Naʻa “Nau Ui Ange ʻa e Sanetalimi”

KO E taulaʻeiki lahí mo e kau pule ʻo e kau Siú naʻa nau veiveiua. Ko e hā ʻe lava ke nau fai ke taʻofiʻaki ʻa e longoaʻa ʻo fekauʻaki mo Sīsū Kalaisí? Ne nau lavameʻa ʻi hono fakapoongi iá, ka ʻi he taimi ko ení naʻe fakafonu ai ʻe he kau ākonga ʻa Sīsuú ʻa Selusalema ʻaki ʻa e talanoa ʻo fekauʻaki mo ʻene toetuʻú. ʻE lava fēfē ke fakasīlongoʻi kinautolu? Ke fakapapauʻí, ko e taulaʻeiki lahí mo hono kau poupoú naʻa “nau ui ange ʻa e Sanetalimi,” ko e fakamaauʻanga māʻolunga ʻo e kakai Siú.—Ngāue 5:21.

ʻI ʻIsileli ʻi he taimi ʻo e kau ʻapositoló, naʻe maʻu ai ʻe he Kōvana Loma ko Ponitō Pailató ʻa e mafai māʻolunga tahá. Ka naʻe anga-fēfē ʻa e fengāueʻaki ʻa e Sanetalimí mo Pailató? Ko e hā ʻa e tuʻunga ne aʻu ki ai ʻenau tuʻunga pule fakalaó? Ko e hā ʻa e faʻunga ʻo e Sanetalimí? Pea naʻe anga-fēfē ʻene ngāué?

Tupu ʻa e Sanetalimí

Ko e foʻi lea faka-Kalisi ko e “Sanetalimi” ʻoku ʻuhinga moʻoni ia ko ha “tangutu fakataha.” Ko ha foʻi lea ia naʻe ngāueʻaki lahi ki ha ʻasemipilī pe ko ha fakataha. ʻI he talatukufakaholo faka-Siú, naʻe ʻuhinga maheni ia ki ha kulupu fakaefakamaau, pe fakamaauʻanga fakalotu.

Ko e kau faʻu ʻo e Talamatá, ʻa ia naʻe fakatahatahaʻi lolotonga ʻa e ngaahi taimi ʻi he hili ʻa e fakaʻauha ʻo Selusalema he 70 T.S., naʻa nau fakamatalaʻi ʻa e Sanetalimí ko ha kulupu motuʻa. Naʻa nau fakakaukau atu naʻe faʻuʻaki maʻu pē ia ʻa e kau mataotao ʻa ia naʻa nau fakataha ke tipeitiʻi ʻa e ngaahi poini ʻo e lao faka-Siú pea naʻa nau tui naʻe kamata ia mei he taimi naʻe fakatahatahaʻi ai ʻe Mōsese ʻa e kau tangata matuʻotuʻa ʻe toko 70 ke nau tokoni kiate ia ʻi hono tataki ʻo ʻIsilelí. (Nomipa 11:​16, 17) ʻOku siʻaki ʻe he kau faihisitōliá ʻa e fakakaukau ko  ení. ʻOku nau pehē naʻe toki hoko ʻo ʻi ai ha meʻa hangē ko e Sanetalimi ʻo e ʻuluaki senitulí ʻi he taimi naʻe puleʻi ai ʻe Pēsia ʻa ʻIsilelí. ʻOku toe tui ʻa e kau faihisitōliá ko e fakakaukau ʻa e kau tui Talamatá fekauʻaki mo e kulupú ni ko ha ʻapiako mataotaó ʻoku tatau ange ia mo e ngaahi ʻasemipilī faka-lāpai ʻo e senituli hono uá mo hono tolú ʻi he Sanetalimi he ʻuluaki senitulí. Ko ia ai, naʻe hoko ʻo ʻi ai ʻanefē ʻa e Sanetalimí?

ʻOku fakahaaʻi ʻe he Tohi Tapú ko e faʻahinga ne fakaheeʻi ʻa ia naʻa nau toe foki ki Siuta mei Pāpilone ʻi he 537 K.M. naʻe ʻi ai ʻenau fokotuʻutuʻu fakapuleʻanga ki hono puleʻi ʻo e kakaí. ʻOku lave ʻa Nehemaia mo ʻĒsela ki he ngaahi houʻeiki, kau mātuʻa, kau nōpele mo e kau pule leʻoleʻo—mahalo ko e kamataʻanga ia ʻo ha Sanetalimi ki he kahaʻú.—Esela 10:8; Nehemaia 5:7.

