Talanoa ki he Moʻuí

Ko ʻEmau Faitau ke Nofoʻaki Mālohi Fakalaumālié

FAKAMATALA FAI ʻE ROLF BRÜGGEMEIER

Ko e ʻuluaki tohi naʻá ku maʻu ʻi he hili hono fakahū pilīsone aú naʻe ʻomai mei ha kaumeʻa. Naʻá ne fakahā mai ko ʻeku fineʻeikí mo hoku fanga tehiná—Peter, Jochen mo Manfred—naʻe toe puke foki mo kinautolu. Naʻe toe leva ai ʻa homau ongo kiʻi tuofefiné ʻo ʻikai ha ongo mātuʻa pe ha toe taha he fānaú. Ko e hā naʻe fakatangaʻi ai ʻe he kau maʻu mafai ʻo Siamane Hahaké ʻa homau fāmilí? Ko e hā naʻá ne tokoniʻi kimautolu ke mau nofoʻaki mālohi fakalaumālié?

KO E Tau II ʻa Māmaní naʻá ne veuki ʻa e nonga ʻo ʻemau tupu haké; naʻa mau aʻusia tonu ʻa e tuʻunga fakamamahi ʻo e taú. Naʻe kau ʻa e tangataʻeikí ʻi he kau tau Siamané peá ne mate ai ʻi hano ʻave pōpula ʻi he taú. Naʻe ʻuhinga leva eni naʻe pau ke tokangaʻi ʻe Berta ʻa ia ko e fineʻeikí, ʻa e fānau ʻe toko ono mei he taʻu taha ki he taʻu 16.

Naʻe ʻai ʻe he siasi naʻe ʻalu ki ai ʻa e fineʻeikí ke siva fakaʻaufuli ʻene ʻamanaki ʻi he lotú, ʻo fakatupunga ai ke ʻoua te ne toe fie fanongo ki ha meʻa pē fekauʻaki mo e ʻOtuá. Ka ʻi ha ʻaho ʻe taha ʻi he 1949, naʻe haʻu ai ha kiʻi fefine anga-fakapotopoto ko Ilse Fuchs ki homau matapaá ke talanoa ʻo fekauʻaki mo e Puleʻanga ʻo e ʻOtuá. Ko ʻene ngaahi fehuʻí mo e fakaʻuhingá naʻe langaʻi ai ʻa e fieʻilo ʻa e fineʻeikí. Ko hano ako ʻo e Tohi Tapú naʻá ne maʻu leva ai ha ʻamanaki.

Kae kehe, ko kimautolu tamaiki tangatá naʻa mau veiveiua ʻi he ʻuluaki taimí. Naʻe fai ʻe he kau Nasí pea hoko mai ki he kau Kominiusí ʻa e ngaahi talaʻofa lalahi, ka naʻe kei fakasivaʻi ai pē ʻemau ʻamanakí. Neongo ne mau huʻuhuʻu ʻo fekauʻaki mo ha toe talaʻofa pē, naʻe maongo kia kimautolu ʻa ʻemau hoko ʻo ʻiloʻi ha kau Fakamoʻoni ʻa ia naʻa nau ʻi he ngaahi kemi fakamamahí koeʻuhi ko ʻenau fakafisi ke poupouʻi ʻa e taú. ʻI he taʻu hono hokó naʻá ku papitaiso ai mo Peter mo e fineʻeikí.

Naʻe toe papitaiso foki mo homau kiʻi tokoua siʻisiʻi ko Manfred, ka naʻe hā naʻe ʻikai ke faiaka ʻa e moʻoni ʻo e Tohi Tapú ʻi hono lotó. ʻI he taimi naʻe  tapui ai ʻe he kau Kominiusí ʻemau ngāué ʻi he 1950 pea fakamanamanaʻi ia ʻe he kau polisi fufuú—naʻe ʻiloa ko e Stasi—naʻá ne tala ʻa e feituʻu naʻe fai ai ʻemau ngaahi fakatahá. Ko e meʻa ia naʻe faifai atu pē ʻo puke ai ʻeku fineʻeikí mo hoku ongo tokouá.

