ʻOfa ki he ʻOtua ʻOku ʻOfa ʻIate Koé
ʻOfa ki he ʻOtua ʻOku ʻOfa ʻIate Koé
“Te ke ʻofa ki he ʻEiki ko ho ʻOtua, ʻo fai ʻaki ʻa e kotoa ʻo ho loto, mo e kotoa ʻo ho laumalie, mo e kotoa ʻo ho ʻatamai.”—MĀTIU 22:37.
1, 2. Ko e hā nai naʻá ne langaʻi ʻa e fehuʻi ʻo fekauʻaki mo e tuʻutuʻuni mamafa tahá?
KO E foʻi fehuʻí ni ʻoku hā mahino naʻe fakakikihiʻi lahi ia ʻi he lotolotonga ʻo e kau Fālesi ʻi he ʻaho ʻo Sīsuú. Ko fē naʻe mahuʻinga taha ʻi he ngaahi lao laka hake he 600 naʻe faʻuʻaki ʻa e Lao ʻa Mōsesé? Ko ha lao ia naʻe fekauʻaki mo e feilaulaú? He ko ē, naʻe fai ʻa e ngaahi feilaulaú ke fakatou maʻu ai ʻa e fakamolemole ʻo e angahalá pea ke fai ai ʻa e fakamālō ki he ʻOtuá. Pe ko e lao māʻolunga tahá nai ʻa e lao ki he kamú? Naʻe mahuʻinga mo ia foki, koeʻuhi ko e kamú ko ha fakaʻilonga ia ʻo e fuakava naʻe fai ʻe Sihova mo ʻĒpalahamé.—Senesi 17:9-13.
2 ʻI he tafaʻaki ʻe tahá, ko e kau piki ki he tukufakaholó ʻoku hā mahino naʻa nau fakaʻuhinga ʻo pehē koeʻuhi ko e lao kotoa pē naʻe ʻomai ʻe he ʻOtuá naʻe mahuʻinga—neongo ne hā ngali mahuʻinga siʻi ange ʻa e niʻihi—ʻe hala ke fakamāʻolungaʻi ha fekau pē ʻi he ngaahi fekau kehé. Naʻe fili ʻa e kau Fālesí ke fehuʻi kia Sīsū ʻo fekauʻaki mo e meʻa ko eni ne fai ai ʻa e fakakikihí. Mahalo pē te ne leaʻaki ha meʻa ʻa ia ʻe hōloa nai ai ʻa hono tuʻunga falalaʻangá. Naʻe fakaofiofi atu ha taha ʻo kinautolu kia Sīsū ʻo ʻeke: “Ko e faʻahinga tuʻutuʻuni fē ʻi he Lao ʻoku mamafa taha?”—Mātiu 22:34-36.
3. Ko e hā naʻe leaʻaki ʻe Sīsū ko e tuʻutuʻuni mamafa tahá ia?
3 Ko e tali naʻe ʻoange ʻe Sīsuú ʻoku ʻi ai hono mahuʻinga lahi fau kia kitautolu he ʻaho ní. ʻI heʻene talí, naʻá ne fakanounou ai ʻa e meʻa ʻa ia naʻe pehē maʻu pē pea ʻe pehē maʻu ai pē ʻa ia ko e uho ia ʻo e lotu moʻoní. ʻI heʻene lave ki he Teutalonome 6:5, naʻe pehē ʻe Sīsū: “Te ke ʻofa ki he ʻEiki ko ho ʻOtua, ʻo fai ʻaki ʻa e kotoa ʻo ho loto, mo e kotoa ʻo ho laumalie, mo e kotoa ʻo ho ʻatamai. Ko eni ia ʻa e tuʻutuʻuni ʻoku mamafa taha mo tuʻukimuʻa.” Neongo naʻe ʻeke ʻe he Fālesí ʻa e tuʻutuʻuni pē ʻe taha, naʻe ʻoange kiate ia ʻe Sīsū mo e toe meʻa ʻe taha. ʻI heʻene lave ki he Livitiko 19:18, naʻá ne pehē: “ʻOku faʻahinga mo ia ʻa hono ua, Te ke ʻofa ki ho kaungaʻapi ʻo hange ko hoʻo ʻofa kiate koe.” Naʻe fakahaaʻi ange leva ʻe Sīsū ko e ongo laó ni ʻa e uho ʻo e lotu maʻá. ʻI heʻene taʻofi ha feinga pē ke ne fakahokohoko ʻa e mahuʻinga ʻo e ngaahi lao kehé, naʻá ne fakaʻosiʻaki: “Ko e ongo tuʻutuʻuni ko eni ʻe ua ʻoku tautau ki ai ʻa e Lao kotoa mo e Tohi