Fakamoʻoniʻi Hoʻo Tuí ʻAki Hoʻo Founga Moʻuí

“ʻA e tui, kapau ʻoku ʻikai ke ō mo e ngaue, ʻoku mate pe ia, heʻene tuʻu taha.”​—SEMISI 2:17.

 1. Ko e hā naʻe tokanga fakatouʻosi ai ʻa e muʻaki kau Kalisitiané ki he tuí mo e ngaahi ngāué?

 ʻI HE tuʻunga fakalūkufuá, naʻe fakamoʻoniʻi ʻe he muʻaki kau Kalisitiané ʻenau tuí ʻaki ʻa e founga naʻa nau moʻui aí. Naʻe naʻinaʻi ʻa e ākonga ko Sēmisí ki he kotoa ʻo e kau Kalisitiané: “Mou hoko ko e kau fai ki he folofola, ʻo ʻikai ko e kau fanongo pe.” Naʻá ne tānaki mai: “Hangeā ʻoku mate ʻa e sino ʻo ka mavahe mei he laumalie, pehe foki ʻoku mate ʻa e tui ʻo ka mavahe mo e ngaue.” (Semisi 1:22; 2:26) ʻI he taʻu nai ʻe 35 hili ʻene tohi iá, naʻe hokohoko atu ʻa e kau Kalisitiane tokolahi ke fakamoʻoniʻi ʻenau tuí ʻaki ʻa e ngaahi ngāue feʻungamālie mo ia. Ka ko e meʻa fakamamahí, naʻe ʻikai ke pehē ʻa e niʻihi. Naʻe fakaongoongoleleiʻi ʻe Sīsū ʻa e fakatahaʻanga ʻi Sīmaná; ka ki he tokolahi ʻi he fakatahaʻanga Sātisí, naʻá ne pehē: “ʻOku ou ʻilo pē hoʻo ngaahi ngāue, ʻio ʻoku ke hingoa ko e moʻui ka ʻoku ke mate pē.”—Fakahā 2:​8-11; 3:1.

 2. Ko e hā ʻoku totonu ke ʻeke hifo ʻe he kau Kalisitiané kiate kinautolu ʻo fekauʻaki mo ʻenau tuí?

² Ko ia ai, naʻe fakalototoʻaʻi ʻe Sīsū ʻa e faʻahinga ʻi Sātisí, pea toe pehē ki he faʻahinga kotoa te nau toki lau ʻamui ʻene ngaahi leá, ke nau fakamoʻoniʻi ʻenau ʻuluaki ʻofa ki he moʻoni faka-Kalisitiané pea ke nau ʻāʻā fakalaumālie. (Fakahā 3:​2, 3) ʻOku malava ʻe he tokotaha taki taha ʻo kitautolu ke ne ʻeke hifo kiate ia: ‘ʻOku fēfē ʻeku ngaahi ngāué? ʻOku fakahaaʻi mahino ʻe heʻeku ngaahi ngāué ʻoku ou fai ʻeku lelei tahá ke fakamoʻoniʻi ʻeku tuí ʻaki ʻa e meʻa kotoa ʻoku ou faí, naʻa mo e ʻi he ngaahi tafaʻaki ʻoku ʻikai ke fekauʻaki fakahangatonu mo e ngāue fakamalangá pe ngaahi fakataha ʻa e fakatahaʻangá?’ (Luke 16:10) ʻOku lahi ʻa e ngaahi tafaʻaki ʻo e moʻuí ʻoku lava ke fakakaukau atu ki ai, ka te tau tokanga ki ha tafaʻaki pē ʻe taha: ko e ngaahi fakatahataha fakasōsialé, ʻo kau ai ʻa e ngaahi fakatahataha ʻoku hoko ʻi he hili ʻa e ngaahi mali ʻa e Kalisitiané.

