ʻOku Akoʻi ʻe Sihova ʻa e Kau Tauhi-Sipí ke Tokangaʻi ʻEne Fanga Sipí

“ʻOku foaki poto ʻe Sihova; ʻoku mei hono fofonga ʻa e ʻilo mo e [“ʻiloʻilo,” NW].”​—PALOVEPI 2:6.

1, 2. Ko e hā ʻoku kakapa atu ai ʻa e kau tangata ʻosi papitaisó ki ha fatongia lahi ange ʻi he fakatahaʻangá?

 “NAʻÁ KU fiefia lahi ʻi hono fakanofo au ko ha tokotaha mātuʻá,” ko e lau ia ʻa Nick, ʻa ia kuó ne ngāue ko ha ʻovasia ʻi he taʻu ʻe fitu. “Naʻá ku vakai ki he monuú ni ko ha faingamālie ia ke fakalahi ai ʻeku ngāue kia Sihová. Naʻá ku ongoʻi ko hoku moʻua ia ke fakamālōʻiaʻi Ia ʻi he meʻa kotoa kuó Ne fai maʻakú. Naʻá ku toe loto ke u tokoni ki he ngaahi mēmipa ʻo e fakatahaʻangá ki he kakato taha ʻe ala lavá, ke tokoniʻi kinautolu ʻi he founga tatau pē ko ia kuo tokoniʻi ai au ʻe he kau mātuʻa kehé.” Kae kehe, lolotonga ʻene ongoʻi fiefiá naʻá ne toe ongoʻi loto-hohaʻa foki. ʻOku hoko atu ʻa Nick: “Koeʻuhi naʻe teʻeki ai ke u taʻu 30 ʻi he taimi naʻe fakanofo mātuʻa ai aú, naʻá ku loto-moʻua ʻo pehē ʻe ʻikai te u maʻu ʻa e pōtoʻi feʻunga ʻoku fiemaʻu ke tauhi ola lelei ʻaki ʻa e fakatahaʻangá, ʻa ia ko e ʻiloʻiló mo e potó.”

² ʻOku lahi ʻa e ngaahi ʻuhinga ke fiefia ai ʻa e faʻahinga ko ia ʻoku fakanofo ʻe Sihova ke tokangaʻi ʻene fanga sipí. Naʻe fakamanatu ʻe he ʻapositolo ko Paulá ki he kau mātuʻa ʻi ʻEfesoó ʻa e ʻuhinga ʻe taha ke fiefia aí ʻi heʻene lave ki he lea ʻa Sīsū, ʻo ne pehē: “ʻOku te [fiefia] lahi ʻi he fai ha foaki atu, ʻi heʻete maʻu ha foaki mai.” (Ngāue 20:35) ʻI he ngāue ko ha sevāniti fakafaifekau pe ko ha tokotaha mātuʻá ʻokú ne ʻomai ki he kau tangata ʻosi papitaisó ha toe ngaahi founga ke foaki ai kia Sihova pea ki he fakatahaʻangá. Ko e fakatātaá, ʻoku ngāue fakataha ʻa e kau sevāniti fakafaifekaú mo e kau mātuʻá. ʻOku toe tokangaʻi ʻe he kau sevānití ni ha toe ngaahi fatongia lahi kehe ʻa ia ʻoku lahi ʻa e taimi ʻoku fiemaʻu ki aí. ʻOku ueʻi ʻa e fanga tokoua peheé ʻe he ʻofa ki he ʻOtuá pea mo e kaungāʻapí ke nau fakahoko ai ʻa e ngāue mātuʻaki mahuʻinga.—Maake 12:​30, 31.

