Heʻikai Lava Ke Ke Tuku Tauhi Ia, Ngāueleleiʻaki

ʻOKU ʻi ai ʻa e lea ʻoku pehē, Ko e taimí ko e paʻanga. Ko hono moʻoní, ʻoku kehe ʻaupito ʻa e taimí ia mei he paʻangá pe ko e ngaahi meʻa fakamatelie kehé. Heʻikai lava ke ke tuku tauhi ʻa e taimí ke toki ngāueʻaki ʻamui ʻo hangē ko ia ʻe lava ke ke fai ki he paʻangá, meʻakaí, loló, pe ko ha ngaahi meʻa kehe. Ko e koto laufanō ha feinga pē ke tuku tauhi ʻa e taimí ʻi he ʻikai ke ngāueʻakí. Ko e hā ʻe hokó kapau ʻokú ke mohe houa ʻe valu pea feinga ke tuku tauhi ʻa e toenga ʻo e ʻahó ʻo ʻikai fai ai ha meʻa? ʻI he ʻosi ange ʻa e ʻahó, ʻoku mole ʻosi ai pē ʻa e ngaahi houa ia naʻe ʻikai ngāueʻakí.

ʻE lava nai ke fakahoa ʻa e taimí ki ha fuʻu vaitafe ʻoku tafe vave. ʻOku tafe maʻu ai pē ia ki muʻa. Heʻikai lava ke ke taʻofi ia, pea heʻikai lava ke ke ngāueʻaki ʻa e foʻi tulutā kotoa pē ʻoku tafe aí. ʻI he laui senituli kuo maliu atú, naʻe kamata ai ke fokotuʻu ʻe he kakaí ʻa e ngaahi fuʻu veʻe teka vilohi ʻe he vaí ʻi he ngaahi veʻe vaitafé. ʻI hono ngāueʻaki iá naʻa nau puleʻi ai ʻa e mālohi mei he tafe ʻa e vaí ʻo fakaleleʻaki ʻenau ngaahi maka momosí, ngaahi mīsini fahi papá, ngaahi pamú mo e ngaahi meʻa tuki ukameá. ʻI he tuʻunga meimei tatau, ʻe lava ke ke puleʻi ʻa e taimí, ʻo ʻikai ko e ʻai ke tuku tauhi ia, ka ke ngāueʻaki ia ke fakahokoʻaki ʻa e ngāue lelei. Kae kehe, ke fai iá, kuo pau ke ke fāinga mo e ongo meʻa kaihaʻa taimi tefito ʻe ua—ko e toloi meʻá mo e meʻa ʻoku fekauʻaki vāofi mo ia, ko e felé. Tau ʻuluaki lāulea angé ʻo fekauʻaki mo e toloi meʻá.

Fakaʻehiʻehi mei he Toloi Meʻá

ʻOku ʻi ai ha lea ʻoku taka ʻo pehē, ʻOua ʻe tuku ki he ʻapongipongí ʻa e meʻa ʻe lava ke ke fai he ʻaho ní. Kae kehe, ʻoku ʻikai ke muimui ʻa e kakai ia ʻe niʻihi ʻi he faleʻi ko ení. ʻI he fehangahangai mo ha ngāue ʻoku fiemaʻu, ʻoku nau maʻu ha founga faingofua ki ai ʻa ia ko e toloi meʻá. Ko e toloi meʻá ʻoku ʻuhingá “ko e tuku ʻosi fakakaukauʻi mo angaʻaki; ko e tuku ʻosi fakakaukauʻi ʻa hono fai ʻo ha meʻa naʻe ʻosi totonu ia ke fai.” Ki he tokotaha toloi meʻá kuo hoko ʻo ne angaʻaki ʻa e tuku ʻo ʻikai fai ʻo ha meʻá. ʻI he fakalalahi ʻa e loto-mafasiá, ʻokú ne maʻu ʻa e fiemālie ʻi hono tekeʻi ki he tafaʻakí ʻa e ngāué pea fiefia ʻi he “taimi ʻatā” ʻokú ne maʻú—kae ʻoua ke toe malanga hake ʻa e loto-mafasiá.