Ngāue ʻi he Malumalu ʻo e Tapuí

Koeʻuhi ko e tapuí, naʻe pau ke mau ʻomi fakafufū ʻa e ʻū tohi Fakatohitapú ki Siamane Hahake. ʻI he tuʻunga ko ha talafekaú, naʻá ku ʻomi ai ʻa e ʻū tohí ʻo fou mai ʻi he kauʻāfonuá mei he vāhenga fakahihifo ʻo Pēliní, ʻa ia naʻe ʻikai tapui ia ai. Naʻe laka hake he tuʻo tahá ʻa ʻeku hao mei he kau polisí, ka ʻi Nōvema 1950 naʻe puke ai au.

Naʻe tuku au ʻe he Stasi ʻi ha pilīsone ʻi lolofonua naʻe ʻikai hano matapā sioʻata. Lolotonga ʻa e taimi ʻahó naʻe ʻikai ngofua ke u mohe, pea ʻi he poʻulí naʻe fakafehuʻi ai au pea haha ʻi he taimi ʻe niʻihi. Naʻe ʻikai haʻaku fetuʻutaki ʻe taha mo hoku fāmilí ʻo aʻu ki Maʻasi 1951 ʻi he ʻalu ange ai ʻa e fineʻeikí, Peter mo Jochen ki heʻeku hopó. Naʻe tautea ngāue pōpula au ki he taʻu ʻe ono.

Naʻe puke ʻa e fineʻeikí, Peter mo Jochen ʻi he hili ʻa e ʻaho ʻe ono mei heʻeku hopó. Naʻe tokangaʻi leva ai ʻe ha kaungātui ʻa hoku tuofefine ko Hannelore, ʻa ia naʻe taʻu 11, pea naʻe ʻave leva ʻe he tokoua ʻo e fineʻeikí ʻa Sabine ʻa ia naʻe taʻu 7. Naʻe ngaohikoviʻi ʻe he kau leʻo Stasi ʻa e fineʻeikí mo hoku ongo tokouá ʻo hangē ha kau faihia fakatuʻutāmakí, ʻo aʻu ki hono ʻave ʻa e tepi ʻo honau suú. Naʻe pau ke nau tuʻu pē ʻi he taimi kotoa naʻe fakaʻekeʻeke ai kinautolú. Naʻe tautea ngāue pōpula foki mo kinautolu ki he taki taʻu ʻe ono.

ʻI he 1953, naʻe vaheʻi ai au mo ha kau pōpula Fakamoʻoni ʻe niʻihi ke mau langa ha malaʻe vakapuna fakakautau ʻa ia naʻa mau fakafisi ke fai ia. Naʻe tauteaʻi ai kimautolu ʻe he kau maʻu mafaí, ʻo tuku fakamavaheʻi ʻi he ʻaho ʻe 21, ʻa ia naʻe ʻuhinga iá, ko e ʻikai ha ngāue, ʻikai toe ʻomai ha tohi mo e meʻakai siʻisiʻi pē. Naʻe tuku ʻe ha fanga tuofāfine Kalisitiane ha mā mei honau kiʻi ʻinasí pea ʻomi fakafufū ia kia kimautolu. Naʻe iku atu eni ki heʻeku maheni mo Anni, ko e taha ʻi he fanga tuofāfine ko iá, peá ma mali ʻi he hili ʻema ʻatā mai ʻi he 1956 mo e 1957. Hili ʻa e taʻu ʻe taha mei heʻema malí, naʻe fāʻeleʻi ai homa ʻofefine ko Ruth. Ko Peter, Jochen mo Hannelore naʻa nau mali ʻi he meimei taimi tatau pē ko ení.

