Ngaahi Fehuʻi mei he Kau Lautohí

Naʻe taʻefakaʻapaʻapa pe taʻeʻofa ʻa Sīsū ʻi he anga ʻo ʻene lea ki heʻene faʻeé ʻi he kātoanga mali ʻi Kená?—Sione 2:4.

Taimi siʻi pē hili ʻa hono papitaisó, naʻe fakaafeʻi ai ʻa Sīsū mo ʻene kau ākongá ki ha kātoanga mali ʻi Kena. Naʻe ʻi ai foki ʻene faʻeé. ʻI he taimi naʻe nounou ai ʻa e uainé, naʻe tala ange ʻe Mele kia Sīsū: “ʻOku ʻikai haʻanau uaine.” ʻI heʻene tali kiate iá, naʻe tala ange ʻe Sīsū ki heʻene faʻeé: “Fefine, ko ho ha au? kuo teʻeki hoko mai hoku taimi.”—Sione 2:​1-4.

ʻI he ʻahó ni, ke ui ʻe ha taha ʻene faʻeé ko e “Fefine” pea ke pehē ange “ko ho ha au?” ʻoku vakai nai ki ai ko ha anga taʻefakaʻapaʻapa naʻa mo haʻane tuku hifo ia. Ka ke fai ha ngaahi tukuakiʻi pehē kia Sīsuú ʻoku tukunoaʻi ai ʻa e anga fakafonua mo e puipuituʻa fakaelea ʻo e meʻa naʻe hokó. ʻE ʻaonga lahi ke mahinoʻi ʻa hono ngāueʻaki ʻo e ongo kupuʻi lea ko ení ʻi he taimi ʻo e Tohi Tapú.

ʻI he fekauʻaki mo e kupuʻi lea “Fefine,” ʻoku fakamatala ʻa e Vine’s Expository Dictionary of Old and New Testament Words: “ʻI hono ngāueʻaki ʻi he lea ki ha fefiné, naʻe ʻikai ko ha foʻi lea valokiʻi ia pe anga-fefeka, ka ko e foʻi lea ʻo e ongoʻi ʻofa pe fakaʻapaʻapa.” ʻOku loto-tatau mo ia ʻa e ngaahi maʻuʻanga fakamatala kehé. Ko e fakatātaá, ʻoku pehē ʻe he Anchor Bible: “ʻOku ʻikai ko ha valokiʻi eni ia, pe ko ha foʻi lea taʻefakaʻapaʻapa, pe ko ha fakahaaʻi ʻo e taʻeʻofa . . . Ko e founga anga-maheni mo fakaʻapaʻapa pē ia ʻo e lea ʻa Sīsū ki he kakai fefiné.” ʻOku fakamatala ʻa e New International Dictionary of New Testament Theology ko e foʻi leá “naʻe ʻikai ke ngāueʻaki ia ko ha kupuʻi lea ʻo e taʻetokaʻi.” Pea ʻoku pehē ʻi he Theological Dictionary of the New Testament ʻa Gerhard Kittel ko hono ngāueʻaki peheʻí “ʻoku ʻikai ʻaupito ko ha anga taʻefakaʻapaʻapa ia pe lea tuku hifo.” Ko ia ai, ʻoku totonu ke ʻoua te tau fakaʻosiʻaki naʻe taʻefakaʻapaʻapa pe taʻeʻofa ʻa Sīsū ki heʻene faʻeé ʻi hono leaʻaki kiate ia ʻa e foʻi lea ko e “Fefine.”—Mātiu 15:28; Luke 13:12; Sione 4:21; 19:26; 20:​13, 15.

Kae fēfē ʻa e kupuʻi lea ia “ko ho ha au?” ʻOku hangehangē ko ha lea fakatātā faka-Siu anga-maheni eni ʻoku faʻa hā ʻi he Tohi Tapú. Ko e fakatātaá, ʻi he 2 Samiuela 16:​10, ʻoku tau ʻiloʻi ai hono taʻofi ʻe Tēvita ʻa ʻApisai mei heʻene fakapoongi ʻa Simí ʻaki ʻene pehē: “Ko homo ha au, ongo tama ʻa Seluvaia? Kapau kuo ne kape mai, pea kapau kuo pehe ʻe Sihova kiate ia, Ke ke kape kia Tevita.” ʻOku tatau pē mo e meʻa ʻoku tau lau ʻi he 1 Tuʻi 17:18 ʻo kau ki he lea ʻa e uitou Salepitá kia ʻIlaisiā ʻi heʻene ʻiloʻi kuo mate ʻene tamá: “ʻE tangata ʻo Elohimi, ko ho ha au? ta naʻa ke haʻu ki heni ke fakamanatu mai ʻeku hia, mo tamateʻi ʻeku tama!”

Mei he ngaahi fakatātā Fakatohitapu ko ení, ʻoku lava ke tau ʻiloʻi ai ʻoku faʻa ngāueʻaki ai ʻa e kupuʻi lea “ko ho ha au?” ʻo ʻikai ke fakahaaʻi ai ha lea paetaku pe hīkisia, ka ko e fakafisi ke kau ʻi ha ngāue ʻoku fokotuʻu pe fakahaaʻi mai ke te fai, pe ko hono fakahaaʻiʻaki ʻa e kehe ʻi he anga ʻo e fakakaukaú pe vakaí. Ko e hā leva ʻe lava ke leaʻaki ʻo kau ki he ngaahi lea ʻa Sīsū kia Melé?

