ʻOku Fuʻu Fakataputapui ʻa e Tohi Tapú?

“ʻI HEʻEKU kei siʻí, naʻe ʻikai akoʻi kiate au ha ngaahi tuʻunga Fakatohitapu. Naʻe aʻu ʻo ʻikai ʻaupito fai ha lave ki he ʻOtuá,” ko e fakamatala ia ʻa ha talavou ʻi Finilani. Ko ha puipuituʻa pehē ʻoku ʻikai ko ha meʻa foʻou ia he ʻahó ni. Ko e tokolahi, tautefito ki he fānaú, ʻoku nau vakai ki he Tohi Tapú kuo ʻosi ʻaupito hono taimí pea ʻoku fuʻu fakataputapui ʻa ʻene faleʻí. Ko e faʻahinga ʻoku nau loto ke muimui ʻi he Tohi Tapú ʻoku vakai ki ai ʻa e niʻihi kehé ko e kakai kuo fakafeʻātungiaʻi ʻa ia ʻoku fakamafasiaʻi ʻenau moʻuí ʻaki ʻa e ngaahi fakangatangata mo e ngaahi tuʻutuʻuni. Ko ia ʻoku ongoʻi ai ʻe he tokolahi ʻoku lelei ange ke ʻoua ʻe lau ʻa e Tohi Tapú ia pea ʻoku nau kumi tataki leva ki ha feituʻu kehe.

Ko e vakai pehē ki he Tohi Tapú ʻoku tupu lahi ia mei he hisitōlia fuoloa ko ia ʻo e fakafeʻātungia naʻe fai ʻe he ngaahi siasi ʻo e Puleʻanga-Haʻa-Kalisitiané. Ko e fakatātaá, ʻi he lolotonga ʻa e vahaʻa taimi ʻoku ui ʻe he kau faihisitōlia ʻe niʻihi ko e Kuonga Fakapoʻulí, naʻe puleʻi ai ʻe he Siasi Katolika ʻi ʻIulopé ʻa e meimei tafaʻaki kotoa ʻo e moʻui ʻa e kakaí. Ko ha taha pē naʻe fakatoʻotoʻa ke taʻelototatau mo e siasí naʻá ne ʻi ha tuʻunga fakatuʻutāmaki ʻi hono fakamamahiʻi ia pea aʻu ki hono fakapoongi. Ko e ngaahi siasi Palotisaní, ʻa ia naʻe toki ʻasi hake ki muí, naʻa nau toe fakataputapui ʻa e tauʻatāina fakafoʻituituí. ʻI he ʻahó ni, ko e ngaahi foʻi lea hangē ko e “lotu Kalaviní” pe “Pulitaní” ʻoku fakamanatu mai ai ʻo ʻikai ko e kau muimui pē ʻo ha ngaahi tui ʻe niʻihi ka ko e ngaahi tautea kakaha naʻe fekauʻaki mo e ngaahi kulupu peheé. Ko ia ai, koeʻuhi ko e fakafeʻātungia naʻe fai ʻe he ngaahi siasí, naʻe fakaʻosi hala ʻaki ai ʻe he kakaí kuo pau pē ʻoku fakafeʻātungia ʻa e ngaahi akonaki ʻa e Tohi Tapú.

ʻI he ngaahi senituli ki mui ní, kuo mole lahi ai ʻi ha tuʻunga mei he ngaahi siasí ʻa ʻenau puleʻi e moʻui ʻa e kakaí ʻi he ngaahi fonua ʻe niʻihi. Hili hono siʻaki ʻa e ngaahi tui fakalotu tukufakaholó ʻoku maʻu ai ʻe he kakaí ʻa e totonu ke nau fili ʻia kinautolu pē ʻa e meʻa ʻoku tonú mo ia ʻoku halá. Ko e hā hono olá? Ko Ahti Laitinen, ko ha palōfesa ʻi he ako ki he faihiá mo e fakamaau ʻo e saienisi sōsialé, ʻokú ne fakamatala: “Ko e fakaʻapaʻapa ki he tuʻunga mafaí kuo hōloa, pea ko e mahino ʻa e kakaí ki he meʻa ʻoku ala talí mo ʻikai ala talí ʻoku toe nenefu ange.” Ko e meʻa fakaolí, he naʻa mo e kau taki lotú kuo nau tō ki he faʻahinga fakakaukau ko ení. Naʻe pehē ʻe ha pīsope Lūtelo ʻiloa: “ʻOku ou hehema ke siʻaki ʻa e taukaveʻi ʻo pehē ko e ngaahi fehuʻi fakamōlalé ʻoku solova ia ʻi he kumi tokoni ki he Tohi Tapú pe ki ha mafai fakalotú.”