Ngaahi Fakatahataha Iiki

 3. Ko e hā ʻa e vakai Fakatohitapu fekauʻaki mo e kau ʻi ha ngaahi fakatahatahá?

³ Ko e tokolahi taha ʻo kitautolú ʻoku tau houngaʻia ʻi hano fakaafeʻi ki ha fakatahataha ʻa ha kau Kalisitiane fiefia. Ko Sihová ko ha “ʻOtua Mohu Monuʻia” pe fiefia, ʻokú ne fiemaʻu ʻene kau sevānití ke nau fiefia. (1 Timote 1:11) Naʻá ne ʻai ʻa Solomone ke ne fakakau ʻi he Tohi Tapú ʻa e moʻoniʻi meʻa ko ʻení: “Pea u fakahikihikiʻi ʻa e fiefia,  tokua ʻoku ʻikai ha lelei ki he tangata ʻi he lalo laʻa ka ke te kai mo inu mo fakafiefia; pea ke ō ai pe mo ia ʻi heʻene ngaue ʻi he ngaahi ʻaho o ʻene moʻui.” (Koheleti 3:​1, 4, 13; 8:15) ʻOku hoko nai ʻa e fiefia peheé ʻi ha kai ʻa ha fāmili pe ʻi ha kiʻi fakatahataha fakasōsiale ʻa e kau lotu moʻoní.—Siope 1:​4, 5, 18; Luke 10:​38-42; 14:​12-14.

 4. Ko e hā ʻoku totonu ke mahuʻinga ki ha taha ʻokú ne fokotuʻutuʻu ha fakatahataha?

⁴ Kapau ʻokú ke fokotuʻutuʻu ha fakatahataha pehē pea ʻoku fakafatongiaʻaki koe ia, ʻoku totonu ke ke fakakaukau fakalelei ki he meʻa ʻokú ke fokotuʻutuʻú, neongo kapau te ke fakaafeʻi ha kau tui tokosiʻi pē ki ha houa kai mo ha fetalanoaʻaki fakakaumeʻa. (Loma 12:13) ʻE fiemaʻu ke ke sio “ko e meʻa kotoa pe ke tāu,” ʻo tataki ʻe he “poto ʻoku mei ʻolunga.” (1 Kolinito 14:40; Semisi 3:17) Naʻe tohi ʻe he ʻapositolo ko Paulá: “Pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pe ke ongoongolelei ai ʻa e ʻOtua. Ke taʻemelengatāmaki hoʻomou toʻonga.” (1 Kolinito 10:​31, 32) Ko e hā ʻa e ngaahi tafaʻaki ʻe niʻihi ʻoku fiemaʻu ha tokanga makehe ki aí? Ko ha fakakaukau tokamuʻa ki he meʻa peheé ʻe tokoni ia ke fakapapauʻi ko e meʻa te ke fai mo hoʻo kau fakaafé ʻe hā mei ai ʻoku mou ngāue ki he meʻa ʻoku mou tui ki aí.—Loma 12:2.

Ko e Faʻahinga Fakatahataha Fēfē ʻE ʻI Aí?

 5. Ko e hā ʻoku totonu ai ke fakakaukau lelei ʻa e tokotaha-talitalí pe te ne tufa ha ngaahi inu ʻolokaholo mo tā ha ngaahi fasí?

⁵ Kuo fehangahangai ʻa e kau talitali tokolahi mo e ʻīsiu pe ʻe tufa ha ngaahi inu ʻolokaholo. ʻOku ʻikai fiemaʻu ha meʻa pehē ia ki hono ʻai ha fakatahataha ke fakafiefia. Manatuʻi naʻe tokonaki ʻe Sīsū ha meʻakai ki ha kulupu tokolahi naʻe haʻu kiate ia—naʻá ne ʻai ke lahi ʻaupito ʻa e maá mo e iká. ʻOku ʻikai ke pehē ʻe he fakamatalá ia naʻá ne tokonaki fakaemana mai ha uaine, neongo ʻoku tau ʻiloʻi naʻá ne malava ke fai pehē. (Mātiu 14:​14-21) Kapau ʻokú ke fili ke tufa ha ngaahi inu ʻolokaholo ʻi ha fakatahataha, ʻai ke fakafeʻunga pē hono lahí, pea fakapapauʻi ʻoku ʻi ai ha ngaahi inu kehe maʻá e faʻahinga ʻoku nau saiʻia ange aí. (1 Timote 3:​2, 3, 8; 5:23; 1 Pita 4:3) ʻOua ʻaupito ʻe ʻai ha taha ke ne ongoʻi ʻoku tenge ia ke ne inu ʻa e meʻa ʻe uʻu nai “hange ha ngata.” (Palovepi 23:​29-32) Fēfē ʻa e ngaahi fasí pe hivá? Kapau ʻe fakakau ha ngaahi fasi ʻi hoʻo fakatahatahá, ʻoku ʻikai ha veiveiua te ke filifili fakalelei ʻa e ngaahi hivá, ʻo fakakaukau fakatouʻosi ki he haʻuhaʻulú mo e ngaahi leá. (Kolose 3:8; Semisi 1:21) Kuo ʻilo ʻe he kau Kalisitiane tokolahi ko hono tā ʻa e Kingdom Melodies pe naʻa mo hono hivaʻi fakataha ʻa e ngaahi hiva peheé ʻoku tupu ai ha ʻatimosifia lelei. (Efeso 5:​19, 20) Pea ko hono moʻoní, ke vakaiʻi maʻu pē ʻa e leʻo-lahí koeʻuhi ke ʻoua naʻa hanga ʻe he ngaahi fasí ʻo taʻofi ʻa e fetalanoaʻaki leleí pe fakahohaʻasi ha taha ʻo e ngaahi kaungāʻapí.—Mātiu 7:12.

