Sīsū Kalaisi—Ko e Misinale Lahi Tahá
Sīsū Kalaisi—Ko e Misinale Lahi Tahá
“ʻOku ou meiate ia, pea ko ia ia naʻa ne fekau mai au.”—SIONE 7:29.
1, 2. Ko e hā ʻa e misinale, pea ko hai ʻe lava ke ui ko e Misinale lahi tahá?
KO E HĀ ʻoku haʻu ki hoʻo fakakaukaú ʻi hoʻo fanongo ki he foʻi lea “misinale”? ʻOku fakakaukau ʻa e niʻihi ki he kau misinale ʻa e Puleʻanga-Haʻa-Kalisitiané, ʻa ia ko e tokolahi ai ʻoku nau kaunoa ʻi he ngaahi meʻa fakapolitikale mo fakaʻekonōmika ʻo e ngaahi fonua ʻoku nau ngāue aí. Kae kehe, ʻi he tuʻunga ko e taha ʻo e Kau Fakamoʻoni ʻa Sihová, ngalingali ʻokú ke fakakaukau fekauʻaki mo e kau misinale ʻoku fekauʻi atu ʻe he Kulupu Pulé ke nau malangaʻi ʻa e ongoongo leleí ʻi he ngaahi fonua kehekehe takatakai ʻi he māmaní. (Mt. 24:14) Ko e kau misinalé ni ʻoku nau līʻoa taʻesiokita honau taimí mo e iví ki he ngāue tuʻu-ki-muʻa ko hono tokoniʻi ʻa e kakaí ke nau ʻunuʻunu ofi kia Sihova ko e ʻOtuá pea maʻu ha vahaʻangatae makehe mo ia.—Sem. 4:8.
2 Ko e foʻi lea “misinale” mo e “kau misinale” ʻoku ʻikai hā ia ʻi he konga tohi tefito ʻo e New World Translation of the Holy Scriptures. Kae kehe, ʻi he fakamatala ʻi lalo ʻi he Efeso 4:11, ʻoku pehē ai ʻe he Reference Bible ko e foʻi lea faka-Kalisi naʻe liliu ko e “kau ʻevangelioó” ʻoku lava ke toe liliu ia ko e “kau misinale.” Ko Sihova ʻa e ʻEvangeliō lahi tahá, ka heʻikai lava ke ui ia ko e Misinale lahi tahá, he naʻe ʻikai ʻaupito ke fekauʻi ia ʻe ha taha. Ka ʻi he fekauʻaki mo ʻene Tamai fakahēvaní, naʻe pehē ʻe Sīsū Kalaisi: “ʻOku ou meiate ia, pea ko ia ia naʻa ne fekau mai au.” (Sione 7:29) ʻI ha fakahāhā ʻo e ʻofa lahi ki he māmani ʻo e faʻahinga ʻo e tangatá, naʻe fekauʻi mai ʻe Sihova ʻa hono ʻAlo tofu-pē-taha-ne-fakatupú ki he māmaní. (Sione 3:16) ʻOku lava ke ui ʻa Sīsū ko e Misinale lahi tahá, ko e Misinale lelei tahá, koeʻuhi ko e ʻuhinga ʻe taha naʻe fekauʻi mai ai ia ki māmaní ke ne “fakamooni ki he mooni.” (Sione 18:37, PM) Naʻá ne lavameʻa fakaʻaufuli ʻi hono fanongonongo ʻa e ongoongo lelei ʻo e Puleʻangá, pea ko e ngaahi ʻaonga ʻo ʻene ngāué ʻoku tau kei maʻu ʻaonga pē mei ai. Ko e fakatātaá, ʻoku lava ke tau ngāueʻaki ʻene ngaahi founga fakafaiakó ʻi heʻetau ngāue fakafaifekaú, tatau ai pē pe ʻoku vaheʻi mai ke tau hoko ko e kau misinale pe ʻikai.
