Ko e Hā ʻOku Fiemaʻu Ai ke ʻIloʻi ʻa e Fili ʻo Kalaisí?

“[Naʻa] mou fanogo e haʻu ae Fili o Kalaisi,” ko e tohi ia ʻa e ʻapositolo naʻe fakamānavaʻi ʻi he kuohilí. (1 Sione 2:​18, “PM”) He fakatoʻoaloto moʻoni ko e ngaahi lea ko iá! Kuo fifili ʻa e kakaí ʻi he laui senituli ki hono ʻuhingá. Ko hai ʻa e fili ʻo Kalaisí? ʻE haʻú ʻafē? Ko e hā te ne fai ʻi heʻene haʻú?

KO E fakahokohoko ʻo e faʻahinga kuo tukuakiʻi ko e fili ʻo Kalaisí ʻoku lōloa. ʻI he kuohilí, ko e faʻahinga naʻe ui ko e “Fili o Kalaisi” naʻe kau ai ʻa e kau Siú, ko e lakanga fakatuʻitapú mo e kau ʻEmipola Lomá. Ko e fakatātaá, ʻi he taimi naʻe fili ai ʻa ʻEmipola Feletiliki II (1194-​1250) ke ʻoua ʻe kau ʻi ha tau Kaluseti maʻá e siasí, naʻe ui ai ia ʻe Tuʻitapu Kelekōlio IX ko e fili ʻo Kalaisí pea tuʻusi ia mei he siasí. Naʻe toe tuʻusi ia mei he siasí ʻe he fetongi ʻo Kelekōlió, ko ʻInoseni IV. ʻI he tali ki aí, naʻe fakahaaʻi ai ʻe Feletiliki ko ʻInoseni ʻa e fili ʻo Kalaisí.

Ko e ʻapositolo pē ko Sioné ʻa e tokotaha-tohi Tohi Tapu naʻá ne ngāueʻaki ʻa e foʻi lea “Fili o Kalaisi.” ʻI he ua ʻo ʻene ngaahi tohi ʻoku uiʻaki hono hingoá, ʻoku hā tuʻo nima ai ʻa e foʻi leá, ʻo fakatou singulali mo palulali. Ko e ngaahi veesi ʻa ia ʻoku hā ai ʻa e foʻi leá ʻoku fakahokohoko ia ʻi he puha ʻi he peesi hono hokó. Mei he ngaahi veesi ko iá, ʻoku lava ke tau sio ai ko e fili ʻo Kalaisí ko ha tokotaha loi mo kākā, ʻokú ne fakapapauʻi ke fakaʻauha ha vahaʻangatae ʻo ha taha mo Kalaisi pea mo e ʻOtuá. Fakatatau ki ai, naʻe ekinaki ʻa e ʻapositoló ki hono kaungā Kalisitiané: “Siʻi ʻofaʻanga, ʻoua te mou tui ki he laumalie fulipe, ka mou sivi pe ʻa e ngaahi laumalie, pe ʻoku mei he ʻOtua ia: he ʻoku tokolahi ʻa e kau palofita loi kuo ʻalu atu ki mamani.”—1 Sione 4:1.

Naʻe fakatokanga foki mo Sīsū ʻo fekauʻaki mo e kau kākā, pe kau palōfita loi, ʻi heʻene pehē: “ʻOku [nau] haʻu kiate kimoutolu ʻoku nau kofu hange ha sipi, ka ʻi loto ko e fanga ulofi fekai kinautolu. Ko honau ngāhi fua [pe ngaahi ngāué] te mou ʻilo lelei ai kinautolu.” (Mātiu 7:​15, 16) Naʻe toe fakatokanga ʻa Sīsū ki hono kau muimuí ʻo fekauʻaki mo e fili fakaefakatātā ʻo Kalaisí? Tau sio angé ki he founga ʻe lava ke tau ʻiloʻi ai ʻa e tokotaha kākā fulikivanu ko ení.