiʻa ʻi he pule faka-Lomá. Ka naʻe ʻi heʻenau mahuʻingaʻia tahá fakatouʻosi ke nau ngāue fāitaha koeʻuhi ke tuʻumaʻu ʻa e tuʻunga ʻo e puleʻangá.

ʻI heʻene aʻu mai ki he taimi ʻo Kaiafasí, ko hono moʻoní ko e taulaʻeiki lahí ʻa e taki fakapolitikale Siú. Naʻe fakanofo ʻa ʻĀnasi ki he tuʻunga ko ʻení ʻe Kuliniasi, ko e kōvana Loma ʻo Sīlia, ʻi he 6 ki he 7  T.S. ʻOku fakahaaʻi ʻe he talatukufakaholo faka-Lāpaí ko e mānumanú, fakaponé, fakaaoaó mo e fakamālohí ko e ngaahi tōʻonga ia ʻa e ngaahi fāmili māʻolunga tuʻu-ki-muʻa Siú. ʻOku pehē ʻe ha tokotaha-tohi ʻe taha ʻi he tuʻunga ko e taulaʻeiki lahí, naʻe fakapapauʻi ai ʻe ʻĀnasi ko hono foha-ʻi-he-fonó naʻe “vave hono hikihiki hake ia ʻi he tuʻunga mafai ʻi he temipalé; he ko e meʻá, ko e māʻolunga ange ʻa e tuʻunga naʻe maʻu ʻe Kaiafasí, ko ʻene toe ʻaonga lahi ange ia kia ʻĀnasí.”

Ko Valeliasi Kalatusi, ʻa e kōvana ʻo Siuteá, naʻá ne fakahifo ʻa ʻĀnasi ʻi he 15 T.S. nai. Ko e toko tolu kehe, ʻo kau ai ʻa e taha ʻo e ngaahi foha ʻo ʻĀnasí, naʻe vave ʻenau hoko atu ʻo maʻu ʻa e tuʻunga ʻo e taulaʻeiki lahí. Naʻe hoko ʻa Kaiafasi ʻo taulaʻeiki lahi ʻi he 18 T.S. nai. Ko Ponitō Pailato, ʻa ia naʻe fakanofo kōvana ki Siutea ʻi he 26 T.S., naʻá ne tauhi maʻu ia ʻi he tuʻunga mafaí ʻi he kotoa ʻo e ngāue fakakōvana taʻu ʻe hongofulu ʻa Pailató. Ko e vahaʻa taimi pule ʻa Kaiafasí naʻe kau ki ai ʻa e vahaʻa taimi ʻo e ngāue fakafaifekau ʻa Sīsuú pea mo e ʻuluaki malanga ko ia ʻa ʻene kau ākongá. Ka naʻe fakafepaki lahi ʻa Kaiafasi ia ki he pōpoaki faka-Kalisitiané.

Manavahē kia Sīsū, Manavahē ki Loma

Naʻe vakai ʻa Kaiafasi ia kia Sīsū ko ha tokotaha fakamoveuveu fakatuʻutāmaki. Naʻe fehuʻia ʻe Sīsū ʻa e fakaʻuhinga ko ia ʻe he haʻa faifekaú ʻa e ngaahi lao ʻo e Sāpaté peá ne seʻe ai ʻa e kau mēsianití mo e kau fakafetongi paʻangá mei he temipalé, ʻo fakahaaʻi kuo nau ʻai ia ko ha “ana oe kau kaihaa.” (Luke 19: 45, 46, PM) ʻOku tui ʻa e kau faihisitōlia ʻe niʻihi ko e ngaahi māketi ko ia ʻi he temipalé ko e ngaahi meʻa ia ʻo e fale ʻo ʻĀnasí​—ʻo mahalo ko e toe ʻuhinga ia ʻe taha naʻe feinga ai ʻa Kaiafasi ke fakasīlongoʻi ʻa Sīsuú. ʻI hono fekauʻi atu ʻe he houʻeiki taulaʻeikí ha kau ʻōfisa ke puke ʻa Sīsuú, naʻa nau mātuʻaki ʻohovale ʻi heʻene ngaahi leá ʻo nau foki halaʻatā ai.​—Sione 2:​13-​17; 5:​1-​16; 7:​14-​49.

