‘Ko e Fakamulituku Lelei Taha Ne U Lava ke Fakaʻuta Atu ki Aí’

NAʻE tohi ʻe ha faiako kolisi ʻi Sipeini: “Laka hake ʻi he taʻu ʻe teau, kuo fakahāhā ai ʻe he Kau Fakamoʻoni ʻa Sihová ʻa e uouangataha moʻoni, faitotonu taʻealafakaangaʻi, pea hiliō ai, ʻa ʻenau tui taʻealafakaʻauhá.” Ko e hā e meʻa naʻá ne ueʻi ʻa e faiakó ni, ʻa ia ʻokú ne pehē ko ha tokotaha fakaʻikaiʻi-ʻOtua iá, ke ne fai ʻa e faʻahinga fakamatala peheé?

Naʻe kamata kotoa ia ʻi he taimi naʻe vaheʻi ai kia Noemí, ko ha tokotaha ako ʻi he kolisí pea ko e taha ia ʻo e Kau Fakamoʻoni ʻa Sihová, ke ne faʻu ha ʻēsei ko ha konga ia ʻo e sivi ʻi he fakaʻosinga ʻo e taʻú ʻi heʻene lēsoni he akó. Naʻá ne fili ke fakamatala ki he kaveinga “Ko e Tapatolu Vāletí ʻi he Malumalu ʻo e Pule ʻa e Kau Nasí.”

Ko e hā naʻá ne fili ai ʻa e kaveinga ko iá? ʻOku fakamatala ʻa Noemí: “Koeʻuhi naʻe teu ke ʻaʻahi ʻe ha faiako ʻa ʻeku ngāué, naʻá ku fakakaukau ai ʻe lava ke u ngāueʻaongaʻaki ʻa e faingamālie ko ʻení ke u fai fakamoʻoni ai kiate ia. Naʻe maongo ki hoku lotó ʻa e talanoa fekauʻaki mo e tuʻumaʻu moʻoni ʻa e Kau Fakamoʻoni ʻa Sihová ʻi hono puleʻi kinautolu ʻi Siamane ʻe he kau Nasí. Naʻá ku tui ai ʻe toe maongo foki ia ki he niʻihi kehé.”

Naʻe maongo ʻa e ngāue ʻa Noemí ki he kakai tokolahi ʻo lahi ange ia ʻi he meʻa naʻá ne fakaʻuta atu ki aí. ʻI ʻOkatopa 5, 2002, naʻe maʻu pale ai ʻa ʻene ʻēseí ʻi ha feʻauhi fakafonua ʻi he fekumi ki he saienisí mo e anga ʻo e nofo ʻa e tangatá. Ko e ngaahi pale ki he feʻauhi ko iá ʻoku foaki ia ʻe ha kulupu ʻe toko 20 ko e kau mataotao mo e kau palōfesa mei he ngaahi ʻunivēsiti tuʻu-ki-muʻa ʻo Sipeiní.

Naʻe maʻu ʻe Noemí ʻa ʻene palé meia Pilar del Castillo, ko e minisitā ako ʻa Sipeiní. Naʻe ngāueʻaongaʻaki ai ʻe Noemí ʻa e faingamālie ko iá ke ne ʻoatu ai ki he minisitaá ha tatau ʻo e foʻi filimi vitiō Jehovah’s Witnesses Stand Firm Against Nazi Assault. Naʻe tali lelei ʻe he minisitaá ʻa e meʻaʻofá.

ʻI he kolo tupuʻanga ʻo Noemí ko Manresa, naʻe fakamatalaʻi mataʻāʻā ai ʻe he nusipepa ʻi honau feituʻú ʻa ʻene lavameʻa fakaeakó pea toe paaki foki ai ʻa ʻene foʻi ʻēseí. Lolotonga iá, naʻe kole ʻe he pule-ako ʻo hono ʻapiakó ha tatau ʻo e ʻēseí koeʻuhi ke fakakau ia ki ha polokalama ke fakamanatuʻaki ʻa e taʻu 75 ʻo e kolisí.

“Ko e fakamulituku lelei taha ʻeni ne u lava ke fakaʻuta atu ki ai ʻi heʻeku ako ʻi he kolisí,” ko e lau ia ʻa Noemí. “Naʻá ku fuʻu fiefia ʻaupito ʻi heʻeku lau hifo ʻa e lea ʻa ʻeku faiakó, ʻa Mr Jorge Tomás Calot, ʻi heʻene tohi ko e konga ia ʻo ʻene talateu ki heʻeku līpōtí:

“‘Ko aú ko ha tokotaha fakaʻikaiʻi-ʻOtua, ka te u loto ke u tuipau fakaʻaufuli ki he ʻi ai ʻa e Tokotaha Aoniu ko ʻení, ʻa ia ʻokú ne fakaʻaiʻai ki heʻene kau lotú ʻa e moʻoni taha ʻo e “ʻofa ki he kaungāʻapí.”’”