Palofita.” (Mātiu 22:37-40) ʻI he kupú ni, te tau lāulea ai ki he tuʻutuʻuni mamafa taha ʻi he ongo tuʻutuʻuni ko ení. Ko e hā kuo pau ai ke tau ʻofa ki he ʻOtuá? ʻOku anga-fēfē ʻetau fakahāhā ʻoku tau fai pehē? Pea ʻe lava fēfē ke tau fakatupulekina ʻa e ʻofa ko iá? ʻOku mātuʻaki mahuʻinga ke ʻiloʻi ʻa e tali ki he ngaahi fehuʻí ni koeʻuhi ke fakahōifuaʻi ʻa Sihová, kuo pau ke tau ʻofa kiate ia ʻaki hotau lotó, laumālié mo e ʻatamaí kotoa.
Ko e Mahuʻinga ʻo e ʻOfá
4, 5. (a) Ko e hā naʻe ʻikai ʻohovale ai ʻa e Fālesí ʻi he meʻa naʻe leaʻaki ʻe Sīsuú? (e) Ko e hā ʻoku mahuʻinga ange ki he ʻOtuá ʻi he ngaahi ʻinasí mo e ngaahi feilaulaú?
4 ʻOku hā ngali ko e Fālesi naʻá ne fehuʻi kia Sīsuú naʻe ʻikai te ne hohaʻa pe ʻohovale ʻi he tali naʻe fai ange kiate iá. Naʻá ne ʻiloʻi ko e ʻofa ki he ʻOtuá ko ha tafaʻaki tefito ia ʻo e lotu moʻoní, neongo ʻoku ʻikai malava ke fakahāhā ia ʻe he tokolahi. ʻI he ngaahi sinakoké, naʻe tōʻongaʻaki ai hono lau leʻo-lahi ʻa e Semá, pe lotu faka-Hepeluú, pea naʻe kau ʻi he meʻá ni ʻa e kupu ʻoku maʻu ʻi he Teutalonome 6:4-9, ʻa ia naʻe lave ki ai ʻa Sīsuú. Fakatatau ki he fakamatala meimei tatau ʻi he Maaké, naʻe lea ange leva ʻa e Fālesí kia Sīsū: “Tangataʻeiki, moʻoni hoʻo lau: ʻoku taha pe ia, pea ʻoku ʻikai hano ua: pea ko ʻete ʻofa kiate ia ʻaki ʻa e kotoa ʻo hoto loto, mo e kotoa ʻo hoto ʻatamai, mo e kotoa ʻo hoto ivi, pea mo ʻete ʻofa ki hoto kaungaʻapi ʻo hange ko ʻete ʻofa kia kita, ʻoku hulu noa pe ia ʻi he ʻatu ʻo e ngaahi feilaulau liʻaki pe ko e ngaahi ʻinasi.”—Maake 12:32, 33.
5 Ko e moʻoni, lolotonga ko e ngaahi feilaulau liʻakí mo e ngaahi ʻinasí naʻe fiemaʻu ia ʻe he Laó, ko e meʻa naʻe mahuʻinga moʻoni ki he ʻOtuá ko e ongoʻi ʻofa ʻi he lotó ʻa ʻene kau sevānití. Ko ha foʻi misi naʻe foaki ki he ʻOtuá ʻi he ʻofa mo e līʻoá naʻe mahuʻinga ange ia kiate ia ʻi he afeʻi sipi tangata naʻe foaki fakataha mo ha taumuʻa hala. (Maika 6:6-8) Manatuʻi ʻa e talanoa ki he uitou masiva ʻa ia naʻe siofi ʻe Sīsū ʻi he temipale ʻi Selusalemá. Ko e ongo kiʻi koini naʻá ne tuku ki he puha meʻaʻofá naʻe ʻikai lava ke fakatau mai ʻaki naʻa mo ha foʻi misi ʻe taha. Neongo ia, ko e foaki ko iá, ʻi hono fai fakataha mo e ʻofa ongoʻi loloto kia Sihová, naʻe mahuʻinga ange ia kiate ia ʻi he fuʻu foaki lahi naʻe fai ʻe he kau koloaʻiá mei heʻenau koloa naʻe hulú. (Maake 12:41-44) He fakalototoʻa ē ke ʻiloʻi ko e meʻa ʻoku fakamahuʻingaʻi taha ʻe Sihová ko e meʻa ʻoku tau lava kotoa ke fakahāhaá ʻo tatau ai pē pe ko e hā hotau ngaahi tuʻungá—ko ʻetau ʻofa kiate iá!
