Fakatupulekina ʻa e Fiefia mo e Ngeia ʻo Ho ʻAho Malí

“KO HOKU ʻaho malí ʻa e taha ʻo e ngaahi ʻaho mahuʻinga mo fakafiefia taha ʻo ʻeku moʻuí,” ko e lau ia ʻa Gordon, ʻa ia kuó ne mali he meimei taʻu ʻe 60. Ko e hā ʻokú ne ʻai ʻa e ʻaho malí ke mahuʻinga lahi pehē ki he kau Kalisitiane moʻoní? Ko ha ʻaho ia ʻoku nau fai ai ha fuakava toputapu ki he faʻahinga ʻoku nau ʻofa lahi aí—ʻa honau hoá pea mo Sihova ko e ʻOtuá. (Mātiu 22:37; Efeso 5:​22-29) ʻIo, ko ha faʻahinga ʻoku palani ke mali ʻoku nau fiemaʻu ke nau fiefia ʻi honau ʻaho malí, ka ʻoku nau toe fiemaʻu ke fakalāngilangiʻi ʻa e Tupuʻanga ʻo e malí.—Senesi 2:​18-24; Mātiu 19:​5, 6.

ʻE lava fēfē ke fakalahi ʻe ha tangata mali ʻa e ngeia ʻo e taimi fakafiefia ko ʻení? Ko e hā ʻe lava ke fai ʻe he fefine malí ke fakahāhā ʻa e fakaʻapaʻapa ki hono husepānití pea kia Sihova? ʻE lava fēfē ke tokoni ʻa e faʻahinga ko ia ʻoku nau ʻi aí ki he fiefia ʻo e ʻaho malí? Ko e fakakaukau atu ki ha ngaahi tefitoʻi moʻoni Fakatohitapu ʻe niʻihi ʻe lava ke tokoni ia ki hono tali ʻa e ngaahi fehuʻi ko iá, pea ko hono ngāueʻaki ʻa e ngaahi tefitoʻi moʻoni ko iá te ne fakasiʻisiʻi ʻa e malava ke hoko ha ngaahi palopalema te ne toʻo ʻa e mahuʻinga ʻo e meʻa makehe ko iá.

Ko Hai ʻOku Fatongiaʻakí?

ʻI he ngaahi fonua lahi, ʻoku fakahoko fakalao nai ai ʻe ha faifekau ʻo e Kau Fakamoʻoni ʻa Sihová ha ouau mali. Naʻa mo e ngaahi feituʻu ʻa ia kuo pau ke fakahoko ai ʻa e lākanga fakalaó ʻi ha ʻōfisi fakapuleʻanga, ʻe fiemaʻu nai ʻe ha ongo meʻa ke fai ha malanga makatuʻunga ʻi he Tohi Tapú. ʻI ha malanga pehē, ʻoku faʻa kole ai ki he tangata malí ke fakakaukauloto atu ki he ngafa ʻo e ʻulu ʻi he fāmilí kuo ʻomai ʻe he ʻOtuá. (1 Kolinito 11:3) Fakatatau ki ai, ʻoku maʻu ʻe he tangata malí ʻa e fatongia tefito ki he meʻa ʻoku hoko ʻi he malí. Ko hono moʻoní, ko e ngaahi fokotuʻutuʻu ki he ouau malí tonu pea mo ha fakatahataha pē ʻe hoko atu ai ʻoku faʻa fai tokamuʻa ia. Ko e hā nai ʻe faingataʻa ai ʻení?

Ko e ʻuhinga ʻe taha ʻoku feinga nai ʻa e ngaahi kāinga ia mei he ongo tafaʻakí ke tākiekina mālohi ʻa e ngaahi palani ʻo e malí. ʻOku pehē ʻe Rodolfo, ʻa ia kuó ne fakahoko ha ngaahi mali lahi: “ʻI he taimi ʻe niʻihi, kuo fuesia ʻe he tangata malí ia ha tenge lahi fakaʻulia mei he ngaahi kāingá, tautefito kapau ʻoku nau tokoni ki hono totongi ʻo e talitali ʻi he malí. ʻOku nau maʻu nai ha ngaahi fakakaukau mālohi ki he meʻa ʻoku totonu ke fai ʻi he lolotonga ʻo e ouau malí pea mo e talitalí. ʻOku lava ʻe he meʻá ni ke ne fakavaivaiʻi ʻa e ngafa Fakatohitapu ʻo e tangata malí ʻi hono tuʻunga ko e tokotaha ia ʻoku fatongiaʻaki ʻa e meʻa ko iá.”

