Ko ha Feinga Loto-Toʻa ke Pouaki ʻa e Tohi Tapú

Naʻá ne mālōlō ʻi he feituʻu maomaonganoa mo momoko toho ʻo e fakahahake ʻo Saipīliá, pea naʻe fai hono lauʻikoviʻi mo fakaongoongokoviʻi. ʻOku manatu ʻa e tokosiʻi kiate ia ko e taha ia ʻo e kau tangata tuʻu-ki-muʻa ki he fakalakalaka fakalaumālie ʻa hono kau kaungā Kalisí. Ko e hingoa ʻo e paionia ne taʻetokaʻí ni ko Selāfimi. Ko ʻene feinga loto-toʻa ke pouaki ʻa e Tohi Tapú naʻe iku atu ia ki heʻene maté.

NAʻE moʻui ʻa Selāfimi ʻi he taimi naʻe hoko ai ʻa Kalisi ko ha konga ʻo e ʻEmipaea Toaké. Fakatatau ki he mataotao Siasi ʻOfotokisī Kalisi ko George Metallinos, naʻe fakaʻilongaʻi ʻa e vahaʻa taimi ko iá ʻe he “ʻikai loko ʻi ai ha ngaahi akoʻanga feʻungá” pea “mo ha siʻi ʻa e akó ʻi he lotolotonga ʻo e tokolahi taha ʻo e kakaí,” ʻo kau ki ai mo e haʻa faifekaú.

Naʻe ʻi ai ha faikehekehe lahi ʻi he lea faka-Kalisi Koiné (anga-mahení) pea mo e lea fakafonuá, fakataha mo hono ngaahi lea fakafeituʻu lahi faú. Naʻe aʻu ʻo lahi ʻaupito ʻa e faikehekehe ko iá ʻo hoko ai ʻa e lea Koiné, ʻa ia naʻe tohi ai ʻa e Ngaahi Konga Tohi Tapu Faka-Kalisi Kalisitiané, ʻo ʻikai kei mahinoʻi ia ʻe he faʻahinga ko ia naʻe ʻikai ke akó. ʻI ha fekīhiaki naʻe hoko ai, naʻe fili ai ʻe he siasí ke tali ʻa e lea faka-Kalisi Kōini mahinongataʻá.

ʻI he ʻātakai ko ʻení, naʻe fāʻeleʻi ai ʻa Sitefanosi ʻAionesi Pokonatusi ʻi ha fāmili ʻiloa ʻi he motu ko Lesbos, ʻi Kalisi, ʻi he 1670 nai. Ko e tokolahi ʻi he kiʻi motú naʻe masiva mo ʻikai malava ke lautohi. Koeʻuhi ko e ʻikai loko ʻi ai ha ngaahi akoʻanga feʻungá, naʻe pau ai kia Sitefanosi ke kamata pē ʻi he akó ʻi ha monasiteliō fakalotofonua. Naʻe fakanofo ia ko ha tīkoni ʻo e Siasi ʻOfotokisī Kalisí pea ʻoange ki ai ʻa e hingoa Selāfimí ʻokú ne fuʻu kei taʻu siʻi ʻaupito.

ʻI he 1693 nai, naʻe hanga ai ʻe he fakaʻamu ʻa Selāfimi ki ha ʻiló ʻo ueʻi ia ke ne ʻalu ki Konisitanitinopale (ko ʻIsitenipulu ia he taimí ni, ʻi Toake). Hili ha taimi siʻi, naʻe tokaʻi ai ia ʻe he kau tangata ʻiloa ʻo Kalisí koeʻuhi ko ʻene potó. Tuaiekemo, naʻe ʻave ia ʻe ha kautaha mamahiʻi-fonua fakapulipuli ʻa Kalisi ke ne hoko ko honau fakafofonga talafekau kia Sā Pita ko e Lahi ʻo Lūsiá. Naʻe hanga ʻe heʻene feʻaluʻaki ki Mosikoú ʻo ʻai ʻa Selāfimi ke ne aʻu ai ki he konga lahi ʻo ʻIulope, ʻa ia naʻá ne fetaulaki ai mo e tākiekina fakalotu pea mo e liliu fakaefakakaukau. ʻI he 1698, naʻe fononga ai ʻa Selāfimi ki ʻIngilani pea fai ai ha ngaahi fetuʻutaki mahuʻinga ʻi Lonitoni mo Oxford. Naʻe fakafeʻiloaki ai ia ki he Pīsope-Pule ʻo Canterbury, ko e taki ʻo e Siasi ʻIngilaní, ko ha fetuʻutaki ia naʻe vave ʻene ʻaonga lahi kia Selāfimí.

