ʻOku ʻAonga ʻa e Hoko ʻo Faitotonú

KUO hoko ʻa e taʻefaitotonú talu mei he ngoue ko ʻĪtení. Kae kehe, ʻoku fakamahuʻingaʻi ʻe he ngaahi anga fakafonua mo e ngaahi sōsaieti lahi ʻa e faitotonú pea nau vakai ki he loí mo e kākaá ʻoku ʻikai fiemaʻu pea kovi ʻaupito. Ko ʻete hoko ko ia ʻo alafalalaʻangá ko ha meʻa ia ke te laukauʻaki. Ka ʻoku fakautuutu ʻa e vakai ki he taʻefaitotonú ko e meʻa ia ʻoku mātuʻaki fiemaʻu koeʻuhi ka te moʻui ʻi he sōsaieti ʻi onopōní. ʻOku anga-fēfē hoʻo ongoʻi ʻo kau ki aí? ʻOku tuha ke fakatupulekina ʻa e faitotonú? ʻOku makatuʻunga ʻi he hā ʻa hoʻo fakapapauʻi ko ia pe ko e hā ʻa e tōʻonga faitotonú mo taʻefaitotonú?

Ke fakahōifuaʻi ʻa e ʻOtuá, kuo pau ke tau faitotonu ʻi heʻetau leá pea ʻi heʻetau founga moʻuí. Naʻe ekinaki ʻa e ʻapositolo ko Paulá ki he kaungā Kalisitiané: “Mou taki taha lea moʻoni ʻi he feangai mo hono kaungaʻapi.” (Efeso 4:25) Naʻe toe tohi foki ʻa Paula: “Ko homau loto ke tāu [pe faitotonu] ʻemau moʻui ʻi he meʻa kotoa.” (Hepelu 13:18) Ko ʻetau fakaueʻiloto ki he hoko ʻo faitotonú ʻoku ʻikai koeʻuhi ke fakahīkihikiʻi kitautolu ʻe he niʻihi kehé. ʻOku tau faitotonú koeʻuhí he ʻoku tau fakaʻapaʻapaʻi ʻa hotau Tokotaha-Fakatupú pea fakaʻamu ke fakahōifuaʻi ia.

ʻOua ʻe ʻAi Pūloa

ʻI he ngaahi fonua lahi, ʻoku ʻoatu ai ʻe he kakaí ʻa e fakamatala loi ʻo fekauʻaki mo kinautolu koeʻuhi ke maʻu ai ha ngaahi ʻaonga ʻi he moʻuí. ʻOku nau ʻai ʻa e ngaahi pepa, tipiloma mo e ID kākā ke nau hū taʻefakalao ai ki ha fonua pe maʻu ha ngāue pe ko ha tuʻunga ʻa ia ʻoku ʻikai te nau taau mo ia. ʻOku liliukeheʻi ʻe he ngaahi mātuʻa ia ʻe niʻihi ʻa e tohi-taʻu ʻo ʻenau fānaú koeʻuhi ke fakalahi atu ai e ako ʻa e fānaú.

Kae kehe, ke hoko ʻo fakahōifuaʻi ʻa e ʻOtuá heʻikai lava ke tau kākā. ʻOku pehē ʻe he Tohi Tapú ko Sihová ko e “Otua oe mooni” pea ʻokú ne ʻamanekina ʻa e moʻoní mei he faʻahinga ʻoku nau maʻu ha tuʻunga fekoekoeʻi mo iá. (Sāme 31:​5, PM) Kapau ʻoku tau fakaʻamu ke tauhi maʻu ha vahaʻangatae vāofi mo Sihova, heʻikai lava ke tau faʻifaʻitaki ki he “kakai mūnoa” pe lea loí, ʻa e faʻahinga ʻoku nau “ʻai puloa.”—Sāme 26:4.

ʻOku toe anga-maheni foki ki he kakaí ke nau fufū ʻa e moʻoní ʻi he fehangahangai ko ia mo hano teu akonekina kinautolu ʻi he faihalá. Naʻa mo e fakatahaʻanga Kalisitiané, ʻe fakataueleʻi nai ha tokotaha ke ne fai pehē. Ko e fakatātaá, ʻi ha fakatahaʻanga ʻe taha naʻe fakahā ʻe ha talavou ki he kau mātuʻá kuó ne fai ha ngaahi angahala. Kae kehe, naʻe ʻikai te ne fakahā ange ko haʻane kaihaʻa, neongo ne ʻi ai ha fakamoʻoni naʻá ne fai ia. Ne toki faifai pē ʻo ʻiloʻi pea pau ke tuʻusi ai ia mei he fakatahaʻangá. ʻIkai nai ne mei fakapotopoto ange kiate ia ke ne faitotonu ʻaupito pea maʻu ʻa e tokoni ke toe fakafoki mai ai hono vahaʻangatae maʻongoʻonga mo Sihová? Ko hono  moʻoní, ʻoku pehē ʻe he Tohi Tapú: “ʻOua te ke taʻetokangaʻi ʻa e kini ʻoku fai ʻe he ʻEiki, ʻumaʻā haʻo vaivai ʻi ho valokiʻi ʻe ia: he ko ia ia ʻoku ʻofa ki ai ʻa e ʻEiki ʻa ia ʻoku ne kinisi.”—Hepelu 12:​5, 6.