 3. Ko e hā ʻoku toumoua nai ai ʻa e niʻihi ke kakapa atu ki he ngaahi monū ʻi he fakatahaʻangá?

³ Fēfē ha tangata Kalisitiane ʻokú ne toumoua nai ke kakapa atu ki he monū ke hoko ko ha sevāniti pea faai atu ʻo hoko ko ha tokotaha mātuʻa koeʻuhí ʻokú ne ongoʻi taʻefeʻunga? ʻOkú ne loto-hohaʻa nai hangē ko Nick, ʻo pehē ʻoku ʻikai te ne maʻu ʻa e pōtoʻi ʻoku fiemaʻu ke hoko ai ko ha tauhi-sipi lavameʻá. ʻI he tuʻunga ko ha tokoua ʻosi papitaisó, ʻokú ke ʻi he lotolotonga ʻo e faʻahinga ʻoku nau ongoʻi peheé? ʻOku totonu pē ʻa e ngaahi loto-moʻua peheé ia. ʻE fai ʻe he kau mātuʻá ha fakamatala kia Sihova ki he founga ʻo ʻenau fakafeangai ki he fanga sipí. Naʻe pehē ʻe Sīsū: “Ko ia kuo foaki ki ai ha meʻa lahi, ʻe fiemaʻu mei ai ha meʻa lahi: pehē foki, ka tuku ʻe he kakai ha fuʻu meʻa ki ha taha ke tauhi, pea hulu atu mo e meʻa ʻe ʻeke kiate ia.”—Luke 12:48.

 4. ʻOku anga-fēfē hono tokoniʻi ʻe Sihova ʻa e faʻahinga ko ia ʻokú ne fakanofo ke nau tokangaʻi ʻene fanga sipí?

⁴ ʻOku ʻamanekina mai ʻe Sihova mei he faʻahinga ko ia ʻokú ne fakanofo ko e kau sevāniti mo e kau mātuʻá ke nau fua ʻa e fatongiá ʻiate kinautolu pē? ʻIkai, ʻokú ne tokonaki mai ʻa e tokoni ʻaonga ʻoku fakaivia ai kinautolu ke ʻoua ʻe ngata pē ʻi he fekuki mo iá ka ke toe lavameʻa ai. Hangē ko ia naʻe lāulea ki ai ʻi he kupu ki muʻá, ʻoku foaki ʻe Sihova kiate kinautolu hono laumālie māʻoniʻoní, ʻa ia ko hono fuá ē ʻokú ne tokoniʻi kinautolu ke nau tokanga ʻofa ki he fanga sipí. (Ngāue 20:28; Kaletia 5:​22, 23) Tānaki atu ki ai, ʻoku foaki ʻe Sihova kiate kinautolu ʻa e poto, ʻilo mo e ʻiloʻilo. (Palovepi 2:6) ʻOku anga-fēfē ʻene fai ʻení? Tau lāulea angé ki he ngaahi founga ʻe tolu ʻa ia ʻoku akoʻi ai ʻe Sihova ʻa e faʻahinga tāutaha ko ia ʻokú ne fakanofo ke nau tokangaʻi ʻene fanga sipí.

 Akoʻi ʻe he Kau Tauhi-Sipi Taukei

 5. Ko e hā naʻe hoko ai ʻa Pita mo Sione ko e ongo tauhi-sipi lavameʻá?

⁵ ʻI he tuʻu ʻa e ongo ʻapositolo ko Pita mo Sioné ʻi he ʻao ʻo e Sanetalimí, naʻe vakai ʻa e kau fakamaau poto fakamāmani ko iá ki he ongo tangatá ni ko e “ongo meʻa taʻe kolisi kinaua, pea taʻe maʻu tuʻunga.” ʻOku moʻoni, naʻe malava ke na lautohi mo tohi, ka naʻe ʻikai te na maʻu ha ako fakalāpai ʻi hono ako ʻo e Tohi Tapú. Neongo ia, naʻe fakamoʻoniʻi ʻe Pita mo Sione fakataha mo e kau ākonga kehé ko e kau faiako lavameʻa kinautolu, ʻi hono ueʻi ʻa e tokolahi ʻo e faʻahinga ko ia naʻe fanongo kiate kinautolú ke nau hoko ko e kau tui. Naʻe anga-fēfē ʻa e hoko ʻa e kau tangata taʻemaʻu tuʻunga ko ʻení ko ha kau faiako tuʻu-ki-muʻa peheé? ʻI he hili ʻa e fanongo kia Pita mo Sioné, naʻe hanga hake ʻa e fakamaauʻangá ʻo nau “vakai, ta ko e ongo meʻa naʻe faʻa ʻia Sisu.” (Ngāue 4:​1-4, 13) Ko hono moʻoní, naʻá na maʻu ʻa e laumālie māʻoniʻoní. (Ngāue 1:8) Ka naʻe toe hā mahino ʻo aʻu ki he kau fakamaau kui fakalaumālie ko iá, naʻe akoʻi ʻe Sīsū ʻa e ongo tangatá ni. ʻI he lolotonga ʻa e ʻi māmani ʻa Sīsū fakataha mo kinautolú, naʻá ne akoʻi ʻa e kau ʻapositoló ʻo ʻikai ki he founga pē ke fakatahatahaʻi mai ai ʻa e faʻahinga hangē ha sipí kae toe pehē foki ki he founga ke tauhi ai kinautolú ʻi he taimi pē ʻoku nau hoko ai ko e konga ʻo e tākangá.—Mātiu 11:29; 20:​24-28; 1 Pita 5:4.

