Talitekeʻi ʻa Sētane, pea Te Ne Hola!

“Mou fakavaivaiʻi kimoutolu ki he ʻOtua. Ka mou tali tekeʻi ʻa e Tevolo, pea te ne hola meiate kimoutolu.”​—SEMISI 4:7.

1, 2. (a) Ko e hā ʻa e anga ʻo e Tēvoló ʻoku hā mahino ʻi ha ngaahi lea naʻe lēkooti ʻi he Aisea vahe 14? (e) Te tau lāulea ki he ngaahi fehuʻi ko e hā?

 KO E Tēvoló ʻa e tefitoʻi faʻifaʻitakiʻanga ʻo e anga-hikí. Ko ʻene pōlepolé ʻoku hā mahino ia ʻi he ngaahi lea naʻe lēkooti ʻe he palōfita ʻa e ʻOtuá ko ʻAiseá. Laka hake ʻi ha senituli ki muʻa ke hoko ʻa Papilōnia ko e hau tefito ʻi he māmaní, naʻe fakahaaʻi ai ʻa e kakai ʻa Sihová ʻi heʻenau fai ʻa e talaki ko eni ki he “Tuʻi Papilone”: “Naa ke behe i ho loto, Teu alu hake ki he lagi, teu fokotuu ke maoluga hake a hoku nofoaga i he gaahi fetuu oe Otua [ngaahi tuʻi ʻo e laine fakatuʻi ʻo Tēvitá] . . . teu tatau mo ia oku maoluga taha be.” (Aisea 14:​3, 4, 12-15, PM; Nomipa 24:17) Ko e pōlepole ʻa e “Tuʻi Papilone” naʻe meimei tatau ia mo e fakakaukau ʻa Sētané, ʻa e “ʻotua ʻo e tuʻu ko eni.” (2 Kolinito 4:4) Ka ko e anga-hiki ʻa Sētané ʻe ngata ia ʻi he fakatamaki, ʻo hangē pē ko e hoko ʻa e haʻa tuʻi Pāpiloné ki ha ngataʻanga fakamaá.

² Kae kehe, lolotonga ʻa e ʻi ai ʻa e Tēvoló, te tau tokanga nai ai ʻo fekauʻaki mo e ngaahi fehuʻi hangē ko ení: ʻOku totonu ke tau manavahē kia Sētane? Ko e hā ʻokú ne fakaʻaiʻai ai ʻa e kakaí ke nau fakatangaʻi ʻa e kau Kalisitiané? ʻE lava fēfē ke tau fakaʻehiʻehi mei hono ikunaʻi kitautolu ʻe he Tēvoló?

ʻOku Totonu Ke Tau Manavahē ʻi he Tēvoló?

3, 4. Ko e hā ʻoku ʻikai ilifia ai ʻa e kau Kalisitiane paní mo honau ngaahi tākangá ʻi he Tēvoló?

³ ʻOku fakaivimālohi ʻaupito ki he kau Kalisitiane paní ʻa e ngaahi lea ko eni ʻa Sīsū Kalaisí: “ʻOua te ke manavahē ki he ngaahi mamahi ʻoku ene ke hoko kiate ko e: ko eni ʻoku teu li homou niʻihi ʻe he Tevolo ki he pilisone, ko homou ʻahiʻahiʻi; pea te mou moʻua ʻi he mamahi ʻo ʻaho hongofulu: ka ke pikitai kiate au, ʻo aʻu ki he mate, pea te u ʻatu kiate koe ʻa e kalauni ʻo e moʻui.” (Fakahā 2:10) Ko e faʻahinga paní mo honau ngaahi takanga ʻoku nau maʻu ʻa e ʻamanaki fakaemāmaní ʻoku ʻikai te nau ilifia ʻi he Tēvoló. Ko e ʻikai ʻi ai ko eni ha manavaheé ʻoku ʻikai tupu ia mei ha loto-toʻa kuo ʻosi maʻu fakanatula. ʻOku hokó koeʻuhi ko ʻenau maʻu ʻa e manavahē anga-ʻapasia ki he ʻOtuá pea ‘hufanga ki he malu ʻo hono kapakaú.’—Sāme 34:9; 36:7.

