ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi Luké

ʻOKU mahinó ko e Kōsipeli ko ia ʻa Mātiú naʻe fakahangataha hono hikí maʻá e kau lautohi Siú, pea ko e Kōsipeli leva ʻa Maʻaké ki he faʻahinga ʻikai ko e Siú. Kae kehe, ko e Kōsipeli ia ʻa Luké naʻe hiki ia maʻá e kakai ʻo e ngaahi puleʻangá kotoa. Ko e tohi ko ia ʻa Luké ko ha fakamatala ia ʻo e moʻui mo e ngāue fakafaifekau ʻa Sīsuú, ʻa ia naʻe hiki ʻi he taʻu 56-58 T.S. nai.

Ko Luke ʻi heʻene vakai ko ha toketā tokanga mo fakamātoató, ʻokú ne fakatotolo ai “ki he mea kotoabe talu hano kāmataga” ʻo kāpui ha vahaʻa taimi ko e taʻu ʻe 35—mei he 3 K.M. ki he 33 T.S. (Luke 1:3, PM) Meimei ko e peseti ʻe 60 ʻo e fakamatala naʻe ngāueʻaki ʻe Luke ʻi heʻene Kōsipelí ʻoku laulōtaha.

MUʻAKI NGĀUE FAKAFAIFEKAU

(Luke 1:1–9:62)

Hili ko ia hono ʻomai ʻo e ngaahi fakaikiiki fekauʻaki mo hono fāʻeleʻi ʻo Sione Papitaiso pea mo Sīsuú, ʻoku tala mai ai ʻe Luke kiate kitautolu naʻe kamata ʻa e ngāue fakafaifekau ʻa Sioné ʻi he 15 taʻu ʻo e pule ʻa Taipiliō Sisá, ʻa ia ko e faʻahitaʻu failau ia ʻo e 29 T.S. (Luke 3:1, 2) Naʻe papitaiso ai ʻa Sīsū ʻe Sione ʻi he faʻahitaʻu fakatōlau pē ʻo e taʻu ko iá. (Luke 3:21, 22) ʻI he 30 T.S., ‘ʻoku foki ʻa Sīsū ki Kāleli pea ʻokú ne faiako ʻi honau ngaahi falelotú.’—Luke 4:14, 15.

Ko e kamata leva eni e ʻuluaki fononga fakaemalanga ʻa Sīsū ki Kālelí. ʻOkú ne pehē ai ki he matangá: “Kuo pau ke u ʻave ʻa e ongoongolelei ki he ngaahi kolo kehe foki, ʻo tala ʻa e Puleʻanga ʻo e ʻOtua.” (Luke 4:43) Naʻá ne ʻalu ai fakataha mo Saimone ko e tangata toutaí mo ha niʻihi. ʻOkú ne pehē ange: “Mei he taimi ni te ke pō tangata.” (Luke 5:1-11; Mt. 4:18, 19) Naʻe ʻia Sīsū ʻa e kau ʻapositolo ʻe toko 12 lolotonga ʻene fononga fakaemalanga hono ua ʻi Kālelí. (Luke 8:1) ʻI he fononga hono tolú, naʻá ne tuku atu ai ʻa e toko 12 ke nau “malanga aki a e buleaga oe Otua, mo fakamoui ae mahaki.”—Luke 9:1, 2, PM.

Tali ki he Ngaahi Fehuʻi Fakatohitapú:

