“ʻOku Totonu Pe ke Fai ki he Pule ʻa e ʻOtua ʻi he Pule ʻa e Tangata”

“ʻOku ʻa Sihova ʻa e Tau”

ʻOKU tuʻu fehangahangai ha ongo faʻahi fakakautau, mei ha ongo tafaʻaki teleʻa. ʻI he ʻaho ʻe 40 ʻoku ʻulupunou ai ʻa e kau tangata ʻo ʻIsilelí ʻi he manavahē lahi pea ʻoku toutou fakailifiaʻi kinautolu ʻe Kolaiate, ʻa e fuʻu toʻa ʻo e kau Filisitiá.—1 Samiuela 17:​1-4, 16.

ʻOku luma leʻo-lahi atu ʻa Kolaiate ki he kau ʻIsilelí ʻaki ʻa e ngaahi leá ni: “Fili hamou tangata ke ʻalu hifo kiate au. Kapau te ne lava ke tauʻi au, ʻo taaʻi, pea te mau tamaioʻeiki kiate kimoutolu: ka ʻo kapau te u lavaʻi ia, ʻo taaʻi, pea te mou tamaioʻeiki kiate kimautolu, ʻo tauhi kimautolu. . . . Ko au eni ʻoku ou luki ki he ngaahi matatau ʻo Isileli he ʻaho ni; tuku mai ha tangata ke ma fetakai.”—1 Samiuela 17:​8-10.

ʻI he kuonga muʻá, naʻe anga-maheniʻaki hono fakafofongaʻi ʻe ha toʻa ʻa ʻene faʻahí ʻi he ʻaiʻai maʻa mo ha toʻa ʻi he faʻahi ʻe tahá. Naʻe ʻave ʻa e ikuná ki he faʻahi ko ia ʻo e toʻa naʻe mālohí. Ka ko e tokotaha pole tau ia ko eni ki ʻIsilelí naʻe ʻikai ko ha sōtia anga-maheni pē ia. Ko ha fuʻu saianiti lōloa ʻaupito ia—ko ha fuʻu fili fītaʻa mo fakailifia. Kae kehe, ʻi heʻene manukiʻi ʻa e kau tau ʻa e kakai ʻa Sihová, ʻoku nooʻi ai ʻe Kolaiate ʻa e ikuʻanga fakamamahi kiate iá.

ʻOku ʻikai ko ha feʻauhi fakakautau pē eni ia. Ko e feʻauhi eni ia ʻi he vahaʻa ʻo Sihova pea mo e ngaahi ʻotua ʻo e kau Filisitiá. ʻI he ʻikai ke taki loto-toʻa atu ʻene kau taú ke nau fepaki mo e ngaahi fili ʻo e ʻOtuá, ʻoku mate manavahē ʻa Tuʻi Saula ia ʻo ʻIsilelí.—1 Samiuela 17:11.

ʻOku Falala ha Kiʻi Talavou kia Sihova

ʻI he lolotonga ʻa e tauʻaki tuʻu fakamamaʻu ko ení, ʻoku ʻaʻahi atu ha kiʻi talavou kuo ʻosi pani ke hoko ko e tuʻi ʻo ʻIsilelí ki hono fanga taʻokete ʻi he kau tau ʻa Saulá. Ko hono hingoá ko Tēvita. ʻI heʻene fanongo ki he ngaahi lea ʻa Kolaiaté, ʻokú ne ʻeke ange: “Ko hai ʻa e Filisitia, ʻa e motuʻa taʻekamu na, ke ne luki ki he ngaahi matatau ʻo e ʻOtua Moʻui?” (1 Samiuela 17:26) ʻI he anga ʻo e vakai ia ʻa Tēvitá, ʻoku fakafofongaʻi fakatouʻosi ʻe Kolaiate ʻa e kau Filisitiá pea mo honau ngaahi ʻotuá. ʻI heʻene fisiʻia totonu aí, ʻoku loto ʻa Tēvita ke ne tuʻu maʻa Sihova pea mo ʻIsileli pea ke ne tauʻi ʻa e saianiti panganí. Ka ʻoku tala ange ʻe Tuʻi Saula: “ʻE ʻikai te ke lava ke ʻalu ki he Filisitia ni ke tau mo ia: he ko e talavou koe.”—1 Samiuela 17:33.

He kehekehe lahi ē ko e anga ʻo e vakai ʻa Saulá meia Tēvitá! ʻOku vakai pē ʻa Saula ia ko ha kiʻi tamasiʻi tauhi-sipi ʻoku loto ke tau mo ha fuʻu saianiti fītaʻa. Kae kehe, ʻoku sio ʻa Tēvita ia ko ha tangata pē eni ia ʻokú ne fakafetau ki he ʻEiki Hau ko Sihová. ʻOku makatuʻunga ʻa e loto-toʻa ia ʻa Tēvitá ʻi heʻene tuipau heʻikai fakaʻatā ʻe he ʻOtuá ʻa Hono huafá mo ʻEne kakaí ke manukiʻi taʻetautea. Lolotonga hono vikia mai ʻe Kolaiate hono mālohí, ʻoku falala ʻa Tēvita ia kia Sihova, ʻo ne vakai ki he tuʻunga ko iá mei he anga ʻo e vakai ki ai ʻa e ʻOtuá.