⁴ Ko e muʻaki kau ākonga taʻemanavahē ʻa Sīsū Kalaisí naʻe fakamoʻoniʻi ʻa ʻenau faitōnungá ʻo aʻu ki he mate neongo ʻa e ngaahi meʻa naʻa nau faingataʻaʻia aí. Naʻe ʻikai te nau tō ki he manavahē ki he meʻa ʻe lava ʻe Sētane ko e Tēvoló ʻo faí, he naʻa nau ʻiloʻi ʻe ʻikai ʻaupito liʻaki ʻe Sihova ʻa e faʻahinga ʻoku fakamoʻoniʻi ʻenau mateaki kiate Iá. ʻI he tuʻunga meimei tatau, ʻi he fehangahangai mo e fakatanga kakaha he lolotonga ní, ʻoku fakapapauʻi ʻe he kau Kalisitiane paní mo honau takanga fakatapuí ke ʻoua ʻe motuhi ʻenau anga-tonu ki he ʻOtuá. Kae kehe, naʻe fakahaaʻi ʻe he ʻapositolo ko Paulá ʻe lava ʻe he Tēvoló ʻo fakatupunga ʻa e maté. ʻIkai ʻoku totonu ke ʻai ai ʻe he meʻa ko iá kitautolu ke tau manavahē?

 5. Ko e hā ʻoku tau ako mei he Hepelu 2:​14, 15?

 ⁵ Naʻe pehē ʻe Paula naʻe hoko ʻa Sīsū ko e toto mo e kakano koeʻuhí “ko e meʻa ʻi heʻene mate, ke ne fakakaʻanga ʻa e toko taha ʻa ia ʻoku aʻana ʻa e malohi ʻo e mate, ʻa ia ko e Tevolo. Pea ke ne fakatauʻataina ʻa e faʻahinga ko ia kotoa pe kuo nau moʻui ʻaki ʻa e nofo popula, heʻenau manavahe ki he mate.” (Hepelu 2:​14, 15) ʻI he tuʻunga ko e “toko taha ʻa ia ʻoku aʻana ʻa e malohi ʻo e mate,” naʻe puleʻi ʻe Sētane ʻa Siutasi ʻIsikaliote pea ngāueʻaki leva ʻa e kau taki Siú mo e kau Lomá ke nau tāmateʻi ʻa Sīsū. (Luke 22:3; Sione 13:​26, 27) Kae kehe, fakafou ʻi heʻene pekia fakaefeilaulaú, ʻoku fakatauʻatāinaʻi ai ʻe Sīsū ʻa e faʻahinga angahalaʻia ʻo e tangatá mei he nima ʻo Sētané pea ʻai ai ke tau malava ʻo maʻu ʻa e moʻui taʻengatá.—Sione 3:16.

6, 7. Ko e hā hono lahi ʻo e ngaahi founga ʻoku maʻu ʻe Sētane ke fakatupungaʻaki ʻa e maté?

⁶ Ko e hā hono lahi ʻo hono maʻu ʻe he Tēvoló ʻa e ngaahi founga ke fakatupungaʻaki ʻa e maté? Sai, mei he kamata ʻo e ngāue fulikivanu ʻa Sētané, ko ʻene ngaahi loí mo e tatakí kuó ne fakatupunga ʻa e mate ʻi he lotolotonga ʻo e faʻahinga ʻo e tangatá. ʻOku hoko ení koeʻuhi naʻe faiangahala ʻa ʻĀtama peá ne tuku mai ai ʻa e angahalá mo e maté ki he fāmili fakaetangatá. (Loma 5:12) Tānaki atu ki ai, kuo fakatangaʻi ʻe he kau sevāniti fakaemāmani ʻa Sētané ʻa e kau lotu ʻa Sihová, ʻo aʻu ʻi he taimi ʻe niʻihi ki he tuʻunga ʻo e maté, ʻo hangē ko ia naʻa nau fai ʻi he tuʻunga ʻo Sīsū Kalaisí.