ʻOku Manakoa ʻa e Tauʻatāina Taʻefakangatangatá?

Ko e foʻi fakakaukau ʻo e tauʻatāina taʻefakangatangatá ʻe ongo fakamānako nai ia, tautefito ki he toʻutupú. ʻOku ʻikai saiʻia ʻa e tokolahi ke fai ha siolalo kia kinautolu, pe ʻi he pau ke nau moʻui ʻo fakatatau ki he ngaahi ʻotu tuʻutuʻuní. Kae kehe, ʻoku totonu ke tauʻatāina ʻa e tokotaha kotoa ke nau fai ʻa e meʻa pē ʻoku nau fiemaʻú? Ke tali ʻa e fehuʻi ko ení, fakakaukau angé ki ha fakatātā. Fakaʻuta atu ki ha kolo ʻoku ʻikai hano ngaahi lao fefonongaʻaki. ʻOku ʻikai fiemaʻu ai ha laiseni fakaʻuli pe sivi fakaʻuli. ʻE lava ke fakaʻuli faʻiteliha pē ʻa e kakaí, ʻo aʻu ki he taimi ʻoku nau konā aí, ʻo ʻikai fiemaʻu ke hohaʻa fekauʻaki mo ha ngaahi fakangatangata ʻi he vave ʻo e lelé, ko ha ngaahi fakaʻilonga tuʻu, ngaahi maama hala, ngaahi hala ʻoku huʻu-tahá, pe ngaahi kolosiʻanga ki he ʻalu laló. ʻE manakoa ʻa e “tauʻatāina”  peheé? ʻIkai ʻaupito! Ko e olá ko e moveuveu, puputuʻu mo e fakatamaki. Neongo ko e ngaahi lao fefonongaʻakí ʻoku fakataputapui ai ʻa e tauʻatāina ʻa e kakaí, ʻoku tau mahinoʻi ko e ngaahi laó ni ʻoku maluʻi ai ʻa e kau fakaʻulí pea pehē foki ki he kau ʻalu laló.

ʻOku ʻomai ʻe Sihova ʻi he founga meimei tatau, ʻa e fakahinohino ʻoku totonu ke tau moʻui aí. ʻOku tau maʻu ʻaonga mei heni. ʻI he ʻikai ha tataki peheé, ʻe pau ai ke tau ako ʻa e ngaahi meʻá ʻi hono ʻahiʻahiʻi ʻo e ngaahi foungá, pea ʻi he fai peheé, ʻe lava ke tau fakatupu ai ha maumau kia kitautolu mo e niʻihi kehé. Ko ha ʻatimosifia pehē ʻo e moveuveu fakaeʻulungāangá ʻe ʻikai manakoa pea fakatuʻutāmaki tatau pē ia mo e fakaʻuli ʻi ha kolo ʻoku ʻikai ha ngaahi lao fefonongaʻakí. Ko hono moʻoní, ʻoku tau fiemaʻu ʻa e ngaahi tuʻutuʻuni mo e ngaahi lao ʻi ha faʻahinga founga pē—ko ha moʻoniʻi meʻa ʻa ia ʻoku ʻosi fakamoʻoniʻi ʻe he tokolahi taha ʻo e kakaí.

“Ko e Kavenga Aʻaku ʻOku Maʻamaʻa”

