Ngeia ʻo e Tangatá—ʻOku Malava ke Maʻu

“Kuo pau ke tau fokotuʻu ha māmani foʻou—ko ha māmani ʻoku lelei mamaʻo ange— ha māmani ko ia ʻoku tokaʻi ai ʻa e ngeia taʻengata ʻo e tangatá.”—PALESITENI ʻO ʻAMELIKA KO HARRY TRUMAN, SAN FRANCISCO, KALEFŌNIA, U.S.A., ʻEPELELI 25, 1945.

ʻI HE hangē ko e tokolahi ʻi he ngaahi taʻu hili ʻa e Tau II ʻa Māmaní, naʻe tui ʻa Palesiteni Truman ʻe malava ke ako ʻa e tangatá mei hono kuohilí peá ne fokotuʻu “ha māmani foʻou” ʻoku ʻi ai ʻa e ngeia ki he tokotaha kotoa. ʻOku fakamamahí, he ʻoku fakahoko mai ʻe he ngaahi meʻa ʻoku hoko ʻi onopōní ha tuʻunga ia ʻoku kehe. ʻOku hokohoko atu hono tāpalasia “ʻa e ngeia taʻengata ʻo e tangatá” koeʻuhi ko e tefitoʻi tupuʻanga ʻo e palopalemá ʻoku ʻikai mei he tangatá ia ka ʻoku mei he fili lahi taha ʻo e tangatá.

Ko e Tefitoʻi Tupuʻanga ʻo e Palopalemá

ʻOku fakamatalaʻi ʻe he Tohi Tapú ʻa e fili ko ení ko Sētane ko e Tēvoló, ko ha meʻamoʻui laumālie fulikivanu ʻa ia ʻi he kamata mai ʻa e moʻui ʻa e tangatá, kuó ne poleʻi ʻa e totonu ʻa e ʻOtuá ke pulé. Mei he fetuʻutaki ʻa Sētane mo ʻIvi ʻi he ngoue ko ʻĪtení, ko ʻene taumuʻá ke tohoakiʻi mamaʻo ʻa e tangatá mei he tauhi ki hono Tokotaha-Fakatupú. (Senesi 3:​1-5) Fakakaukau ki he ngaahi ola fakatuʻutāmaki naʻe hoko kia ʻĀtama mo ʻIvi ʻi heʻena ʻulutukua ki he ngaahi fakaʻaiʻai ʻa e Tēvoló! Ko e nunuʻa vave taha ʻo ʻena talangataʻa ki he lao ʻa e ʻOtuá  fekauʻaki mo e fuaʻiʻakau naʻe tapuí, ko ʻena ‘toitoi ke ʻoua naʻa meaʻi kinaua ʻe Sihova Elohimi.’ Ko e hā hono ʻuhingá? Naʻe vete hia ʻa ʻĀtama: “[Naʻá ku] manavahe, koeʻuhi kuo u telefua; pea u toitoi.” (Senesi 3:​8-10) Naʻe maliu ai ʻa e vahaʻangatae ʻo ʻĀtama mo ʻene Tamai fakahēvaní pea mo ʻene vakai kiate iá. Naʻá ne mā pea naʻe ʻikai te ne kei ongoʻi fiemālie ʻi he ʻao ʻo Sihová.

Ko e hā naʻe loto ai ʻa e Tēvoló ke sio ʻoku hōloa ʻa e tokaʻi-kita ʻa ʻĀtamá? Koeʻuhi ko e ngaohi ʻa e tangatá ʻi he ʻīmisi ʻo e ʻOtuá, ʻoku fiefia ʻa Sētane ke sio ʻokú ne tōʻongafai ʻi ha founga ʻoku mele ai ʻa ʻene tapua atu ʻa e lāngilangi ʻo e ʻOtuá. (Senesi 1:27; Loma 3:23) ʻOku tokoni eni ke ne fakamatalaʻi ʻa e ʻuhinga ʻoku hūhū ai ʻa e ngaahi tōʻonga fakamaá ʻi he hisitōlia ʻo e tangatá. ʻI he tuʻunga ʻo Sētane ko e “ʻotua ʻo e tuʻu ko eni,” kuó ne pouaki ai ʻa e laumālié ni “ʻi he taimi naʻe pule ai ha tangata ki he kakai ke nau kovi ai.” (2 Kolinito 4:4; Koheleti 8:9; 1 Sione 5:19) ʻOku ʻuhinga ení kuo mole ai pē ʻa e ngeia totonu fakaetangatá?

