Ngaahi Meʻa Mahuʻinga mei he Tohi Esetá
ʻOku Moʻui ʻa e Folofola ʻa Sihová
Ngaahi Meʻa Mahuʻinga mei he Tohi Esetá
KO E palaní ʻe ʻikai pē lava ke taʻehoko ia. Ko e tāmateʻi tavale ʻo e kau Siú ʻe fakaʻāuliliki mo lavameʻa. ʻI ha foʻi ʻaho ʻosi fakapapauʻi ʻe taha, ko e kotoa ʻo e kau Siu ʻoku nau nofo ʻi he ʻemipaeá, ʻa ia ʻoku lele mei ʻInitia ki ʻItiopeá, ʻe fakaʻauha kinautolu. Ko e fakakaukau ia ʻa e tokotaha-palani ʻo e foʻi faʻufaʻú. Neongo ia, ko ha foʻi fakaikiiki mātuʻaki mahuʻinga kuo mole ia mei heʻene tokangá. Ko e ʻOtua ʻo e ngaahi langí ʻe lava ke ne fakahaofi ʻe ia ʻa ʻene kakai filí mei ha faʻahinga tuʻunga fakatupu mate pē. Ko e fakahaofí ʻoku lēkooti ia ʻi he tohi Tohi Tapu ʻa Esetá.
ʻI hono hiki ia ʻe ha tangata taʻumotuʻa Siu ko Motekiai, ʻoku kāpui ʻe he tohi Esetá ʻa e vahaʻa taimi ʻo e ngaahi taʻu nai ʻe 18 lolotonga ʻo e pule ʻa e Tuʻi Pēsia ko ʻAhasiveló, pe ko Sease I. ʻOku fakahaaʻi ʻe he talanoa fakaueʻiloto ko ʻení ʻa e anga hono fakahaofi ʻe Sihova ʻa hono kakaí mei he ngaahi faʻufaʻu kovi ʻa honau ngaahi filí, neongo ʻoku movetevete lahi ʻa ʻene kau sevānití ʻi ha fuʻu ʻemipaea lahi. ʻI he ʻahó ni, ko e ʻilo ko iá ko e moʻoni ʻoku fakaivimālohi ia ki he kakai ʻa Sihová, ʻa ia ʻoku nau ʻoatu ʻa e ngāue toputapu kiate ia ʻi he ngaahi fonua ʻe 235. ʻIkai ko ia pē, ko e faʻahinga kuo fakamatalaʻi ʻi he tohi Esetá ʻoku ʻomai ai ʻa e ngaahi faʻifaʻitakiʻanga ke tau faʻifaʻitaki ki ai pea mo e ngaahi faʻifaʻitakiʻanga kehe ʻoku totonu ke tau fakaʻehiʻehi mei ai. Ko e moʻoni, “ko e folofola ʻa e ʻOtua, ko e koto moʻui mo e koto malohi.”—Hepelu 4:12.
KUO PAU KE FAKALALOA ʻA E KUINÍ
ʻI he taʻu hono tolu ʻo ʻene pulé (493 K.M.), ʻoku fokotuʻutuʻu ʻe Tuʻi ʻAhasivelo ha fuʻu kai efiafi fakatuʻi. Ko Kuini Vāsiti ʻa ia ʻoku ʻiloa ʻi heʻene ʻofá, ʻokú ne langaʻi ʻa e taʻehōifua lahi ʻa e tuʻí pea ʻoku fakahifo ia mei hono tuʻungá. ʻOku filiʻi ʻa e fefine Siu ko Hatasa mei he kotoa ʻo e kau tāupoʻou fakaʻofoʻofa ʻo e fonuá ke ne fetongi ʻa hono tuʻungá. ʻI he tataki ʻa Motekiai ʻokú ne tuongaʻaneʻakí, ʻokú ne ʻai ke puli ʻa hono tuʻunga ko e Siú pea ngāueʻaki ʻa hono hingoa faka-Pēsiá, ʻa e ʻĒsetá.