1:35—Naʻe ʻi ai nai ha kaunga ʻo e fua ʻo e fakatupu ʻi he manava ʻo Melé ki heʻene feitamá? Ke hoko ʻa e tama ʻa Melé ko e hako moʻoni ia ʻo hono tupuʻangá ʻa ʻĒpalahame, Siuta, pea mo Tēvita, hangē ko ia naʻe talaʻofa ʻe he ʻOtuá, ʻoku ʻi ai leva ʻa e kaunga ʻo e fua ʻo e fakatupu ʻi hono manavá ki heʻene feitamá. (Sen. 22:15, 18; 49:10; 2 Sam. 7:8, 16) Ko ia ai, ko e laumālie māʻoniʻoni ʻo Sihová naʻe ngāueʻaki ki hono hiki hifo ʻo e moʻui haohaoa ʻa e ʻAlo ʻo e ʻOtuá pea fakatupunga ai hono feitamaʻí. (Mt. 1:18) ʻI he meʻá ni, naʻe ʻatā ai ʻa e fua ʻo e fakatupu ʻi he manava ʻo Melé mei ha taʻehaohaoa pea mei he kamata ʻo ʻene feitamá naʻe maluʻi ai ʻa e kiʻi tama ne tupu ʻi manavá mei ha faʻahinga meʻa pē ʻoku fakatupu maumau.

1:62—Naʻe hoko ʻa Sākalaia ʻo noa pea mo tuli? ʻIkai. Ko ʻene leá pē naʻe uesiá. Naʻe “kamo” ʻa e niʻihi ʻo ʻeke pe ko e hā ʻoku loto ke uiʻaki ʻa e tamá ka naʻe ʻikai ko hono ʻuhinga ʻenau kamó naʻe tuli ʻa Sākalaia. Naʻe hangehangē pē naʻá ne ongoʻí ʻa e meʻa naʻe leaʻaki ʻe hono uaifí fekauʻaki mo e hingoa ko ia ʻe uiʻaki hona fohá. Mahalo naʻe ʻi ai ha niʻihi naʻa nau fakaʻekeʻeke ʻa Sākalaia fekauʻaki mo e meʻá ni ʻo ngāueʻaki ha kamo pe ko ha ngaue ʻo e sinó. Ko e moʻoni ko ʻene leá pē naʻe fiemaʻu ke fakaleleiʻí ʻoku fakahaaʻi ai naʻe lelei pē ʻa e fanongo ia ʻa Sākalaiá.—Luke 1:13, 18-20, 60-64.

2:1, 2—ʻOku anga-fēfē tokoni ʻa e fakamatala ki he “fuofua fai ʻa e tohi kakai” ki hono fakapapauʻi e taimi ko ia ʻo e ʻaloʻi ʻo Sīsuú? ʻI he malumalu e pule ʻa Sisa ʻAkositó, naʻe ʻikai ke taha pē ʻa e tohi kakai naʻe faí—ko e ʻuluakí ʻi he 2 K.M. ʻi hono fakahoko ʻo e Taniela 11:20 pea ko e uá leva ʻi he 6 pe 7 T.S. (Ng. 5:37) Naʻe kōvana ʻa Kuliniasi ʻi Sīlia ʻi he taimi ko eni ʻo e ongo lēsisitá, ʻa ia ʻi heʻene mahino mei hení naʻe tuʻo ua ʻa ʻene ʻi he tuʻunga kōvaná. ʻI he fakamatala leva ʻa Luke ki he ʻuluaki tohi kakaí ʻoku fokotuʻu ai ʻa e ʻaho ʻo e ʻaloʻi ʻo Sīsuú ʻi he 2 K.M.

 2:35—Naʻe anga-fēfē ʻa e tuiʻi ʻaki ha ‘heletā’ ʻa Melé? ʻOku ʻuhinga eni ki he ongoʻi faingataʻaʻia ko ia ʻa Mele ʻi heʻene vakai atu ki he tokolahi ʻo e kakaí ʻoku nau talitekeʻi ʻa Sīsū ko e Mīsaiá pea mo e mamahi ʻokú ne ongoʻi ʻi heʻene mate fakamamahí.—Sione 19:25.

