Tali ʻe he Faʻahinga Naʻe “Hehema Totonu”
Tali ʻe he Faʻahinga Naʻe “Hehema Totonu”
“ʻIlonga ʻa kinautolu naʻe tuʻutuʻuni [“hehema totonu,” NW] ki he moʻui taʻengata naʻa nau tui.”—NG. 13:48.
1, 2. Naʻe anga-fēfē ʻa e tali ʻa e muʻaki kau Kalisitiané ki he kikite ʻa Sīsū ʻo pehē ko e ongoongo leleí ʻe malangaʻaki ʻi he māmaní kotoa?
KO E tohi Ngāue ʻi he Tohi Tapú ʻoku fakatolonga mai ai ʻa e fakamatala fakatoʻoaloto ki he anga ʻo e tali ʻa e muʻaki kau Kalisitiané ki he kikite ʻa Sīsū ʻo pehē ko e ongoongo lelei ʻo e Puleʻangá ʻe malangaʻi ia ʻi he māmaní kotoa. (Mt. 24:14) Ko e kau malanga faivelengá naʻa nau tofa ʻa e halá, hangē ko e laú, ki he faʻahinga kotoa te nau muimui ʻia kinautolú. Ko e ola ʻo e faifakamoʻoni faivelenga ʻa e kau ākonga ʻa Sīsū ʻi Selusalemá, naʻe ʻaukolo mai ai ʻa e kakai ʻe laui afe, ʻo kau ai ha “fuʻu tokolahi ʻo e kau taulaʻeiki” ki he fakatahaʻanga ʻi he ʻuluaki senitulí.—Ng. 2:41; 4:4; 6:7.
2 Naʻe tokoniʻi ʻe he muʻaki kau misinalé ʻa e toe tokolahi ange ke nau tali ʻa e lotu faka-Kalisitiané. Ko e fakatātaá, ko Filipe naʻá ne ʻalu ki Samēlia, ʻa ia naʻe tokanga ai ha kakai tokolahi ki heʻene fakamatalá. (Ng. 8:5-8) Naʻe fononga ki he feituʻu lahi ʻa Paula mo e ngaahi kaungāmeʻa kehekehe, ʻi hono malangaʻi ʻa e pōpoaki faka-Kalisitiané ʻi Saipalo, ko e ngaahi konga ʻo ʻĒsia Maina, Masitōnia, Kalisi mo ʻĪtali. ʻI he ngaahi kolo ʻa ia naʻá ne malanga aí, naʻe hoko ai ko e kau tui ʻa e fuʻu tokolahi fakatouʻosi ʻi he kau Siú mo e Kalisí. (Ng. 14:1; 16:5; 17:4) Naʻe fakahoko ʻe Taitusi ha ngāue fakafaifekau ʻi Kēliti. (Tai. 1:5) Naʻe femoʻuekina ʻa Pita ʻi Pāpilone, pea ʻi he aʻu ki he taimi naʻá ne fai ai ʻene ʻuluaki tohí, ʻi he 62-64 T.S. nai, naʻe ʻiloa ʻa e ngāue ʻa e kau Kalisitiané ʻi Ponitō, Kalētia, Kapatōsia, ʻĒsia pea mo Pitinia. (1 Pita 1:1; 5:13) Ko ha ngaahi taimi fakafiefia moʻoni ia! Ne fuʻu faivelenga ʻa e kau malanga Kalisitiane ko ia he ʻuluaki senitulí ʻo taukaveʻi ai ʻe honau ngaahi filí kuo nau “fulihi a mamani.”—Ng. 17:6, PM; Ng. 28:22.
3. Ko e hā e ngaahi ola ʻoku maʻu he ʻahó ni ʻe he kau fanongonongo ʻo e Puleʻangá ʻi heʻenau ngāue fakamalangá, pea ʻoku anga-fēfē hoʻo ongoʻi fekauʻaki mo e meʻa ko iá?