Pulusi ʻo ha Tohi Tapu

Lolotonga ʻene ʻi ʻIngilaní, naʻe aʻu ai ʻa Selāfimi ki he fakamulituku ʻo pehē naʻe ʻi ai ha fiemaʻu lahi ʻi he lotolotonga ʻo e kau Kalisí ki ha liliu foʻou mo mahinongofua ʻo e ‘Fuakava Foʻoú’ (Ngaahi Konga Tohi Tapu Faka-Kalisi Kalisitiané). ʻI hono ngāueʻaki ha liliu naʻe faʻu ʻe mōnike Mekisimasi ʻo laka hake he taʻu ʻe nimangofulu ki muʻá, naʻe kamata pulusi ai ʻe Selāfimi ha liliu foʻou, tonu matematē mo mahinongofua. Naʻá ne kamata vēkeveke ʻene ngāué ka naʻe vave ʻa e ʻosi ʻa e paʻangá. Naʻe fakaleleiʻi ʻa e tuʻungá ni ʻi he palōmesi ange ʻa e Pīsope-Pule ʻo Canterbury te ne ʻoange ʻa e tokoni fakapaʻanga naʻe fiemaʻú. ʻI hono fakalototoʻaʻi ʻe he tokoni ko iá, naʻe fakatau ai ʻe Selāfimi ha pepa paaki pea alea mo ha tokotaha faipulusi.

 Kae kehe, naʻe lele ʻa e pulusi tohí ni ʻo ngata pē ia ʻi he vaeua ʻo e Kōsipeli ʻa Luké. Pea ʻi ha liliu fakapolitikale ʻi ʻIngilani naʻe iku atu ai ki he holomui ʻa e Pīsope-Pule ʻo Canterbury mei hano toe fai ha tokoni fakapaʻanga. Naʻe feinga taʻemanavahē ai ʻa Selāfimi ki ha kau siponisā tuʻumālie ʻe niʻihi pea naʻe malava ai ke pulusi ʻene liliu ne fakaleleiʻí ʻi he 1703. Ko e konga ʻo e fakamolé naʻe totongi ia ʻe he Sōsaieti ki Hono Fakamafola ʻo e Kōsipelí ʻi he Ngaahi Feituʻu Mulí.

Ko e ongo liliu voliume ʻe ua motuʻa ange meia Mekisimasí naʻe kau ai ʻa e muʻaki konga tohi faka-Kalisí, ʻa ia naʻe matolu mo mamafa. Ko e liliu ne fakaleleiʻi ʻa Selāfimí naʻe pulusi ia ʻi ha mataʻitohi mata iiki ange pea ko e liliu lea faka-Kalisi fakaeonopōní pē naʻe kau ki aí, ʻa ia naʻe manifi ange ia mo totongi maʻamaʻa.

Ko Hono Tafunaki ʻo ha Fekīhiaki

“Ko hono moʻoní, naʻe fakalato ʻe he liliu fakaeonopooni ko ʻení ʻa e fiemaʻu moʻoni ʻa e kakaí,” ko e fakamatala ia ʻa e mataotao ko George Metallinos. “Kae kehe, naʻe ngāueʻaki ʻe Selāfimi ia ʻa e faingamālié ni ke ne ʻohofi ai ha kulupu ʻo e haʻa faifekaú naʻa nau fakafepakiʻi ʻa e ngaahi liliu [Tohi Tapú].” Naʻe ʻita lahi ʻa e haʻa faifekaú ʻi he pehē ʻe Selāfimi ʻi he talateú naʻá ne faʻu ʻene liliú ‘ʻo fakatefito pē ki ha lelei maʻá e niʻihi ʻo e kau pātelé mo e haʻa faifekau ʻe niʻihi ko ia naʻe ʻikai ke nau mahinoʻi ʻa e lea faka-Kalisi Koiné, koeʻuhi ʻi he tokoni ʻa e Fungani Laumālie Māʻoniʻoní te nau malava ai ke lau mo mahinoʻi ha meʻa mei he muʻaki konga tohí koeʻuhi ke nau lava ʻo fakahoko atu ʻa e ʻuhingá ki he kau Kalisitiane lāuvalé.’ (The Translation of the Bible Into Modern Greek​—During the 19th Century) Naʻe hoko ai ʻa Selāfimi ʻo kau lahi ʻi ha fekīhiaki ʻi he liliu Tohi Tapú ʻi he lotoʻi Siasi ʻOfotokisī Kalisí.