Ko e vahaʻa taimi mei he kakato ʻo e Ngaahi Konga Tohi Tapu Faka-Hepeluú ki hono faʻu ʻo e Kōsipeli ʻa Mātiú ko ha taimi moveuveu ia ki he kau Siú. ʻI he 332 K.M., naʻe puleʻi ai ʻe ʻAlekisānita ko e Lahi ʻa Siutea. Hili e mate ʻa ʻAlekisānitá, naʻe hoko ai ʻa Siutea ʻo ʻi he malumalu ʻo e ongo puleʻanga Kalisi ʻe ua naʻe ʻi heʻene pulé—ʻuluakí ko e puleʻanga ʻo e haʻa tuʻi Tolimí, pea hoko ai ʻa e haʻa tuʻi Selusitá. ʻI he ngaahi fakamatala fekauʻaki mo e pule faka-Selusitá, ʻa ia naʻe kamata ʻi he 198 K.M., ʻoku tau maʻu ai ʻa e ʻuluaki fakamatala ki ha sēnatu ʻo e kau Siú. Ko e ʻasemipilī ko ení ʻoku ngalingali naʻe ʻi ai hono ngaahi mafai fakangatangata, ka naʻá ne ʻoange ki he kau Siú ha tuʻunga meimei tatau ʻo e puleʻanga fakaekinautolu.

ʻI he 167 K.M., naʻe feinga ai ʻa e tuʻi Selusita ko ʻAnitiokasi IV (ʻEpifeini) ke ngāueʻaki ki he kau Siú ha anga fakafonua faka-Kalisi. Naʻá ne fakalieliaʻi ʻa e temipale ʻi Selusalemá ʻaki ʻene feilaulauʻi ʻi hono ʻōlitá ha puaka kia Siusi. Naʻe fakatupunga ʻe he meʻá ni ha angatuʻu ʻa ia naʻe toʻo ai he lolotonga ʻa e taimi ko iá ʻe he kau Makapeó ʻa e pule Selusitá pea fokotuʻu ai ʻa e haʻa tuʻi Hesimoní. a ʻI he taimi tatau, ko e kau sikalaipé mo e kau Fālesí—ʻa e kau taki ʻo e fuʻu tokolahi naʻa nau poupouʻi ʻa e angatuʻú—naʻa nau maʻu ʻa e mafai ki hono fakalele ʻo e puleʻangá ʻo tupu mei ai e mole ʻa e mafai ʻo e kalasi taulaʻeikí.

Naʻe tupu ai ʻa e Sanetalimí ʻo hangē ko ia naʻe fakahaaʻi ʻi he ngaahi Konga Tohi Tapu Faka-Kalisí. ʻE hoko ia ko ha kulupu pule fakapuleʻanga pea ko e fakamaauʻanga māʻolunga ia ki hono fakaʻuhingaʻi ʻo e lao faka-Siú.

Ko e Mafamafatatau ʻo e Mafaí

ʻI he aʻu mai ki he taimi ʻo e kau ʻapositoló, naʻe puleʻi ai ʻe Loma ʻa Siutea. Kae kehe, naʻe maʻu ʻe he kau Siú ha tuʻunga ʻo e tauʻatāina. Ko ha founga faka-Loma ʻa hono ʻoange ki he kakai naʻá ne puleʻí ʻa e totonu ke nau fili ʻa e founga-pule pē ʻanautolu. Ko ia ai, naʻe ʻikai kaunoa ʻa e kau ʻōfisa Lomá ʻi he ngaahi fatongia naʻe fakahoko ʻe he ngaahi fakamaauʻanga fakafeituʻú, pea naʻa nau fakaʻehiʻehi mei he ngaahi palopalema ʻe malanga hake nai koeʻuhi ko e ngaahi faikehekehe fakafonuá. Ko e fakakaukaú ke pouaki ʻa e melino mo e mateaki ʻa e faʻahinga ʻoku pule ki aí ʻaki hono fakaʻatā ke nau tauhi ʻenau anga fakafonuá tonu pea ko e tuʻunga tefitó ke nau puleʻi pē kinautolu. Tuku kehe ʻa hono fakanofo mo fakahifo ʻa e taulaʻeiki lahí—ʻa ia ko e palesiteni ia ʻo e Sanetalimí—mo hono hilifaki ʻa e ngaahi tukuhaú, naʻe tuʻu vahaʻa ʻa e kau Lomá ʻi he ngaahi meʻa faka-Siú ʻi he taimi pē naʻe fiemaʻu ai ʻa e meʻá ni ʻi heʻenau tuʻunga pulé mo ʻenau ngaahi meʻá tonu. Hangē ko ia naʻe fakahaaʻi ʻi he  fekauʻaki mo hono fakamāuʻi ʻo Sīsuú, ʻoku hā ngali naʻe maluʻi ʻe Loma ʻa hono mafai ke hilifaki ʻa e tautea maté.—Sione 18:31.