3 ʻI onopooni foki, kuo tāpuakiʻi ʻaki ai ʻa e fakatahaʻanga Kalisitiané ʻa e tupu lahi fau. ʻIkai ʻokú ke loto-toʻa ʻi hoʻo lau ʻa e līpooti fakataʻu ʻa e Kau Fakamoʻoni ʻa Sihová ʻo sio ai ki he ngaahi ola ʻoku maʻu ʻi māmani lahí? ʻIkai ʻoku māfana ho lotó ke ʻiloʻi ko e kau fanongonongo ʻo e Puleʻangá naʻa nau fai ʻa e ngaahi ako Tohi Tapu laka hake he ono milioná lolotonga ʻa e taʻu fakangāue 2007? ʻIkai ngata aí, ko e kau maʻu Fakamanatu ʻo e pekia ʻa Sīsū Kalaisí, ʻi he taʻu kuo ʻosí, ʻoku fakahaaʻi ai ko e kakai nai ʻe toko hongofulu miliona ʻa ia ʻoku ʻikai ko e Kau Fakamoʻoni kinautolu ʻa Sihova naʻa nau mahuʻingaʻia feʻunga ʻi he ongoongo leleí ʻo nau maʻu ai ʻa e fakamanatu mahuʻinga ko ení. ʻOku fakahaaʻi heni ʻoku kei toe lahi ʻa e ngāue ke faí.
4. Ko hai ʻokú ne tali ʻa e pōpoaki ʻo e Puleʻangá?
4 ʻI he ʻahó ni, hangē ko ia ʻi he ʻuluaki senitulí, ko “kinautolu [ʻoku] tuʻutuʻuni [“hehema totonu,” NW] ki he moʻui taʻengata” ʻoku nau tali ʻa e pōpoaki ʻo e moʻoní. (Ng. 13:48) ʻOku tohoakiʻi mai ʻe Sihova ʻa e kakai ko iá ki heʻene kautahá. (Lau ʻa e Hakeai 2:7.) Ko e hā e fakakaukau ki he ngāue fakafaifekau faka-Kalisitiané ʻoku fiemaʻu ke tau tauhi maʻu koeʻuhi ke fāitaha kakato ai mo e ngāue fakatahatahaʻi ko ení?
Malanga Taʻefilifilimānako
5. Ko e kakai fēfē ʻoku nau maʻu ʻa e hōifua ʻa Sihová?
5 Ko e kau Kalisitiane ʻo e ʻuluaki senitulí naʻa nau mahinoʻi “ʻoku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.” (Ng. 10:34, 35) Pe ʻoku maʻu ʻe ha taha ha vahaʻangatae lelei mo Sihova pe ʻikai ʻoku fakatuʻunga ia ʻi heʻene ngāueʻi ʻa e tui ki he feilaulau huhuʻi ʻa Sīsuú. (Sione 3:16, 36) Pea ko e finangalo ia ʻo Sihová “ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.”—1 Tim. 2:3, 4.
6. Ko e hā kuo pau ke ʻoua ʻe fai ʻe he kau malanga ʻo e Puleʻangá, pea ko e hā hono ʻuhingá?
6 ʻE hala ke tomuʻa fakamāuʻi ʻe he kau fanongonongo ʻo e ongoongo leleí ʻa e kakaí makatuʻunga ʻi honau matakalí, tuʻunga fakasōsialé, fōtungá, puipuituʻa fakalotú pe ko ha faʻahinga tōʻonga kehe pē. Fakakaukau angé ʻi ha mōmeniti: ʻIkai ʻokú ke houngaʻia he ko e tokotaha naʻe ʻuluaki lea atu kiate koe fekauʻaki mo e ngaahi moʻoni Fakatohitapú naʻe ʻikai te ne fakahaaʻi ha tomuʻa fehiʻa kiate koe? Ko ia ko e hā ke taʻotaʻofi ai mei hono fakahoko ha pōpoaki ʻoku lava ke fakahaofi ha moʻui ʻa ha taha pē nai ʻe fanonogo ki ai?—Lau ʻa e Mātiu 7:12.