 6. Ko e hā ʻa e faʻifaʻitakiʻanga naʻe fokotuʻu ʻe Sīsū mo Paula ʻi hono akoʻi ʻo e niʻihi kehé?

⁶ ʻI he hili ʻa e toetuʻu ʻa Sīsuú, naʻá ne hokohoko atu ke akoʻi ʻa e faʻahinga ko ia naʻá ne fakanofo ko e kau tauhi-sipí. (Fakahā 1:1; 2:1–​3:22) Ko e fakatātaá, naʻá ne fili ʻa Paula pea tokangaʻi hono akoʻí. (Ngāue 22:​6-10) Naʻe houngaʻia ʻa Paula ʻi hono akoʻi iá peá ne vahevahe atu ʻa e meʻa naʻá ne akó ki he kau mātuʻa kehé. (Ngāue 20:​17-35) Hangē ko ʻení, naʻá ne vaheʻi ʻa e taimi mo e ivi lahi ʻi hono akoʻi ʻo Tīmote ke hoko “ko e tangata ngaue ʻoku ʻikai mā” ʻi he ngāue ʻa e ʻOtuá. (2 Timote 2:15) Naʻe maʻu ʻe he ongo tangatá ni ha vahaʻangatae vāofi. Ki muʻá, naʻe tohi ʻa Paula fekauʻaki mo Tīmote: “Hage koe foha moe tamai, kuo behe ene gaue mo au i he ogoogolelei.” (Filipai 2:​22, PM) Naʻe ʻikai feinga ʻa Paula ke ʻai ʻa Tīmote pe ko ha taha kehe pē ko haʻane ākonga. ʻI hono kehé, naʻá ne fakalototoʻaʻi ʻa e kaungātuí ke nau hoko ko e ‘kau faʻifaʻitaki kiate ia, ʻo hange foki ko ʻene faʻifaʻitaki aʻana kia Kalaisí.’—1 Kolinito 10:34 (1Ko 11:​1, PM).

7, 8. (a) Ko e hā ʻa e meʻa naʻe hokosia ʻokú ne fakahaaʻi ʻa e lelei ʻoku hoko ʻi he faʻifaʻitaki ʻa e kau mātuʻá kia Sīsū mo Paulá? (e) Ko fē ʻa e taimi ʻoku totonu ke kamata ai ʻa e kau mātuʻá ʻi hono akoʻi ʻa e faʻahinga ʻoku ʻamanekina ke hoko ko e kau sevāniti fakafaifekau mo e kau mātuʻá?

⁷ ʻI he faʻifaʻitaki kia Sīsū mo Paulá, ʻoku tamuʻomuʻa ʻa e kau tauhi-sipi taukeí ʻi hono akoʻi ʻo e fanga tokoua ʻosi papitaisó, ʻo maʻu ai ʻa e ngaahi ola lelei meimei tatau. Fakakaukau angé ki he meʻa naʻe hokosia ʻe Chad. Naʻe ʻohake ia ʻi ha fāmili māvahevahe fakalotu ka naʻe fakanofo ia ki muí ni ko ha tokotaha mātuʻa. ʻOkú ne pehē: “ʻI he ngaahi taʻu kuo maliu atú, naʻe tokoniʻi ai au ʻe ha kau mātuʻa taukei ke u fakalakalaka fakalaumālie. Koeʻuhi ko ʻeku tamaí ko ha tokotaha taʻetui, naʻe fakahāhā ʻe he kau mātuʻa ko iá ha mahuʻingaʻia fakafoʻituitui ʻiate au pea nau hoko ʻo hangē ha fanga tamai fakalaumālié kiate au. Naʻa nau vaheʻi ʻa e taimi ke akoʻi ai au ʻi he ngāue fakamalangá, pea ki mui aí, naʻe tautefito ki ha tokotaha mātuʻa ʻe taha naʻá ne akoʻi au ki hono tokangaʻi ʻa e ngaahi fatongia fakaefakatahaʻanga naʻá ku maʻú.”