ʻI he tala ange ko ia ʻe Mele kia Sīsū “ʻOku ʻikai haʻanau uaine,” ʻoku hā mahino naʻe ʻikai te ne fakahaaʻi pē kia Sīsū ʻa e foʻi moʻoni ko iá ka naʻá ne fokotuʻu ange ke ne fai ha meʻa ki ai. Naʻe ngāueʻaki ʻe Sīsū ʻa e lea fakaefakatātā anga-maheni ko iá ke fakafisingaʻi ʻaki ʻa e fokotuʻu fakapotopoto ʻa Melé, pea ko ʻene hoko atu ko ia ʻo pehē, “kuo teʻeki hoko mai hoku taimi,” ʻoku tokoniʻi ai kitautolu ke tau mahinoʻi ʻa e ʻuhinga ʻo ʻene lea peheé.

Mei he taimi ʻo hono papitaiso ia pea pani ʻi he 29 T.S., naʻe mātuʻaki lāuʻilo ai ʻa Sīsū ko e finangalo ia ʻo Sihova kiate iá, ʻi hono tuʻunga ko e Mīsaia naʻe talaʻofaʻakí, ke ne muia ha ʻalunga ʻo e anga-tonú ʻa ia ʻe iku atu ki heʻene pekia, toetuʻu pea fakalāngilangiʻí. Naʻá ne pehē: “Ko e Fanautama ʻa Tangata naʻe ʻikai te ne haʻu ke maʻu sevaniti, ka ke sevaniti pe ʻe ia, pea ke tuku ʻene moʻui ke huhuʻiʻaki ha tokolahi.” (Mātiu 20:28) ʻI he maluʻaki mai ʻa e taimi ke ne pekia aí, naʻe fakahaaʻi mahino ʻe Sīsū ʻa e meʻá ni ʻi heʻene lea: “Kuo hokosia ʻa e taimi.” (Sione 12:​1, 23; 13:1) Ko ia ʻi heʻene lotu he pō ki muʻa peá ne pekiá, naʻe pehē ai ʻe Sīsū: “ʻAlā Tamai, kuo hokosia ʻa e taimi: ke ke fakalangilangiʻi ho ʻAlo, koeʻuhi  ke fakalangilangiʻi ʻe he ʻAlo ʻa e ʻAfiona.” (Sione 17:1) Pea ʻi he faai pē ʻo aʻu mai ʻa e fuʻu kakaí ke puke ia ʻi he ngoue Ketisemaní, naʻe fafangu hake ai ʻe Sīsū ʻa e kau ʻapositoló ʻo ne pehē: “Kuo hokosia hono taimi; ʻe, ʻoku lavakiʻi ʻa e Fanautama ʻa Tangata ki he kau angahala.”—Maake 14:41.

Kae kehe, ʻi he mali ʻi Kená ko e toki kamata pē ia ʻa Sīsū ʻi heʻene ngāue fakafaifekau ʻi he tuʻunga ko e Mīsaiá, pea naʻe teʻeki ke hoko mai hono “taimi.” Ko ʻene taumuʻa tefitó ke fai ʻa e finangalo ʻo ʻene Tamaí ʻi he founga mo e taimi naʻe fakahinohino ange ʻe heʻene Tamaí, pea ʻoku ʻikai ha taha ʻe lava ke ne toe ueʻia hono ʻalunga kuo ʻosi fakapapauʻí. ʻI hono fakahaaʻi eni ki heʻene faʻeé, naʻe tuʻumaʻu ʻa Sīsū kae ʻikai ʻaupito taʻefakaʻapaʻapa pe taʻeʻofa. Ko ia ai, naʻe ʻikai ongoʻi ʻe Mele kuo fakamaaʻi pe tuku hifo ia ʻe heʻene tamá. Ko hono moʻoní, ʻi heʻene mahinoʻi ʻa e ʻuhinga ʻa Sīsuú, naʻe tala ange ai ʻe Mele ki he kau ngāue ʻi he malí: “Neongo pe ko e hā ha meʻa te ne tala kiate kimoutolu, mou fai.” ʻI he ʻikai ke tukunoaʻi ʻene faʻeé, naʻe fakahoko ai ʻe Sīsū ʻene fuofua mana ʻi hono tuʻunga ko e Mīsaiá—ʻo liliu ʻa e vaí ko e uaine lelei—ʻo ne fakahāhā ai ha mafamafatatau lelei ʻi hono fai ʻa e finangalo ʻo ʻene Tamaí pea mo ʻene tokanga ki he fiemaʻu ʻene faʻeé.—Sione 2:​5-11.

[Fakatātā ʻi he peesi 31]

Naʻe anga-ʻofa ʻa Sīsū ka naʻá ne tuʻumaʻu ʻi heʻene lea ki heʻene faʻeé