7. Ko e hā kuo pau ai ke tau fakaʻehiʻehi mei hono fakamāuʻi ʻa e faʻahinga ʻoku tau malanga ki aí?
7 Kuo fakanofo ʻe Sihova ʻa Sīsū ko e Fakamaau; ko ia ai, ʻoku ʻikai ke tau maʻu ʻa e totonu ke fakamāuʻi ha taha pē. ʻOku feʻungamālie ia, koeʻuhi—ʻi he ʻikai hangē ko Sīsuú—ʻoku lava ke tau fakamaau pē ʻo fai “ki he meʻa ʻoku ha ki [hotau] mata” pe “ki he ongo ʻo [hotau] telinga,” lolotonga ia ko Sīsuú ʻoku lava ke ne ʻiloʻi ʻa e ngaahi fakakaukau ʻi lotó mo e ngaahi fakaʻuhinga ʻa e lotó.—Ai. 11:1-5; 2 Tim. 4:1.
8, 9. (a) Ko e tokotaha fēfē ʻa Saula ki muʻa ke ne hoko ko ha Kalisitiané? (e) Ko e hā ʻoku totonu ke akoʻi kia kitautolu ʻe he hokosia ʻa e ʻapositolo ko Paulá?
8 Kuo hoko ʻa e kakai mei he meimei ʻātakai kotoa pē ko e kau sevāniti ʻa Sihova. Ko e fakatātā tuʻu-ki-muʻa ʻe taha ko Saula ʻo Tāsusí, ʻa ia naʻe hoko ʻo ʻiloa ko e ʻapositolo ko Paulá. Ko Saulá, ko ha Fālesi, ko ha tokotaha fakafepaki fakafili ia ʻo e kau Kalisitiané. Ko ʻene tuipau loto-moʻoni naʻa nau halá naʻe taki atu ai ia ke ne fakatangaʻi ʻa e fakatahaʻanga Kalisitiané. (Kal. 1:13) Mei ha vakai ʻa e tangatá, ʻoku pau naʻe hā ngali ko e tokotaha ia heʻikai lava ke ne hoko ko ha Kalisitiane. Neongo ia, naʻe sio ʻa Sīsū ia ki he meʻa lelei ʻi he loto ʻo Saulá peá ne fili ia ke ne fakahoko ha fekau makehe. Ko hono olá, naʻe hoko ai ʻa Saula ko e taha ʻo e ngaahi mēmipa longomoʻui mo faivelenga taha ʻo e fakatahaʻanga Kalisitiane ʻi he ʻuluaki senitulí.
9 Ko e hā ʻoku akoʻi mai kia kitautolu ʻe he hokosia ʻa e ʻapositolo ko Paulá? ʻI hotau feituʻu ngāué, mahalo pē ʻoku ʻi ai ha ngaahi kulupu ʻo e kakaí ʻoku nau hā ngali fakafili ki he pōpoaki ʻoku tau ʻoatú. Neongo ʻe hā fehuʻia nai pe ʻe faifai ange pea hoko ha niʻihi ʻo kinautolu ko ha kau Kalisitiane moʻoni, ʻoku ʻikai totonu ke tuku ʻetau feinga ke fakaʻuhinga mo kinautolú. ʻI he taimi ʻe niʻihi, ʻoku hoko ai ʻo ongongofua naʻa mo e faʻahinga ʻoku ngalingali taha heʻikai ke nau talí. Ko ʻetau fekaú ke hanganaki malanga ki he tokotaha kotoa ʻo “ʻikai tuku.”—Lau ʻa e Ngāue 5:42.
Tatali Mai ʻa e Tāpuaki ki he Faʻahinga ʻOku Malanga ʻo “ʻIkai Tuku”
10. Ko e hā ʻoku ʻikai totonu ai ke tau toumoua ʻi he malanga ki he kakai ʻoku nau hā ngali fakailifiá? Fakamatala ki ha ngaahi hokosia fakalotofonua.
