Tokangataha ki he Lelei ʻo e Kautaha ʻa Sihová
Tokangataha ki he Lelei ʻo e Kautaha ʻa Sihová
“Te mau fiemalie i he lelei o ho fale.”—SĀME 65:4, PM.
1, 2. (a) Ko e hā ʻa e ola ʻe maʻu ʻe he kakai ʻa e ʻOtuá ʻi he ngaahi fokotuʻutuʻu ʻi he temipalé? (e) Ko e hā ʻa e ngaahi tokoni naʻe fai ʻe Tēvita ki he langa ʻo e temipalé?
KO Tēvita ʻo ʻIsileli ʻo e kuonga muʻá ko e taha ia ʻi he kakai tuʻu-ki-muʻa taha ʻoku lāulea ki ai ʻa e Ngaahi Konga Tohi Tapu Faka-Hepeluú. Ko e tauhi-sipi, tokotaha-mūsika, palōfita mo tuʻi ko ʻení naʻe falala kakato kia Sihova ko e ʻOtuá. Naʻe hanga ʻe he vahaʻangatae fekoekoeʻi ʻo Tēvita mo Sihová ʻo langaʻi ʻiate ia ha holi ke ne langa ha fale maʻá e ʻOtuá. ʻE hoko ʻa e fale pe temipale ko iá ko e senitā ia ʻo e lotu moʻoní ʻi ʻIsileli. Naʻe ʻiloʻi ʻe Tēvita ʻe hanga ʻe he ngaahi fokotuʻutuʻu ʻi he temipalé ʻo ʻomai ʻa e fiefia mo e tāpuaki ki he kakai ʻa e ʻOtuá. Ko ia ai, naʻe hiva ʻa Tēvita: “Oku monuia ia aia oku ke fili [Sihova], mo ke fakaofi ia kiate koe, koeuhi ke ne nofo i ho lotoa: te mau fiemalie i he lelei o ho fale, io, o ho fale tabu maonioni.”—Sāme 65:4, PM.
2 Naʻe ʻikai fakaʻatā ʻa Tēvita ke ne tokangaʻi ʻa e langa ʻo e fale ʻo Sihová. ʻI hono kehé, naʻe tuku ʻa e monū ia ko iá ki hono foha ko Solomoné. Naʻe ʻikai ke lāunga ʻa Tēvita ia koeʻuhi ko hono ʻoange ki he tokotaha kehe ʻa e monū ko ia naʻá ne holi tōtōivi ki ai ʻa ia tonú. Ko e meʻa naʻe mahuʻinga lahi taha kiate iá ke langa ʻa e temipalé. Naʻá ne poupou ʻaufuatō ki he foʻi ngāué ʻaki hono ʻoange kia Solomone ʻa e ngaahi palani fakaelanga naʻá ne maʻu meia Sihová. ʻIkai ngata aí, naʻe fokotuʻutuʻu ʻe Tēvita ʻa e kau Līvai ʻe laui afe ki he ngaahi lakanga ʻo e ngāué pea tokoniʻaki ha koula mo e siliva lahi ʻaupito ki he langa ʻo e temipalé.—1 Kalonikali 17:1, 4, 11, 12; 23:3-6; 28:11, 12; 29:1-5.
3. Ko e hā ʻa e fakakaukau ʻoku maʻu ʻe he kau sevāniti ʻa e ʻOtuá ki he ngaahi fokotuʻutuʻu ki he lotu moʻoní?
3 Naʻe poupouʻi ʻe he kau ʻIsileli faitōnungá ʻa e ngaahi fokotuʻutuʻu naʻe fai ki he lotu moʻoní ʻi he fale ʻo e ʻOtuá. ʻI he tuʻunga ko e kau sevāniti he ʻahó ni ʻa Sihová, ʻoku tau poupou meimei tatau ki he ngaahi fokotuʻutuʻu ki he lotú ʻi loto ʻi he konga ʻi māmani ʻo e kautaha ʻa Sihová. ʻOku tau fakahāhaaʻi ai ʻoku tau maʻu ʻa e fakakaukau tatau naʻe maʻu ʻe Tēvitá. ʻOku ʻikai ke tau maʻu ha fakakaukau lāunga. ʻI hono kehé, ʻoku tau tokangataha ki he lelei ʻo e kautaha ʻa e ʻOtuá. Kuó ke fakakaukau fekauʻaki mo e ngaahi meʻa lelei lahi ko ia ʻoku malava ke tau houngaʻia moʻoni aí? Tau lāulea angé ki ha niʻihi ʻo kinautolu.
