Muimui he Faʻifaʻitakiʻanga ʻa Sīsuú ʻo Fakahaaʻi ʻa e Tokanga ki he Masivá

KO E masivá mo e fakafeʻātungiá ʻoku meimei motuʻa tatau pē ia mo e faʻahinga ʻo e tangatá. Lolotonga naʻe ngāue ʻa e Lao ʻa e ʻOtuá ki ʻIsilelí ke maluʻi ʻa e masivá pea fakasiʻisiʻi ʻenau faingataʻaʻiá, ko e Lao ko iá naʻe faʻa tukunoaʻi. (Emosi 2:6) Naʻe fakahalaiaʻi ʻe he palōfita ko ʻIsikelí ʻa e anga ʻo e tōʻongafai ki he masivá. Naʻá ne pehē: “Ko e kainanga ʻo e fonua ʻoku nau fai fakamalohi mo kaihaʻa; pea ʻoku nau fakaehaua ʻa e tuʻutamaki mo e masiva; pea ko siʻi ʻaunofo ʻoku nau fai fakamalohi ki ai, ʻo taʻetāu mo e konisitutone.”—Isikeli 22:29.

Naʻe ʻikai kehe ʻa e tuʻungá ʻi he taimi naʻe ʻi māmani ai ʻa Sīsuú. Naʻe fakahaaʻi ʻe he kau taki lotú ha taʻetokanga fakaʻaufuli ki he masivá mo e faingataʻaʻiá. Ko e kau taki lotú naʻe fakamatalaʻi ko e “faʻahinga ʻofa ki he paʻanga” ʻa ia naʻa nau “folo kotoa ʻa e ngaahi ʻapi ʻo siʻi kau uitou” pea naʻa nau tokanga lahi ange fekauʻaki mo hono tauhi ʻenau ngaahi talatukufakaholó ʻi hono tokangaʻi ʻa e kau taʻumotuʻá mo e faingataʻaʻiá. (Luke 16:14; 20:47; Mātiu 15:​5, 6) ʻOku taau ke fakatokangaʻi ʻi he pealapeli ʻa Sīsū fekauʻaki mo e tangata Samēlia leleí, ko ha taulaʻeiki mo ha Līvai ʻi heʻena sio ki he tangata kafó naʻá na lue fakalaka atu ai ki he kauhala ʻe tahá, kae ʻikai afe ke tokoniʻi ia.​—Luke 10:30-37.

Fakahaaʻi ʻe Sīsū ʻa e Tokanga ki he Masivá

Ko e ngaahi fakamatala Kōsipeli fekauʻaki mo e moʻui ʻa Sīsuú ʻoku fakahaaʻi ai naʻá ne mahinoʻi kakato ʻa e ngaahi faingataʻaʻia ʻa e masivá pea naʻá ne ongoʻi lahi ʻenau ngaahi fiemaʻú. Neongo naʻe moʻui ʻa Sīsū ʻi hēvani, naʻá ne fakamasivesivaʻi ʻe ia ia, hoko ko e tangata, pea ‘hoko ko e masiva koeʻuhí ko kitautolu.’ (2 Kolinito 8:9) ʻI he sio  ʻa Sīsū ki he fuʻu kakaí, “naʻe langa hono fatu ʻi he ʻofa kiate kinautolu: he naʻa nau nofo ongosia mo tukuhāusia, ʻo hange ko ha fanga sipi taʻe hanau tauhi.” (Mātiu 9:36) Ko e fakamatala fekauʻaki mo e uitou masivá ʻoku fakahaaʻi ai naʻe maongo kia Sīsū, ʻo ʻikai ko e ngaahi meʻaʻofa lalahi ʻa e kau koloaʻiá, ʻa ia naʻa nau foaki “mei he paʻanga hulu ʻo ʻenau koloa,” ka ko e kiʻi tokoni valevale ʻa e uitou masivá. Ko e meʻa naʻá ne faí naʻe aʻu ki he loto ʻo Sīsuú koeʻuhi naʻá ne ‘fusimoʻomo, ka ne li hono kotoa ʻo e meʻa naʻá ne maʻu ke tauhi ʻaki siʻene moʻuí.’—Luke 21:4.