 6. ʻE malava fēfē ke fakahāhā ʻe ha tokotaha-talitali ʻoku moʻui ʻene tuí ʻi he fekauʻaki mo e fetalanoaʻakí pe ngaahi meʻa kehé?

⁶ ʻI ha fakatahataha fakasōsiale, ʻe talanoa nai ai ʻa e kau Kalisitiané ki ha ngaahi tuʻunga-lea kehekehe, lau leʻo-lahi ha meʻa, pe lave ki ha ngaahi hokosia mahuʻinga. Kapau ʻoku ʻalu kehe ʻa e fetalanoaʻakí, ʻe lava ʻe he tokotaha-talitalí ke ne toe tataki pōtoʻi ia. ʻOku totonu ke ne toe tokanga ke ʻoua naʻa ʻi ai ha taha te ne puleʻi ʻe ia ʻa e fetalanoaʻakí. Kapau ʻokú ne fakatokangaʻi ʻoku kamata ke  hoko ia, ʻe lava ke ne lea fakapotopoto atu pea fakakau mai ki ai mo e niʻihi kehé, ʻaki hono fakaafeʻi nai mo e kau taʻu iiki angé ke nau lea mai mo kinautolu pe ko ʻene kamataʻi ha tuʻunga-lea ʻe fai mai ai ha ngaahi fakamatala kehekehe. ʻE fakatou fiefia ʻa e kei siʻí mo e taʻumotuʻá ʻi he tafaʻaki ko ʻeni ʻo e fakatahatahá. ʻI he tuʻunga ko e tokotaha fokotuʻutuʻú, kapau ʻokú ke tataki fakapotopoto mo pōtoʻi ʻa e ngaahi meʻá, ʻe ‘ilo ai hoʻo ulugaaga leleí’ ʻe he faʻahinga ʻoku ʻi aí. (Filipai 4:​5, PM) Te nau ongoʻi ʻokú ke maʻu ha tui ʻoku moʻui, ko e tui ʻoku kaunga ki he ngaahi tafaʻaki kotoa pē ʻo hoʻo moʻuí.

Ngaahi Malí mo e Ngaahi Talitali ʻo e Malí

 7. Ko e hā ʻoku taau ai ke fakakaukau lahi ki he palani ʻo e ngaahi malí mo e ngaahi fakatahataha ʻoku fekauʻaki mo iá?

⁷ Ko e taha ha meʻa makehe ke fiefia aí ko ha mali Kalisitiane. Ko e kau sevāniti ʻa e ʻOtuá ʻi he kuonga muʻá, kau ai ʻa Sīsū mo ʻene kau ākongá, naʻa nau loto ke kau ʻi he ngaahi taimi fiefia peheé, ʻo kau ai ʻa e kātoanga kaí. (Senesi 29:​21, 22; Sione 2:​1, 2) Kae kehe, ʻi he ngaahi taimi ki mui ní, kuo fakahaaʻi mahino ʻe he meʻa kuo hokosiá ko e palani ko ia ki he ngaahi meʻa fakasōsiale ʻoku fekauʻaki mo e malí ʻoku fiemaʻu ki ai ʻa e feinga makehe kapau ko e taumuʻá ke tapua atu ai ʻa e fakakaukau leleí mo e mafamafatatau faka-Kalisitiané. Kae kehe, ko e ngaahi tafaʻaki anga-maheni ia ʻo e moʻuí ʻokú ne ʻoange ki ha Kalisitiane ha faingamālie ke ne fakahāhā ʻa ʻene tuí.