ʻI he taimi ʻe niʻihi, ko ha tokoua ʻoku kakapa atu ki ha fatongia ʻi he fakatahaʻangá te ne feinga nai ke fufū ʻa e ngaahi palopalema fakafoʻituituí pe tōʻonga kovi he kuohilí. Ko e fakatātaá, ʻi hono fakafonu ha tohi kole ki ha monū ngāue makehe, heʻikai nai te ne ʻomai ʻa e tali kakato ki he ngaahi fehuʻi ʻi he moʻui leleí mo e ʻulungāangá, ʻi he fakakaukau atu ʻe fakataʻeʻaongaʻi ia ʻe he ngaahi moʻoni ko iá. Te ne fakaʻuhinga nai, ‘Naʻe ʻikai te u fuʻu loi fēfē au,’ ka naʻá ne tali totonu mo faitotonu moʻoni nai ki he niʻihi kehé? Fakakaukau ange ki he poini ʻoku ʻomai he Palovepi 3:32: “Ko e tangata angapiko ʻoku fakaliliʻa ki ai ʻa Sihova: ka ko e kau angatonu ʻoku nau talanoa fafale mo ia.”

Ko e hoko ʻo faitotonú ʻoku ʻuhinga iá ko e ʻuluaki hoko ʻo faitotonu kia kita. ʻOku tau faʻa tui pē ki he meʻa ʻoku tau fie tui ki aí kae ʻikai ko e meʻa ʻoku totonú pe moʻoní. He faingofua moʻoni ē ke tau tukuakiʻi ha tokotaha kehe! Ko e fakatātaá, naʻe feinga ʻa Tuʻi Saula ke fakatonuhiaʻi ʻene talangataʻá ʻaki hono tukuakiʻi ʻa e niʻihi kehé. Ko hono ikuʻangá, naʻe toʻo ai meiate ia ʻe Sihova ʻa e tuʻunga-tuʻí. (1 Samiuela 15:​20-23) He kehe ē ko ia meia Tuʻi Tēvitá, ʻa ia naʻá ne lotu kia Sihova: “Naʻa ku fakamoʻoni ki he ʻAfiona ʻeku hia, pea naʻe ʻikai te u fufū ʻeku angahala: naʻa ku pehē, Te u vete ki he ʻEiki ʻeku ngaahi talangataʻa; pea naʻa ke tamateʻi ʻa e moʻua ʻo ʻeku angahala.”—Sāme 32:5.

 ʻOmi ʻe he Faitotonú ʻa e Ngaahi Tāpuaki

Ko e faitotonu pe taʻefaitotonú ʻoku tākiekina ai ʻa e anga ʻo e vakai atu ʻa e niʻihi kehé kia koé. Kapau ʻe ʻiloʻi ʻe he kakaí kuó ke kākaaʻi kinautolu naʻa mo e tuʻo taha pē, heʻikai ai te nau toe falala atu, pea ʻoku ʻikai faingofua hono toe maʻu ʻenau falalá. ʻI he tafaʻaki ʻe tahá, kapau ʻokú ke lea moʻoni mo faitotonu, te ke maʻu ai ha ongoongo ko ha tokotaha anga-tonu, ʻo tuha mo e falalá. Kuo maʻu ʻe he Kau Fakamoʻoni ʻa Sihová ha ongoongo pehē. Vakai angé ki ha ngaahi fakatātā ʻe niʻihi.

Naʻe lāuʻilo ha talēkita ʻo ha kautaha ki he tokolahi ʻo ʻene kau ngāué ne nau kākaaʻi ʻa e kautahá, ko ia ai naʻá ne fetuʻutaki ki he kau polisí. ʻI heʻene ʻiloʻi naʻe kau ʻi he faʻahinga naʻe puké ha tokotaha ngāue ko e taha ʻo e Kau Fakamoʻoni ʻa Sihová, naʻá ne ʻalu ki he polisí ke tuku ange mai he vave tahá ʻa e Fakamoʻoní. Ko e hā hono ʻuhingá? Koeʻuhí naʻe ʻiloʻi ʻe he talēkitá ko e tokotaha ko ení ko ha tokotaha ngāue faitotonu pea naʻá ne tonuhia. Naʻe kei maʻu pē ʻe he Fakamoʻoní ʻene ngāué, kae tuli ʻa e niʻihi kehé ia. Naʻe fiefia hono ngaahi kaungā Fakamoʻoní ʻi hono ʻiloʻi naʻe ʻoatu ʻe hono ʻulungāangá ʻa e fakalāngilangi ki he huafa ʻo Sihová.