Naʻe ʻikai ke ngata pē ʻi he ongoʻi manavaʻofa ʻa Sīsū ki he masivá, ka naʻá ne toe tokanga fakafoʻituitui ki heʻenau ngaahi fiemaʻú. Ko ia mo ʻene kau ʻapositoló naʻe ʻi ai ʻenau paʻanga tokoni fakaekinautolu ʻa ia naʻa nau fai mei ai ʻa e foaki ki he kau ʻIsileli masivá. (Mātiu 26:​6-9; Sione 12:​5-8; 13:29) Naʻe fakalototoʻaʻi ʻe Sīsū ʻa e faʻahinga naʻa nau loto ke hoko ko hono kau muimuí ke nau ʻiloʻi honau fatongia ke tokoniʻi ʻa e faʻahinga masivá. Naʻá ne tala ange ki ha talavou pule koloaʻia: “Fakatau aia kotoabe oku aau, o tufaki ki he majiva, bea te ke maʻu ae koloa i he lagi: bea ke haʻu, o muimui iate au.” Ko e moʻoniʻi meʻa ko ia ʻa e taʻeloto ʻa e tangatá ke māvae mo ʻene koloá naʻe fakahaaʻi ai ko ʻene ʻofa ki he koloá naʻe lahi ange ia ʻi heʻene ʻofa ki he ʻOtuá mo hono kaungā faʻahinga ʻo e tangatá. Ko ia ai, naʻe ʻikai te ne maʻu ʻa e ngaahi ʻulungāanga naʻe fiemaʻu ke hoko ai ko ha ākonga ʻa Sīsū.—Luke 18:​22, 23, PM.

Tokanga ʻa e Kau Muimui ʻo Kalaisí Fekauʻaki mo e Masivá

Hili e pekia ʻa Sīsuú, naʻe hokohoko atu ʻa e kau ʻapositoló mo e kau muimui kehe ʻo Kalaisí ʻi hono fakahāhā ʻa e tokanga ki he kau masiva ʻi honau haʻohaʻongá. ʻI he 49 T.S. nai, naʻe fakataha ai ʻa e ʻapositolo ko Paulá mo Sēmisi, Pita mo Sione ʻo lāulea ki he fekau naʻá ne maʻu mei he ʻEiki ko Sīsū Kalaisí ke malangaʻi ʻa e ongoongo leleí. Naʻa nau felotoi ke ʻalu ʻa Paula mo Panepasa ki he “Senitaile,” ʻo tokangataha ʻena malangá kia kinautolu. Kae kehe, naʻe ekinaki ʻa Sēmisi mo hono ngaahi takangá kia Paula mo Panepasa ke na “manatua ʻa e kau masiva.” Pea ko e meʻa ia naʻe “matuʻaki loto [ʻa Paula] ke fai.”—Kaletia 2:​7-10.

Lolotonga ʻa e pule ʻa ʻEmipola Kālotí, naʻe hoko ai ha fuʻu honge lahi ʻi he ngaahi tapa kehekehe ʻo e ʻEmipaea Lomá. ʻI he tali ki aí, ko e kau Kalisitiane ʻi ʻAniteoké naʻa nau “tuʻutuʻuni . . . ke tanaki tokoni, ʻo taki taha ʻomi ha meʻa te ne lava, ke ʻave ki he kainga naʻe nofo ʻi Siutea. Pea nau fai ia ʻo ʻave ki he kau faifekau ʻia Panepasa mo Saula.”—Ngāue 11:​28-30.

Ko e kau Kalisitiane moʻoni he ʻaho ní ʻoku nau toe ʻiloʻi ko e kau muimui ʻo Sīsuú kuo pau ke nau fakahaaʻi ʻa e tokanga ki he masivá mo e faingataʻaʻiá, tautautefito ʻi he lotolotonga ʻo e ngaahi kaungātuí. (Kaletia 6:10) Ko ia ai, ʻoku nau fakahāhā ʻa e tokanga moʻoni ki he ngaahi fiemaʻu fakamatelie ʻa e faʻahinga ʻoku masivá. Ko e fakatātaá, ʻi he 1998, naʻe fakaʻauha ai ʻe ha fuʻu laʻalaʻā lahi ʻa e konga lahi ʻo e tokelau-hahake ʻo Pelēsilá. Naʻe hanga ʻe he laʻalaʻaá ʻo fakaʻauha ʻa e laisé, pīní mo e ngaahi ngoue koané ʻo iku ai ki he honge lahi—ko e kovi tahá ia ʻi he taʻu ʻe 15. ʻI he ngaahi feituʻu ʻe niʻihi, naʻa mo e vai inú naʻe tāiʻi. Ko e Kau Fakamoʻoni ʻa Sihova ʻi he ngaahi tapa kehe ʻo e fonuá naʻa nau fokotuʻutuʻu leva ha ngaahi kōmiti tokoni, pea ʻi ha taimi nounou, naʻa nau tānaki ai ha ngaahi toni meʻakai pea totongi ʻa e fakamole ʻo hono ʻave ʻa e ngaahi tokonaki ko iá.