Ko ia naʻe meimei fakalele ai ʻe he Sanetalimí ʻa e lahi taha ʻo e ngaahi meʻa faka-Siú tonu. Naʻe ʻi ai ʻene kau ʻōfisa ke nau fai ha ngaahi puke fakalao. (Sione 7:​32) Ko e ngaahi fakamaauʻanga māʻulalo angé naʻa nau fakamāuʻi ʻa e fanga kiʻi faihia īkí mo e ngaahi hopo sivilé ʻo ʻikai kau mai ki ai ʻa Loma. ʻI he taimi naʻe ʻikai lava ke fakahoko ai ʻe he ngaahi fakamaauʻanga māʻulalo angé ha tuʻutuʻuni ʻi ha hopo, naʻe ʻave ia ki he Sanetalimí, ʻa ia naʻá ne fai ʻa e ngaahi tuʻutuʻuni aofangatukú.

Ke tauhi maʻu ʻa hono mafaí, naʻe pau ai ki he Sanetalimí ke ne tauhi ʻa e melinó pea poupouʻi ʻa e pule ʻa Lomá. Ka ʻo kapau naʻe mahaloʻi ʻe he kau Lomá ha ngaahi faihala fakapolitikale, naʻa nau kau mai ʻo fai ha ngāue ʻo fakatatau ki he meʻa ʻoku nau sio ʻoku feʻungamālié. Ko e keisi pehē ʻe taha ko hono puke ʻo e ʻapositolo ko Paulá.​—Ngāue 21:​31-​40.

Mēmipa ʻo e Fakamaauʻangá

Ko e Sanetalimí naʻe ʻi ai hono kau mēmipa ʻe toko 71—ko e taulaʻeiki lahí mo e toko 70 ʻo e kau tangata tuʻu-ki-muʻa ʻo e puleʻangá. ʻI he taimi ʻo Lomá naʻe faʻuʻaki ia ʻa e kau nōpele tuʻunga taulaʻeiki (meimei ko e kau Sātusi), kau māʻolunga ʻikai ʻi he haʻa faifekaú, mo e kau sikalaipe mataotao ʻi he faʻahi ʻa e kau Fālesí. Ko e kau māʻolunga ʻi he tuʻunga taulaʻeikí, ʻi hono poupouʻi ʻe he kau tuʻu-ki-muʻa ʻikai ʻi he haʻa faifekaú, naʻa nau puleʻi ʻa e fakamaauʻangá. b Lolotonga ko e kau Sātusí naʻa nau tauhi ʻa e tuʻunga tukufakaholó, ko e kau Fālesí naʻe ʻatā ʻenau fakakaukaú pea meimei ko e faʻahinga lāuvale ʻa ia naʻa nau tākiekina lahi ʻa e kakaí. Fakatatau ki he faihisitōlia ko Siosifasí, ko e ngaahi meʻa naʻe kounaʻi ʻe he kau Fālesí naʻe toumoua ke fai ki ai ʻa e kau Sātusí. Naʻe ngāueʻaongaʻaki ʻe Paula ʻenau feʻauʻauhí mo e ngaahi faikehekehe ʻi he tui he vahaʻa ʻo e ongo kulupú ni, ʻi he taimi naʻá ne taukapoʻi ai ia ʻi he ʻao ʻo e Sanetalimí.​—Ngāue 23:​6-9.

