Lotú—Ko e Hā ha Lelei ʻOkú Ne Fai?

“ʻOKU ou sai pē au ia ʻi he ʻikai te u ʻalu ki ha lotú!” ʻOku ongoʻi peheni ʻa e tokolahi. Ko e kakai faitotonu, manavaʻofa mo alafalalaʻanga tokolahi ʻoku ʻikai te nau mahuʻingaʻia kinautolu ʻi he lotú. Ko e fakatātaá, ko e kau ʻIulope Hihifo tokosiʻi pē ʻoku nau ō maʻu pē ki he lotú, neongo ko e tokolahi taha aí ʻoku nau pehē ʻoku nau tui ki he ʻOtuá. a Naʻa mo ʻAmelika Latina, ko e peseti pē ʻe 15 ki he 20 ai ʻo e kau Katoliká ʻoku nau ō maʻu pē ki he lotú.

ʻI he hangē ko e tokolahi kehé, mahalo pē ʻokú ke ongoʻi ko e lotú ʻoku ʻikai tokoni ia ke toe sai ange ai ʻa e tuʻunga ʻo ʻete moʻuí. Neongo ia, ʻoku lava foki ke ke toe lāuʻilo ʻi he ngaahi taʻu kuo maliu atú, ʻi he taimi ʻo hoʻo fanga kuí, ko e tokolahi taha ʻo e kakaí naʻa nau anga fakalotu lahi ʻaupito ange ʻi he taimi ko iá ʻi he kakai he ʻaho ní. Naʻe anga-fēfē ʻa e mole ʻa e manakoa lahi ʻo e lotú? ʻE lava ke sai pē ha taha ia ʻi he ʻikai ke anga fakalotú? ʻOku ʻi ai ha lotu ʻe lava ke ke maʻu ʻaonga mei ai?

ʻUhinga Kuo Tafoki Ai ʻa e Tokolahi mei he Lotú

ʻI he laui senituli, naʻe tui ai ʻa e kakai tokolahi taha ʻi he Puleʻanga-Haʻa-Kalisitiané ʻoku fiemaʻu ʻe he ʻOtuá ʻa e talangofuá. Naʻa nau ō ki he lotú ke maʻu ʻa e hōifua ʻa e ʻOtuá, ʻo fakafou ʻi he ngaahi ouau naʻe fai ʻe ha pātele pe fakafou ʻi he tataki naʻe fai ʻe ha faifekau. Ko e moʻoni, naʻe lāuʻilo ʻa e tokolahi ʻo fekauʻaki mo e mālualoi ʻi he lotú. Ko e kau ʻa e lotú ʻi he taú naʻe ʻiloa, ʻo hangē pē ko e ʻulungāanga kovi ʻa e haʻa faifekau ʻe niʻihi. Ka ko e tokolahi taha ʻo e kakaí naʻa nau ongoʻi ʻoku lelei ʻa e lotú ʻiate ia pē. Naʻe saiʻia ʻa e niʻihi ʻi he meʻa fakamisitelí, ko e talatukufakaholó, pea mo e mūsiká; naʻe aʻu ʻo ueʻi ʻa e niʻihi ʻe he fakamanamana ʻo e tutu taʻengata ʻi helí, ʻa ia ko ha akonaki ʻoku ʻikai ke maʻu ʻi he Tohi Tapú. Ki mui ai, naʻe liliu ʻe he ngaahi meʻa lahi naʻe hokó ʻa e anga ʻo e vakai ʻa e kakai tokolahi ki he ngaahi siasí.

Naʻe hoko ʻa e fakakaukau fakamahalo ʻo e ʻevalūsioó ʻo manakoa. Naʻe tuipau ʻa e niʻihi naʻe hokonoa mai pē e kamata ia ʻa e moʻuí—ʻo ʻikai kau ai ʻa e ʻOtuá. Ko e lahi taha ʻo e ngaahi lotú kuo ʻikai lava ke nau ʻomai ha fakamoʻoni fakatupu tuipau ko e ʻOtuá ʻa e Matavai ʻo e moʻuí. (Sāme 36:9) Tānaki atu ki ai, ʻi he fakalakalaka ʻa e tekinolosiá, ko e ngaahi lavameʻa kāfakafa ʻi he malaʻe ʻo e faitoʻó, fefonongaʻakí mo e fetuʻutakí naʻe fakakaukau ai ʻa e kakaí ʻe lava ke solova ʻe he saienisí ha faʻahinga palopalema pē. ʻIkai ko ia pē, naʻe pehē ko e kau faisaienisi sōsialé mo e kau toketā ki he ʻatamaí naʻa nau ʻomai ʻa e tataki lelei ange ia ʻi he ngaahi siasí. Ko e ngaahi siasí, ʻi heʻenau tafaʻakí, naʻe ʻikai lava ke nau fakahaaʻi mahino ko e moʻui ʻo fakatatau ki he lao ʻa e ʻOtuá ʻa e founga lelei taha ʻo e moʻuí.—Semisi 1:25.