ʻOku pehē ʻe Max, ʻa ia kuó ne fakahoko ha ngaahi ouau mali ʻo laka hake ʻi he taʻu ʻe 35: “Kuó u fakatokangaʻi ʻa e hehema ki he fefine malí ke ne takimuʻa ʻi he fili ʻo e meʻa ke fakahoko ʻi he malí mo e talitalí, kae ʻikai loko lea ʻa e tangata malí ia.” Ko e fakamatala ʻeni ia ʻa David, ʻa ia kuó ne fakahoko ha ngaahi mali lahi: “ʻOku ʻikai nai ke faʻa takimuʻa ʻa e kau tangata malí ia pea ʻoku anga-maheniʻaki ʻa e ʻikai ke nau kau feʻunga ʻi he ngaahi teuteu ki he malí.” ʻE lava fēfē ke fua ola lelei ʻe he tangata malí ʻa hono fatongiá?

Fakatupulekina ʻe he Fetuʻutakí ʻa e Fiefiá

Ke fakahoko lavameʻa ʻe he tangata malí hono fatongia ki he ngaahi teuteu ki he malí, kuo pau ke ne fai ha fetuʻutaki lelei. ʻOku tala hangatonu mai ʻe he Tohi Tapú: “ʻOku maumau fakakaukau ʻa e ʻikai fai ha alea.” (Palovepi 15:22) Kae kehe, ʻoku malava ke kalofi ha maumau fakakaukau lahi kapau ʻe ʻuluaki fetalanoaʻaki ʻa e tangata malí mo e fefine malí ki he ngaahi teuteu ki he malí, ʻo kau atu ki ai mo e ngaahi mēmipa ʻo e fāmilí, mo ha niʻihi kehe ʻoku malava ke nau ʻoatu ha faleʻi lelei ʻoku makatuʻunga ʻi he Tohi Tapú.

 ʻIo, ʻoku mātuʻaki mahuʻinga ki ha ongo meʻa kuó na fakamaʻu ke na ʻuluaki talanoa ki he ngaahi palaní mo e ngaahi meʻa ʻe malava ke hokó. Ko e hā hono ʻuhingá? Sai, fanongo ki he ngaahi fakamatala meia Ivan mo hono uaifí, ko Delwyn, ʻa ia kuó na nofo mali fiefia he laui taʻu lahi ka naʻá na haʻu mei he ongo ʻātakai fakafonua kehekehe. ʻI he manatu ki heʻena ngaahi palani ki he malí, ʻoku pehē ʻe Ivan: “Naʻá ku maʻu ha ngaahi fakakaukau papau fekauʻaki mo e meʻa naʻá ku fiemaʻu ki heʻeku malí, ʻo kau ai ha talitali pea ke ʻi ai kotoa hoku ngaahi kaumeʻá, ko ha keke mali, pea ke tui ʻe hoku hoá ha kofu mali hinehina. ʻI he tafaʻaki ʻe tahá, naʻe fiemaʻu ʻe Delwyn ia ha mali siʻisiʻi mo maʻamaʻa pea ʻoua ʻe ʻi ai ha keke mali. Naʻá ne fakakaukau ke tui ha kofu anga-maheni pē kae ʻikai ko ha kofu mali.”