8, 9. ʻOku anga-fēfē hono fakapapauʻi mahino mai ʻe he ngaahi tōʻonga ʻi he ngaahi mali lahi ʻa e meʻa ʻoku tau lau ʻi he 1 Sione 2:​16, 17?

⁸ Ko e kakai tokolahi ko ia ʻoku ʻikai ke nau ʻilo pea ʻoku ʻikai ke nau tokanga fekauʻaki mo e ngaahi tefitoʻi moʻoni fakaʻotuá ʻoku nau vakai ki he malí ko ha taimi ia ki he ʻai ke tōtuʻá, pe ko e taimi ia ʻoku fakamolemoleʻi ai ʻa e ʻai ke tōtuʻá. ʻI ha makasini ʻIulope ʻe taha, naʻe leaʻaki ai ʻeni ʻe ha uaifi foʻou ʻo fekauʻaki mo ʻene mali “fakatuʻí”: ‘Naʻá ma heka ʻi ha saliote naʻe toho ʻe he hoosi ʻe fā pea muimui mai ai mo ha ngaahi saliote naʻe toho ʻe he fanga hoosi ʻe 12 pea mo ha saliote naʻe ʻi ai ha kau tāmeʻa naʻa nau tā ha ngaahi fasi. Hili iá naʻa mau maʻu ha meʻatokoni mo e inu vovo mo e ngaahi fasi mālie ʻaupito; naʻe lelei ʻaupito ia. Hangē tofu pē ko e meʻa naʻá ku loto ki aí, ko e kuini au ʻo e ʻahó.’

⁹ Neongo ʻoku kehe ʻa e ngaahi tōʻongá ʻi he fonua ki he fonua, ʻoku fakapapauʻi mahino mai ʻe he ngaahi fakakaukau ko iá ʻa e meʻa naʻe tohi ʻe he ʻapositolo ko Sioné: “Ko e meʻa katoa ʻoku ʻi mamani, ʻa e holi ʻo e kakano, mo e holi ʻo e mata, mo e ʻafungi ʻo e moʻui, ʻoku ʻikai mei he Tamai ia, ka ʻoku mei mamani.” ʻE lava ke ke sioloto atu ki ha ongo meʻa Kalisitiane matuʻotuʻa ʻokú na loto ke na maʻu ha mali “fakatuʻi” mo ha fuʻu talitali taha kehe atu? ʻI hono kehé, ʻoku totonu ke tapua mei heʻena ngaahi palani malí ko “ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.”—1 Sione 2:​16, 17.

10. (a) Ko e hā ʻoku mātuʻaki fiemaʻu ai ʻa e palaní ki ha mali ʻoku fakapotopotó? (e) ʻOku totonu ke fēfē ʻa e fili fekauʻaki mo e faʻahinga ke fakaafeʻí?

¹⁰ ʻOku fiemaʻu ki he ongo meʻa Kalisitiané ke na fakatou fakakaukau fakamātoato mo fakapotopoto, pea ʻoku malava ʻe he Tohi Tapú ke ne tokoniʻi kinaua. Neongo ʻoku mahuʻinga ʻa e ʻaho malí, ʻokú na ʻiloʻi ko e kamataʻanga pē ia ʻo e moʻui fakaemali ʻa ha ongo Kalisitiane ʻokú na ʻamanaki atu ki he moʻui taʻengatá. ʻOku ʻikai fiemaʻu ke na ʻai ha fuʻu kātoanga mali lahi. Kapau ʻokú na fili ke ʻi ai ha fakatahataha, ʻe fiemaʻu ke na fikaʻi ʻa e fakamole ʻo e fakatahatahá pea fakakaukau ki he faʻahinga fakatahataha ʻe faí. (Luke 14:28) ʻI heʻena fakataha ʻi he moʻui faka-Kalisitiané, ko e husepānití ʻe hoko ko e ʻulu Fakatohitapú. (1 Kolinito 11:3; Efeso 5:​22, 23) Ko ia ai, ko e tangata malí ʻoku ʻaʻana ʻa e fatongia tefito ki he talitali ʻo e malí. Ko hono moʻoní, te ne fetuʻutaki anga-ʻofa mo hono uaifi ʻi he kahaʻú ki he ngaahi meʻa peheé pe ko hai ʻokú na fiemaʻu pe ʻoku malava ke fakaafeʻi ki he kai ʻi he malí. Mahalo pē ʻe ʻikai malava pe ʻaonga ke fakaafeʻi kotoa hona ngaahi kaumeʻá mo e ngaahi kāingá; ko ia ai, kuo pau nai ke fai ha ngaahi fili fakapotopoto. ʻOku totonu ke falala pau ʻa e ongo meʻá kapau heʻikai malava ke na fakaafeʻi ha niʻihi ʻo e kaungā Kalisitiané, ʻe mahinoʻi pē ia ʻe he faʻahingá ni pea ʻe ʻikai hoko ai ha mamahi.​—Koheleti 7:9.