ʻI he hili nai ʻa e taʻu ʻe tolu mei heʻeku ʻataá, naʻe toe puke ai au. Naʻe feinga ha ʻōfisa Stasi ke fakalotoʻi au ke u hoko ko ha sipai. Naʻá ne pehē: “Siʻi Brüggemeier, fakapotopoto muʻa ā. ʻOkú ke ʻilo pē ʻa e anga ʻo e nofo pilīsoné pea ʻoku ʻikai te mau loto ke ke toe foua ʻa e ngaahi meʻa kotoa ko iá. Te ke kei lava pē ke hoko ko ha Fakamoʻoni, hokohoko atu hoʻo akó, mo ke talanoa faʻiteliha ʻo kau ki he Tohi Tapú. Ko homau lotó pē ke mau ʻilo ʻa e fakamatala fakamuimui tahá. Fakakaukau ki ho uaifí pea mo ho kiʻi ʻofefiné.” Ko e foʻi sētesi fakaʻosi ko iá ne hangē naʻá ne hokohokaʻi aú. Neongo ia, naʻá ku ʻilo ʻi heʻeku nofo pilīsoné, ʻe tokangaʻi ai ʻe Sihova ʻa hoku fāmilí ʻo lelei ange ia ʻi haʻaku tokangaʻi ʻe au tonu, pea naʻe pehē!

Naʻe feinga ʻa e kau maʻu mafaí ke fakamālohiʻi ʻa Anni ke ngāue taimi kakato kae tuku ki ha niʻihi kehe ke nau tokangaʻi ʻa Ruth he lolotonga ʻo e uiké. Naʻe ʻikai ke tali  ia ʻe Anni peá ne ngāue poʻuli ai koeʻuhi kae malava ke ne tokangaʻi ʻa Ruth ʻi he ʻahó. Naʻe mātuʻaki tokanga ʻaupito ʻa homau fanga tokoua fakalaumālié ʻo nau ʻoange ʻa e ngaahi meʻa lahi ki hoku uaifí ʻo malava ai ke ne vahevahe ia mo e niʻihi kehé. Lolotonga iá naʻá ku fakamoleki ʻa e toe meimei taʻu ʻe ono ʻi pilīsone.

Founga ʻo ʻEmau Tauhi Maʻu ʻEmau Tuí ʻi Pilīsoné

ʻI heʻeku toe foki ki pilīsoné, naʻe vēkeveke ʻa hoku kaungā pōpula Fakamoʻoní ke ʻiloʻi ʻa e ngaahi meʻa naʻe toki pulusí. Ko ha fiefia moʻoni ē ko au ʻi heʻeku ako fakamākukanga ʻa e makasini Taua Leʻo mo ʻeku ʻalu maʻu pē ki he ngaahi fakatahá ʻo malava ai ke u hoko ko ha fakalototoʻa fakalaumālie kia kinautolu!

ʻI he taimi naʻa mau kole ai ha Tohi Tapu ki he kau leʻó, naʻa nau tali mai: “Ko hono ʻoange ha Tohi Tapu ki he Kau Fakamoʻoni ʻa Sihová ʻoku fakatuʻutāmaki tatau pē ia mo hono ʻoange ha ngaahi meʻangāue ki ha pōpula hae fale ke hola ai.” ʻI he ʻaho taki taha, ko e fanga tokoua naʻe takimuʻá naʻa nau fili ha konga Tohi Tapu ke mau talanoa ki ai. Lolotonga ʻa ʻemau taimi lue fakaʻaho haafe houa ʻi he lotoʻaá, naʻe ʻikai te mau mahuʻingaʻia ʻi he fakamālohi sinó mo e ʻea leleí ʻo hangē ko ia ko e ʻaonga naʻa mau maʻu mei he konga Tohi Tapu fakaʻahó. Neongo naʻe pau ke mau vāmamaʻo ʻaki ʻa e mita ʻe 5 mei he tokotaha taki taha pea ʻikai ngofua ke fai ha talanoa, naʻa mau kei maʻu pē ʻa e ngaahi founga ke feʻaveʻaki holo ai ʻa e konga tohí. ʻI heʻemau foki ki homau pilīsoné, naʻa mau fakatahatahaʻi ʻa e meʻa naʻe malava ke fanongo ki ai ʻa e tokotaha taki taha, pea fai leva ai ʻemau talanoa Fakatohitapu fakaʻahó.