Naʻe anga-fēfē hono fakaleleiʻi ʻe he ongo meʻá ni ʻa e ngaahi faikehekehé ni? ʻAki ʻa e fetuʻutaki anga-ʻofa mo faitotonu. (Palovepi 12:​18) ʻOku tānaki mai ʻe Ivan: “Naʻá ma ako ʻa e ngaahi kupu makatuʻunga ʻi he Tohi Tapú ʻi he tuʻunga-lea ki he malí, hangē ko e ngaahi kupu ʻoku pulusi ʻi he Watchtower ʻo ʻEpeleli 15, 1984. a Naʻe tokoniʻi kimaua ʻe he fakamatalá ni ke ma maʻu ha vakai fakalaumālie ki he malí. ʻI he vakai atu ki homa ongo ʻātakai kehekehé, naʻe pau ke ma fakangaloku ʻi he ngaahi tafaʻaki ʻo e fili fakafoʻituituí. Naʻá ma fakatou feʻunuʻaki ʻema fakakaukaú.”

Naʻe muimui ʻa Aret mo Penny ʻi ha ʻalunga meimei tatau. ʻI he fekauʻaki mo hona ʻaho malí, ʻoku pehē ʻe Aret: “Ko au mo Penny naʻá ma lāulea ki heʻema ngaahi fiemaʻu kehekehe ki he malí, pea naʻá ma malava ai ke aʻu ki ha loto-tatau feongoongoi. Naʻá ma lotu ʻo kole ʻa e tāpuaki ʻa Sihová ki he ʻaho ko iá. Naʻá ku toe kumi faleʻi ki heʻema ongo mātuʻá mo e niʻihi ʻo e ngaahi hoa mali matuʻotuʻa ʻi he fakatahaʻangá. Naʻe ʻaonga ʻaupito ʻenau ngaahi fokotuʻú. ʻI he ʻosi angé, naʻe fakaʻofoʻofa ʻema malí.”

Ko Hono Tauhi Maʻu ʻa e Ngeiá ʻi he Valá mo e Teuteú

Ko e meʻa mahino ia ʻoku fiemaʻu fakatouʻosi ʻe he fefine malí mo e tangata malí ke na vala lelei ki heʻena malí. (Sāme 45:​8-15) ʻOkú na fakamoleki nai ʻa e taimi, ivi, mo e paʻanga ki ha vala ʻoku feʻungamālié. Ko e hā ʻa e ngaahi tefitoʻi moʻoni Fakatohitapu ʻe lava ke ne tokoniʻi kinaua ke fili ʻa e meʻa ʻoku fakatou taau mo fakaʻofoʻofá?

Fakakaukau atu ki he meʻa ʻe tui ʻe he fefine malí ki he foʻi taimi ko iá. Neongo ʻoku kehekehe ʻa e ngaahi manakó mei he tokotaha ki he tokotaha pea mei he fonua ki he fonua, ʻoku ala ngāueʻaki ʻa e akonaki ʻa e Tohi Tapú ia ʻi ha feituʻu pē. Ko e kakai fefiné ke nau “teuʻaki kinautolu ʻa e kofu ʻoku ngali ke ʻai, pea ō mo e angamā mo e angafakamaʻumaʻu.” ʻOku ngāueʻaki ia ki he kakai fefine Kalisitiané ʻi he taimi kotoa pē, pea ʻoku kau moʻoni ki ai mo e ʻaho malí. Ko hono moʻoní, ʻoku ʻikai fiemaʻu ha  “kofu mahuʻinga” ia ki ha mali fiefia. (1 Timote 2:9; 1 Pita 3:​3, 4) He fakafiemālie ē ko e taimi ʻoku ngāueʻaki ai ʻa e faleʻi ko ʻení!