9:27, 28—Ko e hā e ʻuhinga naʻe pehē ai ʻe Luke ko e fakasinokehé naʻe fai ia ʻi he ‘ʻaho ʻe valu’ hili ʻa e palōmesi ʻa Sīsū ki heʻene kau ākongá ʻe ʻi ai ʻa e niʻihi ʻo kinautolu ʻe “ʻikai te nau momoʻi lave ki he mate” kae ʻoua ke nau mamata ki heʻene hoko mai ʻi he malumalu hono puleʻangá, kae pehē ʻe Mātiu ia mo Maʻake ko e “hili ʻa e ʻaho ʻe ono”? (Mt. 17:1; Mk. 9:1, 2) Hangehangē naʻe toki fakahū atu ʻe Luke ia ha ongo ʻaho ʻe ua—ko e ʻaho naʻe fai ai ʻa e palōmesí mo e ʻaho naʻe fakahoko aí.

9:49, 50—Ko e hā e ʻuhinga naʻe ʻikai taʻofi ai ʻe Sīsū ha tangata mei heʻene kapusi ʻa e kau tēvoló, neongo naʻe ʻikai muimui ʻiate ia ʻa e tangatá? Naʻe ʻikai taʻofi ʻe Sīsū ʻa e tangatá ni koeʻuhí ne teʻeki ke fokotuʻu ʻa e fakatahaʻanga Kalisitiané ia ʻi he taimi ko iá. Ko ia ai, naʻe ʻikai ko ha fiemaʻu ia ki he tangatá ke ne ʻalu fakataha mo Sīsū kae toki malava ke ngāueʻi ʻene tuí ki he hingoa ʻo Sīsuú pea mo kapusi tēvolo foki.—Mk. 9:38-40.

Ngaahi Lēsoni kia Kitautolu:

1:32, 33; 2:19, 51. Naʻe tauhi maʻu ʻi he loto ʻo Melé ʻa e ngaahi meʻa naʻe hoko mo e ngaahi lea ʻa ia naʻe fakahoko ai e ngaahi kikité. ʻOku tau tauhi maʻu ʻi hotau lotó ʻa e meʻa naʻe muʻaki tala ʻe Sīsū fekauʻaki mo e “fakaʻosi ʻo e kuonga,” ʻo fakafehoanaki ʻene leá ki he meʻa ʻoku lolotonga hoko ní?—Mt. 24:3.

2:37. ʻOku tau ako mei he faʻifaʻitakiʻanga ʻa ʻAná ke tau lotu maʻu pē kia Sihova, “kītaki ʻi he lotu,” ʻo ʻoua naʻa siʻaki “ʻetau ngaahi fakataha” ʻi he ngaahi fakataha faka-Kalisitiané.—Loma 12:12; Hep. 10:24, 25.

2:41-50. Naʻe fakamuʻomuʻa ʻe Siosefa ʻa e ngaahi meʻa fakalaumālié ʻi heʻene moʻuí pea toe tokanga foki ki he ngaahi lelei fakamatelie mo fakalaumālie ʻa hono fāmilí. ʻI he tuʻungá ni, ʻokú ne tuku ai ha faʻifaʻitakiʻanga lelei ki he ngaahi ʻulu ʻo e fāmilí.

4:4. ʻAi ke tau fakakaukau maʻu pē ki ha ngaahi meʻa fakalaumālié ʻi he ʻaho kotoa.

6:40. Kuo pau ke tā ʻe ha tokotaha faiako ʻo e Folofola ʻa e ʻOtuá ha sīpinga lelei ki heʻene kau akó. ʻOku totonu ke tatau hono ngutú mo hono tuhú.

8:15. Ke ‘pukenimaʻi [ʻa e folofolá] pea fua he kītakí’ ʻoku totonu ke tau mahinoʻi, mahuʻingaʻia pea mo ngāueʻaki ʻa e Folofola ʻa e ʻOtuá. ʻI he taimi ʻokú ke lau ai ʻa e Tohi Tapú pehē ki he ngaahi tohi Fakatohitapú ʻoku totonu ke ke fakalaulauloto ki ai fakataha mo e lotu.