6. Ko e hā naʻe tohi ʻe Paula ʻo fekauʻaki mo e mahuʻinga ʻo e ʻofá?
6 ʻI hono fakamamafaʻi ʻa e mahuʻinga ʻo e ʻofá ʻi he lotu moʻoní, naʻe tohi ʻe he ʻapositolo ko Paulá: “Neongo te u lava ke leaʻaki ʻa e ngaahi lea ʻa e kakai, ʻio, mo e ngaahi lea ʻa e kau angelo, ka ʻoku ʻikai ʻiate au ʻa e ʻofa, ko e meʻa pe kuo u hoko ki ai, ko ha ukamea ongo au, pe ko ha simipale tatangi. Pea neongo te u lava ʻa e malanga-palofisai; neongo te u aʻusia ʻa e ngaahi misiteli kotoa pe, mo e faʻahinga ʻilo loloto kotoa pe; ʻio, pea neongo te u ʻosiki ʻa e tui, ʻo u lava ai ke hiki moʻunga, ka ʻoku ʻikai ʻiate au ʻa e ʻofa, ko e meʻa noa pe au. Pea neongo te u tufotufa ʻeku koloa kotoa; pea neongo te u liʻaki hoku sino ke lava ʻeku polepole; ka ʻoku ʻikai ʻiate au ʻa e ʻofa, ʻoku ʻikai hano ʻaonga kiate au.” (1 Kolinito 13:1-3) ʻOku hā mahino, ko e ʻofá ʻoku mahuʻinga ia kapau ʻoku fiemaʻu ke fakahōifua ʻa ʻetau lotú ki he ʻOtuá. Ko ia ai, ʻoku anga-fēfē ʻetau fakahāhā ʻetau ʻofa kia Sihová?
Founga ʻo ʻEtau Fakahāhā ʻEtau ʻOfa kia Sihová
7, 8. ʻE lava fēfē ke tau fakahāhā ʻetau ʻofa kia Sihová?
7 ʻOku tui ʻa e tokolahi ko e ʻofá ko ha ongoʻi ia ʻa ia ʻoku siʻi ʻetau mapuleʻí; ʻoku lau ʻa e kakaí ʻo fekauʻaki mo e ʻofa manako ʻi ha taha. Neongo ia, ko e ʻofa moʻoní ʻoku ʻikai ko ha meʻa pē ia ʻoku tau ongoʻi. ʻOku fakaʻilongaʻi pe fakamatalaʻi ia ʻe he ngāué, ʻo ʻikai ko e ongoʻí. ʻOku lave ʻa e Tohi Tapú ki he ʻofá ko ha “hala ʻoku fungani hake” pea ko e meʻa ia ʻoku tau “tuli” ki ai. (1 Kolinito 13:1 [1Ko 12:31, PM]; 1Ko 14:1) ʻOku fakalototoʻaʻi ʻa e kau Kalisitiané ke nau ʻofa, ʻo ʻikai ʻi he “lea pe, ʻumaʻā ʻaki hotau ʻelelo pe; ka tau fai ʻi ngaue mo fai ʻi moʻoni.”—1 Sione 3:18.
