Naʻe Lala Ai Pē ʻa Siuta?

NAʻE tomuʻa tala ʻe he Tohi Tapú ʻe fakaʻauha ʻa e fonua ʻo e puleʻanga Siutá ʻe he kau Pāpiloné pea ʻe lala ai pē kae ʻoua kuo foki ʻa e kau Siu naʻe fakahēʻí. (Selemaia 25:​8-11) Ko e ʻuhinga mālohi taha ke tui ai naʻe fakahoko ʻa e kikite ko ení ko e fakamatala fakahisitōlia fakamānavaʻi ko ia naʻe hiki ʻi he taʻu nai ʻe 75 hili ʻa e foki ʻa e ʻuluaki kulupu ne fakahēʻí ki honau fonua tupuʻangá. ʻOku fakahaaʻi ai ko e tuʻi Pāpiloné ‘naʻá ne taki popula kinautolu kuo hao mei he heletaá ki Papilone, pea nau nofo hopoate kiate ia mo ʻene fanaú, kaeʻoua ke hau ʻa Pesia.’ Pea ʻi he fekauʻaki mo e fonuá, ʻoku līpooti mai: “Lolotonga ʻene lala naʻa ne maʻu [pe tauhi] sapate.” (2 Kalonikali 36:​20, 21) ʻOku ʻi ai nai ha fakamoʻoni ʻi he keli fakatotoló ke poupouʻiʻaki ʻeni?

ʻI he pepa ko e Biblical Archaeology Review, ʻoku fakahaaʻi mai ai ʻe Ephraim Stern ko e palōfesa ʻo e keli fakatotolo ʻa Pālesitainé ʻi he ʻUnivēsiti Hepeluú: “Ko e kau ʻAsīliá mo e kau Pāpiloné fakatouʻosi naʻa nau fakaʻauha ʻa e ngaahi konga lahi ʻo ʻIsileli he kuonga muʻá, ka neongo ia ko e fakamoʻoni ʻi he keli fakatotoló mei he ikuʻanga ʻo ʻena taki taha ikuná ʻoku fakahaaʻi mai ai ha ongo talanoa kehekehe ʻaupito.” ʻOkú ne fakamatala: “Lolotonga naʻe ʻi ai ha toetoenga ʻi he keli fakatotoló ko e fakamoʻoni ia naʻe ʻi Pālesitaine ʻa e kau ʻAsīliá, ʻoku faikehe ʻa e ʻikai ha fakamoʻoni ia ʻi he hili ʻa hono fakaʻauha ʻo Pāpiloné. . . . ʻOku ʻikai te mau maʻu ha fakamoʻoni pe naʻe nofoʻi ia ka ʻi he toki aʻu pē ki he vahaʻa taimi ʻo Pēsiá . . . ʻOku ʻikai ʻaupito pē ke ʻi ai ha fakamoʻoni ia ʻe fakahaaʻi mai ai naʻe nofoʻi. ʻI he kotoa ʻo e taimi ko iá, naʻe ʻikai toe nofoʻi ha taha pē ʻi he ngaahi kolo ko ia naʻe fakaʻauha ʻe he kau Pāpiloné.”

ʻOku loto-tatau ki ai ʻa Palōfesa Lawrence E. Stager ʻo e ʻUnivēsiti Harvard. “ʻI Filisitia kotoa, pea ki mui ai ʻi Siuta kotoa,” ko e tuʻi Pāpiloné mo ʻene “palani fakalala fonuá ne fakatupunga ai ke ʻi ai ha konga fonua maumau ʻaupito ʻi he fakahihifo ʻo e Vaitafe Sioataní,” ko ʻene laú ia. ʻOku tānaki mai ʻe Stager: “ʻI he toki aʻu ki he taimi ʻo e pule ʻa Kōlesi ko e Lahí, ʻa e tokotaha Pēsia naʻá ne fetongi ʻa e kau pule Pāpiloné, naʻe toe kamata ai ʻa e lēkooti keli fakatotoló . . . ʻi Selusalema pea ʻi Siuta, ʻa ia naʻe toe foki ki ai ʻa e kau Siu fakaheeʻi tokolahi ki honau fonua tupuʻangá.”

ʻIo, ko e folofola ʻa Sihova fekauʻaki mo hono fakalala ʻo Siutá naʻe fakahoko ia. Ko e meʻa ʻoku tomuʻa folofolaʻaki ʻe Sihová ʻoku hoko maʻu pē ia. (Aisea 55:​10, 11) ʻE lava ke tau falala kakato kia Sihova pea ki heʻene ngaahi talaʻofa ʻoku lēkooti ʻi heʻene Folofolá, ʻa e Tohi Tapú.—2 Timote 3:16.