Faifai atu pē, naʻe tala kimautolu ʻe ha tokotaha sipai pea naʻe tuku ai au ʻi he pilīsone malú. Ko ha tāpuaki moʻoni he ʻi he taimi ko iá naʻá ku maʻuloto ai ha ngaahi konga Tohi Tapu ʻe laui teau! Ko e ngaahi ʻaho nofo noa ko iá, naʻá ku fakalaulauloto ai ki ha ngaahi tuʻunga-lea Fakatohitapu kehekehe. Hili iá, naʻe ʻave au ki ha toe pilīsone ʻe taha, ʻa ia naʻe tuku fakataha ai au ʻe he leʻó mo ha toe ongo Fakamoʻoni kehe pea—ko e meʻa fakafiefia tahá—naʻá ne ʻomai kia kimautolu ha Tohi Tapu. Hili ʻa e māhina ʻe ono ʻo e nofo ʻi he pilīsone malú, naʻá ku houngaʻia ʻi he toe malava ke u lāulea ki he ngaahi tuʻunga-lea Fakatohitapú mo hoku ngaahi kaungātuí.

Ko e fakamatala eni ʻa hoku tokoua ko Peter ki he meʻa naʻá ne tokoniʻi ia ke ne kātaki ʻi heʻene nofo ko ia ʻi ha pilīsone ʻe taha: “Naʻá ku fakakaukauloto ki he moʻui ʻi he māmani foʻoú pea ʻai hoku ʻatamaí ke nōfoʻi ʻi he ngaahi fakakaukau Fakatohitapú. Ko kimautolu Kau Fakamoʻoní naʻa mau fefakaivimālohiʻaki ʻi hono ʻeke ʻa e ngaahi fehuʻi Fakatohitapu pe fai ha sivi ʻi he ngaahi konga Tohi Tapú. Ko e moʻuí naʻe ʻikai ke faingofua. ʻI he taimi ʻe niʻihi, naʻe tuku ai ha toko 11 ʻo kimautolu ʻi ha kiʻi foʻi feituʻu naʻe sikuea mita nai ʻe 12. Naʻe pau ke mau fai ʻi ai ʻa e meʻa kotoa pē—kai, mohe, kaukau pea mo hono ngāueʻaki ki he falemālōloó. Ne mau pāhia ai mo ʻitangofua.”

Ko e fakamatala eni ʻa Jochen, ʻa ia ko e taha ʻi hoku fanga tokouá, ki heʻene nofo pilīsoné: “Naʻá ku hiva ʻa e ngaahi hiva naʻá ku manatuʻi ʻi heʻetau tohi hivá. ʻI he ʻaho kotoa pē, naʻá ku fakalaulauloto ki ha konga Tohi Tapu naʻá ku maʻuloto. ʻI heʻeku ʻataá, naʻá ku hokohoko atu ai pē ʻi hono maʻu ʻo e fakahinohino lelei fakalaumālié. ʻI he ʻaho taki taha, naʻá ku lau fakataha ai mo hoku fāmilí ʻa e konga Tohi Tapu fakaʻahó. Naʻa mau toe teuteu foki ki he ngaahi fakatahá kotoa.”

ʻAtā ʻa e Fineʻeikí mei Pilīsoné

Naʻe ʻatā ʻa e fineʻeikí ʻi he hili ia hano tuku pōpula ʻo fakalaka siʻi hake he taʻu ʻe ua. Naʻá ne ngāueʻaki ʻa ʻene tauʻatāiná ke ne ako ai ʻa e Tohi Tapú mo Hannelore mo Sabine, ʻo tokoniʻi kinaua ke na fakatoka ha makatuʻunga lelei ki heʻena tuí. Naʻá ne toe akoʻi foki kinaua ke na fakaleleiʻi ʻa e ngaahi ʻīsiu naʻe malanga hake ʻi he ʻapiakó koeʻuhi ko ʻena tui ki he ʻOtuá. Ko e lau eni ʻa Hannelore: “Naʻe ʻikai te ma tokanga ki hono ngaahi nunuʻá, koeʻuhi ʻi ʻapí ne mau fefakalototoʻaʻaki ai. Koeʻuhi ko e haʻi mālohi ʻa homau fāmilí naʻe ʻikai ai te ma tokanga ki ha faʻahinga faingataʻa pē naʻá ma hokosia.”