“ʻEiki ʻo e Kātoanga”

11. Ko e hā ʻa e ngafa ʻe lava ʻe he talēkita “ʻo e kātoanga” ʻo fakahoko ʻi ha mali?

¹¹ Kapau ʻoku fili ha ongo meʻa ke talitali ha fakatahataha ki hono kātoangaʻi ʻa e malí, ʻe lava fēfē ke na fakapapauʻi ʻe kei ʻi he tuʻunga ngeia pē ʻa e meʻa ko iá? ʻI he laui taʻu lahi, kuo ʻiloʻi ai ʻe he  Kau Fakamoʻoni ʻa Sihová ʻa e fakapotopoto ʻo hono fakakau ki ai ha tafaʻaki ʻo e meʻa ʻoku lave ki ai ʻi he fekauʻaki mo e fakatahataha naʻe ʻi ai ʻa Sīsū ʻi Kená. Naʻe ʻi ai ha talēkita pe “ʻEiki ʻo e kātoanga,” ko hono moʻoní ko ha kaungātui falalaʻanga. (Sione 2:​9, 10) ʻI he tuʻunga meimei tatau, ko ha tangata mali fakapotopoto te ne fili ha tokoua Kalisitiane matuʻotuʻa fakalaumālie ki he fatongia mahuʻinga ko ʻení. ʻI hono fakapapauʻi ʻa e ngaahi fakaʻamu mo e saiʻia ʻa e tangata malí, ʻe lava ke fakahoko kotoa ia ʻe he talēkita ʻo e kātoangá fakatouʻosi ki muʻa pea ʻi he lolotonga ʻo e fakatahatahá.

12. Ko e hā ʻoku totonu ke fakakaukau ki ai ʻa e tangata malí ʻi he fekauʻaki mo hono ngāueʻaki ʻa e ngaahi inu ʻolokaholó?

¹² ʻI he fehoanaki mo e meʻa naʻe lāulea ki ai ʻi he palakalafi 5, ʻoku fili ʻa e ngaahi hoa mali ia ʻe niʻihi ke taʻofi ʻa e ngaahi inu ʻolokaholó mei he kātoanga kai ʻo e malí koeʻuhi naʻa ngāuehalaʻaki ia ʻo maumauʻi ai ʻa e fiefia mo e lavameʻa ʻa e kātoangá. (Loma 13:13; 1 Kolinito 5:11) Kae kehe, kapau ʻokú na fakakau ʻa e ngaahi inu ʻolokaholó, ʻoku totonu ki he tangata malí ke ne fakapapauʻi ʻoku tufa pe ala maʻu fakafeʻunga pē ia. Naʻe ʻi ai ʻa e uaine ʻi he mali naʻe ʻi ai ʻa Sīsū ʻi Kená, pea naʻá ne tokonaki ai ha uaine lelei. Ko e meʻa ʻoku fakatupu tokangá, naʻe pehē ʻe he talēkita ʻo e kātoanga kai ko iá: “Ko e anga ʻo e tangata ke tomuʻa fokotuʻu ʻa e uaine lelei; pea ka konā ʻa e kakai, pea toki fokotuʻu ʻa e uaine ʻoku fakaʻangeʻange [pe ʻikai loko leleí]: ka ko koe kuo ke taʻofi ʻa e uaine lelei ki he taimi ni.” (Sione 2:10) Ko e moʻoni, naʻe ʻikai ke fakaʻaiʻai ʻe Sīsū ia ha konā, he naʻá ne vakai ki he meʻa ko iá ʻoku hala. (Luke 12:​45, 46) ʻI hono fakahaaʻi ʻa e ʻohovale ʻi he tuʻunga lelei ʻo e uainé, naʻe fakamahino ʻe he talēkitá naʻá ne fakatokangaʻi ha ngaahi taimi naʻe konā ai ʻa e kau fakaafe ki ha mali. (Ngāue 2:15; 1 Tesalonaika 5:7) Ko ia ai, ʻoku totonu fakatouʻosi ki he tangata malí pea mo e tokotaha Kalisitiane falalaʻanga ʻokú ne vaheʻi ko e talēkita ʻo e kātoangá ke na fakapapauʻi ʻoku muimui ʻa e faʻahinga kotoa ʻi aí ki he fakahinohino mahino: “ʻOua te mou konā ʻi he uaine, he ʻoku ʻi ai ha fakalusa ʻi he fai pehe.”—Efeso 5:18; Palovepi 20:1; Hosea 4:11.