3. Ko e hā ʻa e ngaahi fehuʻi te tau lāulea ki aí?
3 Ko e ngafa ʻo Sīsū ko ha tokotaha fanongonongo ʻo e Puleʻangá ʻoku langaʻi hake ai ʻa e ngaahi fehuʻi hangē ko ení: Ko e hā naʻe hokosia ʻe Sīsū ʻi he māmaní? Ko e hā naʻe ola lelei ai ʻene faiakó? Pea ko e hā naʻá ne ʻai ke lavameʻa ʻa ʻene ngāue fakafaifekaú?
Laumālie Loto-Lelei ʻi he ʻĀtakai Foʻou
4-6. Ko e hā ʻa e ngaahi liliu ʻe niʻihi naʻe fehangahangai mo Sīsū ʻi hono fekauʻi mai ki māmaní?
4 Ko e kau misinale he ʻaho ní mo e niʻihi ʻo e kau Kalisitiane ʻa ia ʻoku nau hiki ki he ngaahi feituʻu ʻoku lahi ange ai ʻa e fiemaʻu ʻo e kau malanga ʻo e Puleʻangá ʻe pau nai ke nau hoko ʻo alāanga ki he ngaahi tuʻunga māʻulalo ʻi he tuʻunga moʻui naʻa nau anga ki aí. Ka heʻikai lava ke tau fakaʻuta atu ki he faikehekehe ʻi he ngaahi tuʻunga ʻo Sīsū ʻi he māmaní mo ia ʻi hēvaní, ʻa ia naʻá ne nofo ai mo ʻene Tamaí ʻi he haʻohaʻonga ʻo e ngaahi meʻamoʻui ko e kau ʻāngelo ʻa ia naʻa nau tauhi kia Sihova ʻaki ʻa e ngaahi fakaueʻiloto maʻa. (Siope 1:6; 2:1) He kehe moʻoni ē ko e ʻi he haʻohaʻonga ʻo e faʻahinga angahalaʻia ʻo e tangatá ʻi ha māmani kuo fakameleʻi! (Mk. 7:20-23) Naʻe aʻu ʻo pau ke feangainga ʻa Sīsū mo e feʻauʻauhi ʻi he lotolotonga ʻo ʻene kau ākonga ofi tahá. (Luke 20:46; 22:24) Ko e moʻoni, naʻá ne feangainga haohaoa mo e meʻa kotoa pē naʻá ne fetaulaki mo ia ʻi he māmaní.
5 Naʻe ʻikai ke kamata fakaemana ʻa Sīsū ke leaʻaki ha lea fakaetangata; naʻá ne kamata ke ako ia ʻi he tuʻunga ko ha kiʻi pēpeé. Ko ha liliu lahi ē mei heʻene puleʻi ʻa e kau ʻāngelo ʻi hēvaní! ʻI he māmaní, naʻe ngāueʻaki ai ʻe Sīsū ʻa e taha ʻo e “ngaahi lea ʻa e kakai.” Naʻe kehe fakaʻaufuli ia mei he “ngaahi lea ʻa e kau angelo.” (1 Kol.1Ko 13:1) Kae kehe, ʻi hono ngāueʻaki ʻo e ngaahi lea mālié, kuo ʻikai ha tangata ʻe lea ʻi ha taimi ʻo hangē ko ia ko Sīsuú.—Luke 4:22.
6 Fakakaukau angé ki he ngaahi founga kehe ʻa ia naʻe liliu lahi ai ʻa e ngaahi meʻá ki he ʻAlo ʻo e ʻOtuá ʻi heʻene haʻu ki he māmaní. Neongo naʻe ʻikai ke maʻu tukufakaholo ʻe Sīsū ʻa e angahalá meia ʻĀtama, naʻá Ne hoko moʻoni ko ha tangata, ʻo hangē ko e faʻahinga ko ia te nau hoko ki mui ko hono “ngaahi tokoua,” pe kau muimui paní. (Lau ʻa e Hepelu 2:17, 18.) ʻI he pō fakaʻosi ʻo ʻene moʻui ʻi he māmaní, naʻe ʻikai kole ai ʻa Sīsū ki heʻene Tamai fakahēvaní ke fekauʻi mai ha “kongakau angelo ʻe hongofulu ma ua, pe lahi hake.” Kae fakakaukau atu angé ki he ngaahi meʻamoʻui ko e kau ʻāngelo naʻá ne pule ki ai ʻi hono tuʻunga ko Maikeli ko e ʻĀngelo-Pulé! (Mt. 26:53; Siu. 9) ʻIo, naʻe fakahoko moʻoni ʻe Sīsū ʻa e ngaahi mana; neongo ia, ko e meʻa naʻá ne fai lolotonga ʻene ʻi māmaní naʻe ʻi he tuʻunga fakangatangata ia ʻi hono fakahoa ki he meʻa naʻá ne mei malava ke fakahoko ʻi hēvaní.