NGĀUE FAKAFAIFEKAU KI MUI ʻA SĪSŪ

(Luke 10:1–24:53)

Naʻe fekau atu ʻe Sīsū ha toko 70 kehe ke nau muʻomuʻa ʻiate ia ki he ngaahi kolo mo e ngaahi feituʻu ko ia ʻi Siuteá. (Luke 10:1) Naʻá ne fononga atu “ʻi he ngaahi kolo, mo e ngaahi vilisi, ʻo ne fai ako ai.”—Luke 13:22.

ʻI ha ʻaho ʻe nima ki muʻa ʻi he Pāsova ʻo e 33 T.S., ʻoku heka atu ai ʻa Sīsū ʻi ha kiʻi ʻasi ki Selusalema. Kuo hoko ʻa e taimi ki hono fakahoko ko ia ʻo ʻene ngaahi lea ki heʻene kau ākongá: “Kuo pau ki he Fanautama ʻa Tangata ke lahi hono fakamamahiʻi; pea ke fakataleʻi ia ʻe he kau mātuʻa mo e houʻeiki taulaʻeiki, mo e kau sikalaipe; pea ke tamateʻi; pea ʻi hono ʻaho tolu ke ne toetuʻu.”—Luke 9:22, 44.

Tali ki he Ngaahi Fehuʻi Fakatohitapú:

10:18—Naʻe ʻuhinga ki he hā ʻa e pehē ko ia ʻa Sīsū ki heʻene kau ākonga ʻe toko 70: “Ne u toutou sio ki he to ʻa Setani mei he langi, ʻo hange  ha ʻuhila”? Naʻe ʻikai ke pehē ʻe Sīsū ia kuo ʻosi kapusi hifo ʻa Sētane mei hēvani. Naʻe toki fakahoko iá fuoloa siʻi pē hili hono fokotuʻu ʻo Kalaisi ko e Tuʻi fakahēvani ʻi he 1914. (Fkh. 12:1-10) Neongo heʻikai malava ke tau fuʻu fakapapauʻi, ka ko hono talanoaʻi ha meʻa ʻe toki hoko ʻi he kahaʻú ʻo hangē pē naʻe ʻosi hokó, ʻoku hā mahino naʻe fakamamafaʻi ai ʻe Sīsū ʻe papau ʻene hokó.

14:26—ʻI he ʻuhinga fē ke “fehiʻa” ai ʻa e kau muimui ʻo Kalaisí ki honau kāingá? ʻI he Tohi Tapú, ko e “fehiʻa” ʻoku lava ke ʻuhinga ia ki ha ʻofa fakangatangata pē ki ha tokotaha pe ko ha meʻa. (Sen. 29:30, 31) ʻOku fiemaʻu ke “fehiʻa” ʻa e kau Kalisitiané ki honau kāingá ʻo ʻuhinga iá ko ʻenau ʻofa kia Sīsuú ʻe lahi ange ia ʻi heʻenau ʻofa kia kinautolú.—Mt. 10:37.

17:34-37—Ko hai ʻa e “fanga [ʻīkale],” pea ko e hā ʻa e “ʻangaʻanga” ʻoku nau fakatahataha ki aí? Ko e faʻahinga ko ia ʻoku “ʻave,” pe fakahaofí, ʻoku fakatatau ia ki he fanga ʻīkale sio mamaʻo. Ko e “ʻangaʻanga” ʻoku nau fakatahataha ki aí ko e Kalaisi moʻoní ia ʻi heʻene ʻi ai taʻehāmaí pea pehē ki he meʻakai fakalaumālie ʻoku tokonaki mai ʻe Sihova maʻa kinautolú.—Mt. 24:28.

22:44—Ko e hā naʻe moʻua ai ʻa Sīsū ʻi he mamahi lahí? ʻOku lahi hono ngaahi ʻuhingá. Naʻe tokanga ʻa Sīsū fekauʻaki mo e uesia ko ia ʻe hoko ki he ʻOtua ko Sihová pehē ki hono Huafá foki ʻi heʻene pekia ko ia ʻo hangē ko ha tokotaha faihiá. ʻIkai ngata aí, naʻe ʻosi ʻiloʻi lelei pē ʻe Sīsū ko e ʻene moʻui taʻengatá mo e kahaʻu ʻo e matakali fakalūkufua ʻo e faʻahinga ʻo e tangatá ʻoku fakafalala ia ʻi heʻene nofoʻaki anga-tonú.