13. Ko e hā ʻoku totonu ke fakakaukau ki ai ʻa e ongo meʻá kapau ʻokú na fokotuʻutuʻu ke ʻi ai ha ngaahi fasi ʻi ha kātoanga kai ʻo e malí, pea ko e hā hono ʻuhingá?

¹³ Hangē pē ko ia ʻoku hoko moʻoni ʻi he ngaahi fakatahataha kehé, kapau ʻe ʻi ai ha ngaahi fasi, ʻoku totonu ke fai ha tokanga totonu ki he leʻo-lahí koeʻuhi ke fai ha fanongo ki he fetalanoaʻakí. Naʻe pehē ʻe ha tokotaha mātuʻa Kalisitiane ʻe taha: “ʻI he faai atu ke poʻulí, ʻi he fakaʻau ke toe longomoʻui ange ʻa e fetalanoaʻakí pe kamata ʻa e tauʻolungá, ʻi he taimi ʻe niʻihi ʻoku faai hake ai mo e leʻo-lahi ia ʻo e ngaahi fasí. Ko e meʻa ko ia naʻe kamataʻaki ko e ngaahi fasi leʻo-siʻí ʻe lava nai ke hoko ia ʻo leʻo-lahi pea taʻofi ai ʻa e fetalanoaʻakí. ʻOku ʻomai ʻe he talitali ʻo ha mali ha faingamālie ki he feohi fiefia. He meʻa fakamamahi ē kapau ʻe hanga ʻe he ngaahi fasi leʻo-lahí ia ʻo maumauʻi ʻa e faingamālie ko ʻení!” Mo ʻeni foki, ʻoku fiemaʻu ki he tangata malí pea mo e talēkita ʻo e kātoangá ke na fatongiaʻaki, ʻo ʻoua ʻe tuku ki he kau tāmeʻá, tatau ai pē pe naʻe haea mai pe ʻikai, ʻa hono puleʻi ʻa e natula pea mo e leʻo-lahi ʻo e ngaahi fasí. Naʻe tohi ʻe Paula: “Neongo pe ko e ha ha meʻa te mou fai, ha lea pe ha ngaue, mou fai kotoa pe ʻi he huafa ʻo e ʻEiki ko Sisu.” (Kolose 3:17) ʻI he foki ʻa e kau fakaafé ki ʻapi ʻi he hili ʻo ha kātoanga kai pe talitali ʻo ha mali, te nau manatuʻi ʻa e ngaahi fasí naʻe tapua atu ai naʻe fai ʻe he ongo meʻá ʻa e meʻa kotoa pē ʻi he huafa ʻo Sīsuú? ʻOku totonu ke pehē.