⁸ Hangē ko ia ʻoku fakahaaʻi ʻe he meʻa naʻe hokosia ʻe Chad, ʻoku kamata hono akoʻi ʻe he kau tauhi-sipi ʻiloʻiló ʻa e faʻahinga ʻoku ʻamanekina ke nau hoko ko e kau sevāniti fakafaifekau mo e kau mātuʻá ki muʻa fuoloa ia pea toki fakalakalaka feʻunga ʻa e faʻahingá ni ke nau taau ai ki he ngaahi monū peheé. Ko e hā ʻoku pehē aí? Koeʻuhi ʻoku tuʻutuʻuni mai ʻe he Tohi Tapú ʻoku fiemaʻu ki he kau sevāniti fakafaifekaú mo e kau mātuʻá fakatouʻosi ke nau aʻusia ha tuʻunga māʻolunga fakaeʻulungāanga mo fakalaumālie ki muʻa ke fakanofo kinautolú. Kuo pau ke ʻuluaki ‘siviʻi kinautolu.’—1 Timote 3:​1-10.

 9. Ko e hā ʻa e fatongia ke fai ʻe he kau tauhi-sipi matuʻotuʻá, pea ko e hā ʻoku nau fai ai iá?

⁹ Kapau ko e taumuʻá ia ke siviʻi ʻa e fanga tokoua ʻosi papitaisó, tā ʻoku totonu pē ke ʻuluaki akoʻi kinautolu. Ke fakatātaaʻi: Kapau ʻoku tala ki ha tokotaha ako ʻi ha ʻapiako ke ne sivi ʻi ha sivi faingataʻa naʻe ʻikai ke fai ʻe he kau faiakó ia hano akoʻi ia ki ai, ʻe lava ʻa e tokotaha akó ʻi he sivi ko iá? ʻOku mahino pē te ne tō. Ko ia ai, ʻoku fiemaʻu ʻa e akoʻi. Kae kehe, ʻoku akoʻi ʻe he kau faiako tokangá ʻa e kau akó ʻo ʻikai ko e fakataumuʻa pē ke lava ʻi ha sivi ka ke toe ngāueʻaki ʻa e ʻilo ʻoku nau maʻú. ʻI he tuʻunga meimei tatau, ʻoku tokoniʻi ʻe he kau mātuʻa ngāue tōtōiví ʻa e fanga tokoua ʻosi papitaisó ke nau fakatupulekina ʻa e ngaahi ʻulungāanga ʻoku  fiemaʻu ki ha tangata ke fakanofó ʻaki hono akoʻi papau kinautolu. ʻOku nau fai pehē ʻo ʻikai ʻi he taumuʻa pē ke tokoni ke fakanofo ʻa e fanga tokouá ni ka ke tokoniʻi kinautolu ke nau toe malava foki ke tokanga feʻunga ki he fanga sipí. (2 Timote 2:2) Ko ia ai, kuo pau ki he fanga tokoua ʻosi papitaisó ke nau fai ʻenau tafaʻakí pea ngāue mālohi ke aʻusia ʻa e ngaahi tuʻunga poto ʻoku fiemaʻu ki ha sevāniti fakafaifekau pe ko ha tokotaha mātuʻá. (Taitusi 1:​5-9) Ka neongo ia, ʻi heʻenau loto-lelei ke akoʻi ʻa e faʻahinga ko ia ʻoku nau kakapa atú ki he fatongia ʻi he fakatahaʻangá, ʻoku malava ai ʻe he kau tauhi-sipi taukeí ke tokoniʻi kinautolu ke nau fakalakalaka vave ange.

10, 11. ʻE lava fēfē ʻe he kau tauhi-sipí ke nau akoʻi ʻa e niʻihi kehé ki ha ngaahi monū lahi angé?

