“Kuo Ma ʻIlo ʻa e Misaia”

“KUO MA ʻilo ʻa e Misaia.” “Ko e Toko Taha naʻe lea ki ai ʻa Mosese ʻi he Tohi Lao, mo e Kau Palofita, kuo mau ʻilo ia.” Ko e ongo Siu līʻoa ʻi he ʻuluaki senitulí naʻá na fai ʻa e ongo fanongonongo fakaʻohovale ko iá. Mālō ia ʻa e faifai ange pea aʻusia ʻa e ʻamanaki ki he Mīsaiá. Naʻá na tuipau ki ai!​—Sione 1:​35-​46.

ʻI hoʻo fakakaukau atu fekauʻaki mo iá, ʻi he vakai ki he puipuituʻa fakahisitōlia mo fakalotu ʻo e taimi ko iá, ʻoku toe mahuʻinga ange ai ʻa ʻena tuipaú. Naʻe ʻosi ʻasi ʻa e kau fakatauʻatāina lau pē ʻi he lotolotonga ʻo e ngaahi fakaʻaliʻali fiehā mo e talaʻofa lahi, ka naʻe vave ʻa e mole ʻa e ngaahi ʻamanakí ʻi he ʻikai lava ʻe he kau tangata ko iá ke fakatauʻatāinaʻi ʻa e kau Siú mei he ʻioke faka-Lomá.​—Ngāue 5:​34-​37.

Kae kehe, ko e ongo Siu ko iá​—ʻa ʻAnitelū mo Filipe—naʻe ʻikai ʻaupito te na veiveiua ʻi heʻena tuipau kuó na ʻilo ʻa e Mīsaia moʻoní. ʻI hono kehé, ʻi he ngaahi taʻu hoko mai aí, naʻe fakalalahi ai ʻena tuipaú ʻi heʻena sio tonu fakafoʻituitui ki he ngaahi mana naʻe fai ʻe he tangatá ni ʻi hono fakahoko ʻa e ngaahi tafaʻaki ʻo e ngafa ʻo e Mīsaiá.

Ko e hā naʻe tui ai ʻa e toko uá ni mo e niʻihi kehe tokolahi kiate iá, ʻo tuipau naʻe ʻikai ko ha Mīsaia loi pē ia pe ko ha foʻi kākā fakasiva ʻamanakí? Ko e hā ʻa e ngaahi fakamoʻoni naʻe ʻai ke fakatuipauʻi ai ko ia ʻa e Mīsaia moʻoní?

Fakatatau ki he fakamatala fakahisitōliá, naʻe fakapapauʻi ʻe ʻAnitelū mo Filipe ʻa Sīsū ʻo Nasaletí,  ʻa e tufunga ki muʻá, ko e Mīsaia ia naʻe fuoloa ʻa e tatali ki aí. (Sione 1:​46 [45, PM]) Ko ha faihisitōlia fakamākukanga ʻo e kuonga ko iá, ko Luke, ʻokú ne fakahaaʻi ko e haʻu ko eni ʻa e Mīsaiá naʻe hoko ia “ʻi hono hongofulu mā nima taʻu ʻo e pule ʻa Taipilio ko e Sisa.” (Luke 3:​1-3) Ko e taʻu ko ia hono 15 ʻo e pule ʻa Taipilioó naʻe kamata ia ʻi Sepitema ʻo e 28 T.S. pea ngata ʻi Sepitema ʻo e 29 T.S. ʻOku toe fakahaaʻi ʻe Luke ko e kau Siu ʻi he taimi ko ení naʻa nau “amanaki” ki he hoko mai ʻa e Mīsaiá. (Luke 3:​15, PM) Ko e hā naʻe ʻamanekina ai ia ʻi he taimi tefito ko iá? Tau sio angé ki aí.