ʻI he tali ki aí, kuo liliu ʻe he ngaahi siasi lahi ʻenau pōpoakí. Ko e kau pātelé mo e kau faifekaú kuo ʻikai te nau toe akoʻi ʻa e fiemaʻu ʻe he ʻOtuá ʻa e talangofuá. ʻI hono kehé, kuo akoʻi ʻe he tokolahi ʻo pehē ko e tokotaha taki taha kuo pau ke ne fai ha fili maʻana ʻi he meʻa ʻoku tonú mo e meʻa ʻoku halá. ʻI he feinga ke manakoá, kuo taukaveʻi ai ʻe he kau taki lotu ʻe niʻihi ʻoku tali koe ʻe he ʻOtuá ʻo tatau ai pē pe ʻoku fēfē hoʻo moʻuí. Ko e akonaki peheé ʻoku fakamanatu mai ai ʻa e meʻa naʻe tomuʻa tala ʻe he Tohi Tapú: “Koeʻuhi ʻe faifai pea  hoko ha kuonga, ʻa ia ʻe ʻikai te nau kātaki ai ʻa e tokateline haohaoa; ka te nau fokotuʻuniu hanau kau akonaki, ʻo fakatatau ki he ngaahi holi ʻanautolu, he veli honau telinga.”—2 Timote 4:3.

ʻI he ʻikai tohoakiʻi ʻa e kakaí, ko e akonaki peheé naʻá ne fakatafokiʻi kinautolu. Naʻe fakanatula pē ʻenau fifili ʻo pehē: ‘Kapau ʻoku veiveiua ʻa e ngaahi siasí fekauʻaki mo e mālohi ʻo e ʻOtuá ke fakatupu meʻá pea mo ʻene poto ʻi he faʻu ʻa e ngaahi laó, ko e hā hono ʻaonga kiate au ʻeku ʻalu ki he lotú? Ko e hā ke u hela ai hono akoʻi ʻa e lotú ki heʻeku fānaú?’ Ko e faʻahinga tāutaha ʻa ia naʻa nau feinga pē ke tataki ha moʻui tāú naʻe kamata ke nau sio ʻoku ʻikai ha ʻaonga ia ʻo e lotú. Naʻa nau mavahe mei he ngaahi siasí, pea naʻe ʻikai kei mahuʻinga kia kinautolu ʻa e lotú. Ko e hā ʻoku hoko ai ʻa e meʻa ʻoku totonu ke ʻaongá ʻo mātuʻaki halá? ʻOku ʻomai ʻe he Tohi Tapú ha fakamatala ʻuhinga lelei.

Ngāueʻaki ʻa e Lotú ki he Ngaahi Taumuʻa Kovi

Naʻe fakatokanga ʻa e ʻapositolo ko Paulá ki he muʻaki kau Kalisitiané ʻo pehē ʻe ngāueʻaki ʻe he niʻihi ʻa e lotu faka-Kalisitiané ki he ngaahi taumuʻa kovi. Naʻá ne pehē: “ʻE hu atu ha fanga ulofi anga malohi, ʻa ia ʻe ʻikai te nau mamae ki he fanga sipi. ʻIo, naʻa mo kimoutolu ʻe tupu mei ai ha kau tangata ʻoku leaʻaki ʻa e ngaahi meʻa ʻoku ʻalu kehe, ke tohoaki ʻaki ʻa e kau ako ke muimui kiate kinautolu.” (Ngāue 20:​29, 30) Ko e tokotaha ʻa ia naʻá ne leaʻaki ʻa e “ngaahi meʻa ʻoku ʻalu kehe” ko e teolosia Katolika Loma ko ʻAokositainé. Naʻe akoʻi ʻe Sīsū ʻa hono kau muimuí ke nau fakatuipauʻi ʻa e niʻihi kehé ʻaki ʻa e fakaʻuhinga mei he Tohi Tapú. Kae kehe, naʻe ʻai ʻe ʻAokositaine ʻo ʻalu kehe ʻa e ʻuhinga ʻo e ngaahi lea ʻa Sīsū ʻoku hiki ʻi he Luke 14:​23, ʻa ia ko e “ʻOmi fakamalohi ʻa e kakai,” ke ʻuhingá naʻe sai pē ke ngāueʻaki ʻa e fakamālohí ʻi he ngāue ko hono fakaului ʻo e kakaí. (Mātiu 28:​19, 20; Ngāue 28:​23, 24) Naʻe ngāueʻaki ʻe ʻAokositaine ʻa e lotú ke puleʻiʻaki ʻa e kakaí.