8 Ko e ʻofa ki he ʻOtuá ʻoku ueʻi ai kitautolu ke tau fai ʻa e meʻa ʻoku fakahōifua kiate iá pea ke taukapoʻi mo pouaki ʻa hono tuʻunga-haú, fakatouʻosi ʻi he lea mo e ngāue. ʻOkú ne ueʻi kitautolu ke tau fakaʻehiʻehi mei he ʻofa ki he māmaní mo ʻene ngaahi founga taʻefakaʻotuá. (1 Sione 2:15, 16) Ko e faʻahinga ʻoku ʻofa ki he ʻOtuá ʻoku nau fehiʻa ʻi he meʻa ʻoku koví. (Sāme 97:10) Ko e ʻofa ki he ʻOtuá ʻoku toe kau ki ai ʻa e ʻofa ki he kaungāʻapí, ʻa ia te tau lāulea ki ai ʻi he kupu hoko maí. ʻIkai ko ia pē, ko e ʻofa ki he ʻOtuá ʻoku fiemaʻu ai ʻetau talangofuá. ʻOku pehē ʻe he Tohi Tapú: “Ko eni ia ʻa e ʻofa ki he ʻOtua, ʻa ʻetau tauhi ki heʻene ngaahi tuʻutuʻuni.”—1 Sione 5:3.
9. Naʻe anga-fēfē ʻa hono fakahāhā ʻe Sīsū ʻa ʻene ʻofa ki he ʻOtuá?
9 Naʻe fakahāhā haohaoa ʻe Sīsū ʻa e ʻuhinga ʻo e ʻofa ki he ʻOtuá. Naʻe ueʻi ia ʻe he ʻofá ke ne liʻaki ʻa hono ʻapi fakahēvaní pea ke ne nofo ʻi he māmaní ko ha tangata. Naʻe ueʻi ia ke ne fakalāngilangiʻi ʻa ʻene Tamaí ʻaki ʻa e ngaahi meʻa naʻá ne faí mo akoʻí. Naʻe ueʻi ia ʻe he ʻofá ke ne “talangofua ʻo aʻu ki heʻene mate.” (Filipai 2:8) Ko e talangofua ko iá—ko ha fakahāhā ʻo ʻene ʻofá—naʻe fakaʻatā ai ʻa e faʻahinga faitōnungá ke nau maʻu ha tuʻunga māʻoniʻoni ʻi he ʻao ʻo e ʻOtuá. Naʻe tohi ʻe Paula: “Hange naʻe fakahalaiaʻi ʻa e tokolahi, ko e meʻa ʻi he talangataʻa ʻa e tangata ʻe toko taha [ʻĀtama]: pehe foki, ʻe fakatonuhiaʻi ʻa e tokolahi, ko e meʻa ʻi he talangofua ʻa e toko taha [Kalaisi Sīsū].”—Loma 5:19.
10. Ko e hā ʻoku kau ai ʻa e talangofuá ʻi he ʻofa ki he ʻOtuá?
10 ʻI he hangē ko Sīsuú, ʻoku tau fakahāhā ʻa e ʻofá ʻi heʻetau talangofua ki he ʻOtuá. “Ko eni ia ʻa e ʻofa, ʻa ʻetau laka ʻo fakatatau ki he ngaahi tuʻutuʻuni ʻa ʻEne ʻAfio,” ko e tohi ia ʻa e ʻapositolo ko Sioné ʻa ia naʻe ʻofa ai ʻa Sīsuú. (2 Sione 6) Ko e faʻahinga ʻoku nau ʻofa moʻoni kia Sihová ʻoku nau fiemaʻu ʻa ʻene tatakí. ʻI he ʻiloʻi heʻikai lava ke nau tataki lavameʻa honau halá tonu, ʻoku nau falala ki he poto ʻo e ʻOtuá pea fakamoʻulaloa ki heʻene tataki ʻofá. (Selemaia 10:23) ʻOku nau hangē ko e faʻahinga anga-fakaʻeiʻeiki ʻi Pēlea ʻo e kuonga muʻá ʻa ia naʻa nau tali ʻa e pōpoaki ʻa e ʻOtuá fakataha mo e “loto lelei,” ʻo maʻu ha holi vēkeveke ke fai ʻa e finangalo ʻo e ʻOtuá. (Ngāue 17:11) Naʻa nau sivisiviʻi fakalelei ʻa e Tohi Tapú ke mahinoʻi kakato ange ʻa e finangalo ʻo e ʻOtuá, ʻa ia naʻe tokoniʻi ai kinautolu ke fakahāhā ʻa e ʻofá ʻi he ngaahi ngāue talangofua lahi ange.