Ngaahi Fakamoʻoni Faka-Mīsaia

ʻI he fakakaukau atu ki he ngafa mātuʻaki mahuʻinga ʻo e Mīsaiá, ʻe lava ke ke ʻiloʻi ai ko e Tokotaha-Fakatupú, ʻa Sihova, te ne tokonaki mai ʻi ha ʻuhinga lelei ʻa e ngaahi fakamoʻoni papau ke tokoniʻiʻaki ʻa e faʻahinga ʻāʻā mo faitōnungá ke nau fakapapauʻi ai ʻa e Mīsaia naʻe talaʻofa maí. Ko e hā hono ʻuhingá? Koeʻuhi ʻi he founga ko iá, ʻe ʻikai ke kākaaʻi ai ʻa e faʻahinga tāutaha ʻoku tokangá ʻe he kau kākaá, ʻo hangē ko ia naʻe hoko ki he kakai tokolahi ʻaupito.

ʻI hono fakafeʻiloaki ʻe ha ʻamipasitoa ʻa ia tonu ki ha puleʻanga ʻe taha, ʻoku ʻamanekina te ne fakapapauʻi ʻa hono lakangá ʻaki ʻa e ngaahi fakamoʻoni ʻoku fiemaʻu pau. ʻI he tuʻunga meimei tatau, naʻe ʻosi lēkooti fuoloa ki muʻa ʻe Sihova ʻa e ngaahi fiemaʻu ʻe aʻusia ʻe he Mīsaiá. Ko ia ai, ʻi he taimi naʻe ʻasi ai ʻa e “Fakafofonga Tefito,” ʻe hangē pē ia naʻá ne haʻu mo e pepa fakamatala, pe ngaahi fakamoʻoni, ʻa ia ʻe fakapapauʻi ai ʻa hono tuʻungá tonu.​—Hepelū 12:​2, NW.

Ko e ngaahi fiemaʻu ʻa ia ʻe pau ke tatau mo ia ʻa e ngaahi fakamoʻoní naʻe ʻomai ia ʻi he ngaahi kikite lahi ʻi he Tohi Tapú ʻa ia naʻe hiki ʻi he ngaahi laui senituli ki muʻa. Naʻa nau tomuʻa tala fakaikiiki ai ʻa e anga ʻo e hoko mai ʻa e Mīsaiá, ko e natula ʻo ʻene ngāue fakafaifekaú, ko ʻene faingataʻaʻia ʻi he nima ʻo e niʻihi kehé pea mo e faʻahinga pekia te ne hokosiá. Te ke mahuʻingaʻia nai ʻi hono ʻiloʻi ko e ngaahi kikite alafalalaʻanga ko iá naʻe toe tomuʻa tala ai ʻene toetuʻú, ko hono hakeakiʻi ki he nima toʻomataʻu ʻo e ʻOtuá pea ʻi hono fakaʻosí ko e ngaahi tāpuaki ʻe ʻomai ʻe hono Puleʻangá ʻi heʻene pule he kahaʻú. ʻI he foungá ni, naʻe tokonaki mai ai ʻe he ngaahi kikite ʻi he Tohi Tapú ha sīpinga laulōtaha ʻa ia ʻe fakatatau nai ki ha fakaʻilonga nima, ʻa ia ʻe lava ke fakapapauʻiʻaki ha foʻi toko taha pē.

Ko e moʻoni, ʻi he taimi naʻe ʻasi ai ʻa Sīsū ʻi he māmaní ʻi he 29 T.S., naʻe teʻeki ai ke fakahoko ʻa e ngaahi kikite faka-Mīsaia kotoa pē ʻi he taimi ko iá. Ko e fakatātaá, naʻe teʻeki ai ke fakapoongi ia pea toe fokotuʻu hake. Ka neongo ia, ko ʻAnitelū, Filipe mo e tokolahi kehé naʻa nau tui kia Sīsū koeʻuhi ko e meʻa naʻá ne akoʻí mo faí. Naʻa nau mamata ʻi he fakamoʻoni lahi fau, ko hono moʻoní, ko ia ʻa e Mīsaiá. Kapau naʻá ke moʻui ʻi he taimi ko iá pea naʻe lava ke ke ako tonu ai ʻa e fakamoʻoní fakataha mo ha ʻatamai ʻatā, ngalingali naʻá ke mei tuipau ai mo koe foki ko Sīsū ʻa e Mīsaiá.