7. Naʻe anga-fēfē ʻa e fakafeangai ʻa e kau Siú ki he Laó?
7 Lolotonga ʻene moʻui ko e “Folofola” ki muʻa ke ne hoko ko e tangatá, ko Sīsū nai ʻa e Tangata-Lea ʻa e ʻOtuá ʻa ia naʻá ne tataki ʻa e kau ʻIsilelí ʻi he toafá. (Sione 1:1; Eki. 23:20-23) Kae kehe, naʻa nau “maʻu ʻa e Lao ʻi hono talafonoʻaki ʻe ha kau ʻangelo, ka naʻe ʻikai te [nau] tauhi ki ai.” (Ng. 7:53; Hep. 2:2, 3) Ko hono moʻoní, ko e kau taki lotu Siu ʻi he ʻuluaki senitulí naʻe ʻikai lava ke nau ʻiloʻi ʻa e ʻuhinga moʻoni ʻo e Laó. Ko e fakatātaá, fakakaukau angé ki he lao ʻo e Sāpaté. (Lau ʻa e Maake 3:4-6.) Ko e kau sikalaipé mo e kau Fālesí naʻa nau “tuku ʻa e ngāhi meʻa mamafa ʻo e Lao, ʻa e fakamāu totonu, mo e fai mesi, mo e lototō.” (Mt. 23:23) Kae kehe, naʻe ʻikai ke foʻi ai ʻa Sīsū pea tuku ʻene talaki ʻa e moʻoní.
8. Ko e hā ʻoku lava ai ke tokoniʻi kitautolu ʻe Sīsuú?
8 Naʻe maʻu ʻe Sīsū ha laumālie loto-lelei. Naʻe ueʻi ia ʻe he ʻofa ki he kakaí pea naʻá ne holi lahi ke tokoniʻi kinautolu. Naʻe ʻikai ʻaupito mole meiate ia ʻa e laumālie ʻo e ʻevangelioó. Pea koeʻuhi ko ʻene faitōnunga kia Sihova lolotonga ʻene ʻi māmaní, ko Sīsuú “naʻa ne hoko maʻanautolu fuape ʻoku talangofua kiate ia, ko e tupuʻanga ʻo ha fakamoʻui ʻoku laui itaniti.” ʻIkai ngata aí, “ko e meʻa kuo ne mamahi ai ʻe ia ʻi hono ʻahiʻahiʻi, ʻoku ne lava ke tokoni ai kiate kinautolu ʻoku ʻahiʻahiʻi” ʻo hangē ko kitautolú.—Hep. 2:18; 5:8, 9.
Faiako Naʻe Akoʻi Lelei
9, 10. Ko e hā ʻa e faʻahinga ako naʻe maʻu ʻe Sīsū ki muʻa ke fekauʻi mai ki māmaní?
9 Ki muʻa ke fekauʻi atu ʻa e kau Kalisitiane he ʻaho ní ko e kau misinalé, ʻoku fokotuʻutuʻu ʻe he Kulupu Pulé ke akoʻi kinautolu. Naʻe akoʻi ʻa Sīsū Kalaisi? ʻIo, ka naʻe ʻikai te ne ʻalu ki he ngaahi ʻapiako faka-Lāpaí ki muʻa ke pani ia ko e Mīsaiá; pea naʻe ʻikai ke akoʻi ia ʻe ha kau faiako fakalotu tuʻu-ki-muʻa. (Sione 7:15; fakafehoanaki mo e Ngāue 22:3.) Ko e hā leva naʻe mātuʻaki taau ai ʻa Sīsū ke ne faiakó?