¹⁰ ʻE lava fēfē ʻe he kau tauhi-sipi taukeí ʻo akoʻi papau ʻa e niʻihi kehé ke nau tokangaʻi ʻa e ngaahi fatongia ʻi he fakatahaʻangá? ʻOku kamataʻaki pē ʻa e mahuʻingaʻia ʻi he fanga tokoua ʻi he fakatahaʻangá, ʻo faʻa ngāue mo kinautolu ʻi he ngāue fakamalangá mo tokoniʻi kinautolu ke nau malava lelei ange ke tofa “totonu ʻa e folofola ʻo e moʻoni.” (2 Timote 2:15) ʻOku lāulea ʻa e kau mātuʻa matuʻotuʻá mo e fanga tokoua ko iá ki he ngaahi fiefia ʻoku maʻu mei hono tauhi ʻo e niʻihi kehé pea mo e nonga ʻoku nau maʻu mei hono fokotuʻu mo hono aʻusia ʻa e ngaahi kolo fakalaumālié. ʻOku nau toe ʻoatu ʻi he anga-ʻofa ha ngaahi fokotuʻu papau ki he founga ʻe lava ke hoko ai ha tokoua ko ha ‘faʻifaʻitakiʻanga [lelei ange] ki he fanga sipí.’—1 Pita 5:​3, 5.

¹¹ ʻI hono fakanofo pē ha tokoua ko ha sevāniti fakafaifekaú, ʻoku hokohoko atu ʻa e kau tauhi-sipi potó ʻi hono akoʻi iá. ʻOku pehē ʻe Bruce, ʻa ia kuó ne ngāue ko ha tokotaha mātuʻa ʻi he ngaahi hongofuluʻi taʻu: “ʻOku ou saiʻia ke u tangutu fakataha mo ha sevāniti toki fakanofo foʻou ʻo fakamanatu kiate ia ʻa e ngaahi fakahinohino kuo pulusi mai ʻe he kalasi tamaioʻeiki anga-tonu mo potó. Te ma toe lau ha ngaahi fakahinohino pē fekauʻaki mo hono fatongia kuo vaheʻi angé, pea ʻoku ou loto leva ke u ngāue fakataha mo ia kae ʻoua leva kuó ne maheni mo hono ngaahi fatongiá.” ʻI hono maʻu ʻe ha sevāniti ʻa e taukeí, ʻe toe lava ke akoʻi ia ʻi he ngāue fakatauhisipí. ʻOku hoko atu ʻa Bruce: “ʻI he taimi ʻoku ou ʻave ai ha sevāniti fakafaifekau ʻi ha ʻaʻahi fakatauhisipi, ʻoku ou tokoniʻi ia ke ne fili ha ngaahi konga Tohi Tapu pau ʻa ia ʻe fakalototoʻa mo ueʻi ai ʻa e tokotaha pe ko e fāmili ko ia te ma ʻaʻahi ki aí. Ko e ako ki he founga pehē ʻo hono ngāueʻaki ʻa e Tohi Tapú ʻa ia ʻe ueʻi ai ʻa e lotó ʻoku mātuʻaki fiemaʻu ia kapau ʻoku fiemaʻu ki ha sevāniti ke ne hoko ko ha tauhi-sipi lavameʻa.”—Hepelu 4:12; 5:14.

12. ʻE lava fēfē ke akoʻi ʻe he kau tauhi-sipi taukeí ʻa e kau mātuʻa toki fakanofo foʻoú?

¹² ʻOku toe maʻu ʻe he kau tauhi-sipi toki fakanofo foʻoú ʻa e ʻaonga lahi mei he akoʻi lahi angé. ʻOku pehē ʻe Nick, ʻa ia naʻe lave ki ai ki muʻá: “Naʻe ʻaonga ʻaupito ʻa e ako tefito naʻe fai mai kiate au ʻe ha ongo ʻovasia taʻumotuʻa ange. Naʻe faʻa mahino maʻu pē ki he ongo tokouá ni ʻa e founga ʻoku totonu ke fakaleleiʻiʻaki ha faʻahinga tuʻunga. Naʻá na fanongo anga-kātaki maʻu pē kiate au pea fakakaukau fakamātoato ki heʻeku fakakaukaú, neongo kapau naʻe ʻikai te na loto ki ai. Naʻá ku ako lahi mei hono siofi ʻa ʻena fakafeangai anga-fakatōkilalo mo fakaʻapaʻapa ki he fanga tokoua mo e fanga tuofāfine ʻi he fakatahaʻangá. Naʻe ʻai ʻe he toko ua ko ʻeni ʻo e kau mātuʻá ʻo maongo kiate au ʻa e fiemaʻu ke ngāueʻaki pōtoʻi ʻa e Tohi Tapú ʻi hono fakaleleiʻi ha ngaahi palopalema pe ko hono fai ha fakalototoʻá.”