Ko e hoko atu eni ʻa Hannelore: “Naʻa mau toe ʻave foki ʻa e meʻakai fakalaumālie ki homau fanga tuongaʻane ʻi pilīsoné. Naʻa mau hiki nima mataʻitohi iiki ha ʻīsiu kakato ʻo e Taua Leʻo ʻi ha pepa hekeheke. Naʻa mau kofu leva ʻa e ngaahi pēsí ʻi ha pepa ʻoku ʻikai lava ke hū ki ai ʻa e vaí pea fufū leva ia ʻi ha ngaahi foʻi palamu ʻa ia naʻa mau ʻave ʻi he kofukofu naʻe ʻave fakamāhiná. Ko ha fiefia moʻoni hono maʻu ʻa e tala naʻe ‘fuʻu ifo ʻaupito’ ʻa e ngaahi foʻi palamú. Naʻa mau fuʻu femoʻuekina ʻaupito ʻi heʻemau ngāué pea ko ha taimi fakafiefia moʻoni ia.”

 Moʻui ʻi he Malumalu ʻo e Tapuí

ʻOku fakamatala ʻa Peter ki he anga ʻo e nofo ʻi he ngaahi hongofuluʻi taʻu ʻi he malumalu ʻo e tapuí ʻi Siamane Hahaké: “Naʻa mau fakataha ʻi ha ngaahi ʻapi nofoʻanga ʻi he fanga kiʻi kulupu iiki, ʻo aʻu mo foki mei ai ʻi he ngaahi taimi kehekehe. ʻI he fakataha taki taha, naʻa mau fai ai ʻa e ngaahi fokotuʻutuʻu ki he fakataha hono hokó. Naʻa mau fai eni fakafou ʻi ha ngaahi fakaʻilonga mo ha ngaahi nouti naʻe hiki koeʻuhi ko e fakamanamana maʻu pē ʻo hono fakaongo kimautolu ʻe he Stasi.”

Ko e fakamatala eni ʻa Hannelore: “ʻI he taimi ʻe niʻihi naʻa mau maʻu ai ʻa e ngaahi foʻi tepi ʻo e ngaahi polokalama ʻasemipilií. Ko e tupuʻanga maʻu pē eni ʻo ha fakataha fiefia. Naʻe fakatahataha mai ʻemau kiʻi kulupú ke fanongo ʻi ha ngaahi houa ki he fakahinohino Fakatohitapú. Neongo naʻe ʻikai malava ke mau sio ki he kau malangá, naʻa mau muimui tokanga ʻi he polokalamá pea hiki mo e ngaahi nouti.”

ʻOku pehē ʻe Peter: “Ko homau fanga tokoua Kalisitiane ʻi he ngaahi fonua kehé naʻa nau fāinga mālohi ke ʻomai kia kimautolu ha ʻū tohi Fakatohitapu. Ko e hongofuluʻi taʻu fakamuimui pe ofi ai, ki muʻa ke holafa ʻa e ʻā ʻo Pēliní ʻi he 1989, naʻa nau faʻu ai ʻa e fanga kiʻi tohi iiki makehe maʻa kimautolu. Naʻe tuku ʻe he niʻihi ke ʻi he tuʻunga fakatuʻutāmaki ʻenau kaá, ko ʻenau paʻangá, pea naʻa mo ʻenau tauʻatāiná ke ʻomai ai ʻa e meʻakai fakalaumālié ki Siamane Hahake. ʻI he pō ʻe taha, naʻe ʻikai ke ʻasi mai ai ha ongo meʻa naʻa mau tatali ki ai. Naʻe maʻu ʻe he kau polisí ʻa e ʻū tohí pea faʻao ai ʻena kaá. Neongo ʻa e ngaahi fakatuʻutāmakí, naʻe ʻikai te mau teitei fakakaukau ke tuku ʻa e ngāué ni koeʻuhí pē ke mau maʻu ai ha moʻui fiemālie ange.”