ʻOku Fakangeingeiaʻi ʻe Sihova ʻa ʻEne Fakatupú

Toe fakakaukau angé ki he ngaahi tuʻunga ʻi he ngoue ko ʻĪtení ki muʻa ʻi he faiangahala ʻa ʻĀtama mo ʻIví. Naʻá na maʻu ʻo lahi ʻa e meʻakaí, ngāue fakafiemālie pea mo e ʻamanaki ki ha moʻui lelei mo taʻehanongataʻanga mo ʻena fānaú. (Senesi 1:28) Ko e tafaʻaki kotoa pē ʻo ʻena moʻuí naʻe fakaeʻa mai ai ʻa e taumuʻa anga-ʻofa mo fakangeingeia ʻa e ʻOtuá ki he faʻahinga ʻo e tangatá.

Naʻe liliu ʻa e vakai ʻa Sihova ki he ngeia ʻo e tangatá ʻi he taimi naʻe ʻikai kei haohaoa ai ʻa ʻĀtama mo ʻIví? ʻIkai. Naʻá ne tokanga ki heʻena hoko ʻo ongoʻi mā he taimi ko ení ʻi heʻena telefuá. ʻI he tuʻunga anga-ʻofa, naʻe tokonaki ʻe he ʻOtuá ʻa e “ngaahi kofu kiliʻimanu” ke fetongi ʻaki ʻa e vala lou fiki naʻá na ngaohi maʻa kinauá. (Senesi 3:​7, 21) ʻI he ʻikai tuku ai pē ʻe he ʻOtuá kinaua ʻi hona tuʻunga fakamaá, naʻá ne fakangeingeiaʻi kinaua.

Ki mui ai, ʻi he taimi naʻe feangai ai ʻa Sihova mo e puleʻanga ʻIsilelí, naʻá ne fakahā ʻa e manavaʻofa ki he paeá, uitoú mo e mulí—ko e ngaahi mēmipa ʻo e sōsaietí ʻa ē ʻoku faʻa lahi taha ʻenau ʻi he malumalu ʻo e ngaohikoviá. (Sāme 72:13) Ko e fakatātaá, ʻi hono toli ʻe he kau ʻIsilelí ʻenau ngoue uité, ʻōlivé mo e kālepí, naʻe tala ai kiate kinautolu ke ʻoua te nau toe foki ki he toengá. Naʻe fekauʻi ʻe he ʻOtuá ko e ngaahi toenga ko iá “ʻe tuku ia ki he muli, ki he tamaimate mo e uitou.” (Teutalonome 24:​19-21) ʻI hono ngāueʻaki iá, naʻe hanga ai ʻe he ngaahi lao ko ení ʻo toʻo ʻa e fiemaʻu ki he kolekolé pea tokonaki ai ʻa e ngāue ʻoku ʻi ai hono ngeia ʻo aʻu ai pē ki he faʻahinga masiva tahá.