Akoʻi ʻe he Folofola ʻa e ʻOtuá

13. (a) Ko e hā ʻoku fiemaʻu ki ha tokoua kae lava ke ne hoko ko ha tauhi-sipi lavameʻa? (e) Ko e hā naʻe pehē ai ʻe Sīsū: “Ko ʻeku tokāteline ʻoku ʻikai aʻaku”?

¹³ Ko e moʻoni, ʻoku ʻi he Folofola ʻa e ʻOtuá, ʻa ia ko e Tohi Tapú, ʻa e ngaahi lao, ngaahi tefitoʻi moʻoni, mo e ngaahi faʻifaʻitakiʻanga ʻoku fiemaʻu ki ha tauhi-sipi kae lava ke ne hoko ai ʻo ‘tuʻu kakato kuo ʻosi sāuni ki he ngāue lelei fulipe.’ (2 Timote 3:​16, 17) ʻOku maʻu nai ʻe ha tokoua ha tuʻunga fakaako fakamāmani lelei, ka ko ʻene ʻilo ki he Tohi Tapú pea mo e founga ʻokú ne ngāueʻaki  ai iá ko e meʻa ia ʻoku tokoni ki hono ʻai ia ko ha tauhi-sipi lavameʻá. Fakakaukau angé ki he faʻifaʻitakiʻanga ʻa Sīsuú. Ko Ia ʻa e tauhi-sipi fakalaumālie ʻilo lahi taha, ʻiloʻilo lahi taha, mo poto lahi taha kuo ʻaʻeva ʻi he māmaní; neongo ia, naʻe ʻikai te ne falala pē ki hono poto ʻoʻoná ʻi heʻene akoʻi ʻa e fanga sipi ʻa Sihová. Naʻá ne pehē: “Ko ʻeku tokāteline ʻoku ʻikai aʻaku, ka ʻoku aʻana naʻa ne fekau mai au.” Ko e hā naʻe ʻave ai ʻe Sīsū ʻa e lāngilangí ki heʻene Tamai fakahēvaní? Naʻá ne fakamatalaʻi: “Ko ia ʻoku lea meiate ia pe, ʻoku ne tuli pē ki hono ongoongo oʻona.”—Sione 7:​16, 18.

14. ʻOku fakaʻehiʻehi fēfē ʻa e kau tauhi-sipí mei he tuli ki honau ongoongo pē ʻonautolú?

¹⁴ ʻOku fakaʻehiʻehi ʻa e kau tauhi-sipi mateakí mei he tuli ki honau ongoongo pē ʻonautolú. ʻOku nau fakatuʻunga ʻenau akonakí mo e fakalototoʻá, ʻo ʻikai ʻi he poto ʻo kinautolú, ka ʻi he Folofola ʻa e ʻOtuá. ʻOku nau mahinoʻi ko e ngāue ʻa ha tauhi-sipí ko hono tokoniʻi ʻa e sipí ke ne maʻu “ʻa e finangalo ʻo Kalaisi,” ʻikai ko e fakakaukau ʻa e kau mātuʻá. (1 Kolinito 2:​14-16) Ko e fakatātaá, fēfē kapau ko ha tokotaha mātuʻa naʻá ne tokoni ki ha ongo meʻa ke na fekuki mo e ngaahi faingataʻa fakaemalí ʻo fakatuʻunga ʻene akonakí ʻi heʻene taukei pē ʻaʻaná kae ʻikai ʻi he ngaahi tefitoʻi moʻoni ʻa e Tohi Tapú mo e fakamatala kuo pulusi ʻe he “tamaioeiki agatonu mo boto”? (Mātiu 24:​45, PM) ʻOku tākiekina tōtuʻa nai ʻene faleʻí ʻe he ngaahi anga-fakafonuá pea mo ʻene ʻilo fakangatangatá. Ko hono moʻoní, ʻoku ʻi ai ʻa e ngaahi anga-fakafonua ia ʻoku ʻikai ke kovi, pea ʻoku maʻu nai ʻe he tokotaha mātuʻá ʻa e taukei ʻi he moʻuí. Ka ʻoku maʻu ʻe he fanga sipí ʻa e ʻaonga lahi tahá ʻi he taimi ʻoku fakalototoʻaʻi ai ʻe he kau tauhi-sipí kinautolu ke fanongo ki he leʻo ʻo Sīsuú pea ki he ngaahi foʻi folofola ʻa Sihová kae ʻikai ki he ngaahi fakakaukau ʻa e tangatá pe ki he ngaahi tuʻutuʻuni ʻa e anga-fakafonuá.—Sāme 12:6; Palovepi 3:​5, 6.

