Ko e Hā e Taumuʻa ʻa e ʻOtuá ki he Māmaní?

KO E hā ʻokú ke fiefia ai ʻi haʻo ʻeveʻeva atu ʻi ha matātahi ʻoneʻone maʻá? Ko e hā ʻokú ke namu leleiʻia ai ʻi he ʻalaha ngangatu ʻo e matalaʻiʻakaú? Ko e hā ʻoku toʻoa ai ho lotó ʻi haʻo sio ki he pā mālohi hake ʻa e peaú ʻi he pupuʻá pea puhiʻi māʻolunga ki he ʻataá ʻo tapua mai ai hono ʻatá ʻi ha fakatōtō fakaholomamata hifo ʻa e laʻaá? Pea ko e hā ʻoku fakamānako ai ʻa e mamata ki ha vaʻinga holo ʻa ha fuʻu tofuaʻa lahi mo hono ʻuhikí ʻi he tahí, pe ko e mamata ʻi he fehūʻaki ʻa e fanga ika lanu kehekehé ʻi he feó?

ʻOku taha pē ʻa e talí ki he kotoa ʻo e ngaahi fehuʻí ni. Naʻe ngaohi kitautolú ke tau nofo ʻi he Palataisí! Ko e feituʻu ia naʻe ʻuluaki moʻui ai ʻetau muʻaki ongo mātuʻá, ʻa ʻĀtama mo ʻIvi. Naʻa tau maʻu meia kinaua ʻa e holi ko ia ke moʻui ʻi he Palataisí, pea naʻá na maʻu ia mei hona Tokotaha-Fakatupú, ʻa Sihova ko e ʻOtuá. Naʻá ne ʻiloʻi ko kitautolu faʻahinga ʻo e tangatá te tau fiefia ʻi he Palataisí koeʻuhí naʻá ne fakatupu kitautolu fakataha mo e ngaahi ʻulungāanga ʻoku fiemaʻu ke tau fiefia ai ʻi ha ʻapi fakaemāmani fisifisimuʻa peheé.

Ko e hā naʻe fakatupu ai ʻe Sihova ʻa e māmaní? Naʻá ne “faʻu ia ke nofoʻanga” ai ʻa e faʻahinga ʻo e tangatá. (Aisea 45:18) Naʻe foaki ange ʻe he tokotaha “ngaohi ʻa e fonua” kia ʻĀtama mo ʻIvi ha ʻapi palataisi fakaʻofoʻofa, ko e ngoue ko ʻĪtení. (Selemaia 10:12; Senesi 2:​7-9, 15, 21, 22) He fakaʻofoʻofaʻia moʻoni ē ko kinaua ʻi hono ngaahi vaitafé, ko hono matalaʻiʻakaú pea mo hono ʻuluʻakaú! Naʻe lava pē ke mātā ʻa e ngaahi foʻi manupuna fakaʻofoʻofa ʻi he ʻataá, mo e fanga manu ʻo e faʻahinga kehekehe naʻa nau heva holo he funga fonuá—ʻo halaʻatā haʻanau fakatuʻutāmaki ki he tangatá. Ko e fanga iká mo e ngaahi meʻamoʻui kehé naʻa nau ngaʻunu holo ʻi he ngaahi vai maʻa tasilo ʻo e māmaní. Pea naʻe hiliō ai ʻa e fakataha ʻa ʻĀtama mo ʻIví. Naʻe lava ke na fanauʻi mai ʻena fānau pea fakalahi atu hona ʻapi Palataisí ʻo feohi fiefia mo hona fāmili naʻe tupulakí.

Neongo ʻoku ʻikai ko ha palataisi ʻa e māmaní ia he ʻahó ni, ʻe lava ke fakahoa ia ki ha ʻapi fakalata ʻo ha fāmili fiefia. ʻOku ʻi hotau ʻapi fakaemāmanilahi kuo foaki mai ʻe he ʻOtuá ʻa e meʻa ʻoku tau fiemaʻú—ʻa e maama, māfana, vai mo e meʻatokoni. He houngaʻia ē ko kitautolu ʻi he maama mo e māfana ʻo e laʻaá pea mo e ulo feʻunga ʻa e māhiná  ʻi he poʻulí! (Senesi 1:​14-18) ʻI lalofonuá, ʻoku ʻi ai ʻa e ngaahi fefie, hangē ko e malalá mo e loló, ʻa ia ʻoku lava ke tau ngāueʻaki ki hono fakamāfanaʻi ʻo ha meʻa. Makatuʻunga ʻi he vilo takai ʻa e vaí pea mo e ngaahi vaitafé, anovaí mo e tahi ʻo e māmaní, ʻoku tau maʻu ai ʻa e vaí. Pea ko e musie lanu mata ʻi he māmaní ʻoku hangē ia hano kāpetí.

ʻI he hangē pē nai ko ha meʻatokoni ʻoku tānaki ʻi ha ʻapí, ʻoku mahu ʻa e feleoko ʻo e māmaní. Fakafou ʻi he ngaahi meʻakai foha ʻi he ngoueʻangá pea mo e fuaʻiʻakau ʻi he ngoue ʻakau fuá, ko Sihova ʻokú ne ‘ʻomai kia kitautolu ʻa e ngaahi taʻu mahu, ʻo ne ʻai ke fonungutungutu hotau lotó ʻi he fakafiefia.’ (Ngāue 14:​16, 17) Koeʻuhi kuo ʻosi hoko ʻa e māmaní ia ko ha ʻapi fakalata pehē, fakaʻuta atu ki he tuʻunga ʻe ʻi aí ʻi he taimi ʻe ʻai ai ia ʻe Sihova ko e “ʻOtua fiefiá,” ko ha palataisí!—1 Timote 1:​11, NW.

 [Maʻuʻanga ʻo e Tā ʻi he peesi 2]

TAKAFÍ: Māmani: NASA photo; Ngaahi fetuʻu: NASA, ESA and AURA/Caltech