Faifai atu pē, ko ha tangata hīkisia ko hono hingoá ko Hāmani ʻokú ne hiki hake ki he tuʻunga ko e palēmiá. ʻOku ʻita lahi ʻa Hāmani ʻi he fakafisi ʻa Motekiai ke ‘tuʻulutui, ʻo hu kia Hamaní,’ ko ia ʻokú ne faʻufaʻu ai ke fakaʻauha ʻa e kau Siu kotoa ʻi he ʻEmipaea Pēsiá. (Eseta 3:2) ʻOku fakalotoʻi ʻe Hāmani ʻa ʻAhasivelo ke ne felotoi mo ia pea lavameʻa ʻi hono ʻai ʻa e tuʻí ke ne faʻu ha foʻi tuʻutuʻuni fakapuleʻanga ke fakahoko ʻa e tāmate tavale ko ʻení. ʻOku “tauangaʻa mo e efu” ʻa Motekiai. (Eseta 4:1) Kuo pau ke kau mai ʻa ʻĒseta ki ai. ʻOkú ne fakaafeʻi ʻa e tuʻí mo ʻene palēmiá ki ha fuʻu kai efiafi ʻaʻana. ʻI heʻena ō fiefia ki aí, ʻoku kole fakalelei ange ʻe ʻĒseta kiate kinaua ke na ō ange ki ha toe fuʻu kai efiafi ʻe taha ʻi he ʻaho hono hokó. ʻOku fiefia ʻa Hāmani. Kae kehe, ʻokú ne ʻita ʻi he fakafisi ʻa Motekiai ke fakalāngilangiʻi iá. ʻOku faʻufaʻu ʻe Hāmani ke tāmateʻi ʻa Motekiai ki muʻa he fuʻu kai efiafi ʻi he ʻaho hono hokó.
Tali ki he Ngaahi Fehuʻi Fakatohitapú:
1:3-5—Naʻe feʻunga nai ʻa e fuʻu kai efiafí mo e ʻaho ʻe 180? ʻOku ʻikai ke fakahaaʻi ia ʻe he konga tohí naʻe lōloa pehē ʻa e fuʻu kai efiafí ka naʻe fakahāhā ʻe he tuʻí ki heʻene kau ʻōfisá ʻa e ngaahi koloa mo e fakaʻofoʻofa ʻo hono puleʻanga lāngilangiʻiá ʻo feʻunga mo e ʻaho ʻe 180. Mahalo naʻe ngāueʻaki ʻe he tuʻí ʻa e fakatahataha fuoloa ko ʻení ke fakaʻaliʻali loto-vēkeveke ʻa e lāngilangi ʻo hono puleʻangá koeʻuhí ke maongo ki he kau nōpelé ʻo fakatuipauʻi ai kia kinautolu ʻa ʻene malava ke fakahoko ʻene ngaahi palaní. ʻI heʻene peheé, naʻe lava pē ke ʻuhinga ʻa e Eseta vahe 1 veesi 3 mo e 5 ki he fuʻu kai efiafi ʻaho ʻe 7 naʻe fakahoko ʻi he ngataʻanga ʻo e fakatahataha ʻaho ʻe 180.
1:8 (PM)—ʻI he founga fē naʻe ‘fai ai ae inú o fakatatau ki he fonó ʻo ikai buleʻi malohi e ha toko tahá’? ʻI he tuʻunga ko ʻení, naʻe ʻai ai ʻe Tuʻi ʻAhasivelo ʻo ʻikai fakakau ʻa e meʻa ʻa ia ʻoku hā kuo hoko ko ha tōʻonga faka-Pēsia ʻo e fefakaʻaiʻaiʻaki ke inu ha lahi pau ʻi he ngaahi fakatahataha peheé. “Naʻa nau lava ke inu lahi pe siʻisiʻi ʻo faiʻaki ʻenau saiʻiá,” ko e lau ia ʻa e maʻuʻanga fakamatala ʻe taha.