Ko e Kau Fakamoʻoni naʻa nau poupou ki he ngaahi feinga tokoní naʻa nau tohi: “ʻOku mau fiefia ʻaupito ʻi he malava ke mau tokoniʻi ʻa homau fanga tokouá, tautefito koeʻuhí ʻoku mau fakapapauʻi kuo mau ʻai ʻa e loto ʻo Sihová ke fiefia. ʻOku ʻikai ʻaupito ngalo ʻia kimautolu ʻa e ngaahi lea ʻo e Semisi 2:​15, 16.” Ko e ongo veesi  Tohi Tapu ko iá ʻoku pehē ai: “Kapau ʻe masiva kofu ha tangata lotu pe ha fine lotu, mo ʻikai ʻaupito maʻu siʻa meʻa tokoni pea ka peheange ʻe hamou toko taha, ʻAlu ā, ʻoku fai pe homou fakamafana, ʻoku fai pe homou fakamakona; ka ʻoku ʻikai te mou ange ʻa e ngaahi meʻa ʻoku tangi ki [ai] ʻa e sino; ko e ha hono ʻaonga, ʻo?”

ʻI he taha ʻo e ngaahi fakatahaʻanga ʻa e Kau Fakamoʻoni ʻa Sihová ʻi he kolo ko São Paulo, ko ha Fakamoʻoni anga-fakatōkilalo mo faivelenga ʻa ia ʻoku masiva fakamatelie ʻokú ne faʻa fāinga ai ke maʻu ʻa e meʻa tefito ki he moʻuí. ʻOkú ne pehē: “Neongo ʻoku ou nofo masiva, ko e pōpoaki Fakatohitapú kuó ne ʻomai ʻa e ʻuhinga moʻoni ki heʻeku moʻuí. ʻOku ʻikai te u ʻilo pe ko e hā naʻe mei hoko kiate aú ʻo kapau naʻe ʻikai te u maʻu ʻa e tokoni mei hoku kaungā Fakamoʻoní.” ʻI ha taimi he kuohilí, ko e fefine Kalisitiane ngāue mālohi ko ení naʻe fiemaʻu ke fai hano tafa, ka naʻe ʻikai te ne malava ke totongi ʻa e tafá. ʻI he taimi tonu ko ení, naʻe malava ai ʻa e fanga tokoua mo e fanga tuofāfine Kalisitiane ʻi he fakatahaʻangá ke feau ʻa e fakamole ʻo e tafá. Ko hono fai ʻa e tokoni ki he ngaahi kaungātui masivá ʻoku fai ia ʻe he kau Kalisitiane moʻoní ʻi māmani lahi.

Kae kehe, tatau ai pē pe ko e hā nai ʻa e lahi ʻo e fakalotomāfana ʻa e ngaahi hokosia peheé, ʻoku mahino ko e ngaahi feinga loto-moʻoni ko iá ʻe ʻikai ke ne toʻo ʻosi ʻa e masivá. Naʻa mo e ngaahi puleʻanga mālohí mo e ngaahi kautaha tokoni fakavahaʻapuleʻanga lalahí, neongo kuo ʻi ai ʻenau lavameʻa, kuo ʻikai te nau malava ke fakangata ʻa e palopalema fuoloa ʻo e masivá. Ko ia ai, ko e fehuʻi ʻoku malanga haké, Ko e hā ʻa e fakaleleiʻanga lelei taha ki he masivá mo e ngaahi palopalema kehe ʻokú ne fakamamahiʻi ʻa e faʻahinga ʻo e tangatá?

