Masivá​—Ko e Tuʻunga he ʻAho Ní

KO Vinisení a ʻoku faʻa fai ʻa e mamata ki ai ʻi heʻene toho holo ha saliote mamafa ʻi he ngaahi hala ʻo São Paulo, ʻi Pelēsila. ʻOkú ne tātānaki ʻa e ngeʻesi puha pepá, potupotuʻi ukameá mo e pelesitikí. ʻI heʻene mamalu ʻa e poʻulí, ʻokú ne fola ha ʻotu laʻi puha pepa ʻi heʻene lalo salioté ʻo ne mohe ai. ʻOku hā ngali ʻoku ʻikai te ne tokanga ki he longoaʻa ʻa e kaá mo e pasí ʻi he hala moʻumoʻua ko ia ʻokú ne mohe ai he poʻulí. Naʻe ʻi ai ʻi ha taimi haʻane ngāue, ko ha ʻapi mo ha fāmili—ka kuo mole kotoa ia. ʻI he taimí ni ʻokú ne moʻui faingataʻaʻia pē ʻi he halá.

Ko e meʻa fakamamahí, he ko e kakai ʻe laui miliona ʻi māmani lahi, hangē ko Vinisení, ʻoku nau moʻui ʻi he masiva ʻangoʻango. ʻI he ngaahi fonua langalanga haké, ʻoku pau ai ke nofo ʻa e tokolahi ʻi he halá pe ʻi he fanga kiʻi kolo masivá. Ko e kau kolekolé​—ʻa e mamateá, ko e kuí mo e kakai fefine ʻoku fakahuhu ʻenau fanga kiʻi pēpeé—ko ha meʻa ia ʻoku anga-maheni ʻa e mamata ki aí. ʻI he ngaahi maama halá, ʻoku lele holo ai ʻa e fānaú ʻi he vahaʻa ʻo e ngaahi kā ʻoku tuʻú, ʻo feinga ke fakatau atu ʻenau fanga kiʻi lole ʻi he ʻamanaki ke maʻu mai ai ha kiʻi koini.

ʻOku faingataʻa ke fakamatalaʻi ʻa e masiva peheé. Ko e makasini Pilitānia ko e Economist naʻe fakamatala ai: “Kuo ʻikai ʻaupito ha toe taimi ʻe koloaʻia ange ai ʻa e matakali ʻo e tangatá, pe mateuteu lelei ange ai ʻi he ʻilo fakafaitoʻo, malava fakatekinolosia mo e mālohi fakaʻatamai ʻoku fiemaʻu ke tauʻiʻaki ʻa e masivá.” Kuo maʻu ʻaonga moʻoni ʻa e tokolahi mei he ʻilo ko ení. Ko e ngaahi hala ʻo e ngaahi kolo lalahi ʻi he ngaahi fonua langalanga hake ʻe niʻihi ʻoku fele ai ʻa e ngaahi kā foʻou uloulo. ʻOku fonu ʻa e ngaahi falekoloá ʻi he ngaahi meʻangāue fakamuimui tahá, pea ʻoku ʻi ai maʻu pē ʻa e kakai ke nau fakatau ia. ʻI ha ongo senitā faiʻanga fakatau ʻi Pelēsila naʻe lele ai ha tuʻuaki makehe. Naʻá na ava kakato ʻi he poó kotoa mei Tīsema 23 ki he 24, 2004. Ko e taha ʻi he ongo senitaá naʻá ne totongiʻi ha kau hula ke nau fakafiefiaʻi ʻa e faʻahinga naʻe omi ke fakataú. Naʻe tohoakiʻi mai ʻe he meʻá ni ha kau fakatau ʻe meimei toko 500,000!

Neongo ia, ko e fuʻu kakai tokolahi ʻoku ʻikai te nau maʻu ʻaonga mei he koloa ʻoku maʻu pē ʻe he  niʻihi. Ko e fuʻu faikehekehe lahi ʻi he vahaʻa ʻo e koloaʻiá mo e masivá kuo taki atu ai ʻa e tokolahi ke nau fakamulitukuʻaki ʻoku ʻi ai ha fiemaʻu fakavavevave ke tauʻi ʻa e masivá. Ko e makasini Pelēsila ko e Veja naʻe pehē ai: “ʻI he taʻú ni [2005] ko e tauʻi ʻo e masivá ʻoku totonu ke hoko ko e kaveinga tefito ia ʻo e tālanga fakaemāmani lahí.” Naʻe toe līpooti ʻe he Veja ʻa e fokotuʻu fakakaukau ki ha Palani foʻou ʻa Māsolo ʻa ia naʻe fakataumuʻa ke tokoniʻi ʻa e ngaahi fonua masiva tahá, tautefito ki ʻAfilika. b Kae kehe, lolotonga ko e ngaahi fokotuʻu fakakaukau peheé ʻoku ʻomai ai ha ʻata ʻo e fakalakalaká, naʻe tānaki mai ʻe he makasini tatau: “ʻOku toe lahi foki mo e ngaahi ʻuhinga ke fehuʻia ai ʻa e olá. Kapau ʻoku toumoua ʻa e lahi taha ʻo e ngaahi fonuá ke fai ha tokoni, ʻoku peheé koeʻuhi ʻoku tātātaha ke aʻu ʻa e paʻanga tokoní ki he kakai ko ia ʻoku fakataumuʻa ki aí.” Ko e meʻa fakamamahí, ko ha konga lahi ʻo e paʻanga tokoni ʻoku ʻomai ʻe he ngaahi puleʻangá, ngaahi kautaha fakavahaʻapuleʻangá mo e faʻahinga tāutahá ʻoku ʻikai ʻaupito aʻu ia ki he kakai ʻoku nau fiemaʻu moʻoni iá, koeʻuhi ko e kākaá mo e fuʻu fihi ʻa e ngaahi tuʻutuʻuni fakapuleʻangá.

Naʻe ʻiloʻi ʻe Sīsū ʻe hokohoko atu ai pē ʻa e masivá ko ha palopalemá. Naʻá ne pehē: “Ko e meʻa ki he masiva te mou feangai ai pe mo kinautolu.” (Mātiu 26:11) ʻOku ʻuhinga ení ʻe ʻi ai maʻu pē ʻa e masivá ʻi he māmaní? ʻE lava ke fai ha meʻa ke fakaleleiʻiʻaki ʻa e tuʻunga ko iá? Ko e hā ʻe lava ke fai ʻe he kau Kalisitiané ke tokoniʻiʻaki ʻa e masivá?

[Fakamatala ʻi lalo]