⁷ Ka neongo ia, ʻoku totonu ke ʻoua te tau fakakaukau ʻe lava ke fakatupunga ʻe he Tēvoló ʻa e mate ʻa ha taha pē ʻokú ne loto ke ne tāmateʻi. ʻOku maluʻi ʻe he ʻOtuá ʻa e faʻahinga ʻoku ʻAʻaná pea ʻe ʻikai ʻaupito te ne fakangofua ʻa Sētane ke ne fakaʻauha ʻosi ʻa e kau lotu moʻoni kotoa pē ʻi he foʻi māmaní. (Loma 14:8) Ko e moʻoni, ʻoku fakaʻatā ʻe Sihova ʻa e fakatangá ke hoko mai ki he kotoa ʻo ʻene kakaí, pea ʻokú ne fakangofua ʻa e maté ke hoko ki he niʻihi ʻo kitautolu ko e tupu mei he ngaahi ʻoho ʻa e Tēvoló. Neongo ia, ʻoku ʻomai ʻi he Tohi Tapú ʻa e ʻamanaki fakaofo ʻo ha toetuʻu ki he faʻahinga ʻi he “tohi fakamanatu” ʻa e ʻOtuá—pea ʻoku halaʻatā ha meʻa ʻe lava ʻe he Tēvoló ʻo fai ke taʻofiʻaki ʻa e toe fakafoki ko ia ʻo e moʻuí!—Malakai 3:16; Sione 5:​28, 29; Ngāue 24:15.

Ko e Hā ʻOku Fakatangaʻi Ai Kitautolu ʻe Sētané?

 8. Ko e hā ʻoku ʻomai ai ʻe he Tēvoló ʻa e fakatanga ki he kau sevāniti ʻa e ʻOtuá?

⁸ Kapau ko e kau sevāniti mateaki kitautolu ʻa e ʻOtuá, ʻoku ʻi ai ha ʻuhinga tefito ki hono ʻomai ʻe he Tēvoló ʻa e fakatangá kiate kitautolú. Ko ʻene taumuʻá ke fakatupunga kitautolu ke tau fakangaloku ʻetau tuí. ʻOku tau maʻu ha vahaʻangatae mahuʻinga mo ʻetau Tamai fakahēvaní, pea ʻoku holi ʻa Sētane ke ne fakaʻauha ia. ʻOku ʻikai totonu ke fakaʻohovaleʻi kitautolu ʻe he meʻá ni. ʻI ʻĪteni, naʻe tomuʻa tala ai ʻe Sihova ʻe ʻi ai ʻa e fetāufehiʻaʻaki ʻi he vahaʻa ʻo e “fefine” fakaefakatātaá mo e “Ngata” pea ʻi he vahaʻa ʻo hona “hako” taki taha. (Senesi 3:​14, 15) ʻOku fakapapauʻi ʻe he Tohi Tapú ʻa e Tēvoló “ko e Ngata ʻo ono ʻaho” pea fakahaaʻi ʻi he taimi ní ʻoku nounou ʻa hono taimí pea ʻoku lahi ai ʻene ʻitá. (Fakahā 12:​9, 12) ʻI he  hokohoko atu ʻa e fetāufehiʻaʻaki ʻa e ongo “hako” ko e faʻahinga ʻoku tauhi faitōnunga kia Sihová ʻe lava ke nau ʻamanekina ʻe fakatangaʻi kinautolu. (2 Timote 3:12) ʻOkú ke lāuʻilo fekauʻaki mo e ʻuhinga tefito ki he fakatanga fakasētane peheé?

9, 10. Kuo langaʻi hake ʻe he Tēvoló ʻa e ʻīsiu ko e hā, pea ʻoku anga-fēfē ʻa e felāveʻi mo ia ʻa e ʻulungāanga ʻo e faʻahinga ʻo e tangatá?