14. Ko e hā ʻa e meʻa ʻoku totonu ke manatu fiefia ki ai ʻa e kau Kalisitiané ʻi he fekauʻaki mo ha mali?

¹⁴ ʻIo, ko ha mali fokotuʻutuʻu-lelei ʻoku malava ke manatu fiefia ki ai. Ko Adam mo Edyta, kuo ʻosi atu ʻa e taʻu ʻe 30 ʻena malí, naʻá na fakamatala ki ha mali ʻe taha: “Naʻe malava ke ke ongoʻi moʻoni ʻa e ʻatimosifia faka-Kalisitiané. Naʻe ʻi ai ʻa e ngaahi hiva fakahīkihikiʻi ʻo Sihová ka naʻe toe ʻi ai foki mo e ngaahi fakafiefia lelei kehe. Naʻe fika ua ʻa e mahuʻinga ia ʻo e tauʻolungá mo e ngaahi fasí. Naʻe fakafiefia mo fakatupu langa hake, pea naʻe fehoanaki ʻa e meʻa kotoa pē mo e ngaahi tefitoʻi moʻoni ʻi he Tohi Tapú.” ʻOku hā mahino, ʻoku lahi ʻa e ngaahi meʻa ʻoku malava ke fai ʻe he fefine malí mo e tangata malí ke fakahāhaaʻi ʻokú na fakamoʻoniʻi ʻena tuí ʻaki ʻena ngaahi ngāué.

 Ngaahi Meʻaʻofa ki he Malí

15. Ko e hā ʻa e akonaki Fakatohitapu ʻoku malava ke ngāueʻaki ʻi he fekauʻaki mo e ngaahi meʻaʻofa ki he malí?

¹⁵ ʻI he ngaahi fonua lahi ʻoku anga-maheniʻaki ki he ngaahi kaumeʻá mo e ngaahi kāingá ke foaki ha meʻaʻofa ki he ongo meʻa malí. Kapau ʻokú ke fili ke fai pehē, ko e hā nai ke ke fakakaukau ki aí? Sai, manatuʻi ʻa e fakamatala ʻa e ʻapositolo ko Sioné ʻo fekauʻaki mo e “ʻafungi ʻo e moʻui.” Naʻá ne fakafehokotaki ʻa e ʻafungi peheé, ʻo ʻikai ki he kau Kalisitiane ʻoku nau fakahāhā ʻenau tuí ʻi heʻenau ngaahi ngāué, ka ki he ‘mamani ʻoku fakaʻaʻau ke molé.’ (1 Sione 2:​16, 17) ʻI he vakai atu ki he fakamatala fakamānavaʻi ʻa Sioné, ʻoku totonu ki he ongo meʻa toki mali foʻoú ke na fakahaaʻi mai ʻa e ngaahi hingoa kotoa ʻo e kau foaki meʻaʻofá? Naʻe fai ʻe he kau Kalisitiane mei Masitōnia mo ʻĀkeiá ha ngaahi tokoni ki he fanga tokoua ʻi Selusalemá, ka ʻoku ʻikai ha fakamatala ia naʻe uingaki honau ngaahi hingoá. (Loma 15:26) Ko e kau Kalisitiane tokolahi ko ia ʻoku nau foaki ha meʻaʻofa ki he malí ʻoku nau saiʻia ange ke ʻoua ʻe tala hingoa naʻa tohoakiʻi mai ha tokanga taʻetotonu kiate kinautolu. ʻI he meʻá ni, manatuʻi ʻa e akonaki ʻa Sīsū ʻoku hā ʻi he Mātiu 6:​1-4.

16. ʻE lava fēfē ke fakaʻehiʻehi ha ongo meʻa toki mali foʻou mei hano uesia ʻa e ngaahi ongoʻi ʻa e niʻihi kehé ʻi he fekauʻaki mo e ngaahi meʻaʻofa ki he malí?

¹⁶ Ko hono fakahaaʻi ʻa e kau foaki ʻo e ngaahi meʻaʻofá ʻe lava ke iku atu ia ki he “fepolepolei” pe ko fē ʻa e meʻaʻofa ʻoku lelei angé pe totongi mamafa angé. Ko ia, ʻe fakaʻehiʻehi ha ongo meʻa Kalisitiane fakapotopoto toki mali foʻou mei hano uingaki fakahāhā ʻa e ngaahi hingoa ʻo e kau foaki meʻaʻofá. Ko hono uingaki ʻa e hingoa ʻo e kau foaki meʻaʻofá ʻe fakamaaʻi nai ai ʻa e niʻihi kehe ʻoku ʻikai malava ke nau foaki nai ha meʻaʻofá. (Kaletia 5:26; 6:10) Kae kehe, ʻoku ʻikai hala ia ke ʻilo ʻe he fefine malí mo e tangata malí ha taha naʻá ne foaki ange ha meʻaʻofa pau. ʻE lava nai ke na ʻilo ia mei ha kaati feʻungamālie ʻoku haʻu fakataha mo e meʻaʻofá ka heʻikai ke lau ia ki he kakaí. ʻI hono fakatau mai, mo hono foaki, pea mo hono tali ʻo e ngaahi meʻaʻofa ki he malí, ʻoku tau maʻu kotoa ai ha faingamālie ke fakamoʻoniʻi naʻa mo e meʻa fakafoʻituitui peheé, ʻoku kaunga ai ʻetau tuí ki heʻetau ngaahi ngāué. a

