Pulusinga Ako Foʻou ʻo e Taua Leʻo

KO E makasini ʻokú ke lolotonga laú ni ko e ʻuluaki ʻīsiu ia ʻo e pulusinga ako ʻo e Taua Leʻo. ʻOku mau loto ke fakamatalaʻi atu ʻa e niʻihi e ngaahi tafaʻaki ʻo e fokotuʻutuʻu foʻou ʻo e makasini ko ʻení.

Ko e pulusinga akó ʻoku pulusi ia maʻá e Kau Fakamoʻoni ʻa Sihová pea mo e kau ako Tohi Tapu ʻoku fakalakalaká. ʻE pulusi ia tuʻo taha he māhina pea ʻe ʻi loto ʻa e ngaahi kupu ako ʻe fā pe nima. Ko e taimi-tēpile ki he taimi ʻe fakahoko ai ʻa e ngaahi kupu akó ni ʻoku pulusi ia ʻi he takafi ʻo e makasiní. ʻI he kehe mei he pulusinga ʻo e Taua Leʻo maʻá e kakaí, ʻe ʻikai ʻai ha fakatātā kehe ʻi he takafí ki he ʻīsiu taki taha, koeʻuhí ʻe ʻikai ke tufaki atu ia ʻi he malaʻe malangá.

ʻI he peesi 2 ʻo e makasiní, te ke maʻu ai ha kiʻi fakamatala nounou ʻaonga ʻaupito fekauʻaki mo e taumuʻa ʻo e kupu ako taki taha pe ngaahi kupu ako hokohoko pea pehē foki ki ha lisi ʻo e ngaahi kupu kehé. ʻE ʻilo ʻe he kau faiako Taua Leʻo ʻa e ʻaonga ʻaupito ʻa e kiʻi fakamatala nounou ko iá ʻi heʻenau teuteu ki ha lāulea mohu ʻuhinga ki he ngaahi kupú ʻi he fakataha ʻa e fakatahaʻangá.

Te ke fakatokangaʻi ʻoku kiʻi nounou ange ʻa e ngaahi kupu akó mei he tuʻunga naʻe ʻi ai ki muʻá. Ko hono olá, ʻe ʻatā ai ʻa e taimi lahi ange ke lāulea ai ki he ngaahi konga Tohi Tapu tefitó lolotonga ʻa e Ako Taua Leʻo. ʻOku fakalototoʻaʻi māfana atu koe ke sio ʻi he uike taki taha ki he kotoa ʻo e ngaahi konga Tohi Tapu ʻoku hā atú. Ko e ngaahi konga Tohi Tapu ʻe niʻihi ʻoku haá ʻoku fakaʻilongaʻi ai ke “lau” pea ʻoku totonu ke lau mo lāulea ki ai lolotonga ʻa e Ako Taua Leʻo. ʻE lava foki ke lau mo e ngaahi konga Tohi Tapu kehé kae fakatatau pē ki he taimí. ʻI he ngaahi kupu ʻe niʻihi, te ke ʻilo nai ai ʻa e ngaahi konga Tohi Tapu ʻoku fakaʻilongaʻi ai ke “fakafehoanaki.” Koeʻuhi ʻoku ʻikai poupou fakahangatonu ʻa e ngaahi konga Tohi Tapu ko iá ki he ngaahi poini tefito ʻi he palakalafí, ʻe ʻikai ke faʻa lau ia ʻi he fakataha ʻa e fakatahaʻangá. Ka, ko e ngaahi konga Tohi Tapu ke “fakafehoanaki” ʻoku ʻi ai ʻa e fakamatala fakalahi mahuʻinga ai, pe ko e ʻi ai ʻene kaunga ki he ngaahi poini ʻoku lāulea ki aí. ʻOku fakalototoʻaʻi atu ke sio ki ai lolotonga hoʻo teuteu ki he Ako Taua Leʻo. Mahalo ʻe lava ke ke lave ki ai ʻi hoʻo ngaahi talí.

Ko e līpooti fakataʻú ʻe ʻikai kei ʻasi atu ia ʻi he Taua Leʻo. Kamata ʻi he 2008, ʻe ʻasi atu ia ʻi he fakalahi ʻo ʻEtau Ngāue Fakafaifekau ʻo e Puleʻanga pea pehē foki ki he Yearbook. Kae kehe, hangē ko ia kuo ʻosi fakahaaʻi atú, ko e pulusinga akó ʻoku kau ki ai ʻa e ngaahi kupu kehe. Neongo ko e lahi ʻo e ngaahi kupú ni ʻe ʻikai ke lāulea ki ai ʻi ha fakataha ʻa e fakatahaʻangá, ʻoku fakalototoʻaʻi atu ke ke lau fakalelei ia. ʻOku toe maʻu foki ai ʻa e meʻakai fakalaumālie mei he “tamaioeiki agatonu mo boto.”​—Mt. 24:45-47, PM.

Fakaʻosí, ko e pulusinga ako mo e pulusinga ʻo e Taua Leʻo maʻá e kakaí ʻoku ʻikai ko e ongo makasini kehekehe ia ʻe ua. Ko e ongo pulusingá fakatouʻosi Ko e Taua Leʻo ʻOku Fanongonongo Ai ʻa e Puleʻanga ʻo Sihová. ʻI he peesi 2 ʻoku fakatou maʻu ai ha palakalafi tatau ʻoku fakamatalaʻi ai ʻa e taumuʻa ʻo e Taua Leʻo. ʻE fakakau fakatouʻosi ʻa e ongo pulusingá ʻi he tohi voliume fakataʻú. Pea ko e fakamatala mei he ongo pulusingá fakatouʻosi ʻe hā ia ʻi he kupu “ʻOkú Ke Manatuʻi?” ʻa ia ʻe pulusi ia ʻi he pulusinga akó.

Talu mei he 1879, ʻi he ngaahi taimi ʻo e tau, faingataʻa fakaʻekonōmika pea mo e fakatanga, kuo fanongonongo faitōnunga ʻe he Taua Leʻo ʻa e ngaahi moʻoni fekauʻaki mo e Puleʻanga ʻo e ʻOtuá. ʻOku mau lotua fakataha mo e tāpuaki ʻa Sihová, ʻe hokohoko atu ʻene fai iá ʻi hono sīpinga foʻoú. Pea ʻoku mau lotua ke tāpuakiʻi koe ʻe Sihova, ʻa koe tokotaha lautohí, ʻi hoʻo ngāueleleiʻaki ʻa e pulusinga ako foʻou ʻo e Taua Leʻo.