1:10-12—Ko e hā naʻe hanganaki fakafisi ai ʻa Kuini Vasitai ke ʻalu ki he tuʻí? ʻOku fakahuʻunga ʻa e kau mataotao ʻe niʻihi ʻo pehē naʻe fakafisi ʻa e kuiní ia ke talangofua koeʻuhí naʻá ne fili ke ʻoua ʻe fakamāʻulaloʻi ia ʻi he lotolotonga ʻo e kau fakaafe huʻakavaʻia ʻa e tuʻí. Pe mahalo nai ko e kuini fakaʻofoʻofa ʻi tuʻa ia ko ʻení naʻe ʻikai anganofo moʻoni ia. Lolotonga ʻoku ʻikai fakahaaʻi ʻe he Tohi Tapú ʻa e ʻuhinga ki heʻene peheé, naʻe fakakaukau ʻa e kau tangata poto ia ʻo e ʻaho ko iá ko e talangofua ki he husepānití ko ha ʻīsiu pau ia pea ko e faʻifaʻitakiʻanga kovi ko ia ʻa Vāsití te ne tākiekina ʻe ia ʻa e kotoa ʻo e ngaahi uaifi ʻi he ngaahi vahefonua ʻo Pēsiá.
2:14-17—Naʻe fai ʻe ʻĒseta ha ngaahi vā fakaefehokotaki fakasino taʻetaau mo e tuʻí? Ko e talí ko e ʻikai. ʻOku pehē ʻe he fakamatalá ko e kau fefine kehe naʻe ʻomi ki he tuʻí naʻe fakafoki kinautolu ʻi he pongipongí ki he fale hono ua ʻi he malumalu e mafai ʻo e ʻiunoke ʻa e tuʻí, ʻa ia “naʻa ne tauhi ʻa e kau sinifu.” Ko e kau fefine naʻa nau fakamoleki ʻa e poó mo e tuʻí naʻa nau hoko ai ko ʻene kau sinifu, pe ngaahi uaifi hono ua. Kae kehe, naʻe ʻikai ʻave ʻa ʻĒseta ia ki he fale ʻo e kau sinifú ʻi he hili ʻene sio ki he tuʻí. ʻI he taimi naʻe ʻomi ai ʻa ʻĒseta ki he ʻao ʻo ʻAhasiveló, “naʻe ʻofa ʻa e tuʻi kia Eseta ʻo lahi hake ʻi he kau fefine kotoa, pea naʻe lahi ʻa e ʻofa mo e tokanga ʻa e tuʻi ki ai ʻi he kau tāupoʻou kotoa.” (Eseta 2:17) Naʻe anga-fēfē ʻene maʻu ʻa e “ʻofa mo e tokanga” ʻa ʻAhasiveló? ʻI he founga tatau ko ia naʻá ne maʻu ai ʻa e ʻofa ʻa e niʻihi kehé. “Naʻa ne [Hēkai] matamataleleiʻia ʻi he taʻahine, pea naʻa ne ʻofa ai.” (Eseta 2:8, 9) Naʻe leleiʻia ʻa Hēkai ia ʻiate ia ʻo fakatuʻunga pē ʻi he meʻa naʻá ne mātaá—ko hono fōtungá mo hono ngaahi ʻulungāanga leleí. Ko hono moʻoní, “naʻe ʻofeina ʻa Eseta ʻe he kakai kotoa naʻe sio ki ai.” (Eseta 2:15) ʻI he tuʻunga meimei tatau, naʻe maongo ki he tuʻí ʻa e meʻa naʻá ne mātā ʻia ʻĒsetá pea ko ia naʻá ne hoko ai ʻo ʻofa ʻiate ia.
3:2; 5:9—Ko e hā naʻe fakafisi ai ʻa Motekiai ke punou kia Hāmaní? Naʻe ʻikai hala ia ki he kau ʻIsilelí ke fakamālōʻiaʻi ʻa e tuʻunga māʻolunga ange ʻo ha tokotaha māʻolunga ʻaki ʻa e fakatōmapeʻe kiate kinautolú. Kae kehe, ʻi he tuʻunga ʻo Hāmaní, naʻe kau ki ai ʻa e meʻa lahi ange ia. Ko Hāmaní ko ha tokotaha ʻĒkaki, mahalo pē ko ha tokotaha ʻAmaleki, pea naʻe fakaʻilongaʻi ʻe Sihova ia ʻa e kau ʻAmalekí ki he fakaʻauha. (Teutalonome 25:19) ʻI he vakai ʻa Motekiaí, ko e punou kia Hāmaní ko ha ʻīsiu ia ʻo e anga-tonu kia Sihová. Naʻá ne fakafisi mataʻāʻā, ʻo fakahaaʻi ko ha tokotaha Siu ia.—Eseta 3:3, 4.