Houngaʻia ʻi he Faʻahinga ʻOku Takimuʻá
4, 5. (a) ʻOku anga-fēfē hono fakahoko ʻe he “tamaioeiki agatonu mo boto” hono ngafá? (e) Kuo anga-fēfē ʻa e ongoʻi ʻa e Kau Fakamoʻoni ʻe niʻihi ʻo fekauʻaki mo e meʻakai fakalaumālie ʻoku nau maʻú?
4 ʻOku tau maʻu ʻa e ngaahi ʻuhinga lelei ke houngaʻia ai ʻi he “tamaioeiki agatonu mo boto” naʻe fakanofo ʻe Sīsū Kalaisi ke pule ki heʻene ngaahi meʻa ʻi he māmaní. ʻOku takimuʻa ʻa e kalasi tamaioʻeiki ʻo e kau Kalisitiane pani ʻe he laumālié ʻi hono malangaʻi ʻa e ongoongo leleí, fokotuʻutuʻu ʻa e ngaahi fakataha ki he lotú, pea mo hono pulusi ʻa e ngaahi tohi makatuʻunga ʻi he Tohi Tapú ʻa ia ʻoku laka hake ʻi he ngaahi lea ʻe 400. ʻOku laui miliona ʻa e kakai ʻi māmani lahi ʻoku nau maʻu ʻinasi ʻi he “mea kai [fakalaumālie] i hono taimi totonu” ko ʻení. (Mātiu 24:45-47, PM) ʻOku ʻikai moʻoni ha ʻuhinga ke lāunga ai fekauʻaki mo ia.
5 ʻI he ngaahi taʻu lahi, naʻe hokosia ai ʻe he Fakamoʻoni taʻumotuʻa ʻa Sihova ko Elfi ʻa e fiemālie mo e tokoni ko e tupu mei hono ngāueʻaki ʻa e akonaki Fakatohitapu ʻi he ngaahi tohi ʻa e kalasi tamaioʻeikí. Naʻe ueʻi ʻe he houngaʻia loloto ʻa Elfi ke ne tohi: “Ko e hā ʻaku ʻe fai ka ne taʻeʻoua ʻa e kautaha ʻa Sihová?” Kuo toe hoko foki mo Peter mo Irmgard ko ha ongo sevāniti ʻa e ʻOtuá ʻi he ngaahi taʻu lahi. ʻOku fakahaaʻi ʻe Irmgard ʻene houngaʻia ki he ngaahi tohi kotoa pē kuo faʻu ʻe he “kautaha ʻofa mo tokanga ʻa Sihová.” ʻOku kau ki he ngaahi tohi ko ʻení ʻa e ngaahi tohi naʻe teuteuʻi tefito pē maʻá e kakai ʻoku ʻi ai ʻenau ngaahi fiemaʻu makehé, ʻo hangē ko e faʻahinga taautaha ʻoku kovi ʻenau sió pe fanongó.
6, 7. (a) ʻOku anga-fēfē hono tokangaʻi ʻa e ngaahi ngāue ʻa e ngaahi fakatahaʻanga ʻi māmani lahí? (e) Ko e hā kuo leaʻaki ʻo fekauʻaki mo e konga ʻi māmani ʻo e kautaha ʻa Sihová?