17. Ko e hā ʻa e taumuʻa ʻoku totonu ke maʻu ʻe he kau Kalisitiané ʻi he fekauʻaki mo ʻenau tuí mo e ngaahi ngāué?

¹⁷ Ko hono fakamoʻoniʻi ʻetau tuí ʻoku kau moʻoni ki ai ʻa e meʻa lahi ange ia ʻi he moʻui tāú, maʻu ʻa e ngaahi fakataha faka-Kalisitiané, pea mo e kau ki he ngāue fakamalangá. ʻOfa ke maʻu ʻe he tokotaha taki taha ʻo kitautolu ha tui ʻoku moʻui ʻa ia ʻoku kaunga ki he meʻa kotoa pē ʻoku tau faí. ʻIo, ʻe lava ke tau fakahāhaaʻi ʻetau tuí ʻaki ʻa e ngaahi ngāue “ʻoku kakato,” ʻo kau ai ʻa e ngaahi ngāue ʻi he ngaahi tafaʻaki ʻo e moʻuí ʻoku lave ki ai ʻi ʻolungá.—Fakahā 3:2.

18. ʻE lava fēfē ke fakamoʻoniʻi ʻa e moʻoni ʻo e ngaahi lea ʻi he Sione 13:17 ʻi he fekauʻaki mo e ngaahi mali mo e ngaahi fakatahataha ʻa e Kalisitiané?

¹⁸ ʻI he hili hono fokotuʻu ʻe Sīsū ha faʻifaʻitakiʻanga lelei ki heʻene kau ʻapositolo faitōnungá ʻaki ʻa e ngāue māʻulalo ko hono fufulu honau vaʻé, naʻá ne pehē: “Kapau ʻoku mou ʻilo ʻa e ngaahi meʻa ko ia, pea ko e toki kakai monuʻia kimoutolu, ʻo kapau te mou fai ia.” (Sione 13:​4-17) ʻI he feituʻu ko ia ʻoku tau nofo ai he ʻaho ní, ʻoku ʻikai nai fiemaʻu pe anga-maheniʻaki ai ke fufulu ʻa e vaʻe ʻo ha tokotaha kehe, hangē ko ha tokotaha ʻaʻahi mai ki hotau ʻapí. Kae kehe, hangē ko ia kuo tau lāulea mai ki ai ʻi he kupú ni, ʻoku ʻi ai ʻa e ngaahi tafaʻaki kehe ʻo e moʻuí ʻa ia ʻoku lava ke tau fakahāhā ai ʻetau tuí ʻaki ʻa e ngaahi ngāue anga-ʻofa mo fakaʻatuʻi, ʻo kau ai ʻa e ngaahi tafaʻaki ʻoku fekauʻaki mo e ngaahi fakatahataha fakasōsialé mo e ngaahi mali ʻa e Kalisitiané. ʻOku malava ke tau fakahāhā ia ʻo tatau ai pē pe ʻoku tau teu mali pe ko ha kau fakaafe kitautolu ki ha mali pe ki ha fakatahataha fiefia kehe ʻa ha kau Kalisitiane ʻa ia ʻoku nau loto ke fakahāhaaʻi ʻenau tuí ʻaki ʻenau ngaahi ngāué.

[Fakamatala ʻi lalo]

ʻE Anga-Fēfē Haʻo Tali?

ʻE lava fēfē ke ke fakamoʻoniʻi hoʻo tuí

• ʻi hono fokotuʻutuʻu ha fakatahataha fakasōsiale?

• ʻi hono fokotuʻutuʻu ha mali pe ko ha talitali?

• ʻi hono foaki pe tali ha ngaahi meʻaʻofa ki he malí?

[Fehuʻi ki he Ako]

[Fakatātā ʻi he peesi 24]

Naʻa mo e taimi ʻoku fakaafeʻi ai pē ha kakai tokosiʻí, ʻai ke tataki ʻe he “poto ʻoku mei ʻolunga”