10 ʻOku lava ke maʻu ʻa e fakamulituku hala mei he ngaahi fōtungá. Ko e fakatātaá, ko ʻIkināsio, a naʻá ne kamata ako Tohi Tapu mo e Kau Fakamoʻoni ʻa Sihová lolotonga ʻene ʻi pilīsone ʻi ha fonua ʻi ʻAmelika Tonga. Naʻe ilifiaʻi ia koeʻuhi ko ʻene natula fakamālohí. ʻI heʻene peheé, ko e kau pōpula naʻa nau ngaohi ʻo fakatau atu ʻa e ngaahi meʻa ki honau kaungā pōpulá naʻa nau ngāueʻaki ʻa ʻIkināsio ke ne tānaki moʻua mei he faʻahinga naʻe tuai ʻenau totongí. Kae kehe, ʻi he fakalakalaka ʻa ʻIkināsio peá ne ngāueʻaki ʻa e meʻa naʻá ne akó, ko e tokotaha houtamaki anga-fakamālohi ko eni ki muʻá naʻá ne hoko ko ha tokotaha anga-lelei. ʻOku ʻikai toe ngāueʻaki ia ʻe ha taha ke ne tānaki moʻua, neongo ia ʻoku fiemālie ʻa ʻIkināsio ʻi hono liliuʻi ʻe he ngaahi moʻoni ʻo e Tohi Tapú mo e laumālie ʻo e ʻOtuá ʻa hono angaʻitangatá. ʻOkú ne toe houngaʻia ʻi he taʻefilifilimānako ʻa e kau malanga ʻo e Puleʻangá ʻa ē naʻa nau fai ʻa e feinga ke ako mo iá.
11. Ko e hā ʻoku tau toutou foki ai ki he kakaí?
11 Ko e taha ʻo e ngaahi ʻuhinga ʻoku tau toutou foki ai ki he kakai kuo tau ʻosi talanoa mo kinautolu fekauʻaki mo e ongoongo leleí he ko honau ngaahi tuʻungá mo e fakakaukaú ʻe lava ke liliu pea ʻoku nau liliu. Talu mei heʻetau ʻaʻahi fakamuimuí, kuo uesia nai ʻa e niʻihi ʻe he puke lahi, mole ʻo ha ngāue pe ko e mate ʻa ha taha ʻofeina. (Lau ʻa e Koheleti 9:11.) Ko e ngaahi meʻa ʻoku hoko ʻi he māmaní ʻoku ueʻi nai ai ʻa e kakaí ke nau fakakaukau fakamātoato fekauʻaki mo honau kahaʻú. Ko e ngaahi meʻa pehē ʻoku hokó ʻoku lava ke ne fakatupunga ha tokotaha ʻa ia naʻe taʻemahuʻingaʻia ki muʻa—pe aʻu ʻo fakafepaki—ke ne tali lelei. Ko ia ai, ʻoku ʻikai totonu ke tau toumoua mei hono vahevahe ʻa e ongoongo leleí ki he niʻihi kehé ʻi he faingamālie kotoa pē.
12. ʻOku totonu ke fēfē ʻetau vakai ki he kakai ʻoku tau malanga ki aí, pea ko e hā hono ʻuhingá?
12 Ko hono fakakalakalasi mo fakamāuʻi ʻa e kakai kehé ʻoku hā ko ha hehema fakaetangata ia. Neongo ia, ʻoku ʻafio mai ʻa Sihova ki he kakaí ko e faʻahinga tāutaha. ʻOkú ne ʻafioʻi ʻa e ʻulungāanga lelei ʻo e tokotaha taki taha. (Lau ʻa e 1 Samiuela 16:7.) ʻI heʻetau ngāue fakafaifekaú ʻoku totonu ke tau feinga ke fai ʻa e meʻa tatau. ʻOku fakahaaʻi ʻi he ngaahi hokosia lahi ʻa e lelei ʻoku tupu mei hono maʻu ha vakai lelei ki he faʻahinga kotoa ʻoku tau malanga ki aí.
13, 14. (a) Ko e hā ne hala ai ʻa e fakafeangai ʻa ha tāimuʻa ki ha fefine naʻá ne fetaulaki mo ia ʻi he ngāue fakafaifekaú? (e) Ko e hā ʻoku lava ke tau ako mei he meʻa ko eni naʻe hokosiá?