6 ʻOku fakafofongaʻi ʻa e ‘tamaioeiki agatonú’ ʻe he Kulupu Pule ʻo e Kau Fakamoʻoni ʻa Sihová, ko ha kiʻi kulupu tokosiʻi ʻo e kau tangata pani ʻe he laumālié ʻoku nau ngāue ʻi he ʻuluʻi ʻapitanga ʻi māmani ʻo e Kau Fakamoʻoni ʻa Sihová ʻi Brooklyn, Niu ʻIoke. ʻOku fakanofo ʻe he Kulupu Pulé ʻa e kau sevāniti taukei ʻa Sihova ke nau ngāue ʻi he ngaahi ʻōfisi vaʻa ʻoku nau tokangaʻi ʻa e ngaahi ngāue ʻa e ngaahi fakatahaʻanga laka hake he 98,000 ʻi māmani lahi. Ko e kau tangata ʻoku nau aʻusia ʻa e ngaahi fiemaʻu Fakatohitapú ʻoku fakanofo kinautolu ko e kau mātuʻa mo e kau sevāniti fakafaifekau ʻi he ngaahi fakatahaʻangá ni. (1 Timote 3:1-9, 12, 13) ʻOku takimuʻa ʻa e kau mātuʻá mo tauhi anga-ʻofa ʻa e tākanga ʻa e ʻOtuá ʻi honau malumalú. Ko ha tāpuaki lahi ē ke hoko ko ha konga ʻo e tākanga ko iá pea ke aʻusia ʻa e ʻofa mo e fāʻūtaha ʻoku ʻi he lotolotonga ʻo e “feohiʻanga fakakātoa ʻo e fanga tokouá”!—1 Pita 2:17, NW; 5:2, 3.
7 ʻI he ʻikai ke fai ha ngaahi lāungá, ʻoku faʻa fakahaaʻi ʻe he faʻahinga tāutahá ʻa e houngaʻia ki he tataki fakalaumālie anga-ʻofa ʻoku nau maʻu mei he kau mātuʻá. Ko e fakatātaá, fakakaukau angé kia Birgit, ko ha uaifi Kalisitiane ʻi hono taʻu 30 tupú. ʻI heʻene taʻu hongofulu tupú, naʻá ne kau ai ki ha feohi kovi pea meimei tō ai ki he faihala. Ka naʻe hanga ʻe he akonaki māʻalaʻala Fakatohitapu ʻa e kau mātuʻá mo e tokoni ʻa e ngaahi kaungātuí ʻo tokoniʻi ia ke ne hao mei he tuʻunga fakatupu maumau naʻá ne mei tō ki aí. ʻOku ongoʻi fēfē ʻa Birgit he taimí ni? ʻOkú ne pehē: “ʻOku ou houngaʻia loloto ʻi heʻeku kei kau ki he kautaha fakaofo ʻa Sihová.” ʻOku pehē ʻe ha tokotaha taʻu 17 ko Andreas: “Ko e kautaha moʻoni ʻeni ia ʻa Sihova, ko e kautaha lelei taha ia ʻi he māmaní.” ʻIkai ʻoku totonu ke tau houngaʻia ʻi he lelei ʻo e konga ʻi māmani ʻo e kautaha ʻa Sihová?
ʻOku Taʻehaohaoa ʻa e Faʻahinga ʻOku Takimuʻá
8, 9. Naʻe anga-fēfē ʻa e tōʻonga ʻa e niʻihi ʻo e ngaahi toʻumeʻa ʻo Tēvitá, pea naʻe anga-fēfē ʻa e tali ʻa Tēvita ki he faʻahinga tōʻonga peheé?