Akoʻi ʻe he “Tamaioeiki Agatonu mo Boto”

15. Ko e hā ʻa e ngāue naʻe ʻoange ʻe Sīsū ki he “tamaioeiki agatonu mo boto,” pea ko e hā ha ʻuhinga ʻe taha ʻoku lavameʻa ai ʻa e kalasi tamaioʻeikí?

¹⁵ Ko e kau tauhi-sipi hangē ko e kau ʻapositolo ko ia ko Pita, Sione mo Paulá ko e ngaahi mēmipa kotoa kinautolu ʻo e kulupu naʻe fakamatalaʻi ʻe Sīsū ko e “tamaioeiki agatonu mo boto.” ʻOku faʻuʻaki ʻa e kalasi tamaioʻeiki ko ʻení ʻa e fanga tokoua ʻo Sīsū ʻi he māmaní ʻoku pani ʻaki ʻa e laumālié, ʻa ia ko ʻenau ʻamanakí ke pule fakataha mo Kalaisi ʻi hēvani. (Fakahā 5:​9, 10) ʻI he lolotonga ʻo e ngaahi ʻaho fakaʻosí ni, ʻoku ʻamanekina ʻe fakaʻau ki he tokosiʻi ange ʻa e tokolahi ʻo e fanga tokoua ʻo Kalaisi ʻoku kei toe ʻi he māmaní. Kae kehe, ko e ngāue ko ia naʻe tuʻutuʻuni ʻe Sīsū kiate kinautolu ke nau fakahokó, ʻa hono malangaʻi ʻa e ongoongo lelei ʻo e Puleʻangá ki muʻa ke hoko mai ʻa e ngataʻangá, ʻoku lahi ange ia he taimí ni ʻi ha toe taimi ki muʻa. Naʻa mo e meʻa ko iá, kuo lavameʻa fakaofo ai ʻa e kalasi tamaioʻeikí! Ko e hā hono ʻuhingá? ʻI ha ʻuhinga ʻe taha, kuo nau akoʻi ʻa e ngaahi mēmipa ʻo e “fanga sipi kehe” ke tokoni kiate kinautolu ʻi he ngāue fakamalangá mo e faiakó. (Sione 10:16; Mātiu 24:14; 25:40) ʻI he ʻahó ni, ko e konga lahi taha ʻo e ngāué ʻoku fakahoko ia ʻe he kulupu mateaki ko ʻeni ʻo e fanga sipi kehé.

16. ʻOku anga-fēfē hono akoʻi ʻe he kalasi tamaioʻeikí ʻa e kau tangata kuo fakanofó?