13 Ko Senitulaá ko ha tuofefine tāimuʻa ia, naʻe kau ʻi he ngāue fale-ki-he-falé ʻi ha motu ʻi he Kalipiané ʻi he taimi naʻá ne fetaulaki ai mo Luté, ʻa ia naʻe kau lahi ki he ngaahi kātoanga fakafiefia. Naʻe tuʻo ua hono fakakalauni ʻa Lute ko e kuini ʻi he kātoanga fakafiefia fakafonuá. Naʻá ne fakahāhā ha mahuʻingaʻia loto-moʻoni ʻi he meʻa naʻe leaʻaki ʻe Senitulaá, ko ia naʻe fokotuʻutuʻu ai ke fai ha ako Tohi Tapu. ʻOku manatuʻi ʻe Senitulā: “ʻI heʻeku lue atu ki hono loto falé, naʻá ku sio ai ʻi ha fuʻu tā lahi ʻo Lute ʻi hono teunga kakato ʻi he kātoanga fakafiefiá, pea pehē ki he ngaahi ipu naʻá ne ikunaʻí. Naʻá ku fakakaukau hala ai ko ha tokotaha ʻa ia naʻe fuʻu manakoa pea kau lahi ʻi he ngaahi kātoanga fakafiefiá heʻikai lava ke ne mahuʻingaʻia ʻi he moʻoní. Ko ia naʻe ʻikai ai ke u toe ʻaʻahi kiate ia.”
14 ʻI ha taimi ki mui ai, naʻe ʻasi ʻa Lute ʻi he Fale Fakatahaʻangá, pea ʻi he tuku ʻa e fakatahá naʻá ne ʻeke ange kia Senitulā, “Ko e hā ne ʻikai te ke haʻu ai ke ta akó?” Naʻe kole fakamolemole ange ʻa Senitulā pea fokotuʻutuʻu ke toe hoko atu ʻa e akó. Naʻe fakalakalaka vave ʻa Lute, ʻo ne toʻo ʻa hono ngaahi tā ʻi he kātoanga fakafiefiá, kamata ke kau ʻi he ngaahi ngāue kotoa ʻa e fakatahaʻangá pea fakatapui ʻene moʻuí kia Sihova. Ko e moʻoni, ne hoko ai ʻo ʻiloʻi ʻe Senitulā naʻe hala ʻa ʻene muʻaki fakafeangaí.
15, 16. (a) Ko e hā ne iku ki ai ʻi he faifakamoʻoni ʻa ha tokotaha malanga ki ha kāinga? (e) Ko e hā ʻoku totonu ai ke ʻoua ʻe hoko ha puipuituʻa ʻo ha kāinga ko ha fakalotosiʻi ia kia kitautolu mei he faifakamoʻoni kiate iá?
15 Kuo toe hoko foki ʻa e ngaahi ola lelei ki he tokolahi kuo nau faifakamoʻoni ki he ngaahi mēmipa taʻetui ʻi he fāmilí, naʻa mo e taimi ne hā ʻikai ngali tali lelei ai ʻe he faʻahinga ko iá. Ko e fakatātaá, ko e tuʻunga ʻo Siosi, ko ha tuofefine Kalisitiane ʻi ʻAmelika. Ko hono tuongaʻane-ʻi-he-fonó naʻá ne faʻa ʻi he pilīsoné talu mei heʻene taʻu hongofulu tupú. “Naʻe pehē ʻe he kakaí ʻokú ne moʻui taʻeʻaonga,” ko e fakamatala ia ʻa Siosí, “koeʻuhi naʻá ne tila faitoʻo kona tapu, kaihaʻa peá ne fai mo e ngaahi kovi kehekehe. Neongo ʻene hā ngali faingataʻá, naʻá ku hanganaki vahevahe kiate ia ʻa e ngaahi moʻoni Fakatohitapú ʻo feʻunga mo e taʻu ʻe 37.” Ko ʻene ngaahi feinga anga-kātaki ke tokoniʻi ʻa hono kāingá naʻe tāpuakiʻi lahi ʻi he faifai pē peá ne kamata ke ako Tohi Tapu mo e Kau Fakamoʻoni ʻa Sihová ʻo ne fai ha ngaahi liliu lahi ʻi heʻene moʻuí. Ki muí ni mai, ʻi hono taʻu 50 naʻe papitaiso ai ʻa e tuongaʻane-ʻi-he-fono ʻo Siosí ʻi ha fakataha-lahi fakavahe ʻi Kalefōnia, ʻAmelika. ʻOku pehē ʻe Siosi: “Naʻá ku tō loʻimata ʻi heʻeku fiefiá. Naʻá ku fiefia lahi ʻi he ʻikai ʻaupito te u foʻi ʻi he malanga kiate iá!”