8 Ko hono moʻoní, ko e faʻahinga ko ia ʻoku fakanofo ke nau takimuʻa ʻi he lotu moʻoní ʻoku nau taʻehaohaoa. Ko kinautolu kotoa ʻoku nau fai ʻa e ngaahi fehālaaki, pea ʻoku maʻu ʻe he niʻihi ʻa e ngaahi vaivaiʻanga tuʻumaʻu ʻa ia ʻoku nau ngāue mālohi ke mapuleʻi. ʻOku totonu ke tau loto-mamahi koeʻuhi ko e meʻá ni? ʻIkai. Naʻa mo e faʻahinga tāutaha naʻe ʻoange ki ai ʻa e fatongia lahi ʻi ʻIsileli ʻo e kuonga muʻá naʻa nau fai ʻa e ngaahi hala mamafa. Ko e fakatātaá, ʻi he taimi naʻe kei talavou ai ʻa Tēvitá, naʻe koleʻi ia ke ne hoko ko ha tokotaha tā meʻalea ke ne fakanonga ʻa Tuʻi Saula heʻene loto-hohaʻá. Ki muí, naʻe feinga ʻa Saula ke ne tāmateʻi ʻa Tēvita, ʻa ia naʻe iku ʻo pau ke ne hola ai telia ʻene moʻuí.—1 Samiuela 16:14-23; 18:10-12; 19:18; 20:32, 33; 22:1-5.
9 Naʻe anga-lavaki mo e kau ʻIsileli kehe. Hangē ko ení, naʻe hanga ʻe he ʻeikitau ʻa Tēvita ko Sioapé ʻo fakapoongi ʻa e kāinga ʻo Saula ko ʻĀpiná. Naʻe faʻufaʻufono ʻa ʻApisalome ke tāmateʻi ʻene tamaí, ʻa Tēvita, koeʻuhi ko e tuʻunga-tuʻí. Pea ko e tokotaha faleʻi falalaʻanga ʻa Tēvita ko ʻEhitofelí naʻá ne lavakiʻi ʻa Tēvita. (2 Samiuela 3:22-30; 15:1-17, 31; 16:15, 21) Neongo ia, naʻe ʻikai ke hoko ʻa Tēvita ko ha tokotaha lāunga loto-ʻita; pea naʻe ʻikai te ne sītuʻa mei he lotu moʻoní. Ko hono moʻoní, naʻe kehe ʻaupito ʻa e tali ia ʻa Tēvita ki aí. Naʻe hanga ʻe he faingataʻá ia ʻo ueʻi ʻa Tēvita ke ne pīkitai kia Sihova pea tauhi maʻu ʻa e fakakaukau lelei naʻá ne maʻu ʻi he taimi naʻá ne hola ai koeʻuhi ko Saulá. ʻI he taimi ko iá, naʻe hiva ʻa Tēvita: “ʻOfa mai, ʻofa mai, Elohimi e; he kuo hufanga atu hoku laumalie: ʻio, te u hufanga ki he malu ʻo ho kapakau na, kae ʻoua ke tolona ʻa e fakaʻauha.”—Sāme 57:1.
10, 11. Ko e hā naʻe hokosia ʻe ha Kalisitiane ko hono hingoá ko Gertrud ʻi heʻene finemuí, pea ko e hā naʻá ne leaʻaki ʻo fekauʻaki mo e ngaahi tōnounou ʻa e ngaahi kaungātuí?
10 ʻOku ʻikai ha ʻuhinga ke tau lāunga ai fekauʻaki mo ha anga-lavaki ʻi loto ʻi he kautaha ʻa e ʻOtuá he ʻahó ni. ʻOku ʻikai ke kātakiʻi ʻe Sihova pe ko ʻene kau ʻāngeló pe ko e kau tauhi-sipi fakalaumālié ke ʻi ai ha faʻahinga anga-lavaki mo fulikivanu ʻi he fakatahaʻanga Kalisitiané. Ka neongo ia, ko kitautolu kotoa ʻoku tau fekuki mo e taʻehaohaoa fakaetangatá, ʻa kitautolú tonu pea mo e taʻehaohaoa ʻa e kau sevāniti kehe ʻa e ʻOtuá.