ʻI he taimi ʻe niʻihi, ko hotau tuʻunga fakaesinó mo fakaeongó ʻe fiemaʻu nai ai ke tau toloiʻi ʻa e ngaahi ngāue ʻe niʻihi pe naʻa mo e kotoa ʻo ʻetau ngaahi ngāué. Pehē foki, ʻoku fiemaʻu ʻe he tokotaha kotoa ha mālōlō ʻi he taimi ki he taimi mei he ngāue tuʻumaʻu fakaʻahó. Naʻa mo e ʻAlo ʻo e ʻOtuá naʻá ne fiemaʻu ia. Naʻe mātuʻaki femoʻuekina ʻa Sīsū ʻi heʻene ngāue fakafaifekaú, ka naʻá ne toe fakaʻatā ha taimi mālōlō kiate ia tonu mo ʻene kau ākongá. (Maake 6:​31, 32) Ko e faʻahinga mālōlō ko ení ʻoku ʻaonga. Kae kehe, ko ha meʻa kehe ʻa e  toloi meʻá ia; ʻoku faʻa fakatupu maumau ia. Fakakaukau angé ki ha fakatātā.

ʻOku maʻu ʻe ha tokotaha ako taʻu hongofulu tupu ʻa e foʻi uike ʻe tolu ke ne teuteu ai ki ha sivi fika. ʻOku lahi ʻa e ngaahi nouti mo e ʻū tohi kuo pau ke ne akó. ʻOkú ne ongoʻi faingataʻaʻia. ʻOku fakataueleʻi ia ʻe he toloi meʻá, pea ʻokú ne tō ʻi he tauhele ko iá. ʻI he ʻikai te ne akó, ʻoku sio televīsone ia. ʻOsi atu ʻa e ʻaho mo e ʻaho mo ʻene toloiʻi ʻa e meʻa ʻoku fiemaʻu ke ne fai ke lava ai ʻi he siví. Pea ʻi he pō leva ki muʻa ʻi he siví, ʻokú ne toki fehangahangai ai mo e ngaahi fuʻu ʻotu meʻá kātoa. ʻOkú ne tangutu ʻi hono tesí ʻo kamata ke ne vakaiʻi ʻene ngaahi noutí mo e ʻū tohí.

ʻOku ʻosi atu ʻa e ngaahi houa lahi. Lolotonga ʻa e mohe ʻa e ngaahi mēmipa kehe ʻo e fāmilí, ʻokú ne ʻā fakamālohi ʻi ha ngāue lōloa mo faingataʻa ʻo hono ako maʻuloto ʻa e ngaahi founga fakafika kehekehe. ʻI he ʻapiakó he ʻaho hono hokó, ʻokú ne fāinga ai mo e ngaahi fehuʻi ʻoku ʻikai mateuteu ʻa hono ʻatamai kuo ongosiá ke tali. ʻOku kovi ʻa e maaka ʻo ʻene siví, pea ʻokú ne tō ai ʻi he fiká. Kuo pau ke ne toe ako ʻa e noutí pea heʻikai nai ke ne hiki ki he kalasi hono hokó.

ʻOku iku ʻo fakatupu maumau lahi ʻa e toloi meʻá ki he tokotaha ako ko ení. Ka ʻoku ʻi ai ha tefitoʻi moʻoni Fakatohitapu ʻe lava ke ne tokoniʻi ʻa e kakaí ke nau fakaʻehiʻehi ai mei ha tuʻunga pehē. “Mou tokanga ki hoʻomou laka fakatuʻutuʻuni, pe ʻoku fefe hono anga, ʻo ʻoua te mou ngali taʻepoto ai, kae ngali poto: mo mou lamalama ke ngaueʻaki ʻa e faingamalie,” ko e tohi ia ʻa e ʻapositolo ko Paulá. (Efeso 5:​15, 16) Naʻe ekinaki ʻa Paula ki he kau Kalisitiané ke nau ngāuefakapotopotoʻaki ʻa honau taimí ʻi he tokanga ki he ngaahi meʻa fakalaumālié, ka ʻoku lava ke ʻaonga ʻa e tefitoʻi moʻoni ko ení ʻi he ngaahi ngāue mahuʻinga lahi ʻi he moʻuí. Koeʻuhi ʻoku faʻa lava ke tau fili ʻa e taimi ke fakahoko ai ha ngāue, te tau sio ki ha ngaahi ola lelei ange pea ʻe vave ange hono fai ʻa e ngāué ʻaki hono fili ke kamata ia ʻi he taimi ʻoku “faingamalie,” pe lelei tahá. Ko ha fakaʻilonga eni ʻo e faʻahinga ʻoku “poto,” ʻo hangē ko ia ʻoku fakahaaʻi ʻe he konga Tohi Tapú.