16 Te ke toumoua nai ke lea ki he ngaahi kāinga ʻe niʻihi fekauʻaki mo e ngaahi moʻoni Fakatohitapú koeʻuhi ko honau puipuituʻá. Neongo ia, naʻe ʻikai taʻofi ʻe he toumoua peheé ʻa Siosi mei he lea ki hono tuongaʻane-ʻi-he-fonó. He ko ē, ʻoku lava fēfē ke te ʻiloʻi ʻa e meʻa ʻoku ʻi he loto ʻo ha tokotaha kehe? Ko e tokotaha ko iá naʻá ne kumi nai ʻi he loto-moʻoni ki he moʻoni fakalotú. Ko ia ai, ʻoua ʻe toumoua mei hono ʻoange kiate ia ʻa e faingamālie ke maʻu ai iá.—Lau ʻa e Palovepi 3:27.
Ko ha Tohi Tokoni Ako Tohi Tapu Ola Lelei
17, 18. (a) Ko e hā ʻoku fakahaaʻi ʻe he ngaahi līpooti takatakai ʻi he māmaní fekauʻaki mo e mahuʻinga ʻo e tohi Ko e Hā ʻOku Akoʻi Moʻoni ʻe he Tohi Tapú? (e) Ko e hā ʻa e ngaahi hokosia lelei kuó ke maʻu ʻi hono ngāueʻaki ʻa e tohí ni?
17 Ko e ngaahi līpooti mei he ngaahi fonua takatakai ʻi he māmaní ʻoku fakahaaʻi ai ko e faʻahinga loto-totonu tokolahi ʻoku nau tali lelei ʻa e tohi tokoni ako Tohi Tapu Ko e Hā ʻOku Akoʻi Moʻoni ʻe he Tohi Tapú? Ko Pené, ko ha tuofefine tāimuʻa ia ʻi ʻAmelika, naʻá ne kamata ha ngaahi ako Tohi Tapu ʻo ngāueʻaki ʻa e tohi ko ení. Ko e ako ʻe ua ai ko e ongo meʻa taʻumotuʻa ʻa ia ko e ongo mēmipa līʻoa kinaua ʻi he ongo siasi naʻá na kau ki aí. Naʻe ʻikai fakapapauʻi ʻe Pene pe ʻe fēfē ʻena fakafeangai ki he ngaahi moʻoni Fakatohitapu ʻoku ʻomai ʻi he tohi Akoʻi ʻe he Tohi Tapú. Neongo ia, ʻokú ne tohi, “Koeʻuhi ko e founga mahino, totonu, mo nounou ʻo hono ʻomai ʻa e fakamatalá, naʻá na tali lelei ʻa e meʻa naʻá na akó ko e moʻoní ia, ʻo ʻikai ha fakakikihi pe hohaʻa fakaeongo.”
18 Ko Peti ʻa ia ko ha tokotaha malanga ʻi Pilitānia, naʻá ne kamata ako Tohi Tapu mo ha fefine ʻa ia ko ha tokotaha kumi hūfanga mei ha fonua ʻĒsia. Naʻe fakamālohiʻi ʻa e fefiné ke ne hola mei hono fonuá hili hono ʻave ʻa hono husepānití mo ʻene fānau tangatá ʻe he kau sōtia angatuʻú, ʻo ʻikai ʻaupito te ne toe sio kia kinautolu. Naʻe ʻi he tuʻunga fakatuʻutāmaki ʻa ʻene moʻuí, ne vela ʻosiʻosi ʻa hono ʻapí pea naʻe tohotohoʻi ia ʻe ha kau kengi. Ko e meʻá ni kotoa ne ʻai ai ia ke ne ongoʻi ʻoku ʻikai ha toe ʻaonga ʻene moʻuí pea naʻá ne fakakaukau taonakita tuʻo lahi. Kae kehe, naʻe ʻoange ʻe he ako Tohi Tapú kiate ia ʻa e ʻamanaki. “Ko e faingofua ʻo e ngaahi fakamatalá mo e ngaahi talanoa fakatātā ʻi he tohi Akoʻi ʻe he Tohi Tapú ne ʻi ai hono ola fakaofo kiate ia,” ko e tohi ia ʻa Petí. Naʻe fai ʻe he tokotaha akó ʻa e fakalakalaka vave, taau ke ne hoko ko ha tokotaha malanga teʻeki papitaiso pea fakahāhā ʻene holi ke papitaiso ʻi he ʻasemipilī hono hokó. He meʻa fakafiefia moʻoni ko hono tokoniʻi ʻa e kakai loto-moʻoní ke nau mahinoʻi pea houngaʻia ʻi he ʻamanaki kuo ʻomai ʻe he Tohi Tapú!