11 ʻI he taimi naʻe kei finemui ai ʻa Gertrud, ko ha tokotaha lotu ʻa Sihova ʻi ha taimi fuoloa, naʻe tukuakiʻi loi ia ki ha kākā pea pehē ʻoku ʻikai ko ha tokotaha fanongonongo taimi-kakato ia ʻo e Puleʻanga ʻo e ʻOtuá. Naʻe anga-fēfē ʻene tali ki aí? Naʻe lāunga ʻa Gertrud ʻo fekauʻaki mo e faʻahinga feangainga ko iá? ʻIkai. Ki muʻa siʻi peá ne mālōlō ʻi he 2003 ʻi hono taʻu 91, naʻá ne fakakaukauloto atu ki heʻene moʻuí peá ne fakamatala: “Kuo akoʻi kiate au ʻe he ngaahi meʻa kotoa kuó u hokosia ʻi heʻeku moʻuí, neongo ʻa e ngaahi hala kuo fai ʻe he faʻahinga tāutaha, ʻoku tataki ʻe Sihova ʻene ngāue mahuʻingá, ʻa ia ʻokú ne ngāueʻaki ai kitautolu faʻahinga taʻehaohaoa ʻo e tangatá.” ʻI he taimi naʻá ne fekuki ai mo e ngaahi taʻehaohaoa ʻa e kau sevāniti kehe ʻa e ʻOtuá, naʻe hanga ʻa Gertrud kia Sihova ʻi he lotu fakamātoato.
12. (a) Ko e hā ʻa e sīpinga kovi naʻe fokotuʻu ʻe he niʻihi ʻo e kau Kalisitiane ʻi he taimi ʻo e kau ʻapositoló? (e) ʻOku totonu ke tau fokotuʻu maʻu ʻetau fakakaukaú ʻi he hā?
12 Koeʻuhi naʻa mo e kau Kalisitiane mateaki mo līʻoa lahi tahá ʻoku nau taʻehaohaoa, ʻi he taimi ʻoku fai ai ʻe ha sevāniti fakanofo ha fehālaaki, ʻai ke tau hokohoko atu ke fai “ʻa e meʻa kotoa pe ʻo taʻe ha lāunga.” (Filipai 2:14) He meʻa fakamamahi lahi ē kapau te tau muimui ʻi he sīpinga kovi ʻa ha niʻihi tokosiʻi ʻi he fakatahaʻanga Kalisitiane ʻi he taimi ʻo e kau ʻapositoló! Fakatatau ki he ākonga ko Siutasí, ko e kau faiako loi ʻo e ʻaho ko iá naʻa nau “taʻetokaʻi ʻa houʻeiki; ʻio, ʻoku nau talalakulaku ki he faʻahinga langilangiʻia.” ʻIkai ko ia pē, ko e kau faihala ko iá ko e kau “koto lāunga, ko e taʻetoliʻa ʻi honau tufakanga kuo to.” (Siutasi 8, 16) ʻOfa ke tau talitekeʻi ʻa e ʻalunga naʻe muimui ai ʻa e kau lāunga taʻetōliʻá pea fokotuʻu maʻu ʻetau fakakaukaú ʻi he ngaahi meʻa lelei ʻoku tau maʻu fakafou mai ʻi he ‘tamaioeiki agatonú.’ ʻAi ke tau fakamahuʻingaʻi ʻa e lelei ʻo e kautaha ʻa Sihová pea “fai ʻa e meʻa kotoa pe ʻo taʻe ha lāunga.”
“Ko e Lea Fefeka ʻEni”