Ko ha Fakamoʻoni Faʻu Fetuiaki

Ko e hā naʻá ne mei tokoniʻi koe ke ke aʻu ki he fakamulituku ko iá? ʻI he faai mai ʻa e ngaahi senitulí, naʻe ʻomai ai ʻe he kau palōfita ʻi he Tohi Tapú ʻa e ngaahi fiemaʻu papau kuo pau ke aʻusia ʻe he Mīsaiá, ʻo fakapapauʻi taʻetoefehālaaki ai iá. ʻI hono ʻomai ʻe he kau palōfitá ʻa e ngaahi fakaikiiki ko ení ʻi he faai mai ʻa e ngaahi senitulí, naʻe eʻa māmālie hake ai ha fakamoʻoni ʻo e Mīsaiá. Naʻe fakahaaʻi ʻe Henry H. Halley: “Tau pehē ko ha kau tangata ʻo e ngaahi fonua kehekehe, ʻa ia kuo teʻeki ai te nau fesiofaki, pe fetuʻutaki ki muʻa ʻi ha faʻahinga founga, te nau lue atu ki ha loki, pea taki taha tuku hifo ki lalo ha konga maka māpele tā tongitongi, ʻa ia ko e ngaahi kongá, ʻi he taimi ʻe fakahokohoko fakataha aí, te nau faʻu ha maka fakamanatu haohaoá​—ʻe fakamatalaʻi fēfeeʻi ia ʻo ʻikai fakaʻosiʻaki ai naʻe tā ʻe ha toko taha ʻa e ngaahi fakaikiikí pea ʻave ki he tangata taki taha ʻa ʻene kongá?” Naʻá ne ʻeke leva: “ʻOku lava fēfē ke fakamatalaʻi ʻa e faʻu fetuiaki fakaofo ko eni ʻo e moʻui mo e ngāue ʻa Sīsuú, ʻa ia naʻe fakatahatahaʻi ʻe ha kau faʻu-tohi kehekehe ʻo e ngaahi senituli kehekehe, ʻi he ngaahi kuonga ki muʻa ke haʻu ʻa Sīsuú ʻi ha toe ʻuhinga, ka ko e FOʻI ʻATAMAI MAHULU HAKE ʻI HE TANGATÁ ʻE TAHA naʻá ne tokangaʻi ʻa e tohí?” Naʻe fakaʻosiʻaki ʻe Halley, “Ko e mana ia ʻo e ngaahi kuongá!”

 Ko e “mana” ko ení naʻe kamata ia ʻi he ʻuluaki tohi ʻo e Tohi Tapú. Tānaki atu ki he ʻuluaki kikite ʻa e Tohi Tapú ʻa ia naʻe fakahaaʻi ai ʻa e ngafa ʻo e Mīsaiá, ko e tokotaha-tohi ʻo e Senesí naʻá ne lēkooti ko e Mīsaiá ʻe hoko mai ia ʻi he laine ʻo e hako ʻo ʻĒpalahamé. (Senesi 3:​15; 22:​15-​18) Ko ha toe fakamoʻoni ʻe taha naʻe fakahaaʻi ai ko e Mīsaiá ʻe haʻu mei he matakali Siutá. (Senesi 49:10) Naʻe tala ʻe he ʻOtuá ki he kau ʻIsilelí fakafou ʻia Mōsese ko e Mīsaiá ʻe hoko ia ko ha tangata-lea mo faifakahaofi lahi ange ʻia Mōsese.​—Teutalonome 18:18.