Ngaahi Lēsoni kia Kitautolu:
2:10, 20; 4:12-16. Naʻe tali ʻe ʻĒseta ʻa e fakahinohino mo e akonaki mei ha tokotaha lotu matuʻotuʻa ʻa Sihova. ʻOku tau poto ai ke “talangofua kiate kinautolu oku fakahinohino [kitautolú], bea [tau] fakavaivai.”—Hepelu 13:17, PM.
2:11; 4:5. ʻOku totonu ke ‘ʻoua naʻa tau taki taha tokanga ki he meʻa ʻaʻatá pe, ka ki he meʻa ʻa e kakai kehé foki.’—Filipai 2:4.
2:15. Naʻe fakahāhā ʻe ʻĒseta ʻa e anga-fakanānā mo e mapuleʻi-kita ʻaki ʻa e ʻikai kole ki ha toe siueli lahi ange pe vala lelei ange ʻi he meʻa naʻe tokonaki ʻe Hēkaí. Ko e “teuʻaki ʻa e tangata fufū ʻo e loto, ʻio, ʻaki ʻa e meʻa taʻe ʻauha ko e angava[i]vai mo e angamalū” naʻe maʻu ai ko ē ʻe ʻĒseta ʻa e hōifua ʻa e tuʻí.—1 Pita 3:4.
2:21-23. Ko ʻĒseta mo Motekiaí ko e ongo faʻifaʻitakiʻanga lelei kinaua ʻo e “anganofo . . . ki he ngaahi pule ʻoku maʻolunga.”—Loma 13:1.
3:4. ʻI he ngaahi tuʻunga ʻe niʻihi, ʻe fakapotopoto nai ke hanganaki fakalongolongo ʻo fekauʻaki mo hotau tuʻungá, ʻo hangē ko ia naʻe fai ʻe ʻĒseta ʻi hono tuʻungá. Kae kehe, ʻi he taimi ʻoku haʻu ai ki he tuʻu ʻi he ngaahi ʻīsiu mahuʻingá, ʻo hangē ko ia ko e tuʻunga-hau ʻo Sihová pea mo ʻetau anga-tonú, kuo pau ke ʻoua te tau manavahē ke ʻai ke ʻiloʻi ko e Kau Fakamoʻoni kitautolu ʻa Sihova.
4:3. ʻI he fehangahangai mo e ngaahi ʻahiʻahí, ʻoku totonu ke tau hanga kia Sihova ʻi he faʻa lotu ki ha mālohi mo ha poto.
4:6-8. Naʻe kumi ʻa Motekiai ki ha fakaleleiʻanga fakalao ki he fakamanamana naʻe fai ʻe he faʻufaʻufono ʻa Hāmaní.—Filipai 1:7.
4:14. Ko e falala pau ʻa Motekiai kia Sihová naʻe alafaʻifaʻitakiʻanga ia.
4:16. ʻI he falala fakaʻaufuli kia Sihová, naʻe fehangahangai faitōnunga mo loto-toʻa ai ʻa ʻĒseta mo ha tuʻunga naʻe lava ke iku ai ki haʻane mate. ʻOku mātuʻaki mahuʻinga ke tau ako ke falala kia Sihova ʻo ʻikai kiate kitautolu.
5:6-8. Koeʻuhi ke maʻu ʻa e hōifua ʻa ʻAhasiveló, naʻe fakaafeʻi ai ia ʻe ʻĒseta ki ha fuʻu kai efiafi hono ua. Naʻá ne ngāueʻaki ʻa e fakapotopoto, ʻa ia ʻoku totonu ke tau fai pehē.—Palovepi 14:15.
NGAAHI FEMALIUAKI HOKOHOKO
ʻI he hoko ʻa e ngaahi meʻá, kuo hoko ai ha foʻi mafuli fakaʻaufuli ia mei he meʻa naʻe toki hokó. ʻOku tautau ʻa Hāmani ia ʻi he ʻakau naʻá ne faʻu moʻo Motekiaí, pea ko e tokotaha naʻe fakataumuʻa ki aí ʻoku hoko ia ko e palēmiá! Fēfē nai ʻa e palani ke tāmateʻi tavale ʻa e kau Siú? ʻI he fekauʻaki mo iá, ʻe ʻi ai ha femaliuaki fakafokifā.