ʻOku ʻikai taʻefakatokangaʻi ʻa e ʻulungāanga leleí. ʻI ha feituʻu ʻAfilika ʻe taha, naʻe fiemaʻu ai ke monomono ha halafakakavakava naʻe kolosi atu ʻi ha fuʻu luo fakatafenga vai, koeʻuhí ne kaihaʻasi mei ai ʻa e niʻihi ʻo e ngaahi lauʻi papá. Naʻe fakakaukau ʻa e kau nofo he koló ke fai ha tānaki paʻanga ke fetongi mai ʻaki ʻa e ngaahi lauʻi papá, ka ko hai ʻe falalaʻanga ke ne tokangaʻi ʻa e paʻangá? Naʻa nau loto-taha kotoa: ʻOku totonu pē ko ha taha ʻo e Kau Fakamoʻoni ʻa Sihová.

ʻI he taimi naʻe tofanga ai ha fonua ʻAfilika ʻe taha ʻi ha moveuveu fakapolitikale mo fakamatakalí, naʻe hiki ai ʻe ha kautaha fakavahaʻapuleʻanga ha Fakamoʻoni ʻa ia naʻe ngāue maʻa kinautolu ko ha ʻakauniteni he naʻe ʻi he tuʻunga fakatuʻutāmaki ʻa ʻene moʻuí. Naʻe fokotuʻutuʻu ʻe he kautahá ke ne ngāue, ka nau totongi pē, ʻi he ngaahi māhina lahi ʻi ha fonua kehe kae ʻoua kuo saisai ʻa e tuʻungá. Ko e hā hono ʻuhingá? Koeʻuhí naʻá ne fakafisi ki muʻa ke fengāueʻaki mo e faʻahinga naʻa nau faʻufaʻu ke kākaaʻi ʻa e kautahá. Naʻe lāuʻilo ʻa e faʻahinga naʻa nau tokangaʻi ʻa e kautahá ki hono ongoongo ʻi heʻene mātuʻaki faitotonú. Ne nau mei loto-lelei nai ke tokoni ki he tokotaha ngāue ko ení kapau naʻe ʻiloa ia ʻi haʻane ngaahi tōʻonga taʻefaitotonu?

“Oku eveeva ae tagata agatonu i he ene maonioni,” ko e lau ia ʻa e Palovepi 20:7 (PM). Ko ha tokotaha faitotonu ko ha tokotaha anga-tonu ia. ʻOku ʻikai ʻaupito te ne kākaaʻi ʻa e niʻihi kehé. ʻIkai nai ko hoʻo fakaʻamú ia ke fai pehē atu ʻa e niʻihi kehé kiate koe? Ko e faitotonú ko ha konga mātuʻaki mahuʻinga ia ʻo e lotu moʻoní. Ko ha fakahāhā ia ʻo ʻetau ʻofa ki he ʻOtuá mo e kaungāʻapí. ʻI he hoko ʻo faitotonú, ʻoku tau fakahaaʻi ai ʻetau holi ke muimui ʻi he tefitoʻi moʻoni fakaeʻulungāanga naʻe fakahaaʻi ʻe Sīsuú: “Ko ia ʻilonga ha meʻa ʻoku mou loto ke fai ʻe he kakai kiate kimoutolu, fai pehe foki kiate kinautolu.”—Mātiu 7:12; 22:​36-39.

Ke faitotonu ʻi he taimi kotoa peé ʻe iku nai ai ki he ngaahi tuʻunga ʻikai lelei, ka ko e konisēnisi maʻa ʻoku iku ki aí ʻoku mahuʻinga mamaʻo ange ia ʻi ha tuʻunga kovi pē ʻe hoko ai. ʻI he lele lōloá, ko e hoko ko ia ʻo faitotonu mo anga-tonú ʻoku maʻu ai ʻa e ngaahi ʻaonga lahi tahá. Ko hono moʻoní ko hono maʻu ha vahaʻangatae lelei mo Sihová ʻoku taʻehanotatau ia. Ko e hā ke maumauʻi ai ia ʻaki hono fai ha meʻa taʻefaitotonu koeʻuhi ke ʻoua naʻa mole ai ʻa hono tokaʻi kitá pe ke maʻu ai ha ngaahi ʻaonga taʻefakalao ʻe niʻihi? Pe ko e hā pē ʻa e pole te tau fehangahangai nai mo iá, ʻoku lava ke tau maʻu ʻa e loto-falala ki he ngaahi lea ʻa e tokotaha-tohi-sāmé: “Oku monuia ae tagata koia oku falala kia Jihova, bea ikai tokaga ia ki he kakai laukau, mo kinautolu oku afe ki he loi.”—Sāme 40:​4, PM.

[Fakatātā ʻi he peesi 18]

Ko e kau Kalisitiane moʻoní ʻoku ʻikai te nau fakatau pe ngāueʻaki ʻa e ngaahi pepa kākaá