11. ʻOku ʻuhinga ki he hā ʻa e ʻofa ki he ʻOtuá ʻaki ʻa e kotoa hotau lotó, ʻatamaí, laumālié mo e mālohí?
11 Hangē ko ia naʻe leaʻaki ʻe Sīsuú, ko e ʻofa ki he ʻOtuá ʻoku kau ki ai hotau lotó, ʻatamaí, laumālié mo e mālohí kotoa. (Maake 12:30) Ko e ʻofa ko iá ʻoku haʻu ia mei he lotó, ʻo kau ki ai ʻetau ngaahi ongoʻí, holí mo e ngaahi fakakaukau lolotó, pea ʻoku tau holi tōtōivi ke fakahōifuaʻi ʻa Sihova. ʻOku tau toe ʻofa foki ʻaki hotau ʻatamaí. Ko ʻetau līʻoá ʻoku ʻikai ke fai kui pē; kuo tau hoko ʻo ʻiloʻi ʻa Sihova—ʻa hono ngaahi ʻulungāangá, ngaahi tuʻungá mo ʻene ngaahi taumuʻá. ʻOku tau ngāueʻaki hotau laumālié, ʻa ʻetau kotoá mo e moʻui ʻoku tau maʻú, ke tauhi mo fakahīkihikiʻi ia. Pea ʻoku tau ngāueʻaki foki hotau mālohí ki he taumuʻa ko iá.
ʻUhinga ʻOku Totonu Ai Ke Tau ʻOfa kia Sihová
12. Ko e hā ʻoku fiemaʻu ai ʻe he ʻOtuá ke tau ʻofa kiate iá?
12 Ko e ʻuhinga ʻe taha ʻoku totonu ai ke tau ʻofa kia Sihová he ʻokú ne fiemaʻu ke tau tapua atu ʻa hono ngaahi ʻulungāangá. Ko e ʻOtuá ko e matavai ia mo e faʻifaʻitakiʻanga māʻolunga taha ʻo e ʻofá. “Ko e ʻOtua ko e ʻOfa,” ko e tohi ia ʻa e ʻapositolo fakamānavaʻi ko Sioné. (1 Sione 4:8) Naʻe fakatupu ʻa e tangatá ʻi he ʻīmisi ʻo e ʻOtuá; naʻe ngaohi kitautolú ke tau ʻofa. Ko hono moʻoní, ko e tuʻunga-hau ʻo Sihová ʻoku makatuʻunga ia ʻi he ʻofá. ʻOkú ne fiemaʻu ke hoko ko ʻene kakai ʻa e faʻahinga ʻoku nau tauhi kiate ia, koeʻuhi ko ʻenau ʻofa mo holi ki heʻene founga pule māʻoniʻoní. Ko e moʻoni, ko e ʻofá ko e meʻa tefito ia ki he melino mo e feongoongoi ʻa e meʻa fakatupú kotoa.
13. (a) Ko e hā naʻe tala ai ki he kau ʻIsilelí: “Te ke ʻofa ki he ʻEiki ko ho ʻOtua”? (e) Ko e hā ʻoku ʻuhinga lelei ai hono ʻamanekina mai ʻe Sihova ke tau ʻofa kiate iá?