ʻI he tafaʻaki ʻe taha ʻo e fekīhiakí ko e faʻahinga ia naʻa nau lāuʻilo ko e fakalakalaka fakalaumālie mo fakaeʻulungāanga ʻa e kakaí ʻoku fakatuʻunga ia ʻi heʻenau mahinoʻi ʻa e Tohi Tapú. Naʻa nau toe tui naʻe fiemaʻu ki he kau mēmipa ʻo e haʻa faifekaú ke nau fakaleleiʻi ʻenau ʻilo ʻanautolu tonu ki he Tohi Tapú. Pehē foki, naʻe tui ʻa e kau poupou ia ki he liliu ʻo e Tohi Tapú ʻoku malava ke fakahaaʻi ʻa e ngaahi moʻoni ia ʻo e Tohi Tapú ʻi ha faʻahinga lea pē.—Fakahā 7:9.

Naʻe ngāueʻaki ʻe he kau fakafepaki ki he liliu ʻo e Tohi Tapú ha ʻuhinga fakangalilelei ʻo pehē ko hano liliu ʻo e Tohi Tapú ʻe mioʻi ai ʻa e ngaahi meʻa ʻi lotó pea ʻe fakataʻeʻaongaʻi ai ʻa e mafai ʻo e siasí ki hono ʻomai ʻa e fakaʻuhingá mo e tokāteliné. Ka ko e meʻa naʻa nau ilifia moʻoni kinautolu ki aí ko hano ngāueʻaki ʻe he kau Palotisaní ʻa e liliu ʻo e Tohi Tapú ke fakavaivaiʻiʻaki ʻa e mafai ʻo e Siasi ʻOfotokisī Kalisí. Naʻe fakakaukau ai ʻa e kau tangata faifekau tokolahi ʻoku nau moʻuaʻaki ke fakafepakiʻi ha faʻahinga meʻa pē ʻe kaunga lelei ki he kau Palotisaní, ʻo kau ai ʻa e ngaahi feinga ko ē ke ʻai ʻa e Tohi Tapú ke mahinongofua ki he kakai lāuvalé. Naʻe hoko ai ʻa e liliu ʻo e Tohi Tapú ʻo ne fakalanga lahi ʻa e fepaki ʻi he vahaʻa ʻo e kau lotu Palotisaní pea mo e lotu ʻOfotokisií.

Neongo naʻe ʻikai ke loto ʻa Selāfimi ia ke liʻaki ʻa e Siasi ʻOfotokisií, naʻá ne fakahaaʻi loto-toʻa ʻa e taʻeʻilo mo e tomuʻa fehiʻa ʻa e haʻa faifekau naʻa nau fakafepakiʻi iá. ʻI he talateu ki heʻene ‘Fuakava Foʻoú,’ naʻá ne tohi ai: “ʻOku fiemaʻu ki he tokotaha Kalisitiane manavahē-ʻOtua kotoa pē ke ne lau ʻa e Tohi Tapu Māʻoniʻoní” koeʻuhi ke ne “hoko ko ha tokotaha faʻifaʻitaki kia Kalaisi pea talangofua ki [heʻene] akonakí.” Naʻe fakamatematē ʻa Selāfimi ʻo pehē ko hono taʻofi ʻa hono ako ʻo e Tohi Tapú ko e tupu ia mei he Tēvoló.

Ko ha Matua Mai ʻa e Fakafepakí

ʻI he aʻu ʻa e liliu ʻa Selāfimí ki Kalisí, naʻe langaʻi ai ʻa e ʻita ʻa e Siasi ʻOfotokisī Kalisí. Naʻe tapui ai ʻa e liliu foʻoú ni. Naʻe tutu ʻa e ngaahi tatau ʻo e liliú ni, pea ko ha taha pē naʻá ne maʻu pe lau iá naʻe fakamanamanaʻi ʻaki hano tapui ia mei he maʻuʻanga kelesi fakalotú. Naʻe hanga ʻe Pēteliake Kepaleli III ʻo tapui ʻa hono tufaki ʻo e liliu ʻa Selāfimí, ʻo lau ia ʻoku taʻefeʻunga mo taʻeʻaonga.