Fakakaukau atu ki he meʻa naʻe hokó ʻi he taimi naʻe fanongo ai ʻa e haʻa faifekau Siú naʻe fokotuʻu hake ʻe Sīsū ʻa Lāsalosí. ʻOku fakamatala ʻa e Kōsipeli ʻa Sioné: “Naʻe hanga ai ʻa e houʻeiki taulaʻeiki mo e kau Falesi, ʻo nau fai ha fakataha, ʻo nau pehē, Ko e ha muʻa ʻoku tau fai? he ko e tangata ni ko e meʻa ngei ʻene fai mana. Kapau te tau tuku ia ke fai pehē ai pē, ʻe tui pikitai kiate ia ʻa e kakai kotoa pē, pea ʻe haʻu ʻa e kau Loma, ʻo ʻave hotau fonua mo  hotau puleʻanga fakatouʻosi.” (Sione 11:​47, 48) Naʻe vakai ʻa e Sanetalimí kia Sīsū ko ha fakamanamana ia ki he mafai ʻo e fokotuʻutuʻu fakalotú pea mo e maau ko ia ʻa e kakaí, ʻa ia naʻe fakafatongiaʻaki kinautolu ʻe Pailató. Ko ha faʻahinga ngaʻunu manakoa pē ʻe fakaʻuhingaʻi nai ʻe he kau Lomá ko ha fakatupu-angatuʻú ʻe lava ʻo fakalanga ai ʻa ʻenau tuʻu ʻi vahaʻa ʻi he ngaahi meʻa faka-Siú​—ʻa ia ko ha meʻa ia naʻe loto ʻa e Sanetalimí ke fakaʻehiʻehi mei ai ʻi ha faʻahinga tuʻunga pē.

Neongo ʻa e ʻikai malava ke ne fakaʻikaiʻi naʻe fakahoko ʻe Sīsū ʻa e ngaahi maná, naʻe ʻikai ngāueʻi ʻe Kaiafasi ʻa e tuí ka naʻá ne feinga ke tauhi maʻu ʻa hono tuʻunga ongoongoá mo e mafaí. Naʻe anga-fēfē ʻene lava ʻo ʻiloʻi ʻa hono fokotuʻu hake ʻo Lāsalosí kae kei taʻetui peé? ʻI he tuʻunga ko ha Sātusí, naʻe ʻikai tui ʻa Kaiafasi ia ki he toetuʻú!​—Ngāue 23:8.

Ko e tuʻunga fulikivanu ʻo Kaiafasí naʻe fakaeʻa ia ʻi he taimi naʻá ne tala ange ai ki hono ngaahi kaungā pulé: “Tokaga e lelei kiate kitautolu, ke mate ha tagata e toko taha ma ae kakai, kae oua naa auha ae buleaga kotoa.” ʻOku hoko atu ʻa e fakamatalá: “Bea nae ikai meiate ia ene lea koia: ka koe taulaeiki lahi ia i he taʻu koia, bea ne kikite e mate a Jisu ki he buleaga koia; Bea oku ikai ki he buleaga be koia, ka koeuhi ke ne tanaki o fakataha ae fānau ae Otua kuo fakaheʻi mamao. Bea talu mei he aho koia naa nau alea fakataha ke tamateʻi [ʻa Sīsū].”​—Sione 11:​49-​53, PM.

Naʻe ʻikai ʻiloʻi ʻe Kaiafasi ia ʻa e ʻuhingamālie kakato ʻo ʻene ngaahi leá. Koeʻuhí ko hono tuʻunga ko e taulaʻeiki lahí, naʻá ne fai kikite. b Ko e pekia ʻa Sīsuú ʻe ʻaonga​—ʻo ʻikai ki he kau Siú pē. Ko ʻene feilaulau huhuʻí ʻe tokonaki mai ai ʻa e founga ke fakaʻatā ai ʻa e kotoa ʻo e faʻahinga ʻo e tangatá mei he pōpula ki he angahalá mo e maté.