Ko Sētané, ko ha ʻāngelo angatuʻu, ʻokú ne tuʻu mei mui ʻi he ngāuehalaʻaki mo hono ʻuliʻi ʻo e lotú. Naʻá ne fakaʻaiʻai ʻa e kau tangata lotu ʻi he ʻuluaki senitulí ke nau feinga ke ʻuliʻi ʻa e ngaahi fakatahaʻanga Kalisitiané. ʻOku pehē ʻe he Tohi Tapú ʻo fekauʻaki mo e kau tangata ko iá: “Ko e faʻahinga ko ia ko e kau aposetolo loi, ko e kau ngaue fakahekeheke: ʻoku nau ʻai ai pe ʻa e anga ʻo e kau aposetolo ʻa Kalaisi. Pea ko hai ʻe ofo ai? he naʻa mo Setane ʻoku ne ʻai ʻa e anga ʻo ha angelo mei he maama. Pea talaʻehai ko e meʻa faka ofo ʻa e ʻai ʻe heʻene kau sevaniti ʻa e anga tofu pe ʻo e kau sevaniti ʻa Faitotonu.”—2 Kolinito 11:​13-15.

ʻOku kei ngāueʻaki ʻe Sētane ʻa e lotu ʻoku fakangalingali Kalisitiane, ʻulungāanga taau mo fakamāmá koeʻuhí ke ʻai ʻa e kakaí ke nau moʻuiʻaki ʻa ʻene ngaahi tuʻungá kae ʻikai ko e ngaahi tuʻunga ʻa e ʻOtuá. (Luke 4:​5-7) Ngalingali kuó ke fakatokangaʻi ʻoku ngāueʻaki ʻe he haʻa faifekau tokolahi he ʻaho ní ʻa e lotú ke teke ai honau langí fakataha mo e ngaahi hingoa fakalakanga māʻolunga pea ke maʻu ai ʻa e paʻanga mei heʻenau ngaahi tākangá. Kuo toe ngāueʻaki foki ʻe he ngaahi puleʻangá ʻa e lotú ke fakalotoʻi ʻa honau kau tangataʻifonuá ke nau feilaulauʻi kinautolu ʻi he taú.

ʻOku ngāueʻaki lahi ange ʻe he Tēvoló ʻa e lotú ʻi he meʻa ʻoku ʻiloʻi ʻe he tokolahi taha ʻo e kakaí. Te ke pehē pē nai ʻe koe ko ha kau fai meʻa fakalotu tōtuʻa tokosiʻi pē ʻoku ngāueʻaki ʻe Sētané. Kae fakatatau ki he Tohi Tapú, ko e “tokotaha ʻoku ui ko e Tevolo mo Setane, . . . ʻoku ne kākāʻi ʻa mamani kātoa.” ʻOku toe pehē ʻe he Tohi Tapú: “Ko hono kotoa ʻo mamani ʻoku ʻi he nima ʻo e  Fili.” (Fakahā 12:9; 1 Sione 5:19) ʻOku anga-fēfē ʻa e ongoʻi ʻa e ʻOtuá fekauʻaki mo e lotu ʻa ia ʻoku ngāueʻaki ʻe he kau taki ko ia ʻoku nau loto pē ke tohoakiʻi ʻa e kakaí kia kinautolú?

“Ko e Umaʻaki?”