Lolotonga ʻa e taimi ʻo Tuʻi Tēvitá, naʻe fakaeʻa ai ʻe he kikité ko e Mīsaiá ʻe hoko ko e ʻea ia ʻo Tēvita ki he taloní pea ko Hono Puleʻangá ʻe ‘fokotuʻu ia ʻo taʻengata.’ (2 Samiuela 7:​13-​16) Ko e tohi ʻa Maiká naʻe fakahaaʻi ai ko e Mīsaiá ʻe ʻaloʻi mai ia ʻi he kolo ʻo Tēvitá, ʻi Pētelihema. (Maika 5:2) Naʻe tomuʻa tala ʻe ʻAisea ʻe ʻaloʻi Ia ʻe ha tāupoʻou. (Aisea 7:​14) Naʻe tala ki muʻa ʻe he palōfita ko Malakaí ko ʻEne haʻú ʻe fanongonongo ia ʻe ha taha hangē ko ʻIlaisiaá.​—Malakai 4:​5, 6.

Ko ha fakaikiiki papau lahi ange ʻo e Mīsaiá naʻe hā ia ʻi he tohi Tanielá. ʻI hono fakapapauʻi ʻa e taʻu tonu ʻo e ʻasi ʻa e Mīsaiá, ʻoku pehē ʻe he kikité: “Ke ke ʻilo foki, pea ke mahino kiate koe; mei he ʻalu atu ʻa e fekau ke fokotuʻu foʻou mo langa ʻa Selusalema, ʻo aʻu kia Misaia ko e ʻEiki, ko e uike ʻe fitu mo e uike ʻe onongofulu ma ua: ʻe toe fokotuʻu mo langa ʻa malaʻe mo e ʻa, pea ʻi he ngaahi taimi ʻefihia foki.”​—Fakaʻītali ʻamautolu; Taniela 9:​25.

Ko Tuʻi ʻAtasease ʻo Pēsiá naʻá ne fai “ʻa e fekau” ke toe fakafoʻou mo toe langa ʻa Selusalemá ʻi he taʻu hono 20 ʻo ʻene pulé. Ko ʻene pulé naʻe kamata ia ʻi he 474 K.M., ko ia ko hono taʻu hono 20 ko e 455 K.M. (Nehemaia 2:​1-8) Fakatatau ki ai, ko ha vahaʻa taimi ʻo e ngaahi uike fakaekikite ʻe 69 (7 tānaki 62) ʻe hoko ia ʻi he vahaʻa ʻo e fekau ke toe fakafoʻou mo e toe langa ʻa Selusalemá pea mo e ʻasi ʻa e Mīsaiá. Ko ia, ko e uike moʻoni ʻe 69, ʻoku tatau ia mo e ʻaho pē ʻe 483, pe siʻi hifo ʻi he taʻu ʻe uá. Ka ʻi hono ngāueʻaki ʻa e lao fakaekikite kuo fokotuʻu ʻo e “ʻaho ki he taʻu,” ʻoku fakahaaʻi ai ko e Mīsaiá ʻe ʻasi ia ʻi he taʻu ʻe 483 ki mui ai, ʻi he 29 T.S.​—Isikeli 4:6. a

Neongo naʻe ʻasi ha faʻahinga naʻa nau taukaveʻi ko e Mīsaiá kinautolu ʻi he ngaahi taimi kehekehe, ko Sīsū ʻo Nasaletí naʻá ne ʻasi ʻi he māmaní ʻi he 29 T.S. (Luke 3:​1, 2) ʻI he taʻu tonu ko iá, naʻe ʻalu ai ʻa Sīsū kia Sione Papitaiso pea naʻe papitaiso ia ʻi he vaí. Naʻe pani leva ai ʻa Sīsū ʻaki ʻa e laumālie māʻoniʻoní ki he tuʻunga ko e Mīsaiá. Ki mui ai, ko Sione, ʻa e tokotaha fakamelomelo hangē ko ʻIlaisiā naʻe tomuʻa talá, naʻá ne fakafeʻiloaki ʻa Sīsū kia ʻAnitelū mo ha ākonga ʻe taha, ʻo ui Ia ko e “Lami ʻa e ʻOtua, ʻa ia ʻoku ne ʻave ʻa e angahala ʻa māmani.”​—Sione 1:​29; Luke 1:​13-​17; 3:​21-​23.