⁹ Kuo langaʻi ʻe he Tēvoló ʻa e ʻīsiu ʻo e tuʻunga-hau fakalevelevá. ʻI he felāveʻi mo iá, kuó ne fehuʻia ʻa e anga-tonu ʻa e faʻahinga ʻo e tangatá ki honau Tokotaha-Fakatupú. Naʻe ʻomai ʻe Sētane ʻa e fakatanga ki he tangata faitotonu ko Siopé. Ko e hā hono ʻuhingá? Koeʻuhí ke maumauʻi ʻa e anga-tonu ʻa Siope kia Sihová. Ko e uaifi ʻo Siopé mo hono kau “fakalelu langaʻi mamahi” naʻa nau fakahoko ʻa e taumuʻa ʻa e Tēvoló ʻi he taimi ko iá. Hangē ko ia ʻoku fakahaaʻi ʻi he tohi ʻa Siopé, naʻe poleʻi ʻe he Tēvoló ʻa e ʻOtuá, ʻo taukaveʻi ʻe ʻikai ha tangata ʻe kei faitōnunga ai pē kiate Ia kapau ʻe fakaʻatā ʻa Sētane ke ne ʻahiʻahiʻi ʻa e tokotaha ko iá. Ka naʻe puke maʻu ʻe Siope ʻene anga-tonú, ʻo fakamoʻoniʻi ai ko Sētané ko ha tokotaha loi. (Siope 1:8–2:9; 16:2; 27:5; 31:6) ʻOku fakatangaʻi ʻe he Tēvoló ʻa e Kau Fakamoʻoni ʻa Sihová he ʻahó ni ʻi ha feinga ke maumauʻi ʻa ʻenau anga-tonú pea fakamoʻoniʻi ai ʻoku moʻoni ʻa ʻene polé.

¹⁰ ʻI hono ʻiloʻi ʻoku ʻomai ʻe he Tēvoló ʻa e fakatanga kiate kitautolu koeʻuhi ʻokú ne loto ʻaupito ke maumauʻi ʻetau anga-tonu ki he ʻOtuá ʻe lava moʻoni ʻo tokoniʻi ai kitautolu ke tau hoko ʻo loto-toʻa mo mālohi. (Teutalonome 31:6) Ko hotau ʻOtuá ʻa e Hau Fakalevelevá, pea te ne tokoniʻi kitautolu ke tauhi maʻu ʻetau anga-tonú. ʻOfa ke tau feinga maʻu pē ke ʻai ʻa e loto ʻo Sihová ke fiefia ʻaki ʻetau hoko ko e kau tauhi anga-tonu, ʻo ʻoange ai kiate ia ha tali ki he tokotaha-manuki lahí, ʻa Sētane ko e Tēvoló.—Palovepi 27:11.

“Fakahaofi Kimautolu mei he Fili”

11. Ko e hā ʻa e ʻuhinga ʻo e kole, “ʻOua naʻa ke fakahū kimautolu ki he ʻahiʻahi”?

¹¹ Ko e hoko ko ha tokotaha tauhi anga-tonú ʻoku ʻikai ko ha meʻa faingofua; ʻoku fiemaʻu ki ai ʻa e lotu tōtōivi. ʻOku tautefito ai e ʻaonga ʻa e ngaahi lea ʻo e sīpinga lotú. ʻI hano konga, naʻe pehē ai ʻe Sīsū: “ʻOua naʻa ke fakahū kimautolu ki he ʻahiʻahi; ka ke fakahaofi kimautolu mei he fili” pe tokotaha fulikivanú. (Mātiu 6:13) ʻOku ʻikai ʻahiʻahiʻi kitautolu ʻe Sihova ke tau faiangahala. (Semisi 1:13) Kae kehe, ʻoku lau ʻa e Tohi Tapú ʻi he taimi ʻe niʻihi ʻo fekauʻaki mo ʻene fai pe fakatupunga ʻa e ngaahi meʻá, lolotonga ia ko iá, ko hono moʻoní, ʻokú ne fakangofua pē kinautolu. (Lute 1:​20, 21) ʻI he lotu leva ʻo hangē ko ia naʻe fakahaaʻi ʻe Sīsuú, ʻoku tau kole ai kia Sihova ke ʻoua te ne fakaʻatā ke tau tō ki he ʻahiʻahí. Pea ʻe ʻikai te ne fai pehē, he ʻoku tau maʻu ʻa e fakafiemālie Fakatohitapu ko ení: “Ko e ʻOtua ko e toko taha ʻoku fai ki heʻene lea, pea ʻe ʻikai te ne fakangofua ke ʻahiʻahiʻi kimoutolu ʻo makehe atu ʻi hoʻomou mafai; kae kehe, te ne ngaohi fakataha mo e ʻahiʻahi hono haoʻanga foki mei ai, koeʻuhi ke lava hono katakiʻi.”—1 Kolinito 10:13.