ʻOmai ʻe he Ngaahi Akonaki Fakatohitapú ʻa e Tokoni Tuʻuloa

Ko e ngaahi fakamatala Kōsipelí ʻoku fakamatala ai ʻo pehē naʻe fakahoko maʻu pē ʻe Sīsū Kalaisi ʻa e ngaahi ngāue lelei maʻá e faʻahinga naʻa nau masivá pe naʻe ʻi ai ʻenau ngaahi fiemaʻu kehé. (Mātiu 14:​14-​21) Ka ko e hā ʻa e ngāue naʻá ne fakamuʻomuʻá? ʻI he taimi ʻe taha, hili hono fakamoleki ha taimi ʻi hono tokoniʻi ʻa e faʻahinga faingataʻaʻiá, naʻe tala ange ʻe Sīsū ki heʻene kau ākongá: “Tau ō ki ha potu kehe, ki he ngāhi vilisi ofi mai, koeʻuhi ke u malanga ki ai foki.” Ko e hā naʻe tuku ai ʻe Sīsū ʻa ʻene ngāue maʻá e kau mahakí mo e faingataʻaʻiá koeʻuhi ke toe hoko atu ʻa ʻene ngāue fakamalangá? Naʻá ne fakamatalaʻi ia ʻaki ʻene pehē: “Ko ia ia naʻa ku haʻu ai [ke malanga].” (Fakaʻītali ʻamautolu; Maake 1:​38, 39; Luke 4:43) Neongo naʻe mahuʻinga kia Sīsū ʻa hono fai ʻa e ngaahi ngāue lelei ki he kakai faingataʻaʻiá, ko e malanga fekauʻaki mo e Puleʻanga ʻo e ʻOtuá ʻa ʻene ngāue tefitó.​—Maake 1:​14.

Koeʻuhi ʻoku ekinaki ʻi he Tohi Tapú ki he kau Kalisitiané ke “muimui ofi, ʻo topuvaʻe taha mo [Sīsū],” ko e kau Kalisitiane he ʻaho ní ʻoku nau maʻu ʻa e tataki mahino fekauʻaki mo e ngaahi meʻa ke fakamuʻomuʻa ʻi heʻenau ngaahi feinga ke tokoniʻi ʻa e niʻihi kehé. (1 Pita 2:21) ʻI he hangē ko Sīsuú, ʻoku nau tokoniʻi ʻa e kakai faingataʻaʻiá. Kae kehe, ʻi he hangē foki ko Sīsuú, ʻoku nau ʻai ʻa e ngāue ʻo hono akoʻi ko ia ʻa e pōpoaki Fakatohitapu fekauʻaki mo e ongoongo lelei ʻo e Puleʻanga ʻo e ʻOtuá ko ʻenau meʻa muʻomuʻa tahá ia. (Mātiu 5:​14-​16; 24:14; 28:​19, 20) Ko ia, ko e hā ʻoku totonu ke fakamuʻomuʻa ai ʻa hono malangaʻi ʻa e pōpoaki ʻoku maʻu ʻi he Folofola ʻa e ʻOtuá ʻi he ngaahi founga kehe ʻo hono fai ʻa e tokoni ki he niʻihi kehé?

Ko e ngaahi hokosia moʻoni ʻi he moʻuí mei he māmaní takatakai ʻoku fakahāhā ai ko e taimi ʻoku mahinoʻi ai pea muimui ʻa e kakaí ʻi he akonaki ʻaonga ʻa e Tohi Tapú, ʻoku nau mateuteu lelei  ange ai ke fekuki mo e ngaahi palopalema fakaʻaho ʻo e moʻuí, ʻo kau ai ʻa e masivá. ʻIkai ngata aí, ko e pōpoaki Fakatohitapu ʻo e Puleʻanga ʻo e ʻOtuá ʻa ia ʻoku malangaʻi ʻe he Kau Fakamoʻoni ʻa Sihová he ʻaho ní ʻoku ʻoange ai ki he kakaí ha ʻamanaki ki he kahaʻú—ko ha ʻamanaki ʻokú ne ʻai ke mahuʻinga ʻa e moʻuí, naʻa mo e ʻi he malumalu ʻo e ngaahi tuʻunga faingataʻa tahá. (1 Timote 4:8) Ko e hā ʻa e ʻamanaki ko iá?