Neongo naʻe ʻikai ke mole ʻa e ʻamanaki ʻa Selāfimí, naʻá ne ʻiloʻi ʻoku fiemaʻu ke ne tokanga. Pea neongo ʻa e tapui fakalotu ʻe he siasí, naʻe tali ʻe he kau faifekau ia ʻe niʻihi mo e niʻihi kehe ʻene liliu Tohi Tapú. Naʻá ne lavameʻa ʻaupito ʻi hono tufaki ʻene liliú. Ka neongo ia, naʻe teʻeki ke vavea ʻosi ʻene fepaki mo e kau fakafepaki mālohí ni.

Ko e Ngaahi Taʻau Fakaʻosi ki Heʻene Moʻuí

Tuku kehe ʻa hono pouaki ʻa hono tufaki ʻo e Tohi Tapú, naʻe hoko ʻa Selāfimi ʻo kau ʻi he ngaahi kautaha mamahiʻi-fonua feinga liliu  puleʻangá. Ke muia ʻení, naʻá ne foki ki Mosikou ʻi he faʻahitaʻu māfana ʻo e 1704. Naʻá ne hoko ai ko ha kaumeʻa falalaʻanga ʻo Pita ko e Lahi pea hoko ai ko ha palōfesa ʻi he Akoʻanga Fakatuʻi Lūsiá. Kae kehe, ʻi he hohaʻa ki ha meʻa ʻe hoko nai ki heʻene liliu Tohi Tapú, naʻe toe foki ai ʻa Selāfimi ki Konisitanitinopale ʻi he 1705.

ʻI ha toe pulusi ʻo ʻene liliú ʻi he taʻu pē ko iá, naʻe toʻo ai ʻe Selāfimi ʻa e talateu fakaanga ʻo ʻene ʻuluaki pulusí. Naʻá ne tānaki leva ki ai ha lea kamata faingofua ʻa ia naʻe fakaʻaiʻai ai ʻa hono lau ʻo e Tohi Tapú. Naʻe mafolalahia ʻa e tatau ko ʻení pea ʻoku ʻikai ha lēkooti ia ʻo ha tali fakafili ki ai mei he kau maʻu lakanga fakaesiasí.

Ka neongo ia, ʻi he 1714 naʻe hoko ai ha foʻi tā oʻo moʻoni meia ʻAlekisānita Helatiasi, ko ha tokotaha Kalisi fefonongaʻaki mo fakafepaki ki he liliu ʻo e Tohi Tapú. ʻI heʻene tohi ko e Status Præsens Ecclesiæ Græcæ (Ko e Tuʻunga Lolotonga ʻo e Siasi Kalisí), naʻá ne tāpalasia anga-fulikivanu ai ʻa e kau liliu-leá mo e ngaahi liliu ʻo e Tohi Tapú. Naʻe tohi ʻe Helatiasi ha foʻi vahe kakato fekauʻaki mo Selāfimi, ʻo tukuakiʻi ai ia ko ha tokotaha kaihaʻa, ko ha tokotaha maʻu paʻanga kākā, ko ha tokotaha vale he lautohí pea ko ha tokotaha pauʻu kākā. Naʻe ʻi ai ha moʻoni ʻe taha ʻi he ngaahi tukuakiʻi ko iá? ʻOku fakahaaʻi mai ʻe he faʻutohi ko Stylianos Bairaktaris ʻa e fakakaukau ʻiloa ʻa e tokolahi ʻo e kau mataotaó ʻi heʻene ui ʻa Selāfimi ‘ko ha tangata ngāue pea ko ha paionia ʻatamaiʻia’ ʻa ia naʻe tāpalasia koeʻuhi he naʻe mahulu atu ʻene ʻiló ʻaʻana ʻi hono toʻumeʻá. Neongo ia, naʻe kaunga lahi ʻa e tohi ʻa Helatiasí ia ki he ikuʻanga fakamamahi ʻo Selāfimí.