Kapau ʻokú ke fakatumutumu ʻi he tōʻonga ʻa e ngaahi siasi ʻe niʻihi ʻo e Puleʻanga-Haʻa-Kalisitiané, ko e meʻa ke ke ʻiloʻí ʻoku nau taʻefakahōifua lahi ki he ʻOtua Māfimafi-Aoniú. ʻOku taukaveʻi ʻe he Puleʻanga-Haʻa-Kalisitiané kuo nau fai ha fuakava mo e ʻOtuá; naʻe fai ʻe ʻIsileli ʻo e kuonga muʻá ha taukaveʻi meimei tatau. Kuó na hoko fakatouʻosi ʻo taʻefaitōnunga. Ko e fakahalaiaʻi ʻe Sihova ʻa ʻIsilelí ʻoku ngāueʻaki tatau pē ia ki he Puleʻanga-Haʻa-Kalisitiane ʻo e ʻaho ní. Naʻe folofola ʻa Sihova: “Ko ʻeku ngaahi lea naʻe ʻikai te nau fakaongo ki ai, pea ko ʻeku lao naʻa nau fakataleʻi. Ko e umaʻaki ʻa e ʻomi laipeno kiate au mei Sipa? . . . Ko hoʻomou ngaahi tamate manu ʻoku ʻikai ke tau lelei mai.” (Selemaia 6:​19, 20) Naʻe ʻikai ʻiloʻi ʻe he ʻOtuá ʻa e ngaahi tōʻonga lotu naʻe fakahoko ʻe he kau mālualoí. Naʻe ʻikai te ne mahuʻingaʻia ʻi heʻenau ngaahi ouaú mo ʻenau ngaahi lotú. Naʻá ne tala ki ʻIsileli: “Ko hoʻomou ngaahi fakamahinafoʻou, mo hoʻomou ngaahi katoanga tuʻutuʻuni, ʻoku fehiʻa ki ai ʻa hoku laumalie; kuo nau hoko ko e kavenga kiate au: kuo u fiu hono fafa. Pea ka mou ka fola nima hake, te u hanga kehe meiate kimoutolu; ʻio, ka mou ka fakalahi lotu, ʻe ʻikai te u fakaongo.”—Aisea 1:​14, 15.

ʻOku tohoakiʻi ʻa Sihova ki he ngaahi kātoanga ʻoku tuʻuaki ʻe he ngaahi siasi ʻoku faka-Kalisitiane ka naʻe muʻaki fakalāngilangiʻi ai ʻa e ngaahi ʻotua loí? ʻOkú ne fanongo ki he ngaahi lotu ʻa e haʻa faifekau ʻoku nau ʻuliʻi ʻa e ngaahi akonaki ʻa Kalaisí? ʻOku tali ʻe he ʻOtuá ha lotu pē ʻokú ne siʻaki ʻa ʻene laó? ʻE lava ke ke fakapapauʻi ʻokú ne fakafeangai ki he ngaahi ouau fakalotu he ʻaho ní ʻo hangē pē ko ʻene fakafeangai ki he ngaahi feilaulau ʻa ʻIsileli ʻo e kuonga muʻá, ʻa ia naʻá ne pehē fekauʻaki mo ia: “Ko e umaʻaki?”

Kae kehe, ʻoku tokanga lahi ʻa Sihova fekauʻaki mo e lotu ʻoku fai ʻi he moʻoní ʻe he kakai loto-moʻoní. ʻOku leleiʻia ʻa e ʻOtuá ʻi he taimi ʻoku fakahaaʻi ai ʻe he faʻahinga tāutaha ʻa e houngaʻia ki he meʻa kotoa ʻoku nau maʻu meiate iá. (Malakai 3:​16, 17) Ko ia ʻe lava ke ke sai pē ʻi he ʻikai ke lotu ki he ʻOtuá? Ko ha tokotaha ʻoku ʻikai te ne fai ha meʻa maʻa ʻene ongo mātuʻa ʻofá ʻoku ʻikai ʻaupito fakatonuhiaʻi haʻane fakakaukau ʻokú ne sai pē, ʻikai ko ia? ʻE lava ke pehē ʻoku sai ha tokotaha ʻoku ʻikai te ne fai ha meʻa maʻá e ʻOtuá? ʻI he ʻuhinga lelei, ʻoku totonu ke tau mahuʻingaʻia lahi ʻi he ʻOtua moʻoní, ʻa ia naʻe tupu meiate ia ʻa e moʻuí tonu. ʻI he kupu hoko maí, te tau sio ai ki he ʻikai ngata pē ʻi hono fakalāngilangiʻi ʻe he lotu moʻoní ʻa e ʻOtuá ka ʻoku toe ʻaonga foki ia kia kitautolu.

[Fakamatala ʻi lalo]

[Fakatātā ʻi he peesi 4]

Kuo fakahaaʻi ʻe he ngaahi lotú ʻa e fakamoʻoni naʻe fakatupu ʻe he ʻOtuá ʻa e meʻa kotoa pē?

[Fakatātā ʻi he peesi 4, 5]

ʻOku kau ʻi he fokotuʻutuʻu ko ení ha fakafofonga ʻo e ʻOtuá?

[Fakatātā ʻi he peesi 5]

ʻOku anga-fēfē ʻa e vakai ʻa e ʻOtuá ki he faʻahinga kātoanga ko ení?

[Maʻuʻanga]

AP Photo/Georgy Abdaladze