Ko ha Faʻufaʻufono ke Fakapō

Ko e houʻeiki taulaʻeikí mo e kau mātuʻa Siú naʻa nau fakatahataha ʻi he ʻapi ʻo Kaiafasí ke lāulea ai ki he founga ke puke pea tāmateʻi ai ʻa Sīsuú. ʻOku hā ngali naʻe poupou ʻa e taulaʻeiki lahí fakataha mo Siutasi ʻIsikaliote ʻi hono fakapapauʻi ʻa e totongi ki hono lavakiʻi ʻo Sīsuú. (Mātiu 26:​3, 4, 14, 15) Kae kehe, ko hono fakapoongi ʻo ha toko tahá, naʻe ʻikai feʻunga ia ke lavaʻi ai ʻa e ngaahi taumuʻa kovi ʻa Kaiafasí. “Ka ka puleakiʻi ʻe he houʻeiki taulaʻeiki ke tamateʻi mo Lasalosi foki; koeʻuhi ko e meʻa ʻiate ia naʻe mole ai ha tokolahi ʻo haʻa Siu, ʻo tui pikitai kia Sisu.”​—Sione 12:​10, 11.

Ko Malekusí, ko ha sevāniti ia ʻa Kaiafasi, naʻe ʻi he fuʻu kakai naʻe fekauʻi ke nau puke ʻa Sīsuú. Naʻe ʻuluaki ʻave ʻa e pōpulá kia ʻĀnasi ʻo fakafehuʻi pea toki ʻave leva kia Kaiafasi, ʻa ia naʻá ne ʻosi fakatahatahaʻi ʻa e kau mātuʻa Siú ki ha hopo poʻuli taʻefakalao.​—Mātiu 26:57; Sione 18:​10, 13, 19-​24.

Naʻe ʻikai taʻofi ʻa Kaiafasi ʻi he taimi naʻe ʻikai loto-taha ai ʻa e kau fakamoʻoni loí ʻi heʻenau fakamoʻoni fakafepaki kia Sīsuú. Naʻe ʻiloʻi ʻe he taulaʻeiki lahí ʻa e fakakaukau ʻa hono kaungā faʻufaʻufonó ʻo fekauʻaki mo ha taha pē ʻokú ne taukaveʻi ko ia ʻa e Mīsaiá. Ko ia naʻá ne fiemaʻu ai ke ʻiloʻi pe naʻe taukaveʻi ʻe Sīsū ʻa e hingoa fakalakanga ko iá. Naʻe tali ʻe Sīsū ʻo pehē ko hono kau talatalaakí te nau mamata kiate ia ʻokú ne “nofo ki he nima toʻomataʻu ʻo Malohi, pea ʻoku ne hoko mai ʻoku heka ki he ngāhi ʻao ʻo e langi.” ʻI hano fakahāhaaʻi ʻo e fakangalingalilotú, “naʻe toki hae hifo ʻe he Taulaʻeiki-lahi hono kofu oʻona, ʻo ne pehe, Kuo ne lea fieʻotua; koeʻumaʻā ʻetau toe kumi fakamoʻoni?” Naʻe loto-tatau ʻa e Sanetalimí ʻo pehē naʻe tuha ʻa Sīsū ke mate.​—Mātiu 26:​64-​66.

Ko e ngaahi tautea maté naʻe pau ke toki fakangofua ia ʻe he kau Lomá. ʻI he tuʻunga ko ha tokotaha fakalelei ʻi honau vahaʻá pea mo e kau Siú, ʻoku hangehangē ko Kaiafasi ʻa e tokotaha naʻá ne ʻave ʻa e keisí kia Pailató. ʻI he taimi naʻe feinga ai ʻa Pailato ke fakatauʻatāinaʻi ʻa Sīsuú, ʻoku ngalingali ko Kaiafasí naʻe ʻi he haʻohaʻonga ʻo e houʻeiki taulaʻeiki naʻa nau kaila: “Tutuki ki he akau, tutuki ki he akau.” (Sione 19:​4-6, PM) ʻOku hangehangē naʻe fakaʻaiʻai ʻe Kaiafasi ʻa e fuʻu kakaí ke nau vālau ke tukuange mai ha tokotaha fakapō kae ʻikai ko Sīsū pea naʻá ne ʻi he haʻohaʻonga ʻo e houʻeiki taulaʻeiki ko ia naʻa nau fanongonongo mālualoi: “ʻOku ʻikai hamau tuʻi, ko Sisa pē.”​—Sione 19:15; Maake 15:​7-​11.