Ko David, naʻe lave ki ai ki muʻá, ʻokú ne pehē: “ʻOku feinga ʻa e ngaahi hoa lahi taha ke muimui ʻi he ngaahi tefitoʻi moʻoni ʻa e Tohi Tapú, pea ʻoku taau ke fakaongoongoleleiʻi kinautolu. Kae kehe, kuo ʻi ai ʻa e ngaahi tuʻunga ʻe niʻihi, naʻe ʻikai ke fakanānā ai ʻa e ngaahi kofu ʻo e kau fefine malí mo e kau toʻo kofú, naʻe fuʻu ava ʻa e fatafatá pe fuʻu aata.” ʻI he fakataha ki muʻa ʻa ha tokotaha mātuʻa Kalisitiane matuʻotuʻa mo e fefine malí pea mo e tangata malí, ʻokú ne tokoniʻi ai kinaua ke na tauhi maʻu ha vakai fakalaumālie. Anga-fēfē? ʻAki hono ʻeke ange kiate kinaua pe ko e teunga ʻokú na fakakaukau atu ki aí ʻe fakanānā feʻunga ke tui ki ha fakataha faka-Kalisitiane. Ko e moʻoni, ko e sitaila ʻo e valá ʻe kehe nai ia mei he teunga ki he fakataha tuʻumaʻú pea ko e meʻa ko ia ʻoku tui ki he malí ʻoku tapua atu nai ai ʻa e anga fakafonua fakalotofonuá, ka ko e tuʻunga ʻo e anga-fakanānaá ʻoku totonu ke fehoanaki ia mo e ngaahi tuʻunga fakangeingeia faka-Kalisitiané. Neongo kapau ʻoku vakai nai ha niʻihi ia ki he tuʻutuʻuni fakaeʻulungāanga ʻa e Tohi Tapú ʻo pehē ʻoku fuʻu fakangatangata, ʻoku loto-fiemālie ʻa e kau Kalisitiane moʻoní ke talitekeʻi ʻa e ngaahi feinga ʻa e māmaní ke fakafuo kinautolú.—Loma 12:2; 1 Pita 4:4.

ʻOku pehē ʻe Penny: “ʻI he ʻikai ke vakai ki he teungá pe talitalí ko e meʻa mahuʻinga tahá ia, naʻá ku tokangataha au mo Aret ki he ouaú, ʻa e tafaʻaki fakalaumālie ʻo e malí. Ko e konga mahuʻinga taha ia ʻo e ʻaho ko iá. Ko e ngaahi meʻa makehe ʻoku ou manatuʻí, ʻoku ʻikai ko e meʻa naʻá ku tuí pe kaí, ka ko e faʻahinga naʻá ku feohi mo iá pea mo e fiefia naʻá ku ongoʻi ʻi he mali mo e tangata ʻoku ou ʻofa aí.” ʻOku lelei ki ha ongo meʻa Kalisitiane ke na tauhi maʻu ʻa e fakakaukau peheé ʻi heʻena palani ki heʻena malí.

Ko e Fale Fakatahaʻangá ​—Ko ha Feituʻu Ngeia

ʻOku loto ʻa e ngaahi hoa Kalisitiane tokolahi ke fai ʻenau ouau malí ʻi ha Fale Fakatahaʻanga kapau ʻoku faingamālie. Ko e hā ʻoku nau saiʻia ange ai ʻi he meʻá ni? Naʻe fakamatala ha ongo meʻa ki heʻena ʻuhingá: “Naʻá ma ʻiloʻi ko e malí ko e fokotuʻutuʻu toputapu ia ʻa Sihova. Ko e mali ʻi he Fale Fakatahaʻangá, ʻa hotau feituʻu faiʻanga lotú, naʻe tokoni ia ke maongo kiate kimaua mei he kamataʻangá pē ʻa hono fiemaʻu ke hoko ʻa Sihova ko e konga ʻo ʻema nofo malí. Ko e toe ʻaonga ʻe taha ʻo hono fai ʻo e ouau malí ʻi he Fale Fakatahaʻangá kae ʻikai ʻi ha feituʻu kehé, he naʻe fakahāhaaʻi ai ki homa ngaahi kāinga taʻetui naʻe ʻi he malí ʻa hono mahuʻinga kiate kitautolu ʻa e lotu kia Sihová.”