Ko e natula māʻolunga ʻo e Sanetalimí ʻoku ʻai ai ke ngalingali ko e tuʻunga mēmipá naʻe tuʻumaʻu pea ko e ngaahi lakanga ʻataá naʻe fetongi ia fakafou ʻi hono fakanofo ʻe he kau mēmipa lolotongá. Fakatatau ki he Misinaá, ko e kau mēmipa foʻoú naʻe pau ko e kau “taulaʻeiki, kau Līvai, mo e kau ʻIsileli ʻa ia ʻoku fakangofua ke mali ʻa honau ngaahi ʻofefiné mo e kau taulaʻeikí,” ʻa ia ko e kau Siu ʻa ia naʻe lava ke nau ʻomai ha ngaahi lēkooti laine hohoko naʻe fakamoʻoniʻi ai ʻa e tuʻunga maʻa ʻo honau hakó. Koeʻuhi naʻe tokangaʻi ʻe he fakamaauʻanga māʻolungá ʻa e meʻa fakaefakamaau ʻa e fonuá kotoa, ʻoku hā ngali totonu ko e kau tangata naʻe lelei honau ongoongó ʻi he ngaahi fakamaauʻanga māʻulalo angé ʻe hiki hake kinautolu ki ha lakanga ʻi he Sanetalimí.

Tuʻunga Pule mo e Mafai

Naʻe fakaʻapaʻapaʻi lahi ʻe he kau Siú ʻa e Sanetalimí, pea ko e kau fakamaau ʻi he ngaahi fakamaauʻanga māʻulalo angé naʻe pau ke nau tali ʻa ʻene ngaahi tuʻutuʻuní, pe ko e tautea maté. Naʻe tokanga tautefito ʻa e fakamaauʻangá ki he ngaahi tuʻunga taau ʻo e kau taulaʻeikí mo e ngaahi meʻa fekauʻaki mo Selusalema, ko hono temipalé pea mo e lotu ʻi he temipalé. Ko hono moʻoní ko e pule sivile ʻa e Sanetalimí naʻá ne kāpui ʻa Siutea pē. Ka koeʻuhi naʻe vakai ki he Sanetalimí naʻe māʻolunga ʻi hono fakaʻuhinga ʻo e Laó, naʻá ne tākiekina ʻa e mafai fakaeʻulungāanga ʻi he ngaahi kolo Siu ʻi māmani lahí. Ko e fakatātaá, ko e taulaʻeiki lahí mo ʻene kulupú naʻa nau fakahinohinoʻi ʻa e kau taki ʻo e ngaahi sinakoke ʻi Tāmasikusí ke nau fāitaha ʻi hono puke ʻa e kau muimui ʻo Kalaisí. (Ngāue 9:​1, 2; 22:​4, 5; 26:12) ʻI he founga tatau, ko e kau Siu naʻa nau ʻaʻahi ki Selusalema ki he ngaahi kātoangá ʻoku ngalingali naʻa nau foki ki ʻapi mo e ngaahi ongoongo ʻo e tuʻutuʻuni ʻa e Sanetalimí.

Fakatatau ki he Misinaá, naʻe maʻu ʻe he Sanetalimí ʻa e tuʻunga pule tāfataha ʻi he ngaahi ʻīsiu naʻe mahuʻinga fakapuleʻanga, ʻi he feangai mo e kau fakamaau ʻa ia naʻa nau fakafetau ki heʻene ngaahi tuʻutuʻuní, pea ʻi hono fakamāuʻi ʻo e kau palōfita loí. Naʻe hā ʻa Sīsū mo Sitīveni ʻi he ʻao ʻo e fakamaauʻangá kuo tukuakiʻi ko e ongo meʻa lea fieʻotua, ko Pita mo Sione ko e ongo fulihi ʻo e puleʻangá pea ko Paula ki hono maumauʻi ʻa e tapu ʻo e temipalé.​—Maake 14:64; Ngāue 4:​15-​17; 6:​11; 23:1; 24:6.