Naʻe Fakangeingeiaʻi ʻe Sīsū ʻa e Niʻihi Kehé

Lolotonga ʻa e ʻi māmani ʻa Sīsū Kalaisi ko e ʻAlo ʻo e ʻOtuá, naʻe hā meiate ia ʻa e mahuʻingaʻia ʻi he ngeia ʻo e niʻihi kehé. Ko e fakatātaá, ʻi he taimi naʻá ne ʻi Kāleli aí naʻe fakaofiofi atu kiate ia ha tangata naʻe tofuhia he kiliá. Fakatatau ki he Lao ʻa Mōsesé, ke fakaʻehiʻehi mei hono ʻai ke pihia ʻa e niʻihi kehé, naʻe fiemaʻu ki he tokotaha kiliá ke ne kaila: “Taʻemaʻa! taʻemaʻa!” (Livitiko 13:45) Kae kehe, naʻe ʻikai ke fai ʻe he tangatá ni ha kaila fakatokanga ʻi heʻene fakaofiofi kia Sīsuú. ʻI hono  kehé, naʻá ne tō foʻohifo atu ʻo ne kole kia Sīsū: “ʻEiki, ka ne ke loto ke fai, te ke lava ke fakamaʻa au.” (Luke 5:12) Naʻe anga-fēfē ʻa e tali ʻa Sīsuú? Naʻe ʻikai ke tauteaʻi ʻe Sīsū ʻa e tangatá ʻi heʻene maumauʻi ʻa e Laó, pea naʻe ʻikai haʻane fakamatamatavalea pe ko haʻane fakamamaʻo meiate ia. Ka, naʻá ne fakangeingeiaʻi ʻa e kiliá ʻaki ʻene ala kiate ia ʻo ne pehē: “ʻOku ou loto pe: ke ke maʻa koe.”—Luke 5:13.

ʻI ha ngaahi taimi kehe, naʻe fakahāhā ʻe Sīsū ʻa ʻene malava ke faifakamoʻui taʻeʻiai ha fetuʻutaki fakaesino—mei he mamaʻó ʻi he taimi ʻe niʻihi. Kae kehe, ʻi he tuʻunga ko ení naʻá ne fili ai ke ala ki he tangatá. (Mātiu 15:​21-28; Maake 10:​51, 52; Luke 7:​1-10) Koeʻuhi ko e tangatá naʻe “fonu i he kilia,” ʻoku ʻikai ha veiveiua naʻe laui taʻu ʻa e ʻikai te ne fetuʻutaki mo ha tahá. He fakanonga moʻoni ʻene ongoʻi ʻa e toe ala atu ʻa ha taha! Ko hono fakamaʻa hono kiliá naʻe pau ko e meʻa pē ia naʻe ʻamanekina ʻe he tangatá. Ka neongo ia, ko e anga ʻo hono fakamoʻui ia ʻe Sīsuú ʻoku ʻikai ha veiveiua naʻe tokoni ia ke ne toe fakafoki mai ha meʻa lahi ange—ko hono ngeiá. Ko ha meʻa moʻoni ke tui ʻoku malava ke ʻi ai ha tokanga pehē ki he ngeia ʻo e niʻihi kehé ʻi he sōsaieti ʻo e ʻaho ní? Kapau ko ia, ʻe fakahāhā fēfē nai ia?

Ko e Lao ʻOkú Ne Fai ʻa e Fakangeingeiá

Naʻe fakahā ʻe Sīsū ʻa e meʻa ʻoku vakai ki ai ʻa e tokolahi ko e fakahinohino ʻiloa taha ia kuo fai fekauʻaki mo e ngaahi vā fakaetangatá: “Ko ia ʻilonga ha meʻa ʻoku mou loto ke fai ʻe he kakai kiate kimoutolu, fai pehe foki kiate kinautolu.” (Mātiu 7:12) Ko e Lao Koula ko ení, ʻo hangē ko ia ʻoku faʻa uiʻakí, ʻokú ne ueʻi ai ha taha ke ne tokaʻi ʻa hono kaungā faʻahinga ʻo e tangatá, ʻo ʻamanaki ʻe ʻi ai ʻa e toe fai pehē ange.