Kapau ʻoku fakangofua mai ʻe he kau mātuʻa ʻo e fakatahaʻangá ʻoku nau tokangaʻi ʻa e Fale Fakatahaʻangá ke fai ai ʻa e malí, ʻoku totonu ke fakahaaʻi tokamuʻa ʻe he ongo meʻá kia kinautolu ʻa e ngaahi teuteu ʻoku fai ki ai ʻa e fakakaukaú. Ko e founga ʻe taha ʻe lava ke fakahāhā ai ʻe he fefine malí mo e tangata malí ʻa e fakaʻapaʻapa totonu ki he faʻahinga ko ia ʻoku fakaafeʻi ki he malí ko ʻena fakapapauʻi mālohi ke na aʻu mai ʻi he taimi kuo fakataimitēpileʻi ki he malí. Pea ko hono moʻoní ʻe fiemaʻu ke na fakapapauʻi ko e meʻa kotoa pē ke fai ʻi ha founga fakangeingeia. b (1 Kolinito 14:40) Te na fakaʻehiʻehi ai mei he ngaahi tōʻonga taʻefeʻunga ʻoku hoko ʻi he ngaahi mali lahi ʻa e māmaní.—1 Sione 2:​15, 16.

ʻOku malava foki ke fakahāhā ʻe he faʻahinga ʻoku haʻu ki he malí ʻoku nau maʻu ʻa e vakai ʻa Sihova ki he malí. Ko e fakatātaá, ʻe ʻikai te nau ʻamanekina ʻa e mali ko iá ke ne lakasi ʻe ia ʻa e ngaahi mali kehe ʻa e Kalisitiané, ʻo hangē ia kuo ʻi ai ha feʻauʻauhi pe ko e mali ʻa hai naʻe mahulu angé. ʻOku toe fakatokangaʻi ʻe he kau Kalisitiane matuʻotuʻá ko e haʻu ki he Fale Fakatahaʻangá ki he malanga makatuʻunga ʻi he Tohi Tapú ʻoku mahuʻinga ange mo ʻaonga ange ia ʻi heʻete ʻi ha kātoanga kai ʻo ha mali pe ʻi ha fakatahataha ʻoku hoko mai nai aí. Kapau ʻe fakaʻatā ʻe he taimí pe ngaahi tuʻungá ha Kalisitiane ke ne ʻi ha taha pē ʻo e ongo meʻa ko iá, ko hono moʻoní ʻe lelei ange ke te ʻi he Fale Fakatahaʻangá. ʻOku pehē ʻe ha tokotaha mātuʻa ko William: “Kapau ʻe liʻaki noaʻia ʻe he kau fakaafé ʻa e haʻu ki he Fale Fakatahaʻangá kae maʻu ʻa e talitali ia ki mui aí, ʻoku fakahaaʻi ʻe he meʻá ni ʻa e ʻikai ke mahinoʻi ʻa e toputapu ʻo e meʻa ʻoku faí. Neongo kapau ʻoku  ʻikai ke fakaafeʻi kitautolu ki he talitalí, ʻoku malava ke tau fakahāhā ʻetau poupou ki he fefine malí mo e tangata malí mo ʻoatu ha fakamoʻoni lelei ʻaupito ki he ngaahi kāinga taʻetui ʻi he malí ʻaki ʻetau maʻu ʻa e ouau ʻi he Fale Fakatahaʻangá.”

Fiefia ʻOku Tolonga ʻo Mahulu Atu ʻi he ʻAho Malí

Kuo liliu ʻe he māmani fakakomēsialé ʻa e ouau malí ki ha fuʻu pisinisi lahi faufaua. Fakatatau ki ha līpooti ʻe taha ki muí ni mai, ko e mali anga-maheni ʻi he ʻIunaite Seteté “ʻoku fakamole ai ʻa e $22,000, pe vaeua ʻo e ʻavalisi ʻo e paʻanga hū mai [fakataʻu] ʻa ha fāmili ʻAmelika.” ʻI hono tākiekina ʻe he fakamatala fakangalilelei fakakomēsialé, ʻoku fakatupunga ai ʻe he ngaahi hoa mali foʻou tokolahi pe ko honau ngaahi fāmilí ki he foʻi ʻaho pē ʻe taha ko iá ha fuʻu moʻua fakamafasia ʻa ia te nau fua he laui taʻu. Ko ha founga fakapotopoto ha ʻalunga pehē ke kamataʻaki ʻete nofo malí? Ko e faʻahinga ko ia ʻoku ʻikai te nau ʻilo pe ʻoku ʻikai te nau tokanga ki he ngaahi tefitoʻi moʻoni ʻa e Tohi Tapú te nau fili nai ki ha meʻa fakavalevale pehē, ka he kehekehe lahi ē ʻi he lotolotonga ʻo e kau Kalisitiane moʻoní!

