Ngaahi Fehuʻi mei he Kau Lautohí

ʻI he Lao ʻa Mōsesé, ko e hā naʻe vakai ai ki he fehokotaki fakasino fakanatula ʻe niʻihi naʻá ne ʻai ha taha ke “taʻemaʻa”?

Naʻe fakatupu ʻe he ʻOtuá ʻa e ʻōkani fakafanaú ki hono fakatupuʻaki mai ʻa e faʻahinga ʻo e tangatá pea ke fiefia ai ʻa e ngaahi hoa malí. (Senesi 1:28; Palovepi 5:​15-18) Kae kehe, ʻi he vahe 12 mo e 15 ʻo e Livitikó, ʻoku tau maʻu ai ha ngaahi lao fakaikiiki fekauʻaki mo e taʻemaʻa naʻe tupu mei he mahua mei he tangatá ʻa e huhuʻa fakafanaú, ko e puke fakamāhiná mo e fāʻelé. (Livitiko 12:​1-6; 15:​16-24) Naʻe pouaki ʻe he ngaahi lao pehē naʻe ʻoange ki ʻIsileli ʻo e kuonga muʻá ha founga moʻui lelei, ʻo pouaki ai ʻa e ngaahi tuʻunga maʻa fakaeʻulungāanga māʻolungá, pea fakamamafaʻi ai ʻa e toputapu ʻo e totó pea mo e fiemaʻu ʻo e fakalelei ki he angahalá.

Ko e ngaahi fiemaʻu ʻa e Lao ʻa Mōsesé ʻi he fekauʻaki mo e fehokotaki fakasinó naʻe pouaki ai ʻi he lotolotonga ʻo e ngaahi meʻa kehé ʻa e moʻui lelei fakalūkufua ʻa e kau ʻIsilelí. ʻOku pehē ʻe he tohi ko e Bible and Modern Medicine: “Ko e fai pau ki he tuʻutuʻuni fekauʻaki mo e taimi ʻo e puke fakamāhiná ke fakamamaʻo ai mei he fehokotaki fakasinó naʻe fakamoʻoniʻi ko ha maluʻi lelei ia mei ha hoko ʻa ha faʻahinga mahaki fakaefehokotaki fakasino . . . pea ko ha toe taʻofiʻanga papau ia ʻo e kamata mo e tupu ʻa e kanisā ʻi he taungafanaú.” Naʻe maluʻi ʻe he ngaahi lao peheé ʻa e kakai ʻa e ʻOtuá mei he ngaahi mahaki naʻe taʻeʻiloa pe naʻe ʻikai pē te nau lāuʻilo ki ai. Naʻe fakatupulekina ʻe he maʻa fakaefehokotaki fakasino leleí ʻa e moʻui lelei ʻa ha puleʻanga naʻe ʻosi tāpuakiʻiʻaki ʻe he ʻOtuá ha talaʻofa ʻo e tupulekina mo e lakalakaimonū. (Senesi 15:5; 22:17) Naʻe toe kau foki ki ai ʻa e moʻui lelei fakaeongo ʻa e kakai ʻa e ʻOtuá. ʻI he talangofua ki he ngaahi laó ni, naʻe ako ai ʻa e ngaahi husepānití mo e ngaahi uaifí ke mapuleʻi ʻa e havala ki he fehokotaki fakasinó.

Kae kehe, ko e ʻīsiu tefito naʻe fekauʻaki mo e taʻemaʻa naʻe tupu mei he ngaahi meʻa fakaefehokotaki fakasinó ko e ʻaú pe mole ʻa e totó. Ko e ngaahi lao ʻa Sihova fekauʻaki mo e totó naʻe ʻikai ngata pē ʻi heʻene ʻai ʻo maongo ki he ʻatamai ʻo e kau ʻIsilelí ʻa e tuʻunga toputapu ʻo e totó ka naʻe toe pehē foki ki he ngafa makehe naʻe fakahoko ʻe he totó ʻi he lotu kia Sihová, tautefito ki he ngaahi feilaulau mo e fakalelei ki he ngaahi angahalá.—Livitiko 17:11; Teutalonome 12:​23, 24, 27.

Ko ia ai, ko e ngaahi fiemaʻu fakaikiiki ʻa e Laó ʻi he tafaʻaki ko ʻení ʻoku felāveʻi ofi ia mo e taʻehaohaoa fakaetangatá. Naʻe ʻilo ʻe he kau ʻIsilelí naʻe ʻikai malava ʻe ʻĀtama mo ʻIvi ʻi he hili ʻena faiangahalá ke na fanauʻi mai ha fānau haohaoa. Ko e kātoa ʻo hona ngaahi hakó te nau tofanga ʻi he ngaahi nunuʻa ʻo e angahala tukufakaholó, ko e taʻehaohaoa mo e mate. (Loma 5:12) Koeʻuhi ko e meʻá ni, ko e moʻui taʻehaohaoa pē mo e angahalaʻia ʻe malava ʻe he ngaahi mātuʻá ke fakahoko maí, neongo naʻe faʻu ʻa e ʻōkani fakafanau fakaetangatá ia ʻi he kamataʻangá ke ne fakahoko mai ʻa e moʻui haohaoa fakafou ʻi he fokotuʻutuʻu ko e malí.

Ko ia, ʻe fakamanatu ʻe he ngaahi fiemaʻu fakaefakamaʻa ʻa e Laó ki he kau ʻIsilelí ʻo ʻikai ngata pē ʻi he angahalaʻia tukufakaholó kae toe pehē foki ki he fiemaʻu ʻo ha feilaulau huhuʻi ke fakamolemoleʻi ʻaki ʻa e ngaahi angahalá pea toe fakafoki mai ʻa e tuʻunga haohaoa fakaetangatá. Ko e moʻoni, naʻe ʻikai malava ʻe he ngaahi feilaulau monumanu naʻa nau faí ʻo fakahoko ʻa e meʻa ko iá. (Hepelu 10:​3, 4) Ko e taumuʻa ia ʻo e Lao ʻa Mōsesé ke ne taki kinautolu kia Kalaisi pea ke tokoniʻi kinautolu ke nau mahinoʻi ko e feilaulau fakaetangata haohaoa pē ʻa Sīsuú naʻe malava ai ʻa e fakamolemole moʻoní, ʻo fakaʻatā ai ki he faʻahinga faitōnungá ʻa e hala ki he moʻui taʻengatá.—Kaletia 3:24; Hepelu 9:​13, 14.