10 Neongo ʻa e meʻa naʻe ako nai ʻe Sīsū mei heʻene faʻeé, ʻa Mele, mo ʻene tamai ohí ʻa Siosefa, naʻá ne maʻu ʻa e ako mahuʻinga taha ki he ngāue fakafaifekaú mei he Matavai māʻolunga tahá. ʻI he fekauʻaki mo ení, naʻe pehē ʻe Sīsū: “Naʻe ʻikai meiate au ʻeku lea; ka ko e Tamai naʻa ne fekau mai au, naʻe fai mai ʻe ia hoku tuʻutuʻuni ki he meʻa te u tala mo e lea te u fai.” (Sione 12:49) Fakatokangaʻi ko e ʻAló naʻe ʻoange kiate ia ʻa e fakahinohino papau fekauʻaki mo e meʻa ke ne faiakoʻakí. Ki muʻa ke ne haʻu ki he māmaní, naʻe fakamoleki taʻetoeveiveiua ʻe Sīsū ʻa e taimi lahi ʻi he fanongo ki he fakahinohino ʻa ʻene Tamaí. Ko e hā ha toe ako lelei ange ʻe lava ke ne maʻu?
11. Ko e hā e tuʻunga ne aʻu ki ai ʻa hono tapua atu ʻe Sīsū ʻa e feangainga ʻa ʻene Tamaí ki he faʻahinga ʻo e tangatá?
11 Mei he taimi naʻe fakatupu aí, naʻe maʻu ʻe he ʻAló ha vahaʻangatae fekoekoeʻi mo ʻene Tamaí. Lolotonga ʻene moʻui ki muʻa ke hoko ko ha tangatá, naʻe ʻiloʻi ʻe Sīsū ʻa e ongoʻi ʻa e ʻOtuá ki he faʻahinga ʻo e tangatá ʻi heʻene siofi ʻa e ngaahi feangainga ʻa Sihova mo kinautolú. Ko e ʻofa ʻa e ʻOtuá ki he faʻahinga ʻo e tangatá naʻe tapua mai ia ʻi he ʻAló ʻo aʻu ki he tuʻunga naʻá ne hoko ai ko e fakasino ia ʻo potó, ʻo lava ai ke ne pehē: “Nae i he fānau ae tagata a eku fiefiaaga.”—Pal. 8:22, 31, PM.
12, 13. (a) Naʻe anga-fēfē ʻa e ako ʻa Sīsū ʻi hono siofi ʻa e ngaahi feangainga ʻa ʻene Tamaí mo e kau ʻIsilelí? (e) Naʻe anga-fēfē hono ngāueʻaki ʻe Sīsū ʻa e ako naʻá ne maʻú?
12 Ko e ako naʻe maʻu ʻe he ʻAló naʻe toe kau ai ʻa hono siofi ʻa e founga ʻo e feangainga ʻa ʻene Tamaí mo e ngaahi tuʻunga faingataʻá. Ko e fakatātaá, fakakaukau angé ki he ngaahi feangainga ʻa Sihova mo e kau ʻIsileli talangataʻá. ʻOku pehē ʻi he Nehemaia 9:28: “ʻI heʻenau nonga leva, naʻa nau toe fai kovi ʻi heʻenau feangai mo koe [Sihova]: ko ia naʻa ke liʻaki kinautolu, ʻo tuku ke faʻiteliha ai honau ngaahi fili; ko ia naʻa nau fakaehaua kinautolu; ka ʻi heʻenau tafoki ʻo tautapa ki he ʻAfiona, naʻa ke ongoʻi mei langi; pea naʻe tuʻo lahi hoʻo hamusi kinautolu, he ko ho tau ʻa e ʻaloʻofa.” ʻI he ngāue fakataha mo Sihova pea siofi iá, naʻe fakatupulekina ai ʻe Sīsū ʻa e manavaʻofa tatau ki he kakai ʻi he feituʻu naʻá ne ngāue aí.—Sione 5:19.