12. Ko e hā ʻoku tau lotu ai: “Fakahaofi kimautolu mei he fili”?

¹² Hili ʻa e lave ki he ʻahiʻahí ʻi he sīpinga lotú, naʻe feʻungamālie hono leaʻaki ʻe Sīsū: “Fakahaofi kimautolu mei he fili” pe tokotaha fulikivanú. Ko e ngaahi liliu Tohi Tapu ʻe niʻihi ʻoku pehē ai: “Fakahaofi kimautolu mei he koví” (KF) pe “Maluʻi kimautolu mei he koví.” (Contemporary English Version) Kae kehe, ʻi he Tohi Tapú, ko e kupuʻi lea ‘fakahaofi mei he’ ʻoku ngāueʻaki tefito ia ʻi he fekauʻaki mo e kakaí, pea ko e Kōsipeli ʻa Mātiú ʻoku lave ai ki he Tēvoló ko e “Toko-Taha-Fakatauvele,” ko ha tokotaha. (Mātiu 4:​3, 11) Ko ia ʻoku mahuʻinga ke lotu ki he fakahaofi mei he “fili” pe tokotaha fulikivanú, ʻa Sētane ko e Tēvoló. ʻOkú ne feinga ke ʻai kitautolu ke tau faiangahala ki he ʻOtuá. (1 Tesalonaika 3:5) ʻI heʻetau fai ʻa e kole, “Fakahaofi kimautolu mei he fili” pe tokotaha fulikivanú, ʻoku tau kole ai ki heʻetau Tamai fakahēvaní ke ne tataki mo tokoniʻi kitautolu koeʻuhi ke ʻoua ʻe ikunaʻi kitautolu ʻe he Tēvoló.

 ʻOua ʻe Hoko ʻo Ikunaʻi ʻe he Tēvoló

13, 14. Ko e hā naʻe fiemaʻu ai ki he kau Kolinitoó ke liliu ʻenau founga feangainga ki ha tangata ʻi he fakatahaʻangá ʻa ia naʻe ʻulungāanga taʻetaau?

¹³ ʻI he taimi naʻe ekinaki ai ʻa Paula ki he kau Kalisitiane ʻi Kolinitoó ke nau fakamolemolé, naʻá ne tohi ai: “Ko ia ʻoku mou fakamolemole ni ha meʻa ki ai, ʻoku ou fakamolemole mo au: kaeʻumaʻā ko e fakamolemole aʻaku, ʻo kapau kuo u fakamolemole ha meʻa, kuo u fai ko e fakafofonga ʻo Kalaisi, pea koeʻuhi ko kimoutolu: telia naʻa kākāʻi [pe ikunaʻi] kitautolu ʻe Setane, he talaʻehai ʻoku ʻufikaua ʻiate kitautolu ʻa e ngaahi faliunga ʻa e toko taha ko ia.” (2 Kolinito 2:​10, 11) Ko e Tēvoló ʻoku lava ke ne ikunaʻi kitautolu ʻi he ngaahi founga kehekehe, ka ko e hā naʻe fai ai ʻe Paula ʻa e fakamatala naʻe toki ʻosi lave ki aí?