ʻI hono fakangatangata ʻa e lahi ʻo ʻenau malí ki he meʻa ʻoku fakapotopoto mo ala fuá, pea ʻi he tokangataha ki he tafaʻaki fakalaumālie ʻo e meʻa ʻoku hokó, kuo malava ai ʻe he ngaahi hoa Kalisitiane tokolahi ke ngāueʻaki honau taimí mo e koloá ʻo fehoanaki mo ʻenau fakatapui ki he ʻOtuá. (Mātiu 6:33) Fakakaukau atu ki he faʻifaʻitakiʻanga ʻa Lloyd mo Alexandra, kuó na hokohoko atu ʻi he ngāue fakafaifekau taimi-kakató ʻi he taʻu ʻe 17 talu mei heʻena malí. ʻOku fakamatala ʻa Lloyd: “Naʻe vakai mai nai ʻa e niʻihi ki heʻema malí ko ha kiʻi meʻa maʻamaʻa pē ia, ka naʻá ku fiefia lahi ʻaupito au mo Alexandra. Naʻá ma ongoʻi ko homa ʻaho malí naʻe totonu ke ʻoua ʻe hoko ko ha kavenga fakapaʻanga ke ikuʻi, ka ko ha kātoanga ʻo e fokotuʻutuʻu ʻa Sihova ke fakahoko mai ai ʻa e fiefia lahi ki he toko ua.”

ʻOku tānaki mai ʻe Alexandra: “Naʻá ku ngāue fakafaifekau tāimuʻa au ki muʻa peá ma malí, pea naʻe ʻikai te u fiemaʻu ke liʻaki ʻa e monū ko iá koeʻuhi pē ke ʻai ha fuʻu mali fakamole lahi. Naʻe makehe ʻaupito homa ʻaho malí. Kae kehe, ko e kamataʻanga pē ia ʻo e toenga ʻo ʻema moʻui fakatahá. Naʻá ma ngāueʻaki ʻa e faleʻi ke fakaʻehiʻehi mei he tokanga tōtuʻa ki he ouau ʻo e teu malí pea kumi ki he tataki ʻa Sihová ʻi heʻema moʻui ko e ongo meʻa malí. Kuo ʻomai moʻoni ʻe he meʻá ni kiate kimaua ʻa e tāpuaki ʻa Sihová.” c

ʻIo, ko ho ʻaho malí ko ha taimi makehe ia. Ko e ngaahi tōʻonga mo e ngaahi ngāue ʻoku hā ʻi he ʻaho ko iá ʻoku malava ke ne fokotuʻu ha sīpinga ki hoʻo moʻui nofo mali ʻi he laui taʻu ʻoku hanga maí. Ko ia ai, falala kia Sihova ki ha tataki. (Palovepi 3:​5, 6) ʻAi maʻu pē ʻa e mahuʻinga fakalaumālie ʻo e ʻaho ko iá ko e meʻa māʻolunga taha ia ʻoku ʻi he fakakaukaú. Fepoupouaki ʻi homo ngaahi ngafa kuo vaheʻi mai ʻe he ʻOtuá. ʻE lava ke mo fakatoka ai ha makatuʻunga fefeka ki hoʻomo nofo malí, pea ʻi he tāpuaki ʻa Sihová, te mo maʻu ai ʻa e fiefia ʻoku tolonga ia ʻo mahulu atu ʻi homo ʻaho malí.—Palovepi 18:22.

[Fakamatala ʻi lalo]

[Fakatātā ʻi he peesi 29]

ʻOku totonu ki ha ongo meʻa ke na fetuʻutaki tauʻatāina kae anga-fakaʻapaʻapa lolotonga ʻena palani ki heʻena malí

[Fakatātā ʻi he peesi 31]

ʻAi maʻu pē ʻa e mahuʻinga fakalaumālie ʻo homo ʻaho malí ko e meʻa māʻolunga taha ia ʻoku ʻi he fakakaukaú