Ko Manfred, ʻa hoku tehina naʻá ne lavakiʻi kimautolu ʻi he 1950, ʻokú ne fakamatala ki he meʻa naʻá ne tokoniʻi ia ke ne toe maʻu pea tauhi maʻu ai ʻa ʻene tuí: “Hili hono fakahū pilīsone au ʻi ha ngaahi māhina siʻi, naʻá ku hiki ki Siamane Hihifo pea liʻaki ai ʻa e moʻoní. ʻI he 1954, naʻá ku foki ki Siamane Hahake peá u mali ʻi he taʻu hono hokó. Naʻe ʻikai fuoloa kuo tali lelei ʻe hoku uaifí ʻa e moʻoni ʻo e Tohi Tapú, pea ʻi he 1957 naʻá ne papitaiso ai. ʻI he ʻalu ʻa e taimí, naʻe kamata ke fakahohaʻasi au ʻe hoku konisēnisí pea ʻi he tokoni ʻa hoku uaifí naʻá ku toe foki ai ki he fakatahaʻangá.

“Ko e fanga tokoua Kalisitiane naʻa nau ʻiloʻi au ki muʻa peá u liʻaki ʻa e moʻoní naʻa nau talitali anga-ʻofa au ʻo hangē pē naʻe ʻikai ha meʻa ʻe hokó. Ke fakafeʻiloaki mai ʻaki ha malimali mo ha fāʻofua māfaná ko e meʻa lelei moʻoni. ʻOku ou fiefia ʻaupito ʻi heʻeku toe maʻu ʻa e vahaʻangatae lelei mo Sihova pea mo hoku fanga tokouá.”

Hokohoko Atu ʻa e Faitau Fakalaumālié

Ko e tokotaha kotoa pē ʻi homau fāmilí naʻe pau ke ne faitau mālohi maʻá e tuí. “ʻI he ʻahó ni,” ko e lea ia ʻa hoku tokoua ko Peter, “ʻo ʻikai hano tatau ki muʻa, ʻoku ʻātakaiʻi ai kitautolu ʻe he ngaahi fakalelu lahi mo e ngaahi fakatauele fakamatelie. ʻI he malumalu ʻo e tapuí naʻa tau fiemālie pē ai ʻi he meʻa naʻa tau maʻú. Ko e fakatātaá, naʻe ʻikai ha taha ia naʻe loto ke ʻalu ki ha kulupu ako kehe koeʻuhi pē ko ha ngaahi ʻuhinga fakafoʻituitui, pea naʻe ʻikai ha taha ʻe lāunga naʻe fuʻu mamaʻo pe fuʻu poʻulia ʻa e ngaahi fakatahá. Naʻa tau fiefia kotoa pē ke tau fakatahataha, neongo kapau naʻe pau ke tali ha niʻihi ʻia kitautolu ʻo aʻu ki he 11:00 poʻulí ke toki mavahe ai mei he feituʻu faiʻanga fakatahá.”

 ʻI he 1959, naʻe fili ai ʻa e fineʻeikí ke hiki ki Siamane Hihifo mo Sabine, ʻa ia naʻá ne taʻu 16 he taimi ko iá. Koeʻuhi naʻá na loto ke na ngāue ʻi he feituʻu naʻe lahi ange ai ʻa e fiemaʻu ki ha kau malanga ʻo e Puleʻangá, naʻe ʻomai ai ʻa e tataki mei he ʻōfisi vaʻá ke na ʻalu ki Ellwangen, Baden-Württemberg. Ko e faivelenga ʻa e fineʻeikí neongo ʻene mahamahakí naʻe ueʻi ai ʻa Sabine ke ne kamata tāimuʻa ʻi hono taʻu 18. ʻI he taimi naʻe mali ai ʻa Sabine, naʻe ako fakaʻuli ʻa e fineʻeikí—ʻi hono taʻu 58—koeʻuhi ke toe fakalahi ange ʻa ʻene kau ki he ngāue fakamalangá. Naʻá ne koloaʻaki ʻa e ngāué ni ʻo aʻu ki heʻene mālōlō ʻi he 1974.