ʻI he Folofola ʻa e ʻOtuá ʻoku fakapapau mai ai kia kitautolu ʻo fekauʻaki mo hotau kahaʻú: “ʻI he funga ʻo e talaʻofa ʻa ʻEne ʻAfio ʻoku tau ʻamanaki ki ha ngaahi langi foʻou mo ha fonua foʻou, ʻa ia ʻoku nofoʻanga ai ʻa maʻoniʻoni.” (2 Pita 3:13) ʻI he taimi ʻoku lau ai ʻa e Tohi Tapú ʻo kau ki he “fonua,” ʻoku ʻuhinga iá ʻi he taimi ʻe niʻihi ki he kakai ʻoku nofo ʻi he māmaní. (Senesi 11:1) Ko ia ko e “fonua foʻou” māʻoniʻoni ʻa ia ʻoku talaʻofa ʻe hoko maí ko ha sōsaieti ia ʻo e kakai ʻoku nau maʻu ʻa e hōifua ʻa e ʻOtuá. ʻOku toe talaʻofa ʻa e Folofola ʻa e ʻOtuá ʻo pehē ʻi he malumalu ʻo e pule ʻa Kalaisí, ko e faʻahinga ko ia ʻoku fakahōifua ki he ʻOtuá te nau maʻu ʻa e meʻaʻofa ko e moʻui taʻengatá pea te nau nofo ʻi ha moʻui fiemālie ʻi ha palataisi fakaemāmani. (Maake 10:30) Ko e kahaʻu fakaofo ko iá ʻoku ʻatā ia ki he tokotaha kotoa, ʻo kau ai ʻa e masivá. ʻI he “fonua foʻou” ko iá, ʻe solova ai ʻo taʻengata ʻa e palopalema ʻo e masivá.

[Puha/Fakatātā ʻi he peesi 7]

ʻE ANGA-FĒFĒ HONO HANGA ʻE SĪSŪ ʻO “FAKAHAOFI ʻA E MASIVA”?​—Sāme 72:12

FAKAMAAU TOTONU: “Ko e kakai ngaohikovia te ne taukapoʻi, ko haʻa masiva te ne fakahaofi, kae laiki ʻa ia ʻoku fai fakamalohi.” (Sāme 72:4) Lolotonga ʻa e pule ʻa Kalaisi ki he māmaní, ʻe ʻi ai ʻa e fakamaau totonu maʻá e tokotaha kotoa pē. ʻE ʻikai ha feituʻu ai ki he kākaá, ko ha kovi ʻokú ne fakamasivaʻi ʻa e ngaahi fonua ala koloaʻia lahi.

MELINO: “Ke toʻulu ʻa e maʻoniʻoni ʻi hono kuonga; pea ke leta ʻa e melino, kae ʻoua ke ngata ʻa e mahina.” (Sāme 72:7) Ko e lahi ʻo e masiva ʻi he māmaní ko e tupu ia mei he ngaahi fepaki mo e tau ʻa e tangatá. ʻE ʻomai ʻe Kalaisi ʻa e melino haohaoa ki he māmaní, ʻo fakangata ai ʻa e taha ʻo e ngaahi tupuʻanga tefito ʻo e masivá.

MANAVAʻOFA: “Ko e tuʻutamaki mo e masiva ʻoku ne fakaʻatuʻi, pea ko e ngaahi laumalie ʻo e masiva ʻoku ne fakamoʻui. ʻOku ne huhuʻi honau laumalie mei he maumau mo e fakamalohi, pea ʻoku mahuʻinga honau toto ʻi heʻene vakai.” (Sāme 72:​12-14) Ko e tuʻutāmakí, masivá mo e ngaohikoviá te nau hoko ko e konga ʻo e foʻi fāmili fiefia ʻe taha ʻo e tangatá ʻo fāʻūtaha ʻi he malumalu ʻo e tuʻunga taki ʻa e tuʻi ko Sīsū Kalaisí.

TUʻUMĀLIE: “Ke mafola mai ʻa e koane ʻi he fonua.” (Sāme 72:16) Lolotonga ʻa e pule ʻa Kalaisí, ʻe ʻi ai ʻa e tuʻumālie mo e mahu fakamatelie. ʻE ʻikai faingataʻaʻia ʻa e kakaí ʻi he ngaahi nounou fakameʻatokoní mo e ngaahi hongé ʻa ia ko e tupuʻanga lahi ia ʻo e masiva he ʻaho ní.

[Fakatātā ʻi he peesi 4, 5]

Naʻe mahuʻingaʻia fakafoʻituitui ʻa Sīsū ʻi he ngaahi fiemaʻu ʻa e masivá

[Fakatātā ʻi he peesi 6]

ʻOku ʻomai ʻe he pōpoaki ʻa e Tohi Tapú ʻa e ʻamanaki moʻoni