¹⁴ Naʻe valokiʻi ʻe Paula ʻa e kau Kolinitoó koeʻuhi naʻa nau fakaʻatā ha tangata ʻulungāanga taʻetaau ke ne kei nofo ʻi he fakatahaʻangá. Kuo pau pē naʻe fakafiefiaʻi ʻe he meʻá ni ʻa Sētane, he naʻe hoko ʻa e tuʻunga fakamā ki he fakatahaʻangá ʻi hono fakaʻatā ʻa e “feʻauaki ʻoku taha ʻana, naʻa mo e hiteni ʻe ʻikai te nau kataki ha meʻa pehe.” Naʻe faifai atu pē ʻo tuʻusi ʻa e tokotaha faihalá. (1 Kolinito 5:​1-5, 11-13) Naʻe fakatomala ki mui ʻa e tangatá. Kapau naʻe fakafisi ʻa e kau Kolinitoó ke fakamolemoleʻi pea toe fakafoki mai ʻa e tangata ko iá, naʻe mei ikunaʻi kinautolu ʻe Sētane ʻi ha toe founga ʻe taha. ʻO anga-fēfē? Te nau mei anga-fefeka ai mo taʻefaimeesi, ʻo hangē ko Sētané tonu. Kapau ko e tangata fakatomalá naʻe hoko ʻo ‘fongia ʻaupito, ʻo ka hulu atu ʻene mamahí’ peá ne tukuange fakaʻaufuli ʻa e lotu ki he ʻOtuá, ko e kau mātuʻá ʻe tautefito ʻenau fua ʻa e fatongia ki he meʻá ni ʻi he ʻao ʻo e ʻOtua mohu meesi ko Sihová. (2 Kolinito 2:7; Semisi 2:13; 3:1) Ko e moʻoni, ʻoku ʻikai ha Kalisitiane moʻoni te ne loto ke faʻifaʻitaki kia Sētane ʻaki ʻene hoko ʻo anga-fakamamahi, anga-fefeka mo taʻefaimeesi.

Maluʻi ʻAki ʻa e Teunga Tau mei he ʻOtuá

15. Ko e hā ʻa e faitau ʻoku tau faí, pea ʻoku fakatuʻunga ʻi he hā ʻa e ikuná?

¹⁵ Kapau ʻoku fiemaʻu ke fakahaofi kitautolu mei he Tēvoló, kuo pau ke tau fai ʻa e faitau fakalaumālie mo e ngaahi kongakau laumālie fulikivanú. Ko e ikuna ʻi he fehangahangai mo e ngaahi laumālie kovi peheé ʻoku fakatuʻunga ia ʻi heʻetau tui ʻa e teunga tau pe “mahafukotoa ʻa e ʻOtua.” (Efeso 6:​11-18) Ko e teunga tau ko ení ʻoku kau ai “ʻa e kofutau ko e maʻoniʻoni.” (Efeso 6:14) Ko Tuʻi Saula ʻo ʻIsileli ʻo e kuonga muʻá naʻá ne talangataʻa ki he ʻOtuá pea faingataʻaʻia ai ʻi he mole ʻa e laumālie māʻoniʻoní. (1 Samiuela 15:​22, 23) Ka ʻo kapau ʻoku tau tōʻongafai māʻoniʻoni pea tui ʻa e teunga tau kakato fakalaumālié, te tau maʻu ai ʻa e laumālie māʻoniʻoni ʻo e ʻOtuá pea mo e maluʻi ʻoku fiemaʻu ke fakafepakiʻiʻaki ʻa Sētane mo ʻene kau ʻāngelo fulikivanú, ʻa e kau tēmenioó.—Palovepi 18:10.

16. ʻE lava fēfē ke tau maʻu ʻa e maluʻi hokohoko mei he ngaahi kongakau laumālie fulikivanú?

¹⁶ Ki ha maluʻi hokohoko mei he ngaahi kongakau laumālie fulikivanú, ʻoku tau fiemaʻu, fakataha mo e ngaahi meʻa kehé, ke tau lau mo ako tuʻumaʻu ʻa e Folofola ʻa e ʻOtuá, ʻo ngāueleleiʻaki ʻa e ʻū tohi kuo tokonaki mai fakafou ʻi he “setuata anga-tonú.” (Luke 12:​42, NW) Te tau fakafonu ai hotau ʻatamaí ʻaki ʻa e ngaahi meʻa fakalaumālie lelei, ʻo fehoanaki mo e akonaki ʻa Paulá: “Ko ʻeku lea fakaʻosi, kainga. ʻIlonga ʻa e ngaahi meʻa ʻoku moʻoni, ʻilonga ʻa e ngaahi meʻa ʻoku tāu, ʻilonga ʻa e ngaahi meʻa ʻoku totonu, ʻilonga ʻa e ngaahi meʻa ʻoku maʻa, ʻilonga ʻa e ngaahi meʻa ʻoku fakaʻofoʻofa, ʻilonga ʻa e ngaahi meʻa ʻoku ongoongolelei, ʻio, ka ai ha ʻulungaanga lelei, pea ka ai ha  meʻa ʻoku fakamaloʻia, ko e ngaahi meʻa ia ke mou tokanga ki ai.”—Filipai 4:8.