Ko au leva, ʻi he hili ʻa e ngāue ʻi he meimei taʻu ʻe ono ʻi hoku tautea ngāue pōpula hono uá, naʻe ʻave au ʻi he 1965 ki Siamane Hihifo ʻo ʻikai ke ʻilo ki ai ʻa hoku fāmilí. Kae kehe, ʻi he faai atu ʻa e taimí naʻe ʻalu ange ai ʻa hoku uaifí, ʻa Anni mo homa ʻofefine ko Ruth. Naʻá ku kole ki he ʻōfisi vaʻá pe ʻe lava ke mau ngāue ʻi he feituʻu naʻe fiemaʻu lahi ange ai ʻa e kau malangá, ko ia naʻa nau kole mai ke mau ʻalu ki Nördlingen, Bavaria. Ko e feituʻu ko iá naʻe tupu hake ai ʻa Ruth pea mo hono tuongaʻane ko Johannes. Naʻe ngāue tāimuʻa ʻa Anni. Ko ʻene faʻifaʻitakiʻanga leleí naʻe ueʻi ai ʻa Ruth ke ne tāimuʻa ʻi he hili pē ʻene akó. Fakatouʻosi ʻa ʻema ongo tamaikí naʻá na mali mo e ongo tāimuʻa. Kuo ʻi ai hona fāmili he taimí ni pea ʻoku faitāpuekina ʻaki kimaua ʻa e fanga makapuna fakaʻofoʻofa ʻe toko ono.

ʻI he 1987, naʻá ku maʻu ai ʻa e faingamālie ke u mālōlō mai ki muʻa mei he ngāué ʻou kau fakataha ai mo Anni ʻi he ngāue tāimuʻá. ʻI he taʻu ʻe tolu ki mui ai, naʻe fakaafeʻi ai au ki he ʻōfisi vaʻa ʻi Selters ke u tokoni ki hono fakalahi ʻa e vaʻá. Hili iá, naʻá ma tokoni ki hono langa ʻo e ʻuluaki Holo ʻAsemipilī ʻo e Kau Fakamoʻoni ʻa Sihová ʻi he konga ko ē naʻe Siamane Hahaké, ʻi Glauchau, ʻa ia naʻá ma ngāue ai ki mui ko e ongo tauhi ʻapi. Koeʻuhi ko ha ngaahi ʻuhinga fakaemoʻuilelei, naʻá ma foki ai ke ma fakataha mo homa ʻofefiné ʻi he Fakatahaʻanga Nördlingen, ʻa ia ʻokú ma ngāue tāimuʻa ai.

ʻOku ou fiefia lahi he ko e kotoa ʻo hoku fanga tokouá mo hoku ongo tuofefiné pea mo e tokolahi taha ʻo homau fāmilí ʻoku hokohoko atu ʻenau tauhi ʻa hotau ʻOtua lelei ko Sihová. ʻI he faai mai ʻa e ngaahi taʻú kuo mau ako ai, ʻi heʻemau nofoʻaki mālohi fakalaumālié, ʻoku malava ke mau hokosia ʻa e moʻoni ʻo e lea ʻi he Sāme 126:3: “‘Kuo fai meʻa lalahi [maʻamautolu] ʻe Sihova.’ Pea ʻoku [mau] fuʻu fiefia.”

[Fakatātā ʻi he peesi 13]

ʻI homa ʻaho malí, 1957

[Fakatātā ʻi he peesi 13]

Fakataha mo hoku fāmilí ʻi he 1948: (ʻi muʻá, mei toʻohema ki toʻomataʻu) Manfred, Berta, Sabine, Hannelore, Peter; (ʻi muí, mei toʻohema ki toʻomataʻu) ko au mo Jochen

[Fakatātā ʻi he peesi 15]

Ko ha kiʻi tohi naʻe ngāueʻaki lolotonga ʻa e tapuí mo e meʻangāue fakaongo talanoa ʻa e “Stasi”

[Maʻuʻanga]

Forschungs- und Gedenkstätte NORMANNENSTRASSE

[Fakatātā ʻi he peesi 16]

Fakataha mo hoku fanga tokouá mo hoku ongo tuofefiné: (ʻi muʻá, mei toʻohema ki toʻomataʻu) Hannelore mo Sabine; (ʻi muí, mei toʻohema ki toʻomataʻu) ko au, Jochen, Peter mo Manfred