Ko e ngaahi lao fefonongaʻakí ʻoku kau nai ki ai ha lisi ʻo e ngaahi tuʻutuʻuni lōloa mo fakaikiiki—ʻi he ngaahi feituʻu ʻe niʻihi ʻoku fakaʻohovale ai ʻa e lahi ʻo e ngaahi tuʻutuʻuni ki he tauʻanga meʻalelé pē taha. ʻI hono kehé, ʻoku ʻikai ke fokotuʻu mai ʻe he Tohi Tapú ia ha lisi lōloa ʻo ha ngaahi tuʻutuʻuni. Kae kehe, ʻokú ne fokotuʻu mai ʻa e ngaahi tefitoʻi moʻoni tefito, pea ʻoku ʻikai ke fakakavenga eni pe fakafeʻātungia. Naʻe fakaaʻu ʻe Sīsū Kalaisi ha fakaafe fakamānako ki hono toʻutangatá: “Haʻu kiate au, ʻa kimoutolu kotoa pe ʻoku fakaongosia mo māfasia, pea te u fakamālōlō kimoutolu. He ko e ioke aʻaku ʻoku molū, pea ko e kavenga aʻaku ʻoku maʻamaʻa.” (Mātiu 11:​28, 30) ʻI haʻane faitohi ki he fakatahaʻanga Kalisitiane ʻi Kolinitoó, naʻe pehē ai ʻe he ʻapositolo ko Paulá: “ʻIlonga ha potu ʻoku ʻi ai ʻa e Laumalie ʻo e ʻEiki ʻoku ʻi ai ʻa e tauʻataina.”—2 Kolinito 3:17.

Kae kehe, ko e tauʻatāina ko iá, ʻoku fakangatangata. Naʻe fakahaaʻi mahino ʻe Sīsū ko e ngaahi fiemaʻu ʻa e ʻOtuá ʻoku kau ki ai ʻa e ngaahi fekau faingofua. Ko e fakatātaá, naʻe pehē ʻe Sīsū ki heʻene kau ākongá: “Ko eni ia ʻa e tuʻutuʻuni aʻaku, Ke mou feʻofaʻaki, ʻo hangē ko e ʻofa ne u fai kiate kimoutolu.” (Sione 15:12) Fakaʻuta atu ki he tuʻunga ne mei ʻi ai ʻa e moʻuí kapau naʻe ngāueʻaki ʻe he tokotaha kotoa ʻa e fekau ko iá! Ko ia ai, ko e tauʻatāina ʻoku maʻu ʻe he kau Kalisitiané ʻoku fakangatangata. Naʻe tohi ʻe he ʻapositolo ko Pitá: “Fai ʻo ngali ko ha kau tauʻataina, ʻo ʻikai hange ko ha kakai ʻoku ngaue ʻaki ʻa e tauʻataina ko e pulonga ʻo e lotokovi, kae ngali ko ha kau tamaioʻeiki ʻa e ʻOtua.”—1 Pita 2:16.

Ko ia ai, neongo ko e kau Kalisitiané ʻoku ʻikai haʻihaʻi kinautolu ʻe ha lisi ʻo ha ngaahi lao fakaikiiki, ʻoku ʻikai te nau ngāue ʻo fakatatau ki he fakakaukau pē ʻanautolu ki he meʻa ʻoku tonú mo ia ʻoku halá. ʻOku fiemaʻu ʻe he tangatá ʻa e tataki ʻa ia ko e ʻOtuá pē taha ʻoku lava ke ne ʻomai kia kinautolú. ʻOku fakahaaʻi mahino ʻe he Tohi Tapú: “ʻOku ʻikai ʻi he tangata ʻoku haʻele ke fakaʻuli ʻene ʻalu.” (Selemaia 10:23) Kapau ʻoku tau talangofua ki he fakahinohino ʻa e ʻOtuá, te tau maʻu ʻaonga lahi mei ai.—Sāme 19:11.

Ko e taha ʻo e ngaahi ʻaongá ko e fiefia. Ko e fakatātaá, ko e talavou naʻe lave ki ai ʻi he kamatá ko ha tokotaha kaihaʻa ia mo loi. Naʻá ne toe ʻi ha moʻui fakaʻaluʻalu. ʻI heʻene ako ʻa e ngaahi tuʻunga māʻolunga ʻa e Tohi Tapú, naʻe liliu ʻene founga moʻuí ke fakatatau ki ai. “Neongo naʻe ʻikai te u malava ke muimui fakaʻangataha ki he ngaahi tuʻunga kotoa ʻa e Tohi Tapú,” ko ʻene leá ia, “naʻá ku mahinoʻi ʻa  honau mahuʻingá. Ko ʻeku founga moʻui ki muʻá naʻe ʻikai ke maʻu ai ʻa e fiefia ʻoku ou maʻu he taimi ní. Ko e moʻui ʻo fakatatau ki he ngaahi tuʻunga ʻa e Tohi Tapú ʻokú ne ʻai ke faingofua ʻa hoʻo moʻuí. ʻOkú ke ʻiloʻi ʻa e feituʻu ʻokú ke huʻu ki aí pea mo e meʻa ʻoku tonú mo ia ʻoku halá.”