17. Ko e hā te ne tokoniʻi kitautolu ke hoko ko e kau fanongonongo ola lelei ʻo e ongoongo leleí?

¹⁷ ʻOku ʻai kitautolu ʻe Sihova ke tau malava ʻo “tobuvaʻe aki ae teuteu oe ogoogolelei oe melino.” (Efeso 6:​15, PM) Ko e kau tuʻumaʻu ʻi he ngaahi fakataha faka-Kalisitiané ʻoku teuʻi ai kitautolu ke fanongonongo atu ʻa e ongoongo lelei ʻo e Puleʻanga ʻo e ʻOtuá. He fiefia ē ʻoku tau maʻu mei hono tokoniʻi ʻa e niʻihi kehé ke ako ʻa e moʻoni ʻa e ʻOtuá pea hokosia ʻa e tauʻatāina fakalaumālié! (Sione 8:32) Ko e “heletā ʻa e Laumalie, ʻa ia ko e Folofola ʻa e ʻOtua,” ʻoku mātuʻaki fiemaʻu ia ki hono maluʻi kitautolu mei he ngaahi akonaki loí mo hono “holoki ʻo e ngaahi kolotau.” (Efeso 6:17; 2 Kolinito 10:​4, 5) Ko hono ngāueʻaki pōtoʻi ʻa e Folofola kuo tohi ʻa e ʻOtuá, ʻa e Tohi Tapú, ʻoku tokoniʻi ai kitautolu ke akoʻi ʻa e moʻoní pea maluʻi kitautolu mei he tō ʻi he ngaahi kākā ʻa e Tēvoló.

18. ʻE lava fēfē ke tau “tuʻu [mālohi] ki he ngaahi tuʻutuʻuni kākā ʻa e Tevolo”?

¹⁸ Naʻe kamata ʻe Paula ʻa ʻene lāulea fekauʻaki mo hotau teunga tau fakalaumālié ʻaki ʻene pehē: “Mou tuku ke fakakaukaua kimoutolu ʻi he ʻEiki, ʻio, ʻi he ivi ʻo hono māfimafi. ʻAi kiate kimoutolu ʻa e mahafukotoa [pe teunga tau] ʻa e ʻOtua, koeʻuhi ke mou lava ke tuʻu [mālohi] ki he ngaahi tuʻutuʻuni kākā ʻa e Tevolo.” (Efeso 6:​10, 11) Ko e foʻi lea faka-Kalisi ʻoku liliu ko e ‘tuʻu mālohi’ ʻoku fakafehoanaki ia ki ha sōtia ʻoku tuʻu ʻi hono tuʻungá. ʻOku tau tuʻumaʻu ʻi he faitau fakalaumālié, neongo ʻoku ngāueʻaki ʻe Sētane ʻa e ngaahi founga kākā kehekehe ʻi heʻene ngaahi feinga ke veuki ʻa ʻetau fāʻūtahá, fakameleʻi ʻetau ngaahi akonakí pe maumauʻi ʻetau anga-tonu ki he ʻOtuá. Ka ko e ngaahi ʻoho ʻa e Tēvoló kuo ʻikai ke lavameʻa ia ʻi he aʻu mai ki he taimi ní—pea ʻe ʻikai ʻaupito ke lavameʻa ia! a