Hangē ko ia ʻoku fakahā mai ʻe he hisitōliá, ko hono ngāueʻaki ʻa e lao ko ení ʻoku ʻikai ke hoko fakanatula mai ia—ko e tuʻunga fehangahangaí ia ʻoku faʻa hoko lahi angé. ʻOku pehē ʻe ha tangata te tau ui ko Hāloti: “Naʻá ku faʻa saiʻia ʻi hono fakamaaʻi  ʻa e niʻihi kehé. ʻI ha ngaahi foʻi lea siʻi pē, naʻa nau hahaka holo, mā mo tangi ʻi he taimi ʻe niʻihi.” Ka naʻe ʻi ai ʻa e meʻa naʻe hoko, ʻo liliu ai ʻe Hāloti ʻa e anga ʻo ʻene tōʻonga ki he niʻihi kehé. “Naʻe kamata ke ʻaʻahi mai kiate au ha niʻihi mei he Kau Fakamoʻoni ʻa Sihová. ʻI heʻeku toe sio atu ki muí, ʻoku ou mā ʻi heʻeku fakakaukau ki he niʻihi ʻo e ngaahi meʻa naʻá ku leaʻakí pea mo e anga ʻo ʻeku tōʻonga kiate kinautolu ʻi he taimi ʻe niʻihi. Ka naʻe ʻikai te nau foʻi ai, naʻe māmālie pē ʻa e maongo ki hoku lotó ʻa e moʻoni ʻo e Tohi Tapú peá ne ueʻi au ke u liliu.” ʻI he ʻahó ni, ʻoku hoko ai ʻa Hāloti ko ha tokotaha mātuʻa ʻi he fakatahaʻanga Kalisitiané.

Ko Hāloti ko e fakamoʻoni moʻui ia “ko e folofola ʻa e ʻOtua, ko e koto moʻui mo e koto malohi, pea masila ange ʻi he heleta fakatoumata fuape; ʻo ne ʻasi atu ʻo māioioʻi ʻa e loto mo e laumalie, ʻio, hono ngaahi hokonga mo e uho; pea ʻoku ne vavangaʻi ʻa e ngaahi holi mo e fakakaukau ʻo e loto.” (Hepelu 4:12) Ko e Folofola ʻa e ʻOtuá ʻokú ne maʻu ʻa e mālohi ke aʻu ki he loto ʻo ha taha ʻo ne liliu ʻene fakakaukaú mo ʻene tōʻongá. Ko e kī eni ki hono fakangeingeiaʻi ʻa e niʻihi kehé—ko ha holi loto-moʻoni ke tokoni kae ʻikai ko e fakalotomamahi, ke fakalāngilangiʻi kae ʻikai ko hono fakamaaʻi.—Ngāue 20:35; Loma 12:10.

Toe Maʻu ʻa e Ngeia Totonú

Ko e holi tatau pē eni ʻokú ne kounaʻi ʻa e Kau Fakamoʻoni ʻa Sihová ke nau talanoa mo e niʻihi kehé ʻo fekauʻaki mo e ʻamanaki fakaʻofoʻofa ʻoku ʻi he Tohi Tapú. (Ngāue 5:42) ʻOku ʻikai ha toe founga lelei ange ke tokaʻi mo fakangeingeiaʻi ai ʻa hoto kaungā faʻahinga ʻo e tangatá ka ko hono vahevahe kiate kinautolu ʻa e ‘ogoogolelei oe meʻa lelei ange.’ (Aisea 52:​7, PM) ʻOku kau ʻi he ‘meʻa lelei angé’ ʻa hono ʻai “ʻa e tangata foʻou,” ʻa ia te ne tāmateʻi ʻa e “holi pango” ke fakamaaʻi ʻa e niʻihi kehé. (Kolose 3:​5-10) ʻOku toe kau foki ai ʻa e taumuʻa ʻa Sihova ke ne toʻo vavé ni atu ʻa e ngaahi tuʻunga mo e ngaahi fakakaukau ʻa ia ʻokú ne kaihaʻasia mei he tangatá ʻa hono ngeiá, fakataha mo e tokotaha ʻokú ne fakatupungá, ʻa Sētane ko e Tēvoló. (Taniela 2:44; Mātiu 6:​9, 10; Fakahā 20:​1, 2, 10) Ko e toki taimi ia ʻe ʻi ai moʻoni ai ʻa e ngeia ʻo e tokotaha kotoa, ʻi he hoko ʻa māmani ʻo ‘fonu ʻi he ʻiloʻi ʻo Sihová.’—Aisea 11:9.