Laine Hohokó mo e ʻIloʻanga ʻo e Mīsaiá

Ko e ngaahi kikite fakamānavaʻí naʻe fakafehokotaki ai ʻa e Mīsaiá ki ha ngaahi fāmili Siu makehe. Ko ia ʻoku ʻuhinga lelei ai pē ko e Tokotaha-Fakatupu tokaimaʻanangá te ne fokotuʻutuʻu ʻa e hoko mai ʻa e Mīsaiá ʻi ha taimi, ʻa ia naʻe ala maʻu ai ʻa e ngaahi lēkooti laine hohokó ke fakapapauʻiʻaki ʻa hono tupuʻangá.

ʻOku fakamatala ʻa e Cyclopedia ʻa McClintock mo Strong: “ʻOku lava ke siʻi ʻa e veiveiua ko e ngaahi lēkooti ʻo e ngaahi matakali mo e ngaahi fāmili Siú naʻe mole ia ʻi hono fakaʻauha ʻo Selusalema [ʻi he 70 T.S.], ʻo ʻikai ki muʻa ai.” ʻOku ʻi ai ʻa e ngaahi fakaʻilonga māʻalaʻala ko Mātiu mo Luké naʻá na tohi ʻa ʻena ongo Kōsipelí ki muʻa ʻi he 70 T.S. Ko ia ai, naʻe lava ke na vakai ki he ngaahi lēkooti ko ení ʻi hono tātānaki ʻena ngaahi  fakamatala fekauʻaki mo e tupuʻanga ʻo Sīsuú. (Mātiu 1:​1-​16; Luke 3:​23-​38) Pea ko e moʻoni ʻi ha ʻīsiu ʻo ha meʻa mahuʻinga moʻoni pehē, ko e tokolahi ʻo hona toʻutangatá naʻa nau fiemaʻu nai ke fakapapauʻi ʻiate kinautolu ʻa e tupuʻanga ʻo Sīsuú.

Ko ha Hokonoa ʻa e Fakahoko ʻia Sīsuú?

Kae kehe, ʻoku malava ke pehē ko e fakahoko ʻia Sīsū ʻa e ngaahi kikite faka-Mīsaiá ko haʻane hokonoa pē? ʻI hano fakaʻekeʻeke, naʻe tali ai ʻe ha mataotao ʻe taha: “ʻOku ʻikai malava ke pehē. ʻOku fuʻu lahi ʻa e ngaahi tuʻungá ʻo ʻikai ai malava ke hokonoa. Naʻe fikaʻi ʻe ha taha ʻo ʻiloʻi ai ko e malava ko ia ke fakahoko ha kikite pē ʻe valú ko ha foʻi hokonoa ia ʻe taha ʻi he piliona ʻe teau.” Ke fakatātaaʻi ʻa e ngaahi tuʻunga ko iá, naʻá ne pehē: “Kapau naʻá ke maʻu ʻa e foʻi fika ko ení ʻi ha koini siliva, te nau ʻufiʻufi ʻa e vahefonua ʻo Tekisisí [ko ha ʻēlia sikuea kilomita ʻe 690,000] ʻi ha loloto ko e mita ʻe 0.6. Kapau naʻá ke fakaʻilongaʻi ha koini siliva ʻe taha ʻi honau lotolotongá pea ʻai ha taha kuo haʻi hono matá ke ne taufā holo ʻi he vahefonuá kotoa pea punou ke toʻo hake ha foʻi koini ʻe taha, ʻe hokonoa nai haʻane fili ʻa e taha ko ia kuo fakaʻilongaʻí?” Naʻá ne fakahaaʻi leva ko e ngaahi tuʻunga ko iá “ko e tuʻunga tatau pē ia ʻo e lava ke fakahoko ʻe ha taha pē ʻi he hisitōliá ʻa e valu pē ʻo e ngaahi kikite [faka-Mīsaiá].”