23:44—Naʻe fakatupunga nai ʻe ha mate fakakonga ʻa e laʻaá ʻa e fakapoʻuli houa ʻe tolú? ʻIkai. ʻOku toki hoko pē ʻa e mate fakakonga ia ʻa e laʻaá ʻi he taimi ʻo e māhina foʻoú, ʻo ʻikai ko e taimi ʻoku kātoa ai ʻa e māhiná ʻo hangē ko e meʻa ko ia naʻe hoko ʻi he taimi ʻo e Pāsová. Ko e fakapoʻuli ko ia naʻe hoko ʻi he ʻaho naʻe pekia ai ʻa Sīsuú ko ha mana ia mei he ʻOtuá.

Ngaahi Lēsoni kia Kitautolu:

11:1-4. ʻI hono fakafehoanaki ʻo e ngaahi fakahinohino ko ení pea mo e fakalea ko ia ʻo kiʻi kehe ʻo e lotu ʻa e ʻEikí, ʻa ia naʻe fai ʻi he Malanga ʻi he Moʻungá ʻi he māhina nai ʻe 18 ki muʻa aí, ʻokú ne fakahaaʻi mahino mai kiate kitautolu ʻoku totonu ke ʻoua te tau toutou ngāueʻaki maʻu pē ʻa e ngaahi foʻi lea tatau ʻi heʻetau ngaahi lotú.—Mt. 6:9-13.

11:5, 13. ʻOku totonu ke tau kīvoi foki ʻi he taimi ʻoku tau lotu aí, neongo ʻa e finangalo lelei ʻa Sihova ke tali ʻetau ngaahi lotú.—1 Sione 5:14.

11:27, 28. ʻOku maʻu ʻa e fiefia moʻoní ʻi he faitōnunga ko ia ʻi hono fai ʻo e finangalo ʻo e ʻOtuá ka ʻoku ʻikai maʻu ia mei he ngaahi vahaʻangatae fakafāmilí pe mei he tuʻumālie fakamatelié.

11:41. Ko ʻetau meʻaʻofa ko ia ko e faimeesi ʻoku totonu ke fakatuʻunga ia mei ha loto-ʻofa mo e loto-lelei.

12:47, 48. ʻOku ngutuhua ange ke tukuakiʻi ha taha ʻoku ʻikai ke tokanga ki hono ngaahi fatongia lahi ange ʻokú ne lolotonga maʻú ʻi ha taha ʻoku ʻikai ke ne ʻilo pe mahinoʻi lelei hono ngaahi fatongiá.

14:28, 29. ʻOku tau fakapotopoto ʻi heʻetau moʻui pē ʻo fakatatau ki he meʻa ʻoku tau maʻú.

22:36-38. Naʻe ʻikai ke tala ʻe Sīsū ki heʻene kau ākongá ke nau toʻo ha meʻatau ko ha haoʻanga pe maluʻi fakaekita. ʻI hono kehé, ko e heletā naʻa nau maʻu ʻi he pō naʻe lavakiʻi ai iá, naʻe malava ai ke akoʻi ange ʻe Sīsū ha lēsoni mahuʻinga kiate kinautolu: “ʻIlonga kinautolu ʻoku ala ki he heletā te nau mate heletā.”—Mt. 26:52.

[Fakatātā ʻi he peesi 31]

Naʻe tuku ʻe Siosefa ha faʻifaʻitakiʻanga lelei ʻi heʻene ʻulu ko ia ʻi he fāmilí

[Fakatātā ʻi he peesi 32]

Naʻe tohi ʻe Luke ʻa e fakamatala kakato ʻo e moʻui mo e ngāue fakafaifekau ʻa Sīsuú