Naʻe siʻaki ʻe Kaiafasi ʻa e fakamoʻoni ʻo e toetuʻu ʻa Sīsuú. Naʻá ne fakafepakiʻi ʻa Pita mo Sione pea hoko leva kia Sitīveni. Naʻe toe fakamafaiʻi foki ʻe Kaiafasi ʻa Saula ke ne puke ha Kalisitiane pē ʻa ia te ne lava ʻo maʻu ʻi Tāmasikusi. (Mātiu 28:​11-​13; Ngāue 4:​1-​17; 6:8–​7:​60; 9:​1, 2) Kae kehe ʻi he 36 T.S. nai, naʻe fakahifo ai ʻa Kaiafasi ʻe Viteliasi, ko e kōvana Loma ʻo Sīliá.

 ʻOku fakahaaʻi ʻe he ngaahi tohi faka-Siú ʻa e fāmili ʻo Kaiafasí ʻi ha tuʻunga ʻikai lelei. Hangē ko ʻení, ʻoku fakahaaʻi mamahi ʻi he Talamata faka-Pāpiloné: “Malaʻia ē ko au koeʻuhí ko e fale ʻo Haniní [ʻĀnasi], malaʻia ē ko au koeʻuhí ko ʻenau ngaahi fanafaná,” pe “ngaahi lauʻikovi loí.” Ko e mamahi ko ʻení ʻoku pehē ʻoku ʻuhingá ki he “ngaahi fakataha fakapulipuli ke palaniʻi ʻa e ngaahi tuʻunga fakamafasia.”

Lēsoni ʻe Lava Ke Tau Ako Meia Kaiafasí

ʻOku fakamatalaʻi ʻe ha mataotao ʻe taha ʻa e kau taulaʻeiki lahí ko e kau tangata naʻa nau “anga-fefeka, olopoto mo taukei​—mo mātuʻaki hangehangē ne nau hīkisiá.” Naʻe taʻofi ʻe he hīkisiá ʻa Kaiafasi mei hono tali ʻa e Mīsaiá. Ko ia ʻoku ʻikai totonu ai ke fakaʻohovaleʻi kitautolu ʻi he taimi ʻoku siʻaki ai ʻe he kakai ʻi he ʻaho ní ʻa e pōpoaki ʻo e Tohi Tapú. ʻOku ʻikai ke mahuʻingaʻia feʻunga ʻa e niʻihi ia ʻi he moʻoni Fakatohitapú ke liʻaki ai ʻa e ngaahi tui ʻoku nau koloaʻakí. ʻOku ongoʻi nai ʻe he niʻihi ia ko e hoko ko e kau malanga māʻulalo ʻo e ongoongo leleí ʻoku ʻikai feʻunga ia mo honau tuʻungá. Pea ʻoku fakafepakiʻi ʻe he ngaahi tuʻunga faka-Kalisitiané ia ʻa e faʻahinga ʻoku nau taʻefaitotonú pe mānumanú.

ʻI he tuʻunga ko e taulaʻeiki lahí, naʻe mei lava ʻe Kaiafasi ʻo tokoniʻi ʻa e kaungā Siú ke nau tali ʻa e Mīsaiá, ka naʻe fakatupunga ia ʻe he holi lahi ki he mafaí ke ne fakahalaiaʻi ai ʻa Sīsū. ʻOku ngalingali naʻe hokohoko atu ʻa e fakafepaki ko iá ʻo aʻu ki he tokoto ʻa Kaiafasi ki hono fonualotó. Ko e lēkooti ʻo hono ʻulungāangá ʻoku fakahaaʻi ai ʻoku ʻikai ko e ngaahi huí pē ʻoku ʻiloʻi ʻi he taimi ʻoku tau mate aí. ʻI heʻetau ngaahi tōʻongá, ʻoku tau fokotuʻu ai ha ongoongo tuʻuloa ki he ʻOtuá, ʻi he hoko ʻo kovi pe lelei.

[Fakamatala ʻi lalo]

[Fakatātā ʻi he peesi 10]

Siosefa foha ʻo Kaiafasí

[Fakatātā ʻi he peesi 10]

Ko e tauhiʻanga-hui naʻe ʻiloʻi ki muí ni mai

[Maʻuʻanga ʻo e Ttā ʻi he peesi 10]

Tauhiʻanga-hui, tā tongitongi mo e ʻana ʻi muí: Anga-lelei ʻa e Israel Antiquities Authority