Fekumi ʻa e Tangatá ki he Moʻui Taʻengatá

TALU mei muʻa mo e fakaʻānaua ʻa e faʻahinga ʻo e tangatá ki he moʻui taʻengatá. Neongo ia, ko e fakaʻānaua ko iá ʻoku teʻeki ai pē hoko, he kuo teʻeki ai ke maʻu ʻe ha taha ha founga ke ikuʻiʻaki ʻa e maté. Kae kehe, ki muí ni mai, kuo fakafoʻou ai ʻe he fakatotolo fakafaitoʻó ʻa e ʻamanaki ko ia ʻe lava moʻoni nai ʻo fakalahi fakaofo ʻa e taimi moʻui ʻa e tangatá. Fakakaukau angé ki he meʻa ʻoku tulitāupau ki ai ʻa e ngaahi malaʻe kehekehe ʻo e fakatotolo fakasaienisí.

Kuo tesi ʻe he kau faipaiolosií ʻa e ʻenisaime ʻoku ui ko e telomaleisí ʻi he feinga ke fakalahi ʻa e taimi ʻoku toe fakafoʻou ai ʻe he ngaahi selá ʻa kinautolu peé. ʻOku ʻiloʻi ʻe he kau faisaienisí ʻoku toʻo atu ʻa e ngaahi sela motuʻa mo fakaʻau ke taʻeʻaongá pea fetongi ia ʻe he ngaahi sela foʻou. Ko hono moʻoní, ʻoku fakafoʻou tuʻo lahi ʻa e konga lahi ʻo e sinó ʻi he lolotonga ʻo e moʻui ʻa ha taha. ʻOku pehē ʻe he kau fakatotoló kapau ʻe lava ke fakalahi ʻa e founga fakafoʻou ko iá, “ko e sino fakaetangatá ʻe lava ke ne toe fakafoʻou ʻiate ia pē ʻi ha taimi lōloa ʻaupito pea aʻu ʻo taʻengata.”

Ko hono faʻu fakafaitoʻo ʻa e tatau ʻo e tangatá, ʻa ia ko ha malaʻe ʻo e fakatotoló ʻoku lahi ai ʻa e fekīhiakí, ʻoku taukaveʻi ai ʻe lava ke ne tokonaki maʻá e kau mahakí ʻa e ngaahi ʻate, kofuua pe mafu tatau tofu pē ke ngāueʻaki ʻi he tafa fetongí. Ko e ngaahi ʻōkani peheé ʻe faʻu fakatatau ia ʻo ngāueʻaki ʻa e ngaahi sela tefito ʻo e tokotaha mahakí tonu.

Ko e kau fakatotolo ki he fanga kiʻi meʻa mātuʻaki valevalé, ʻoku nau tomuʻa sio kinautolu ki ha taimi ʻa ia ʻe fakahū ai ʻe he kau toketaá ʻa e ngaahi lōpoti ʻoku lahi tatau mo e selá ki he halanga totó ke nau kumi ʻo fakaʻauha ʻa e ngaahi sela kanisaá pea mo e pekitīlia fakatupu maumaú. ʻOku tui ʻa e faʻahinga ko e malaʻe ko ʻeni ʻo e saienisí, fakataha mo e ngaahi faitoʻo fakakēnisí, ʻe faifai pē ʻo ne ʻai ʻa e sino ʻo e tangatá ke ne fakatolonga ʻa ia pē ʻo taʻengata.

Ko e faʻahinga ʻoku nau poupouʻi ʻa e tuku ʻaisí, ʻoku nau fakapoloka ʻa e ngaahi ʻangaʻangá. Ko e foʻi fakakaukaú ke fakatolonga kinautolu kae ʻoua leva ke ʻai ʻe he ngaahi fakalakalaka ʻo e ʻilo fakafaitoʻó ʻa e kau toketaá ke nau malava ʻo faitoʻo ʻa e ngaahi mahakí, fakafoki ʻa e ngaahi nunuʻa ʻo e taʻumotuʻá pea toe fakafoki fakatouʻosi ʻa e moʻuí mo e tuʻunga moʻui leleí ki he faʻahinga kuo maté. ʻOku ui ʻe he American Journal of Geriatric Psychiatry ʻa e foʻi fakakaukau ko ʻení ko ha “hoatatau fakaeonopooni ʻo e fakatolonga mate ʻa e kau ʻIsipite ʻi he kuonga muʻá.”

Ko e fekumi taʻetuku ʻa e tangatá ki he taʻefaʻamaté ʻoku hā ai ʻa e faingataʻa ko ia ke tali ʻa e tuʻunga moʻoni ʻo e maté. ʻOku malava moʻoni nai ke maʻu ʻe he faʻahinga ʻo e tangatá ʻa e moʻui taʻengatá? Ko e hā ʻoku leaʻaki ʻe he Tohi Tapú ʻo fekauʻaki mo e tuʻunga-leá ni? ʻOku ʻomai ʻe he kupu hono hokó ʻa e talí.