Tofanga ʻi he Fuʻu Potanga Mahalo-Koviʻi

ʻI he taimi naʻe foki ai ʻa Selāfimi ki Lūsia ʻi he 1731, naʻe ʻosi mate ʻa Pita ko e Lahi ia. Ko ia ai, naʻe ʻikai ke kei maʻu ʻe he tīkoni Kalisí ni ha maluʻi fakapuleʻanga. Naʻe lolotonga pule ʻi he taimi ko iá ʻa ʻEmipola ʻAna ʻIvanovana pea naʻá ne tokanga ʻaupito naʻa ʻi ai ha faʻahinga meʻa te ne fakatupunga ha maveuveu ʻi heʻene pulé. ʻI Sanuali 1732, naʻe sasala ai ʻi St. Petersburg ha lau ʻo pehē ʻoku ʻi ai ha sipai Kalisi ʻoku ngāue fakafepaki ki he ngaahi meʻa ʻa e ʻemipaeá. Ko e tokotaha naʻe fakamahaloʻi ki aí ko Selāfimi. Naʻe puke leva ia ʻo ʻave ki he monasiteliō Nevsky ki hano fakaʻekeʻeke. Naʻe ʻi he monasitelioó ha tatau ʻo e tohi ʻa Helatiasí ʻo tukuakiʻi ai ʻa Selāfimi ki ha ngaahi hia kehekehe. Naʻe tuʻo tolu ʻa e faitohi ʻa e tīkoní ʻo fakaʻikaiʻi ʻa e ngaahi tukuakiʻí ni. Naʻe lele ʻa e fakaʻekeʻeké ʻi he māhina nai ʻe nima, pea naʻe faingataʻa kia Selāfimi ke ne ʻatā mei he fuʻu potanga mahalo-koviʻi naʻá ne tofanga aí.

Koeʻuhi ko e ʻikai ha fakamoʻoni pau ki hono tukuakiʻi ʻo Selāfimí, naʻá ne hao ai mei he tautea maté. Kae kehe, koeʻuhi ko e ngaahi tukuakiʻi ʻa Helatiasí, naʻe toumoua ai ʻa e kau maʻu mafaí mei hono tukuange ʻo Selāfimí. Naʻe tautea ai ʻa e tīkoni Kalisí ni ke fakaheeʻi ʻi Saipīlia ʻo aʻu ki heʻene mate. Naʻe pehē ʻi he tuʻutuʻuní naʻe makatuʻunga ʻa e fakahalaiá ʻi he ngaahi tukuakiʻi naʻe “ʻi he fakamatala naʻe pulusi ʻe he faʻutohi Kalisi ko Helatiasí.” ʻI Siulai 1732, naʻe tūʻuta ai ʻa Selāfimi ʻi he fakahahake ʻo Saipīliá kuo kiiʻi pea tuku ia ki he pilīsone ongoongo-kovi ko Okhotsk.

ʻI he taʻu nai ʻe tolu mei ai, naʻe mālōlō ʻa Selāfimi, pea kuo puli atu ia ʻo ʻikai toe manatua. ʻI he taimi ʻe niʻihi, naʻe hala mo taʻefakapotopoto ʻene ngaahi filí mo ʻene ngaahi foungá, ka ko ʻene liliu Tohi Tapú ko e taha ia ʻo e ngaahi liliu Tohi Tapu lahi ʻoku ala maʻu he taimí ni ʻi he lea faka-Kalisi ʻo onopōní. a ʻOku ʻi he lotolotonga ʻo e ngaahi liliu ko iá ʻa e liliu mahinongofua ko e New World Translation of the Holy Scriptures, ʻa ia ʻoku toe ala maʻu mo ia ʻi he ngaahi lea lahi kehekehe. He fakamālō lahi ē ko kitautolu ki hono fakatolonga mai ʻe Sihova ko e ʻOtuá ʻa ʻene Folofolá koeʻuhi ke maʻu ai ʻe he kakai ʻo e feituʻu kotoa pē ʻa e faingamālie ke nau “aʻusia ʻa e ʻilo kanokano ki he moʻoni”!—1 Timote 2:​3, 4.

[Fakamatala ʻi lalo]

[Fakatātā ʻi he peesi 12]

Pita ko e Lahi

[Maʻuʻanga ʻo e Tā ʻi he peesi 10]

ʻŪ tā: Anga-lelei ʻa e American Bible Society