13 Naʻe ngāueʻaki ʻe Sīsū ʻa e meʻa ko eni naʻá ne akó ʻi heʻene feangainga manavaʻofa mo ʻene kau ākongá. ʻI he pō ki muʻa heʻene pekiá, ko e kau ʻapositolo kotoa naʻá ne ʻofa lahi aí naʻa nau ‘liʻaki ia, ʻo nau hola.’ (Mt. 26:56; Sione 13:1) Naʻe aʻu ʻo fakafisingaʻi tuʻo tolu ʻe he ʻapositolo ko Pitá ʻa Kalaisi! Ka neongo ia, naʻe fakaʻatā ʻe Sīsū ʻa ʻene kau ʻapositoló ke nau toe foki mai kiate ia. Naʻá ne tala kia Pita: “Kuo u hufia koe, ke ʻoua naʻa mate ʻaupito hoʻo tui aʻau: pea ʻo ka ke ka toki foki mai, ke ke poupou ʻe koe ho ngaahi tokoua.” (Luke 22:32) Ko e ʻIsileli fakalaumālié kuo fokotuʻu lavameʻa ia ʻi he “kau aposetolo mo e kau palofita,” pea ko e ngaahi maka tefito ʻo e ʻā ʻo Selusalema foʻoú ʻoku ʻi ai ʻa e hingoa ʻo e kau ʻapositolo faitōnunga ʻe toko 12 ʻa e Lamí, ʻa Sīsū Kalaisi. Aʻu mai ki he ʻahó ni, ko e kau Kalisitiane paní fakataha mo honau ngaahi kaungā feohi kuo fakatapuí, ʻa e “fanga sipi kehe,” ʻoku nau lakalakaimonū ʻi he tuʻunga ko ha kautaha malangaʻi ʻo e Puleʻangá ʻi he malumalu ʻo e toʻukupu māfimafi ʻo e ʻOtuá mo e taki ʻa hono ʻAlo ʻofaʻangá.—Ef. 2:20; Sione 10:16; Fkh. 21:14.
Founga ʻo e Faiako ʻa Sīsuú
14, 15. ʻI he ngaahi founga fē naʻe faikehekehe ai ʻa e faiako ʻa Sīsuú mo e faiako ʻa e kau sikalaipé mo e kau Fālesí?
14 Naʻe anga-fēfē hono ngāueʻaki ʻe Sīsū ʻa e meʻa naʻá ne akó ʻi hono akoʻi ʻa hono kau muimuí? ʻI heʻetau fakahoa ʻa e faiako ʻa Sīsuú mo e faiako ʻa e kau taki lotu Siú, ʻoku tau sio lelei ai ki he māʻolunga ʻo e founga ʻa Sīsuú. Ko e kau sikalaipé mo e kau Fālesí naʻa nau ‘fakataeʻaongaʻi ʻa e lao ʻa e Otuá ʻaki ʻenau lau fakaeonoʻahó.’ ʻI hono kehé, ko e meʻa naʻe leaʻaki ʻe Sīsuú naʻe ʻikai tupu ia meiate ia; naʻá ne akoʻi maʻu pē ʻa e folofola pe pōpoaki ʻa e ʻOtuá. (Mt. 15:6; Sione 14:10) Ko e meʻa foki ia ʻoku fiemaʻu ke tau faí.
15 Naʻe ʻai ʻe ha toe meʻa tefito ʻe taha ʻa Sīsū ke ne kehe fakaʻaufuli ai mei he kau taki lotú. Naʻá ne pehē ʻo fekauʻaki mo e kau sikalaipé mo e kau Fālesí: “ʻIlonga ha meʻa ʻoku nau fekau kiate kimoutolu, mou fai ki ai mo tauhia; kae ʻoua naʻa mou faʻifaʻitaki ki heʻenau ngaue: he ʻoku nau lea kae ʻikai fai ki ai.” (Mt. 23:3) Naʻe fai ʻe Sīsū ʻa e meʻa naʻá ne akoʻí. Tau lāulea angé ki ha fakatātā ʻoku fakamoʻoniʻi ai ʻa e moʻoni ʻo e meʻá ni.