“ʻOua Naʻa Ta Fiu ʻi he Failelei”
19. Ko e hā ʻoku mātuʻaki fiemaʻu fakavavevave ai ʻa e ngāue fakamalangá?
19 ʻI he mahili atu ʻa e ʻaho taki taha, ʻoku hoko ʻo toe vivili ange ai ʻa e fiemaʻu fakavavevave ʻo ʻetau fekau ke malanga mo ngaohi ākongá. Ko e laui afe ʻo e faʻahinga ʻoku hehema totonú ʻoku nau tali ʻetau malangá ʻi he taʻu taki taha. Kae kehe, ‘ʻOku ofi ʻa e ʻAho ʻo Sihová,’ ʻo ʻuhinga iá ko e faʻahinga ʻoku nau kei ʻi he fakapoʻuli fakalaumālié ʻoku nau “ʻalu tetetete pe ke tamateʻi.”—Sef. 1:14; Pal. 24:11.
20. Ko e hā ʻoku totonu ke tau taki taha fakapapauʻi ke faí?
20 ʻE kei lava pē ke tau tokoniʻi ʻa e kakai ko iá. Ka ke tau fai iá, ʻoku mātuʻaki mahuʻinga ke tau faʻifaʻitaki ki he kau Kalisitiane ʻi he ʻuluaki senitulí, ʻa ia “naʻe ʻikai tuku ʻenau ako mo malangaʻaki ʻa Sisu, ko e Misaia ia.” (Fakaʻītali ʻamautolu; Ng. 5:42) Muimui ʻi heʻenau faʻifaʻitakiʻangá ʻaki ʻa e kītaki neongo ʻa e fakafilí, ʻi he tokanga ki hoʻo “pōtoʻi fakafaiakó,” pea ʻi he malanga ki he tokotaha kotoa ʻo taʻefilifilimānako! “ʻOua naʻa ta fiu ʻi he failelei,” he kapau te ta kātaki, te ta utu ʻa e ngaahi tāpuaki lahi ʻo e hōifua mai ʻa e ʻOtuá.—2 Tim. 4:2; lau ʻa e Kaletia 6:9.
[Fakamatala ʻi lalo]
a Kuo liliu ʻa e hingoa ʻe niʻihi.
ʻE Fēfē Haʻo Tali?
• Ko hai ʻokú ne tali ʻa e ongoongo leleí?
• Ko e hā ʻoku totonu ai ke tau fakaʻehiʻehi mei he tomuʻa fakamāuʻi ʻo e faʻahinga ʻoku tau malanga ki aí?
• Ko e hā ʻa e ngaahi ola ʻoku maʻu mei he tohi Ko e Hā ʻOku Akoʻi Moʻoni ʻe he Tohi Tapú?
[Fehuʻi ki he Ako]
[Fakatātā ʻi he peesi 13]
ʻOku tali ʻe he laui afe ʻo e faʻahinga loto-totonu
[Fakatātā ʻi he peesi 15]
Ko e hā ʻe lava ke tau ako mei he liliu naʻe fai ʻe he ʻapositolo ko Paulá?
[Fakatātā ʻi he peesi 16]
Ko e kau fanongonongo ʻo e ongoongo leleí ʻoku ʻikai ke nau tomuʻa fakamāuʻi ʻa e kakaí