Kuo hokosia ʻe he kakai ʻe laui miliona ha meʻa meimei tatau. Ko e taha ʻo e ngaahi ʻaongá, ko e tataki ʻoku maʻu ʻi he Tohi Tapú kuo tokoniʻi ai kinautolu ke nau maʻu ʻa e ngaahi vā fakaetangata lelei ange, ke fakatupulekina ha vakai mafamafatatau ki he ngāué, ke fakaʻehiʻehi mei he ngaahi tōʻonga ʻoku fakatupu maumaú, pea ke moʻui fiefia ange. Ko Mākisí, a ko ha talavou ʻa ia kuó ne fakatou moʻui ʻo fakatatau mo ʻikai fakatatau ki he ngaahi tuʻunga Fakatohitapú, ʻokú ne pehē ʻo fekauʻaki mo ʻene moʻuí tonu: “ʻI he moʻui ʻo fakatatau ki he Tohi Tapú, kuó u malava ai ke fakaleleiʻi ʻa ʻeku tokaʻi-kitá.” b

Ko e Hā Hoʻo Filí?

Ko ia ai, ʻoku fakataputapui ʻa e Tohi Tapú? Ko e tali ki aí ko e ʻio—ki he lelei maʻatautolu hono kotoa. Ka ʻoku fuʻu fakataputapui ʻa e Tohi Tapú? Ko e talí ko e ʻikai. Ko e tauʻatāina taʻefakangatangatá ʻoku iku pē ia ki he ngaahi faingataʻa lahi. Ko e ngaahi tuʻunga ʻa e Tohi Tapú ʻoku mafamafatatau, pea ʻoku pouaki ai ʻetau leleí mo e fiefiá. ʻOku pehē ʻe Mākisi: “Kuo fakamoʻoniʻi ʻi he faai mai ʻa e taimí ʻa e fakapotopoto ʻo hono ngāueʻaki ʻa e Folofola ʻa e ʻOtuá ʻi he moʻuí. Neongo ʻoku kehe ʻa ʻeku moʻuí ʻi he ngaahi founga lahi mei he moʻui ʻa e tokolahi taha ʻo e kakaí, ʻoku ʻikai ʻaupito te u fakakaukau kuó u tō mei ha meʻa ʻe taha ʻoku ʻaonga ʻi he moʻuí.”

ʻI hoʻo kamata ke hokosia ʻa e ngaahi tāpuaki ʻo e moʻuiʻaki ʻa e ngaahi tuʻunga Fakatohitapú, ʻe fakalahi ai hoʻo houngaʻia ki he Folofola ʻa e ʻOtuá. ʻE taki atu eni ki ha toe tāpuaki lahi ange—te ke hoko ai ʻo ʻofa ʻi hono Matavaí, ʻa Sihova ko e ʻOtuá. “Ko eni ia ʻa e ʻofa ki he ʻOtua, ʻa ʻetau tauhi ki heʻene ngaahi tuʻutuʻuni. Pea ʻoku ʻikai ke fakamafasia ʻene ngaahi tuʻutuʻuni.”—1 Sione 5:​3, 4a.

Ko Sihová ko hotau Tokotaha-Fakatupú ia pea ko ʻetau Tamai fakahēvani. ʻOkú ne ʻafioʻi ʻa e meʻa ʻoku lelei taha kia kitautolú. ʻI he ʻikai te ne fakataputapui kitautolú, ʻokú ne ʻomai ʻa e fakahinohino anga-ʻofa ki heʻetau lelei. ʻI he lea fakaemāú ʻoku ekinaki mai ai ʻa Sihova kia kitautolu: “Taumaiā naʻa ke tokanga ki heʻeku ngaahi tuʻutuʻuni! pehe kuo hange ha vaitafe hoʻo fiemalie, pea ko hoʻo maʻoniʻo[n]i hange ko e ngaahi peau ʻo e tahi.”—Aisea 48:18.

[Fakamatala ʻi lalo]

[Fakatātā ʻi he peesi 9]

Naʻe pehē ʻe Sīsū ko e ngaahi fiemaʻu ʻa e ʻOtuá ʻe fakaivifoʻou

[Fakatātā ʻi he peesi 10]

Ko e talangofua ki he fakahinohino ʻa e ʻOtuá ʻoku ʻomai ai ʻa e fiefia mo e tokaʻi-kita