ʻOku toe lea hake ʻa ʻĒseta faitōnunga. ʻI hono tuku ʻene moʻuí ki he faingataʻá, ʻokú ne hā ʻi he ʻao ʻo e tuʻí mo ha kole koeʻuhi ke kumi ha faʻahinga founga ke taʻofiʻaki ʻa e faʻufaʻu ʻa Hāmaní. ʻOku ʻiloʻi ʻe ʻAhasivelo ʻa e meʻa ʻoku fiemaʻu ke faí. Ko ia ʻi heʻene faifai pea aʻu ki he ʻaho ʻo e tāmate tavalé ʻoku tāmateʻi, ʻo ʻikai ko e kau Siú ia, ka ko e faʻahinga ia ko ē ʻoku nau kumi ke fakamamahiʻi kinautolú. ʻOku fakahoko ʻe Motekiai ha tuʻutuʻuni fakapuleʻanga ke fakahoko ʻa e Kātoanga ʻo e Pulimí ʻo tuʻo taha he taʻu ke fakamanatuʻaki ʻa e fuʻu fakahaofi ko ʻení. ʻI he tuʻunga ko e fika ua hake pē kia Tuʻi ʻAhasiveló, ʻoku ngāue ʻa Motekiai ‘ʻo feingaʻi ʻa e lelei ʻa hono kakaí, ʻo ne lea malū ki hono faʻahingá kotoa.’—Eseta 10:3.
Tali ki he Ngaahi Fehuʻi Fakatohitapú:
7:4 (PM)—ʻE anga-fēfē ke ʻomi ʻe hono fakaʻauha ʻa e kau Siú ʻa e “kovi ki he tuʻi”? ʻI hono fakahaaʻi pōtoʻi ʻa e malava ʻo hono fakatau atu ʻa e kau Siú ko e kau pōpulá, naʻe fakamamafaʻi ʻe ʻĒseta ʻa e tuʻunga kovi ʻe ʻomi ki he tuʻí ʻi hono fakaʻauha kinautolú. Ko e konga siliva ʻe 10,000 naʻe palōmesi ange ʻe Hāmani ki he tānakiʻanga koloa ʻa e tuʻí naʻe fuʻu siʻisiʻi ʻa hono mahuʻingá ʻoʻona ʻi he koloa naʻe mei fakatupulekina kapau naʻe faʻufaʻu ʻe Hāmani ke fakatau atu ʻa e kau Siú ko e kau pōpula. Kapau naʻe fakahoko ʻa e faʻufaʻu ʻa Hāmaní ʻe mei iku foki ai ʻo mate ʻa e kuiní.
7:8—Ko e hā naʻe fakapūlou ai ʻe he kau ʻōfisa ʻi he fakamaauʻangá ʻa e fofonga ʻo Hāmaní? ʻOku ngalingali naʻe ʻaí ke fakahuʻungaʻaki ki he tuʻunga fakamā pe tautea ʻoku ene ke hokó. Fakatatau ki he maʻuʻanga fakamatala ʻe taha, “naʻe fakapūlou ʻi he taimi ʻe niʻihi ʻe he kakai ʻo e kuonga muʻá ʻa e ʻulu ʻo e faʻahinga ko ia ʻe fakapōngí.”
8:17 (PM)—ʻI he founga fē naʻe ‘hoko ai ae kakai toko lahi oe fonuá, ko e Jiú’? Naʻe tokolahi ʻa e kau Pēsia naʻe faifai pē ʻo nau hoko ko e kau ului Siu, ʻi he fakakaukau ko e foʻi tuʻutuʻuni fakapuleʻanga ke taʻofi e tāmate tavalé ko ha fakaʻilonga ia ʻo e hōifua ʻa e ʻOtuá ki he kau Siú. Ko e foʻi tefitoʻi moʻoni tatau pē ʻoku ngāueʻaki ki hono fakahoko ʻo ha kikite ʻoku maʻu ʻi he tohi Sakalaiá. ʻOku pehē ai: “ʻE puke ʻe ha tuʻunga tangata ʻe toko hongofulu, mei he ngaahi lea kehekehe ʻo e ngaahi puleʻanga, ʻio te nau puke ki he kapaʻi kofu ʻo ha tangata Siu, heʻenau pehe, Te tau ō mo kimoutolu; he kuo mau fanongo ʻoku ʻiate kimoutolu ʻa e ʻOtua.”—Sakalaia 8:23.
