ʻOkú Ke Manatuʻi?

Kuó ke mālieʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:

• Ko e hā ʻe lava ke ne tokoniʻi ha Kalisitiane moʻoni kapau ʻe mavahe ha tokotaha ʻofeina meia Sihova?

Langa hake koe pea mo e ngaahi mēmipa faitōnunga kehe ʻo e fāmilí. Hanganaki femoʻuekina ʻi he ngaahi ngāue fakalaumālié. Fakafaingamālieʻi koe ke ke tokoniʻi ʻa e niʻihi kehé. ʻOua ʻe mole ʻa e ʻamanaki ʻe toe foki mai ʻa e tokotaha ʻofeiná. ʻOua ʻe tukuakiʻi koé. Tokaʻi ʻa e fokotuʻutuʻu ʻa e ʻOtuá ki he akonakí, pea fakahaaʻi hoʻo ngaahi ongó ki he ngaahi kaumeʻá.—9/1, peesi 18-21.

• Ko e hā ʻa e founga ʻe ua ʻoku tokoni ai ʻa e Tohi Tapú ke ʻiloʻi ʻa e ngaahi “kuonga fakamui”?

ʻOku tomuʻa tala ʻe he Tohi Tapú ʻa e ngaahi meʻa ʻe hoko lolotonga e “faka ʻosi ʻo e kuonga.” (Mātiu 24:3, 7, 8; Luke 21:11) ʻOku toe fakamatalaʻi ai ʻa e ngaahi liliu ʻi he fakakaukau mo e tōʻonga ʻa e kakai ʻoku moʻui lolotonga ʻa e “kuonga fakamui.” (2 Timote 3:1-5) Ko e meʻa mahuʻingá, naʻe pau ke toe malangaʻi ʻa e ongoongo lelei ʻo e Puleʻangá lolotonga ʻa e taimi ko ení.—9/15, peesi 4-6.

• Ko e hā ʻa e fatongia ʻo e fakatahaʻangá kapau ʻoku fakatupunga ha fakatuʻutāmaki ʻe ha Kalisitiane ʻokú ne fakaʻuli ʻi ha meʻalele ʻo iku ke mate ai ha niʻihi kehe?

Ko e kau mātuʻa ʻoku nau vakaiʻi ʻa e meʻa naʻe hokó te nau ʻiloʻi nai ai ʻoku ʻikai ha halaia ʻi he totó koeʻuhi naʻe ʻikai loko lava pe ʻikai lava ʻe he tokotaha fakaʻulí ke mapuleʻi ʻa e meʻa naʻe fakatupunga ai ʻa e maté. Ka ʻo kapau ʻoku ʻi ai ha halaia he totó pea ʻoku fakatomala ʻa e tokotaha halaiá, ʻe fai ki ai ʻa e valoki Fakatohitapu pea ʻe fakangatangata ia mei he ngaahi monū ʻi he fakatahaʻangá.—9/15, peesi 30.

• Ko e ha ʻoku ʻikai ke fakatuʻunga ai ʻa e moʻui taʻengatá ʻi he ngaahi fakalakalaka fakasaienisí?

ʻOku ʻi ai ʻa e ngaahi feinga fakasaienisi ki hono fakalōloa ʻa e moʻuí, hangē ko e feinga ke fakalahi ʻa e taimi ʻoku toe fakafoʻou ai ʻe he ngaahi selá ʻa kinautolu peé pe ko hono faʻu fakafaitoʻo ʻa e tatau ʻo e tangatá ke tokonaki maʻá e kau mahakí ʻa e ngaahi ʻōkani foʻou mo tatau tofu pē. Ka ʻoku fakahaaʻi ʻe he Tohi Tapú ko e ʻuhinga pē taha ʻa ia ʻe lava ai ke maʻu ʻe he tangatá ʻa e moʻui taʻengatá ko e huhuʻi ʻa Sīsuú.—10/1, peesi 3-5.

• Ko e kaukau fakaeouau faka-Siú ko ha fakamelomelo ia ʻo e papitaiso faka-Kalisitiané?

ʻIkai. Naʻe fai ʻe he kau Siú ʻa e ngaahi fakamaʻa fakaeouau kia kinautolu, ʻa ia naʻe ʻikai ke fiemaʻu ia ʻe he papitaiso ʻa Sioné. Ko e fakamaʻa naʻe fiemaʻu ʻe he lao ʻa Mōsesé naʻe pau ke toutou fai ia, ka ko e papitaiso faka-Kalisitiané ʻoku fakahoko tuʻo taha pē ia.—10/15, peesi 12-13.

• Ko e Hā ʻa e Akoʻanga Ako Fakafaifekaú?

Ko ha koosi uike valu ia maʻá e kau mātuʻa mo e kau sevāniti fakafaifekau ʻo e fakatahaʻangá ʻoku teʻeki malí pea ʻoku nau ʻi ha tuʻunga ke vaheʻi kinautolu ke nau ngāue ʻi ha feituʻu ʻoku lahi ai ʻa e fiemaʻú. Mahalo pē nai ko honau vāhenga-ngāué ʻa e fakatahaʻanga ʻa ia naʻa nau haʻu mei aí, ʻi ha feituʻu kehe he fonua ko iá, pe ʻi ha toe fonua ʻe taha.—11/15, peesi 10-11.

• Ko e hā pe ko hai ʻa e Fili ʻo Kalaisi ʻa ia ʻoku lave ki ai ʻi he 1 Sione 2:18; 4:3, PM?

ʻI ha ʻuhinga lahi tahá, ʻoku ʻuhinga ʻa e “fili o Kalaisi” ki he faʻahinga kotoa ʻoku nau fakafepakiʻi pe taukaveʻi loi ko Kalaisi kinautolu pe ko ʻene kau fakafofonga. Ko e ngaahi lea ʻa Sīsū mo Sioné ʻoku fakahaaʻi ai ko e fili ʻo Kalaisí ko ha kulupu fakatahatahaʻi ia ʻoku faʻuʻaki ʻa e ngaahi fili tāutaha tokolahi ʻo Kalaisi ʻa ia ʻoku nau fakamafola ʻa e kākā fakalotú mo talitekeʻi ʻa e Puleʻanga ʻo e ʻOtuá.—12/1, peesi 4-6.