“ʻOku Ou ʻAlu Kiate Koe ʻi he Huafa ʻo Sihova”

ʻOku maʻu ʻe Tēvita ha makatuʻunga lelei ki heʻene tuí. ʻOkú ne manatuʻi naʻe tokoni ange ʻa e ʻOtuá kiate ia ʻi heʻene fakahaofi ʻene sipí mei ha pea mo ha laioné. ʻOku fakapapauʻi ʻe he kiʻi tamasiʻi tauhi-sipí ʻe tokoniʻi ia ʻe Sihova he taimí ni ke ne fehangahangai mo e fuʻu fili Filisitia ikuʻingataʻa ko ení. (1 Samiuela 17:​34-37) ʻI he toʻo hake ʻene meʻataú ko ha makatā pē mo ha foʻi maka molemole ʻe nimá, ʻoku tepi atu ʻa Tēvita ke fetaulaki mo Kolaiate.

ʻOku fili ʻa kiʻi Tēvita ke ne fakahoko ʻa e foʻi  ngāue hā ngali faingataʻa ko ení ʻi he mālohi meia Sihová. ʻOkú ne lea loto-toʻa atu ki he Filisitiá: “ʻOku ke haʻu koe kiate au mo e heleta, mo e ongo tao: ka ko au ʻoku ou ʻalu kiate koe ʻi he huafa ʻo Sihova Sapaoti, ko e ʻOtua ʻo e ngaahi matatau ʻo Isileli, ʻa ia kuo ke luki ki ai. Ko e ʻaho ni ʻe tuku koe ʻe Sihova ki hoku nima; . . . Koeʻuhi ke ʻilo ʻe mamani katoa ʻoku ai ha ʻOtua ʻo Isileli: pea ke ʻilo ʻa e fuʻu fakataha ni ʻoku ʻikai fai ʻe he ʻEiki ʻene fakamoʻui ʻaki ʻa e heleta mo e tao: he ʻoku ʻa Sihova ʻa e tau.”—1 Samiuela 17:​45-47.

Ko e hā ʻa e ikuʻangá? ʻOku pehē ʻe he fakamatala fakamānavaʻí: “Pea ko eni kuo lavaʻi ʻe Tevita ʻa e Filisitia ʻaki ha makatā mo ha foʻi maka, pea ne taaʻi ʻa e Filisitia ʻo tamateʻi foki; ka naʻe ʻikai ha heleta ʻi he nima ʻo Tevita.” (1 Samiuela 17:50) Naʻe ʻikai ha heletā ʻi hono nimá, ka naʻe poupoua mālohi ia ʻe Sihova ko e ʻOtuá. a

He fakatonuhiaʻi moʻoni ē ʻa e tui ʻa Tēvita kia Sihová ʻe he faitau ko iá! ʻI he pau ke tau fili ʻi he manavahē ki he tangatá mo e falala ki he mālohi fakaefakahaofi ʻo Sihová, ʻoku hā mahino ʻa e filí: “ʻOku totonu pe ke fai ki he pule ʻa e ʻOtua ʻi he pule ʻa e tangata.” (Ngāue 5:29) Hiliō ai, ʻi heʻetau vakai atu ki he ngaahi tuʻunga faingataʻá mei he anga ʻo e vakai ʻa Sihova ko e ʻOtuá, te tau malava ai ʻo vakai mafamafatatau ki he ngaahi palopalema hā taulōfuʻú.

[Fakamatala ʻi lalo]

[Puha/Fakatātā ʻi he peesi 9]

NAʻE LAHI FĒFĒ ʻA KOLAIATE?

Ko e fakamatala ʻi he 1 Samiuela 17:​4-7 ʻoku tala mai ai kia kitautolu ko e māʻolunga ʻo Kolaiaté naʻe laka hake he kiupite ʻe ono—meimei ki he mita ʻe tolu. ʻOku tala ʻa e lahi mo e mālohi ʻo e saianiti Filisitiá mei hono kofu-tau ʻuno-ukamea palasá, naʻe kilo ʻe 57 hono mamafá! Ko e ʻesia ʻo hono taó naʻe hangē ha vaʻa papá, pea ko hono mata ʻaioné naʻe kilo ʻe 7 hono mamafá. Tā, ʻoku hangehangē naʻe mamafa ange ʻa e teunga-tau ia ʻo Kolaiaté ʻia Tēvita tonu!