 ¹⁶ ʻOku anga-fēfē hono tokonaki mai ʻe he kalasi tamaioʻeikí ʻa e ako ko ʻení? ʻI he taimi ʻo e kau ʻapositoló, naʻe fakamafaiʻi ai ha kau fakafofonga ʻo e kalasi tamaioʻeikí ke nau akoʻi mo fakanofo ha kau ʻovasia ʻi he ngaahi fakatahaʻangá, pea naʻe hanga leva ʻe he kau ʻovasia ko ʻení ʻo akoʻi ʻa e fanga sipí. (1 Kolinito 4:17) ʻOku hoko pehē pē ʻi he ʻahó ni. ʻOku hanga ʻe he Kulupu Pulé, ʻa ia ko e kiʻi kulupu tokosiʻi ʻo e kau mātuʻa pani ʻoku nau fakafofongaʻi ʻa e kalasi tamaioʻeikí, ʻo fakamafaiʻi ʻa hono kau fakafofonga ke nau akoʻi mo fakanofo ʻa e kau sevāniti mo e kau mātuʻa ʻi he ngaahi fakatahaʻanga ʻe laui mano ʻi māmani lahi. Tānaki atu ki ai, ʻoku fokotuʻutuʻu ʻe he Kulupu Pulé ʻa e ngaahi akoʻanga ke akoʻi ai ʻa e kau mēmipa ʻo e Kōmiti Vaʻá, kau ʻovasia fefonongaʻakí, kau mātuʻá, mo e kau sevāniti fakafaifekaú ʻi he founga lelei taha ke nau tokangaʻi ai ʻa e fanga sipí. ʻOku tokonaki mai ha toe ngaahi fakahinohino ʻi he ngaahi tohi, ʻi he ngaahi kupu kuo pulusi mai ʻi he Taua Leʻo, pea ʻi he ngaahi tohi kehe hangē ko e Organized to Do Jehovah’s Will. a

17. (a) Kuo anga-fēfē hono fakahāhaaʻi ʻe Sīsū ʻene falala ki he kalasi tamaioʻeikí? (e) ʻE lava fēfē ke fakahāhā ʻe he kau tauhi-sipi fakalaumālié ʻoku nau falala ki he kalasi tamaioʻeikí?

¹⁷ ʻOku mātuʻaki falala lahi ʻa Sīsū ki he kalasi tamaioʻeikí ʻo ne fakanofo ia ke ne pule “ki heʻene ngāhi meʻa kotoa,” ʻa ia ko e kotoa ʻo ʻene ngaahi meʻa mahuʻinga fakalaumālie ʻi he māmaní. (Mātiu 24:47) ʻOku fakamoʻoniʻi ʻe he kau tauhi-sipi kuo fakanofó ʻoku nau falala foki mo kinautolu ki he kalasi tamaioʻeikí ʻaki ʻenau ngāueʻaki ʻa e ngaahi fakahinohino ʻoku nau maʻu mei he Kulupu Pulé. Ko e moʻoni, ʻi hono akoʻi ʻa e niʻihi kehé pea mo hono fakaʻatā ʻe he kau tauhi-sipí ʻa kinautolu tonu ke akoʻi ʻe he Folofola ʻa e ʻOtuá, pea mo hono ngāueʻaki ʻa e ako kuo tokonaki mai ʻe he kalasi tamaioʻeikí, ʻoku pouaki ai ʻe he kau tauhi-sipí ʻa e fāʻūtaha ʻi he lotolotonga ʻo e fanga sipí. He houngaʻia lahi ē ko kitautolu he kuo akoʻi ʻe Sihova ʻa e kau tangata ʻa ia ʻoku nau tokanga lahi ʻaupito ki he mēmipa taki taha ʻo e fakatahaʻanga Kalisitiané!

[Fakamatala ʻi lalo]

ʻE Anga-Fēfē Haʻo Tali?

• ʻOku anga-fēfē hono akoʻi ʻe he kau tauhi-sipi fakalaumālie matuʻotuʻá ʻa e niʻihi kehé?

• Ko e hā ʻoku ʻikai faiako ai ʻa e kau tauhi-sipí ʻo makatuʻunga ʻi heʻenau ngaahi fakakaukau pē ʻanautolú?

• ʻI he founga fē pea ko e hā e ʻuhinga ʻoku falala ai ʻa e kau tauhi-sipí ki he kalasi tamaioʻeikí?

[Fehuʻi ki he Ako]

[Fakatātā ʻi he peesi 24, 25]

ʻOku akoʻi ʻe he kau mātuʻa Kalisitiané ʻa e kau tangata taʻu siʻi ange ʻi he fakatahaʻangá

[Fakatātā ʻi he peesi 26]

ʻOku tokonaki mai ʻe he “tamaioeiki agatonu mo boto” ʻa e ako lahi fau maʻá e kau mātuʻá