Neongo ia, ʻi he lolotonga ʻa ʻene ngāue fakafaifekau taʻu ʻe tolu mo e kongá, naʻe fakahoko ai ʻe Sīsū ʻo ʻikai ko e valu pē ka ko e ngaahi kikite lahi ʻi he Tohi Tapú. ʻI he vakai ki he fakamoʻoni lahi fau peheé, naʻe fakaʻosiʻaki ai ʻe he mataotaó: “Ko Sīsū​—pea ko Sīsū pē taha ʻi he kotoa ʻo e hisitōliá​—naʻe lava ke ne fai iá.”

“Haʻu” ʻa e Mīsaiá

ʻOku hā mahino, naʻe haʻu ʻa e Mīsaiá ʻi he 29 T.S. ʻi he tokotaha ko Sīsū ʻo Nasaletí. Ko ʻene haʻu ia ʻi he tuʻunga ko ha Tokotaha-Huhuʻi anga-fakatōkilalo mo faingataʻaʻia. Naʻe ʻikai te ne haʻu ko ha Tuʻi ikuna-fakaʻaufuli ke toʻo ʻa e ʻioke fakamafasia ʻa e kau Lomá, ʻo hangē ko ia ʻoku hā ngali naʻe ʻamanekina ʻe he tokolahi taha ʻo e kau Siú pea aʻu ki hono kau muimuí. (Aisea, vahe 53; Sakalaia 9:9; Ngāue 1:​6-8) Kae kehe, ko ʻene haʻu ʻi he kahaʻú, naʻe tomuʻa tala ʻe ʻi he mālohi ia mo e tuʻunga mafai lahi.​—Taniela 2:​44; 7:​13, 14, PM.

Ko hano ako fakalelei ʻo e ngaahi kikite Fakatohitapú kuo fakatuipauʻi ai ʻa e kakai fakaʻuhinga takatakai ʻi he foʻi kolopé ko e Mīsaiá naʻe haʻu ʻi he ʻuluaki senitulí, pea naʻe pau ke ne toe foki mai. ʻOku fakamoʻoniʻi ʻe he fakamoʻoní ko ʻene toe foki mai naʻe tomuʻa talá, ʻa e kamataʻanga ʻo ʻene “ʻi aí,” naʻe hoko ia ʻi he 1914. b (Mātiu 24:​3-​14, NW) ʻI he taʻu ko iá, naʻe fakanofo taʻehāmai ai ʻa Sīsū ʻi hēvani ko e Tuʻi ʻo e Puleʻanga ʻo e ʻOtuá. Taimi nounou mei ai, te ne ngāue ke toʻo mei he māmaní ʻa e ngaahi nunuʻa ʻo e angatuʻu ʻi ʻĪtení. Ko ʻene Pule Taʻu ʻe Afe hoko mai aí ʻe tāpuakiʻi ai ʻa e faʻahinga kotoa ʻoku nau fakahāhā ʻa e tui kiate ia ko e Hako naʻe talaʻofá, ko e Mīsaia, ʻa ia “ʻoku ne ʻave ʻa e angahala ʻa māmani.”​—Sione 1:​29; Fakahā 21:​3, 4.

ʻE fiefia ʻa e Kau Fakamoʻoni ʻa Sihová ke lāulea mo koe ki he fakamoʻoni ko iá pea ke fakahaaʻi atu mei he Tohi Tapú ʻa e meʻa ʻe lava ke ʻuhinga ki ai ʻa e pule ʻa e Mīsaiá kiate koe pea ki he faʻahinga ʻokú ke ʻofa aí.

[Fakamatala ʻi lalo]

[Taiakalami/Fakatātā ʻi he peesi 6, 7]

455 K.M., ko e “fekau ke fokotuʻu foʻou . . . ʻa Selusalema”

29 T.S., hoko mai ʻa e Mīsaiá

Taʻu ʻe 483 (ngaahi uike fakaekikite ʻe 69)​—Taniela 9:​25

1914, fakanofo tuʻi ʻa e Mīsaiá ʻi hēvani

Ko e Mīsaiá kuo vavé ni ke ne fakangata ʻa e fulikivanú pea ngaohi ʻa e māmaní ko ha palataisi