Talitekeʻi ʻa e Tēvoló, pea Te Ne Hola

19. Ko e hā ʻa e founga ʻe taha ke ngāue mālohi ai ʻi hono talitekeʻi ʻa e Tēvoló?

¹⁹ ʻE lava ke tau lavameʻa ʻi heʻetau faitau fakalaumālie mo e Tēvoló pea mo e ngaahi kongakau laumālie fulikivanu ʻoku ʻi he malumalu ʻo ʻene tatakí. ʻOku ʻikai ha ʻuhinga ia ke tetetete ai ʻi he manavahē kia Sētane, he naʻe tohi ʻe he ākonga ko Sēmisí: “Mou fakavaivaiʻi kimoutolu ki he ʻOtua. Ka mou tali tekeʻi ʻa e Tevolo, pea te ne hola meiate kimoutolu.” (Semisi 4:7) Ko e founga ʻe taha ke ngāue mālohi ai ʻi hono talitekeʻi ʻa Sētane mo e ngaahi meʻamoʻui laumālie fulikivanu ʻoku fāitaha mo iá ko e ʻikai ha kaunga ki he ngaahi tōʻonga fakamēsikí pe fakafaimaná pea mo e faʻahinga ʻoku nau fai iá. ʻOku fakahaaʻi mahino ʻe he Tohi Tapú ko e kau sevāniti ʻa Sihová kuo pau ke nau fakafisi ke hanga ki he ngaahi vavaló pe ke kau ʻi he ʻasitalolosiá, tongafisí mo e fakahaʻele faʻahikehé. Kapau ʻoku tau longomoʻui fakalaumālie mo mālohi, ʻoku ʻikai fiemaʻu ia ke tau ilifia telia naʻa fai mai ʻe ha taha ha fakalouʻakau kiate kitautolu.—Nomipa 23:23; Teutalonome 18:​10-​12; Aisea 47:​12-​15; Ngāue 19:​18-​20.

20. ʻE lava fēfē ke tau talitekeʻi ʻa e Tēvoló?

²⁰ ʻOku tau “tali tekeʻi ʻa e Tevolo” ʻaki ʻa e pipiki ki he ngaahi tuʻunga mo e ngaahi moʻoni Fakatohitapú pea ʻi he tuʻu mālohi ʻo fakafepakiʻi iá. ʻOku feongoongoi ʻa e māmaní mo Sētane koeʻuhí he ko ia ʻa hono ʻotuá. (2 Kolinito 4:4) Ko ia ʻoku tau siʻaki ai ʻa e ngaahi tōʻonga ʻa e māmaní, hangē ko e pōlepolé, siokitá, ʻulungāanga taʻetāú, fakamālohí mo e tuli ki he meʻa fakamatelié. ʻOku tau ʻiloʻi naʻe hola ʻa e Tēvoló ʻi he taimi naʻe talitekeʻi ai ʻe Sīsū ʻa ʻene ʻohó ʻaki hono ngāueʻaki ʻa e Tohi Tapú lolotonga ʻa e ʻahiʻahi ʻi he toafá. (Mātiu 4:​4, 7, 10, 11) ʻI he founga tatau, ko Sētané te ne ‘hola meiate kitautolu’ ʻi he ʻulungia ʻo kapau ʻoku tau fakamoʻulaloa kakato kia Sihova pea falala kiate Ia ʻi he lotu. (Efeso 6:18) ʻI he tokoni ʻa Sihova ko e ʻOtuá mo hono ʻAlo ʻofaʻangá, heʻikai lava ke fai mai ai ʻe ha taha ha maumau tuʻuloa kiate kitautolu—ʻikai, naʻa mo e Tēvoló ʻoku ʻikai!—Sāme 91:​9-​11.

[Fakamatala ʻi lalo]

Ko e Hā Hoʻo Talí?

• ʻOku totonu ke tau manavahē kia Sētane ko e Tēvoló?

• Ko e hā ʻoku ʻomai ai ʻe Sētane ʻa e fakatanga ki he kau Kalisitiané?

• Ko e hā ʻoku tau lotu ai ke fakahaofi kitautolu mei he “fili” pe tokotaha fulikivanú?

• ʻE lava fēfē ke tau lavameʻa ʻi hono fai ʻa e tau fakalaumālié?

[Fehuʻi ki he Ako]

[Fakatātā ʻi he peesi 26]

Ko e muʻaki kau muimui taʻemanavahē ʻa Kalaisí naʻe fakamoʻoniʻi ʻa ʻenau faitōnungá ʻo aʻu ki he mate

[Fakatātā ʻi he peesi 27]

Heʻikai lava ʻe he Tēvoló ke taʻofi ʻa e toetuʻu ʻa e faʻahinga ʻoku nau ʻi he manatu ʻa Sihová

[Fakatātā ʻi he peesi 28]

ʻOkú ke lotu ki ha fakahaofi mei he “fili”pe tokotaha fulikivanú?

[Fakatātā ʻi he peesi 29]

ʻOkú ke tui ʻa e teunga tau pe “mahafukotoa ʻa e ʻOtua”?