9:10, 15, 16—Neongo ko e tuʻutuʻuni fakapuleʻanga naʻá ne fakamafaiʻi ʻa hono faʻao fakamālohi ʻo e koloa veté, ko e hā naʻe fakaʻehiʻehi ai ʻa e kau Siú mei hono fai iá? ʻI heʻenau fakafisí ʻoku ʻikai ai ha toe veiveiua ko ʻenau taumuʻá ko e fakahaofi-kita, ʻo ʻikai ko e fakakoloaʻi-kitá.
Ngaahi Lēsoni kia Kitautolu:
6:6-10. “Ko e fieʻeiki ko e fakamelomelo ʻo e haveʻi: pea ko e angahiki ko e fakamelomelo ʻo e hinga.”—Palovepi 16:18.
7:3, 4. ʻOku tau fakapapauʻi loto-toʻa kitautolu ko e Kau Fakamoʻoni ʻa Sihova, neongo ko hono fai iá ʻe lava ke iku ai ki he fakatangá?
8:3-6. ʻE malava pea ʻoku totonu ke tau fakatangi ki he ngaahi mafai fakapuleʻangá mo e ngaahi fakamaauʻangá ki ha maluʻanga mei he filí.
8:5. ʻI ha founga pōtoʻi naʻe ʻikai ke lave ʻa ʻĒseta ia ki he fatongia ʻo e tuʻí ʻi he tuʻutuʻuni fakapuleʻanga ne faʻufaʻu ke fakaʻauha ʻa hono kakaí. ʻI he tuʻunga meimei tatau, ʻoku fiemaʻu ke tau hoko ʻo pōtoʻi ʻi he taimi ʻoku tau fai ai ha fakamoʻoni ki he kau ʻōfisa māʻolungá.
9:22. ʻOku totonu ke ʻoua te tau fakangaloʻi ʻa e kau masiva ʻi hotau lotolotongá.—Kaletia 2:10.
ʻE Tokonaki ʻe Sihova ha “Fakahaofi mo ha Fakamoʻui”
ʻOku lave ʻa Motekiai ki he taumuʻa ʻa e ʻOtuá ʻi hono maʻu ʻe ʻĒseta ʻa e ngeia fakatuʻí. ʻI hono fakamanamanaʻí, ʻoku ʻaukai mo lotu ʻa e kau Siú ki ha tokoni. ʻOku hā taʻefakaafeʻi ʻa e kuiní ʻi he ʻao ʻo e tuʻí pea ʻi he taimi taki taha ʻoku talitali lelei ai ia. ʻOku ʻikai ke lava ʻa e tuʻí ʻo mohe ʻi he pō tonu mahuʻinga ko ʻení. Ko e moʻoni, ko e tohi Esetá ʻoku fekauʻaki ia mo hono faʻufaʻu ʻe Sihova ʻa e ngaahi meʻa ʻoku hokó ke ʻaonga ia ki hono kakaí.
Ko e fakamatala fakatoʻoaloto ʻo e tohi Esetá ko ha fakalototoʻa fakahangatonu ia kia kitautolu ʻi heʻetau nofo ʻi he “kuoga oe gataaga.” (Taniela 12:4, PM) “I he gaahi aho fakamui,” pe konga fakaʻosi ʻo e taimi ʻo e ngataʻangá, ko Koki ʻo Mēkokí—ʻa Sētane ko e Tēvoló—te ne fai ha ʻoho fakaʻosi fakahangatonu ki he kakai ʻa Sihová. Ko ʻene taumuʻá ke fakaʻauhamālie ʻa e kau lotu moʻoní. Kae hangē ko ia ʻi he ʻaho ʻo ʻĒsetá, ʻe tokonaki ʻe Sihova ha “fakahaofi mo ha fakamoʻui” maʻa ʻene kau lotú.—Isikeli 38:16-23; Eseta 4:14.
[Fakatātā ʻi he peesi 10]
ʻĒseta mo Motekiai ʻi he ʻao ʻo ʻAhasiveló