13. Naʻe anga-fēfē ʻa e tali ʻa e niʻihi ki he ngaahi akonaki ʻe niʻihi ʻa Sīsū Kalaisí?
13 Lolotonga ʻa e lāunga ʻa e niʻihi ʻi he taimi ʻo e kau ʻapositoló ʻo fekauʻaki mo e kau sevāniti fakanofó, naʻe lāunga ʻa e niʻihi kehe ʻo fekauʻaki mo e ngaahi akonaki ʻa Sīsuú. Hangē ko ia ʻoku lēkooti ʻi he Sione 6:48-69, naʻe pehē ʻe Sīsū: “Ko ia ʻoku ne keina hoku kakano, mo inu hoku toto, ʻoku ne maʻu ʻa e moʻui taʻengata.” ʻI he fanongo ki he ngaahi leá ni, ko e “tokolahi ʻo ʻene kau ako, naʻa nau pehē, Ko e lea fefeka ʻeni; ko hai ʻe kataki ke fanongo kiate ia?” Naʻe ʻiloʻi ʻe Sīsū ʻa e ‘hanu ʻene kau akó ʻi he meʻa ko iá.’ ʻIkai ngata aí, “ʻi he meʻa ko ia naʻe foki ha tokolahi o [kinautolu], ʻo ʻikai te nau kei ō fano mo ia.” Ka naʻe ʻikai ke lāunga ʻa e kau ākongá kotoa pē. Fakatokangaʻi ʻa e meʻa naʻe hokó ʻi hono ʻeke ʻe Sīsū ki heʻene kau ʻapositolo ʻe toko 12: “Ka ʻe ʻikai te mou fie ō mo kimoutolu, ʻo?” Naʻe tali ʻe he ʻapositolo ko Pitá: “ʻEiki, te mau ʻalu kia hai? ʻoku ʻiate koe ʻa e ngaahi lea ʻo e moʻui taʻengata. Pea kuo loa ʻemau tui, ʻo mau ʻilo, ko koe ia ʻa e Toko Taha Tapu ʻo e ʻOtua.”
14, 15. (a) Ko e hā ʻoku hoko ai ha tokosiʻi ʻo taʻefiemālie ʻi ha tafaʻaki ʻe niʻihi ʻo e ngaahi akonaki faka-Kalisitiané? (e) Ko e hā ʻoku malava ke tau ako mei he meʻa fekauʻaki mo ha tangata ko Emanuel?
14 ʻI onopooni, kuo hoko ha faʻahinga tokosiʻi ʻaupito ʻi he kakai ʻa e ʻOtuá ʻo taʻefiemālie ʻi ha tafaʻaki ʻe niʻihi ʻo e akonaki faka-Kalisitiané pea kuo nau lāunga ai fekauʻaki mo e konga ʻi māmani ʻo e kautaha ʻa Sihová. Ko e hā ʻoku hoko ai ʻa e meʻá ni? ʻOku faʻa fakatupunga ʻa e lāunga peheé ʻe ha ʻikai ke mahinoʻi ʻa e founga ʻa e ʻOtuá ki hono fai ʻo e ngaahi meʻá. ʻOku fakahaaʻi fakalakalaka ʻe he Tokotaha-Fakatupú ʻa e moʻoní ki heʻene kakaí. Ko ia ai, ko ʻetau mahino fekauʻaki mo e Tohi Tapú kuo pau pē ke fai hono fakaleleiʻi ʻi he taimi ki he taimi. ʻOku fiefia ʻa e fuʻu tokolahi ʻo e kakai ʻa Sihová ʻi he ngaahi fakalelei peheé. Ko ha tokosiʻi pē ʻoku hoko ʻo “maʻoniʻoni fau” mo loto-mamahi ʻi he ngaahi liliu ko iá. (Koheleti 7:16) ʻOku kaunga nai ki heni ʻa e loto-pōlepolé, pea ʻoku tō ʻa e niʻihi ki he tauhele ʻo e fakakaukau faʻifaʻitelihá. Tatau ai pē pe ko e hā ʻa e ʻuhingá, ʻoku fakatuʻutāmaki ʻa e lāunga peheé, koeʻuhi ʻoku malava ke ne tohoaki kitautolu ki he māmaní mo ʻene ngaahi foungá.
15 Ko e fakatātaá, ko Emanuel, ko ha Fakamoʻoni naʻá ne fakaangaʻi ʻa e ngaahi meʻa ʻe niʻihi naʻá ne lau ʻi he ngaahi tohi “ae tamaioeiki agatonu mo boto.” (Mātiu 24:45, PM) Naʻá ne tuku hono lau ʻetau ʻū tohi faka-Kalisitiané pea faai mai pē ʻo ne tala ange ki he kau mātuʻa ʻo e fakatahaʻanga fakalotofonuá ʻoku ʻikai te ne kei loto ke hoko ko ha taha ʻo e Kau Fakamoʻoni ʻa Sihová. Kae kehe, ʻi ha vahaʻa taimi nounou mei ai, naʻe fakatokangaʻi ʻe Emanuel tā koā naʻe tonu pē ʻa e ngaahi akonaki ia ʻa e kautaha ʻa Sihová. Naʻá ne fetuʻutaki ki he Kau Fakamoʻoní, ʻo ne vete ʻene fehālaakí, pea naʻe toe fakafoki mai ia ko e taha ʻo e Kau Fakamoʻoni ʻa Sihová. Ko hono olá, naʻá ne toe hoko ko ha tangata fiefia.