Ko fē ʻa e taimi ne “faingamalie” ki he kiʻi tokotaha akó ke ne ako ai ki he sivi fiká? Mahalo ʻi he pō kotoa pē ʻo feʻunga mo e miniti nai ʻe 15 ʻe lava ke ne ako tahataha ai ʻa e noutí. ʻI he founga ko iá, naʻe ʻikai pau ai ke ne ako mate ʻi he pō ki muʻá, lolotonga ko e ngaahi houa ia ne sai ange ke ne mohe ai. Naʻá ne mei maʻu ai ha mālōlō feʻunga mo mateuteu kakato ʻi he ʻaho siví, pea ʻe lava ke ne maʻu ai ha maaka lelei.

Ko ia ai, ʻi he taimi ʻoku ʻoatu ai ha ngāue ke ke fai, fakapapauʻi ʻa e taimi “faingamalie” ki aí pea fai leva ia. Te ke hao leva ai mei he tauhele ʻo e toloi meʻá mo hono ngaahi nunuʻá. Te ke toe maʻu ai ʻa e fiemālie ʻi ha ngāue kuo lava lelei. ʻOku mahuʻinga eni tautefito ʻi he taimi ʻe kaunga ai ki he kakai kehe ʻa e ngāué, hangē ko e ngaahi fatongia ko ia ʻi he fakatahaʻanga faka-Kalisitiané.

Fakasiʻisiʻi ʻa e Felé

Hangē ko ia naʻe lave ki ai ki muʻá, ko e meʻa tefito hono ua ʻi hono ngāueleleiʻaki ʻa hotau taimi mahuʻingá ko e fakaʻehiʻehi mei he felé. ʻOku tau ʻiloʻi ʻoku fiemaʻu ʻa e taimi ke fakahoko ai ʻa e ngaahi meʻá, ke fokotuʻutuʻu kinautolu, ke ngāueʻaki, ke fakamaʻa, ke tauhi pea ke fakasio kinautolu. Ko e lahi ange ʻa e ngaahi meʻá ko e lahi ange ai pē ia ʻa e taimi ʻoku fiemaʻu ki aí. Ko e ngāue ʻi ha loki pe ko ha fale ʻa ia ʻoku felefelé ʻoku fakamole taimi mo fakatupu ongoʻi feifeitamaki ange ia ʻi he ngāue he ngaahi loki ʻoku ʻataʻatā mo ʻikai felé. ʻIkai ko ia pē, ʻi he fokotuʻuna ʻo lahi ange ʻa e ngaahi meʻá, ʻoku fiemaʻu lahi ange ai ʻa e taimi ke kumi ai ki he meʻa ʻa ia ʻoku fiemaʻú.

 ʻOku pehē ʻe he kau taukei ʻi he tauhi ʻapí, ko e meimei vaeua ʻo e taimi ʻoku ngāueʻaki ʻe he kakaí ʻi he fakamaʻá ʻoku fakamoleki ia ʻi hono “toʻo, fakahaohao holo, mo hono fetuku ʻa e felé mo e vevé.” ʻOku ngalingali peheni pē ʻa e tuʻungá ʻi he ngaahi tafaʻaki kehe ʻo e moʻuí. Ko ia kapau ʻokú ke fakaʻamu ke ngāueleleiʻaki ho taimí, vakavakai holo ʻi ho ʻātakaí. ʻOku lahi ʻa e felé ʻi ho nofoʻangá ʻo ne fakafaingataʻaʻiaʻi ai hoʻo ʻalu holó, pe ko e toe kovi angé ko e mole noaʻia ai ho taimí? Kapau ko ia, fakasiʻisiʻi ʻa e felé.

Ko hono toʻo ʻo e felé ʻoku ʻikai nai ke faingofua. ʻOku lava ke faingataʻa ʻa hono laku ʻo e ngaahi meʻa ʻokú ke saiʻia ai ka ʻoku ʻikai fiemaʻú—ʻo meimei hangē ia ko e mole ʻa ha kaumeʻa lelei. Ko ia ʻe lava fēfē ke ke fakapapauʻi pe te ke tauhi ha meʻa pe te ke toʻo? ʻOku ngāueʻaki ʻe he niʻihi ʻa e meʻá ni ko ha lao. Kapau kuo teʻeki ai te ke ngāueʻaki ha meʻa ʻo feʻunga mo ha taʻu ʻe taha, liʻaki ia. Fēfē kapau ʻokú ke kei toumoua ke lī ia hili ʻa e taʻu ʻe tahá? Tuku ia ʻi ha toe māhina ʻe ono ki ha tukuʻanga meʻa. ʻI hoʻo toe sio ki ai ʻo ʻiloʻi kuo mahili atu ha taʻu ʻe taha mo e konga mo e ʻikai pē te ke ngāueʻakí, ʻe faingofua ange nai ai ke ke tukuange ia. Ko e hā pē ʻa e tuʻungá, ko e taumuʻá ke fakasiʻisiʻi ʻa e felé​—ke ngāueleleiʻaki ai ho taimí.