13 Ko e toe ʻuhinga ʻe taha ki he ʻofa kia Sihová ko ʻetau houngaʻia ki he meʻa kuó ne fai maʻatautolú. Manatuʻi naʻe pehē ʻe Sīsū ki he kau Siú: “Te ke ʻofa ki he ʻEiki ko ho ʻOtua.” Naʻe ʻikai ʻamanekina ke nau ʻofa ki ha ʻotua naʻe mamaʻo mo taʻeʻiloa. Naʻe fiemaʻu ke nau ʻofa ki he Tokotaha ʻa ia naʻá ne fakahāhā ʻa ʻene ʻofa kia kinautolú. Ko Sihova ʻa honau ʻOtuá. Ko e Tokotaha ia naʻá ne ʻomi kinautolu ki tuʻa mei ʻIsipite ki he Fonua ʻo e Talaʻofá, ko e Tokotaha naʻá ne maluʻi, fafanga mo tauhi kinautolu, ko e Tokotaha naʻá ne akonekina kinautolu ʻi he ʻofá. Pea ʻi he ʻahó ni, ko Sihova ʻa hotau ʻOtuá, ʻa e tokotaha naʻá ne foaki ʻa hono ʻAló ko ha huhuʻi ke tau lava ai ʻo maʻu ʻa e moʻui taʻengatá. He ʻuhinga lelei ē ko ia ko hono ʻamanekina mai ʻe Sihova ke tau ʻofa ange kiate iá! Ko ʻetau ʻofá ko e tali ia ki he ʻofa ko iá; ʻoku fiemaʻu ke tau ʻofa ki he ʻOtua ʻoku ʻofa ʻia kitautolú. Ko ʻetau ʻofá ki he Tokotaha naʻe ‘tomuʻa ʻofa kiate kitautolú.’—1 Sione 4:19.
14. ʻI he founga fē ʻoku hangē ai ʻa e ʻofa ʻa Sihová ko e ʻofa ʻa ha mātuʻa ʻofá?
14 Ko e ʻofa ʻa Sihova ki he faʻahinga ʻo e tangatá ʻoku hangē ia ko e ʻofa ʻa ha mātuʻa ʻofa ki heʻene fānaú. Neongo ʻa e taʻehaohaoá, ko e ngaahi mātuʻa ʻofá ʻoku nau ngāue tōtōivi ʻi he laui taʻu ki hono tokangaʻi ʻo ʻenau fānaú, ʻo fai ia ʻi he feilaulau lahi fakamatelie mo e ngaahi tuʻunga kehe. ʻOku fakahinohinoʻi, fakalototoʻaʻi, poupouʻi mo akonekina ʻe he ngaahi mātuʻá ʻenau fānaú koeʻuhí ʻoku nau loto ke nau fiefia pea ke nau lakalakaimonū. Ko e hā ʻoku loto ʻa e ngaahi mātuʻá ke fai ange kia kinautolú? ʻOku nau fiemaʻu ʻenau fānaú ke nau ʻofa ʻia kinautolu pea ke tokanga ki he meʻa kuo nau tuku ki he fānaú ki haʻanau lelei. ʻIkai ʻoku ʻuhinga lelei ʻa hono ʻamanekina ʻe heʻetau Tamai fakahēvani haohaoá ke tau fakahāhā ʻa e houngaʻia anga-ʻofa ki he meʻa kotoa kuó ne fai maʻatautolú?
Fakatupulekina ʻa e ʻOfa ki he ʻOtuá
15. Ko e hā ʻa e ʻuluaki sitepu ʻi hono fakatupulekina ʻa e ʻofa ki he ʻOtuá?
15 Kuo teʻeki ai ke tau mamata ki he ʻOtuá pe fanongo ki hono leʻó. (Sione 1:18) Neongo ia, ʻokú ne fakaafeʻi kitautolu ke tau kau ki ha vahaʻangatae ʻofa mo ia. (Semisi 4:8) ʻE lava fēfē ke tau fai ia? Ko e ʻuluaki sitepu ki he ʻofa ki ha tahá ko e maʻu ʻa e ʻilo fekauʻaki mo e tokotaha ko iá; ʻoku faingataʻa ke ongoʻi ʻofa lahi ki ha taha ʻoku ʻikai te tau ʻiloʻi. Kuo ʻomai ʻe Sihova ʻa ʻene Folofolá, ʻa e Tohi Tapú, koeʻuhi ke tau lava ai ʻo ako fekauʻaki mo ia. Ko e ʻuhinga ia ʻoku fakalototoʻaʻi mai ai ʻe Sihova, fakafou heʻene kautahá, ke tau lau maʻu pē ʻa e Tohi Tapú. Ko e Tohi Tapú ʻokú ne akoʻi kitautolu fekauʻaki mo e ʻOtuá, ko hono ngaahi ʻulungāangá, ko hono angá, pea pehē ki heʻene ngaahi feangainga mo e kakaí ʻi he laui afeʻi taʻu. ʻI heʻetau fakalaulauloto ki he ngaahi fakamatala ko iá, ʻe tupulaki ai ʻetau mahino mo e ʻofa kiate iá.—Loma 15:4.