Fakamāuʻi ʻo Sīsū mo ʻEne Kau Ākongá

Tuku kehe ʻa e ngaahi Sāpaté mo e ngaahi ʻaho tapú, naʻe ngāue ʻa e Sanetalimí ʻi heʻene fai tuʻutuʻuní ʻi he ʻaho taki taha mei he feilaulau pongipongí  ki he feilaulau efiafí. Naʻe fai ʻa e ngaahi hopó ʻi he lolotonga pē ʻa e ngaahi taimi ʻahó. Koeʻuhi ko e ngaahi tautea maté naʻe ʻikai ke tala ia kae ʻoua ke aʻu ki he ʻaho hoko mai ʻi he hopó, ko e ngaahi hopo peheé naʻe ʻikai pau ke fai ia ʻi ha efiafi Sāpate pe ʻi ha taimi kātoanga. Naʻe naʻinaʻi mamafa ki he kau fakamoʻoní ʻo fekauʻaki mo e mafatukituki ʻo hono lilingi ʻo ha toto taʻehalaia. Ko ia ai, ko e hopo ʻi he taimi poʻulí mo hono fakahalaiaʻi ʻo Sīsū naʻe fai he ʻapi ʻo Kaiafasi ʻi he efiafi ʻo ha kātoangá naʻe taʻefakalao. Ko e toe kovi angé, ko e kau fakamāú tonu naʻa nau kumi ki ha kau fakamoʻoni loi pea fakalotoʻi ʻa Pailato ke ne tuʻutuʻuni ke fakapoongi ʻa Sīsū.​—Mātiu 26:​57-​59; Sione 11:​47-​53; 19:31.

Ko e kau fakamaau ʻo e ngaahi hopo tautea maté, ko e lau ia ʻa e Talamatá, naʻa nau feinga ke fakahaofi ʻa e fakaʻiloá lolotonga hono fakakaukauʻi fakalelei ʻa e fakamoʻoní. Neongo ia, ko Sitīveni, ʻo hangē pē ko Sīsū ki muʻa ʻiate iá, naʻe ʻikai hopoʻi pehē ia. Ko ʻene taukapo he ʻao ʻo e Sanetalimí naʻe iku ai ki hono tolomakaʻi ia ʻe ha fuʻu kakai. Ka ne ʻikai ʻa e tuʻu vahaʻa ʻa e puleʻanga Lomá, ne mei tāmateʻi nai ʻa e ʻapositolo ko Paulá ʻi he malumalu ʻo e ngaahi tuʻunga tatau. Ko hono moʻoní, ko e kau fakamaau ʻo e Sanetalimí ne nau faʻufaʻufono ke tāmateʻi iá.​—Ngāue 6:​12; 7:​58; 23:​6-​15.

Ne hā ngali ʻi ha tuʻunga ko ha tokosiʻi ʻo e kau mēmipa ʻo e fakamaauʻangá ko e kau tangata kinautolu ne ʻi ai ʻenau ngaahi tefitoʻi moʻoni fakaeʻulungāanga lelei. Ko ha talavou pule Siu ʻa ia naʻe talanoa mo Sīsū ko ha mēmipa nai ia ʻo e Sanetalimí. Neongo ko e koloa ʻa e tangatá ko ha fakafaingataʻaʻiaʻanga ia kiate ia, kuo pau pē ne ʻi ai hono ngaahi ʻulungāanga lelei, koeʻuhi he naʻe fakaafeʻi ia ʻe Sīsū ke ne muimui ʻiate Ia.​—Mātiu 19:​16-​22; Luke 18:​18, 22.

Ko e manavahē ki he fakakaukau mai nai ʻa hono kaungā fakamāú naʻá ne fakatupunga nai ʻa Nikotīmasi, “ko ha taha ia ʻo e houʻeiki Siu,” ke ne ʻaʻahi kia Sīsū ʻi he mamalu ʻa e poʻulí. Neongo ia, naʻe taukapoʻi ʻe Nikotīmasi ʻa Sīsū ʻi he ʻao ʻo e Sanetalimí ʻaki ʻene ʻeke: “He ko e anga o ʻetau lao ke fakamāu ha tangata, ʻi he teʻeki ke fanongo ki haʻane fakamatala, pe mahino ʻa e meʻa kuo ne fai?” Naʻe ʻomai ʻe Nikotīmasi ki mui “ha koto mula mo e ʻalosi” ke teuteuʻiʻaki ʻa e sino ʻo Sīsuú ki hono tanú.—Sione 3:​1, 2; 7:​51, 52; 19:39.