16. Ko e hā ʻoku malava ke ne tokoniʻi kitautolu ke tau ikuʻi ha ngaahi veiveiua fekauʻaki mo e niʻihi ʻo e ngaahi akonaki faka-Kalisitiané?
16 Fēfē kapau ʻoku fakataueleʻi kitautolu ke tau lāunga koeʻuhi ko ha ngaahi veiveiua fekauʻaki mo e ngaahi akonaki ʻe niʻihi ʻa e kakai ʻa Sihová? ʻAi ke ʻoua te tau hoko ʻo taʻeangakātaki. ʻE pulusi mai nai ʻe he ‘tamaioeiki agatonú’ ha meʻa te ne tali ʻetau ngaahi fehuʻí pea fakamāʻalaʻala ʻetau ngaahi veiveiuá. ʻOku fakapotopoto ke kumi ki he tokoni ʻa e kau mātuʻa Kalisitiané. (Siutasi 22, 23) Ko e lotú, ako fakafoʻituituí, pea mo e feohi mo e ngaahi kaungātui ʻoku tokanga-fakalaumālié ʻoku malava ke toe tokoni ia ki hono toʻo atu ha veiveiua pea malava ke fakalolotoʻi ai ʻetau houngaʻia ki he ngaahi moʻoni Fakatohitapu fakaivimālohi-tui ʻoku tau ako fakafou ʻi he fouʻanga fetuʻutaki ʻa Sihová.
Tauhi Maʻu ha Fakakaukau Pau
17, 18. ʻI he ʻikai ke lāungá, ko e hā ʻa e fakakaukau ʻoku totonu ke tau maʻú, pea ko e hā hono ʻuhingá?
17 Ko hono moʻoní, ʻoku maʻu ʻe he faʻahinga taʻehaohaoa ʻo e tangatá ha hehema tukufakaholo ke faiangahala, pea ʻoku maʻu nai ʻe he niʻihi ha hehema mālohi ke fai ha ngaahi lāunga taʻetotonu. (Senesi 8:21; Loma 5:12) Ka ʻo kapau te tau hoko ʻo angaʻaki ʻa e lāungá, te tau ʻai ai ki he tuʻunga fakatuʻutāmaki hotau vahaʻangatae mo Sihova ko e ʻOtuá. Ko ia ai, ʻoku fiemaʻu ke tau mapuleʻi ha faʻahinga hehema pē ke lāunga.
18 ʻI he ʻikai ke lāunga fekauʻaki mo e ngaahi meʻa ʻi he fakatahaʻangá, ʻoku lelei ke tau tauhi maʻu ha fakakaukau pau pea muimui ki ha founga-tuʻumaʻu te ne ʻai kitautolu ke tau femoʻuekina, fiefia, loto-ʻapasia, mafamafatatau mo moʻui lelei ai ʻi he tuí. (1 Kolinito 15:58; Taitusi 2:1-5) ʻOku puleʻi ʻe Sihova ʻa e meʻa kotoa pē ʻi loto ʻi heʻene kautahá, pea ʻoku lāuʻilo ʻa Sīsū ki he ngaahi fakalakalaka ʻi he fakatahaʻanga taki taha, ʻo hangē pē ko ia naʻá ne ʻi ai ʻi he taimi ʻo e kau ʻapositoló. (Fakahā 1:10, 11) Tatali anga-kātaki ki he ʻOtuá mo Kalaisi, ko e ʻUlu ʻo e fakatahaʻangá. ʻOku ngāueʻaki nai ʻa e kau tauhi-sipi fua fatongiá ke nau fakatonutonu ʻa e ngaahi meʻa ʻoku fiemaʻu nai ke fai hano toe fakatonutonú.—Sāme 43:5; Kolose 1:18; Taitusi 1:5.