ʻOku mau fakaafeʻi atu koe ke ke ako ʻo fekauʻaki mo e ʻamanaki fakaʻofoʻofa ko ení. ʻI hoʻo feohi mo e Kau Fakamoʻoni ʻa Sihová, te ke sio tonu ai ko hono ngāueʻaki ʻa e ngaahi tefitoʻi moʻoni Fakatohitapú ʻoku fakangeingeiaʻi ai ʻa e niʻihi kehé. Pea ʻe malava ai ke ke ako ʻo ʻilo ki he vavé ni ke hanga ʻe he Puleʻanga ʻo e ʻOtuá ʻo fakahoko mai ‘ha māmani foʻou mo lelei mamaʻo ange,’ ko ha māmani ʻa ia ʻe ʻi ai moʻoni “ʻa e ngeia taʻengata ʻo e tangatá,” ʻo ʻikai ʻaupito ke toe tāpalasia.

[Puha/Fakatātā ʻi he peesi 6]

Ko e Tauhi Anga-Tonú Naʻe Kei Maʻu Ai Honau Ngeiá

Lolotonga ʻa e Tau II ʻa Māmaní, naʻe laka hake he Kau Fakamoʻoni ʻa Sihova ʻe toko 2,000 naʻe ʻave ki he ngaahi kemi fakamamahi ʻa e kau Nasí koeʻuhi ko ʻenau tuí. ʻI hono fakahaaʻi ʻa e founga fakaofo naʻa nau fakahāhā ai ʻenau tauhi anga-tonú, ʻoku fakamatala ʻa e pōpula ʻi Ravensbrück ki muʻa ko Gemma La Guardia Gluck ʻi heʻene tohi ko e My Story: “Naʻe ʻi ai ha tuʻunga naʻe fanongonongo ai ʻe he Kesitapó, ko ha tokotaha Ako Tohi Tapu pē naʻá ne fakafisingaʻi ʻene tuí peá ne fakamoʻoni hingoa ki ai ʻi ha tohi, ʻe foaki ange ʻene tauʻatāiná pea ʻe ʻikai ke toe fakatangaʻi.” ʻI he fekauʻaki mo e faʻahinga naʻa nau fakafisi ke fakamoʻoni hingoa ʻi he tohí, ʻokú ne tohi: “Naʻe laka ange kia kinautolu ke nau faingataʻaʻia mo tatali anga-kātaki ki he ʻaho ʻo e fakatauʻatāiná.” Ko e hā naʻa nau fai ai ha tuʻu peheé? ʻOku fakamatala ʻa Magdalena, ʻoku taʻu 80 tupu he taimí ni, ʻa ia naʻe lave ki ai ʻi he kamataʻanga ʻo e kupu ki muʻá: “Naʻe mahuʻinga ange ʻa e nofo faitōnunga kia Sihová ʻi hono fai ha meʻa pē ke hao moʻui ai. Ko hono tauhi homau ngeiá naʻe ʻuhinga iá ko hono tauhi ʻemau anga-tonú.” a

[Fakamatala ʻi lalo]

[Fakatātā ʻi he peesi 5]

Naʻe fakangeingeiaʻi ʻe Sīsū ʻa e faʻahinga naʻá ne fakamoʻuí

[Fakatātā ʻi he peesi 7]

ʻOku fakangeingeiaʻi ʻe he Kau Fakamoʻoni ʻa Sihová ʻa e niʻihi kehé ʻaki ʻenau vahevahe kiate kinautolu ʻa e ‘ogoogolelei oe meʻa lelei ange’