16. Ko e hā te ke pehē ai naʻe moʻui ʻa Sīsū ʻo fehoanaki mo ʻene ngaahi lea ʻoku hiki ʻi he Mātiu 6:19-21?
16 Naʻe ekinaki ʻa Sīsū ki heʻene kau ākongá ke nau “faʻoaki koloa . . . ʻi langi.” (Lau ʻa e Mātiu 6:19-21.) Naʻe moʻui ʻa Sīsū tonu ʻo fehoanaki mo e ekinaki ko iá? ʻIo, he naʻe lava ke ne lea moʻoni ʻo fekauʻaki mo ia tonu: “Ko e fanga fokisi ʻoku ai hanau tafu, mo e fanga manupuna ʻo e ʻatā hanau pununga; ka ko e Fanautama ʻa Tangata ʻoku ʻikai siʻa potu ke ʻolunga ki ai hono ʻulu.” (Luke 9:58) Naʻe moʻui ʻa Sīsū ʻi ha tuʻunga faingofua. Naʻá ne nōfoʻi tefito ki hono fanongonongo ʻa e ongoongo lelei ʻo e Puleʻangá, pea naʻá ne fakahāhā ʻa e ʻuhinga ʻo e ʻatā mei he ngaahi loto-moʻua ʻoku hoko ʻi he faʻoaki koloa ʻi māmaní. Naʻe fakahaaʻi ʻe Sīsū ʻa e lelei lahi ange ke faʻoaki koloa ʻi langí, “he ko e potu ia ʻoku ʻikai keina ai ʻe he ane mo e ʻumeʻumea, pea ʻoku ʻikai haea ʻe he kau kaihaʻa ʻo kaihaʻasi.” ʻOkú ke muimui ʻi he ekinaki ʻa Sīsū ke faʻoaki koloa ʻi langí?
ʻUlungāanga Naʻe ʻOfeina Ai ʻa Sīsū ʻe he Kakaí
17. Ko e hā ʻa e ngaahi ʻulungāanga naʻá ne ʻai ʻa Sīsū ke hoko ko ha ʻevangeliō makehé?
17 Ko e hā ʻa e ngaahi ʻulungāanga naʻá ne ʻai ʻa Sīsū ke hoko ko ha ʻevangeliō makehé? Ko e taha ko e anga ʻene fakafeangai ki he kakai naʻá ne tokoniʻí. Naʻe kau ʻi he ngaahi ʻulungāanga lelei ʻo Sihova naʻe tapua atu ʻia Sīsuú ʻa e anga-fakatōkilalo, ʻofa mo e manavaʻofa. Fakatokangaʻi ange ʻa e anga hono tohoakiʻi ʻe he ngaahi ʻulungāangá ni ʻa e tokolahi kia Sīsū.
18. Ko e hā ʻoku lava ai ke pehē naʻe anga-fakatōkilalo ʻa Sīsuú?
18 ʻI hono tali ʻa e ngāue ke haʻu ki he māmaní, naʻe hanga ai ʻe Sīsū ʻo “fakamasivesivaʻi ʻe ia ia, heʻene toʻo ʻa e anga ʻo e tamaioʻeiki, mo ʻene hoko ʻi he tatau ʻo e tangata.” (Fili. 2:7) Ko ha ngāue ia ʻo e anga-fakatōkilalo. ʻIkai ko ia pē, naʻe ʻikai ke siolalo ʻa Sīsū ki he kakaí. Naʻe ʻikai te ne maʻu ʻa e fakakaukau, ‘Naʻá ku haʻu tonu ē mei langi, ko ia ai ʻoku totonu ke mou fanongo kiate au.’ ʻI he ʻikai hangē ko e kau mīsaia loi naʻa nau vikiʻi pē kinautolú, naʻe ʻikai ke ʻalu holo ʻa Sīsū ia ʻo fakamafola ʻa hono ngafa ko e Mīsaia moʻoní. ʻI he taimi ʻe niʻihi naʻá ne tala ai ki he kakaí ke ʻoua te nau tala pe ko hai ia pea mo e meʻa naʻá ne faí. (Mt. 12:15-21) Naʻe loto ʻa Sīsū ke fai ʻe he kakaí ʻenau fili ke muimui ʻiate iá ʻo makatuʻunga ʻi he meʻa naʻa nau sio tonu ki aí. He fakalototoʻa lahi ē ki heʻene kau ākongá ko e ʻikai ʻamanekina ʻe honau ʻEikí ke nau hangē ko e kau ʻāngelo haohaoa ʻa ia naʻá ne feohi mo ia ʻi hēvaní!