19. ʻI he teʻeki ai ke puleʻi kakato ʻe he Puleʻangá ʻa e ngaahi meʻa ʻa e faʻahinga ʻo e tangatá, ko e hā ʻoku totonu ke tau tokangataha ki aí?
19 Kuo vavé ni ke ngata ʻa e ngaahi meʻa ʻo e fokotuʻutuʻu fulikivanu ko ʻení, pea ʻe puleʻi kakato ʻe he Puleʻanga Faka-Mīsaiá ʻa e ngaahi meʻa ʻa e faʻahinga ʻo e tangatá. He mahuʻinga lahi ē kiate kitautolu taki taha ke tau tauhi maʻu ha fakakaukau pau kae ʻoua leva ke aʻu ki he taimi ko iá! ʻE tokoni ʻeni kiate kitautolu ke tau sio ai ki he ngaahi ʻulungāanga lelei ʻa hotau ngaahi kaungātuí, kae ʻikai ko e tokangataha ki heʻenau ngaahi halá. Ko e tokangataha ki he ngaahi tafaʻaki lelei ʻo honau angaʻitangatá te ne ʻai kitautolu ke tau fiefia. ʻI he ʻikai ke ongosia fakaeongo ʻi he lāungá, te tau hoko ai ʻo loto-toʻa mo langa hake fakalaumālie.
20. Ko e hā ʻa e ngaahi tāpuaki ʻe ʻai ʻe he fakakaukau paú ke tau malava ʻo maʻú?
20 ʻE toe ʻai ʻe ha fakakaukau pau ke tau malava ʻo manatuʻi ʻa e ngaahi tāpuaki lahi ʻoku tau maʻu koeʻuhi ko e feohi mo e konga ʻi māmani ʻo e kautaha ʻa Sihová. Ko e kautaha pē ʻeni ʻe taha ʻi he māmaní ʻoku mateaki ki he Hau ʻo e ʻunivēsí. ʻOku anga-fēfē hoʻo ongoʻi fekauʻaki mo e moʻoniʻi meʻa ko iá pea mo e monū ʻo e kau ʻi he lotu ki he ʻOtua moʻoni pē taha, ko Sihová? ʻOfa ke hangē ʻetau fakakaukaú ko e fakakaukau ʻa Tēvitá, ʻa ia naʻá ne hiva: “Akoe oku ke ogoʻi ae lotu, e aʻu atu kiate koe ae kakai kotoabe. Oku monuia ia aia oku ke fili, mo ke fakaofi ia kiate koe, koeuhi ke ne nofo i ho lotoa: te mau fiemalie i he lelei o ho fale.”—Sāme 65:2, 4, PM.
ʻOkú Ke Manatuʻi?
• Ko e hā ʻoku totonu ai ke tau houngaʻia ʻi he faʻahinga ko ia ʻoku nau takimuʻa ʻi he fakatahaʻangá?
• ʻOku totonu ke fēfē ʻetau talí ʻi he taimi ʻoku fai ai ʻe he fanga tokoua fua fatongiá ha ngaahi fehālaakí?
• ʻOku totonu ke fēfē ʻetau vakai ki he ngaahi fakalelei ki he mahino fekauʻaki mo e Tohi Tapú?
• Ko e hā ʻe malava ke ne tokoniʻi ha Kalisitiane ke ne ikuʻi ʻa e veiveiuá?
[Fehuʻi ki he Ako]
[Fakatātā ʻi he peesi 20]
Naʻe ʻoange ʻe Tēvita kia Solomone ʻa e ngaahi palani ʻo e temipalé pea poupou loto-ʻaufuatō ki he lotu moʻoní
[Fakatātā ʻi he peesi 23]
ʻOku tokonaki fiefia mai ʻe he kau mātuʻa Kalisitiané ʻa e tokoni fakalaumālie