16. ʻOku anga-fēfē ʻa hono fakalahi ʻetau ʻofa ki he ʻOtuá ʻi he fakakaukauloto atu ki he ngāue fakafaifekau ʻa Sīsuú?
16 Ko ha founga tefito ʻe lava ke tupulaki ai ʻa ʻetau ʻofa kia Sihová ko e fakakaukauloto ki he moʻui mo e ngāue fakafaifekau ʻa Sīsuú. Ko hono moʻoní, naʻe tapua mātuʻaki haohaoa atu ʻe Sīsū ʻa ʻene Tamaí ʻo lava ai ke ne pehē: “Ko ia kuo ne mātā au, kuo ne mātā ʻa e Tamai.” (Sione 14:9) ʻIkai ʻoku maongo kiate koe ʻa e manavaʻofa naʻe fakahāhā ʻe Sīsū ʻi hono toe fakamoʻui ʻa e tama pē ʻe taha ʻa ha uitou? (Luke 7:11-15) ʻIkai ʻoku fakamānako ʻa e ʻiloʻi ko ia—ʻa e ʻAlo ʻo e ʻOtuá pea ko e moʻungaʻi tangata lahi taha ia kuo moʻui maí—naʻá ne fufulu anga-fakatōkilalo ʻa e vaʻe ʻo ʻene kau ākongá? (Sione 13:3-5) ʻIkai ʻoku maongo kiate koe hono ʻiloʻi neongo naʻá ne lahi ange mo poto ange ʻi ha toe tangata, naʻá ne ʻai ke ne fotungofua ki he tokotaha kotoa, ʻo kau ai ʻa e fānaú? (Maake 10:13, 14) ʻI heʻetau fakalaulauloto houngaʻia ki he ngaahi meʻá ni, ʻoku tau hoko ai ʻo hangē ko e kau Kalisitiane ʻa ia naʻe tohi ʻa Pita ʻo fekauʻaki mo kinautolu: “Neongo kuo teʻeki te mou mamata [kia Sīsū], ka ʻoku mou ʻofa ki ai.” (1 Pita 1:8) ʻI he tupulaki ʻetau ʻofa kia Sīsuú, ʻoku pehē ai pē mo ʻetau ʻofa kia Sihová.
17, 18. Ko e fakalaulauloto ki he ngaahi tokonaki ʻofa ʻa Sihova ko e hā, ʻe lava ke ʻai ai ke tupulaki ʻetau ʻofa kiate iá?
17 Ko e toe founga ʻe taha ʻe lava ke tupulaki ai ʻa ʻetau ʻofa ki he ʻOtuá ko e fakalaulauloto ki he ngaahi tokonaki ʻofa lahi fau kuó ne fai ke tau fiefia ai ʻi he moʻuí—ko e fakaʻofoʻofa ʻo e fakatupú, ko e kehekehe lahi fau ʻo e ngaahi meʻa ifo ke kaí, ko e feohi māfana ʻa e ngaahi kaumeʻa leleí, pea pehē ki he ngaahi meʻa fakafiefia taʻefaʻalaua kehe ʻokú ne ʻomai kia kitautolu ʻa e fiefia mo e fiemālié. (Ngāue 14:17) Ko e lahi ange ʻetau ako fekauʻaki mo hotau ʻOtuá, ko e ʻuhinga lahi ange ia ʻoku tau maʻu ke houngaʻia ai ʻi heʻene anga-lelei mo e nima-homo lahi faú. Fakakaukau atu ki he meʻa kotoa kuo fai ʻe Sihova maʻau fakafoʻituituí. ʻIkai ʻokú ke loto-tatau ʻokú ne tuha mo hoʻo ʻofá?