19, 20. Naʻe anga-fēfē hono ueʻi ʻe he ʻofá mo e manavaʻofá ʻa Sīsū ke ne tokoniʻi ʻa e kakaí?
19 Naʻe toe fakahaaʻi ʻe Sīsū Kalaisi ʻa e ʻofá—ko ha ʻulungāanga tefito ia ʻa ʻene Tamai fakahēvaní. (1 Sione 4:8) Naʻe akoʻi ʻe Sīsū ʻa ʻene kau fanongó ʻi he ʻofa. Hangē ko ení, vakai angé ki heʻene ngaahi ongoʻi ki ha talavou pule ʻe taha. (Lau ʻa e Maake 10:17-22.) Ko Sīsuú “naʻa ne ʻofa ki ai” pea loto ke tokoniʻi ia, ka naʻe ʻikai ke tukuange ʻe he talavou pulé ʻa ʻene ngaahi koloá koeʻuhi ke ne hoko ai ko ha tokotaha muimui ʻo Kalaisi.
20 Naʻe kau ʻi he ngaahi ʻulungāanga fakatupu ʻofeina ʻo Sīsuú ʻa ʻene manavaʻofá. ʻI he hangē ko e faʻahinga taʻehaohaoa kotoa ʻo e tangatá, ko e faʻahinga naʻa nau tali ʻa ʻene akonakí naʻa nau mafasia ʻi he ngaahi palopalemá. ʻI he lāuʻilo ki hení, naʻe akoʻi kinautolu ʻe Sīsū ʻi he manavaʻofa mo e ongoʻi fakaʻofaʻia. Ke fakatātaaʻi: ʻI he taimi ʻe taha, naʻe fuʻu femoʻuekina ʻa Sīsū mo ʻene kau ʻapositoló ʻo ʻikai hanau taimi ke nau kai ai. Kae kehe, ko e hā ʻa e feangainga ʻa Sīsū ʻi heʻene sio ki ha fuʻu kakai naʻe fakatahataha maí? “Naʻe langa hono fatu ʻi he ʻofa kiate kinautolu, koeʻuhi ko ʻenau hange ha fanga sipi taʻe hanau tauhi: pea naʻa ne hanga ʻo ako kiate kinautolu ha ngāhi meʻa lahi.” (Mk. 6:34) Naʻe fakatokangaʻi ʻe Sīsū ʻa e tuʻunga fakaʻofa ʻo e kakai ʻi he feituʻu ko iá pea naʻe ʻikai toe tuku hano ivi ʻi hono akoʻi kinautolu mo hono fai ʻa e ngaahi mana ke ʻaonga kia kinautolu. Naʻe tohoakiʻi ʻa e niʻihi ʻe hono ngaahi ʻulungāanga leleí, ueʻi ʻe heʻene ngaahi leá, pea nau hoko ai ko ʻene kau ākonga.
21. Ko e hā te tau lāulea ki ai ʻi he kupu hoko maí?
21 ʻOku ʻi ai ʻa e meʻa lahi ange ʻoku lava ke tau ako fekauʻaki mo e ngāue fakafaifekau ʻa Sīsū ʻi he māmaní, ʻo hangē ko ia ʻe fakahaaʻi ʻi he kupu hoko maí. ʻI he toe ngaahi founga fē ʻe lava ke tau faʻifaʻitaki ai kia Sīsū Kalaisi, ko e Misinale lahi tahá?
ʻE Fēfē Haʻo Tali?
• Ko e hā ʻa e ako naʻe maʻu ʻe Sīsū ki muʻa ke ne haʻu ki māmaní?
• Naʻe anga-fēfē ʻa e māʻolunga ange ʻa e founga faiako ʻa Sīsuú ʻi he faiako ʻa e kau sikalaipé mo e kau Fālesí?
• Ko e hā ʻa e ngaahi ʻulungāanga naʻe ʻofeina ai ʻa Sīsū ʻe he kakaí?
[Fehuʻi ki he Ako]
[Fakatātā ʻi he peesi 15]
Naʻe anga-fēfē hono akoʻi ʻe Sīsū ʻa e fuʻu kakaí?