Ko Siosefa ʻAlematea, ko e toe mēmipa ia ʻe taha ʻo e Sanetalimí, naʻá ne kole loto-toʻa kia Pailato ʻa e sino ʻo Sīsuú ʻo ne fakatokoto ia ʻi hono fonualoto foʻou ʻoʻona. Ko Siosefá naʻá ne “nofo ʻamanaki ki he Puleʻanga ʻo e ʻOtua,” ka ko e manavahē ki he kau Siú naʻe taʻofi ai ia mei heʻene fakahaaʻi ʻa ia tonu ko e taha ʻo e kau ākonga ʻa Sīsuú. Ko ia ai, ʻi he taau ke fakaongoongoleleiʻi ʻa Siosefá, naʻe ʻikai te ne fili ʻo tatau mo e Sanetalimí ʻi heʻenau faʻufaʻu fakafufū ke tāmateʻi ʻa Sīsuú.—Maake 15:​43-46; Mātiu 27:​57-60; Luke 23:​50-53; Sione 19:38.

Ko e mēmipa ʻo e Sanetalimí ko Kāmelielí naʻá ne faleʻi fakapotopoto ʻa hono ngaahi kaungā fakamāú ke tukunoaʻi ʻa e kau ākonga ʻa Sīsuú. “Kaeʻumaʻā foki,” ko ʻene leá ia, “naʻa ʻiloange ʻoku mou tauʻi ʻa e ʻOtua.” (Ngāue 5:​34-39) Ko e hā naʻá ne taʻofi ʻa e fakamaauʻanga māʻolungá mei heʻenau ʻiloʻi naʻe maʻu ʻe Sīsū mo ʻene kau ākongá ʻa e poupou ʻa e ʻOtuá? ʻI he ʻikai fakamālō ʻi he ngaahi mana ʻa Sīsuú, naʻe fakaʻuhinga ʻa e Sanetalimí: “Ko e ha muʻa ʻoku tau fai? he ko e tangata ni ko e meʻa ngei ʻene fai mana. Kapau te tau tuku ia ke fai pehē ai pē, ʻe tui pikitai kiate ia ʻa e kakai kotoa pē, pea ʻe haʻu ʻa e kau Loma, ʻo ʻave hotau fonua mo hotau puleʻanga fakatouʻosi.” (Sione 11:​47, 48) Ko e holi lahi ki he mafaí naʻe mioʻi ai ʻa e fakamaau totonu ʻa e fakamaauʻanga māʻolunga faka-Siú. ʻI he tuʻunga tatau, ʻi he ʻikai ke fiefia ʻi hono fakamoʻui ʻa e kakaí ʻe he kau ākonga ʻa Sīsuú, naʻe hoko ai ʻa e kau taki lotú ʻo “vevele ʻenau meheka.” (Ngāue 5:17) ʻI he tuʻunga ko e kau fakamāú, naʻe totonu ke nau manavahē-ʻOtua mo faitotonu, ka ko e tokolahi taha ʻo kinautolú naʻa nau kākā mo taʻefaitotonu.​—Ekisoto 18:21; Teutalonome 16:​18-​20.

Fakamaau Fakaʻotua

Koeʻuhi ko e talangataʻa ʻa ʻIsileli ki he Lao ʻa e ʻOtuá pea nau siʻaki ʻa e Mīsaiá, naʻe faifai atu pē ʻo siʻaki ʻe Sihova ʻa e puleʻangá ʻi hono tuʻunga ko ʻene kakai filí. ʻI he 70 T.S. naʻe fakaʻauha ai ʻe he kau Lomá ʻa e kolo ko Selusalemá mo hono temipalé pea fakangata ai ʻa e fokotuʻutuʻu ʻo e ngaahi meʻa faka-Siú fakakātoa ʻo aʻu atu ai pē ki he Sanetalimí.

Ko e Fakamaau ʻa Sihova kuo fakanofó, ʻa Sīsū Kalaisi, te ne fakapapauʻi pe ʻoku taau ha ngaahi mēmipa pē ʻo e Sanetalimí ʻi he taimi ʻo e kau ʻapositoló mo ha toetuʻu pea pehē ki he faʻahinga ʻi honau lotolotongá naʻe faiangahala ki he laumālie māʻoniʻoní. (Maake 3:​29; Sione 5:​22) ʻOku lava ke tau fakapapauʻi ʻi hono fai ʻa e ngaahi fili peheé, ʻe ngāueʻaki ai ʻe Sīsū ʻa e fakamaau totonu haohaoa.​—Aisea 11:​3-5.

[Fakamatala ʻi lalo]