18 ʻOku ʻi he lotolotonga ʻo e ngaahi meʻaʻofa lahi mei he ʻOtuá ʻa e faingamālie ʻoku tau maʻu ke fakaofiofi kiate ia ʻi he lotú ʻi ha faʻahinga taimi pē, ʻi he ʻiloʻi ko iá ko e tokotaha “tali lotu” ʻokú ne fanongo mai kia kitautolu. (Sāme 65:2) Kuo tuku ʻe Sihova ki hono ʻAlo ʻofaʻangá ʻa e mafai ke ne fakatou pule mo fakamaau. Kae kehe, ʻoku ʻikai te ne tuku ki he niʻihi kehé, ʻo kau ai ʻa hono ʻAló, ʻa e fanongo ki he ngaahi lotú. ʻOkú ne fanongo fakafoʻituitui mai ki heʻetau ngaahi lotú. Ko e tokanga ʻofa fakafoʻituitui ko ia ʻoku fakahaaʻi ʻe Sihová ʻoku tohoakiʻi ai kitautolu ke ofi kiate ia.
19. Ko e hā ʻa e ngaahi talaʻofa ʻa Sihova ʻoku tohoakiʻi ai kitautolu kiate iá?
19 ʻOku toe tohoakiʻi kitautolu kia Sihova ʻi he taimi ʻoku tau fakakaukau ai ki he meʻa kuó ne tuku tauhi maʻá e faʻahinga ʻo e tangatá. Kuó ne talaʻofa ke fakangata ʻa e puké, mamahí mo e maté. (Fakahā 21:3, 4) Ko e taimi pē ʻe ʻai ai ke haohaoa ʻa e faʻahinga ʻo e tangatá, heʻikai leva ha taha ʻe tofanga ʻi he loto-mafasiá, loto-siʻí, pe ko e mamahí. Heʻikai toe ʻi ai ha fiekaia, masiva mo ha tau. (Sāme 46:9; 72:16) ʻE liliu ʻa e māmaní ko ha palataisi. (Luke 23:43) ʻE ʻomai ʻe Sihova ʻa e ngaahi tāpuakí ni, ʻo ʻikai koeʻuhí ko ha meʻa kuo pau ke ne fai, ka koeʻuhi ko ʻene ʻofa ʻia kitautolú.
20. Ko e hā naʻe leaʻaki ʻe Mōsese ʻo fekauʻaki mo e ngaahi ʻaonga ʻo e ʻofa kia Sihová?
20 Ko ia ai, ʻoku ʻi ai ʻa e ngaahi ʻuhinga mālohi ke ʻofa ai ki hotau ʻOtuá pea tuku ke tupulaki ʻa e ʻofa ko iá. Te ke hokohoko atu ʻi hono ʻai ke mālohi ʻa hoʻo ʻofa ki he ʻOtuá, ʻo fakaʻatā ia ke ne tataki ho ngaahi halá? Ko e filí ʻoku ʻaʻau ia. Naʻe ʻiloʻi ʻe Mōsese ʻa e ngaahi ʻaonga ʻo hono fakatupulekina mo tauhi maʻu ʻa e ʻofa kia Sihová. Naʻe pehē ʻe Mōsese ki he kau ʻIsileli ʻo e kuonga muʻá: “Ke ke fili ki he moʻui ka ke moʻui, ʻa koe mo ho hako, ke ʻofa kia Sihova ko ho ʻOtua, ke fakaongo ki hono leʻo, pea ke pikitai kiate ia: he ko ia ia hoʻo moʻuiʻanga, mo e loloaʻanga ʻo ho ngaahi ʻaho.”—Teutalonome 30:19, 20.
ʻOkú Ke Manatuʻi?
• Ko e hā ʻoku mahuʻinga ai ke tau ʻofa kia Sihová?
• ʻE lava fēfē ke tau fakahāhā ʻetau ʻofa ki he ʻOtuá?
• Ko e hā ʻa e ngaahi ʻuhinga ʻoku tau maʻu ke ʻofa ai kia Sihová?
• ʻE lava fēfē ke tau fakatupulekina ʻa e ʻofa ki he ʻOtuá?
[Fehuʻi ki he Ako]
[Fakatātā ʻi he peesi 20]
ʻOku fakamahuʻingaʻi moʻoni ʻe Sihova ʻa e meʻa ʻoku tau lava kotoa ke fakahāhaá—ʻa ʻetau ʻofa kiate iá
[Fakatātā ʻi he peesi 23]
“Ko ia kuo ne mātā au, kuo ne mātā ʻa e Tamai.”—Sione 14:9