Ko e moʻoni ko e felé, ʻoku ʻikai fakangatangata pē ia ki he ngaahi meʻa ʻi hoto ʻapí pe ngāueʻangá. Naʻe lea ʻa Sīsū fekauʻaki mo e “lotomoʻua ki māmani, mo e fakahekeheke ʻa koloa,” ʻa ia ʻe lava ke “kāsia ai ʻa e folofola” ʻa e ʻOtuá pea ʻai ai ha taha ke ne “taʻe fua” ʻi he fekauʻaki mo e ongoongo leleí. (Mātiu 13:22) Ko e moʻui ʻa ha taha ʻe lava ke hoko ia ʻo felekeu ʻi he ngaahi meʻa mo e ngaahi ngāue lahi fau, ʻo faingataʻa ai ke ne maʻu ʻa e taimi ʻoku fiemaʻu ke tauhi maʻu ai ʻa e mafamafatatau mo e ngāue tuʻumaʻu fakalaumālié, ʻa ia ʻoku mahuʻinga tahá. Ko e olá ko ʻene faingataʻaʻia fakalaumālie nai pea iku ʻo mole ʻaupito ai meiate ia ʻa e hū ki he māmani foʻou naʻe talaʻofa ʻe he ʻOtuá, ʻa ia ʻe ʻi ai ʻa e taimi taʻehanongataʻanga ke fai ʻa e meʻa ʻoku ʻomai ai ʻa e fiemālie mo e fiefia moʻoní.​—Aisea 65:​17-​24; 2 Pita 3:​13.

ʻOkú ke faʻa feinga ke feʻunuʻaki ho taimí ke feʻunga ki he ngaahi meʻa kotoa ʻokú ke ongoʻi kuo pau ke ke faí—pe ʻoku felāveʻi mo hoʻo ngāué, ʻapí, kaá, ngaahi meʻa fakaemanakó, fononga ki ha feituʻu, fakamālohisino, ngaahi meʻa fakasōsialé, pe ko ha ngaahi meʻa kehe? Kapau ko ia, mahalo kuo taimi ke fakakaukau ki he founga ʻe lava ke ke fakasiʻisiʻi ai ʻa e ngaahi fakafelekeu, hangē ko e laú ʻi he tuʻunga fakalaumālié.

ʻOku toe ʻi ai ha lea anga-maheni ʻe taha ʻoku pehē, ʻOku ʻikai tatali ʻa e taimí mo e tahí ki ha taha. Ko e moʻoni, ʻoku tafe taʻemālōlō ʻa e taimí ki muʻa ʻo hangē ha kiʻi vai ʻoku tafe maʻu peé. Heʻikai lava ke toe fakafoki ia pe tuku tauhi; ko ʻene mavahé pē, ko ʻene mavahe ʻaupitó ia. Kae kehe, ʻi he muimui ki ha ngaahi tefitoʻi moʻoni Fakatohitapu faingofua pea fou ʻi ha ngaahi sitepu ʻaonga, ʻe lava ke tau puleʻi ai ʻa e taimi ʻoku fiemaʻú ke tokanga ai ki he “ngaahi meʻa ʻoku lelei lahi” ange ki heʻetau lelei taʻengatá pea “ke langilangiʻia mo fakamaloʻia ai ʻa e ʻOtua.”—Filipai 1:​10, 11.

[Fakatātā ʻi he peesi 8, 9]

Ko e taimí, ʻi he hangē ko ha kiʻi vai ʻoku tafe vavé, ʻe lava ke puleʻi ia ki he ngāue lelei

[Fakatātā ʻi he peesi 9]

Ko fē ʻa e taimi “faingamalie” ke ne ako ai ki heʻene siví?

[Fakatātā ʻi he peesi 10]

Ko e ngāue ʻi ha feituʻu felekeú ʻoku fakamole taimi mo fakatupu ongoʻi feifeitamaki